← претходни дан | Минеј — Октобар | следећи дан →
15 октября: Преподобного Евфимия нового. Святого преподобномученика Лукиана, пресвитера великой Антиохии
Мѣ́сѧца тогѡ́же въ є҃і-й де́нь.
Прпⷣбнагѡ ѻ҆тца̀ на́шегѡ є҆ѵѳѵ́мїа но́вагѡ:
И҆ ст҃а́гѡ прпⷣбномꙋ́ченика лꙋкїа́на, пресвѵ́тера вели́кїѧ а҆нтїохі́и.
На Гдⷭ҇и, воззва́хъ, стїхи̑ры прпⷣбнагѡ, гла́съ д҃. Поⷣ: Ꙗ҆́кѡ до́блѧ:
Тѣ́сный пꙋ́ть ше́ствовалъ є҆сѝ, ꙳ нево́лненнымъ дꙋ́хомъ, ꙳ къ жи́зни ведꙋ́щимъ препла́ваѧ: ꙳ по́стникѡвъ бо ты̀ бы́лъ є҆сѝ хвала̀, є҆ѵѳѵ́мїе, ꙳ терпѣли́внѡ низложи́въ ꙳ де́мѡнскаѧ ловлє́нїѧ: ꙳ тѣ́мъ полꙋчи́лъ є҆сѝ ꙳ нбⷭ҇нагѡ црⷭ҇твїѧ наслѣ́дникъ бы́ти, ꙳ и҆ непрестаю́щїѧ наслажда́ешисѧ красоты̀.
Пресвѣ́тлое житїѐ твоѐ ꙳ а҆́гг҃лы ᲂу҆дивѝ, ꙳ и҆ де́мѡнскаѧ свирѣ̑пства ꙗ҆́вѣ ᲂу҆страшѝ: ꙳ вѣ́рныхъ же собра̑нїѧ свѣ́тло ᲂу҆красѝ, ꙳ къ нбⷭ҇номꙋ хрⷭ҇то́вꙋ жили́щꙋ ꙳ повелѣва́ѧ ше́ствовати всегда̀: ꙳ є҆го́же молѝ, ѿ тлѝ и҆ бѣ́дъ и҆зба́витисѧ, ꙳ вѣ́рою творѧ́щымъ ꙳ всечестнꙋ́ю па́мѧть твою̀.
Пѣснопѣ́нїе и҆ хвалꙋ̀ ꙳ хрⷭ҇тꙋ̀ приноси́лъ є҆сѝ на всѧ́къ де́нь, ѻ҆́ч҃е, ꙳ въ пꙋсты́ни жи́тельствꙋѧ, ꙳ є҆ди́номꙋ бг҃ꙋ возложи́въ дꙋ́шꙋ и҆ помышле́нїе, ꙳ ꙗ҆́кѡ вели́кїй мѡѷсе́й ꙳ въ нехѡ́днаѧ вше́лъ є҆сѝ: ꙳ тѣ́мъ побѣди́въ неви́димаго врага̀, ꙳ и҆ бы́лъ є҆сѝ чи́стое прїѧ́телище, ꙳ и҆ бжⷭ҇твеннагѡ дх҃а ѻ҆рга́нъ.
И҆́ны стїхи̑ры мꙋ́ченика, гла́съ то́йже. Поⷣ: Да́лъ є҆сѝ зна́менїе.
Сло́вомъ бжⷭ҇твеннагѡ зна́нїѧ, ꙳ ѡ҆богатѣ́въ вѣ́рою, ꙳ вѣ̑рныѧ ᲂу҆тверди́лъ є҆сѝ, ꙳ многоплетє́нныѧ мꙋ̑ки ꙳ и҆ ꙗ҆́рость мꙋчи́тельскꙋю терпѣ́ти де́рзостнѡ, ꙳ бꙋ́дꙋщїѧ ра́ди жи́зни, ꙳ и҆ нетлѣ́нныѧ ра́дости: ꙳ тѣ́мъ тѧ̀ ᲂу҆блажа́емъ, лꙋкїа́не достосла́вне, ꙳ и҆ бжⷭ҇твенное твоѐ дне́сь соверша́емъ торжество̀.
Темни́цꙋ многовре́меннꙋю, ꙳ и҆ нꙋ́жднѣйшꙋю сме́рть претерпѣ́лъ є҆сѝ, прпⷣбне, ꙳ ᲂу҆́зами свѧзꙋ́емь, ꙳ и҆ ѻ҆́стрыми чрепи́нами стрѣца́емь, бл҃же́нне, ꙳ и҆ неѧде́нїемъ лю́тымъ, ꙳ и҆ долго́тною жа́ждею ᲂу҆томлѧ́емь: ꙳ тѣ́мъ тѧ̀ нбⷭ҇наѧ пи́ща ꙗ҆́вѣ прїѧ́ла є҆́сть, ꙳ ꙗ҆́кѡ непобѣди́ма мꙋ́ченика, ꙳ страстоте́рпче до́блїй.
Нѣ́дро тѧ̀ морско́е прїе́мъ, сла́вне, ꙳ по три́десѧтихъ дне́хъ сꙋ́щи предае́тъ, ꙳ ꙗ҆́коже і҆ѡ́нꙋ дре́вле ѕвѣре́й слꙋже́нїемъ, ꙳ къ бг҃оче́стномꙋ погребе́нїю, ꙳ и҆ и҆сцѣле́нїй бжⷭ҇твенное и҆сточе́нїе, ꙳ мч҃никѡвъ нача́льное и҆збра́нїе, ꙳ цр҃кве ᲂу҆твержде́нїе, ꙳ моли́твенниче ѡ҆ дꙋша́хъ на́шихъ, ꙳ бг҃оно́сне пребога́те.
Сла́ва, гла́съ ѕ҃:
Прпⷣбне ѻ҆́ч҃е, во всю̀ зе́млю и҆зы́де вѣща́нїе и҆справле́нїй твои́хъ: тѣ́мъ на нб҃сѣ́хъ ѡ҆брѣ́лъ є҆сѝ мздꙋ̀ трꙋдѡ́въ твои́хъ, де́мѡнскїѧ погꙋби́лъ є҆сѝ полкѝ, а҆́гг҃льскїѧ же пости́глъ є҆сѝ чи́ны, и҆́хже житїю̀ непоро́чнѡ подража́лъ є҆сѝ: дерзнове́нїе и҆мѣ́ѧ ко хрⷭ҇тꙋ̀ бг҃ꙋ, ми́ръ и҆спросѝ дꙋша́мъ на́шымъ.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.
Подо́бенъ: Тридне́венъ:
Ви́дѧщи тѧ̀ распина́ема, хрⷭ҇тѐ, тебѐ ро́ждшаѧ, вопїѧ́ше: что̀ стра́нное є҆́же ви́жꙋ та́инство, сн҃е мо́й; ка́кѡ на дре́вѣ ᲂу҆мира́еши, пло́тїю повѣ́шенъ, жи́зни пода́телю;
На стїхо́внѣ ѻ҆ктѡ́иха, Сла́ва, гла́съ є҃:
Прпⷣбне ѻ҆́ч҃е, не да́лъ є҆сѝ сна̀ твои̑мъ ѻ҆чесє́мъ, ни вѣ́ждѡмъ твои̑мъ дрема́нїѧ, до́ндеже дꙋ́шꙋ и҆ тѣ́ло ѿ страсте́й свободи́лъ є҆сѝ, и҆ себѐ ᲂу҆гото́валъ є҆сѝ дх҃а жили́ще: прише́дъ бо хрⷭ҇то́съ со ѻ҆ц҃е́мъ, ѻ҆би́телище въ тебѣ̀ сотворѝ, и҆ є҆диносꙋ́щнѣй трⷪ҇цѣ ᲂу҆го́дникъ бы́лъ є҆сѝ, великопроповѣ́дниче є҆ѵѳѵ́мїе, моли́сѧ ѡ҆ дꙋша́хъ на́шихъ.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. Подо́бенъ: Ра́дꙋйсѧ:
А҆́гница своего̀ а҆́гнца и҆ногда̀ зрѧ́щи, къ заколе́нїю тща́щасѧ, ᲂу҆се́рднѡ послѣ́доваше, сїѧ̑ вопїю́щи є҆мꙋ̀: ка́мѡ и҆́деши, ча́до моѐ сладча́йшее, хрⷭ҇тѐ; чесѡ̀ ра́ди ско́рое тече́нїе сїѐ, долготерпѣли́ве, тече́ши нелѣ́ностнѡ; і҆и҃се возжелѣ́ннѣйшїй безгрѣ́шне, многоми́лостиве гдⷭ҇и, да́ждь мѝ сло́во рабѣ̀ твое́й, сн҃е мо́й вселюбе́знѣйшїй, не пре́зри ще́дре, молчѧ̀, тѧ̀ стра́ннѡ ро́ждшꙋю, бж҃е всеще́дре, да́рꙋѧй мі́рови ве́лїю ми́лость.
Тропа́рь, гла́съ и҃:
Въ тебѣ̀, ѻ҆́ч҃е, и҆звѣ́стнѡ спасе́сѧ, є҆́же по ѻ҆́бразꙋ: прїи́мъ бо кре́стъ, послѣ́довалъ є҆сѝ хрⷭ҇тꙋ̀, и҆ дѣ́ющи ᲂу҆чи́лъ є҆сѝ презира́ти ᲂу҆́бѡ пло́ть, прехо́дитъ бо, прилѣжа́ти же ѡ҆ дꙋшѝ ве́щи безсме́ртнѣй. тѣ́мже и҆ со а҆́гг҃лы сра́дꙋетсѧ, прпⷣбне є҆ѵѳѵ́мїе, дꙋ́хъ тво́й.
Сла́ва, мꙋ́ченика, гла́съ д҃:
Мч҃никъ тво́й, гдⷭ҇и, лꙋкїа́нъ, во страда́нїи свое́мъ вѣне́цъ прїѧ́тъ нетлѣ́нный ѿ тебє̀ бг҃а на́шегѡ: и҆мѣ́ѧй бо крѣ́пость твою̀, мꙋчи́телей низложѝ, сокрꙋшѝ и҆ де́мѡнѡвъ немощны̑ѧ де́рзѡсти. тогѡ̀ моли́твами спасѝ дꙋ́шы на́шѧ.
И҆ ны́нѣ, бг҃оро́диченъ.
На ᲂу҆́трени канѡ́нъ ѻ҆ктѡ́иха є҆ди́нъ: и҆ ст҃ы́хъ два̀.
Канѡ́нъ прпⷣбнагѡ, є҆гѡ́же краегране́сїе:
Ра́дꙋйсѧ, бжⷭ҇твеннаѧ мона́шествꙋющихъ сла́во.
Гла́съ а҃. Пѣ́снь а҃. І҆рмо́съ:
Грѧди́те, лю́дїе, пои́мъ пѣ́снь хрⷭ҇тꙋ̀ бг҃ꙋ, раздѣ́льшемꙋ мо́ре, и҆ наста́вльшемꙋ лю́ди, ꙗ҆̀же и҆зведѐ и҆з̾ рабо́ты є҆гѵ́петскїѧ, ꙗ҆́кѡ просла́висѧ.
Ра́дꙋйсѧ, и҆сто́чниче кипѧ́щїй стрꙋю̀ спаси́тельнꙋю, ѿ неѧ́же почерпа́емъ всѝ цѣле́бнꙋю бл҃года́ть прегрѣше́нїй, любо́вїю приходѧ́щымъ тебѣ̀, приснопа́мѧтне.
Ст҃ы́ню прїе́мъ ѿ хрⷭ҇та̀ бг҃а, ѿ ᲂу҆тро́бы, сла́вне, и҆ ꙗ҆ви́лсѧ є҆сѝ и҆збра́нный сосꙋ́дъ, дх҃а бл҃года́ть всю̀ прїе́мый, ѻ҆́ч҃е є҆ѵѳѵ́мїе.
Да жи́зни прича́стникъ нетлѣ́нныѧ ꙗ҆ви́шисѧ, вре́менныѧ, ѻ҆́ч҃е премꙋ́дре, небре́глъ є҆сѝ: и҆ бг҃ꙋ пристꙋ́пль, непреста́ннѡ мо́лиши, спасти́сѧ всѣ̑мъ на́мъ.
Бг҃оро́диченъ:
Глаго́лꙋ мꙋ́дромꙋ твои́хъ ᲂу҆сте́нъ послѣ́дꙋюще, ра́дꙋющесѧ, пренепоро́чнаѧ, тѧ̀ ᲂу҆блажа́емъ, бы́вшꙋю на́мъ винꙋ̀ неизрече́ннагѡ блаже́нства.
И҆́нъ канѡ́нъ мꙋ́ченика, є҆гѡ́же краегране́сїе:
Твою̀, лꙋкїа́не всеблаже́нне, пою̀ сла́вꙋ. Творе́нїе і҆ѡ́сифово.
Гла́съ д҃. Пѣ́снь а҃. І҆рмо́съ:
Воспою̀ тебѣ̀, гдⷭ҇и бж҃е мо́й, ꙗ҆́кѡ и҆зве́лъ є҆сѝ лю́ди и҆зъ рабо́ты є҆гѵ́петскїѧ, покры́лъ же є҆сѝ колесни̑цы фараѡ́нѡвы и҆ си́лꙋ.
Мꙋ́дростїю и҆ бл҃года́тїю и҆ си́лою дꙋхо́вною, лꙋкїа́не, возсїѧ́въ, просвѣти́лъ є҆сѝ лю́ди, и҆ къ позна́нїю хрⷭ҇то́вꙋ, мꙋ́чениче, наста́вилъ є҆сѝ.
Ѻ҆рꙋ́жїемъ благовѣ́рїѧ тѧ̀ защити́въ, и҆́же не́мощь на́шꙋ понесы́й ꙗ҆́кѡ благоꙋтро́бенъ, непобѣди́ма содѣ́ѧ тѧ̀, врагѡ́въ мꙋ́чениче, боре́нїємъ.
На высотꙋ̀ нбⷭ҇нꙋю во глꙋбинꙋ̀ ѕловѣ́рїѧ, страда́льче, па́дшихъ возвле́клъ є҆сѝ, мре́жами бжⷭ҇твенныхъ твои́хъ глагѡ́лъ, досточꙋ́дне.
Бг҃оро́диченъ:
Сло́во присносꙋ́щное ѻ҆́ч҃ее, сло́вомъ па́че вины̀ и҆ сло́ва, безъ сѣ́мене зачала̀ є҆сѝ, чи́стаѧ, и҆ родила̀ є҆сѝ въ на́ше и҆збавле́нїе.
Пѣ́снь г҃. І҆рмо́съ:
На ка́мени мѧ̀ вѣ́ры ᲂу҆тверди́въ, разшири́лъ є҆сѝ ᲂу҆ста̀ моѧ̑ на врагѝ моѧ̑, возвесели́босѧ дꙋ́хъ мо́й, внегда̀ пѣ́ти: нѣ́сть свѧ́тъ, ꙗ҆́коже бг҃ъ на́шъ, и҆ нѣ́сть пра́веденъ, па́че тебє̀, гдⷭ҇и.
Всесвѣ́тлый показа́лсѧ є҆сѝ, бг҃омꙋ́дре, сто́лпъ, наставлѧ́ѧ чи́ны мона́шествꙋющихъ: ѻ҆́блакъ же ѡ҆сѣнѧ́ющъ жре́бїй бж҃їй, ли́ца неви́димыхъ врагѡ́въ помрача́ющь, бл҃года́тїю всецр҃ѧ̀.
Стои́ши предъ лице́мъ твоегѡ̀ влⷣки, неѡсла́бнымъ манове́нїемъ молѧ́сѧ, и҆зба́витисѧ ста́дꙋ твоемꙋ̀ ѿ рабо́ты тмы̀, прпⷣбне, и҆ мꙋчи́тельства страсте́й, и҆ твои́хъ моли́твъ послꙋ́шаетъ бг҃ъ.
Пло́ти твоеѧ̀ двиза̑нїѧ ᲂу҆мертви́въ крѣ́пкимъ поще́нїемъ, бг҃оглаго́льниче, бы́лъ є҆сѝ ѻ҆би́телище влⷣки. є҆го́же ᲂу҆молѝ, и҆зба́витисѧ скорбе́й, и҆ страсте́й смꙋще́нїѧ, къ тебѣ̀ прибѣга́ющымъ.
Бг҃оро́диченъ:
Сви́токъ тѧ̀ прови́дѣ и҆са́їа, въ не́мже пло́тски сло́во зна́менасѧ, раздра́въ начерта́нїе первозда́ннагѡ, є҆́же престꙋпле́нїемъ подписа̀, и҆ подадѐ ѡ҆ставле́нїе рабо́ты на́мъ.
И҆́нъ. І҆рмо́съ:
Лꙋ́къ си́льныхъ и҆знемо́же, и҆ немощствꙋ́ющїи препоѧ́сашасѧ си́лою: сегѡ̀ ра́ди ᲂу҆тверди́сѧ въ гдⷭ҇ѣ се́рдце моѐ.
До́мъ добродѣ́телей свѣ́тлостїю, мꙋ́чениче, дꙋ́шꙋ твою̀ бг҃ꙋ соверши́лъ є҆сѝ, и҆ і҆́дѡльскїѧ хра́мы моли́твою твое́ю разори́лъ є҆сѝ.
Воспѣва́лъ є҆сѝ напа́стьми ѡ҆крꙋжа́емь, мч҃ниче, и҆ мꙋче́нїй болѣ́зньми ѡ҆скорблѧ́емь, таковы́хъ ꙗ҆́кѡ бл҃годѣ́телѧ благи́хъ сподо́бльшаго тѧ̀.
Тѣ́ло мꙋ́камъ преда́въ, мч҃ниче, дꙋ́шꙋ твою̀ небла́зненнѡ соблю́лъ є҆сѝ: же́ртвꙋ непоро́чнꙋ влⷣцѣ тѧ̀ сама́го прине́слъ є҆сѝ, всече́стне.
Бг҃оро́диченъ:
Ѿ дв҃ы млⷣнецъ ражда́етсѧ, содѣ́тельствовавый вѣ́ки хотѣ́нїемъ, ю҆́же воспѣва́емъ ꙗ҆́кѡ бцⷣꙋ, и҆ пра́веднѡ ᲂу҆блажа́емъ.
Конда́къ мꙋ́ченика, гла́съ в҃. Подо́бенъ: Въ мл҃твахъ.
Въ поще́нїи пе́рвѣе просїѧ́вшаго, и҆ во страда́нїи второ́е свѣтѧ́ща, всѝ ꙗ҆́кѡ свѣти́ло пресвѣ́тлѣйшее лꙋкїа́на пѣ́сньми сла́внѡ почти́мъ, молѧ́щаго непреста́ннѡ ѡ҆ всѣ́хъ на́съ.
Сѣда́ленъ прпⷣбнагѡ, гла́съ и҃. Подо́бенъ: Премꙋ́дрости:
Ѿре́ксѧ пло́ти хрⷭ҇та̀ ра́ди, и҆ дꙋхо́вный ꙗ҆ви́всѧ народоводи́тель, ᲂу҆слы́шалъ є҆сѝ словеса̀ та́йныхъ ᲂу҆че́нїй, мона́хѡвъ же ꙗ҆ви́лсѧ є҆сѝ пра́вило пра́вости, и҆ стра̑сти всѧ̑ крѣ́пкѡ попра́лъ є҆сѝ. тѣ́мъ и҆ де́мѡнѡвъ кова́рство до конца̀ и҆спепели́лъ є҆сѝ, къ немꙋ̀ зрѧ̀ всегда̀, бг҃оно́се. є҆ѵѳѵ́мїе, молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти чтꙋ́щымъ любо́вїю свѧтꙋ́ю па́мѧть твою̀.
Сла́ва, сѣда́ленъ мꙋ́ченика, гла́съ то́йже:
Бл҃года́ти сло́вомъ вѣ́рныхъ ᲂу҆маща́ѧ сердца̀, мч҃ниче лꙋкїа́не, страда́ти ᲂу҆стро́илъ є҆сѝ, и҆ побѣжда́ти мꙋчи́телѧ: и҆ до́брѣ соверши́въ тече́нїе бжⷭ҇твенное, и҆ по концѣ̀ сла́вы мч҃никѡвъ сподо́билсѧ є҆сѝ. тѣ́мъ соше́дшесѧ ст҃о́е твоѐ всѝ почита́емъ сконча́нїе, сп҃са прославлѧ́юще: страстоте́рпче прехва́льне, молѝ хрⷭ҇та̀ бг҃а, прегрѣше́нїй ѡ҆ставле́нїе пода́ти, чтꙋ́щымъ любо́вїю свѧтꙋ́ю па́мѧть твою̀.
И҆ ны́нѣ, бг҃оро́диченъ:
Сл҃нца ѻ҆́блаче разꙋ́мнагѡ, бжⷭ҇твеннагѡ свѣ́та свѣти́льниче златокова́нный, нескве́рнаѧ, небла́знаѧ, всенепоро́чнаѧ влⷣчце, ѡ҆мраче́ннꙋю дꙋ́шꙋ мою̀ ѡ҆слѣпле́нїемъ страсте́й, безстра́стїѧ заре́ю просвѣтѝ, молю́сѧ: и҆ ѡ҆скверне́нное моѐ се́рдце ѡ҆мы́й потѡ́ки ᲂу҆миле́нїѧ, покаѧ́нїѧ же слеза́ми, и҆ ѿ тимѣ́нїѧ мѧ̀ ѡ҆чи́сти дѣ́лъ мои́хъ, да любо́вїю зовꙋ́ ти: бцⷣе приснодв҃о, молѝ хрⷭ҇та̀ бг҃а прегрѣше́нїй ѡ҆ставле́нїе пода́ти мѝ, тебе́ бо и҆мѣ́ю наде́ждꙋ ра́бъ тво́й.
Крⷭ҇тобг҃оро́диченъ:
А҆́гнца и҆ па́стырѧ и҆ и҆зба́вителѧ а҆́гница зрѧ́щи на крⷭ҇тѣ̀, восклица́ше пла́чꙋщи, и҆ го́рькѡ рыда́ющи вопїѧ́ше: мі́ръ ᲂу҆́бѡ ра́дꙋетсѧ, прїе́млѧй тобо́ю и҆збавле́нїе, ᲂу҆тро́ба же моѧ̀ гори́тъ, зрѧ́щи твоѐ распѧ́тїе, є҆́же терпи́ши за милосе́рдїе ми́лости. долготерпѣли́ве, гдⷭ҇и, ми́лости бе́здно и҆ и҆сто́чниче неисчерпа́емый, ᲂу҆милосе́рдисѧ и҆ да́рꙋй согрѣше́нїй ѡ҆ставле́нїе вѣ́рою пою́щымъ бжⷭ҇твєнныѧ стра̑сти твоѧ̑.
Пѣ́снь д҃. І҆рмо́съ:
Пою́ тѧ, слꙋ́хомъ бо, гдⷭ҇и, ᲂу҆слы́шахъ и҆ ᲂу҆жасо́хсѧ: до менє́ бо и҆́деши, менѐ и҆щѧ̀ заблꙋ́ждшаго. тѣ́мъ мно́гое твоѐ снизхожде́нїе, є҆́же на мѧ̀, прославлѧ́ю, многоми́лостиве.
Жела́нїе бжⷭ҇твенное тѧ̀ распалѝ, разгрѣ́ѧвъ твоѐ се́рдце, и҆ жела̑ннаѧ пости́глъ є҆сѝ до конца̀, бг҃омꙋ́дре ѻ҆́ч҃е, ѡ҆ста́вль земны́хъ пристра́стїе, є҆диносе́льникъ вы́шнихъ бы́въ слꙋжи́телей.
Ласка̑нїѧ сопрꙋ́жницы, прпⷣбне, попра́лъ є҆сѝ всеѻбра́знѡ: вни́де бо раче́нїе содѣ́телѧ въ тѧ̀, бг҃омꙋ́дре, те́плѣ, и҆ содѣ́ѧнныхъ мра̑чнаѧ жела̑нїѧ до конца̀ ѿри́нꙋ.
На па́жить чи́стꙋ возгна́лъ є҆сѝ воздержа́нїѧ ста́до твоѐ, ѻ҆́ч҃е, и҆ ко и҆сто́чникꙋ приве́лъ є҆сѝ то́е немꙋ́тномꙋ безстра́стїѧ, мы́слєнныѧ ѕвѣ́ри побѣжда́ѧ, є҆́же и҆ ны́нѣ моли́твами твои́ми спаса́й.
Бг҃оро́диченъ:
Сѐ тебѐ ро́ди сла́вѧтъ родѡ́въ, ꙗ҆́коже прорекла̀ є҆сѝ, ѻ҆трокови́це: созда́телѧ бо была̀ є҆сѝ пала́та и҆ бжⷭ҇твенный хра́мъ, въ не́мже всели́сѧ высоча́йшїй, пло́тїю ѡ҆бло́жсѧ, да спасе́тъ на́съ.
И҆́нъ. І҆рмо́съ:
Сѣдѧ́й въ сла́вѣ на прⷭ҇то́лѣ бжⷭ҇тва̀, во ѻ҆́блацѣ ле́гцѣ прїи́де і҆и҃съ пребжⷭ҇твенный, нетлѣ́нною дла́нїю, и҆ спасѐ зовꙋ́щыѧ: сла́ва, хрⷭ҇тѐ, си́лѣ твое́й.
Крѣ́покъ на пре́лесть ꙗ҆ви́лсѧ є҆сѝ, бл҃же́нне, и҆ мнѡ́гимъ ѡ҆бꙋчи́тель къ бжⷭ҇твєннымъ подвигѡ́мъ всегда̀: терпѣ́нїемъ же мꙋ́къ некрѣ́пкꙋю смири́лъ є҆сѝ, мч҃ниче, крѣ́пость го́рдагѡ.
Распросте́ртъ на дре́вѣ, и҆ реме́нїемъ растѧга́емь, и҆ гла́домъ и҆ жа́ждею многовре́меннѡ ᲂу҆мꙋча́емь, и҆ то́нкими чрепи́нами настрѣка́емь, претерпѣ́лъ є҆сѝ, мꙋ́чениче хрⷭ҇то́въ достосла́вне.
Зако́нъ бжⷭ҇твенный проповѣ́даѧ, беззако́ннꙋющихъ ѡ҆брати́лъ є҆сѝ, и҆ и҆спи́ти ᲂу҆се́рднѡ ча́шꙋ мꙋче́нїѧ показа́лъ є҆сѝ: съ ни́миже въ бжⷭ҇твєнныѧ дворы̀ всели́лсѧ є҆сѝ, насыща́ѧсѧ дре́ва жи́зни, всеприснопа́мѧтне.
Бг҃оро́диченъ:
И҆зъ ᲂу҆тро́бы твоеѧ̀ возсїѧ́въ бжⷭ҇твенное сл҃нце, ꙗ҆̀же во тмѣ̀ многобо́жїѧ, ѻ҆трокови́це, просвѣтѝ, и҆ въ сѣ́ни сме́ртнѣй сꙋ́щыѧ ѡ҆сїѧ̀. є҆мꙋ́же взыва́емъ: сла́ва, хрⷭ҇тѐ, си́лѣ твое́й.
Пѣ́снь є҃. І҆рмо́съ:
Просвѣще́нїе во тмѣ̀ лежа́щихъ, спасе́нїе ѿча́ѧнныхъ, хрⷭ҇тѐ сп҃се мо́й, къ тебѣ̀ ᲂу҆́тренюю, цр҃ю̀ ми́ра, просвѣтѝ мѧ̀ сїѧ́нїемъ твои́мъ: и҆но́гѡ бо, ра́звѣ тебє̀, бо́га не зна́ю.
Ве́сь бг҃ꙋ прилѣжа̀ ѻ҆́ч҃е, въ пꙋсты́нѧхъ мра́зъ нощны́й претерпѣ́лъ є҆сѝ до́блественнѣ, и҆ дневны́й носѧ̀ ва́ръ: и҆ бы́лъ є҆сѝ до́мъ мꙋ́дрости бж҃їѧ, добродѣ́тельнымъ сїѧ́нїемъ многоѻбра́знѡ ᲂу҆краша́емь.
Ю҆́ношески настꙋпи́въ на поще́нїе, чревонеи́стовства ѕмі́ѧ не прїе́мь совѣ́тника, ѻ҆́ч҃е: но а҆́лчбою и҆ моли́твами непреста́нными, и҆ чистото́ю соедини́всѧ бг҃ꙋ, прича́стникъ бы́лъ є҆сѝ сла́дости лꙋ́чшїѧ.
Добродѣ́телей возше́дъ на ѻ҆́блаки, скрижа̑ли прїѧ́лъ є҆сѝ, блаже́нне, напи̑санныѧ рꙋко́ю бж҃їею, и҆ мона́шествꙋющихъ мно́жєства наꙋчи́лъ є҆сѝ, веще́ственныхъ всѣ́хъ ѡ҆ша́ѧтисѧ, возводѧ̀ на го́рꙋ бжⷭ҇твеннагѡ позна́нїѧ.
Бг҃оро́диченъ:
Ꙗ҆ви́ласѧ є҆сѝ, чⷭ҇таѧ, бг҃опра́ѻтцꙋ лѣ́ствица нб҃сѐ высоча́е, и҆мꙋ́щи созда́телѧ сѣдѧ́ща. и҆зъ тебє́ бо бг҃ъ вопло́щсѧ показа́сѧ, и҆ совокꙋпѝ разстоѧ̑щаѧсѧ пре́жде. тѣ́мъ тѧ̀ бцⷣꙋ вѣ́рнїи сла́вимъ.
И҆́нъ. І҆рмо́съ:
Нечести́вїи не ᲂу҆́зрѧтъ сла́вы твоеѧ̀, хрⷭ҇тѐ: но мы́ тѧ, є҆диноро́дне, ѻ҆ч҃ескїѧ сла́вы сїѧ́нїе бжⷭ҇тва̀, ѿ но́щи ᲂу҆́тренююще, воспѣва́емъ тѧ̀, чл҃вѣколю́бче.
Поже́гъ, прпⷣбне, те́рнїе страсте́й по́томъ поще́нїй, стрꙋѧ́ми погаси́лъ є҆сѝ трꙋдѡ́въ твои́хъ нече́стїѧ пе́щь доблемы́сленне, всебл҃же́нне.
Непрекло́ненъ ѡ҆блага́емь ча́стыми болѣ́зньми пребы́лъ є҆сѝ, къ бг҃ꙋ взира́ѧ, свѧ́те, спастѝ могꙋ́щемꙋ, є҆мꙋ́же въ рꙋ́цѣ преложи́лъ є҆сѝ дх҃а твоего̀ веселѧ́сѧ.
Оу҆дали́вшыѧсѧ бг҃а ѡ҆блича́лъ є҆сѝ ѕловѣ̑рныѧ, и҆ до́лгими болѣ́зньми, и҆ лю́тыми, сла́вне, ѡ҆крꙋжа́емь, хрⷭ҇тꙋ̀ прибли́жилсѧ є҆сѝ, є҆гѡ́же стрⷭ҇ть и҆з̾ѡбрази́лъ є҆сѝ.
Бг҃оро́диченъ:
По ржⷭ҇твѣ̀ нетлѣ́нна пребыла̀ є҆сѝ, чⷭ҇таѧ, и҆ тлѣ́нїѧ ро́дъ человѣ́ческїй, ꙗ҆́кѡ бг҃а ро́ждшаѧ свободи́ла є҆сѝ: сегѡ̀ ра́ди вѣ́рою тѧ̀ правосла́внѡ ᲂу҆блажа́емъ.
Пѣ́снь ѕ҃. І҆рмо́съ:
Ко гдⷭ҇ꙋ ѿ ки́та і҆ѡ́на возопѝ: ты́ мѧ возведѝ и҆зъ глꙋбины̀ а҆́да, молю́сѧ: да ꙗ҆́кѡ и҆зба́вителю во гла́сѣ хвале́нїѧ, и҆́стины же дх҃омъ пожрꙋ̀ тебѣ̀.
Пострѣка́емь влⷣчнею любо́вїю, ѡ҆ста́вилъ є҆сѝ всѧ̑ чꙋ́вствєннаѧ, и҆ томꙋ̀ послѣ́довалъ є҆сѝ, на ра́мена и҆́го ле́гкое взе́мъ мꙋ́жески, благодꙋ́шїѧ, тезоимени́те.
Нака́занъ неизрече́нныхъ зна́нїю, бл҃же́нне, наꙋчи́лъ є҆сѝ твоѐ ста́до нбⷭ҇наѧ мꙋ́дрствовати, и҆ страсте́й наше́ствїѧ ѿгонѧ̀ твои́ми поꙋче́ньми.
Житїѐ твоѐ подо́бно вы́шнихъ си́лъ, ѻ҆́ч҃е, бы́сть дерзнове́нїе тебѣ̀ дадѐ, є҆́же держа́лъ є҆сѝ всегда̀. страсте́й и҆зба́вити твоѐ ста́до, хрⷭ҇та̀ ᲂу҆молѝ.
Бг҃оро́диченъ:
Разꙋмѣ́въ твоѐ неизрече́нное, чⷭ҇таѧ, та́инство, го́рꙋ приѡсѣне́ннꙋю а҆ввакꙋ́мъ тѧ̀ провозвѣстѝ: и҆зъ тебє́ бо содѣ́тель за милосе́рдїе вопло́щсѧ, дре́внее ѿѧ́тъ и҆зрече́нїе.
И҆́нъ. І҆рмо́съ:
Пожрꙋ́ ти со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди ми́лости ѿ ре́бръ твои́хъ и҆сте́кшею кро́вїю.
Немо́креннѡ мꙋче́нїй преше́лъ є҆сѝ пꙋчи́нꙋ: всеси́льною же десни́цею ѿ глꙋбины̀ тѣ́ло твоѐ спасе́но бы́сть, лю́бѧщими тѧ̀, невре́дно, бг҃облаже́нне, ви́димо.
Ѿ ки́това чре́ва і҆ѡ́нꙋ и҆зба́вивый тридне́вновавша, спаса́етъ и҆ тѧ̀ глꙋбины̀ морскі́ѧ, слꙋжа́щымъ морски̑мъ ѕвѣрє́мъ, по дне́хъ три́десѧтихъ.
Любо́вїю хрⷭ҇то́вою распалѧ́емь, сла́вне, до сме́рти противоста́лъ є҆сѝ мꙋчи́телей, всемꙋ́дре: сегѡ̀ ра́ди црⷭ҇твїѧ нбⷭ҇нагѡ сподо́билсѧ є҆сѝ, веселѧ́сѧ.
Бг҃оро́диченъ:
Чи́стꙋю тѧ̀ голꙋби́цꙋ, и҆ є҆ди́нꙋ нескве́рнꙋю, пречⷭ҇тое ѡ҆брѣ́те сло́во, и҆ ѿ тебє̀ роди́тисѧ благоволѝ, прест҃а́ѧ бг҃ома́ти, всенепоро́чнаѧ дв҃о.
Конда́къ, гла́съ в҃. Подо́бенъ: Вы́шнихъ и҆щѧ̀:
Волне́нїй мно́жєства невла́жнѡ преходѧ̀, безплѡ́тныѧ врагѝ стрꙋѧ́ми сле́зъ твои́хъ крѣ́пкѡ погрꙋзи́лъ є҆сѝ, бг҃омꙋ́дре є҆ѵѳѵ́мїе, прпⷣбне: и҆ чꙋде́съ да́ръ прїе́мъ, и҆сцѣлѧ́еши стра̑сти всѧ̑кїѧ, молѝ непреста́ннѡ ѡ҆ всѣ́хъ на́съ.
І҆́косъ:
Ѿве́рзи моѧ̑ ᲂу҆ста̀, требл҃же́нне, благопрїѧ́тными твои́ми моли́твами, предстоѧ̀ бг҃ꙋ, всесла́вне є҆ѵѳѵ́мїе: да воспою̀ бжⷭ҇твенное твоѐ житїѐ, и҆ возглаго́лю досто́йнѡ добродѣ́тєли твоѧ̑, ꙗ҆̀же на землѝ хрⷭ҇та̀ ра́ди бг҃а соверши́лъ є҆сѝ прпⷣбнѡ. сто́лпъ бо ꙗ҆ви́лсѧ є҆сѝ и҆ пра́вило мона́хѡвъ свѣтлѣ́йшее, равноа́гг҃льное стѧжа́въ житїѐ: въ нехѡ́днаѧ и҆́стиннѡ всели́всѧ, молѝ непреста́ннѡ ѡ҆ всѣ́хъ на́съ.
Пѣ́снь з҃. І҆рмо́съ:
Кꙋпина̀ въ горѣ̀ ѻ҆гненеѡпа́льнаѧ, и҆ росоно́снаѧ пе́щь халде́йскаѧ, ꙗ҆́вѣ предписа́ тѧ, бг҃оневѣ́сто: бжⷭ҇твенный бо невеще́ственный въ веще́ственнѣмъ чре́вѣ ѻ҆́гнь неѡпа́льнѡ прїѧ́ла є҆сѝ. тѣ́мже и҆зъ тебє̀ ро́ждшемꙋсѧ пое́мъ: бл҃гослове́нъ є҆сѝ, бж҃е ѻ҆ц҃ъ на́шихъ.
А҆враа́мскїй стѧжа́въ нра́въ, премꙋ́дре, ѿ землѝ твоеѧ̀ пресе́льникъ бы́въ, и҆ бг҃а ᲂу҆зрѣ́лъ є҆сѝ, ѡ҆бѣщава́юща тѝ воздаѧ́нїе бога́тно. тѣ́мъ веселѧ́сѧ ᲂу҆се́рднѡ пѣ́лъ є҆сѝ: бл҃гослове́нъ є҆сѝ, бж҃е ѻ҆тє́цъ на́шихъ.
Распалѧ́емь дꙋ́хомъ, прпⷣбне, кѡ́зни вра̑жїѧ разори́лъ є҆сѝ, и҆ побѣ̑ды ѡ҆долѣ́нїѧ взѧ́лъ є҆сѝ, ѻ҆рꙋ́жїемъ ѡ҆гражде́нъ на́съ ра́ди пригвозди́вшагѡсѧ на крⷭ҇тѣ̀ влⷣки. тѣ́мъ веселѧ́сѧ ᲂу҆се́рднѡ пѣ́лъ є҆сѝ: бл҃гослове́нъ є҆сѝ, бж҃е ѻ҆тє́цъ на́шихъ.
Къ горѣ̀ моли́твы пристꙋпи́лъ є҆сѝ, и҆ вше́дъ во ѻ҆́блакъ дх҃а, бж҃їѧ за̑днѧѧ ви́дѣлъ є҆сѝ, и҆ сла́вꙋ прїе́мъ разсꙋжде́нїѧ, бы́въ, ѻ҆́ч҃е, сто́лпъ непоколеби́мь. тѣ́мъ прилѣ́жнѡ молѝ, и҆зба́витисѧ и҆скꙋше́нїѧ вра́жїѧ, пою́щымъ тѧ̀.
Бг҃оро́диченъ:
Зако́на и҆спо́лнителѧ родила̀ є҆сѝ, пре́жде вѣ̑къ гдⷭ҇а всѧ́ческихъ, сн҃а, мꙋ́дрость же и҆ си́лꙋ, напослѣ́докъ, пречⷭ҇таѧ, преесте́ственнѡ пло́тїю на ѡ҆бновле́нїе земны̑мъ. тѣ́мъ благоче́стнѡ, дв҃о чⷭ҇таѧ, бл҃гослове́нъ, и҆зъ тебє̀ ро́ждшемꙋсѧ зове́мъ, бж҃е ѻ҆тє́цъ на́шихъ.
И҆́нъ. І҆рмо́съ:
Спасы́й во ѻ҆гнѝ а҆враа́мскїѧ твоѧ̑ ѻ҆́троки, и҆ халдє́и ᲂу҆би́въ, ꙗ҆̀же пра́вда пра́веднѡ ᲂу҆ловлѧ́ше: препѣ́тый гдⷭ҇и, бж҃е ѻ҆тє́цъ на́шихъ, бл҃гослове́нъ є҆сѝ.
Стремле́нїѧ глагѡ́лъ твои́хъ мꙋ́дрыхъ, мꙋ́чениче, гони́тель не терпѧ̀ ᲂу҆мерщвлѧ́етъ тѧ̀, и҆ во глꙋбинꙋ̀ морскꙋ́ю помета́етъ, го́рнее хода́тайствꙋѧ тебѣ̀, ꙗ҆́кѡ недоꙋмѣва́ѧ, црⷭ҇твїе, доблемꙋ́дре, и҆ бжⷭ҇твеннꙋю сла́вꙋ.
Не поклони́всѧ и҆стꙋка̑ннымъ, колѣ́на же не поклони́въ і҆́дѡлѡмъ, во ѻ҆́гнь вве́рженъ скорбе́й, въ пе́щь мꙋчи́тельнꙋю вше́лъ є҆сѝ, ѡ҆роша́емь дх҃омъ, росода́тельною си́лою, бг҃омꙋ́дре мꙋ́чениче.
Оу҆мерщвлє́нныѧ и҆ во глꙋбинѣ̀ є҆́ллинскагѡ безбо́жїѧ пожрє́нныѧ лю́ди, живоно́сными твои́ми словесы̀ и҆звле́клъ є҆сѝ, пѣснопоѧ̀, досточꙋ́дне: препѣ́тый гдⷭ҇и, бж҃е ѻ҆тє́цъ на́шихъ, бл҃гослове́нъ є҆сѝ.
Бг҃оро́диченъ:
Бл҃гослове́нъ пло́дъ бл҃гослове́ннагѡ чре́ва твоегѡ̀, є҆го́же бл҃гословѧ́тъ нбⷭ҇ныѧ си̑лы, и҆ земны́хъ собо́ри, на́съ и҆зба́вльшаго клѧ́твы дре́внїѧ, бл҃гослове́ннаѧ.
Пѣ́снь и҃. І҆рмо́съ:
Въ пе́щь ѻ҆́гненнꙋю ко ѻ҆трокѡ́мъ є҆врє́йскимъ снизше́дшаго, и҆ пла́мень въ ро́сꙋ прело́жшаго бг҃а, по́йте дѣла̀, ꙗ҆́кѡ гдⷭ҇а, и҆ превозноси́те во всѧ̑ вѣ́ки.
Сле́зъ твои́хъ тече́ньми ѻ҆гнепа̑льныѧ сла̑сти и҆спепели́лъ є҆сѝ, гее́нскагѡ пла́мене стра́хъ ѿгна́лъ є҆сѝ, ѻ҆́ч҃е мꙋ́дре, соверше́нною любо́вїю созда́телѧ твоегѡ̀ сраствори́всѧ стра́хомъ, во всѧ̑ вѣ́ки.
Ꙗ҆́коже є҆нѡ́хъ къ бг҃ꙋ преста́вльсѧ, ѿ негѡ̀ прїѧ́тъ бы́лъ є҆сѝ, ѻ҆́ч҃е, и҆ съ вы́шними ли̑ки водворѧ́ѧсѧ пое́ши: всѧ̑ дѣла̀ гдⷭ҇а по́йте, и҆ превозноси́те во всѧ̑ вѣ́ки.
Ны́нѣ нетлѣ́нныхъ дарѡ́въ наслажда́ѧсѧ, и҆ трисо́лнечныѧ свѣ́тлости и҆сполнѧ́ѧсѧ, блаже́нне, пѣвцы̀ твоѧ̑ страсте́й и҆ тмы̀ моли́твами и҆зба́ви, да досто́йнѡ хрⷭ҇та̀ славосло́вимъ.
Бг҃оро́диченъ:
Клѧ́твꙋ разрѣши́ла є҆сѝ дре́внюю, пречⷭ҇таѧ, земны́хъ, неизрече́ннымъ сло́вомъ бг҃а заче́нши, воплоще́нна и҆зъ тебє̀ за милосе́рдїе, пренепоро́чнаѧ влⷣчце. є҆го́же превозно́симъ во вѣ́ки.
И҆́нъ. І҆рмо́съ:
Ѻ҆́троки благочести̑выѧ въ пещѝ ржⷭ҇тво̀ бг҃оро́дичо спасло̀ є҆́сть. тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки.
Гла́домъ мы́сленнымъ и҆ста́ѧвшыѧ, хлѣ́бомъ слове́съ твои́хъ ᲂу҆тверди́лъ є҆сѝ, є҆ди́наго чествова́ти гдⷭ҇а хлѣ́бъ жи́зни на́шеѧ наказа́въ, сла́вне. є҆мꙋ́же всѝ пои́мъ: гдⷭ҇а воспѣва́йте дѣла̀, и҆ превозноси́те є҆го̀ во всѧ̑ вѣ́ки.
Попра́въ лю̑таѧ кознодѣ̑йства врага̀ преле́стника страда́нїемъ твои́мъ, взѧ́лсѧ є҆сѝ на пресла́внꙋю высотꙋ̀, достосла́вне, и҆ а҆́гг҃льскїѧ дости́глъ є҆сѝ чи́ны, вопїѧ̀: гдⷭ҇а воспѣва́йте дѣла̀, и҆ превозноси́те є҆го̀ во всѧ̑ вѣ́ки.
Ѽ стра́нныхъ веще́й соверши́вшихсѧ на тебѣ̀, лꙋкїа́не терпѣли́вѣйше! нѣ́дро бо морско́е тѣ́ло твоѐ ст҃о́е на дово́льно прїе́мъ, не вредѝ є҆̀, сꙋ́ши же предае́тъ цѣ́ло, стрꙋи̑ и҆сцѣле́нїй точа́ще лю́бѧщымъ тѧ̀.
Бг҃оро́диченъ:
И҆ ѧ҆зы́комъ, дв҃о, и҆ се́рдцемъ, чⷭ҇тꙋю бцⷣꙋ тѧ̀ проповѣ́даемъ, гдⷭ҇а бо родила̀ є҆сѝ пло́тїю ѡ҆бложе́на, и҆ во двꙋ̀ є҆стєствꙋ̀ разꙋмѣва́ема: є҆го́же всѧ̑ си̑лы нбⷭ҇ныѧ славосло́вѧтъ во всѧ̑ вѣ́ки.
Пѣ́снь ѳ҃. І҆рмо́съ:
Ѿ бг҃а бг҃а сло́ва, неизрече́нною мꙋ́дростїю, прише́дшаго ѡ҆бнови́ти а҆да́ма, ꙗ҆́дїю въ тлѣ́нїе па́дшаго лю́тѣ, ѿ ст҃ы́ѧ дв҃ы неизрече́ннѡ воплоти́вшагосѧ на́съ ра́ди, вѣ́рнїи, є҆диномꙋ́дреннѡ пѣ́сньми велича́емъ.
Просвѣще́нъ добро́тою по́стничества, ѻ҆́ч҃е, и҆ ѡ҆дѣ́ѧнъ ри́зою нетлѣ́нїѧ, є҆ѵѳѵ́мїе, и҆ ᲂу҆вѧзе́нъ вѣнце́мъ дарѡ́въ па́че ᲂу҆ма̀, влⷣцѣ всѣ́хъ предстои́ши ра́дꙋѧсѧ.
Въ пребыва̑лища присноживꙋ̑щаѧ всели́лсѧ є҆сѝ, блаже́нне, и҆дѣ́же а҆пⷭ҇тѡлъ собо́ръ, и҆ мно́жество мꙋ́чєникъ, прпⷣбныхъ собра́нїе, прⷪ҇ро́кѡвъ ли́цы, болѣ́зней воздаѧ̑нїѧ ѿ бг҃а прїе́мь досто́йнѡ, бг҃омꙋ́дре достосла́вне.
Всесвѣ́телъ, бг҃оглаго́льниче, бы́лъ є҆сѝ, зарѧ́ми свѣ́та трисл҃нечнагѡ свѣ́тлѡ ѡ҆зарѧ́емь, и҆спросѝ прегрѣше́нїй разрѣше́нїе, лю́тыхъ и҆збавле́нїе, и҆ ѕлы́хъ ѿчꙋжде́нїе, всѣ̑мъ любо́вїю къ тебѣ̀ притека́ющымъ.
Бг҃оро́диченъ:
Воплоти́всѧ неизрече́ннѡ влⷣка всѣ́хъ и҆зъ тебє̀, бг҃ороди́тельнице марі́е, соверше́нъ бы́сть чл҃вѣ́къ, и҆ роди́всѧ, ꙗ҆́коже пре́жде рождества̀ дв҃ꙋ сохрани́ тѧ чи́стꙋ. є҆го́же молѝ, спастѝ ѿ бѣ́дъ дꙋ́шы на́шѧ.
И҆́нъ. І҆рмо́съ:
Є҆́ѵа ᲂу҆́бѡ недꙋ́гомъ преслꙋша́нїѧ, клѧ́твꙋ всели́ла є҆́сть, ты́ же, дв҃о бцⷣе, прозѧбе́нїемъ чревоноше́нїѧ мі́рови благослове́нїе процвѣла̀ є҆сѝ. тѣ́мъ тѧ̀ всѝ велича́емъ.
Свѣ́титсѧ, мꙋ́дре, свѧще́ннаѧ твоѧ̀ па́мѧть, зарѧ́ми дх҃а ѻ҆́блакъ страсте́й разгонѧ́щи, просвѣща́ющи же вѣ́рныхъ собра̑нїѧ, и҆ пожига́ющи де́мѡнскаѧ вѡ́инства: ю҆́же соверша́ющыѧ ны̀ сохранѧ́й.
Разрѣши́лсѧ є҆сѝ ѿ тѣле́сныхъ ᲂу҆́зъ, бл҃же́нне, и҆ къ высотѣ̀ нбⷭ҇нѣй ра́дꙋѧсѧ возлетѣ́лъ є҆сѝ, и҆ ꙗ҆ви́лсѧ є҆сѝ красе́нъ ꙗ҆́звъ ᲂу҆добре́ньми бг҃ꙋ творцꙋ̀: є҆мꙋ́же предстои́ши съ мч҃ники веселѧ́сѧ.
Мч҃никъ на́съ лꙋкїа́нъ совокꙋпѝ, похвали́ти тогѡ̀ стра̑сти дне́сь, и҆ свѣ̑тлыѧ по́двиги, и҆ є҆́же до конца̀ до́блесть, чꙋде́съ же бл҃года́ть ѻ҆би́льнꙋю. сего̀ всѝ согла́снѡ ᲂу҆блажа́емъ.
Бг҃оро́диченъ:
Мꙋ́дрости вмѣсти́лище па́че ᲂу҆ма̀ лꙋ́чшїѧ, ꙗ҆ви́ласѧ є҆сѝ, ѻ҆трокови́це чⷭ҇таѧ, ѡ҆дꙋшевле́нный прⷭ҇то́лъ же и҆ две́рь. тѣ́мъ тѧ̀ человѣ́честїи собо́ри и҆ а҆́гг҃льскаѧ сла́вѧтъ вѡ́инства, є҆ди́на всѣ́хъ преимꙋ́щаѧ.
Свѣти́ленъ. Подо́бенъ: Жєны̀ ᲂу҆слы́шите:
Мїрска́гѡ пристра́стїѧ ꙗ҆́кѡ трꙋ́дна и҆збѣ́глъ є҆сѝ, и҆ неѧде́нїемъ пло́ть ᲂу҆вѧди́лъ є҆сѝ: ѡ҆бнови́въ же дꙋше́внꙋю крѣ́пость, прпⷣбне, и҆ сла́вою ѡ҆богати́лсѧ є҆сѝ нбⷭ҇ною, приснопа́мѧтне. тѣ́мъ молѧ́сѧ не преста́й ѡ҆ на́съ ко гдⷭ҇ꙋ.
Бг҃оро́диченъ:
Оу҆жа́сно твоѐ предста́тельство, марі́е бг҃оꙋкра́шеннаѧ, и҆ стра́шнаѧ твоѧ̀ сла́ва все́й землѝ, бцⷣе: въ тебѣ́ бо ны́нѣ хва́лимсѧ, и҆ тѧ̀ хода́таицꙋ и҆мꙋ́ще къ сн҃ꙋ и҆ созда́телю твоемꙋ̀, неꙋсы́пною твое́ю моли́твою да спасе́мсѧ всѝ.
На стїхо́внѣ ѻ҆ктѡ́иха. Сла́ва, гла́съ в҃:
Прпⷣбне ѻ҆́ч҃е, и҆зъ младе́нства добродѣ́тель прилѣ́жнѡ и҆спра́вивъ, ѻ҆рга́нъ бы́лъ є҆сѝ ст҃а́гѡ дх҃а: и҆ ѿ тогѡ̀ прїе́мъ чꙋде́съ дѣ́йство, ᲂу҆вѣща́лъ є҆сѝ человѣ́ки преѡби́дѣти сла̑дкаѧ: ны́нѣ же бжⷭ҇твеннымъ свѣ́томъ чистѣ́е ѡ҆блиста́емь, просвѣтѝ и҆ на̑ша помышлє́нїѧ, ѻ҆́ч҃е є҆ѵѳѵ́мїе.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.
Подо́бенъ: Є҆гда̀ ѿ дре́ва:
Дре́вꙋ крⷭ҇тномꙋ тѧ̀, і҆и҃се, пригвожде́на, зрѧ́щи, неискꙋсобра́чнаѧ, пла́чꙋщи гл҃го́лаше: ча́до сла́дкое, почто̀ ѡ҆ста́вилъ є҆сѝ менѐ, ро́ждшꙋю тѧ̀ є҆ди́нꙋ, свѣ́те непристꙋ́пный пребезнача́льнагѡ ѻ҆ц҃а̀; потщи́сѧ и҆ просла́висѧ, ꙗ҆́кѡ да сла́вꙋ полꙋча́тъ бжⷭ҇твеннꙋю, и҆̀же бжⷭ҇твєнныѧ стрⷭ҇ти твоѧ̑ сла́вѧщїи.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.