← претходни дан | Минеј — Октобар | следећи дан →
3 октября: Святого священномученика Дионисия Ареопагита
Мѣ́сѧца тогѡ́же въ г҃-й де́нь.
Ст҃а́гѡ свѧщенномꙋ́ченика дїонѵ́сїа а҆реопагі́та.
На Гдⷭ҇и, воззва́хъ, стїхи̑ры на ѕ҃, гла́съ а҃. Поⷣ: Нбⷭ҇ныхъ чинѡ́въ:
Во внꙋ́треннѣйшїй мра́къ, ꙳ непристꙋ́пнагѡ свѣ́та ты̀ разꙋ́мнѡ вше́дъ, ꙳ навы́клъ є҆сѝ бжⷭ҇твєннаѧ недоꙋмѣ̑ннаѧ сло́ва, ꙳ ᲂу҆ченичѐ хрⷭ҇то́въ свѧще́нне дїонѵ́сїе, ꙳ и҆ а҆́гг҃льскїѧ чи́ны на землѝ ꙳ ꙗ҆́вственнѡ и҆з̾ѧсни́лъ є҆сѝ.
Трисїѧ́нною заре́ю просвѣти́въ твою̀ дꙋ́шꙋ, ꙳ и҆ ѻ҆гне́мъ веще́ственнымъ и҆знꙋрѧ́ющимъ тѣ́ло, ꙳ къ невеще́ственнѣй преста́вилсѧ є҆сѝ, ѻ҆́ч҃е, свѣ́тлости, ꙳ со а҆́гг҃лы совокꙋпи́лсѧ є҆сѝ: ꙳ съ ни́миже моли́сѧ непреста́ннѡ за на́съ, ꙳ спастѝ дꙋ́шы на́шѧ.
Па́стырски преизѧ́ществовавъ въ цр҃кви бж҃їей, ꙳ се́рдце твоѐ, ѻ҆́ч҃е, ꙳ прїѧ́тельно бл҃года́ти дх҃а содѣ́лалъ є҆сѝ. ꙳ тѣ́мже и҆ на́мъ и҆сточа́еши, ꙗ҆́кѡ во́ды, ꙳ ѿ честны́ѧ твоеѧ̀ ра́ки, ꙳ всегда̀ дїонѵ́сїе и҆сцѣлє́нїѧ.
И҆́ны стїхи̑ры. гла́съ то́йже. Подо́бенъ: Всехва́льнїи:
Оу҆́дицею бл҃года́ти мꙋ́дре, ꙳ па́ѵелъ бжⷭ҇твенный, ꙳ народовѣща́въ ᲂу҆ловѝ, ꙳ сщ҃енноѧвле́нна, ꙳ и҆ неизрече́нныхъ зри́телѧ содѣ́ла, ꙳ тѧ̀ сосꙋ́дъ и҆збра́нный ви́дѣвъ. ꙳ съ ни́мже молѝ, ꙳ благоглаго́ливе дїонѵ́сїе, ꙳ спастѝ любо́вїю пою́щыѧ тѧ̀.
А҆́гг҃лѡмъ равноче́стенъ ᲂу҆́мъ, ѻ҆́ч҃е дїонѵ́сїе, ꙳ добродѣ́тели ра́ди содѣ́лавъ, ꙳ премі́рное свѧщеннонача́льства ꙳ благочи́нїе, всемꙋ́дре, си́хъ свѧщенноповѣствова́лъ є҆сѝ, ꙳ и҆́миже ᲂу҆чини́лъ є҆сѝ ꙳ цр҃кѡ́внаѧ составлє́нїѧ, ꙳ нбⷭ҇нымъ чинѡ́мъ подо́бѧсѧ.
Любомꙋдрѣ́йше бг҃ꙋ, ꙳ бл҃же́нне дїонѵ́сїе, ꙳ ꙗ҆́кѡ мо́щно сподо́бѧсѧ, ꙳ и҆менова́нїй твоѐ та́инственнѡ бжⷭ҇твенныхъ, ꙳ благоче́стнѡ распросте́рлъ є҆сѝ, ꙳ бжⷭ҇твенное, бг҃омꙋ́дре, сказа́нїе, є҆дине́нїе, є҆дине́нїемъ лꙋ́чшимъ, ꙳ навы́къ ꙗ҆̀же па́че мы́сли, ꙳ и҆ наꙋчи́лъ є҆сѝ мі́ра концы̀.
Сла́ва, гла́съ в҃. А҆ндре́а і҆ерꙋсали́мскагѡ.
Прїиди́те, вѣ́рнїи, согла́снѡ лѣ́тнюю па́мѧть і҆ера́рхѡвъ похва́лимъ, дїонѵ́сїа же и҆ кѷпрїа́на: ѻ҆́въ бо ѡ҆плева́въ сто́їкѡвъ фїлосо́фѡвъ, и҆ сосꙋ́домъ и҆збра́ннымъ наꙋчи́всѧ, неизрече́нныхъ та̑инъ зна́тель бы́сть. ѻ҆́въ же до́брыѧ ра́ди дѣ́вы і҆ꙋсті́ны, по́мыслъ просвѣти́въ, де́мѡнскїѧ пре́лести и҆збѣжѐ, и҆ волшє́бныѧ кни̑ги ѻ҆гне́мъ и҆зже́гъ, є҆ѵⷢ҇льскїй проповѣ́дникъ бы́сть. тѣ́мъ и҆ мы̀ грѣ́шнїи просла́вльшемꙋ сїѧ̑ сп҃сꙋ славосло́вѧще, возопїи́мъ: и҆́же твоѧ̑ страстоте́рпцы сла́вою вѣнча́вый, хрⷭ҇тѐ бж҃е, тѣ́хъ моли́твами спасѝ дꙋ́шы на́шѧ.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. Поⷣ: Є҆гда̀ ѿ дре́ва:
Є҆гда̀ нескве́рнаѧ а҆́гница ви́дѣ своего̀ а҆́гнца, на заколе́нїе ꙗ҆́кѡ чл҃вѣ́ка во́лею влеко́ма, пла́чꙋщи глаго́лаше: безча́дствовати мѧ̀ ны́нѣ тщи́шисѧ, хрⷭ҇тѐ, ро́ждшꙋю тѧ̀. что̀ сїѐ сотвори́лъ є҆сѝ, и҆зба́вителю всѧ́ческихъ; ѻ҆ба́че воспѣва́ю и҆ сла́влю твою̀ ю҆́же па́че ᲂу҆ма̀ и҆ слова̀ кра́йнюю бла́гость, чл҃вѣколю́бче.
На стїхо́внѣ ѻ҆ктѡ́иха. Сла́ва, гла́съ д҃:
Нбⷭ҇нагѡ зна́нїѧ неви́димꙋю глꙋбинꙋ̀ тебѐ нарече́мъ, свѣтлѣ́йшїй мч҃ниче хрⷭ҇то́въ: ꙗ҆́кѡ бо ѻ҆рꙋ́жника и҆ тве́рда побо́рника цр҃кве воспѣва́емъ тѧ̀, мꙋ́дре: ѻ҆гне́мъ бо чистѣ́йшимъ просїѧ́лъ є҆сѝ, сподо́бивсѧ вкꙋ́пѣ съ вы́шними воинствослѡ́вїи, свѣ́тлою ѻ҆де́ждею ѡ҆блещи́сѧ хрⷭ҇та̀, и҆ ѡ҆зари́въ ᲂу҆́мъ свѣ́тлостїю дх҃а ст҃а́гѡ, дїонѵ́сїе. тѣ́мъ твою̀ всемі́рнꙋю па́мѧть торжествꙋ́имъ вѣ́рнѡ, сла́вѧще просла́вльшаго тѧ̀ гдⷭ҇а.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. Поⷣ: Ꙗ҆́кѡ до́блѧ:
А҆́гнца и҆ па́стырѧ тѧ̀ ꙳ на дре́вѣ ꙗ҆́кѡ ви́дѣ ꙳ а҆́гница ро́ждшаѧ рыда́ше, ꙳ и҆ мт҃рски тѝ вѣща́ше: сн҃е возжелѣ́нне, ꙳ ка́кѡ на дре́вѣ крⷭ҇тнѣмъ повѣ́шенъ є҆сѝ, долготерпѣли́ве; ꙳ ка́кѡ рꙋ́цѣ и҆ но́зѣ твоѝ, сло́ве, ꙳ пригвозди́шасѧ ѿ беззако́нныхъ, ꙳ и҆ кро́вь твою̀ и҆злїѧ́лъ є҆сѝ, влⷣко;
Тропа́рь, гла́съ д҃:
Бла́гости наꙋчи́всѧ, и҆ трезвѧ́сѧ во всѣ́хъ благо́ю со́вѣстїю свѧщеннолѣ́пнѡ ѡ҆бо́лксѧ, поче́рплъ є҆сѝ ѿ сосꙋ́да и҆збра́ннагѡ неизречє́ннаѧ, и҆ вѣ́рꙋ соблю́дъ, ра́вное тече́нїе соверши́лъ є҆сѝ, свѧщенномꙋ́чениче дїонѵ́сїе: молѝ хрⷭ҇та̀ бг҃а, спасти́сѧ дꙋша́мъ на́шымъ.
Сла́ва, и҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.
На ᲂу҆́трени, на Бг҃ъ гдⷭ҇ь, тропа́рь ст҃а́гѡ, два́жды. Сла́ва, и҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. Ѻ҆́ба канѡ́на ѻ҆ктѡ́иха со і҆рмосо́мъ на и҃, безъ мꙋ́ченичнѡвъ, и҆ ст҃а́гѡ на ѕ҃. Є҆гѡ́же краегране́сїе: Оу҆́мъ хвалю̀ мꙋ́дрыхъ ᲂу҆че́нїй. Ѳеофа́нъ.
Гла́съ и҃. Пѣ́снь а҃. І҆рмо́съ:
Во́дꙋ проше́дъ ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ.
Па́ѵломъ бжⷭ҇твеннымъ наꙋче́нъ, нбⷭ҇ныхъ, дїонѵ́сїе, ви́дцемъ, нбⷭ҇ный таи́нникъ а҆́бїе и҆ бг҃овѣща́тель бы́лъ є҆сѝ.
И҆́же бл҃года́тїю бж҃їею ѡ҆зари́всѧ, просвѣтѝ, бл҃же́нне, пою́щихъ тѧ̀ дꙋ́шы, твоѧ̑ разꙋмѣ́ти бг҃одохновє́ннаѧ ᲂу҆чє́нїѧ, дїонѵ́сїе.
Оу҆мо́мъ преѡчище́ннымъ и҆ дꙋше́ю, нбⷭ҇ныхъ ᲂу҆добре́нїй сїѧ̑нїѧ ᲂу҆вѣ́дѣти сподо́билсѧ є҆сѝ, и҆ тѣ́хъ ликостоѧ̑нїѧ, дїонѵ́сїе.
Бг҃оро́диченъ:
Черто́гъ свѣтоно́сный, па́че ᲂу҆ма̀ воплоще́нїѧ ꙗ҆ви́ласѧ є҆сѝ всѣ́хъ содѣ́телѧ: и҆зъ тебє́ бо пло́ть, бг҃ома́ти, на́шꙋ ѡ҆дѣ́ѧлъ є҆́сть.
Пѣ́снь г҃. І҆рмо́съ:
Нбⷭ҇нагѡ крꙋ́га верхотво́рче, гдⷭ҇и, и҆ цр҃кве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе, є҆ди́не чл҃вѣколю́бче.
Нбⷭ҇ныхъ крꙋгѡ́въ превозше́дъ, ѻ҆́ч҃е, премі́рныхъ чи́ны, и҆ вѡ́инства и҆ свѣ́тлѡсти, высоковѣща́ньми слове́съ и҆ всемꙋ́дрыми ᲂу҆чє́нїи всѣ̑мъ и҆з̾ѧсни́лъ є҆сѝ.
Высо́кагѡ видѣ́нїѧ насы́щсѧ, прпⷣбне, и҆ме́нъ бжⷭ҇твенныхъ, бжⷭ҇твенное разꙋмѣ́нїе бг҃осло́вилъ є҆сѝ, трⷪ҇чный бг҃осло́въ бы́въ бл҃года́тїю, бг҃облаже́нне дїонѵ́сїе.
Оу҆мертви́всѧ ны́нѣшнимъ жела́нїемъ, є҆́же къ бг҃ꙋ, и҆ любомꙋ́дрїю крѣ́пкѡ наꙋчи́всѧ, сꙋ́щымъ па́че ᲂу҆ма̀ животвѡ́рнымъ дарова́нїємъ, бг҃оно́сный ѻ҆рга́нъ, ѻ҆́ч҃е, бы́лъ є҆сѝ.
Бг҃оро́диченъ:
Дѣѧ́нїемъ дв҃о, вседѣ́тельнагѡ дх҃а, тѣ́ло влⷣцѣ всѣ́хъ плодоноси́ла є҆сѝ, въ не́мже ѡ҆сꙋди́сѧ мі́ра грѣ́хъ и҆ жи́знь и҆сточи́сѧ вѣ́чнꙋющаѧ.
Сѣда́ленъ, гла́съ и҃. Подо́бенъ: Премꙋ́дрости:
Въ пꙋчи́нѣ премꙋ́дрости ᲂу҆чѧ̀, дх҃а глꙋбины̀, трⷪ҇цы є҆ди́но бж҃ество̀ проповѣ́далъ є҆сѝ, прпⷣбне, списа́въ всѧ̑ а҆́гг҃льскїѧ чи́ны, и҆ та̑йнаѧ тѣ́хъ сїѧ̑нїѧ, бг҃омꙋ́дре. тѣ́мъ и҆ ни́жнюю і҆ера́рхїю счинѧ́ѧ, ко є҆ди́номꙋ всѧ̑ возве́лъ є҆сѝ є҆ди́нствꙋ, і҆ера́рше дїонѵ́сїе. молѝ хрⷭ҇та̀ бг҃а, прегрѣше́нїй ѡ҆ставле́нїе дарова́ти чествꙋ́ющымъ любо́вїю свѧтꙋ́ю па́мѧть твою̀.
Два́жды.
Сла́ва, и҆ ны́нѣ, бг҃оро́диченъ:
Сл҃нца ѻ҆́блаче разꙋ́мнагѡ, бжⷭ҇твеннагѡ свѣ́та свѣти́льниче златокова́нный, нескве́рнаѧ, небла́знаѧ, всенепоро́чнаѧ влⷣчце, ѡ҆мраче́ннꙋю дꙋ́шꙋ мою̀ ѡ҆слѣпле́нїемъ страсте́й, безстра́стїѧ заре́ю просвѣтѝ, молю́сѧ. и҆ ѡ҆скверне́нное моѐ се́рдце ѡ҆мы́й потѡ́ки ᲂу҆миле́нїѧ, покаѧ́нїѧ же слеза́ми, и҆ ѿ тимѣ́нїѧ мѧ̀ ѡ҆чи́сти дѣ́лъ мои́хъ, да любо́вїю зовꙋ́ ти: бцⷣе приснодв҃о, молѝ хрⷭ҇та̀ бг҃а, прегрѣше́нїй ѡ҆ставле́нїе пода́ти мѝ: тебе́ бо и҆мѣ́ю наде́ждꙋ ра́бъ тво́й.
Крⷭ҇тобг҃оро́диченъ:
А҆́гнца и҆ па́стырѧ и҆ и҆зба́вителѧ а҆́гница зрѧ́щи на крⷭ҇тѣ̀, восклица́ше пла́чꙋщи, и҆ го́рькѡ рыда́ющи вопїѧ́ше: мі́ръ ᲂу҆́бѡ ра́дꙋетсѧ, прїе́млѧй тобо́ю и҆збавле́нїе, ᲂу҆тро́ба же моѧ̀ гори́тъ, зрѧ́щи твоѐ распѧ́тїе, є҆́же терпи́ши за милосе́рдїе ми́лости, долготерпѣли́ве гдⷭ҇и, ми́лости бе́здно и҆ и҆сто́чниче неисчерпа́емый, ᲂу҆милосе́рдисѧ и҆ да́рꙋй согрѣше́нїй ѡ҆ставле́нїе вѣ́рою пою́щымъ бжⷭ҇твєнныѧ стра̑сти твоѧ̑.
Пѣ́снь д҃. І҆рмо́съ:
Ты̀ моѧ̀ крѣ́пость, гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а, и҆ на́шꙋ нищетꙋ̀ посѣти́въ. тѣ́мъ съ прⷪ҇ро́комъ а҆ввакꙋ́момъ зовꙋ́ ти: си́лѣ твое́й сла́ва, чл҃вѣколю́бче.
Церко́вное благочи́нїе ᲂу҆краси́лъ є҆сѝ: въ ни́хъ бо, ѻ҆́ч҃е, живописа́лъ є҆сѝ зра̑чныѧ ѻ҆́бразы ꙗ҆́вственнѡ свѧщеннописа́нїемъ без̾ѻбра́зныхъ си́лъ: и҆́миже тайново́дѧтсѧ, и҆ просвѣща́ютсѧ всѧ̑ вѣ́рныхъ, бг҃омꙋ́дре, собо́ры.
Стрꙋи̑ твоегѡ̀ бг҃осло́вїѧ, бг҃опрїѧ́тне, цвѣтникѝ напаѧ́ютъ словє́сныѧ, присноцвѣтꙋ́щыѧ ѕѣлѡ̀, и҆ насаждє́нныѧ на пра́вости бг҃осло́вїѧ: є҆ди́нство бо сꙋщества̀ въ трїе́хъ ли́цѣхъ, честно́е є҆динонача́лїе проповѣ́далъ є҆сѝ.
А҆́гг҃льскагѡ свѧщеннонача́льства си́льное, ст҃и́телю, жела́нїе и҆ раче́нїе, є҆́же къ бг҃ꙋ, и҆ неꙋкло́нное ма́нїе къ высотѣ̀ бжⷭ҇твеннѣй и҆ непостижи́мѣй, наꙋчи́лъ є҆сѝ бг҃омꙋ́дреннѡ вѣ́рою вопїю́щыѧ: си́лѣ твое́й сла́ва, чл҃вѣколю́бче.
Бг҃оро́диченъ:
Сщ҃еннодѣ́йствитель спасе́нїѧ бы́сть сн҃ъ тво́й всѣ̑мъ пою́щымъ тѧ̀, и҆ наста́вникъ и҆ просвѣти́тель, и҆ пра́вда, дв҃о, и҆ и҆збавле́нїе. тѣ́мъ тѧ̀ бцⷣꙋ и҆́стиннѡ и҆ гдⷭ҇ьственнѡ вѣ́рнїи є҆диномꙋ́дреннѡ сла́вимъ.
Пѣ́снь є҃. І҆рмо́съ:
Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннаго, но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.
Глагѡ́лъ твои́хъ вѣща́нїе, ꙗ҆́кѡ нѣ́кїй небе́сный шꙋ́мъ носи́мь, безбѡ́жныѧ ра́зꙋмы ѡ҆громѝ сло́вомъ бл҃года́ти, и҆ велѣ́нїй бжⷭ҇твенныхъ зарѧ́ми свѣтлѣ́йшими вѣ́рныхъ сердца̀ просвѣтѝ.
Оу҆подо́билсѧ є҆сѝ кꙋпцꙋ̀, и҆́щꙋщемꙋ дѡ́брыѧ би́серы, всебога́те, и҆ ѡ҆брѣ́лъ є҆сѝ є҆ди́нъ би́серъ и҆́стиннѡ многоцѣ́ненъ: и҆ ᲂу҆ди́вльсѧ є҆гѡ̀ бг҃отво́рнꙋ свѣтоверже́нїю, ст҃и́телю, бг҃а и҆сповѣ́далъ є҆сѝ.
И҆сто́чникъ мꙋ́дрости, любомꙋ́дрѣйше ѻ҆́ч҃е, возлюби́лъ є҆сѝ, и҆ тоѧ̀ раче́нїемъ и҆ любо́вїю ѡ҆держи́мь, вели́къ бы́лъ є҆сѝ, и҆ рѣ̑ки бжⷭ҇твенныхъ велѣ́нїй всегда̀ то́чиши, бг҃огла́се.
Бг҃оро́диченъ:
Ꙗ҆́кѡ ѡ҆бра́дованнаѧ, добротворѧ́щее прїѧ́ла є҆сѝ бл҃голѣ́пїе, всѧ̑ є҆ди́нѣмъ хотѣ́нїемъ сотво́ршагѡ, и҆ бжⷭ҇твенною добро́тою, и҆ просвѣще́нїемъ благовѣ́рїѧ, бг҃ома́ти, на́съ ᲂу҆добри́вшагѡ.
Пѣ́снь ѕ҃. І҆рмо́съ:
Ѡ҆чи́сти мѧ̀, сп҃се, мнѡ́га бо беззакѡ́нїѧ моѧ̑, и҆ и҆зъ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е спасе́нїѧ моегѡ̀.
Зако́ннѡ любомꙋ́дрствꙋѧ, мꙋ́дрости да́ръ полꙋчи́лъ є҆сѝ. бжⷭ҇твеннѣ бг҃осло́вѧ, правосла̑вныѧ догма́ты, всебл҃же́нне, ѡ҆ста́вилъ є҆сѝ, и҆́хже наслажда́ющесѧ вѣ́рнїи тѧ̀ блажи́мъ.
Ра́зꙋмомъ бг҃олѣ́пнымъ, бг҃омꙋ́дре, ᲂу҆добрѧ́емь, бжⷭ҇твенномꙋ ᲂу҆чи́телю слꙋ́хъ тво́й приклони́лъ є҆сѝ, и҆ премі́рнꙋю ѿ негѡ̀ мꙋ́дрость навы́клъ є҆сѝ, дїонѵ́сїе.
Житїѐ твоѐ чꙋ́дно, сло́во же ди́внѣйше, ѧ҆зы́къ тво́й свѣтоза́ренъ, ᲂу҆ста̀ ѻ҆гнедохновє́нна и҆ дꙋходви̑жима, ᲂу҆́мъ же тво́й и҆спы́тенъ ѻ҆́ч҃е, бг҃облаже́нне.
Бг҃оро́диченъ:
Гла́съ тѝ гаврїи́ловъ ра́достнѡ, дв҃о, взыва́емъ вѣ́рнїи: и҆зъ тебе́ бо неизрече́ннѡ на́мъ живонача́льный творе́цъ и҆зше́лъ є҆́сть, и҆ примѣси́сѧ человѣ́кѡмъ, чл҃вѣколю́бецъ.
Конда́къ, гла́съ и҃. Подо́бенъ: Взбра́нной:
Нбⷭ҇наѧ врата̀ проше́дъ дꙋ́хомъ, ꙗ҆́кѡ ᲂу҆чени́къ, до тре́тїѧгѡ нб҃сѐ дости́гшагѡ а҆пⷭ҇ла, дїонѵ́сїе, неизрече́нныхъ ѡ҆богати́лсѧ є҆сѝ всѧ́кимъ ра́зꙋмомъ, и҆ ѡ҆зари́лъ є҆сѝ во тмѣ̀ невѣ́дѣнїѧ сѣдѧ́щыѧ. тѣ́мже зове́мъ: ра́дꙋйсѧ, ѻ҆́ч҃е всемі́рный.
І҆́косъ:
А҆́гг҃лъ ѿ человѣ́кѡвъ, добродѣ́тельми бы́въ вели́кїй, дїонѵ́сїй, ве́сь ꙗ҆́кѡ крила́тъ навы́че ᲂу҆мо́мъ нбⷭ҇ныѧ ра́зꙋмы. тѣ́мъ пѣ́сньми ꙗ҆́кѡ а҆́гг҃ла почти́мъ, вопїю́ще къ немꙋ̀ такѡва́ѧ: ра́дꙋйсѧ, ᲂу҆вѣ́дѣвый хрⷭ҇та̀ па́ѵломъ. ра́дꙋйсѧ, мнѡ́гїѧ ко хрⷭ҇тꙋ̀ ѡ҆брати́вый. ра́дꙋйсѧ, многобо́жїѧ храмѡ́въ гꙋби́телю. ра́дꙋйсѧ, бг҃оразꙋ́мнагѡ совѣ́та смотре́нїе. ра́дꙋйсѧ, кни́го бг҃оначерта́ннаѧ та́йныхъ сокро́вищъ. ра́дꙋйсѧ, скрижа́ль бг҃озра́чнаѧ, и҆ зерца́ло нбⷭ҇ное. ра́дꙋйсѧ, ꙗ҆́кѡ стрⷭ҇ть гдⷭ҇ню ви́дѣлъ є҆сѝ. ра́дꙋйсѧ, ꙗ҆́кѡ ᲂу҆се́рднѡ тогѡ̀ ра́ди закала́ешисѧ. ра́дꙋйсѧ, и҆сто́чниче, и҆сточа́ѧ ра́зꙋмъ. ра́дꙋйсѧ, ка́пле, ᲂу҆гаша́ющи безꙋ́мїе. ра́дꙋйсѧ, стезѐ неле́стнаѧ спасе́нїѧ. ра́дꙋйсѧ, прегра́до нечести́выхъ прехо́да. ра́дꙋйсѧ, ѻ҆́ч҃е всемі́рный.
Пѣ́снь з҃. І҆рмо́съ:
Бж҃їѧ снисхожде́нїѧ ѻ҆́гнь ᲂу҆стыдѣ́сѧ въ вавѷлѡ́нѣ и҆ногда̀, сегѡ̀ ра́ди ѻ҆́троцы въ пещѝ ра́дованною ного́ю, ꙗ҆́кѡ во цвѣ́тницѣ ликꙋ́юще, поѧ́хꙋ: бл҃гослове́нъ є҆сѝ, бж҃е ѻ҆тє́цъ на́шихъ.
Ꙗ҆́кѡ тꙋ́ча нбⷭ҇наѧ, зе́млю жа́ждꙋщꙋю, твоѧ̑ ᲂу҆чє́нїѧ вѣ́рныхъ сердца̀ при́снѡ жела́ющаѧ ᲂу҆маща́ютъ, и҆ несы́тнѡ вопи́ти наꙋча́тъ: ѻ҆тє́цъ на́шихъ бж҃е, бл҃гослове́нъ є҆сѝ.
Ра́зꙋмомъ бг҃омꙋ́дреннымъ безплѡ́тныѧ ᲂу҆мы̀ расписа́лъ є҆сѝ, и҆ тѣ́хъ, пребл҃же́нне, пѣсносло́вїѧ, бжⷭ҇твенъ бы́въ, цр҃ковь пѣ́ти наказа́лъ є҆сѝ: бл҃гослове́нъ бг҃ъ ѻ҆тє́цъ на́шихъ.
Прїѧ́телище дх҃а всест҃а́гѡ ꙗ҆ви́лсѧ є҆сѝ бл҃гоключи́мое, и҆ тогѡ̀ вдохновє́нїѧ и҆ ꙗ҆влє́нїѧ проро́чески провозглаша́ѧ, мꙋ́дре дїонѵ́сїе, вопїѧ́ше ве́селѡ: бл҃гослове́нъ бг҃ъ ѻ҆тє́цъ на́шихъ.
Бг҃оро́диченъ:
Сѐ ны́нѣ и҆спо́лнисѧ и҆са́їи бг҃оглаго́ливагѡ прорече́нїе: дв҃а бо во чре́вѣ бг҃а сло́ва и҆мѣ̀, и҆ породила̀ є҆́сть жизнода́вца, є҆мꙋ́же всѝ зове́мъ: бл҃гослове́нъ бг҃ъ ѻ҆тє́цъ на́шихъ.
Пѣ́снь и҃. І҆рмо́съ:
Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею спасє́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы, бл҃гослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.
Свѣ́телъ ꙗ҆́кѡ зерца́ло бы́въ, дїонѵ́сїе, и҆ вмѣсти́теленъ чи́стыхъ ꙗ҆вле́нїй ᲂу҆́мъ содѣ́лавъ, добродѣ́телїю, всебога́те, лꙋчы̀ па́че ᲂу҆ма̀ сїѧ́нїѧ прїе́млѧ, вопїѧ́лъ є҆сѝ: свѧще́нницы, благослови́те, лю́дїе, превозноси́те во всѧ̑ вѣ́ки.
Ѻ҆би́льнѣйшаѧ бл҃года́ть и҆злїѧ́сѧ во ᲂу҆стна́хъ твои́хъ, тѣ́мъ бжⷭ҇твєннаѧ ᲂу҆чє́нїѧ предложи́лъ є҆сѝ, и҆ тѣ́хъ ра́зꙋмы па́че смы́сла на́мъ простира́ѧ, и҆ ꙗ҆снѣ́е и҆ свѣ́тлѡ ѿверза́ѧ, вѣ́рою пою́щымъ: свѧще́нницы, благослови́те, лю́дїе, превозноси́те во всѧ̑ вѣ́ки.
Зна́емѣйша бы́сть тобо́ю, дїонѵ́сїе, а҆ѳи́нскаѧ всесла́внаѧ митропо́лїа, хрⷭ҇тꙋ̀ прине́сшаѧ тѧ̀ нача́токъ всесщ҃е́нный всецр҃ю̀, всегда̀ пою́щи: ѻ҆́троцы, благослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.
Бг҃оро́диченъ:
Мт҃и бж҃їѧ всенепоро́чнаѧ, дꙋшѝ моеѧ̀ стрꙋ́пы, и҆ грѣхѡ́вныѧ ꙗ҆́звы потребѝ: сн҃а бо родила̀ є҆сѝ, вла́сть и҆мꙋ́щаго, свѧ̑занныѧ плени́цами грѣхо́вными, ᲂу҆до́бь ѡ҆сла́бити ѿ ᲂу҆́зъ нерѣши́мыхъ, є҆ди́наго бл҃годѣ́телѧ и҆ є҆ди́наго жизнода́вца.
Пѣ́снь ѳ҃. І҆рмо́съ:
Оу҆жасе́сѧ ѡ҆ се́мъ нб҃о, и҆ землѝ ᲂу҆диви́шасѧ концы̀, ꙗ҆́кѡ бг҃ъ ꙗ҆ви́сѧ человѣ́кѡмъ пло́тски, и҆ чре́во твоѐ бы́сть простра́ннѣйшее небе́съ. тѣ́мъ тѧ̀ бцⷣꙋ, а҆́гг҃лѡвъ и҆ человѣ̑къ чинонача̑лїѧ велича́ютъ.
Ст҃ы́хъ а҆пⷭ҇лъ сподо́билсѧ є҆сѝ ви́дитель бы́ти, и҆ сострада́лецъ, и҆ соѻ́бщникъ бы́лъ є҆сѝ сла́вы: и҆ съ тѣ́ми на видѣ́нїе потща́лсѧ є҆сѝ тѣлесѐ и҆́стиннѡ живонача́льныѧ є҆ди́ныѧ бцⷣы, и҆ чⷭ҇тнѣ́йшїѧ, ю҆́же досто́йнѡ велича́емъ.
Бжⷭ҇твеннагѡ црⷭ҇твїѧ на нб҃сѣ́хъ наслѣ́дникъ бы́лъ є҆сѝ, ꙗ҆́кѡ зако́ненъ а҆рхїере́й ѻ҆́ч҃е, ꙗ҆́кѡ непобѣди́мь страда́лецъ, свѧще́нства ма́стїю кро́вь сраствори́лъ є҆сѝ мч҃ническꙋю: тѣ́мъ сꙋгꙋ̑бымъ вѣнцє́мъ сподо́билсѧ є҆сѝ досто́йнѡ, свѧщеннотаи́нниче дїонѵ́сїе.
Ꙗ҆́кѡ и҆мѣ́ѧ дерзнове́нїе ко хрⷭ҇тꙋ̀, і҆ера́рше мꙋ́дре дїонѵ́сїе, всегда̀ молѝ и҆зба́витисѧ ѿ и҆скꙋше́нїѧ благоче́стнѡ пою́щымъ тѧ̀, ᲂу҆ч҃ничѐ неизрече́нныхъ видѣ́нїй, ꙗ҆́кѡ тайноꙋче́нныѧ и҆ бг҃онача́льныѧ свѧщенноѧвле́нникъ бла́гости.
Бг҃оро́диченъ:
Побѣди́вшꙋ є҆́рєси хра́брски, честнꙋ́ю це́рковь ꙗ҆вѝ, ю҆́же хрⷭ҇то́съ чⷭ҇тно́ю свое́ю кро́вїю ꙗ҆́кѡ бл҃гъ стѧжа̀, ѡ҆бра́дованнаѧ, сн҃ъ тво́й и҆́стиннѡ: и҆ спасѝ ѿ бѣ́дъ и҆ ѿ ѡ҆бстоѧ́нїѧ ѡ҆держа́щагѡ на́съ, влⷣчце.
Свѣти́ленъ. Подо́бенъ: Оу҆ченикѡ́мъ зрѧ́щымъ:
Добродѣ́тельми восходѧ̀, возвы́сивсѧ на небеса̀, бг҃опрїѧ́тне, и҆ позна́лъ є҆сѝ а҆́гг҃лѡвъ чи́ны, и҆ всѣ́хъ вы́шнихъ стоѧ̑нїѧ, и҆ трисо́лнечнꙋю зарю̀ навы́къ ѿ па́ѵла.
Бг҃оро́диченъ:
И҆́же жи́зни бжⷭ҇твеннѣй и҆ блаже́ннѣй позави́дѣвъ мѝ дре́вле въ раѝ вра́гъ прелꙋка́вый и҆ ѕлоко́зненный, и҆ ѿ є҆де́ма и҆згна́въ мѧ̀, ᲂу҆мерщвлѧ́етсѧ ржⷭ҇тво́мъ твои́мъ, бцⷣе.
На стїхо́внѣ ѻ҆ктѡ́иха. Сла́ва, ст҃а́гѡ, гла́съ и҃. Ге́рманово:
Во ст҃и́телехъ и҆ мꙋ́ченицѣхъ преизѧ́ществовавъ, преподо́бне, вѣ́ренъ ꙗ҆ви́лсѧ є҆сѝ па́стырь, и҆ хрⷭ҇то́вꙋ и҆спи́въ ча́шꙋ: тѣ́мъ во ѻ҆бои́хъ благоꙋгоди́въ томꙋ̀, моли́сѧ ѡ҆ всѣ́хъ на́съ, съ го́рними слꙋжи́тельми во свѣ́тѣ ны́нѣ водворѧ́емый.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. Поⷣ: Мч҃ницы:
Ю҆́ница нескве́рнаѧ ю҆нца̀ ви́дѧщи на дре́вѣ пригвожда́ема во́лею, рыда́ющи жа́лостнѣ, ᲂу҆вы̀ мнѣ̀, вопїѧ́ше, люби́мѣйшее ча́до! что̀ тѝ со́нмъ воздадѐ безблагода́тный є҆вре́йскїй, хотѧ̀ мѧ̀ ѡ҆безча́дствовати ѿ тебє̀, вселюбе́зне;
На лїтꙋргі́и, бл҃жє́нна ѻ҆ктѡ́иха, на д҃: и҆ ст҃а́гѡ, пѣ́снь г҃, на д҃. Прокі́менъ, гла́съ и҃: Восхва́лѧтсѧ прпⷣбнїи во сла́вѣ, и҆ возра́дꙋютсѧ на ло́жахъ свои́хъ. Сті́хъ. Воспо́йте гдⷭ҇еви пѣ́снь но́вꙋ. А҆пⷭ҇толъ дѣѧ́нїй, зача́ло м҃, ѿ полꙋ̀. А҆ллилꙋ́їа, гла́съ в҃. Сті́хъ: Свѧще́нницы твоѝ ѡ҆блекꙋ́тсѧ пра́вдою. Є҆ѵⷢ҇лїе матѳе́а, зача́ло н҃є ѿ полꙋ̀. Прича́стенъ: Въ па́мѧть вѣ́чнꙋю бꙋ́детъ пра́ведникъ:
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.