← претходни дан | Минеј — Октобар | следећи дан →
19 октября: Святого пророка Иоиля. Святого мученика Уара. Преподобного Иоанна Рыльского
Мѣ́сѧца тогѡ́же въ ѳ҃і-й де́нь.
Ст҃а́гѡ прⷪ҇ро́ка і҆ѡ́илѧ:
И҆ ст҃а́гѡ мч҃ника ᲂу҆а́ра:
И҆ прпⷣбнагѡ ѻ҆тца̀ на́шегѡ і҆ѡа́нна ры́льскагѡ.
Слꙋ́жба є҆гѡ̀ пи́сана по се́й слꙋ́жбѣ.
Стїхи̑ры прⷪ҇ро́ка, гла́съ и҃. Подо́бенъ: Ѽ пресла́внагѡ чꙋдесѐ!
Бжⷭ҇твенный дх҃ъ и҆злїѧ́сѧ, ꙳ ꙗ҆́кѡ честны́й і҆ѡ́иль проро́чествꙋѧ сказа̀, ꙳ ѿ негѡ̀ дви́жимь, ꙳ на ны̀ вѣ́рꙋющыѧ, ꙳ и҆ та́йнамъ бжⷭ҇твєннымъ ꙗ҆вле́нїе ѿкрыва́етъ, ꙳ и҆ прⷪ҇ро́чествꙋютъ, ꙳ и҆̀же дѣ́йство є҆гѡ̀ прїе́мшїи, ꙳ и҆ бжⷭ҇твенною заре́ю просвѣща́еми, ꙳ и҆ бжⷭ҇твенною бл҃года́тїю.
Бг҃овѣща́нїѧ и҆спо́лненъ ꙳ ди́вный і҆ѡ́иль, ꙳ ꙗ҆́кѡ и҆сто́чникъ и҆схо́дитъ дꙋ́шы напаѧ́ющїй ꙳ ѿ до́мꙋ твоегѡ̀, влⷣко, ꙳ и҆ сла́дость на́мъ и҆ска́па, ꙳ помышлє́нїѧ ѡ҆слажда́ющꙋю, ꙳ ве́сь высо́къ бы́въ дꙋ́хомъ, ꙳ добродѣ́телїю возноси́мь ꙳ къ бжⷭ҇твеннѣй высотѣ̀.
Прⷪ҇ро́ческимъ дерзнове́нїемъ твои́мъ, ꙳ и҆ разꙋ́мнымъ къ бг҃ꙋ ꙳ і҆ѡ́иле, приближе́нїемъ, ꙳ и҆́мже нбⷭ҇наѧ зри́ши видѣ̑нїѧ, ꙳ ѡ҆ на́съ того̀ ᲂу҆ми́лостиви, ꙳ соверша́ющихъ вѣ́рою па́мѧть твою̀, ꙳ разрѣше́нїѧ просѧ̀ прегрѣше́нїй, сла́вне, ꙳ и҆ прича́стїѧ бжⷭ҇твенныхъ наслажде́нїй, ꙳ и҆ ве́лїѧ ми́лости.
И҆́ны стїхи̑ры, мꙋ́ченика, гла́съ ѕ҃. Подо́бенъ: Всѐ ѿло́жше:
Страда̑нїѧ ви́дѣвъ ꙳ добропобѣ́дныхъ мꙋ́ченикѡвъ, ꙳ дерзнове́нїѧ бжⷭ҇твеннагѡ и҆спо́лненъ бы́въ, ꙳ вше́лъ є҆сѝ на три́знише, ꙳ и҆ хрⷭ҇та̀, ᲂу҆а́ре, на́съ ра́ди чл҃вѣ́ка бы́вша, ꙳ проповѣ́далъ є҆сѝ, ꙳ не ᲂу҆страши́всѧ сме́рти, ꙳ нижѐ предлежа́щихъ мꙋче́нїй. ꙳ тѣ́мъ ᲂу҆ѧзвлѧ́емь, ꙳ и҆ неми́лостивнѡ раздроблѧ́емь, ꙳ ра́довалсѧ є҆сѝ соверше́ннымъ ра́зꙋмомъ, ꙳ смотрѧ́ѧ, мꙋ́дре, пребыва́ющее добросла́вїе, ꙳ бг҃а возлюби́вшымъ.
Плѡ́ти съ кровьмѝ ꙳ па́дающыѧ ви́дѧ, ꙳ и҆ ꙗ҆́кѡ и҆но́мꙋ стра́ждꙋщꙋ, ꙳ страда́льче, пребыва́лъ є҆сѝ до́блественнѣйше: ꙳ привѧ́занъ бо къ дре́вꙋ, ꙳ терза̑нїѧ терпѣ́лъ є҆сѝ беззако́нныхъ пожда́ннѣйше. ꙳ бг҃ꙋ же въ рꙋ́ки дꙋ́хъ тво́й пре́далъ є҆сѝ, ꙳ ᲂу҆жаси́въ ви́дѧщыѧ тѧ̀, ꙳ непрекло́нными противлє́нїи. тѣ́мъ тѧ̀ почита́емъ, ꙳ вельмѝ мꙋ́жествовавша, мꙋ́дре, и҆ низложи́вша мꙋчи́телѧ, ꙳ ᲂу҆а́ре, болѣ́зньми твои́ми.
Помазꙋ́ющи мѵ́ры тѧ̀, ꙳ чꙋ́днаѧ клеѡпа́тра, ꙳ подъ зе́млю положѝ: ꙳ и҆ хра́мъ тебѣ̀ ст҃ы́й возсозда̀, ꙳ пра́здникъ творѧ́щи, ди́вне ᲂу҆а́ре, ꙳ и҆ вѣ́рнѡ тѧ̀ молѧ́щи. ꙳ є҆ѧ́же дѣ́тище ᲂу҆́мномꙋ во́инствꙋ причета́лъ є҆сѝ, ꙳ и҆ сла́вою ᲂу҆добри́лъ є҆сѝ, ꙳ и҆ ликѡ́мъ ст҃ы́хъ сочета́лъ є҆сѝ. ꙳ є҆гѡ́же ча́сти сподо́би ны̀, ꙳ твоѐ соверша́ющыѧ ꙳ благоче́стнѡ торжество̀, ꙳ мч҃ниче досточꙋ́дне.
Сла́ва, и҆ ны́нѣ, бг҃оро́диченъ. Подо́бенъ: то́йже:
Ра́дꙋйсѧ, ко́рене ро́сный, ꙳ ра́дꙋйсѧ, же́зле а҆арѡ́новъ, ꙳ прозѧбы́й цвѣ́тъ неꙋвѧда́ющїй, и҆ присноживы́й: ꙳ благопло́дный раю̀, ꙳ жи́зни дре́во, ꙳ и҆зъ і҆ессе́ева ко́рене, чⷭ҇таѧ, ꙳ просїѧ́вши, ѻ҆трокови́це, ꙳ и҆ земны́хъ пита́ющи хлѣ́бомъ разꙋ́мнымъ. ꙳ ра́дꙋйсѧ, багрѧни́це всечестна́ѧ, ꙳ всѣ́хъ цр҃ѧ̀ бг҃оневѣ́сто, ꙳ вѣ́нче всесвѣ́тлый, ꙳ а҆рхїере́євъ благолѣ́пїе, ꙳ ра́дꙋйсѧ, є҆ди́на пречⷭ҇таѧ.
Крⷭ҇тобг҃оро́диченъ. подо́бенъ то́йже:
А҆́гнца своего̀, ꙳ а҆́гница нескве́рнаѧ дре́вле, ꙳ и҆ непоро́чнаѧ влⷣчца, ꙳ на дре́вѣ крⷭ҇тнѣмъ ꙗ҆́кѡ ᲂу҆зрѣ̀, ꙳ мт҃рски восклица́ше, ꙳ и҆ дивѧ́щисѧ вопїѧ́ше: ча́до сладча́йшее, что̀ зрѣ́нїе сїѐ но́вое и҆ пресла́вное; ꙳ ка́кѡ со́нмъ безблагода́тный ꙳ сꙋди́щꙋ пїла́товꙋ предаде́ тѧ, ꙳ и҆ ѡ҆сꙋжда́етъ на сме́рть живота̀ всѧ́ческихъ; ꙳ но воспѣва́ю твоѐ неизрече́нное, сло́ве, снисхожде́нїе.
Тропа́рь, гла́съ д҃:
Мꙋ́ченикъ тво́й, гдⷭ҇и, ᲂу҆а́ръ, во страда́нїи свое́мъ вѣне́цъ прїѧ́тъ нетлѣ́нный ѿ тебє̀ бг҃а на́шегѡ: и҆мѣ́ѧй бо крѣ́пость твою̀, мꙋчи́телей низложѝ, сокрꙋшѝ и҆ де́мѡнѡвъ немѡщны́ѧ де́рзѡсти. тогѡ̀ моли́твами спасѝ дꙋ́шы на́шѧ.
Сла́ва, и҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.
На ᲂу҆́трени канѡ́нъ ѻ҆ктѡ́иха є҆ди́нъ, и҆ ст҃ы́хъ два̀.
Канѡ́нъ прⷪ҇ро́ка, є҆гѡ́же краегране́сїе:
Прⷪ҇ро́чествѡмъ і҆ѡ́илѧ прⷪ҇ро́ка дивлю́сѧ. Творе́нїе ѳеофа́ново.
Гла́съ в҃. Пѣ́снь а҃. І҆рмо́съ:
Грѧди́те, лю́дїе, пои́мъ пѣ́снь хрⷭ҇тꙋ̀ бг҃ꙋ, раздѣ́льшемꙋ мо́ре, и҆ наста́вльшемꙋ лю́ди, ꙗ҆̀же и҆зведѐ и҆з̾ рабо́ты є҆гѵ́петскїѧ, ꙗ҆́кѡ просла́висѧ.
Ли́къ на́мъ прⷪ҇ро́ческїй свесели́тсѧ, похвалѧ́емꙋ тебѣ̀ небомꙋ́дреннꙋ, і҆ѡ́иле бг҃огла́се: съ ни́миже спасти́сѧ на́мъ молѝ, блаже́нне.
Глаго́лы бж҃їѧ предвозвѣща́ѧ, бг҃одохнове́нне, лю́тый проре́клъ є҆сѝ гнѣ́въ и҆ пра́ведный, и҆́же ѿ нече́стїѧ прибы́вшїй лю́демъ твои́мъ сꙋемꙋ́дрєннымъ.
Чꙋ́дное и҆ свѣтоно́сное дх҃а, и҆ животворѧ́щее вдохнове́нїе тебѐ присѣнѝ, и҆ бꙋ́дꙋщихъ зна́нїе вдохнѐ, прⷪ҇ро́че блаже́ннѣйше.
Бг҃оро́диченъ:
Тѧ̀ ски́нїѧ свидѣ́тельства прописа̀, многови́днѡ ѡ҆бразꙋ́ема, ꙗ҆влѧ́ющи ѿ тебє̀ вопло́щшагосѧ неизмѣ́ннѡ, бг҃ома́ти пречⷭ҇таѧ влⷣчце.
И҆́нъ канѡ́нъ мꙋ́ченика, є҆гѡ́же краегране́сїе:
Стра̑сти похвалѧ́ю ᲂу҆а́ра, сла́вꙋ вели́кꙋю. І҆ѡ́сифово.
Гла́съ ѕ҃. Пѣ́снь а҃. І҆рмо́съ:
Ꙗ҆́кѡ по сꙋ́хꙋ пѣшеше́ствовавъ і҆и҃ль, по бе́зднѣ стопа́ми, гони́телѧ фараѡ́на ви́дѧ потоплѧ́ема, бг҃ꙋ побѣ́днꙋю пѣ́снь, пои́мъ, вопїѧ́ше.
Ꙗ҆ви́лсѧ є҆сѝ на высотѣ̀ хрⷭ҇то́вы цр҃кве, ᲂу҆а́ре, ꙗ҆́коже со́лнце свѣ́тлое, блиста́ньми просвѣща́ѧ твои́хъ боре́нїй, блаже́нне, земна̑ѧ и҆сполнє́нїѧ.
Бжⷭ҇твенныѧ любвѐ, всебл҃же́нне, ѡ҆б̾ѧ́тъ сла́дкимъ раче́нїемъ, ѿве́рглсѧ є҆сѝ себє̀, и҆ ко всѧ́кой мꙋ́цѣ пло́тстѣй ᲂу҆стреми́лсѧ є҆сѝ, крѣ́пкѡ подвиза́всѧ.
Смы́сленнѡ бжⷭ҇твенныхъ подви̑жникъ ю҆́зами свѧза́въ себѐ, страстоте́рпче, и҆ лє́стныѧ разори́лъ є҆сѝ ᲂу҆́зы, крѣ́пкимъ терпѣ́нїемъ мно́гихъ мꙋ́къ.
Бг҃оро́диченъ:
Пресꙋ́щественное сло́во во твое́мъ чре́вѣ па́че сло́ва всели́сѧ, и҆ роди́всѧ бг҃олѣ́пнѡ, мꙋ́ченичєскїѧ ли́ки, чⷭ҇таѧ, приведѐ: съ ни́миже пѣсносло́вимъ тѧ̀.
Пѣ́снь г҃. І҆рмо́съ:
Оу҆твердѝ на́съ въ тебѣ̀, гдⷭ҇и, дре́вомъ ᲂу҆мерщве́й грѣ́хъ, стра́хъ тво́й всадѝ въ сердца̀ на́съ пою́щихъ тѧ̀.
Оу҆чи́ми твои́ми мꙋ́дрыми догма́ты, по́стъ, прⷪ҇ро́че, и҆ слꙋже́нїе благоче́стнѡ проповѣ́дꙋемъ, въ до́мъ гдⷭ҇ень ходѧ́ще.
Твои̑мъ ᲂу҆че́нїємъ послѣ́дꙋюще, ѿ всегѡ̀ се́рдца и҆ помышле́нїѧ, пла́чемъ же, и҆ моли́твами бг҃а взыскꙋ́емъ, достохва́льне.
И҆з̾ѧви́въ на́мъ всеще́драгѡ влⷣки, прⷪ҇ро́че, долготерпѣ́нїе, бжⷭ҇твеннꙋю же благосты́ню и҆з̾ѧсни́лъ є҆сѝ тогѡ̀, и҆ благода́ть.
Бг҃оро́диченъ:
Зачала̀ є҆сѝ пречⷭ҇таѧ, бг҃а, и҆ родила̀ є҆сѝ сло́во неизрече́ннѡ вопло́щшеесѧ, во прⷪ҇ро́цѣхъ глаго́лавшее, и҆ и҆спо́лнившее тѣ́хъ проповѣ̑данїѧ.
И҆́нъ. І҆рмо́съ:
Нѣ́сть свѧ́тъ, ꙗ҆́коже ты̀, гдⷭ҇и бж҃е мо́й, вознесы́й ро́гъ вѣ́рныхъ твои́хъ, бл҃же, и҆ ᲂу҆тверди́вый на́съ на ка́мени и҆сповѣ́данїѧ твоегѡ̀.
Вше́лъ є҆сѝ ра́зꙋмомъ крѣ́пкимъ въ мꙋ́жествєнныѧ по́двиги, ᲂу҆тверди́всѧ наде́ждами бꙋ́дꙋщихъ благи́хъ, и҆ мч҃никѡвъ хрⷭ҇то́выхъ всемꙋ́дрыми, бл҃же́нне, поꙋче́нїи.
Во́инство ст҃ы́хъ страстоте́рпєцъ, стра́ждꙋщихъ зако́ннѣ зрѧ̀, ѻ҆́нѣхъ показа́лъ є҆сѝ мꙋ́жескꙋю крѣ́пость, примѣша́ѧсѧ многоѻбра̑знымъ, ᲂу҆а́ре, мꙋ́камъ.
Въ полцѣ̀ свѧще́ннѣмъ, ᲂу҆а́ре, ꙗ҆́кѡ до́блїй во́инъ ѡ҆брѣ́лсѧ є҆сѝ, и҆ ссѣ́къ мно́жества мꙋ́жества мече́мъ, мꙋ́дре, ра́тнымъ, побѣ́дами сла́вимь.
Бг҃оро́диченъ:
Дв҃о мт҃и бж҃їѧ, моегѡ̀ ᲂу҆ны́нїѧ глꙋбоча́йшꙋю тмꙋ̀, и҆ ѻ҆́блаки страсте́й, просвѣще́нїемъ є҆́же въ тебѣ̀, молю́ тѧ, бл҃года́ти, ѿженѝ.
Сѣда́ленъ, прⷪ҇ро́ка, гла́съ в҃. Подо́бенъ: Страстоте́рпцы гдⷭ҇ни.
Бг҃оглаго́ливе прⷪ҇ро́че, вдохнове́нїемъ и҆спо́лнивсѧ ᲂу҆тѣ́шителевымъ, и҆з̾ѧсни́лъ є҆сѝ въ послѣ̑днѧѧ времена̀ бы́вшее ꙗ҆зы́кѡмъ ѡ҆сїѧ́нїе. сегѡ̀ ра́ди ны́нѣ благоче́стнѡ тѧ̀ похвалѧ́емъ, и҆ твою̀ па́мѧть соверша́юще вопїе́мъ тѝ: хрⷭ҇та̀ бг҃а молѝ ѡ҆ дꙋша́хъ на́шихъ.
Сла́ва, мꙋ́ченика, гла́съ а҃. Подо́бенъ: Гро́бъ тво́й:
Стра̑сти честны́хъ ви́дѣвъ мꙋ́ченикѡвъ, и҆ тѣ́хъ лобза́въ ᲂу҆́зы любо́вїю, на высотꙋ̀ восте́клъ є҆сѝ свидѣ́тельства, всечꙋ́дне: на дре́вѣ бо повѣ́шенъ, ра̑ны претерпѣ́лъ є҆сѝ, до́ндеже въ рꙋ́ки гдⷭ҇ни дꙋ́ха пре́далъ є҆сѝ.
И҆ ны́нѣ, бг҃оро́диченъ:
Оу҆пова́нїе хрⷭ҇тїа́нъ, прест҃а́ѧ дв҃о, є҆го́же родила̀ є҆сѝ бг҃а, па́че ᲂу҆ма̀ и҆ сло́ва, непреста́ннѡ молѝ ѡ҆ воспѣва́ющихъ тѧ̀, пода́ти ѡ҆ставле́нїе грѣхѡ́въ на́шихъ всѣ́хъ, и҆ и҆справле́нїе житїѧ̀, вѣ́рою и҆ любо́вїю при́снѡ сла́вѧщымъ тѧ̀.
Крⷭ҇тобг҃оро́диченъ:
Зрѧ́щи тѧ̀, хрⷭ҇тѐ, всенепоро́чнаѧ мт҃и, ме́ртва на крⷭ҇тѣ̀ просте́рта, вопїѧ́ше: сн҃е мо́й, собезнача́льне ѻ҆ц҃ꙋ̀ и҆ дх҃ꙋ, что̀ неизрече́нное твоѐ сїѐ смотре́нїе, и҆́мже спа́слъ є҆сѝ пречⷭ҇тыхъ рꙋ́къ твои́хъ, ще́дре, созда́нїе;
Пѣ́снь д҃. І҆рмо́съ:
Оу҆слы́шахъ, гдⷭ҇и, слꙋ́хъ твоегѡ̀ смотре́нїѧ, и҆ просла́вихъ тѧ̀, є҆ди́не чл҃вѣколю́бче.
Ми́лостивъ бꙋ́ди, гдⷭ҇и, чи́стѡ къ тебѣ̀ ка́ющымсѧ, ꙗ҆́кѡ є҆ди́нъ ще́дръ и҆ многоми́лостивъ.
Ꙗ҆́коже провозвѣсти́лъ є҆сѝ, сла́вне, ѿ бг҃а и҆злїѧ́сѧ дх҃ъ на всѧ́кꙋ пло́ть вѣ́ровавшихъ.
Сни́тїе дх҃а ᲂу҆ч҃никѝ гдⷭ҇ни ᲂу҆мꙋдри́вшее, твоѧ̑ бг҃оглагѡ́ливаѧ словеса̀ и҆спо́лни.
Бг҃оро́диченъ:
И҆зба́вльшесѧ пречⷭ҇таѧ, и҆зъ мра́чныхъ а҆́довыхъ бокѡ́въ, бжⷭ҇твеннымъ твои́мъ ржⷭ҇тво́мъ, тѧ̀ ᲂу҆блажа́емъ.
И҆́нъ. І҆рмо́съ:
Хрⷭ҇то́съ, моѧ̀ си́ла, бг҃ъ и҆ гдⷭ҇ь, честна́ѧ цр҃ковь бг҃олѣ́пнѡ пое́тъ, взыва́ющи ѿ смы́сла чи́ста, ѡ҆ гдⷭ҇ѣ пра́зднꙋющи.
Ст҃ы́ми ꙗ҆́звами ᲂу҆добрѧ́емь, краснѣ́йшїй ꙗ҆ви́лсѧ є҆сѝ, и҆ бг҃ꙋ, ᲂу҆а́ре, возлю́бленъ вѣнча́вшемꙋ тво́й ве́рхъ, досточꙋ́дне.
На крⷭ҇тѣ̀, сла́вне, растѧза́емь, и҆ на землѝ простира́емь, лю̑тыѧ болѣ̑зни претерпѣ́лъ є҆сѝ. тѣ́мъ неболѣ́зненнꙋю жи́знь наслѣ́довалъ є҆сѝ веселѧ́сѧ.
Зако́ннѡ ви́дѧще бжⷭ҇твеннїи мꙋ́чєницы стра́ждꙋща тѧ̀, блаже́нне, терпѣ́нїѧ словесы̀ ᲂу҆крѣплѧ́хꙋ: съ ни́миже стра̑сти дѡ́лгїѧ соверши́въ, ᲂу҆блажи́лсѧ є҆сѝ.
Хвала́ми вѣнча́емъ бжⷭ҇твєнныѧ мꙋ́ченики, ꙗ҆̀же вѣнча̀ бл҃года́ть бжⷭ҇твеннаѧ бжⷭ҇твенными ᲂу҆вѧзє́нїи, низло́жшихъ вра̑жїѧ высѡ́каѧ мꙋдрова̑нїѧ.
Бг҃оро́диченъ:
Ѿ ти́ны страсте́й, влⷣчце, возведѝ, и҆ стра́стныхъ помышле́нїй, ѿчꙋжда́ющихъ мѧ̀ бг҃а є҆ди́нагѡ чⷭ҇тагѡ, да вѣ́рою ᲂу҆блажа́ю тѧ̀.
Пѣ́снь є҃. І҆рмо́съ:
Но́щи преше́дшей, прибли́жисѧ де́нь, и҆ свѣ́тъ мі́рꙋ возсїѧ̀: сегѡ̀ ра́ди хва́лѧтъ тѧ̀ а҆́гг҃льстїи чи́ни, и҆ славосло́вѧтъ тѧ̀ всѧ́чєскаѧ.
Хрⷭ҇то́во прише́ствїе і҆ѡ́иль бжⷭ҇твенный ꙗ҆́вственнѡ всѣ̑мъ проречѐ, ꙗ҆́кѡ прїи́детъ и҆ спасе́тъ ро́дъ человѣ́ческїй ѿ і҆́дѡльскагѡ льще́нїѧ.
Ве́сь ты̀ возни́кнꙋвъ, прⷪ҇ро́че сла́вне, на преꙋ́мный же и҆ вы́ше по́мысла свѣ́тъ, прⷪ҇ро́чествїѧ благода́ть и҆звле́клъ є҆сѝ ѿтꙋ́дꙋ, и҆ пра́вдꙋ проповѣ́далъ є҆сѝ.
Ѡ҆ пою́щихъ тѧ̀ моли́сѧ, спастѝ ѿ всѧ́кагѡ ѡ҆ѕлобле́нїѧ, пребога́те і҆ѡ́иле, и҆ бжⷭ҇твенныѧ благода́ти и҆ зарѝ сподо́битисѧ ᲂу҆молѝ.
Бг҃оро́диченъ:
Прест҃а́ѧ дв҃о, влⷣчце мі́ра, тѧ̀ бцⷣꙋ и҆сповѣ́дающымъ, ѿ безчи́сленныхъ грѣхѡ́въ молѝ спасти́сѧ, и҆ жите́йскихъ ѡ҆бстоѧ́нїй.
И҆́нъ. І҆рмо́съ:
Бж҃їимъ свѣ́томъ твои́мъ, бл҃же, ᲂу҆́тренюющихъ тѝ дꙋ́шы любо́вїю ѡ҆зарѝ, молю́сѧ, тѧ̀ вѣ́дѣти, сло́ве бж҃їй, и҆́стиннаго бг҃а, ѿ мра́ка грѣхо́внагѡ взыва́юща.
Оу҆крѣплѧ́ешисѧ манове́ньми бжⷭ҇твенными, и҆ неѡсла̑бнаѧ терза̑нїѧ терпи́ши до́блимъ смы́сломъ, ᲂу҆а́ре, растерза́ѧ го́рдагѡ се́рдце ѕло́бꙋ содѣ́лавшагѡ.
Сла́вный мꙋ́ченикъ ви́дѧ ѿпа̑дающыѧ на зе́млю своѧ̑ плѡ́ти, ра́довашесѧ, вѣ̑чнꙋющаѧ ᲂу҆ма̀ свѣ́тлостїю, и҆ бжⷭ҇твєннаѧ возда̑нїѧ предпрозира́ѧ.
Пою̀ тѧ̀, гдⷭ҇и бж҃е, и҆ славосло́влю, и҆ покланѧ́юсѧ, благи́хъ сподоблѧ́ѧсѧ ᲂу҆гото́ванныхъ тебѐ возлю́бльшымъ, мч҃никъ въ страда́нїи те́плѣ зовѧ́ше.
Бг҃оро́диченъ:
Ꙗ҆́вльшисѧ херꙋві̑мъ и҆ серафі̑мъ ꙗ҆́кѡ вои́стиннꙋ свѧтѣ́йши, всенепоро́чнаѧ, всѧ̑ вѣ́рнѡ тѧ̀ ны́нѣ ѡ҆свѧща́ющыѧ ѡ҆свѧтѝ, и҆ спасѝ хода́тайствомъ твои́мъ.
Пѣ́снь ѕ҃. І҆рмо́съ:
Бе́здна мѧ̀ мно́га грѣхо́внаѧ ѡ҆крꙋжа́етъ, и҆ вопїю́ ти, проро́ка подража́ѧй: ѿ тли́ мѧ, гдⷭ҇и, возведѝ.
Ка́плютъ твои́хъ глагѡ́лъ и҆сто́чницы, бг҃овѣща́нїѧ и҆ дꙋшепи́щнꙋю сла́дость точа́ще, сла́вне, напаѧ́ющꙋю вѣ́рнѡ приходѧ́щыѧ.
Го́рꙋ тѧ̀ прⷪ҇ро́чества, сла́дость и҆сточа́ющꙋю, и҆ бг҃оче́стїѧ, і҆ѡ́иле, проповѣ́дника всемꙋ́дра зна́емъ, бг҃оглаго́ливе прⷪ҇ро́че.
Бг҃оро́диченъ:
Просвѣтѝ, свѣ́тъ ро́ждшаѧ незаходѧ́щїй, сердца̀ славосло́вѧщихъ тѧ̀ вѣ́рнѡ, пречⷭ҇таѧ влⷣчце, и҆ и҆зъ тебє̀ ро́ждшагосѧ неизрече́ннѡ.
И҆́нъ. І҆рмо́съ:
Жите́йское мо́ре воздвиза́емое зрѧ̀ напа́стей бꙋ́рею, къ ти́хомꙋ приста́нищꙋ твоемꙋ̀ прите́къ, вопїю́ ти: возведѝ ѿ тлѝ живо́тъ мо́й, многоми́лостиве.
Глаго́лѡвъ небре́глъ є҆сѝ пребеззако́ннагѡ врага̀, и҆ пла́мень претерпѣ́лъ є҆сѝ нестерпи́мыхъ болѣ́зней терпѣли́внѡ, многострада́льне ᲂу҆а́ре, моле́бниче ѡ҆ хва́лѧщихъ тѧ̀ вѣ́рою.
Не преста́ше мꙋчи́тель пребезꙋ́мный, ра́нами неми́лостивнѡ сдроблѧ́ѧ тѧ̀, до́ндеже въ рꙋ́ки бж҃їѧ свѧще́ннꙋю твою̀ дꙋ́шꙋ преда́лъ є҆сѝ, добро́тами просвѣ́щшꙋсѧ пѡ́двигъ твои́хъ.
Возвы́силсѧ є҆сѝ подо́бѧсѧ на дре́вѣ хрⷭ҇тꙋ̀, и҆ на то́мъ ви́сѧ, твою̀ дꙋ́шꙋ пре́далъ є҆сѝ бг҃ꙋ, тѧ̀ вѣнчава́ющꙋ, страстоте́рпче, зако́ннѡ до́блествовавша.
Бг҃оро́диченъ:
Оу҆пра́ви, влⷣчце, въ пꙋчи́нѣ лю́тыхъ, ѡ҆бꙋрева́емꙋю всегда̀ смире́ннꙋю дꙋ́шꙋ мою̀, и҆ къ ти́хомꙋ приста́нищꙋ напра́ви, несомнѣ́ннымъ ра́зꙋмомъ тѧ̀ блажа́щꙋю.
Конда́къ мꙋ́ченикꙋ, гла́съ д҃:
Хрⷭ҇тꙋ̀ послѣ́дꙋѧ, мꙋ́чениче ᲂу҆а́ре, тогѡ̀ и҆спи́въ ча́шꙋ, и҆ мꙋче́нїѧ вѣнце́мъ ᲂу҆вѧзе́сѧ, и҆ со а҆́гг҃лы ликовствꙋ́еши: молѝ непреста́ннѡ за дꙋ́шы на́шѧ.
Пѣ́снь з҃. І҆рмо́съ:
Пе́щь дре́вле всегремѧ́щꙋю ᲂу҆гаси́вый, и҆ ѻ҆́троки тꙋ́чею дꙋхо́вною ѡ҆роси́вый, бл҃гослове́нъ є҆сѝ бж҃е ѻ҆тє́цъ на́шихъ.
И҆сходѧ́щїй ѿ до́мꙋ гдⷭ҇нѧ, и҆ напаѧ́ющїй и҆сто́чникъ, ꙗ҆́коже проре́клъ є҆сѝ, произы́де, прⷪ҇ро́че всече́стне.
Пото́къ сито́вный, пшеницено́сенъ содѣ́лалъ є҆сѝ пи́щный и҆сто́чникъ, ꙗ҆́коже і҆ѡ́иль проречѐ: бл҃гослове́нъ є҆сѝ бж҃е ѻ҆тє́цъ на́шихъ.
Бг҃оро́диченъ:
И҆́же всѧ̑ сотвори́вый ро́ждсѧ ѿ дв҃ы, спасѐ мі́ръ благоче́стнѡ пою́щїй: бл҃гослове́нъ є҆сѝ, бж҃е ѻ҆тє́цъ на́шихъ.
И҆́нъ. І҆рмо́съ:
Росода́тельнꙋ ᲂу҆́бѡ пе́щь содѣ́ла а҆́гг҃лъ прпⷣбнымъ ѻ҆трокѡ́мъ, халдє́и же ѡ҆палѧ́ющее велѣ́нїе бж҃їе мꙋчи́телѧ ᲂу҆вѣща̀ вопи́ти: бл҃гослове́нъ є҆сѝ, бж҃е ѻ҆тє́цъ на́шихъ.
Просвѣще́на тѧ̀ подвигѡ́въ приложе́ньми, предо́браѧ клеопа́тра, ᲂу҆а́ре, скꙋ́тала є҆́сть, ѡ҆брѣ́тши сла́вꙋ тобо́ю, вѣ́ры досто́йнꙋ ꙗ҆́вѣ, ю҆́же показа̀ те́плѣ въ твоѐ сконча́нїе.
И҆злива́ющи на тѧ̀ сле́зы, и҆ мѵ́ры тѧ̀ честны́ми помазꙋ́ющи, сокрыва́етъ тѧ̀ подъ земле́ю всечестна́ѧ жена̀, погре́бшаго пре́лесть лꙋка́вꙋю, и҆ и҆зъ гро́ба блиста́ньми просвѣща́юща на́съ.
Не престаѧ́ше, прпⷣбне, ᲂу҆гожда́ющи тебѣ̀ хрⷭ҇то́вꙋ ᲂу҆го́дникꙋ, приснопа́мѧтнаѧ, до́ндеже ꙗ҆ви́лсѧ є҆сѝ хода́тай є҆́й, мꙋ́дре, црⷭ҇твїѧ нбⷭ҇нагѡ, є҆гѡ́же сподо́бисѧ тобо́ю съ любе́знѣйшимъ сы́номъ.
Бг҃оро́диченъ:
Сокрꙋше́на мѧ̀ безчи́сленными согрѣшє́нїи, дв҃о, хода́йствомъ твои́мъ ѡ҆бновѝ, ᲂу҆врачꙋ́ющи мою̀ дꙋ́шꙋ, и҆ сло́во подаю́щи вопи́ти: бл҃гослове́на ꙗ҆́же бг҃а пло́тїю ро́ждшаѧ.
Пѣ́снь и҃. І҆рмо́съ:
Дре́вле ѡ҆роси́вшаго є҆врє́йскїѧ ѻ҆́троки въ пла́мени, и҆ ѡ҆пали́вшаго гдⷭ҇а халдє́и пресла́внѡ въ не́мъ, воспое́мъ глаго́люще: благослови́те и҆ превозноси́те є҆го̀ во вѣ́ки.
Показа́лъ є҆сѝ, сла́вне, покаѧ́нїѧ ѻ҆́бразы ꙗ҆́вѣ, бл҃гоꙋтро́бнагѡ гдⷭ҇а, прїе́млюща вѣ́рою къ немꙋ̀ приходѧ́щыѧ, и҆ пою́щыѧ: благослови́те, дѣла̀ гдⷭ҇нѧ, гдⷭ҇а.
Слꙋжи́тель бы́въ ты̀ гдⷭ҇ень, прⷪ҇ро́че і҆ѡ́иле, тогѡ̀ та̑йны врꙋчи́лсѧ є҆сѝ прорица́ти лю́демъ, хва́лѧщымъ и҆ пою́щымъ: благослови́те, дѣла̀ гдⷭ҇нѧ, гдⷭ҇а.
Ѡ҆ставле́нїе и҆сточа́ютъ і҆ꙋ́дови чꙋде́съ рѣ́ки, ꙗ҆̀же сꙋ́ть а҆пⷭ҇ли пресла́внїи гдⷭ҇ни, ꙗ҆́коже прⷪ҇ро́чествова і҆ѡ́иль, вопїю́щихъ напаѧ́юще: благослови́те, всѧ̑ дѣла̀ гдⷭ҇нѧ, гдⷭ҇а.
Бг҃оро́диченъ:
Ѵ҆поста́сь сло́жнꙋ во двою̀ сꙋщєствꙋ̀ хрⷭ҇та̀, всенепоро́чнаѧ, родила̀ є҆сѝ, пребы́вши дв҃а чⷭ҇таѧ, є҆мꙋ́же пою́ще зове́мъ: благослови́те, дѣла̀ гдⷭ҇нѧ, гдⷭ҇а.
И҆́нъ. І҆рмо́съ:
И҆зъ пла́мене преподѡ́бнымъ ро́сꙋ и҆сточи́лъ є҆сѝ, и҆ пра́веднагѡ же́ртвꙋ водо́ю попали́лъ є҆сѝ: всѧ̑ бо твори́ши, хрⷭ҇тѐ, то́кмѡ є҆́же хотѣ́ти. тѧ̀ превозно́симъ во всѧ̑ вѣ́ки.
Мт҃рнихъ послꙋ́шавъ, мч҃ниче, моле́бъ, нбⷭ҇номꙋ во́инствꙋ свѣ́тлѡ во́инствꙋѧ, ѻ҆́трока честна́го, и҆ твоегѡ̀ неѿстꙋ́пна показа́лъ є҆сѝ благосла́вїѧ, неизрече́ннымъ милосе́рдїемъ.
Ѿ є҆гѵ́пта тѧ̀ бога́тство, ꙗ҆́коже многоцѣ́нное принесѐ, мч҃ниче, разбогатѧ́щи многоцѣ́нными дармѝ, клеопа́тра, цѣле́нїи всю̀ палесті́нꙋ, любо́вїю тѧ̀ почита́ющꙋю.
Веселѧ́сѧ по́двиги твоѧ̑ соверши́лъ є҆сѝ, во́ине до́блїй вседержи́телѧ, и҆ ꙗ҆́кѡ побѣди́тель ѿ негѡ̀ вѣнча́лсѧ є҆сѝ, ᲂу҆а́ре всебл҃же́нне, мч҃никѡвъ вели́каѧ сла́во.
Бг҃оро́диченъ:
Грѣхѝ прилага́ю ко грѣхѡ́мъ, и҆ бꙋ́дꙋщагѡ не бою́сѧ стра́шнагѡ сꙋда̀: побѣдѝ, чⷭ҇таѧ, дꙋшѝ моеѧ̀ ѡ҆слѣпле́нїе, и҆ мольбо́ю твое́ю ѡ҆брати́вши мѧ̀ спасѝ.
Пѣ́снь ѳ҃. І҆рмо́съ:
На нб҃сѣ́хъ бл҃гослове́ннаѧ, и҆ на землѝ славосло́вимаѧ, ра́дꙋйсѧ, невѣ́сто неневѣ́стнаѧ.
Со прⷪ҇рѡ́ки ꙗ҆́кѡ прⷪ҇ро́къ, ра́достнѡ ны́нѣ въ нбⷭ҇ныхъ весели́шисѧ ѻ҆би́телехъ.
Свы́ше ны̀ назира́еши ны́нѣ, благоговѣ́йнѡ тѧ̀ славосло́вѧщыѧ, бг҃оглаго́ливе всебога́те.
Сокраще́нъ пꙋ́ть спасе́нїѧ, і҆ѡ́иль покаѧ́нїемъ бг҃омꙋ́дреннѡ показа̀.
Бг҃оро́диченъ:
Возвела̀ є҆сѝ ны̀ па́дшыѧ, мт҃и бж҃їѧ, бл҃гоꙋтро́бнаго влⷣкꙋ и҆ сп҃са ро́ждши.
И҆́нъ. І҆рмо́съ:
Бг҃а человѣ́кѡмъ невозмо́жно ви́дѣти, на него́же не смѣ́ютъ чи́ни а҆́гг҃льстїи взира́ти: тобо́ю бо, всечⷭ҇таѧ, ꙗ҆ви́сѧ человѣ́кѡмъ сло́во воплоще́нно, є҆го́же велича́юще, съ нбⷭ҇ными вѡ́и тѧ̀ ᲂу҆блажа́емъ.
Крѣ́пость низложи́лъ є҆сѝ ратобо́рца, бжⷭ҇твенною ꙗ҆́вѣ си́лою препоѧ́савсѧ, страда́льче до́блїй ᲂу҆а́ре. тѣ́мъ тѧ̀ хва́лимъ, врачева́нїе ѻ҆би́льное ѿ твои́хъ моще́й, вѣ́рнїи, почерпа́юще.
Ꙗ҆́кѡ свѣ́тъ, ꙗ҆́кѡ ᲂу҆́тро, ꙗ҆́кѡ вели́кое со́лнце въ земны̑ѧ простре́сѧ па́мѧть твоѧ̀ концы̀, свѣтоно́сными просвѣща́ющи сїѧ́ньми твои́хъ честны́хъ пѡ́двигъ всѧ̑, прехва́льне, и҆ мра́къ серде́цъ ѿгонѧ́щи.
Съ тобо́ю сїѧ́юща ви́дѣвши сла́вою мно́гою своего̀ сы́на чадолюби́ваѧ, всѣ́хъ бг҃а велича́ше: тебе́ же и҆́скреннѣйше, мꙋ́чениче, сла́вѧще велича́йшаго предста́телѧ, ꙗ҆́вственнѡ ѡ҆богати́вшисѧ.
Землѧ̀, на не́йже терпѣли́вѣйшее тѣ́ло твоѐ, мꙋ́дре, лежи́тъ, бжⷭ҇твеннѣ ѡ҆свѧти́сѧ: но да́ждь моли́твами твои́ми на́мъ разрѣше́нїе грѣхѡ́въ, житїѧ̀ и҆справле́нїе, ᲂу҆а́ре, и҆ всѣ́хъ неꙋдо́бныхъ и҆збавле́нїе.
Бг҃оро́диченъ:
Ꙗ҆́вльсѧ, дв҃о, и҆зъ тебє̀ гдⷭ҇ь свѣ́тлагѡ ѻ҆́блака, є҆гѵ́пєтскїѧ кꙋмі́ры всѧ́ческой па́гꙋбѣ предадѐ: мно́жество же страстоте́рпцєвъ сего̀ носи́ти сподо́би, сегѡ̀ подража́тели честны̑мъ є҆гѡ̀ страда́нїємъ.
Слꙋ́жба ст҃а́гѡ и҆ прпⷣбнагѡ ѻ҆ц҃а̀ на́шегѡ і҆ѡа́нна ры́льскагѡ.
Ве́черъ: Блаже́нъ мꙋ́жъ: На Гдⷭ҇и, воззва́хъ, стїхи̑ры, гла́съ а҃: Подо́бенъ: Ѽ ди́внагѡ чꙋдесѐ!
Въ по́стницѣхъ возсїѧ́вшемꙋ проѡбразова́нїе, пꙋсты́нное воспита́нїе, сре́дческаго свѣти́льника, словесы̀ пѣ́сненными всѝ вѣ́рнїи похва́лимъ, зовꙋ́ще: ра́дꙋйсѧ, вели́каѧ сла́ва, ꙗ҆́же въ на́шѧ дни̑ ꙗ҆ви́сѧ, преблаже́нне.
Посредѝ двою̀ живѡтꙋ̀, разꙋ́мнѣ бг҃оꙋго́днѡ мѣ́рило поста́вилъ є҆сѝ, ѻ҆́ч҃е, и҆́бо тлѣ̑ющаѧ ѡ҆ста́вилъ є҆сѝ: разꙋмѣ́въ же при́снѡ пребыва́юща хрⷭ҇та̀ бг҃а, и҆ томꙋ̀ пра́вило дꙋшѝ твоеѧ̀ ᲂу҆се́рднѡ, блаже́нне і҆ѡа́нне, прилѣпи́лъ є҆сѝ.
Ра́дꙋешисѧ ви́дѣвъ соверше́нїе трꙋдѡ́въ твои́хъ, и҆́хже ѻ҆́ко не ви́дѣ, ни ᲂу҆́хо слы́ша: но добро́ты ра́йскїѧ и҆мѣ́ѧ свѣтовозда́нїе пѡ́двигъ твои́хъ, и҆сточа́етъ бл҃года́ть тво́й гро́бъ, и҆ тѣ́ло и҆мѣ́ѧй неразрꙋши́мо.
И҆́ны стїхи̑ры, гла́съ и҃. Подо́бенъ: Ѽ пресла́внагѡ чꙋдесѐ!
И҆́хже ѻ҆́ко не ви́дѣ, ꙳ ни ᲂу҆́хо слы́ша, ꙳ ни на се́рдце человѣ́ка взыдо́ша, ꙗ҆̀же ᲂу҆гото́вана бг҃омъ того̀ возлю́бльшымъ, ꙳ си́хъ ты̀ возжелѣ́лъ є҆сѝ, і҆ѡа́нне бг҃одохнове́нне. ꙳ возненави́дѣлъ є҆сѝ мїрско́е смѣше́нїе, ꙳ къ бг҃ꙋ є҆ди́номꙋ прите́клъ є҆сѝ, ꙳ и҆ тогѡ̀ бл҃года́ти при́снѡ насыща́ѧсѧ, ꙳ моли́сѧ є҆мꙋ̀ прилѣ́жнѡ, спасти́сѧ дꙋша́мъ на́шымъ.
Ра́зꙋма свѣ́тлостїю ᲂу҆краси́всѧ, ꙳ за́повѣдьми бжⷭ҇твенными ꙳ просвѣти́лъ є҆сѝ дꙋ́шꙋ твою̀: ꙳ но и҆ ѡ҆ тлѣ́ющихъ мимоходѧ́щихъ небре́глъ є҆сѝ. ꙳ земна̑ѧ всѧ̀ ѡ҆ста́вивъ, ꙳ въ пꙋсты́нѧхъ жи́ти и҆зво́лилъ є҆сѝ. ꙳ хрⷭ҇то́вы за́пѡвѣди соблю́лъ є҆сѝ, ꙳ і҆ѡа́нне прпⷣбне. ꙳ є҆го́же молѝ, да спасе́тъ дꙋ́шы на́шѧ.
Любе́знѡ влⷣцѣ вожделѣ́лъ є҆сѝ, ꙳ ѿ млады́хъ ногте́й тогѡ̀ соверша́ѧ повелѣ̑нїѧ, ꙳ бл҃года́тїю па́че, не́жели млеко́мъ воспита́нъ бы́лъ є҆сѝ, ꙳ и҆ тѣ́ло твоѐ ᲂу҆краси́лъ є҆сѝ, ꙳ цѣломꙋ́дрїемъ, и҆ чистото́ю, ꙳ и҆ сꙋ́ща въ домꙋ̀ бж҃їи при́снѡ жела́ѧ, ꙳ хрⷭ҇та̀ ѡ҆брѣ́лъ є҆сѝ. ꙳ того̀, преблаже́нне, ᲂу҆молѝ, ꙳ да спасе́тъ дꙋ́шы на́шѧ.
Сла́ва, гла́съ и҃:
Бж҃їй дх҃ъ и҆злїѧ́сѧ, ꙗ҆́коже ст҃ы́й і҆ѡ́иль проречѐ: ѿ негѡ́же дви́жимь, на́мъ вѣ́рꙋющымъ та̑йны бж҃їѧ ꙗ҆вле́ннѡ ѿкрыва́етъ, и҆́же дѣ́тель є҆гѡ̀ прїе́мый. тѣ́мже бж҃їимъ свѣ́томъ просвѣтѝ на́съ и҆ бл҃года́тїю.
И҆ ны́нѣ, бг҃оро́диченъ: Цр҃ь нбⷭ҇ный:
Вхо́дъ. Прокі́менъ днѐ.
Чтє́нїѧ г҃, пи́саны въ а҃ де́нь са́ввѣ вы́шерскомꙋ.
На стїхо́внѣ стїхи̑ры, гла́съ а҃. Подо́бенъ: Всехва́льнїи мч҃ницы:
Зри́тель бы́сть ᲂу҆мо́мъ ꙳ мы́сленныхъ си́лъ, ꙳ ꙗ҆́кѡ дѣ́латель бжⷭ҇твенныхъ слове́съ ꙳ полага́ѧ во твое́мъ се́рдцы. ꙳ въ не́мже восхождє́нїѧ, ꙳ ꙗ҆́кѡ лѣ́ствицꙋ ᲂу҆тверди́лъ є҆сѝ. ꙳ і҆ѡа́нне прпⷣбне ѻ҆́ч҃е на́шъ, ꙳ моли́сѧ дарова́ти на́мъ ми́ръ, ꙳ и҆ ве́лїю ми́лость.
Сті́хъ: Честна̀ предъ гдⷭ҇емъ сме́рть прпⷣбныхъ є҆гѡ̀.
І҆ѡа́нне прпⷣбне, ꙳ твою̀ ѿ дѣ́тска возложи́лъ є҆сѝ жи́знь ꙳ хрⷭ҇тꙋ̀ бг҃ꙋ на́шемꙋ: ꙳ и҆́мже ᲂу҆крѣплѧ́емь, ꙳ плотскі̑ѧ стра̑сти ꙳ по́мыслꙋ повинꙋ́лъ є҆сѝ, ꙳ хꙋ́ждшее покори́въ лꙋ́чшемꙋ. тѣ́мже молѝ, ꙳ спасти́сѧ дꙋша́мъ на́шымъ.
Сті́хъ: Блаже́нъ мꙋ́жъ боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀.
Бг҃омꙋ́дре ѻ҆́ч҃е на́шъ і҆ѡа́нне, ꙳ свѣти́льникъ ꙗ҆ви́лсѧ є҆сѝ вели́къ, ꙳ просвѣща́ѧ подсо́лнечнꙋю ꙳ чꙋде́съ сїѧ́ньми, ꙳ бж҃е́ственными дѣ́лы: ꙳ тѣ́мже по ᲂу҆спе́нїи ꙳ незаходи́мый свѣ́тъ прїѧ̀. ꙳ сегѡ̀ ра́ди молѝ, ꙳ спасти́сѧ дꙋша́мъ на́шымъ.
Сла́ва, гла́съ и҃:
Хрⷭ҇то́во и҆збра́нное ста́до, вѣ́рныхъ собо́ри, новосвѧще́ннїи лю́дїе, прїиди́те стеце́мсѧ всѝ къ честнѣ́й па́мѧти пребл҃же́ннагѡ ѻ҆тца̀ на́шегѡ і҆ѡа́нна, въ средцѣ̀ возсїѧ́вшагѡ, къ на́мъ прише́дша: се́ бо предлежи́тъ на́мъ свѧще́нное є҆гѡ̀ тѣ́ло, вѣ́ры на́шеѧ честно́е ᲂу҆твержде́нїе, прпⷣбныхъ ꙗ҆́кѡ вои́стиннꙋ ᲂу҆краше́нїе. да посра́мѧтсѧ є҆реті́чєскаѧ собѡ́рища невѣ̑рꙋющаѧ воскресе́нїю: се́й бо по сме́рти зра́къ дае́тъ, хромы̑мъ хожде́нїе, слѣпы̑мъ прозрѣ́нїе, разсла́блєнныѧ стѧза́етъ: и҆ во́инство на́ше ᲂу҆крѣплѧ́етъ на врагѝ проти̑вныѧ. дꙋ́хомъ же предстоѧ̀ ᲂу҆̀ прⷭ҇то́ла влⷣчнѧ, мо́литъ спасти́сѧ дꙋша́мъ на́шымъ.
И҆ ны́нѣ, бг҃оро́диченъ. Тропа́рь, гла́съ а҃:
Покаѧ́нїѧ ѡ҆снова́нїе, прописа́нїе ᲂу҆миле́нїѧ, ѻ҆́бразъ ᲂу҆тѣше́нїѧ, дх҃о́внагѡ соверше́нїѧ, ра́вно а҆́гг҃лѡмъ житїѐ твоѐ бы́сть, прпⷣбне, въ мл҃твахъ ᲂу҆́бѡ и҆ поще́нїихъ, и҆ въ слеза́хъ пребыва́ѧ, ѻ҆́ч҃е і҆ѡа́нне, молѝ хрⷭ҇та̀ бг҃а ѡ҆ дꙋша́хъ на́шихъ.
На ᲂу҆́трени, по а҃-мъ стїхосло́вїи сѣда́ленъ, гла́съ д҃.
Подо́бенъ: Ско́рѡ предварѝ:
Воздержа́нїемъ ᲂу҆вѧди́лъ є҆сѝ плотскі̑ѧ стра̑сти, ми́лости возда́нїемъ, бл҃года́ть вели́кꙋю, ѻ҆́ч҃е, дꙋхо́внꙋю воспрїѧ́лъ є҆сѝ. тѣ́мъ благоꙋгоди́лъ є҆сѝ бг҃ꙋ, досто́инъ сосꙋ́дъ чꙋде́съ и҆ по кончи́нѣ ꙗ҆ви́лсѧ є҆сѝ, ѿ страсте́й ѡ҆чища́ѧ на́съ, і҆ѡа́нне прпⷣбне, молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти, чествꙋ́ющымъ любо́вїю свѧтꙋ́ю па́мѧть твою̀.
Два́жды.
Сла́ва, и҆ ны́нѣ, бг҃оро́диченъ:
Ѡ҆бнови́ла є҆сѝ, чⷭ҇таѧ, бжⷭ҇твеннымъ ржⷭ҇тво́мъ твои́мъ, и҆стлѣ́вшее во страсте́хъ земноро́дныхъ ме́ртвенное сꙋщество̀, и҆ воздви́гла є҆сѝ всѧ̑ ѿ сме́рти къ животꙋ̀ нетлѣ́нїѧ. тѣ́мже тѧ̀ по до́лгꙋ блажи́мъ всѝ, дв҃о препросла́вленнаѧ, ꙗ҆́коже прорекла̀ є҆сѝ.
По в҃-мъ стїхосло́вїи сѣда́ленъ, гла́съ є҃. Подо́бенъ: Собезнача́льное:
По́стника гдⷭ҇нѧ пѣ́сньми почти́мъ, ꙗ҆́кѡ ᲂу҆мертви́вшаго прило́ги страсте́й воздержа́нїемъ тве́рдымъ, и҆ терпѣ́нїемъ вои́стиннꙋ посрами́вша сопроти́внаго врага̀, и҆ всю̀ є҆гѡ̀ горды́ню низложи́вша, и҆ ны́нѣ молѧ́щасѧ, поми́ловатисѧ дꙋша́мъ на́шымъ.
Два́жды.
Сла́ва, и҆ ны́нѣ, бг҃оро́диченъ:
Оу҆жа́сно чꙋ́до зача́тїѧ, и҆ несказа́ненъ ѻ҆́бразъ ржⷭ҇тва̀ въ тебѣ̀ позна́всѧ, приснодв҃о чⷭ҇таѧ, ᲂу҆жаса́етъ мо́й ᲂу҆́мъ, и҆ ᲂу҆дивлѧ́етъ моѐ помышле́нїе. сла́ва твоѧ̀, бцⷣе, во всѣ́хъ простре́сѧ, ко спасе́нїю дꙋ́шъ на́шихъ.
По полѷеле́и сѣда́ленъ, гла́съ и҃. Подо́бенъ: Премꙋ́дрости:
Па́стырскꙋю хи́трость воспрїи́мъ, мона́шествꙋющихъ сто́лпъ и҆ ѡ҆снова́нїе, разꙋ́мнѣ ᲂу҆па́слъ є҆сѝ ста́до твоѐ: хрⷭ҇то́ва бо вожделѣ́въ бжⷭ҇твєннаѧ ᲂу҆чє́нїѧ, въ ни́хже просвѣти́лсѧ є҆сѝ, прпⷣбне. тѣ́мже къ ре́вности а҆́гг҃льскагѡ житїѧ̀ воздви́глъ є҆сѝ всѣ́хъ є҆диномꙋ́дреннѡ сла́вити бг҃а: бг҃оно́се і҆ѡа́нне, молѝ хрⷭ҇та̀ бг҃а, грѣхѡ́въ ѡ҆ставле́нїе пода́ти чтꙋ́щымъ любо́вїю свѧтꙋ́ю па́мѧть твою̀.
Два́жды.
Сла́ва, и҆ ны́нѣ, бг҃оро́диченъ:
Пречⷭ҇таѧ дв҃о мт҃и бж҃їѧ, дꙋшѝ моеѧ̀ стра̑сти лю̑тыѧ и҆сцѣлѝ, молю́сѧ, и҆ проще́нїе да́рꙋй мои́хъ прегрѣше́нїй, ꙗ҆̀же безꙋ́мнѣ содѣ́ѧхъ, дꙋ́шꙋ и҆ тѣ́ло ѡ҆скверни́въ, ѡ҆каѧ́нный. ᲂу҆вы̀ мнѣ̀, что̀ сотворю̀ въ ча́съ ѻ҆́нъ, внегда̀ а҆́гг҃ли дꙋ́шꙋ мою̀ разлꙋча́тъ ѿ стра́стнагѡ моегѡ̀ тѣлесѐ; тогда̀ помо́щница мѝ бꙋ́ди и҆ предста́тельница теплѣ́йшаѧ: тѧ́ бо и҆́мамъ наде́ждꙋ ра́бъ тво́й.
Та́же степє́нна, а҃ а҆нтїфѡ́нъ, д҃-гѡ гла́са. Прокі́менъ, гла́съ д҃: Честна̀ предъ гдⷭ҇емъ сме́рть прпⷣбныхъ є҆гѡ̀. Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми; Є҆ѵⷢ҇лїе прпⷣбническое.
По н҃-мъ ѱалмѣ̀, стїхи́ра самогла́сна, гла́съ ѕ҃:
Прпⷣбне ѻ҆́ч҃е і҆ѡа́нне, во всю̀ зе́млю и҆зы́де вѣща́нїе и҆справле́нїй твои́хъ: тѣ́мъ на нб҃сѣ́хъ ѡ҆брѣ́лъ є҆сѝ мздꙋ̀ трꙋдѡ́въ твои́хъ, де́мѡнскїѧ полкѝ разрꙋши́лъ є҆сѝ, и҆ а҆́гг҃льскїѧ дости́глъ є҆сѝ чи́ны, и҆́хже житїю̀ безъ поро́ка поревнова́лъ є҆сѝ. дерзнове́нїе и҆мѣ́ѧ ко хрⷭ҇тꙋ̀ бг҃ꙋ, ми́ръ и҆спросѝ дꙋша́мъ на́шымъ.
Канѡ́нъ бцⷣы, со і҆рмосо́мъ на ѕ҃: и҆ ст҃а́гѡ на и҃, є҆гѡ́же краегране́сїе:
Ст҃и́телю, пою̀ твоѧ̑, всеблаже́нне, чꙋдеса̀.
Гла́съ д҃. Пѣ́снь а҃. І҆рмо́съ:
Ли́цы і҆и҃льтестїи невла́жными стопа́ми, по́нтъ чермны́й, и҆ вла́жнꙋю глꙋбинꙋ̀ прогна́вше, вса́дники трїста́ты врагѝ ви́дѧще въ не́й погрꙋже́ны, съ весе́лїемъ поѧ́хꙋ: пои́мъ бг҃ꙋ на́шемꙋ, ꙗ҆́кѡ просла́висѧ.
Бжⷭ҇твеннымъ свѣ́томъ ѡ҆сїѧ́нъ, и҆ со а҆́гг҃лы, ѻ҆́ч҃е, ны́нѣ водворѧ́ешисѧ, моли́твами твои́ми спаса́й творѧ́щыѧ всегда̀ свѧще́ннꙋю твою̀ па́мѧть, въ ра́дости пою́щыѧ: пои́мъ бг҃ꙋ на́шемꙋ, ꙗ҆́кѡ просла́висѧ.
Пꙋ́ть, и҆́же къ жи́зни возводѧ́щїй неꙋкло́ннѡ, пребл҃же́нне, ше́ствовалъ є҆сѝ, и҆збѣ́гъ мѧте́жей мїрски́хъ, и҆ де́мѡнскаѧ смꙋщє́нїѧ разори́лъ є҆сѝ, ра́достнѡ взыва́ѧ, ѻ҆́ч҃е і҆ѡа́нне: пои́мъ бг҃ꙋ на́шемꙋ, ꙗ҆́кѡ просла́висѧ.
Оу҆мертви́въ плотско́е мꙋдрова́нїе, твои́ми по́стными боре́ньми, бжⷭ҇твенномꙋ дх҃ꙋ покори́лъ є҆сѝ, ѡ҆кормле́нїемъ бжⷭ҇твенныѧ си́лы, ра́достнѡ вопїѧ́лъ є҆сѝ: пои́мъ бг҃ꙋ на́шемꙋ, ꙗ҆́кѡ просла́висѧ.
Всѧ̑ кра̑снаѧ ѡ҆ста́вилъ є҆сѝ, непреста́ннꙋю, ѻ҆́ч҃е, возлюби́лъ є҆сѝ красотꙋ̀, въ домꙋ̀ гдⷭ҇ни, и҆дѣ́же шꙋ́мъ пра́зднꙋющихъ, ра́достнѡ пою́щихъ: пои́мъ бг҃ꙋ на́шемꙋ, ꙗ҆́кѡ просла́висѧ.
Бг҃оро́диченъ:
Безлѣ́тна сн҃а и҆зъ безнача́льна ѻ҆ц҃а̀, пло́ть на́съ ра́ди въ человѣ́цѣхъ бы́вша, во ᲂу҆тро́бѣ заче́нши, подъ лѣ́томъ сего̀ родила̀ є҆сѝ несказа́ннѡ, є҆мꙋ́же ра́дꙋющесѧ вопїе́мъ: пои́мъ бг҃ꙋ на́шемꙋ, ꙗ҆́кѡ просла́висѧ.
Катава́сїа: Ѿве́рзꙋ ᲂу҆ста̀ моѧ̑:
Пѣ́снь г҃. І҆рмо́съ:
Лꙋ́къ си́льныхъ и҆знемо́же, и҆ немощствꙋ́ющїи препоѧ́сашасѧ си́лою: сегѡ̀ ра́ди ᲂу҆тверди́сѧ въ гдⷭ҇ѣ се́рдце моѐ.
Зако́нꙋ повинꙋ́лсѧ є҆сѝ дх҃а, є҆го́же всѣ̑мъ, прпⷣбне, предложи́лъ є҆сѝ: грѣха́ же зако́нꙋ и҆зволе́нїемъ не повинꙋ́лсѧ є҆сѝ.
Горѣ̀ къ бг҃ꙋ мꙋдрова́нїе и҆мѣ́ѧ, ѻ҆́ч҃е, ꙗ҆́же на землѝ ѡ҆ста́вилъ є҆сѝ, болѣ́зньми воздержа́нїѧ непреста́ннѡ ѡ҆блегча́емь.
Растерза́въ ю҆́зы є҆стества̀, преесте́ственнымъ чи́стымъ житїе́мъ, бг҃оно́сне і҆ѡа́нне, вышеесте́ственныхъ прїѧ́лъ є҆сѝ дѣ́йство.
Да бг҃ꙋ, блаже́нне, безъ смꙋще́нїѧ бесѣ́дꙋеши, въ пꙋсты́ни жи́ти, ѻ҆́ч҃е, и҆зво́лилъ є҆сѝ, ѿ молвы̀ ᲂу҆далѧ́ѧсѧ.
Бг҃оро́диченъ:
Спастѝ восхотѣ́въ человѣ́ка на поле́зное, ꙗ҆́кѡ бл҃годѣ́тель и҆ чл҃вѣколю́бецъ, въ твою̀ ᲂу҆тро́бꙋ неѡпи́саннѡ, бг҃ома́ти, всели́сѧ.
Сѣда́ленъ, гла́съ а҃. Подо́бенъ: Гро́бъ тво́й:
Воздержа́нїѧ ѻ҆гне́мъ ꙗ҆́кѡ зла́то въ пещѝ, мꙋ́дре, и҆скꙋси́всѧ, свѣтлѣ́йшїй ꙗ҆ви́лсѧ є҆сѝ, і҆ѡа́нне прпⷣбне: тѣ́мже къ нбⷭ҇номꙋ преста́вилсѧ є҆сѝ црⷭ҇твїю. сегѡ̀ ра́ди вѣ́рою тѧ̀ восхвалѧ́юще вопїе́мъ: бл҃года́ть и҆ ми́лость, и҆ ѡ҆чище́нїй на́шихъ, ѻ҆́ч҃е, и҆спросѝ.
Два́жды.
Сла́ва, и҆ ны́нѣ, бг҃оро́диченъ:
Наста́ви мѧ̀ на пꙋ́ть покаѧ́нїѧ, пребл҃га́го прогнѣ́вавша гдⷭ҇а, неискꙋсобра́чнаѧ бл҃гослове́ннаѧ марі́е, прибѣ́жище ѿча́ѧнныхъ человѣ́кѡвъ, бж҃їе вмѣсти́лище.
Пѣ́снь д҃. І҆рмо́съ:
Сѣдѧ́й въ сла́вѣ на прⷭ҇то́лѣ бж҃ества̀, во ѻ҆́блацѣ ле́гцѣ прїи́де і҆и҃съ пребжⷭ҇твенный, нетлѣ́нною дла́нїю, и҆ спасѐ зовꙋ́щыѧ: сла́ва, хрⷭ҇тѐ, си́лѣ твое́й.
Ѡ҆бветша́вшагѡ человѣ́ка а҆́бїе совле́ксѧ, ѻ҆́ч҃е, со грѣхо́вными страстьмѝ, воздержа́нїемъ незави́стнымъ ѡ҆бле́клсѧ є҆сѝ въ но́ваго по хрⷭ҇тꙋ̀, всече́стне.
Свѣ́тлое твоѐ житїѐ, ꙗ҆́кѡ пра́вило и҆звѣ́стно, въ тебѣ̀, ѻ҆́ч҃е, бжⷭ҇твенныѧ добродѣ́тели показа́сѧ, въ моли́твахъ и҆ поще́нїихъ, во бдѣ́нїихъ же и҆ мольба́хъ ꙗ҆̀же ко хрⷭ҇тꙋ̀ чл҃вѣколю́бцꙋ.
Дрема́нїѧ твои̑мъ ѻ҆чесє́мъ не да́лъ є҆сѝ, прпⷣбне, до́ндеже, ѻ҆́ч҃е, хра́мъ себѐ сотвори́лъ є҆сѝ прекра́сенъ всеви́дѧщемꙋ влⷣцѣ, къ немꙋ́же взыва́еши: сла́ва си́лѣ твое́й, гдⷭ҇и.
Бг҃оро́диченъ:
Оу҆мерщвлє́нныѧ, пречⷭ҇таѧ, человѣ́ки ѡ҆живи́ла є҆сѝ, жизнода́вца ро́ждши и҆збавлѧ́ющаго ѿ тлѝ, взыва́ющыѧ є҆мꙋ̀: сла́ва си́лѣ твое́й, гдⷭ҇и.
Пѣ́снь є҃. І҆рмо́съ:
Просвѣще́нїе твоѐ, гдⷭ҇и, низпослѝ на́мъ, и҆ ѿ мглы̀ прегрѣше́нїй разрѣши́ ны, бл҃же, тво́й ми́ръ да́рꙋѧй.
Въ ю҆́ности мꙋ́дрость, въ ста́рости ра́зꙋмъ, во все́мъ житїѝ пожда́нїе, и҆ долготерпѣ́нїе, и҆ є҆́же ко всѣ̑мъ любо́вь показа́лъ є҆сѝ, блаже́нне.
Впери́въ, сла́вне, дꙋше́вный ра́зꙋмъ, и҆ чꙋ̑вства, мꙋ́дре, ѡ҆корми́въ, бы́лъ є҆сѝ хра́мъ ѡ҆свѧще́нъ бг҃ꙋ че́стенъ.
Оу҆краси́лъ є҆сѝ, прпⷣбне, дꙋшѝ тричи́сленное, и҆ влады́кꙋ ᲂу҆́мъ поста́вивъ, и҆мѣ́юща хрⷭ҇та̀, наставлѧ́юща тѧ̀ къ ше́ствїю нбⷭ҇номꙋ.
Бг҃оро́диченъ:
Дв҃а родѝ пречⷭ҇таго бг҃а, зако́нъ полага́юща, всѣ̑мъ человѣ́кѡмъ сп҃си́телѧ, благоче́стїе сꙋ́щымъ на землѝ возвѣща́юща.
Пѣ́снь ѕ҃. І҆рмо́съ:
Возопѝ, проѡбразꙋ́ѧ погребе́нїе тридне́вное, прⷪ҇ро́къ і҆ѡ́на, въ ки́тѣ молѧ́сѧ: ѿ тлѝ и҆зба́ви мѧ̀, і҆и҃се, цр҃ю̀ си́лъ.
Въ пꙋсты́ни жи́ти ᲂу҆се́рднѡ возлюби́лъ є҆сѝ, бг҃оно́сне, къ не́йже бг҃а прїе́млѧ и҆збавлѧ́ющаго тѧ̀, и҆ соблюда́ющаго твоѧ̑ стѡпы̀.
Непрекло́ненъ въ пꙋсты́ни, бг҃омꙋ́дре, претерпѣ́лъ є҆сѝ, да́же и҆ до кончи́ны хранѧ̀ сїѐ ѡ҆пасе́нїемъ, и҆́мже нетлѣ́нномꙋ сподо́билсѧ є҆сѝ наслажде́нїю.
Равноа́гг҃льнѡ на землѝ пожи́лъ є҆сѝ, равноа́гг҃льнꙋю че́сть досто́йнѡ полꙋчи́лъ є҆сѝ, со а҆́гг҃лы всѣ́ми бг҃ꙋ предстоѧ̀.
Бг҃оро́диченъ:
Зачала̀ є҆сѝ во ᲂу҆тро́бѣ, бг҃ома́ти, безнача́льнаго бг҃а сло́ва, на́съ ра́ди въ человѣ́цѣхъ бы́вшаго, по на́мъ непрело́жна, во двꙋ̀ зна́ема є҆стєствꙋ̀.
Конда́къ, гла́съ и҃. Подо́бенъ: Взбра́нной:
А҆́гг҃льскомꙋ житїю̀ поревнова́въ, прпⷣбне, всѧ̑ земна̑ѧ ѡ҆ста́вивъ, ко хрⷭ҇тꙋ̀ прите́клъ є҆сѝ: и҆ тогѡ̀ за́повѣдьми ѡ҆гражда́ѧсѧ, ꙗ҆ви́лсѧ є҆сѝ сто́лпъ непоколеби́мъ ѿ вра́жїихъ нападе́нїй. тѣ́мъ зове́мъ тѝ: ра́дꙋйсѧ, ѻ҆́ч҃е і҆ѡа́нне, свѣти́ло пресвѣ́тлое.
І҆́косъ:
Въ ме́ртвеннѣмъ тѣ́лѣ, а҆́гг҃льскомꙋ ᲂу҆подо́бльшасѧ житїю̀ па́че є҆стества̀, и҆ съ тѣ́ми на небесѣ́хъ ликꙋ́юща, прїиди́те всѝ вѣ́рнїи воспое́мъ прпⷣбнаго і҆ѡа́нна: то́й бо ꙗ҆́кѡ ᲂу҆ме́ты вмѣнѝ мїрска̑ѧ всѧ̑ кра̑снаѧ, ꙗ҆́кѡ да нбⷭ҇ныхъ полꙋчи́тъ, вше́дъ на го́рꙋ ꙗ҆́коже дре́вле мѡѷсе́й вели́кїй, и҆ и҆лїа̀, посто́мъ ѡ҆чи́щсѧ, сподо́бисѧ ви́дѣти трⷪ҇ческꙋю свѣ́тлость, ни во мра́цѣ, ни въ ви́хрѣ, но во свѣ́тѣ бл҃года́ти бж҃їѧ: тѣ́мъ и҆ чꙋде́съ лꙋчѝ и҆спꙋща́ѧ свѣ́тлѡ, и҆сцѣле́нїѧ рѣ́ки и҆сточа́ѧ вѣ̑рнымъ ѿ гро́ба, ꙗ҆́кѡ жи́въ недꙋ́гѡвъ и҆сцѣли́тель, сегѡ̀ ра́ди зове́мъ є҆мꙋ̀: ра́дꙋйсѧ ѻ҆́ч҃е і҆ѡа́нне, свѣти́ло пресвѣ́тлое.
Пѣ́снь з҃. І҆рмо́съ:
Спасы́й во ѻ҆гнѝ а҆враа̑мскїѧ твоѧ̑ ѻ҆́троки, и҆ халдє́и ᲂу҆би́въ, ꙗ҆̀же пра́вда пра́веднѡ ᲂу҆ловлѧ́ше: препѣ́тый гдⷭ҇и бж҃е ѻ҆тє́цъ на́шихъ, бл҃гослове́нъ є҆сѝ.
Вы́шнею си́лою бж҃їѧ по́мощи, врагѝ низложи́лъ є҆сѝ, побѣдоно́сецъ бы́лъ є҆сѝ, зовы́й: препѣ́тый гдⷭ҇и бж҃е ѻ҆тє́цъ на́шихъ, бл҃гослове́нъ є҆сѝ.
Ѡ҆чи́стивъ мглꙋ̀ ѿ стра́сти бы́вшꙋю, безстра́стїемъ просвѣще́нїѧ ѡ҆зари́всѧ, зовы́й прпⷣбне, препѣ́тый гдⷭ҇и бж҃е ѻ҆тє́цъ на́шихъ, бл҃гослове́нъ є҆сѝ.
Оу҆ѧзви́въ дꙋ́шꙋ добродѣ́тельными лѣ́потами, красе́нъ добро́тою бы́лъ є҆сѝ, гдⷭ҇ꙋ пое́ши ра́дꙋѧсѧ: препѣ́тый гдⷭ҇и бж҃е ѻ҆тє́цъ на́шихъ, бл҃гослове́нъ є҆сѝ.
Бг҃оро́диченъ:
Призыва́ѧ ны̀ плѣнє́нныѧ, дв҃о, во є҆́же бѣ́хомъ въ нача́лѣ, во чре́во твоѐ всели́выйсѧ, вопло́щсѧ чл҃вѣколю́бецъ гдⷭ҇и.
Пѣ́снь и҃. І҆рмо́съ:
Ѻ҆́троки благочести̑выѧ въ пещѝ ржⷭ҇тво̀ бг҃оро́дичо спасло̀ є҆́сть: тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки.
Глаго́лы жи́зни вѣ́чныѧ, преблаже́нне, въ се́рдцы твое́мъ прїи́мъ, пло́ть ᲂу҆вѧди́лъ є҆сѝ: мі́рꙋ же ᲂу҆мертви́сѧ, живоно́снымъ ᲂу҆мерщвле́нїемъ ѡ҆дѣ́ѧвсѧ: гдⷭ҇а по́йте, и҆ превозноси́те є҆го̀ во всѧ̑ вѣ́ки.
Ми́лостива бы́ти, бг҃оно́сне, є҆ди́наго бл҃годѣ́телѧ молѝ, твою̀ пречестнꙋ́ю па́мѧть пра́зднꙋющымъ, согрѣше́нїй ѡ҆ставле́нїе си̑мъ дарова́ти.
Воззрѣ́нїемъ къ бг҃ꙋ непреста́ннѡ внима́ѧ, ѿѻнꙋ́дꙋже нѣ́коегѡ сїѧ́нїѧ зарю̀ прїи́мъ, свѣ́тъ неꙋгаси́мый ꙗ҆́кѡ зерца́ло посыла́еши, пою́щымъ: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки.
На лѣ́ствицꙋ къ небесѝ просте́ртꙋю, на не́йже ᲂу҆твержде́нъ гдⷭ҇ь ꙗ҆ви́сѧ, ѻ҆́ч҃е, вше́лъ є҆сѝ, бжⷭ҇твенными восхождє́нїи преспѣва́ѧ, прпⷣбне, до́ндеже дости́глъ є҆сѝ соверше́нїе жела́емыхъ, поѧ̀: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки.
Бг҃оро́диченъ:
Пое́мъ тѧ̀, ѡ҆бра́дованнаѧ, бг҃а бо воплоще́нна на́мъ родила̀ є҆сѝ. тѣ́мже тѧ̀ бцⷣꙋ всѝ и҆менꙋ́емъ, бг҃опрїѧ́тнꙋю ᲂу҆тро́бꙋ, добро́тꙋ і҆а́кѡвлю, гдⷭ҇и воспѣва́юще, и҆ превозносѧ́ще є҆го̀ во всѧ̑ вѣ́ки.
Пѣ́снь ѳ҃. І҆рмо́съ:
Є҆́ѵа ᲂу҆́бѡ недꙋ́гомъ преслꙋша́нїѧ клѧ́твꙋ всели́ла є҆́сть: ты́ же, дв҃о бцⷣе, прозѧбе́нїемъ чревоноше́нїѧ, мі́рови благослове́нїе процвѣла̀ є҆сѝ. тѣ́мъ тѧ̀ всѝ велича́емъ.
Слеза́ми по́стническими браздꙋ̀ напои́лъ є҆сѝ, ра́дꙋешисѧ, ѻ҆́ч҃е бг҃оно́сне, ны́нѣ ра́достїю рꙋкоѧ̑ти собира́ѧ подвигѡ́въ по́чєсти. тѣ́мже тѧ̀ всѝ ᲂу҆блажа́емъ.
Незаходи́мый возсїѧ̀ тебѣ̀ свѣ́тъ, присносꙋ́щее весе́лїе воспрїѧ̀, и҆дѣ́же ликꙋ́ѧ со а҆́гг҃лы ѻ҆крꙋ́гъ цр҃ѧ̀ и҆ гдⷭ҇а, вѣ́рою творѧ́щихъ па́мѧть твою̀ помина́й, ѻ҆́ч҃е всеблаже́нне.
Возмо́гъ де́мѡнѡвъ ᲂу҆бѣжа́ти стрѣлѧ́нїй и҆ кова́рствъ лꙋка́выхъ, спа́слсѧ є҆сѝ, блаже́нне. ѿѻнꙋ́дꙋже дꙋша̀ твоѧ̀ свѧта̀, чиста̀ и҆ нескве́рна, наслажде́нїѧ нбⷭ҇нагѡ сподо́бисѧ: помина́й чтꙋ́щыѧ тѧ̀.
Зако́номъ, ѻ҆́ч҃е, страда́льческимъ подвиза́ѧсѧ, и҆ побѣди́лъ є҆сѝ де́мѡнскїѧ полкѝ. тѣ́мже тѧ̀ сла́вою вѣнча́етъ, ꙗ҆́кѡ є҆ди́нъ бл҃годѣ́тель по́честей, и҆ бжⷭ҇твеннагѡ свѣтоѧвле́нїѧ сподо́би, бжⷭ҇твеннымъ наслажде́нїемъ.
Бг҃оро́диченъ:
Ꙗ҆́кѡ всѣ́хъ тва́рей творца̀ ро́ждши, бг҃ома́ти, превозшла̀ є҆сѝ всю̀ тва́рь бжⷭ҇твенною сла́вою, ст҃остїю и҆ бл҃года́тїю, и҆ всѧ́кїѧ добродѣ́тели бо́льши. тѣ́мже тѧ̀ всѝ велича́емъ.
Свѣти́ленъ. Подо́бенъ: Не́бо ѕвѣзда́ми:
А҆́гг҃льскагѡ житїѧ̀ жела́ѧ, ᲂу҆дали́лъ є҆сѝ себѐ въ пꙋсты́нѧхъ: и҆ стра̑сти покори́въ плотскі̑ѧ, ра́венъ а҆́гг҃лѡмъ ꙗ҆ви́лсѧ є҆сѝ, ѻ҆́ч҃е на́шъ і҆ѡа́нне бг҃оно́сне.
Два́жды.
Бг҃оро́диченъ:
Держа́внымъ твои́мъ покро́вомъ, ѿ вра̑гъ навѣ́та, чⷭ҇таѧ, твоѧ̑ рабы̑ соблюди́ ны всѧ̑ невре́дны: тѧ́ бо и҆́мамы є҆ди́нꙋ прибѣ́жище въ жена́хъ.
На хвали́техъ стїхи̑ры на д҃, гла́съ и҃. Поⷣ: Ѽ пресла́внагѡ чꙋдесѐ!
Прпⷣбне ѻ҆́ч҃е і҆ѡа́нне, ꙳ ты̀ и҆́го хрⷭ҇то́во на ра́мо взе́мъ, ꙳ до́блественнѣ наи́тїе ꙳ вра́жїе попра́лъ є҆сѝ. ꙳ тѣ́мъ тѧ̀ вѣ́рою всѝ почита́емъ, ꙳ ѽ пребл҃же́нне мона́шествꙋющихъ похвало̀! ꙳ тѣ́мже хрⷭ҇та̀ ꙳ непреста́ннѡ молѝ, ꙳ спастѝ дꙋ́шы на́шѧ.
Два́жды.
Вѣ́рою соше́дшесѧ всѝ, ꙳ ꙗ҆́кѡ по́стника тѧ̀ хрⷭ҇то́ва чествꙋ́емъ, і҆ѡа́нне. ꙳ ра́дꙋѧсѧ ᲂу҆́бѡ ше́ствовалъ є҆сѝ ꙳ въ пꙋсты́ни непрохо́днѣй, мꙋ́дре, наста́вникъ бы́въ че́стенъ. ꙳ тѣ́мже тебѣ̀ мы̀ вѣ́рою взыва́емъ, бл҃же́нне, ꙳ по́стникѡвъ похвало̀, ꙳ ѡ҆ на́съ моли́сѧ ко гдⷭ҇ꙋ, ꙳ поми́ловатисѧ дꙋша́мъ на́шымъ.
Прпⷣбне ѻ҆́ч҃е на́шъ, і҆ѡа́нне, ꙳ бꙋ́дꙋщїѧ ра́ди жи́зни, ꙳ въ ка́менныхъ про́пастехъ, и҆ въ дре́вѣ заключи́лсѧ є҆сѝ, ꙳ ника́коже боѧ́сѧ неви́димыхъ вра̑гъ, ꙳ мно́гащи толца̑нїѧ творѧ́щихъ къ тебѣ̀. ꙳ ты́ же моли́твами твои́ми си́хъ безъ вѣ́сти сотворѧ́лъ є҆сѝ, ꙳ ѽ терпѣли́вый дꙋше́ю! въ пꙋсты́ни ры́льстѣй, чꙋ́дное ѻ҆вча̀, ꙳ хрⷭ҇та̀ а҆́гнца па́стырѧ и҆мѣ́ѧ. ꙳ тѣ́мже вѣ́рою вси́ тѧ чти́мъ и҆ ᲂу҆блажа́емъ.
Сла́ва, гла́съ то́йже:
На не́бо текꙋ́щꙋю вше́дъ колесни́цꙋ, чꙋ́дне, добродѣ́телей, дости́глъ є҆сѝ кра́йнее житїѐ воздержа́нїемъ. въ пꙋсты́ни живы́й, смотрѧ́ѧ вы́шнѧгѡ і҆ерⷭ҇ли́ма красотꙋ̀, и҆ болѣ̑зни подвигѡ́въ досто́йнѡ по́чєсти прїи́мъ, съ нбⷭ҇ными ра́дꙋешисѧ чинонача̑лїи, пребл҃же́нне, вѣ́чныхъ бла̑гъ наслѣ́дникъ, црⷭ҇твїѧ жи́тель бы́въ: но моли́сѧ, бг҃оно́сне і҆ѡа́нне, сп҃сꙋ всѣ́хъ, ᲂу҆мири́ти мі́ръ и҆ спастѝ дꙋ́шы на́шѧ.
И҆ ны́нѣ, бг҃оро́диченъ.
Влⷣчце, прїимѝ моли́твы рабѡ́въ твои́хъ, и҆ и҆зба́ви на́съ ѿ всѧ́кїѧ нꙋ́жды и҆ печа́ли.
Славосло́вїе вели́кое. И҆ ѿпꙋ́стъ.
На лїтꙋргі́и: Бл҃жє́нна, ѿ канѡ́на ст҃а́гѡ пѣ́снь г҃-ѧ и҆ ѕ҃-ѧ. И҆ про́чаѧ слꙋ́жба прпⷣбническаѧ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.