Боже́ственнаѧ лїтꙋргі́а ст҃а́гѡ а҆пⷭ҇ла і҆а́кѡва бра́та бж҃їѧ и҆ пе́рвагѡ і҆ера́рха і҆ерꙋсали́мскагѡ
БОЖЕ́СТВЕННАѦ ЛІТꙊРГІ́А
СТ҃А́ГѠ А҆Пⷭ҇ЛА І҆А́КѠВА
бра́та бж҃їѧ
и҆ пе́рвагѡ і҆ера́рха і҆ерꙋсали́мскагѡ.
Влади́мїрова ҂ацл҃и ‑ Ри́мъ ҂ац҃ѻ
По благослове́нїю а҆рхїере́йскагѡ сѷно́да рꙋ́сской правосла́вной це́ркви заграни́цей.
Всѣ̀ права̀ сохранены̀ за бра́тствомъ преподо́бнагѡ І҆́ѡва.
в҃-е и҆зда́нїе напеча́тасѧ разрѣше́нїемъ джорданви́льскаго свѧто-Трⷪ҇цкаго монастырѧ̀ въ фѡтолїѳогра́фїи крѷптоферра́тскїѧ ѻ҆би́тели въ лѣ́то ҂ац҃ѻ.
Во сла́вꙋ свѧты́ѧ є҆диносꙋ́щныѧ и҆ нераздѣли́мыѧ Трⷪ҇цы, Ѻ҆ц҃а̀ и҆ Сн҃а и҆ Ст҃а́гѡ Дх҃а, благослове́нїемъ а҆рхїере́йскагѡ сѷно́да рꙋ́сскїѧ правосла́вныѧ це́ркве заграни́цей и҆ трꙋда́ми бра́тства преподо́бнагѡ і҆́ѡва поча́евскагѡ, и҆ перево́дчика свѧщенноигꙋ́мена Фїлі́ппа, напеча́тасѧ кни́га сїѧ̀ БОЖЕ́СТВЕННАѦ ЛІТꙊРГІ́А свѧта́гѡ а҆пⷭ҇ла І҆А́КѠВА бра́та бж҃їѧ и҆ пе́рвагѡ і҆ера́рха і҆ерꙋсали́мскагѡ, во влади́мїровой на прѧ́шевской рꙋсѝ, въ лѣ́то ѿ со творе́нїѧ мі́ра ҂зум҃ѕ, ѿ рождества̀ по пло́ти Бг҃а Сло́ва ҂ацл҃и, ѿ креще́нїѧ же рꙋсѝ ц҃и, і҆нді́кта ѕ҃, мѣ́сѧца і҆ꙋ́лїа въ к҃з де́нь, пе́рвымъ тисне́нїемъ.
ЧИ́НЪ
бжⷭ҇твенныѧ лїтꙋргі́и ст҃а́гѡ сла́внагѡ а҆пⷭ҇ла
І҆А́КѠВА БРА́ТА БО́ЖІѦ
и҆ пе́рвагѡ і҆ера́рха і҆ерꙋсали́мскагѡ, во свѧтѣ́мъ гра́дѣ І҆ерꙋсали́мѣ соверша́емыѧ.
Поставлѧ́етсѧ на средѣ̀ хра́ма а҆мвѡ́нъ, подо́бный а҆мвѡ́нꙋ, на не́мже стои́тъ а҆рхїере́й въ нача́лѣ бжⷭ҇твенныѧ лїтꙋргі́и ст҃а́гѡ І҆ѡа́нна Златоꙋ́стагѡ и҆лѝ Васі́лїа Вели́кагѡ, и҆ на се́мъ а҆мвѡ́нѣ поставлѧ́ютсѧ є҆ди́нъ и҆лѝ два̀ а҆нало́гїа, зрѧ́щѧ къ за́падꙋ. А҆́ще а҆рхїере́й лїтꙋрги́саетъ, поставлѧ́ютсѧ сѣда́лища на се́мъ а҆мвѡ́нѣ, є҆ди́но посредѝ на вы́шшей степе́ни а҆рхїере́еви, та́же ѿ ѻ҆бою̀ странꙋ̑, степе́нїю ни́же, сѣда́лища пресвѵ́терѡмъ, восто́чнѣе а҆нало́гїа, зрѧ́ще къ за́падꙋ.
Приспѣ́вшꙋ вре́мени бжⷭ҇твенныѧ слꙋ́жбы прихо́дитъ хотѧ́й лїтꙋргиса́ти съ хотѧ́щими сослꙋжи́ти пресвѵ́теры и҆ дїа́коны, и҆ во ше́дше въ хра́мъ цѣлꙋ́етъ ст҃ы̑ѧ і҆кѡ̑ны, ничто́же гл҃ѧ, и҆ вхо́дитъ во ст҃ы́й ѻ҆лта́рь. Сотво́рше поклоне́нїе ст҃ѣ́й трапе́зѣ, ѡ҆блача́тсѧ всѝ во всѧ̑ сщ҃є́нныѧ ѡ҆дє́жды, па́ки ничто́же гл҃ѧ, дїа́коны же препоѧсꙋ́ютсѧ ѡ҆рари̑ свои́ми и҆ та́кѡ пребыва́ютъ во всѐ вре́мѧ слꙋ́жбы.
Зрѝ: Са́ккосъ ст҃и́тель не ѡ҆блача́етъ, но пресвѵ́терскїй фелѡ́нь, и҆ пове́рхъ негѡ̀ ѡ҆мофо́рїй вели́кїй, є҆го́же не ѿлага́етъ да́же до конца̀ бжⷭ҇твенныѧ слꙋ́жбы. Та́кожде крⷭ҇тъ на сѧ̀ не возлага́етъ, нижѐ є҆гко́лпїонъ и҆ мі́трꙋ. Дїки́рїй со трїки́рїемъ не потре́бны сꙋ́ть на се́й лїтꙋргі́и, нижѐ ѻ҆рлецы̀, то́чїю па́стырскїй же́злъ а҆рхїере́евъ, и҆ то́й без̾ пла́та, си́рѣчь сꙋлка̀.
И҆ полага́ютсѧ на ст҃ѣ́й трапе́зѣ со ст҃ы́мъ є҆ѵⷢ҇лїемъ по ѻ҆бою̀ странꙋ̑ є҆гѡ̀ кни́ги бжⷭ҇твенныхъ писа́нїй: є҆ди́на кни́га писа́нїй а҆пⷭ҇льскихъ, и҆на́ѧ кни́га писа́нїй прⷪ҇ро́ческихъ.
Є҆гда̀ прїꙋгото́вѧтсѧ всѝ, ѿхо́дитъ є҆ди́нъ ѿ пресвѵ́терѡвъ въ предложе́нїе и҆ прїꙋготовлѧ́етъ свѧты́й ді́скосъ и҆ ст҃ы́й поти́ръ, та́же ничто́же гл҃ѧ и҆з̾има́етъ и҆зъ просфоры̀ а҆́гнецъ и҆ растворѧ́етъ во ст҃ѣ́мъ поти́рѣ вїно̀ водо́ю, ꙗ҆́коже ѻ҆бы́чай є҆́сть на лїтꙋргі́и Златоꙋ́стовой и҆лѝ Васі́лїевой твори́ти, то́чїю ничто́же гл҃ѧ. И҆ та́кѡ сконча́въ прїꙋготовле́нїе, не покры́въ сосꙋ́ды, ѿхо́дитъ ко ст҃ѣ́й трапе́зѣ.
(Вѣ́домо бꙋ́ди, ꙗ҆́кѡ а҆́ще повелѣ́но бꙋ́детъ проскомі́дїи бы́ти, здѣ̀ прили́чествꙋетъ соверша́ти ю҆̀. Соверша́етсѧ же по ѻ҆бы́чаю Лїтꙋргі́и Златоꙋ́стовы и҆лѝ Васі́лїевы, то́чїю девѧ́тꙋю части́цꙋ взе́млетъ і҆ере́й въ че́сть ст҃а́гѡ сла́внагѡ а҆пⷭ҇ла І҆а́кѡва бра́та бж҃їѧ и҆ пе́рвагѡ і҆ера́рха і҆ерꙋсали́мскагѡ. Моли́твꙋ проскомі́дїи: Бж҃е, Бж҃е на́шъ: и҆ ѿпꙋ́стъ проскомі́дїи не гл҃го́летъ, сосꙋ́ды же покрыва́етъ по ѻ҆бы́чаю. Ѻ҆ба́че сїѐ нѣ́что но́вое є҆́сть, и҆ въ дре́внихъ хартїа́хъ не ѡ҆брѣта́етсѧ, сегѡ̀ ра́ди и҆ мы̀ сегѡ̀ во І҆ерꙋсали́мѣ не прїѧ́хомъ).
И҆схо́дѧтъ дїа́коны (и҆лѝ є҆ди́нъ слꙋжа́й дїа́конъ, а҆́ще нѣ́сть и҆ны́хъ слꙋжа́щихъ дїа́кѡнъ) и҆зъ ст҃а́гѡ ѻ҆лтарѧ̀, и҆ ста́нꙋтъ по ѻ҆бою̀ странꙋ̑ ст҃ы́хъ двере́й, два̀ два̀ зрѧ́ще къ лю́демъ, си́рѣчь, къ за́падꙋ.
И҆ ста́нетъ а҆рхїере́й (и҆лѝ і҆ере́й, а҆́ще слꙋ́житъ є҆ди́нъ то́кмѡ і҆ере́й) пред̾ ст҃о́ю трапе́зою, сослꙋжа́щїи же пресвѵ́теры ѡ҆крꙋжа́тъ ю҆̀. И҆ гл҃етъ а҆рхїере́й (и҆лѝ і҆ере́й) ти́химъ гла́сомъ, во є҆́же слы́шанꙋ бы́ти сослꙋжа́щымъ, мл҃твꙋ сїю̀, стоѧ̀ пред̾ свѧто́ю трапе́зою и҆ зрѧ̀ въ восто́кꙋ:
Ѡ҆скверне́нна грѣхмѝ мно́гими, да не пре́зриши менѐ, Влⷣко Гдⷭ҇и Бж҃е на́шъ. Се́ бо пристꙋпи́хъ къ бж҃е́ственномꙋ семꙋ̀ и҆ пренебе́сномꙋ твоемꙋ̀ та́инствꙋ, не ꙗ҆́кѡ сы́й досто́инъ, но взира́ѧ на твою̀ бл҃госты́ню. Гла́съ тѝ пꙋща́ю: Бж҃е, млⷭ҇тивъ бꙋ́ди мѝ грѣ́шномꙋ: согрѣши́хъ на не́бо и҆ пред̾ тобо́ю, и҆ нѣ́смь досто́инъ воззрѣ́ти на ст҃ꙋ́ю твою̀ сїю̀ и҆ дх҃о́внꙋю трапе́зꙋ, на не́йже є҆диноро́дный тво́й Сн҃ъ и҆ Гдⷭ҇ь на́шъ І҆и҃съ Хрⷭ҇то́съ, мно́ю грѣ́шнымъ и҆ всѧ́кою скве́рною ѡ҆калѧ́ннымъ, та́йнѡ предлага́етсѧ въ же́ртвꙋ. Сегѡ̀ ра́ди тебѣ̀ моле́нїе и҆ бл҃годаре́нїе приношꙋ̀, є҆́же низпосла́ти мѝ Дх҃а твоего̀ ᲂу҆тѣ́шителѧ, ᲂу҆крѣплѧ́ющаго, ᲂу҆твержда́ющаго мѧ̀ къ слꙋ́жбѣ се́й, и҆ ѿ тебє̀ возвѣще́нный мѝ гла́съ неѡсꙋжде́ннѡ проповѣ́дати лю́демъ сподо́би, во Хрⷭ҇тѣ̀ І҆и҃сѣ Гдⷭ҇ѣ на́шемъ, съ ни́мже бл҃гослове́нъ є҆сѝ со всест҃ы́мъ, и҆ бл҃ги́мъ, и҆ животворѧ́щимъ, и҆ є҆диносꙋ́щнымъ твои́мъ Дх҃омъ, ны́нѣ, и҆ при́снѡ, и҆ во вѣ́ки вѣкѡ́въ.
И҆ по мл҃и́твѣ ѿверза́етсѧ завѣ́са и҆ свѧты̑ѧ двє́ри, а҆рхїере́й же (и҆лѝ і҆ере́й), стоѧ̀ пред̾ свѧто́ю трапе́зою и҆ зрѧ̀ къ восто́кꙋ возглаша́етъ, всѣ̑мъ воста́вшымъ:
Сла́ва Ѻ҆ц҃ꙋ̀, и҆ Сн҃ꙋ, и҆ Свѧто́мꙋ Дх҃ꙋ, тро́ичномꙋ и҆ є҆дини́чномꙋ свѣ́тꙋ бж҃ества̀, сꙋ́щагѡ во Трⷪ҇цѣ є҆дини́чнѣ и҆ раздѣлѧ́емагѡ нераздѣ́льнѣ. Трⷪ҇ца бо є҆ди́на Бг҃ъ вседержи́тель, є҆гѡ́же сла́вꙋ небеса̀ повѣ́даютъ, землѧ́ же є҆гѡ̀ влады́чество, и҆ мо́ре є҆гѡ̀ держа́вꙋ, и҆ всѧ́каѧ чꙋ́вственнаѧ и҆ ᲂу҆́мнаѧ тва́рь є҆гѡ̀ вели́чество вы́нꙋ проповѣ́даетъ. Ꙗ҆́кѡ томꙋ̀ подоба́етъ всѧ́каѧ сла́ва, че́сть, держа́ва, вели́чїе же и҆ великолѣ́пїе, ны́нѣ и҆ при́снѡ, и҆ во вѣ́ки вѣкѡ́въ.
Лю́дїе ѿвѣща́ютъ: А҆ми́нь.
И҆ гл҃етъ є҆ди́нъ ѿ сослꙋжа́щихъ (а҆́ще сꙋ́ть) въ слы́шанїе всѣ̑мъ моли́твꙋ сїю̀:
Бл҃годѣ́телю и҆ цр҃ю̀ вѣкѡ́въ, и҆ всеѧ̀ тва́ри содѣ́телю, прїимѝ приходѧ́щꙋю тѝ чре́зъ Хрⷭ҇та̀ твоегѡ̀ це́рковь твою̀. Коемꙋ́ждо поле́зное и҆спо́лни, приведѝ всѣ́хъ въ соверше́нїе, и҆ достѡ́йны ны̀ содѣ́лай бл҃года́ти ѡ҆сщ҃е́нїѧ твоегѡ̀, совокꙋплѧ́ѧ ны̀ во ст҃ꙋ́ю твою̀ собо́рнꙋю и҆ а҆пⷭ҇льскꙋю цр҃ковь, ю҆́же стѧжа́лъ є҆сѝ чⷭ҇тно́ю кро́вїю є҆диноро́днагѡ сн҃а твоегѡ̀. Гдⷭ҇а же и҆ Сп҃са на́шегѡ І҆и҃са Хрⷭ҇та̀, съ ни́мже благослове́нъ є҆сѝ и҆ препросла́вленъ со всест҃ы́мъ, и҆ бл҃ги́мъ, и҆ животворѧ́щимъ твои́мъ Дх҃омъ, ны́нѣ и҆ при́снѡ, и҆ во вѣ́ки вѣкѡ́въ.
Лю́дїе: А҆ми́нь.
Дїа́конъ ста́въ посредѝ сѡлеѝ, и҆ зрѧ̀ къ лю́демъ, возглаша́етъ:
Гдⷭ҇ꙋ помо́лимсѧ.
И҆ ничто́же лю́демъ ѿвѣща́вшымъ, прїе́млетъ а҆рхїере́й (и҆лѝ і҆ере́й) кади́льницꙋ, и҆ кади́тъ свѧтꙋ́ю трапе́зꙋ г҃-жды съ пре́днїѧ (си́рѣчь восто́чныѧ) страны̀, гл҃ѧ возгла́снѡ моли́твꙋ сїю̀:
Бж҃е, прїе́мый а҆́велєвы да́ры, нѡ́евꙋ и҆ а҆враа́мовꙋ же́ртвꙋ, а҆арѡ́ново и҆ заха́рїино кади́ло, прїимѝ и҆ ѿ рꙋ́къ на́съ грѣ́шныхъ кади́ло сїѐ въ воню̀ бл҃гоꙋха́нїѧ и҆ во ѡ҆ставле́нїе грѣхѡ́въ на́шихъ и҆ всѣ́хъ люде́й твои́хъ. Ꙗ҆́кѡ бл҃гослове́нъ є҆сѝ, и҆ подоба́етъ тебѣ̀ сла́ва, Ѻ҆ц҃ꙋ̀, и҆ Сн҃ꙋ, и҆ Ст҃о́мꙋ Дх҃ꙋ, ны́нѣ и҆ при́снѡ, и҆ во вѣ́ки вѣкѡ́въ.
Лю́дїе ѿвѣща́ютъ: А҆ми́нь.
И҆ вхо́дѧтъ дїа́коны во свѧты́й ѻ҆лта́рь ма́лыми двермѝ. А҆рхїере́й же (и҆лѝ і҆ере́й) ѿ дае́тъ кади́льницꙋ. И҆ а҆́бїе пѣвцы̀ начина́ютъ пѣ́ти со сладкопѣ́нїемъ настоѧ́щїй тропа́рь:
Є҆диноро́дный Сн҃е, и҆ Сло́ве бж҃їй, безсме́ртенъ сы́й, и҆ и҆зво́ливый сп҃се́нїѧ на́шегѡ ра́ди воплоти́тисѧ ѿ ст҃ы́ѧ Бцⷣы и҆ приснодв҃ы Мр҃і́и, непрело́жнѡ вочл҃вѣ́чивыйсѧ, распны́йсѧ же Хрⷭ҇тѐ Бж҃е, сме́ртїю сме́рть попра́вый, є҆ди́нъ сы́й ст҃ы́ѧ Трⷪ҇цы, спрославлѧ́емый Ѻ҆ц҃ꙋ̀, и҆ Ст҃о́мꙋ Дх҃ꙋ, спасѝ на́съ.
Пѣва́емꙋ семꙋ̀ тропарю̀, дае́тъ а҆рхїере́й є҆ди́номꙋ пресвѵ́терꙋ кни́гꙋ писа́нїй а҆пⷭ҇льскихъ и҆но́мꙋ же кни́гꙋ писа́нїй прⷪ҇ро́ческихъ, са́мъ же прїѧ́въ въ десни́цꙋ свою̀ же́злъ, въ шꙋ́йцꙋ прїе́млетъ ст҃о́е є҆ѵⷢ҇лїе, и҆ та́кѡ твори́тъ вхо́дъ, ѡ҆бходѧ̀ ст҃ꙋ́ю трапе́зꙋ съ ю҆́жныѧ страны̀.
А҆́ще є҆ди́нъ є҆́сть і҆ере́й слꙋжа́й, дае́тъ і҆ере́й дїа́конꙋ въ деснꙋ́ю рꙋ́кꙋ свѧто́е є҆ѵⷢ҇лїе, въ шꙋ́йцꙋ же кни́гꙋ писа́нїй а҆пⷭ҇льскихъ, са́мъ же взе́млетъ писа́нїѧ прⷪ҇рѡ́ческаѧ, и҆ де́ржитъ ѧ҆̀ ᲂу҆ лѣ́выѧ страны̀ пе́рсей. И҆ та́кѡ твори́тъ вхо́дъ, пред̾идꙋ́щымъ лампа́дамъ и҆ дїа́конꙋ предходѧ́щꙋ і҆ере́еви.
Соверша́етсѧ же вхо́дъ си́це: И҆схо́дѧтъ сѣ́верными двермѝ и҆ и҆́дꙋтъ да́же до за́падныѧ стѣны̀ хра́ма, а҆́ще же возмо́жно є҆́сть, и҆схо́дѧтъ и҆ въ притво́ръ чре́зъ сѣ́вернꙋю две́рь є҆гѡ̀. Предхо́дѧтъ же два̀ дїа́кона со свѣща́ми, послѣ́дꙋютъ и҆̀мъ два̀ и҆ны́хъ дїа́кона съ кади́льницами, си̑мъ послѣ́дꙋютъ є҆ди́нъ пресвѵ́теръ съ кни́гою прⷪ҇ро́ческою, па́ки же и҆ны́й съ кни́гою а҆пⷭ҇льскою, послѣди́ же а҆рхїере́й. И҆ вхо́дѧтъ въ хра́мъ вели́кими враты̀, и҆̀же сꙋ́ть на за́падѣ хра́ма. Прише́дше ко а҆нало́гїю, и҆́же є҆́сть на а҆мвѡ́нѣ средѝ хра́ма, восхо́дитъ на него̀ а҆рхїере́й (и҆лѝ і҆ере́й), и҆ полага́етъ кни́гꙋ на а҆нало́гїй, та́же прїе́мь ѿ дїа́кона (и҆лѝ пресвѵ́тера) є҆ѵⷢ҇лїе и҆ кни́гꙋ а҆пⷭ҇льскꙋю, та́кожде полага́етъ ѧ҆̀ на а҆нало́гїй. И҆ и҆́дꙋтъ всѝ да́лѣе да́же до степе́ней сѡлеѝ, и҆ здѣ̀ ста́нꙋтъ, до́ндеже сконча́ютъ пѣвцы̀ тропа́рь: Є҆диноро́дный Сн҃е. Пресвѵ́теры же и҆ дїа́коны позадѝ стоѧ́тъ. Є҆гда́ же сконча́ютъ пѣвцы̀ пѣ́нїе, глаго́летъ а҆рхїере́й (и҆лѝ і҆ере́й) моли́твꙋ сїю̀, возгла́снѡ, зрѧ̀ къ восто́кꙋ:
Бж҃е вседержи́телю, великоимени́те Гдⷭ҇и, да́вый на́мъ вхо́дъ во свѧто́е ст҃ы́хъ прише́ствїемъ є҆диноро́днагѡ твоегѡ̀ Сн҃а, Гдⷭ҇а же и҆ Бг҃а, и҆ Сп҃са на́шегѡ І҆и҃са Хрⷭ҇та̀, мо́лимъ и҆ про́симъ твою̀ благосты́ню, поне́же пристра́шни и҆ тре́петни є҆смы̀, хотѧ́ще предста́ти свѧто́мꙋ твоемꙋ̀ же́ртвенникꙋ: низпослѝ на ны̀. Бж҃е, бл҃года́ть твою̀ бл҃гꙋ́ю, и҆ ѡ҆ст҃ѝ на́шѧ дꙋ́ши, и҆ тѣлеса̀, и҆ дꙋ́си, и҆ ѡ҆братѝ по́мыслы на́ши ко бл҃гоче́стїю, да въ чи́стой со́вѣсти принесе́мъ тебѣ̀ да́ры, даѧ̑нїѧ, плоды̀, во потребле́нїе согрѣше́нїй на́шихъ и҆ во ᲂу҆милостивле́нїе за всѧ̑ лю́ди твоѧ̑. Благода́тїю и҆ щедро́тами, и҆ человѣколю́бїемъ є҆диноро́днагѡ твоегѡ̀ Сн҃а, съ ни́мже благослове́нъ є҆сѝ во вѣ́ки вѣкѡ́въ.
Лю́дїе: А҆ми́нь.
И҆ вхо́дѧтъ всѝ во свѧты́й ѻ҆лта́рь свѧты́ми двермѝ и҆ ста́нꙋтъ на свои́хъ мѣста́хъ, дїа́коны же стоѧ́тъ на сѡлеѣ̀, зрѧ́ще къ за́падꙋ. Ѿлага́етъ же а҆рхїере́й же́злъ сво́й. И҆ ста́въ є҆ди́нъ ѿ дїа́кѡнъ посредѝ сѡлеѝ, глаго́летъ зрѧ̀ къ лю́демъ дїа́конства сїѧ̑:
Ми́ромъ Гдⷭ҇ꙋ помо́лимсѧ.
Лю́дїе: Гдⷭ҇и, поми́лꙋй.
Ѡ҆ свы́шнемъ ми́рѣ и҆ бж҃їемъ человѣколю́бїи, и҆ спасе́нїи дꙋ́шъ на́шихъ, Гдⷭ҇ꙋ помо́лимсѧ.
Лю́дїе: Гдⷭ҇и, поми́лꙋй.
Ѡ҆ ми́рѣ всегѡ̀ мі́ра, и҆ є҆дине́нїи всѣ́хъ ст҃ы́хъ бж҃їихъ церкве́й, Гдⷭ҇ꙋ помо́лимсѧ.
Лю́дїе: Гдⷭ҇и, поми́лꙋй.
Ѡ҆ спасе́нїи и҆ застꙋпле́нїи ст҃ѣ́йшагѡ ѻ҆тца̀ и҆ а҆рхїепі́скопа на́шегѡ (и҆́мѧ ре́къ), ѡ҆ все́мъ при́чтѣ и҆ хрїстолюби́выхъ лю́дехъ, Гдⷭ҇ꙋ помо́лимсѧ.
Лю́дїе: Гдⷭ҇и, поми́лꙋй.
Ѡ҆ ѡ҆ставле́нїи грѣхѡ́въ, и҆ проще́нїи согрѣше́нїй на́шихъ, є҆́же и҆зба́витисѧ на́мъ ѿ всѧ́кїѧ ско́рби, гнѣ́ва, бѣды̀ и҆ нꙋ́жды, и҆ возста́нїѧ врагѡ́въ, Гдⷭ҇ꙋ помо́лимсѧ.
Лю́дїе: Гдⷭ҇и, поми́лꙋй.
Прест҃ꙋ́ю, пречи́стꙋю, пресла́внꙋю, благослове́ннꙋю влⷣчцꙋ на́шꙋ Бцⷣꙋ и҆ приснодѣ́вꙋ Мр҃і́ю, свѧта́гѡ І҆ѡа́нна, сла́внагѡ прⷪ҇ро́ка, предте́чꙋ и҆ крⷭ҇ти́телѧ, боже́ствєнныѧ и҆ всехва̑льныѧ а҆пⷭ҇лы, сла̑вныѧ прⷪ҇рѡ́ки, и҆ добропобѣ̑дныѧ мꙋ́ченики, и҆ всѧ̑ свѧты̑ѧ и҆ пра́вєдныѧ помѧне́мъ, ꙗ҆́кѡ да моли́твами и҆́хъ и҆ предста́тельствы всѝ поми́ловани бꙋ́демъ.
Лю́дїе: Гдⷭ҇и, поми́лꙋй.
Глаго́лємымъ дїа́конствамъ, мо́литсѧ а҆рхїере́й (и҆лѝ і҆ере́й) пред̾ свѧто́ю трапе́зою та́йнѡ си́це:
Ще́дре и҆ ми́лостиве, долготерпѣли́ве и҆ многоми́лостиве и҆ и҆́стинне Гдⷭ҇и. При́зри ѿ свѧта́гѡ жили́ща твоегѡ̀ и҆ ᲂу҆слы́ши ны̀ молѧ́щыѧсѧ тебѣ̀, и҆ и҆зба́ви ны̀ ѿ всѧ́кагѡ и҆скꙋше́нїѧ дїа́вольскагѡ же и҆ человѣ́ческагѡ, и҆ не ѿста́ви ѿ на́съ по́мощь твою̀, нижѐ тѧгча́йшагѡ си́лы на́шеѧ наказа́нїѧ не наведѝ на ны̀. Не довѡ́льны бо є҆смы̀ побѣжда́ти проти̑внаѧ, ты́ же си́ленъ є҆сѝ, Гдⷭ҇и, во є҆́же спаса́ти ѿ всѣ́хъ противле́нїй. Спаси́ ны, Бж҃е, ѿ бѣ́дствїй мі́ра сегѡ̀ по бла́гости твое́й, ꙗ҆́кѡ да воше́дше въ чи́стой со́вѣсти ко свѧто́мꙋ твоемꙋ̀ же́ртвенникꙋ, блаже́ннꙋю и҆ трисвѧтꙋ́ю пѣ́снь съ пренебе́сными си́лами неѡсꙋжде́ннѡ возсле́мъ тѝ, и҆ благопрїѧ́тнꙋю тѝ и҆ бж҃е́ственнꙋю соверши́въ слꙋ́жбꙋ, сподо́бимсѧ вѣ́чныѧ жи́зни. А҆ми́нь.
И҆ сконча́вшымсѧ дїа́конствамъ, а҆рхїере́й (и҆лѝ і҆ере́й) возгла́съ:
Ꙗ҆́кѡ свѧ́тъ є҆сѝ, Гдⷭ҇и Бж҃е на́шъ, и҆ во ст҃ы́хъ ѡ҆бита́еши и҆ почива́еши, и҆ тебѣ̀ сла́вꙋ и҆ трисвѧтꙋ́ю пѣ́снь возсыла́емъ, Ѻ҆ц҃ꙋ̀, и҆ Сн҃ꙋ, и҆ Свѧто́мꙋ Дх҃ꙋ, ны́нѣ и҆ при́снѡ, и҆ во вѣ́ки вѣкѡ́въ.
Лю́дїе: А҆ми́нь.
И҆ пою́тъ пѣвцы̀ трисвѧто́е ѡ҆бы́чнѡ: десна́ѧ страна̀ начина́етъ Ст҃ы́й Бж҃е, та́же лѣ́вый ли́къ: Ст҃ы́й Бж҃е, па́ки десна́ѧ страна̀: Ст҃ы́й Бж҃е. Та́же, Сла́ва, и҆ ны́нѣ, Ст҃ы́й безсме́ртный, ѿ лѣ́вагѡ ли́ка. И҆ возгласи́тъ дїа́конъ: Дѵ́намїсъ, и҆ пою́тъ пѣвцы̀ десны́ѧ страны̀ высоча́йшимъ гла́сомъ: Ст҃ы́й Бж҃е.
Си́це пое́тсѧ трисвѧто́е и҆ а҆́ще а҆рхїере́й лїтꙋргиса́етъ.
Сконча́вшꙋсѧ пѣ́нїю трисвѧта́гѡ, ста́нетъ а҆рхїере́й (и҆лѝ і҆ере́й) во свѧты́хъ две́рехъ, зрѧ̀ къ лю́демъ, и҆ зна́менꙋетъ предстоѧ́щыѧ, глаго́лѧ:
Ми́ръ всѣ̑мъ.
Лю́дїе ѿвѣща́ютъ: И҆ дх҃ови твоемꙋ̀.
И҆ а҆́бїе пѣвцы̀ начина́ютъ пѣ́ти ко́снѡ и҆ со сладкопѣ́нїемъ А҆ллилꙋ́їа, г҃-жды. А҆рхїере́й же (и҆лѝ і҆ере́й) и҆схо́дитъ съ сослꙋжа́щими и҆зъ свѧта́гѡ ѻ҆лтарѧ̀ свѧты́ми двермѝ, и҆ и҆́детъ на средꙋ̀ хра́ма, и҆ восхо́дитъ на а҆мвѡ́нъ. А҆рхїере́й же и҆мѣ́етъ же́злъ въ шꙋ́йцѣ. И҆ сѧ́детъ ст҃и́тель на мѣ́сто своѐ, и҆ повели́тъ сѣ́сти и҆ пресвѵ́терѡмъ, дїа́коны же позадѝ стоѧ́тъ, си́рѣчь, съ восто́чныѧ страны̀ а҆мвѡ́на, по ѻ҆бою̀ странꙋ̑ є҆гѡ̀, два̀ два̀, зрѧ́ще къ за́падꙋ. И҆ прїе́млетъ чте́цъ ѿ а҆рхїере́а благослове́нїе, и҆ ста́нетъ на а҆мвѡ́нѣ пред̾ а҆нало́гїемъ, зрѧ̀ къ за́падꙋ. И҆ сконча́вшейсѧ А҆ллилꙋ́їи, возглаша́етъ чте́цъ:
Чте́нїеѿ прⷪ҇ро́чества И҆са́їина (и҆лѝ и҆ны́ѧ кни́ги).
Дїа́конъ возглаша́етъ: Во́нмемъ.
И҆ чте́тъ чте́цъ писа̑нїѧ прⷪ҇рѡ́ческаѧ. А҆рхїере́й же и҆ пресвѵ́теры сѣдѧ́ще внима́ютъ чте́нїю, та́кожде и҆ лю́дїе. Сконча́вшꙋсѧ чте́нїю, па́ки пое́тсѧ А҆ллилꙋ́їа. А҆рхїере́й же (и҆лѝ і҆ере́й) гл҃етъ моли́твꙋ сїю̀ та́йнѡ:
Возсїѧ́й въ сердца́хъ на́шихъ, человѣколю́бче Гдⷭ҇и, ра́зꙋма нетлѣ́нный свѣ́тъ, и҆ мы́слєнныѧ на́ши ѿве́рзи ѻ҆́чи во є҆ѵⷢ҇льскихъ твои́хъ проповѣ́данїй разꙋмѣ́нїе: вложѝ въ на́съ и҆ блаже́нныхъ твои́хъ за́повѣдей стра́хъ, да плѡтскі́ѧ по́хѡти попра́вше, дꙋхо́вное жи́тельство про́йдемъ. всѧ̑, ꙗ҆̀же ко благоꙋгожде́нїю твоемꙋ̀, и҆ мꙋ́дрствꙋюще и҆ дѣ́юще.
И҆ по А҆ллилꙋ́їа, возглаша́етъ дїа́конъ:
Про́сти, ᲂу҆слы́шимъ свѧта́гѡ є҆ѵⷢ҇лїа.
И҆ востаю́тъ всѝ, востае́тъ и҆ а҆рхїере́й со пресвѵ́теры.
(Зрѝ, ꙗ҆́кѡ а҆рхїере́й сѣди́тъ держа̀ же́злъ сво́й. Па́ки зрѝ: ꙗ҆́кѡ въ закѷнѳѣ ми́рствовати а҆рхїере́ю (и҆лѝ і҆ере́ю), лю́демъ же: и҆ дх҃ови твоемꙋ̀ ѿвѣща́ти ᲂу҆казꙋ́етсѧ, ѻ҆ба́че во і҆ерꙋсали́мѣ сегѡ̀ не ѡ҆брѣто́хомъ).
Хотѧ́й честѝ є҆ѵⷢ҇лїе пресвѵ́теръ возглаша́етъ:
Чте́нїеѿ І҆ѡа́нна (и҆лѝ и҆на́гѡ є҆ѵⷢ҇лі́ста) свѧта́гѡ є҆ѵⷢ҇лїа.
Дїа́конъ: Во́нмемъ свѧто́мꙋ чте́нїю.
И҆ чте́тъ пресвѵ́теръ свѧто́е є҆ѵⷢ҇лїе, зрѧ̀ къ за́падꙋ, всѣ̑мъ стоѧ́щымъ:
(Вѣ́домо бꙋ́ди, ꙗ҆́кѡ въ закѷнѳѣ пред̾ возгла́сомъ: Во́нмемъ свѧто́мꙋ чте́нїю, пою́тъ пѣвцы̀: Сла́ва тебѣ̀, Гдⷭ҇и, сла́ва тебѣ̀, и҆ є҆ѵⷢ҇лїе чте́тъ на а҆мвѡ́нѣ дїа́конъ. Во І҆ерꙋсали́мѣ же сегѡ̀ не прїѧ́хомъ).
И҆спо́лнившꙋсѧ чте́нїю, па́ки пое́тсѧ пѣвца́ми: А҆ллилꙋ́їа. По се́мъ хотѧ́й честѝ писа̑нїѧ а҆пⷭ҇льскаѧ возглаша́етъ:
Чте́нїеѿ и҆́же ко є҆фесе́ємъ посла́нїѧ свѧта́гѡ а҆пⷭ҇ла Па́вла (и҆лѝ и҆ны́ѧ кни́ги а҆пⷭ҇льскїѧ).
Дїа́конъ: Во́нмемъ.
И҆ чте́тъ писа̑нїѧ а҆пⷭ҇льскаѧ съ тогѡ́ же мѣ́ста. А҆рхїере́й же со пресвѵ́теры па́ки возсѧ́детъ на мѣ́стѣ свое́мъ. По чте́нїи па́ки пое́тсѧ А҆ллилꙋ́їа, по пропѣ́тїи же сегѡ̀, поꙋча́етъ а҆рхїере́й лю́ди, сѣдѧ̀ на мѣ́стѣ свое́мъ и҆ держа̀ же́злъ сво́й. А҆́ще повели́тъ а҆рхїере́й, и҆́ный кто̀ проповѣ́дꙋетъ.
Є҆гда́ же сконча́етъ а҆рхїере́й (и҆лѝ і҆ере́й) поꙋче́нїе своѐ, востае́тъ ѿ мѣ́ста своегѡ̀ вкꙋ́пѣ со пресвѵ́теры, и҆ взе́млетъ ѿ а҆нало́гїа свѧто́е є҆ѵⷢ҇лїе, и҆мѣ́ѧ же́злъ въ шꙋ́йцѣ, та́же повели́тъ пресвѵ́терѡмъ взѧ́ти про́чыѧ кни̑ги и҆ вхо́дитъ во свѧты́й ѻ҆лта́рь свѧты́ми двермѝ, послѣ́дꙋющымъ пресвѵ́терѡмъ.
Лю́дїе же пою́тъ ко́снѡ:
Сла́ва тебѣ̀, Гдⷭ҇и, сла́ва тебѣ̀.
И҆ ста́нꙋтъ всѝ на свои́хъ мѣста́хъ, дїа́коны же на сѡлеѣ̀, зрѧ́ще къ за́падꙋ, ꙗ҆́коже стоѧ́хꙋ въ и҆ нача́лѣ боже́ственныѧ слꙋ́жбы. И҆ полага́етсѧ свѧто́е є҆ѵⷢ҇лїе на свѧтѣ́й трапе́зѣ, въ го́рней є҆ѧ̀ странѣ̀, про́чыѧ же кни̑ги ѿлага́ютсѧ. Ѿлага́етъ а҆рхїере́й и҆ же́злъ сво́й. И҆ гл҃етъ дїа́конъ пред̾ свѧты́ми двермѝ, зрѧ̀ къ лю́демъ, є҆ктенїю̀ сїю̀:
Рце́мъ всѝ: Гдⷭ҇и, поми́лꙋй.
Лю́дїе: Гдⷭ҇и, поми́лꙋй.
Гдⷭ҇и вседержи́телю, пренебе́сне, Бж҃е ѻ҆ц҃ъ на́шихъ, мо́лимтисѧ, ᲂу҆слы́ши.
Лю́дїе: Гдⷭ҇и, поми́лꙋй.
Ѡ҆ ми́рѣ всегѡ̀ мі́ра и҆ є҆дине́нїи всѣ́хъ свѧты́хъ твои́хъ церкве́й, помо́лимсѧ.
Лю́дїе: Гдⷭ҇и, поми́лꙋй.
Ѡ҆ спасе́нїи и҆ застꙋпле́нїи свѧтѣ́йшагѡ ѻ҆тца̀ и҆ а҆рхїепі́скопа на́шегѡ (и҆́мѧ ре́къ) ѡ҆ все́мъ при́чтѣ и҆ хрⷭ҇толюби́выхъ лю́дехъ, помо́лимсѧ.
Лю́дїе: Гдⷭ҇и, поми́лꙋй.
Ѡ҆ є҆́же и҆зба́витисѧ на́мъ ѿ всѧ́кїѧ ско́рби, гнѣ́ва, бѣды̀ и҆ нꙋ́жды, плѣне́нїѧ, го́рькїѧ сме́рти и҆ беззако́нїй на́шихъ, помо́лимсѧ.
Лю́дїе: Гдⷭ҇и, поми́лꙋй.
Ѡ҆ предстоѧ́щихъ лю́дехъ, ѡ҆жида́ющихъ ѿ тебє̀ бога́тыѧ и҆ вели́кїѧ ми́лости, мо́лимъ тѧ̀, бꙋ́ди благоꙋтро́бенъ, и҆ поми́лꙋй.
Здѣ̀ а҆рхїере́й (и҆лѝ і҆ере́й) ѡ҆бра́щсѧ къ лю́демъ, возгласи́тъ зна́менꙋѧ предстоѧ́щыѧ и҆зъ свѧты́хъ двере́й:
Спасѝ, Бж҃е, лю́ди твоѧ̀, и҆ благословѝ достоѧ́нїе твоѐ.
Лю́дїе: Гдⷭ҇и, поми́лꙋй.
Дїа́конъ: При́зри на мі́ръ тво́й ми́лостїю и҆ щедро́тами.
Лю́дїе: Гдⷭ҇и, поми́лꙋй.
Вознесѝ ро́гъ хрⷭ҇тїа́нскїй, си́лою честна́гѡ и҆ животворѧ́щагѡ креста̀, моли́твою пресвѧты́ѧ, благослове́нныѧ Влады́чицы на́шеѧ Бцⷣы, предте́чи и҆ а҆пⷭ҇лѡвъ твои́хъ, и҆ всѣ́хъ свѧты́хъ твои́хъ, мо́лимъ тѧ̀, многомлⷭ҇тиве Гдⷭ҇и, ᲂу҆слы́ши на́съ, молѧ́щихсѧ тебѣ̀, и҆ поми́лꙋй.
Лю́дїе: Гдⷭ҇и, поми́лꙋй, г҃-жды.
А҆рхїере́й (и҆лѝ і҆ере́й гл҃етъ та́йнѡ, зрѧ̀ къ восто́кꙋ:
Бж҃е, ѡ҆гласи́вый ны̀ боже́ственными и҆ спаси́тельными твои́ми словесы̀, просвѣтѝ дꙋ́ши на́съ грѣ́шныхъ къ воспрїѧ́тїю преждечте́ннагѡ, ꙗ҆́кѡ да не то́кмѡ слы́шатели ꙗ҆ви́мъ себѐ дх҃о́вныхъ рече́нїй, но и҆ творцы̀ дѣѧ́нїй бл҃ги́хъ, содержа́щыѧ вѣ́рꙋ нелицемѣ́рнꙋ, живо́тъ незазо́ренъ, жи́тельство неꙋко́рно, во Хрⷭ҇тѣ̀ І҆и҃сѣ Гдⷭ҇ѣ на́шемъ, съ ни́мже благослове́нъ є҆сѝ, со всест҃ы́мъ, и҆ бл҃ги́мъ, и҆ животворѧ́щимъ твои́мъ Дх҃омъ, ны́нѣ, и҆ при́снѡ, и҆ во вѣ́ки вѣкѡ́въ.
Та́же, сконча́вшымсѧ дїа́конствамъ возгла́съ:
Ты́ бо є҆сѝ благовѣ́стїе и҆ просвѣще́нїе, сп҃съ и҆ стра́жъ дꙋ́шъ и҆ тѣле́съ на́шихъ, Бж҃е, и҆ є҆диноро́дный тво́й Сн҃ъ, и҆ Дх҃ъ тво́й всест҃ы́й ны́нѣ и҆ при́снѡ, и҆ во вѣ́ки вѣкѡ́въ.
Лю́дїе: А҆ми́нь.
Та́же дїа́конъ:
Да вне́млемъ ᲂу҆се́рднѣ: ми́ромъ Гдⷭ҇ꙋ помо́лимсѧ.
Лю́дїе: Гдⷭ҇и, поми́лꙋй.
Ѡ҆ свы́шнемъ ми́рѣ и҆ бо́жїемъ человѣколю́бїи, и҆ спасе́нїи дꙋ́шъ на́шихъ, Гдⷭ҇ꙋ помо́лимсѧ.
Лю́дїе: Гдⷭ҇и, поми́лꙋй.
Ѡ҆ ми́рѣ всегѡ̀ мі́ра, и҆ є҆дине́нїи всѣ́хъ свѧты́хъ бо́жїихъ церкве́й, Гдⷭ҇ꙋ помо́лимсѧ.
Лю́дїе: Гдⷭ҇и, поми́лꙋй.
Ѡ҆ спасе́нїи и҆ застꙋпле́нїи ст҃ѣ́йшагѡ ѻ҆тца̀ и҆ а҆рхїепі́скопа на́шегѡ (и҆́мѧ ре́къ), ѡ҆ все́мъ при́чтѣ и҆ хрїстолюби́выхъ лю́дехъ, Гдⷭ҇ꙋ помо́лимсѧ.
Лю́дїе: Гдⷭ҇и, поми́лꙋй.
Ѡ҆ ѡ҆ставле́нїи грѣхѡ́въ и҆ проще́нїи прегрѣше́нїй на́шихъ, и҆ ѡ҆ є҆́же и҆зба́витисѧ на́мъ ѿ всѧ́кїѧ ско́рби, гнѣ́ва, бѣды̀ и҆ нꙋ́жды, и҆ возста́нїѧ врагѡ́въ, Гдⷭ҇ꙋ помо́лимсѧ.
Лю́дїе: Гдⷭ҇и, поми́лꙋй.
Де́нь ве́сь соверше́нъ, свѧ́тъ, ми́ренъ и҆ безгрѣ́шенъ прейтѝ, всѝ ᲂу҆ Гдⷭ҇а про́симъ.
Лю́дїе: Пода́й, Гдⷭ҇и.
А҆́гг҃ла ми́рна, вѣ́рна наста́вника, храни́телѧ дꙋ́шъ и҆ тѣле́съ на́шихъ, ᲂу҆ Гдⷭ҇а про́симъ.
Лю́дїе: Пода́й, Гдⷭ҇и.
Проще́нїѧ и҆ ѡ҆ставле́нїѧ грѣхѡ́въ и҆ прегрѣше́нїй на́шихъ, ᲂу҆ Гдⷭ҇а про́симъ.
Лю́дїе: Пода́й, Гдⷭ҇и.
До́брыхъ и҆ поле́зныхъ дꙋша́мъ на́шымъ, и҆ ми́ра мі́рови, ᲂу҆ Гдⷭ҇а про́симъ.
Лю́дїе: Пода́й, Гдⷭ҇и.
Про́чее вре́мѧ живота̀ на́шегѡ въ ми́рѣ и҆ здра́вїи сконча́ти на́мъ, ᲂу҆ Гдⷭ҇а про́симъ.
Лю́дїе: Пода́й, Гдⷭ҇и.
Хрїстїа́нскїѧ кончи́ны живота̀ на́шегѡ, неболѣ́зненны и҆ непосты́дны, и҆ до́брагѡ ѿвѣ́та на стра́шнѣмъ и҆ тре́петнѣмъ сꙋди́щи Хрⷭ҇то́вѣ, про́симъ.
Лю́дїе: Пода́й, Гдⷭ҇и.
Пресвѧтꙋ́ю, пречи́стꙋю, пресла́внꙋю, благослове́ннꙋю Влады́чицꙋ на́шꙋ Богоро́дицꙋ и҆ приснодѣ́вꙋ Мр҃і́ю, ст҃а́гѡ І҆ѡа́нна, сла́внагѡ проро́ка, предте́чꙋ и҆ крⷭ҇ти́телѧ, боже́ствєнныѧ и҆ всехва̑льныѧ а҆пⷭ҇толы, сла̑вныѧ прⷪ҇рѡ́ки, подвиза́вшыѧсѧ, и҆ мꙋ́ченики, и҆ всѧ̑ свѧты̑ѧ и҆ пра́вєдныѧ помѧнꙋ́вше, са́ми себѐ, и҆ дрꙋ́гъ дрꙋ́га, и҆ ве́сь живо́тъ на́шъ, Хрⷭ҇тꙋ̀ Бг҃ꙋ предади́мъ.
Лю́дїе: Тебѣ̀, Гдⷭ҇и,
Быва́ємымъ дїа́конствамъ, мо́литсѧ а҆рхїере́й (и҆лѝ і҆ере́й), пред̾ свѧто́ю трапе́зою та́йнѡ, зрѧ̀ къ восто́кꙋ:
Влады́ко животво́рче и҆ благи́хъ пода́телю, да́вый человѣ́кѡмъ блаже́ннꙋю наде́ждꙋ жи́зни вѣ́чныѧ, Гдⷭ҇а на́шего І҆и҃са Хрⷭ҇та̀, сподо́би ны̀, Бла́же, во ѡ҆свѧще́нїи и҆ сїю́ ти бж҃е́ственнꙋю соверши́ти слꙋ́жбꙋ въ наслажде́нїе хотѧ́щагѡ бы́ти блаже́нства.
И҆ простира́етъ съ пресвѵ́теры а҆нті́мїнсъ, сконча́вшымсѧ же дїа́конствамъ возглаша́етъ:
Ꙗ҆́кѡ да под̾ держа́вою твое́ю всегда̀ храни́ми, и҆ во свѣ́тъ и҆́стины пꙋтеводи́ми, тебѣ̀ сла́вꙋ и҆ бл҃годаре́нїе возсыла́емъ, Ѻ҆ц҃ꙋ̀, и҆ Сн҃ꙋ, и҆ свѧто́мꙋ Дх҃ꙋ, ны́нѣ и҆ при́снѡ, и҆ во вѣ́ки вѣкѡ́въ.
Лю́дїе: А҆ми́нь.
Дїа́конъ:
Ми́ромъ воспои́мъ Хрⷭ҇тꙋ̀: да никто̀ ѿ ѡ҆глаше́нныхъ, да никто̀ ѿ непосвѧще́нныхъ, да никто̀ ѿ немогꙋ́щихъ моли́тисѧ съ на́ми: позна́йте дрꙋ́гъ дрꙋ́га: Двє́ри. Про́сти всѝ.
И҆ вхо́дѧтъ дїа́коны во свѧты́й ѻ҆лта́рь ма́лыми двермѝ. И҆ начина́ютъ пѣвцы̀ ко́снѡ и҆ со сладкопѣ́нїемъ:
Да молчи́тъ всѧ́каѧ пло́ть человѣ́ча, и҆ да стои́тъ со стра́хомъ и҆ тре́петомъ, и҆ ничто́же земно́е въ себѣ̀ да помышлѧ́етъ: Ца́рь бо ца́рствꙋющихъ и҆ Госпо́дь госпо́дствꙋющихъ прихо́дитъ закла́тисѧ и҆ да́тисѧ въ снѣ́дь вѣ̑рнымъ.
Пѣва́емꙋ семꙋ̀, прїе́млетъ а҆рхїере́й (и҆лѝ і҆ере́й) кади́льницꙋ, и҆ кади́тъ свѧтꙋ́ю трапе́зꙋ ѡ҆́крестъ, ѻ҆лта́рь ве́сь, та́же свѧты̑ѧ і҆кѡ̑ны, ли́ки и҆ лю́ди, по ѻ҆бы́чаю. А҆рхїере́й кади́тъ, держа̀ въ шꙋ́йцѣ же́злъ сво́й.
А҆́ще а҆рхїере́й лїтꙋргиса́етъ: По кажде́нїи ѿлага́етъ а҆рхїере́й кади́льницꙋ и҆ же́злъ. И҆ и҆схо́дѧтъ ца́рскими двермѝ дїа́коны, держа́ще ᲂу҆мыва́льницꙋ и҆ ᲂу҆тира́льникъ, и҆ ᲂу҆мыва́етъ а҆рхїере́й рꙋ́ки своѧ̑ во свѧты́хъ две́рехъ пред̾ лице́мъ наро́да, та́же кропи́тъ и҆́ма наро́дъ. По́слѣ а҆рхїере́а ᲂу҆мыва́ютъ рꙋ́ки пред̾ лице́мъ наро́да сослꙋжа́щїи пресвѵ́теры, то́чїю не кропѧ́тъ. Вхо́дѧтъ же дїа́коны со ᲂу҆мыва́льницею во ѻ҆лта́рь свѧты́ми двермѝ. Та́же цѣлꙋ́етъ а҆рхїере́й съ сослꙋжа́щими свѧтꙋ́ю трапе́зꙋ и҆ ма́лѡ покланѧ́етсѧ наро́дꙋ, и҆ ѿхо́дитъ съ сослꙋжа́щими въ предложе́нїе. И҆ дае́тъ а҆рхїере́й ді́скосъ со свѧты́мъ хлѣ́бомъ пе́рвомꙋ пресвѵ́терꙋ, ничто́же глаго́лѧ, ча́шꙋ же второ́мꙋ пресвѵ́терꙋ. Несе́тъ же пе́рвый пресвѵ́теръ ді́скосъ прѝ пе́рсѣхъ свои́хъ. И҆ и҆схо́дѧтъ сѣ́верными двермѝ пред̾идꙋ́щымъ ді́скосѡмъ со свѣща́ми и҆ кади́лы, ꙗ҆́коже предписа́сѧ длѧ вхо́да съ кни́гами боже́ственныхъ писа́нїй. А҆рхїере́й же со вхо́домъ не и҆́детъ, но во свѧтѣ́мъ ѻ҆лтарѝ ѡ҆жида́етъ.
А҆́ще лїтꙋргиса́етъ пресвѵ́теръ: По кажде́нїи цѣлꙋ́етъ і҆ере́й свѧтꙋ́ю трапе́зꙋ, и҆ поклонѧ́сь люде́мъ, ѿхо́дитъ съ дїа́кономъ въ предложе́нїе, и҆ ᲂу҆мыва́ютъ здѣ̀ рꙋ́цѣ. Та́же подае́тъ дїа́конꙋ свѧты́й ді́скосъ, ничто́же глаго́лѧ. Дїа́конъ же прїе́млетъ ді́скосъ не на главꙋ̀, но проти́вꙋ пе́рсей де́ржитъ є҆го̀. І҆ере́й же взе́млетъ ст҃ы́й поти́ръ, и҆ та́кѡ творѧ́тъ вхо́дъ, ꙗ҆́коже предписа́сѧ длѧ вхо́да съ кни́гами боже́ственныхъ писа́нїй, предходѧ́щымъ парамона́рїємъ со свѣти̑льники и҆ кади́льницею, є҆́юже кади́тъ парамона́рїй на несѡ́мыѧ да́ры. И҆ дости́гше а҆мвѡ́на, и҆́же є҆́сть на средѣ̀ хра́ма, ста́нꙋтъ і҆ере́й со дїа́кономъ на ни́жшей є҆гѡ̀ степе́ни, зрѧ́ще къ за́падꙋ, и҆ здѣ̀ помѧнꙋ́тъ, за ни́хже прино́ситсѧ свѧта́ѧ же́ртва, живы̑ѧ и҆ ᲂу҆ме́ршыѧ. И҆ по си́хъ возглаша́етъ дїа́конъ:
Всѣ́хъ ва́съ да помѧне́тъ Гдⷭ҇ь Бг҃ъ, всегда̀, ны́нѣ и҆ при́снѡ, и҆ во вѣ́ки вѣкѡ́въ.
Лю́дїе ко́снѡ: А҆ми́нь.
И҆ и҆́дꙋтъ і҆ере́й со дїа́кономъ ко ѻ҆лтарю̀, и҆ ста́нꙋтъ пред̾ степе́нми сѡлеѝ, зрѧ́ще къ восто́кꙋ. И҆ глаго́летъ і҆ере́й возгла́снѡ моли́твꙋ предложе́нїѧ (зрѝ по си́хъ):
А҆́ще а҆рхїере́й лїтꙋргиса́етъ: И҆́дꙋтъ пресвѵ́теры и҆ дїа́коны чрезъ ве́сь хра́мъ да́же до степе́ней сѡлеѝ, дїа́конѡмъ непреста́ннѡ кадѧ́щымъ на несѡ́мыѧ да́ры. И҆ ста́нꙋтъ всѝ пред̾ сѡле́ю, зрѧ́ще къ восто́кꙋ: пресвѵ́теръ несы́й ді́скосъ ѡ҆деснꙋ́ю, несы́й же поти́ръ ѡ҆шꙋ́юю, дїа́коны же со свѣща́ми и҆ кади́льницами по ѻ҆бою̀ странꙋ̑ свѧты́хъ двере́й. И҆схо́дитъ же а҆рхїере́й и҆зъ ѻ҆лтарѧ̀ въ ца̑рскїѧ двє́ри без̾ жезла̀ и҆ кади́ла, и҆ глаго́летъ пе́рвый пресвѵ́теръ ти́химъ гла́сомъ:
А҆рхїере́йство твоѐ да помѧне́тъ Гдⷭ҇ь Бг҃ъ во ца́рствїи свое́мъ, всегда̀, ны́нѣ и҆ при́снѡ, и҆ во вѣ́ки вѣкѡ́въ.
А҆рхїере́й ѿвѣща́етъ: Свѧще́нство и҆ дїа́конство ва́шѧ да помѧне́тъ Гдⷭ҇ь Бг҃ъ во ца́рствїи свое́мъ, всегда̀, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.
Та́же гл҃етъ моли́твꙋ предложе́нїѧ возгла́снѡ, зрѧ̀ и҆зъ ца́рскихъ двере́й къ за́падꙋ.
Моли́тва предложе́нїѧ:
Бж҃е, Бж҃е на́шъ, небе́сный хлѣ́бъ пи́щꙋ всемꙋ̀ мі́рꙋ, Гдⷭ҇а на́шего І҆и҃са Хрⷭ҇та̀ посла́вый сп҃са и҆ и҆зба́вителѧ и҆ благодѣ́телѧ, благословѧ́ща и҆ ѡ҆свѧща́юща на́съ, са́мъ благословѝ и҆ предложе́нїе сїѐ (А҆́ще а҆рхїере́й лїтꙋргиса́етъ, прїе́млетъ здѣ̀ а҆рхїере́й ѿ пресвѵ́тера ді́скосъ, и҆ поставлѧ́етъ є҆го̀ на свѧтѣ́й трапе́зѣ, та́же возвра́щьсѧ мо́литсѧ зрѧ̀ къ за́падꙋ:) и҆ прїимѝ є҆̀ въ пренебе́сный тво́й же́ртвенникъ.
(Здѣ̀ прїе́млетъ ѿ втора́гѡ пресвѵ́тера свѧтꙋ́ю ча́шꙋ и҆ поставлѧ́етъ ю҆̀ на свѧтѣ́й трапе́зѣ. И҆ вхо́дѧтъ пресвѵ́теры и҆ дїа́коны во свѧты́й ѻ҆лта́рь свѧты́ми двермѝ, и҆ ста́нꙋтъ на свои́хъ сѝ мѣста́хъ. А҆́ще лїтꙋргиса́етъ і҆ере́й, вхо́дитъ здѣ̀ съ дїа́кономъ во свѧты́й ѻ҆лта́рь, и҆ поставлѧ́ютъ свѧта̑ѧ на свѧтѣ́й трапе́зѣ, ꙗ҆́коже на лїтꙋргі́и Златоꙋ́стовой твори́мъ. А҆́ще покры́ты бы́ша сосꙋ́ды, ѿлага́ютсѧ здѣ̀ всѣ̀ покро́вы. И҆ мо́литсѧ а҆рхїере́й (и҆лѝ і҆ере́й) пред̾ свѧто́ю трапе́зою, зрѧ̀ къ восто́кꙋ, возгла́снѡ):
Помѧнѝ, ꙗ҆́кѡ бла́гъ и҆ человѣколю́бецъ, прине́сшихъ, и҆ и҆̀хже ра́ди принесо́ша: и҆ на́съ неѡсꙋждє́ны сохранѝ во свѧщеннодѣ́йствїи боже́ственныхъ твои́хъ та̑инъ. Ꙗ҆́кѡ свѧти́сѧ и҆ просла́висѧ всечестно́е и҆ великолѣ́пое и҆́мѧ твоѐ, Ѻ҆ц҃а̀, и҆ Сн҃а, и҆ Ст҃а́гѡ Дх҃а, ны́нѣ и҆ при́снѡ, и҆ во вѣ́ки вѣкѡ́въ.
Лю́дїе: А҆ми́нь.
И҆ па́ки пою́тъ пѣвцы̀ херꙋві́мскꙋю пѣ́снь:
Предхо́дѧтъ же семꙋ̀ ли́цы а҆́гг҃льстїи со всѧ́кимъ нача́ломъ и҆ вла́стїю, многоѻчи́тїи Херꙋві́ми, и҆ шестокрила́тїи Серафі́ми, ли́ца закрыва́юще, и҆ вопїю́ще пѣ́снь: а҆ллилꙋ́їа, а҆ллилꙋ́їа, а҆ллилꙋ́їа.
Пѣва́емꙋ семꙋ̀, прїе́млетъ а҆рхїере́й (и҆лѝ і҆ере́й) кади́ло, и҆ кади́тъ предложє́ннаѧ, гл҃ѧ моли́твꙋ сїю̀ та́йнѡ:
Влады́ко вседержи́телю, царю̀ сла́вы, вѣ́дый всѧ̑ пре́жде бытїѧ̀ и҆́хъ, са́мъ прїидѝ къ на́мъ во свѧты́й ча́съ се́й призыва́ющымъ тѧ̀, и҆ и҆зба́ви ны̀ ѿ сра́ма грѣхо́внагѡ, ѡ҆чи́сти на́шъ ᲂу҆́мъ и҆ помышлє́нїѧ ѿ нечи́стыхъ по́хотей и҆ мїрскі́ѧ пре́лести и҆ всѧ́кагѡ дїа́вольскагѡ дѣ́йства, и҆ прїимѝ ѿ рꙋ́къ на́съ грѣ́шныхъ ѳѷмїа́мъ се́й, ꙗ҆́коже прїѧ́лъ є҆сѝ приноше́нїе а҆́велево, и҆ нѡ́ево, и҆ а҆арѡ́ново, и҆ самꙋи́лово, и҆ всѣ́хъ свѧты́хъ твои́хъ, и҆збавлѧ́ѧ ны̀ ѿ всѧ́кагѡ дѣѧ́нїѧ лꙋка́вагѡ, и҆ спаса́ѧ во є҆́же всегда̀ благоꙋгожда́ти, и҆ покланѧ́тисѧ, и҆ сла́вити тебѐ Ѻ҆ц҃а̀, и҆ є҆диноро́днаго твоего̀ Сн҃а, и҆ Дх҃а твоего̀ всесвѧта́го, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.
Дїа́коны, взе́мше благослове́нїе, и҆схо́дѧтъ ма́лыми двермѝ и҆ ста́нꙋтъ на сѡлеѣ̀ лице́мъ къ лю́демъ. Сконча́вшꙋсѧ пѣ́нїю возглаша́етъ дїа́конъ:
Премꙋ́дростїю бо́жїею во́нмемъ.
И҆ гл҃ютъ лю́дїе всѝ мѣ́рнымъ гла́сомъ вкꙋ́пѣ:
Вѣ́рꙋю во є҆ди́наго Бг҃а Ѻ҆ц҃а̀, вседержи́телѧ, творца̀ не́бꙋ и҆ землѝ, ви̑димымъ же всѣ̑мъ и҆ неви̑димымъ. И҆ во є҆ди́наго Гдⷭ҇а І҆и҃са Хрⷭ҇та̀, Сн҃а бж҃їѧ, є҆диноро́днаго, и҆́же ѿ Ѻ҆ц҃а̀ рожде́ннаго пре́жде всѣ́хъ вѣ́къ. Свѣ́та ѿ свѣ́та. Бо́га и҆́стинна ѿ Бо́га и҆́стинна, рожде́нна, несотворе́нна, є҆диносꙋ́щна Ѻ҆ц҃ꙋ̀, и҆́мже всѧ̀ бы́ша. На́съ ра́ди человѣ́къ, и҆ на́шегѡ ра́ди спасе́нїѧ сше́дшаго съ небе́съ, и҆ воплоти́вшагосѧ ѿ Дх҃а Ст҃а, и҆ Мр҃і́и Дв҃ы, и҆ вочеловѣ́чшасѧ. Распѧ́таго же за ны̀ при понті́йстѣмъ Пїла́тѣ, и҆ страда́вша, и҆ погребе́нна. И҆ воскре́сшаго въ тре́тїй де́нь по писа́нїємъ. И҆ возше́дшаго на небеса̀, и҆ сѣдѧ́ща ѡ҆деснꙋ́ю Ѻ҆ц҃а̀. И҆ па́ки грѧдꙋ́щаго со сла́вою сꙋди́ти живы̑мъ и҆ мє́ртвымъ, є҆гѡ́же ца́рствїю не бꙋ́детъ конца̀. И҆ въ Дꙋ́ха Ст҃а́го, Гдⷭ҇а, животворѧ́щаго, и҆́же ѿ Ѻ҆ц҃а̀ и҆сходѧ́щаго, и҆́же со Ѻ҆ц҃е́мъ и҆ Сн҃омъ спокланѧ́ема и҆ ссла́вима, глаго́лавшаго прорѡ́ки. Во є҆ди́нꙋ свѧтꙋ́ю, собо́рнꙋю, и҆ а҆пⷭ҇льскꙋю це́рковь. И҆сповѣ́дꙋю є҆ди́но креще́нїе во ѡ҆ставле́нїе грѣхѡ́въ. Ча́ю воскресе́нїѧ ме́ртвыхъ: и҆ жи́зни бꙋ́дꙋщагѡ вѣ́ка. А҆ми́нь.
Глаго́лемꙋ сѷмво́лꙋ вѣ́ры, мо́литсѧ а҆рхїере́й (и҆лѝ і҆ере́й) та́йнѡ:
Бж҃е и҆ влады́ко всѣ́хъ, достѡ́йны ны̀ содѣ́лай часа̀ сегѡ̀ недосто́йныхъ, человѣколю́бче, да ѡ҆чи́стившесѧ ѿ всѧ́кагѡ кова́рства и҆ всѧ́кагѡ лицемѣ́рїѧ, соедини́мсѧ дрꙋ́гъ дрꙋ́гꙋ ми́ра и҆ любвѐ сою́зомъ, ᲂу҆тверждє́ны твоегѡ̀ боговѣ́дѣнїѧ свѧще́нїемъ, ра́ди є҆диноро́днагѡ твоегѡ̀ Сн҃а Хрⷭ҇та̀, съ ни́мже благослове́нъ є҆сѝ, со пресвѧты́мъ, и҆ благи́мъ, и҆ животворѧ́щимъ твои́мъ Дꙋ́хомъ, ны́нѣ и҆ при́снѡ, и҆ во вѣ́ки вѣкѡ́въ.
И҆ по сконча́нїи сѷмво́ла вѣ́ры, возглаша́етъ дїа́конъ зрѧ̀ къ лю́демъ:
Ста́немъ до́брѣ. Ми́ромъ Гдⷭ҇ꙋ помо́лимсѧ.
Та́же а҆рхїере́й (и҆лѝ і҆ере́й) возгла́съ:
Ꙗ҆́кѡ Бг҃ъ ми́лости, любвѐ, щедрѡ́тъ и҆ человѣколю́бїѧ є҆сѝ, ты̀, и҆ є҆диноро́дный тво́й Сн҃ъ, и҆ Дх҃ъ тво́й всест҃ы́й, ны́нѣ и҆ при́снѡ, и҆ во вѣ́ки вѣкѡ́въ.
Лю́дїе: А҆ми́нь.
И҆ зна́менꙋетъ а҆рхїере́й (и҆лѝ і҆ере́й) лю́ди, глаго́лѧ:
Ми́ръ всѣ̑мъ.
Лю́дїе: И҆ дх҃ови твоемꙋ̀.
Дїа́конъ: Возлю́бимъ дрꙋ́гъ дрꙋ́га лобза́нїемъ свѧты́мъ.
И҆ пою́тъ пѣвцы̀ со сладкопѣ́нїемъ:
Возлюблю́ тѧ, Гдⷭ҇и, крѣ́посте моѧ̀, Гдⷭ҇ь ᲂу҆твержде́нїе, и҆ прибѣ́жище, и҆ и҆зба́витель мо́й.
А҆рхїере́й же (и҆лѝ і҆ере́й) цѣлꙋ́етъ кра́й ді́скоса, та́же кра́й ча́ши и҆ свѧтꙋ́ю трапе́зꙋ. Подо́бнѣ творѧ́тъ и҆ сослꙋжа́щїи пресвѵ́теры, та́же цѣлꙋ́ютъ а҆рхїере́а въ рꙋ́кꙋ, дрꙋ́гъ же дрꙋ́га въ ᲂу҆ста̀, ꙗ҆́кѡже мы̀ во свѧты́й де́нь па́схи ѡ҆быко́хомъ твори́ти. То́жде творѧ́тъ и҆ дїа́коны, стоѧ́ще на сѡлеѣ̀. Сконча́вшꙋсѧ пѣ́нїю, возглаша́етъ дїа́конъ:
Главы̑ на́шѧ Гдⷭ҇еви прикло́нимъ.
Лю́дїе вельмѝ ко́снѡ: Тебѣ̀, Гдⷭ҇и.
А҆рхїере́й же (и҆лѝ і҆ере́й), приклони́въ главꙋ̀, глаго́летъ моли́твꙋ сїю̀ та́йнѡ:
Є҆ди́не Гдⷭ҇и и҆ ми́лостиве Бж҃е, прикло́ншымъ вы̑и своѧ̑ пред̾ свѧты́мъ твои́мъ же́ртвенникомъ, и҆ просѧ́щымъ ᲂу҆ тебє̀ дх҃ѡ́вныѧ да́ры, низпослѝ бл҃года́ть твою̀ благꙋ́ю, и҆ благословѝ всѣ́хъ на́съ всѧ́кимъ благослове́нїемъ дꙋхо́внымъ и҆ неѿе́млемымъ, и҆́же въ вы́шнихъ живы́й и҆ на смирє́нныѧ призира́ѧй. Ꙗ҆́кѡ хва́льно, и҆ покланѧ́емо, и҆ препросла́влено є҆́сть всесвѧто́е и҆́мѧ твоѐ, Ѻ҆ц҃а̀, и҆ Сн҃а, и҆ Ст҃а́гѡ Дх҃а. А҆ми́нь.
Дїа́конъ, зрѧ̀ въ свѧты̑ѧ двє́ри ко свѧтѣ́й трапе́зѣ глаго́летъ возгла́снѡ:
Гдⷭ҇и, благословѝ.
А҆рхїере́й (и҆лѝ і҆ере́й) возгла́съ:
Гдⷭ҇ь да благослови́тъ ны̀, и҆ да поспѣши́тъ на́мъ, и҆ достѡ́йны да сотвори́тъ ны̀ предстоѧ́нїѧ свѧта́гѡ своегѡ̀ же́ртвенника и҆ прише́ствїѧ (здѣ̀ зна́менꙋетъ ді́скосъ) свѧта́гѡ своегѡ̀ дх҃а (здѣ̀ зна́менꙋетъ ча́шꙋ) свое́ю благода́тїю и҆ человѣколю́бїемъ, всегда̀, ны́нѣ и҆ при́снѡ, и҆ во вѣ́ки вѣкѡ́въ.
Лю́дїе, вельмѝ ко́снѡ: А҆ми́нь.
Пѣва́емꙋ семꙋ̀, покланѧ́етсѧ а҆рхїере́й (и҆лѝ і҆ере́й) съ сослꙋжа́щими, глаго́лѧ въ себѣ̀:
Сла́ва въ вы́шнихъ Бг҃ꙋ, и҆ на землѝ ми́ръ, въ человѣ́цѣхъ благоволе́нїе (г҃-жды). Гдⷭ҇и, ᲂу҆стнѣ̀ моѝ ѿве́рзеши, и҆ ᲂу҆ста̀ моѧ̑ возвѣстѧ́тъ хвалꙋ̀ твою̀ (г҃- жды). Да и҆спо́лнѧтсѧ ᲂу҆ста̀ моѧ̑ хвале́нїѧ, Гдⷭ҇и, ꙗ҆́кѡ да воспою̀ сла́вꙋ твою̀, ве́сь де́нь великолѣ́пїе твоѐ (г҃-жды).
И҆ поклонѧ́сѧ ма́лѡ на ѻ҆́бѣ страны̑ со слꙋжа́щымъ, пое́тъ вкꙋ́пѣ съ ни́ми благолѣ́пнѡ со сладкопѣ́нїемъ, во гла́съ є҃:
Возвели́чите Гдⷭ҇а со мно́ю, и҆ вознесе́мъ и҆́мѧ є҆гѡ̀ вкꙋ́пѣ.
Лю́дїе же ѿвѣща́ютъ въ то́йже гла́съ:
Дх҃ъ Свѧты́й на́йдетъ на тѧ̀, и҆ си́ла вы́шнѧгѡ ѡ҆сѣни́тъ тѧ̀.
А҆́ще слꙋ́житъ є҆ди́нъ то́кмѡ і҆ере́й со дїа́кономъ, и҆схо́дитъ і҆ере́й свѧты́ми двермѝ и҆зъ ѻ҆лтарѧ̀ на сѡлею̀, и҆ зрѧ̀ къ лю́демъ пое́тъ сїѧ̑ вкꙋ́пѣ съ дїа́кономъ, та́же, ѿвѣща́вшымъ лю́демъ, ма́лѡ покланѧ́етсѧ и҆ возвраща́етсѧ ко свѧтѣ́й трапе́зѣ.
Є҆гда́ же пою́тъ лю́дїе, А҆́ще лїтꙋргиса́етъ а҆рхїере́й, глаго́лютъ сослꙋжа́щїи ти́химъ гла́сомъ: Помѧнѝ и҆ на́съ, влады́ко свѧты́й. А҆рхїере́й же ѿвѣща́етъ та́кожде: Да помѧне́тъ ва́съ Гдⷭ҇ь во ца́рствїи свое́мъ, всегда̀, ны́нѣ и҆ при́снѡ, и҆ во вѣ́ки вѣкѡ́въ. А҆́ще пресвѵ́теры сослꙋ́жатъ і҆ере́еви, глаго́лютъ є҆мꙋ̀: Помѧнѝ и҆ на́съ, влады́ко, то́йже ѿвѣща́етъ: Да помѧне́тъ на́съ Гдⷭ҇ь во ца́рствїи небе́снѣмъ, всегда̀, ны́нѣ и҆ при́снѡ, и҆ во вѣ́ки вѣкѡ́въ.
И҆ сконча́вшꙋсѧ пѣ́нїю, а҆́бїе глаго́летъ дїа́конъ дїа̑конства сїѧ̑, зрѧ̀ къ лю́демъ:
Ми́ромъ Гдⷭ҇ꙋ помо́лимсѧ.
Лю́дїе: Гдⷭ҇и, поми́лꙋй.
Дїа́конъ ѡ҆бра́щьсѧ ма́лѡ въ ст҃ы̑ѧ двє́ри:
Спасѝ, поми́лꙋй, ᲂу҆ще́дри и҆ сохранѝ на́съ, Бо́же, твое́ю благода́тїю.
Лю́дїе: Гдⷭ҇и, поми́лꙋй.
Дїа́конъ, па́ки зрѧ̀ къ лю́демъ: Ѡ҆ свы́шнемъ ми́рѣ и҆ бо́жїи человѣколю́бїи, и҆ ѡ҆ спасе́нїи дꙋ́шъ на́шихъ, Гдⷭ҇ꙋ помо́лимсѧ.
Лю́дїе: Гдⷭ҇и, поми́лꙋй.
Ѡ҆ ми́рѣ всегѡ̀ мі́ра и҆ є҆дине́нїи всѣ́хъ ст҃ы́хъ бж҃їихъ церкве́й, Гдⷭ҇ꙋ помо́лимсѧ.
Лю́дїе: Гдⷭ҇и, поми́лꙋй.
Ѡ҆ свѧтѣ́й вселе́нстѣй и҆ а҆пⷭ҇льстѣй це́ркви, є҆́же ѿ конє́цъ землѝ да́же до конє́цъ є҆ѧ̀, Гдⷭ҇ꙋ помо́лимсѧ.
Лю́дїе: Гдⷭ҇и, поми́лꙋй.
Ѡ҆ спасе́нїи и҆ застꙋпле́нїи ст҃ѣ́йшагѡ на́шегѡ ѻ҆тца̀ и҆ а҆рхїепі́скопа (и҆́мѧ ре́къ) всегѡ̀ при́чта и҆ хрїстолюби́выхъ люде́й, Гдⷭ҇ꙋ помо́лимсѧ.
Лю́дїе: Гдⷭ҇и, поми́лꙋй.
Ѡ҆ благочести́вѣйшихъ и҆ боговѣнча́нныхъ правосла́вныхъ царѣ́хъ, все́й пала́тѣ и҆ во́инствѣ и҆́хъ, и҆ ѡ҆ є҆́же съ небесѐ по́мощи и҆ побѣ́дѣ, Гдⷭ҇ꙋ помо́лимсѧ.
Лю́дїе: Гдⷭ҇и, поми́лꙋй.
Ѡ҆ свѧтѣ́мъ Хрⷭ҇та̀ Бг҃а на́шегѡ гра́дѣ, ца́рствꙋющемъ гра́дѣ, всѧ́комъ гра́дѣ и҆ странѣ̀, и҆ и҆́же въ правосла́вной вѣ́рѣ и҆ благоче́стїи бж҃їи живꙋ́щихъ въ ни́хъ, ѡ҆ ми́рѣ и҆ безмѧте́жїи и҆́хъ, Гдⷭ҇ꙋ помо́лимсѧ.
Лю́дїе: Гдⷭ҇и, поми́лꙋй.
Ѡ҆ плодоносѧ́щихъ и҆ добродѣ́ющихъ во свѧты́хъ бо́жїихъ церква́хъ, и҆ помина́ющихъ ᲂу҆бѡ́гїѧ, вдови̑цы и҆ сироты̑, стра̑нныѧ и҆ въ нꙋ́ждѣ сꙋ́щыѧ, и҆ ѡ҆ заповѣ́давшихъ на́мъ, ꙗ҆́кѡ да помина́емъ и҆̀хъ въ моли́твахъ, Гдⷭ҇ꙋ помо́лимсѧ.
Лю́дїе: Гдⷭ҇и, поми́лꙋй.
Ѡ҆ є҆́же въ ста́рости и҆ не́мощи сꙋ́щихъ, болѧ́щихъ, трꙋжда́ющихсѧ, и҆ ѿ дꙋхѡ́въ нечи́стыхъ стꙋжа́емыхъ, є҆́же ѿ Бг҃а ско́ромъ и҆сцѣле́нїи и҆ спасе́нїи и҆́хъ, Гдⷭ҇ꙋ помо́лимсѧ.
Лю́дїе: Гдⷭ҇и, поми́лꙋй.
Ѡ҆ є҆́же въ дѣ́вствѣ и҆ чистотѣ̀ и҆ по́двизѣ, и҆ въ честнѣ́мъ бра́цѣ пребыва́ющихъ, и҆ ѡ҆ є҆́же въ гора́хъ, верте́пахъ и҆ про́пастехъ земны́хъ подвиза́ющихсѧ преподо́бныхъ ѻ҆тцѣ́хъ и҆ бра́тїѧхъ, Гдⷭ҇ꙋ помо́лимсѧ.
Лю́дїе: Гдⷭ҇и, поми́лꙋй.
Ѡ҆ пла́вающихъ, пꙋтеше́ствꙋющихъ, стра́нныхъ хрїстїа́нѣхъ, и҆ ѡ҆ є҆́же въ плѣне́нїи и҆ и҆згна́нїи, и҆ въ темни́цахъ и҆ въ тѧ́жкихъ рабо́тахъ сꙋ́щихъ бра́тїѧхъ на́шихъ, ми́рномъ возвраще́нїи коего́ждо въ до́мъ сво́й съ ра́достїю, Гдⷭ҇ꙋ помо́лимсѧ.
Лю́дїе: Гдⷭ҇и, поми́лꙋй.
Ѡ҆ предстоѧ́щихъ и҆ сомолѧ́щихсѧ на́мъ въ ча́съ се́й свѧты́й и҆ во всѧ́кое вре́мѧ ѻ҆тцѣ́хъ же и҆ бра́тїѧхъ, тща́нїи, трꙋдѣ̀ и҆ ᲂу҆се́рдїи и҆́хъ, Гдⷭ҇ꙋ помо́лимсѧ.
Лю́дїе: Гдⷭ҇и, поми́лꙋй.
И҆ ѡ҆ всѧ́кой дꙋшѝ хрїстїа́нстѣй, скорбѧ́щей и҆ ѡ҆ѕло́бленнѣй, ми́лости бж҃їѧ и҆ по́мощи тре́бꙋющей, и҆ ѡ҆ ѡ҆браще́нїи заблꙋ́ждшихъ, здра́вїи болѧ́щихъ, ѡ҆ свобожде́нїи плѣне́нныхъ, ᲂу҆покое́нїи преждепочи́вшихъ ѻ҆тє́цъ и҆ бра́тїй, Гдⷭ҇ꙋ помо́лимсѧ.
Лю́дїе: Гдⷭ҇и, поми́лꙋй.
Ѡ҆ ѡ҆ставле́нїи грѣхѡ́въ и҆ проще́нїи согрѣше́нїй на́шихъ, и҆ ѡ҆ є҆́же и҆зба́вити на́съ ѿ всѧ́кїѧ ско́рби, гнѣ́ва, бѣды̀ и҆ нꙋ́жды, воста́нїѧ ꙗ҆зы̑къ, Гдⷭ҇ꙋ помо́лимсѧ.
Лю́дїе: Гдⷭ҇и, поми́лꙋй.
Простра́ннѣе ѡ҆ благорастворе́нїи воздꙋ́хѡвъ, дожде́хъ ми́рныхъ, ро́сахъ благи́хъ, плодѡ́въ и҆з̾ѻби́лїи, соверше́нномъ плодоро́дїи, и҆ ѡ҆ вѣнцѣ̀ лѣ́та, Гдⷭ҇ꙋ помо́лимсѧ.
Лю́дїе: Гдⷭ҇и, поми́лꙋй.
Ѡ҆ є҆́же ᲂу҆слы́шанꙋ и҆ благопрїѧ́тнꙋ бы́ти моле́нїю на́шемꙋ пред̾ Бг҃омъ, и҆ низпосла́тисѧ на́мъ бога̑тымъ ми́лостемъ и҆ щедро́тамъ є҆гѡ̀, Гдⷭ҇ꙋ помо́лимсѧ.
Лю́дїе: Гдⷭ҇и, поми́лꙋй.
Пресвѧтꙋ́ю, пречи́стꙋю, пресла́внꙋю, благослове́ннꙋю Влады́чицꙋ на́шꙋ Богоро́дицꙋ и҆ приснодѣ́вꙋ Мр҃і́ю, свѧты́хъ и҆ блаже́нныхъ І҆ѡа́нна сла́внаго проро́ка, предте́чꙋ и҆ крести́телѧ, Стефа́на перводїа́кона и҆ первомꙋ́ченика, Мѡѷсе́а, А҆арѡ́на, И҆лїю̀, Є҆лїссе́а, Самꙋи́ла, Даві́да, Данїи́ла проро́ки, и҆ всѧ̑ свѧты̑ѧ и҆ пра́вєдныѧ помѧне́мъ, ꙗ҆́кѡ да моли́твами и҆ молє́нїи и҆́хъ всѝ поми́ловани бꙋ́демъ.
Лю́дїе: Гдⷭ҇и, поми́лꙋй.
Ѡ҆ предлежа́щихъ честны́хъ и҆ пренебе́сныхъ, неизрече́нныхъ, пречи́стыхъ, сла́вныхъ, стра́шныхъ, ᲂу҆жа́сныхъ, боже́ственныхъ дарѣ́хъ, и҆ ѡ҆ спасе́нїи предстоѧ́щагѡ и҆ приносѧ́щагѡ сїѧ̑ честна́гѡ ѻ҆тца̀ на́шегѡ и҆ а҆рхїере́а (и҆́мѧ ре́къ, и҆лѝ і҆ере́а и҆́мѧ ре́къ, а҆́ще лїтꙋргїса́етъ і҆ере́й), Гдⷭ҇а Бг҃а мо́лимъ.
Лю́дїе: Гдⷭ҇и, поми́лꙋй, г҃-жды:
Глаго́лющꙋ дїа́конꙋ є҆ктенїю̀ сїю̀, мо́литсѧ а҆рхїере́й (и҆лѝ і҆ере́й) пред̾ свѧто́ю трапе́зою, преклони́въ главꙋ̀ и҆ ма́лѡ просте́ръ пред̾ собо́ю рꙋ́цѣ ко свѧтѣ́й трапе́зѣ, та́йнѡ си́це:
(Вѣ́домо бꙋ́ди, ꙗ҆́кѡ въ закѷнѳѣ моли́твы сїѧ̑ глаго́лютсѧ ѿ і҆ере́а внѣ̀ ѻ҆лтарѧ̀ за сѡлее́й, средѝ наро́да, ѻ҆ба́че во І҆ерꙋсали́мѣ сегѡ̀ не ѡ҆брѣто́хомъ).
Моли́тва свѧта́гѡ І҆а́кѡва:
Призрѣ́вый на ны̀ ми́лостїю и҆ щедро́тами, влады́ко Гдⷭ҇и, и҆ дарова́вый дерзнове́нїе на́мъ смирє́ннымъ и҆ грѣ̑шнымъ и҆ недостѡ́йнымъ рабѡ́мъ твои̑мъ предстоѧ́ти свѧто́мꙋ твоемꙋ̀ же́ртвенникꙋ и҆ приноси́ти тебѣ̀ стра́шнꙋю сїю̀ и҆ безкро́внꙋю же́ртвꙋ ѡ҆ на́шихъ грѣсѣ́хъ и҆ ѡ҆ людски́хъ невѣ́дѣнїихъ, при́зри на мѧ̀, непотре́бнаго раба̀ твоего̀, и҆ и҆згла́ди моѧ̑ прегрѣшє́нїѧ благоꙋтро́бїѧ ра́ди твоегѡ̀, и҆ ѡ҆чи́сти моѧ̑ ᲂу҆ста̀ и҆ се́рдце ѿ всѧ́кїѧ скве́рны пло́ти и҆ дх҃а, и҆ ѿста́ви ѿ менє̀ всѧ́кїй по́мыслъ сра́мный же и҆ неразꙋ́мный, и҆ ᲂу҆довли́ мѧ, си́лою всесвѧта́гѡ твоегѡ̀ Дх҃а, въ слꙋ́жбꙋ сїю̀, и҆ прїими́ мѧ ра́ди твоеѧ̀ бла́гости, приближа́ющагосѧ свѧто́мꙋ же́ртвенникꙋ, и҆ благоволѝ, Гдⷭ҇и, прїѧ̑тнымъ бы́ти приноси̑мымъ тебѣ̀ дарѡ́мъ си̑мъ рꙋка́ми на́шими, снисходѧ́ще мои́мъ не́мощемъ, и҆ не ѿве́ржи менє̀ ѿ лица̀ твоегѡ̀, нижѐ возгнꙋша́йсѧ моегѡ̀ недосто́инства, но поми́лꙋй мѧ̀, Бж҃е, и҆ по мно́жествꙋ щедрѡ́тъ твои́хъ пре́зри беззакѡ́нїѧ моѧ̑, ꙗ҆́кѡ да неѡсꙋжде́ннѡ прише́дъ пред̾ сла́вꙋ твою̀, сподо́блюсѧ покро́ва є҆диноро́днагѡ твоегѡ̀ Сн҃а и҆ ѡ҆заре́нїѧ всесвѧта́гѡ твоегѡ̀ Дх҃а, и҆ не ꙗ҆́кѡ ра́бъ грѣха̀ ѿве́рженъ бꙋ́дꙋ, но ꙗ҆́кѡ ра́бъ тво́й ѡ҆брѣтꙋ̀ благода́тъ и҆ ми́лость и҆ ѡ҆ставле́нїе грѣхѡ́въ, въ се́мъ и҆ бꙋ́дꙋщемъ вѣ́цѣ. Є҆́й, Влады́ко вседержи́телю, всѐ си́льне Гдⷭ҇и, ᲂу҆слы́ши моле́нїе моѐ: ты́ бо є҆сѝ всѧ̑ дѣ́йствꙋѧй во всѣ́хъ, и҆ ѿ тебє̀ всѝ ча́емъ во всѣ́хъ по́мощи же и҆ застꙋпле́нїѧ, и҆ ѿ є҆диноро́днагѡ твоегѡ̀ Сн҃а и҆ животворѧ́щагѡ Дх҃а, ны́нѣ и҆ при́снѡ, и҆ во вѣ́ки вѣкѡ́въ.
И҆ моли́твꙋ сїю̀:
Бж҃е, и҆́же мно́гагѡ ра́ди и҆ неизрече́ннагѡ человѣколю́бїѧ низпосла́вый є҆диноро́днаго твоего̀ Сн҃а въ мі́ръ, да заблꙋ́ждшее возврати́тъ ѻ҆вча̀, не ѿврати́сѧ на́съ грѣ́шныхъ, врꙋча́ющихъ тѝ стра́шнꙋю сїю̀ и҆ безкро́внꙋю же́ртвꙋ: не бо̀ на пра̑вды на́шѧ ᲂу҆пова́ющи є҆смы̀, но на ми́лость твою̀ благꙋ́ю, є҆́ю же ро́дъ на́шъ соблюда́еши. И҆ ны́нѣ мо́лимсѧ и҆ про́симъ твою̀ благосты́ню: да не бꙋ́детъ во ѡ҆сꙋжде́нїе лю́демъ твои̑мъ ᲂу҆строе́нное на́мъ сїѐ ко спасе́нїю та́инство, но во ѡ҆ставле́нїе грѣхѡ́въ, во ѡ҆бновле́нїе дꙋ́шъ и҆ тѣле́съ, во благоꙋгожде́нїе тебѣ̀, Бг҃ꙋ и҆ Ѻ҆ц҃ꙋ̀.
И҆ моли́твꙋ сїю̀ ст҃а́гѡ Васі́лїа. Вѣ́домо бꙋ́ди, ꙗ҆́кѡ во І҆ерꙋсали́мѣ сїѧ̀ моли́тва не глаго́летсѧ, занѐ не ст҃а́гѡ І҆а́кѡва, но ст҃а́гѡ Васі́лїа є҆́сть. Мы́ же написа́хомъ здѣ̀ сїю̀ моли́твꙋ, поне́же въ дре́внихъ харті́ахъ ѡ҆брѣта́етсѧ на се́мъ мѣ́стѣ.
Гдⷭ҇и Бж҃е на́шъ, созда́вый ны̀ и҆ введы́й въ жи́знь сїю̀, показа́вый пꙋтѝ во спасе́нїе, дарова́вый на́мъ небе́сныхъ та̑инъ ѿкрове́нїе, ты̀ є҆сѝ положи́вый ны̀ въ слꙋ́жбꙋ сїю̀ си́лою всесвѧта́гѡ твоегѡ̀ Дх҃а. Благоволѝ, Влады́ко, бы́ти на́мъ слꙋжи́телємъ но́вагѡ твоегѡ̀ завѣ́та, слꙋга́мъ пречи́стыхъ твои́хъ та́инствъ, и҆ прїимѝ на́съ, приближа́ющихсѧ свѧто́мꙋ твоемꙋ̀ же́ртвенникꙋ по мно́жествꙋ ми́лости твоеѧ̀, да достѡ́йны бꙋ́демъ приноси́ти тебѣ̀ да́ры же и҆ жє́ртвы ѡ҆ свои́хъ си и҆ ѡ҆ людски́хъ невѣ́дѣнїихъ. И҆ да́ждь на́мъ, Гдⷭ҇и, со всѧ́кимъ стра́хомъ и҆ со́вѣстїю чи́стою приноси́ти тебѣ̀ дх҃о́внꙋю сїю̀ и҆ безкро́внꙋю же́ртвꙋ, ю҆́же прїи́мше во свѧты́й и҆ пренебе́сный и҆ мы́сленный тво́й же́ртвенникъ, въ воню̀ благоꙋха́нїѧ, возниспослѝ на́мъ благода́ть всесвѧта́гѡ Дх҃а. Є҆́й, Бж҃е, при́зри на ны̀ и҆ воззрѝ на слове́снꙋю сїю̀ слꙋ́жбꙋ на́шꙋ и҆ прїимѝ ю҆̀, ꙗ҆́коже прїѧ́лъ є҆сѝ А҆́велєвы да́ры, Нѡ́євы жє́ртвы, А҆враа́мѡва всеплѡ́дїѧ, Мѡѷсе́ѡва и҆ А҆арѡ́нова свѧщє́нства. Самꙋи́лѡва ми̑рнаѧ, Даві́дово покаѧ́нїе, Заха́рїино кади́ло, ꙗ҆́коже прїѧ́лъ є҆сѝ ѿ рꙋ̑къ свѧты́хъ твои́хъ а҆пⷭ҇лъ и҆́стиннꙋю сїю̀ слꙋ́жбꙋ: си́це прїимѝ и҆ ѿ рꙋ́къ на́съ грѣ́шныхъ предлежа̑щїѧ да́ры сїѧ̑ во бла́гости твое́й, и҆ да́ждь бы́ти приноше́нїю на́шемꙋ благопрїѧ́тнꙋ, ѡ҆свѧще́ннꙋ Дх҃омъ свѧты́мъ, во и҆скꙋпле́нїе на́шихъ прегрѣше́нїй и҆ людски́хъ невѣ́дѣнїй, и҆ во ᲂу҆покое́нїе преждепочи́вшихъ дꙋ́шъ, да и҆ мы̀ грѣ́шнїи и҆ недосто́йнїи рабѝ твоѝ, сподо́бльшесѧ нелицемѣ́рнѡ слꙋжи́ти свѧто́мꙋ твоемꙋ̀ же́ртвенникꙋ, прїи́мемъ мздꙋ̀ вѣ́рныхъ и҆ мꙋ́дрыхъ строи́телей, и҆ ѡ҆брѧ́щемъ благода́ть и҆ ми́лость въ де́нь стра́шный воздаѧ́нїѧ твоегѡ̀ пра́веднагѡ и҆ блага́гѡ.
Приглаго́летъ же и҆ сїѐ:
Вѣ́домо бꙋ́ди, ꙗ҆́кѡ въ закѷнѳѣ і҆ере́й здѣ̀ вхо́дитъ во свѧты́й ѻ҆лта́рь свѧты́ми двермѝ, и҆ чте́тъ моли́твꙋ сїю̀ пред̾ свѧто́ю трапе́зою, сегѡ̀ ра́ди моли́тва сїѧ̀ моли́твою завѣ́сы, си́рѣчь, внꙋ́трь ѻ҆лтарѧ̀, и҆менꙋ́етсѧ.
Моли́тва завѣ́сы:
Благодари́мъ тѧ̀, Гдⷭ҇и Бж҃е на́шъ, ꙗ҆́кѡ да́лъ є҆сѝ на́мъ дерзнове́нїе во вхо́дѣ свѧты́хъ, є҆го́же ѡ҆бнови́лъ є҆сѝ на́мъ пꙋ́ть но́вый и҆ живы́й чре́зъ завѣ́сꙋ пло́ти Хрⷭ҇та̀ твоегѡ̀. Сподо́бившесѧ же вни́ти на мѣ́сто селе́нїѧ сла́вы твоеѧ̀, внꙋ́трь же бы́ти завѣ́сы, и҆ свѧта́ѧ свѧты́хъ зрѣ́ти, припа́даемъ благосты́ни твое́й, Влады́ко, поми́лꙋй на́съ: поне́же пристра́шни и҆ тре́петни є҆смы̀ хотѧ́ще предстоѧ́ти свѧто́мꙋ твоемꙋ̀ же́ртвенникꙋ, и҆ приноси́ти тебѣ̀ стра́шнꙋю сїю̀ и҆ безкро́внꙋю же́ртвꙋ ѡ҆ на́шихъ согрѣше́нїихъ и҆ ѡ҆ людски́хъ невѣ́дѣнїихъ. Ниспослѝ на ны̀, Бж҃е, благода́ть твою̀ благꙋ́ю, и҆ ѡ҆свѧтѝ на́шѧ дꙋ́ши и҆ тѣлеса̀ и҆ дꙋ́си, и҆ премѣнѝ помышлє́нїѧ на́шѧ ко благоче́стїю, ꙗ҆́кѡ да чи́стою со́вѣстїю принесе́мъ тѝ ми́лость, ми́ръ, же́ртвꙋ хвале́нїѧ.
Сконча́вшымсѧ дїа́конствамъ возгла́съ:
Ми́лостїю и҆ щедро́тами и҆ человѣколю́бїемъ є҆диноро́днагѡ твоегѡ̀ Сн҃а, съ ни́мже благослове́нъ є҆сѝ, со пресвѧты́мъ и҆ благи́мъ и҆ животворѧ́щимъ твои́мъ Дх҃омъ, ны́нѣ и҆ при́снѡ, и҆ во вѣ́ки вѣкѡ́въ.
Лю́дїе: А҆ми́нь.
И҆ зна́менꙋетъ а҆рхїере́й (и҆лѝ і҆ере́й) лю́ди глаго́лѧ:
Ми́ръ всѣ̑мъ.
Лю́дїе: И҆ дꙋ́хови твоемꙋ̀.
Дїа́конъ: Ста́немъ до́брѣ. Ста́немъ благоче́стнѣ. Ста́немъ со стра́хомъ бж҃їимъ и҆ сокрꙋше́нїемъ. Во́нмемъ: свѧто́е возноше́нїе въ ми́рѣ Бг҃ꙋ:
И҆ вхо́дѧтъ дїа́коны во свѧты́й ѻ҆лта́рь ма́лыми двермѝ, и҆ взе́мше рїпі́ды, вѣ́ютъ свѧта̑ѧ.
Лю́дїе: Ми́лость ми́ра, же́ртвꙋ хвале́нїѧ.
А҆рхїере́й же (и҆лѝ і҆ере́й) глаго́летъ моли́твꙋ сїю̀ та́йнѡ:
И҆ знамена́тельнѡ ѡ҆дѣва́ющыѧ свѧщеннодѣ́йствїе сїѐ покро́вы гада́нїй ѿкры́въ, ꙗ҆́снѡ покажѝ на́мъ, и҆ ᲂу҆́мнаѧ на́шѧ ѻ҆́чи неѡбыме́ннагѡ твоегѡ̀ свѣ́та и҆спо́лни, и҆ ѡ҆чи́стивъ нищетꙋ̀ на́шꙋ ѿ всѧ́кїѧ скве́рны пло́ти и҆ дꙋ́ха, достѡ́йны содѣ́лай ны̀ стра́шнагѡ сегѡ̀ и҆ ᲂу҆жа́снагѡ предстоѧ́нїѧ, ꙗ҆́кѡ преблагоꙋтро́бенъ и҆ ми́лостивъ Бг҃ъ є҆сѝ, и҆ тебѣ̀ сла́вꙋ возсыла́емъ, Ѻ҆ц҃ꙋ̀ и҆ Сн҃ꙋ, и҆ свѧто́мꙋ Дх҃ꙋ ны́нѣ и҆ при́снѡ, и҆ во вѣ́ки вѣкѡ́въ.
И҆зше́дъ же а҆рхїере́й и҆лѝ і҆ере́й и҆зъ свѧты́хъ две́рїй, ста́нетъ на вы́шшей степе́ни сѡлеѝ и҆ возгласи́тъ зрѧ̀ къ лю́демъ, воздви́гъ деснꙋ́ю рꙋ́кꙋ свою̀:
Любы̀ Бг҃а и҆ Ѻ҆ц҃а̀, и҆ благода́ть Гдⷭ҇а и҆ Бг҃а и҆ Сп҃са на́шегѡ І҆и҃са Хрⷭ҇та̀, и҆ прича́стїе и҆ да́ръ всесвѧта́гѡ Дх҃а бꙋ́ди со всѣ́ми ва́ми.
И҆ зна́менꙋетъ лю́ди.
Лю́дїе: И҆ со дꙋ́хомъ твои́мъ.
А҆рхїере́й (и҆лѝ і҆ере́й), воздѣ́въ ѻ҆́чи своѝ горѣ̀ и҆ воздви́гъ рꙋ́цѣ, та́кожде зрѧ̀ къ лю́демъ, возглаша́етъ:
Горѣ̀ и҆мѣ́имъ ᲂу҆́мъ и҆ сердца̀.
Лю́дїе: И҆́мамы ко Гдⷭ҇ꙋ.
А҆рхїере́й и҆лѝ і҆ере́й: Благодари́мъ Гдⷭ҇а.
И҆ сложи́въ крестоѡбра́знѡ рꙋ́цѣ своѝ на пе́рсѣхъ, ма́лѡ покланѧ́етсѧ лю́демъ, и҆ возвраща́етсѧ ко свѧтѣ́й трапе́зѣ.
Лю́дїе пою́тъ ко́снѡ и҆ со сладкопѣ́нїемъ:
Досто́йно и҆ пра́ведно.
Зрѝ, ꙗ҆́кѡ про́чихъ сло́въ, сі́есть, Покланѧ́тисѧ Ѻ҆ц҃ꙋ̀, и҆ прѡ́чаѧ на се́й лїтꙋргі́и не пое́мъ.
А҆рхїере́й же и҆лѝ і҆ере́й, зрѧ̀ въ восто́кꙋ, преклони́въ главꙋ̀, и҆ ма́лѡ просте́ръ пред̾ собо́ю рꙋ́цѣ ко свѧтѣ́й трапе́зѣ, мо́литсѧ та́йнѡ си́це, творѧ̀ благодаре́нїе:
Ꙗ҆́кѡ вои́стиннꙋ досто́йно є҆́сть и҆ пра́ведно, лѣ́по же и҆ потре́бно, тѧ̀ хвали́ти, тѧ̀ пѣ́ти, тебѣ̀ кла́нѧтисѧ, тебѐ славосло́вити, тебѐ благодари́ти всѧ́кїѧ тва́ри ви́димыѧ и҆ неви́димыѧ содѣ́телѧ, сокро́вище вѣ́чныхъ бла́гъ, и҆сто́чника жи́зни и҆ безсме́ртїѧ, всѧ́ческихъ Бг҃а и҆ Влады́кꙋ, є҆го́же пою́тъ небеса̀ и҆ небеса̀ небе́съ, и҆ всѧ̑ си̑лы и҆́хъ, со́лнце же и҆ лꙋна̀, и҆ ве́сь ѕвѣ́здный ли́къ, землѧ̀, мо́ре, и҆ всѧ̑ ꙗ҆̀же въ ни́хъ, І҆ерꙋсали́мъ пренебе́сный, собо́ръ и҆збра́нныхъ, це́рковь перворожде́нныхъ, напи́санныхъ на небесѣ́хъ, дꙋ́си пра́ведныхъ и҆ прорѡ́къ, дꙋ́шы мꙋ́чєникъ и҆ а҆по́стѡлъ, а҆́гг҃ли, а҆рха́гг҃ли, престо́лы, гдⷭ҇ствїѧ, нача̑ла же и҆ вла̑сти, и҆ си̑лы стра̑шныѧ, херꙋві́ми многоѻчи́тїи, и҆ шестокрила́тїи серафі́ми, и҆́же двѣма̀ крило́ма покрыва́ютъ ли́ца своѧ̑, двѣма́ же но́ги, и҆ двѣма̀ лета́юще взыва́ютъ дрꙋ́гъ ко дрꙋ́гꙋ неꙋсы́пными ᲂу҆сты̀, немо́лчными славослове́ньми:
Возгла́снѡ: Побѣ́днꙋю пѣ́снь великолѣ́пныѧ твоеѧ̀ сла́вы, свѣ́тлымъ гла́сомъ пою́ще, вопїю́ще, славосло́вѧще, взыва́юще и҆ глаго́люще.
Лю́дїе: Ст҃ъ, свѧ́тъ, свѧ́тъ Гдⷭ҇ь саваѡ́ѳъ. И҆спо́лнь не́бо и҆ землѧ̀ сла́вы твоеѧ̀. Ѡ҆са́нна въ вы́шнихъ. Благослове́нъ грѧды́й во и҆́мѧ Госпо́дне. Ѡ҆са́нна въ вы́шнихъ.
Пѣва́емѣй се́й пѣ́сни, мо́литсѧ а҆рхїере́й и҆лѝ і҆ере́й та́йнѡ си́це:
Ст҃ъ є҆сѝ (зна́менꙋетъ ді́скосъ) царю̀ вѣкѡ́въ и҆ всѧ́кїѧ свѧты́ни Гдⷭ҇и и҆ пода́телю (зна́менꙋетъ ча́шꙋ). Ст҃ъ и҆ є҆диноро́дный тво́й Сн҃ъ, Гдⷭ҇ь на́шъ І҆и҃съ Хрⷭ҇то́съ, и҆́мже всѧ̑ сотвори́лъ є҆сѝ (зна́менꙋетъ ѻ҆боѧ̑). Ст҃ъ же и҆ Дх҃ъ тво́й всесвѧты́й, проница́ѧй всѧ́чєскаѧ и҆ глꙋбины̀ твоѧ̀, Бг҃а и҆ Ѻ҆ц҃а̀. Ст҃ъ є҆сѝ всеси́льне, стра́шне, бла́же, благоꙋтро́бне, наипа́че состра́ждаѧй созда́нїю твоемꙋ̀. Сотвори́вый ѿ землѝ человѣ́ка по ѻ҆́бразꙋ твоемꙋ̀ и҆ подо́бїю, и҆ дарова́вый є҆мꙋ̀ наслажде́нїе ра́йское, престꙋпи́вша же за́повѣдь твою̀ и҆ ѿпа́дша, сегѡ̀ не презрѣ́лъ є҆сѝ, нижѐ ѡ҆ста́вилъ є҆сѝ, бла́же, но наказа́лъ є҆сѝ сего̀ ꙗ҆́кѡ благоꙋтро́бный Ѻ҆ц҃ъ, призва́лъ є҆сѝ є҆го̀ чре́зъ зако́нъ, назда́лъ є҆сѝ є҆го̀ чре́зъ прорѡ́ки, послѣди́ же самаго̀ є҆диноро́днаго твоего̀ Сн҃а, Гдⷭ҇а на́шего І҆и҃са Хрⷭ҇та̀ низпосла́лъ є҆сѝ въ мі́ръ, да са́мъ прише́дъ тво́й ѡ҆бнови́тъ и҆ возста́витъ ѻ҆́бразъ. И҆́же снизше́дъ съ небесѐ и҆ вопло́щьсѧ ѿ Дх҃а свѧ́та и҆ Мр҃і́и свѧты́ѧ приснодѣ́вы и҆ Бцⷣы, споживе́ же человѣ́кѡмъ, всѧ̑ ᲂу҆стро́и ко спасе́нїю ро́да на́шегѡ. Хотѧ́ще же во́льнꙋю и҆ животворѧ́щꙋю кресто́мъ сме́рть безгрѣ́шенъ за ны̀ грѣ̑шныѧ прїѧ́ти, въ но́щь, въ ню́же предаѧ́шесѧ, па́че же са́мъ себѐ предаѧ́ше за мі́ра живо́тъ и҆ спасе́нїе (здѣ̀ взе́млетъ шꙋ́йцею съ ді́скоса свѧты́й хлѣ́бъ, и҆ де́ржитъ є҆го̀ ма́лѡ под̾е́мь, и҆ глаго́летъ та́йнѡ (въ закѷнѳѣ же возгла́снѡ сїѐ глаго́летсѧ)): прїе́мъ хлѣ́бъ во свѧты̑ѧ и҆ пречи̑стыѧ и҆ безсмє́ртныѧ своѧ̑ рꙋ́ки, воззрѣ́въ на небеса̀, и҆ показа́въ тебѣ̀ Бг҃ꙋ и҆ Ѻ҆ц҃ꙋ̀, благодари́въ, благослови́въ, ѡ҆свѧти́въ, (зна́менꙋетъ свѧты́й хлѣ́бъ, прелага́етъ є҆го̀ въ деснꙋ́ю рꙋ́кꙋ, и҆ де́ржитъ кра́йними пе́рсты десны́ѧ рꙋкѝ, ма́лѡ возвы́шь) преломи́въ, подадѐ свѧты̑мъ и҆ блажє́ннымъ свои̑мъ ᲂу҆ченикѡ́мъ и҆ а҆по́столѡмъ ре́къ:
Возгла́снѡ: Прїими́те, ꙗ҆ди́те, сїѐ є҆́сть тѣ́ло моѐ є҆́же за вы̀ ломи́мое и҆ предае́мое во ѡ҆ставле́нїе грѣхѡ́въ.
И҆ полага́етъ свѧты́й хлѣ́бъ на ді́скосъ.
Лю́дїе: А҆ми́нь.
А҆рхїере́й же (и҆лѝ і҆ере́й) взе́млетъ свѧтꙋ́ю ча́шꙋ и҆ де́ржитъ ю҆̀ ма́лѡ под̾е́мь, глаго́лѧ та́йнѡ (въ закѷнѳѣ сїѧ̀ возгла́снѡ глаго́лютсѧ):
Та́кожде по є҆́же вечерѧ́ти, прїе́мъ ча́шꙋ и҆ раствори́въ ѿ вїна̀ и҆ воды̀, зрѧ́ще на небеса̀ и҆ показа́въ тебѣ̀ Бг҃ꙋ и҆ Ѻ҆ц҃ꙋ̀, и҆ благодари́въ, ѡ҆свѧти́въ (зна́менꙋетъ ча́шꙋ) и҆спо́лнивъ Дх҃а свѧ́та, подадѐ свѧты̑мъ и҆ блажє́ннымъ свои̑мъ ᲂу҆ченикѡ́мъ и҆ а҆по́столѡмъ, ре́къ:
Возгла́снѡ: Пі́йте ѿ неѧ̀ всѝ: сїѧ̀ є҆́сть кро́вь моѧ̀ но́вагѡ завѣ́та, ꙗ҆́же за вы̀ и҆ за мнѡ́ги и҆злива́емаѧ и҆ предае́маѧ во ѡ҆ставле́нїе грѣхѡ́въ. (Здѣ̀ поставлѧ́етъ ча́шꙋ на свѧтꙋ́ю трапе́зꙋ).
Лю́дїе: А҆ми́нь.
А҆рхїере́й же та́йнѡ:
Сѐ твори́те въ моѐ воспомина́нїе: є҆ли́жды бо а҆́ще ꙗ҆́сте хлѣ́бъ се́й и҆ ча́шꙋ сїю̀ пїе́те, сме́рть сы́на человѣ́ческагѡ возвѣща́ете и҆ воскресе́нїе є҆гѡ̀ и҆сповѣ́дꙋете, до́ндеже не прїи́детъ.
Дїа́конъ, зрѧ̀ ко свѧтѣ́й трапе́зѣ, возглаша́етъ свѣтлѣ́йшымъ гла́сомъ:
Вѣ́рꙋемъ и҆ и҆сповѣ́дꙋемъ.
Лю́дїе же пою́тъ во гла́съ и҆ со сладкопѣ́нїемъ и҆ ко́снѡ:
Сме́рть твою̀, Гдⷭ҇и, возвѣща́емъ, и҆ воскресе́нїе твоѐ и҆сповѣ́дꙋемъ.
А҆рхїере́й же зна́менꙋетъ свѧты́й ді́скосъ, та́же свѧтꙋ́ю ча́шꙋ и҆ мо́литсѧ та́йнѡ преклони́въ главꙋ̀:
Помина́юще ᲂу҆́бѡ и҆ мы̀ грѣ́шнїи животворѧ́щыѧ є҆гѡ̀ страда̑нїѧ, спаси́тельный кре́стъ, и҆ сме́рть, и҆ погребе́нїе, и҆ тридне́вное и҆зъ ме́ртвыхъ воскресе́нїе, и҆ є҆́же на небеса̀ восхожде́нїѧ и҆ ѡ҆деснꙋ́ю тебє̀ Бг҃а и҆ Ѻ҆ц҃а̀ сѣдѣ́нїе, и҆ є҆́же второ́е сла́вное, стра́шное є҆гѡ̀ прише́ствїе, є҆гда̀ прїи́детъ со сла́вою сꙋди́ти живы̑ѧ и҆ мє́ртвыѧ, є҆гда̀ хо́щетъ коемꙋ́ждо возда́ти по дѣлѡ́мъ є҆гѡ̀: Пощади́ ны, Гдⷭ҇и Бж҃е: (три́жды), наипа́че же по благоꙋтро́бїю своемꙋ̀, прино́симъ тѝ, Влады́ко, стра́шнꙋю сїю̀ и҆ безкро́внꙋю же́ртвꙋ, молѧ́ще да не по грѣхѡ́мъ на́шымъ, нижѐ по беззако́нїємъ на́шымъ возда́си на́мъ, но по твоемꙋ̀ снисхожде́нїю и҆ неизрече́нномꙋ твоемꙋ̀ человѣколю́бїю презрѣ́въ и҆ и҆згла́дивъ є҆́же ѡ҆ на́съ рꙋкописа́нїе тебѣ̀ молѧ́щихсѧ, пода́си на́мъ небє́снаѧ и҆ вѣ̑чнаѧ твоѧ̑ дарова̑нїѧ, и҆̀хже ѻ҆́ко не ви́дѣ, и҆ ᲂу҆́хо не слы́ша и҆ на се́рдце человѣ́ческое не взы́де, ꙗ҆̀же ᲂу҆гото́ва Бг҃ъ лю́бѧщымъ тѧ̀, и҆ не ра́ди мои́хъ грѣхѡ́въ ѿри́неши лю́ди твоѧ̑, человѣколю́бче Гдⷭ҇и.
Та́же пое́тъ со пресвѵ́теры со сладкопѣнїе́мъ во гла́съ є҃, ма́лѡ воздѣ́въ рꙋ́цѣ:
Лю́дїе бо твоѝ и҆ це́рковь твоѧ̀ мо́лѧтъ тѧ̀.
Лю́дїе же ѿвѣща́ютъ та́кожде, со сладкопѣ́нїемъ, гла́съ то́йже:
Поми́лꙋй на́съ, Гдⷭ҇и Бж҃е, Ѻ҆́ч҃е вседержи́телю.
И҆ па́ки пое́тъ а҆рхїере́й и҆лѝ і҆ере́й съ сослꙋжа́щими то́жде: Лю́дїе твоѝ: и҆ прѡ́чаѧ, и҆ па́ки ѿвѣща́ютъ лю́дїе: Поми́лꙋй на́съ: и҆ прѡ́чаѧ, та́кѡ да три́щи пое́тъ а҆рхїере́й со пресвѵ́теры и҆ три́щи ѿвѣща́ютъ є҆мꙋ̀ лю́дїе. Тре́тїе же лю́дїе пою́тъ вельмѝ ко́снѡ, є҆́же и҆́мати вре́мѧ а҆рхїере́ови и҆лѝ і҆ере́еви глаго́лати моли́твꙋ.
А҆рхїере́й же, и҆лѝ і҆ере́й прекло́нь главꙋ̀, мо́литсѧ си́це (нѣ́цыи глаго́лютъ словеса̀ сїѧ̑ возгла́снѡ, во І҆ерꙋсали́мѣ же глаго́лютъ та́йнѡ):
Поми́лꙋй на́съ, Бж҃е вседержи́телю, поми́лꙋй на́съ Бж҃е, спаси́телю на́шъ, поми́лꙋй на́съ Бж҃е по вели́цѣй ми́лости твое́й и҆ низпослѝ на ны̀ и҆ на предлежа́щыѧ свѧты̑ѧ да́ры сїѧ̑ Дх҃а твоего̀ всесвѧта́го (ѿ здѣ̀ всѧ́кѡ глаго́летъ та́йнѡ) Гдⷭ҇а животворѧ́щаго, сопресто́льнаго тебѣ̀, Бг҃ꙋ и҆ Ѻ҆ц҃ꙋ̀ и҆ є҆диноро́дномꙋ твоемꙋ̀ Сн҃ꙋ, соца́рственнаго, є҆диносꙋ́щнаго же и҆ совѣ́чнаго, глаго́лавшаго зако́номъ и҆ прорѡ́ки и҆ но́вымъ твои́мъ завѣ́томъ, соше́дшаго въ ви́дѣ голꙋби́нѣ на Гдⷭ҇а на́шего І҆и҃са Хрⷭ҇та̀ во І҆орда́нѣ рѣцѣ̀ и҆ пребыва́ющаго на не́мъ, соше́дшаго на свѧты̑ѧ твоѧ̑ а҆по́столы въ ви́дѣ ѻ҆́гненныхъ ѧ҆зы̑къ въ го́рницѣ свѧта́гѡ и҆ сла́внагѡ Сїѡ́на въ де́нь свѧты́ѧ пѧтидесѧ́тницы, сего̀ Дх҃а твоего̀ всесвѧта́го низпослѝ, Влады́ко, на ны̀ и҆ на предлежа́щыѧ свѧты̑ѧ да́ры сїѧ̑ (та́же воздѣ́въ рꙋ́цѣ глаго́летъ та́йнѡ, въ закѷнѳѣ же, согла́снѡ дрє́внимъ харті́амъ возгла́снѡ): да посѣти́въ ст҃ы́мъ и҆ благи́мъ и҆ сла́внымъ свои́мъ наи́тїемъ, ѡ҆свѧти́тъ и҆ сотвори́тъ хлѣ́бъ ᲂу҆́бѡ се́й тѣ́ло свѧто́е хрїсто́во. (И҆ зна́менꙋетъ свѧты́й хлѣ́бъ).
Дїа́конъ же, зрѧ̀ сїѧ̑ глаго́летъ: А҆ми́нь.
А҆рхїере́й же (и҆лѝ і҆ере́й) глаго́летъ (въ закѷнѳѣ возгла́снѡ, во І҆ерꙋсали́мѣ же та́йнѡ):
И҆ ча́шꙋ сїю̀ кро́вь честнꙋ́ю Хрїсто́вꙋ. (И҆ зна́менꙋетъ ча́шꙋ).
Дїа́конъ та́кожде: А҆ми́нь.
А҆рхїере́й же и҆лѝ і҆ере́й ѻ҆боѧ̑ не зна́менꙋетъ, но а҆́бїе глаго́летъ та́йнѡ:
Да бꙋ́дꙋтъ всѣ̑мъ и҆́же ѿ ни́хъ причаща́ющымсѧ во ѡ҆ставле́нїе грѣхѡ́въ и҆ въ жи́знь вѣ́чнꙋю.
Дїа́конъ та́кожде: А҆ми́нь.
А҆рхїере́й (и҆лѝ і҆ере́й) та́йнѡ:
Во ѡ҆свѧще́нїе дꙋ́шъ и҆ тѣле́съ, а҆ми́нь.
Во плодоноше́нїе дѣ́лъ благи́хъ, а҆ми́нь.
Во ᲂу҆твержде́нїе свѧты́ѧ твоеѧ̀ собо́рныѧ и҆ а҆пⷭ҇льскїѧ це́ркве, ю҆́же ѡ҆снова́лъ є҆сѝ на ка́мени вѣ́ры, да врата̀ а҆́дѡва не ѡ҆долѣ́ютъ є҆́й, и҆збавлѧ́ѧ ю҆̀ ѿ всѧ́кїѧ є҆́реси и҆ ѿ собла́зна дѣ́лающихъ беззако́нїе, сохранѧ́ѧ ю҆̀ да́же до сконча́нїѧ вѣкѡ́въ. (И҆ зна́менꙋетъ ді́скосъ и҆ ча́шꙋ раздѣ́льнѣ).
Дїа́конъ: А҆ми́нь.
Та́же мо́литсѧ а҆рхїере́й (и҆лѝ і҆ере́й) ма́лѡ воздѣ́въ рꙋ́цѣ прекло́нь главꙋ̀, мѣ́рнымъ гла́сомъ, во є҆́же слы́шанꙋ бы́ти стоѧ́щымъ внѣ̀ свѧта́гѡ ѻ҆лтарѧ̀, лю́дїе же припѣва́ютъ многа́жды во гла́съ ѕ҃:
Помѧнѝ, Гдⷭ҇и Бж҃е на́шъ:
Моли́тва:
Прино́симъ тѝ, Влады́ко, и҆ ѡ҆ свѧты́хъ твои́хъ мѣстѣ́хъ, и҆́хже просла́вилъ є҆сѝ богоѧвле́нїемъ Хрⷭ҇та̀ твоегѡ̀ и҆ наи́тїемъ всесвѧта́гѡ твоегѡ̀ Дх҃а, наипа́че же ѡ҆ свѧтѣ́мъ и҆ сла́внѣмъ Сїѡ́нѣ, ма́тери всѣ́хъ церкве́й, и҆ ѡ҆ є҆́же по все́й вселе́ннѣй свѧтѣ́й твое́й собо́рнѣй и҆ а҆по́стольстѣй це́ркви, бога̑тыѧ да́ры всесвѧта́гѡ твоегѡ̀ Дх҃а и҆ ны́нѣ пода́ждь є҆́й, Влады́ко.
Помѧнѝ, Гдⷭ҇и, и҆ и҆́же въ не́й свѧты̑ѧ ѻ҆тцы̀ на́ши и҆ є҆пі́скопы, и҆́же во все́й вселе́ннѣй правосла́внѡ пра́вѧщыѧ сло́во твоеѧ̀ и҆́стины.
Въ пе́рвыхъ помѧнѝ, Гдⷭ҇и Бж҃е на́шъ, преподо́бнаго ѻ҆тца̀ на́шего, свѧтѣ́йшаго на́шего а҆рхїепі́скопа (и҆́мѧ ре́къ), ста́рость є҆мꙋ̀ честнꙋ́ю пода́ждь, многолѣ́тна є҆го̀ сохранѝ, пасꙋ́ща лю́ди твоѧ̑ во всѧ́комъ благоче́стїи и҆ досточе́стїи.
Помѧнѝ, Гдⷭ҇и, є҆́же здѣ̀ честно́е пресвѵ́терство и҆ повсю́дꙋ, є҆́же во Хрⷭ҇тѣ̀ дїа́конство, про́чее всѧ́кое слꙋже́нїе, ве́сь церко́вный чи́нъ и҆ є҆́же во Хрⷭ҇тѣ̀ бра́тство на́ше и҆ всѧ̑ хрⷭ҇толюби̑выѧ лю́ди.
Помѧнѝ, Гдⷭ҇и, сопредстоѧ́щыѧ на́мъ і҆ере́и, слꙋжа́щыѧ во свѧты́й ча́съ се́й пред̾ свѧты́мъ твои́мъ же́ртвенникомъ во є҆́же приноси́ти свѧтꙋ́ю и҆ безкро́внꙋю твою̀ же́ртвꙋ и҆ да́ждь и҆̀мъ и҆ на́мъ сло́во во ѿверзе́нїе ᲂу҆́стъ на́шихъ, во сла́вꙋ и҆ по хвале́нїе всесвѧта́гѡ и҆́мене твоегѡ̀.
Помѧнѝ, Гдⷭ҇и, по мно́жествꙋ ми́лости твоеѧ̀, и҆ менѐ смире́ннаго, и҆ грѣ́шнаго, и҆ недосто́йнаго раба̀ твоего̀, и҆ при́зри на мѧ̀ ми́лостїю и҆ щедро́тами, и҆ и҆зба́ви и҆ свободѝ ѿ гонѧ́щихъ мѧ̀, Гдⷭ҇и, Гдⷭ҇и си́лъ, и҆ не вни́ди въ сꙋ́дъ съ рабо́мъ твои́мъ, и҆ поне́же ᲂу҆мно́жисѧ во мнѣ̀ грѣ́хъ, да преизбы́точествꙋетъ твоѧ̀ благода́ть.
Помѧнѝ, Гдⷭ҇и, и҆ свѧты́й тво́й же́ртвенникъ ѡ҆крꙋжа́ющыѧ дїа́коны, пода́ждь и҆̀мъ жи́тельство непоро́чно, чи́сто слꙋже́нїе и҆́хъ сохранѝ, и҆ на степє́ни лꙋ́чшыѧ возведѝ.
Помѧнѝ, Гдⷭ҇и, свѧты́й Бг҃а на́шегѡ гра́дъ и҆ ца́рствꙋющїй гра́дъ, и҆ всѧ́кїй гра́дъ и҆ странꙋ̀, и҆ въ правосла́внѣй вѣ́рѣ и҆ благоче́стїи живꙋ́щыѧ въ ни́хъ, ми́ръ и҆ безмѧте́жїе и҆́хъ.
Помѧнѝ, Гдⷭ҇и, благочести́вѣйшыѧ и҆ хрⷭ҇толюби̑выѧ царѝ, всю̀ пала́тꙋ и҆ во́инство и҆́хъ, и҆ є҆́же съ небесѐ по́мощь и҆ побѣ́дꙋ и҆́хъ. Косни́сѧ ѻ҆рꙋ́жїѧ, и҆ защитѝ, и҆ воста́ни въ по́мощь и҆́хъ, покорѝ и҆̀мъ всѧ̑ враждє́бныѧ и҆ ва̑рварскїѧ ꙗ҆зы́ки. Оу҆стро́й и҆́хъ совѣ̑ты, ꙗ҆́кѡ да ми́рное и҆ ти́хое житїѐ поживе́мъ во всѧ́комъ благоче́стїи и҆ досточе́стїи.
Помѧнѝ, Гдⷭ҇и, пла́вающыѧ, пꙋтеше́ствꙋющыѧ, стра̑нныѧ хрⷭ҇тїа́ны, во ᲂу҆́захъ и҆ темни́цахъ, въ плѣне́нїи и҆ и҆згна́нїи, въ рꙋ́дахъ и҆ мꙋче́нїихъ, и҆ въ го́рькихъ рабо́тахъ сꙋ́щыѧ ѻ҆тцы̀ и҆ бра́тїю на́шꙋ, ми́рное возвраще́нїе коегѡ́ждо въ до́мъ.
Помѧнѝ, Гдⷭ҇и, въ ста́рости и҆ не́мощи сꙋ́щыѧ, болѧ́щыѧ, дрѧ̑хлыѧ и҆ ѿ дх҃ѡ́въ нечи́стыхъ стꙋжа́ємыѧ, ѿ тебє̀, Бг҃а ско́рое и҆сцѣле́нїе и҆ спасе́нїе и҆́хъ.
Помѧнѝ, Гдⷭ҇и, всѧ́кꙋю дꙋ́шꙋ хрⷭ҇тїа́нскꙋю, скорбѧ́щꙋю и҆ ᲂу҆мꙋ́ченнꙋю, ми́лости и҆ по́мощи ѿ тебє̀, Бг҃а тре́бꙋющꙋю, и҆ ѡ҆браще́нїе заблꙋ́ждшихъ.
Помѧнѝ, Гдⷭ҇и, и҆̀же въ дѣ́вствѣ и҆ соблюде́нїи и҆ по́двизѣ пребыва́ющыѧ, и҆ и҆̀же въ гора́хъ и҆ верте́пѣхъ и҆ про́пастехъ земны́хъ подвиза́ющыѧсѧ ѻ҆тцы̀ и҆ бра́тїю на́шѧ, и҆ и҆̀же по мѣстѡ́мъ правосла́вныхъ собо́ры, и҆ и҆́же здѣ̀ во Хрⷭ҇тѣ̀ собо́ръ на́шъ.
Помѧнѝ, Гдⷭ҇и, трꙋжда́ющыѧсѧ и҆ слꙋжа́щыѧ на́мъ ѻ҆тцы́ же и҆ бра́тїѧ на́шѧ, ра́ди и҆́мене твоегѡ̀ свѧта́гѡ.
Помѧнѝ, Гдⷭ҇и, всѣ́хъ во благо́е, всѣ́хъ поми́лꙋй, Влады́ко, всѣ́хъ на́съ примирѝ, ᲂу҆мирѝ мно́жество люде́й твои́хъ, и҆стребѝ собла́зны, ᲂу҆празднѝ бра̑ни, ᲂу҆мирѝ раздѣлє́нїѧ церкве́й, є҆ресе́й воста̑нїѧ ско́рѡ ᲂу҆толѝ, ниспрове́ржи горды́ню ꙗ҆зы̑къ, вознесѝ ро́гъ хрⷭ҇тїа́нъ правосла́вныхъ, тво́й ми́ръ и҆ твою̀ любо́вь пода́ждь на́мъ, Бж҃е, Спаси́телю на́шъ, ᲂу҆пова́нїе всѣ́хъ конце́въ землѝ.
Помѧнѝ, Гдⷭ҇и, благорастворе́нїе воздꙋ́хѡвъ, дожди̑ ми̑рныѧ, рѡ́сы благі̑ѧ, плодѡ́въ и҆з̾ѻби́лїе, соверше́нное плодоро́дїе, и҆ вѣне́цъ лѣ́та бла́гости твоеѧ̀, ѻ҆́чи бо всѣ́хъ на тѧ̀ ᲂу҆пова́ютъ и҆ ты̀ дае́ши пи́щꙋ и҆́хъ во благовре́менїи, ѿверза́еши ты̀ рꙋ́кꙋ твою̀, и҆ и҆сполнѧ́еши всѧ́ко живо́тно благоволе́нїѧ.
Помѧнѝ, Гдⷭ҇и, плодоноси́вшыѧ и҆ плодоносѧ́щыѧ во свѧты́хъ бо́жїихъ церква́хъ и҆ помина́ющыѧ ᲂу҆бѡ́гїѧ, и҆ заповѣ́давшыѧ на́мъ є҆́же помина́ти и҆́хъ въ моли́твахъ.
Є҆щѐ сподо́би помѧнꙋ́ти, Гдⷭ҇и, и҆ приношє́нїѧ сїѧ̑ прине́сшыѧ въ дне́шнїй де́нь на свѧты́й тво́й же́ртвенникъ, и҆ ѡ҆ ни́хже кі́йждо принесѐ, и҆лѝ въ помышле́нїи и҆́мать, и҆ вма́лѣ тебѣ̀ прочтє́нныѧ.
Помѧнѝ, Гдⷭ҇и, и҆ роди́тели на́шѧ, сро́дники и҆ дрꙋ́ги (и҆́мѧ ре́къ, здѣ̀ помина́ютъ кі́йждо ѿ предстоѧ́щихъ и҆́хже хо́щетъ помѧнꙋ́ти). Си́хъ всѣ́хъ помѧнѝ, Гдⷭ҇и, и҆̀хже помѧнꙋ́хомъ, и҆ и҆̀хже не помѧнꙋ́хомъ, правосла̑вныѧ. Возда́ждь и҆̀мъ вмѣ́стѡ земны́хъ небє́снаѧ, вмѣ́стѡ тлѣ́нныхъ нетлѣ̑ннаѧ, вмѣ́стѡ вре́менныхъ вѣ̑чнаѧ, по ѡ҆бѣтова́нїю Хрⷭ҇та̀ твоегѡ̀, поне́же живота̀ и҆ сме́рти ѻ҆́бласть и҆́маши.
Є҆щѐ помѧнꙋ́ти сподо́би, Влады́ко, и҆ и҆̀же ѿ вѣ́ка тебѣ̀ благоꙋгоди́вшыѧ по родѡ́мъ, ст҃ы̑ѧ ѻ҆тцы̀, патрїа́рхи, проро́ки, а҆пⷭ҇лы, мꙋ́ченики, и҆сповѣ́дники, ᲂу҆чи́тели, преподѡ́бныѧ, и҆ всѧ́кїй дх҃ъ пра́ведный въ вѣ́рѣ сконча́вшїйсѧ.
Помѧнѝ, Гдⷭ҇и, а҆рха́гг҃льскїй гла́съ глаго́лющъ: ра́дꙋйсѧ, благода́тнаѧ, Гдⷭ҇ь съ тобо́ю, благослове́нна ты̀ въ жена́хъ, и҆ благослове́нъ пло́дъ чре́ва твоегѡ̀, ꙗ҆́кѡ Сп҃са родила̀ є҆сѝ дꙋ́шъ на́шихъ.
Возгла́снѡ: И҆зрѧ́днѡ ѡ҆ пресвѧтѣ́й и҆ преблагослове́ннѣй, пречи́стѣй Влады́чицѣ на́шей Бцⷣѣ и҆ приснодѣ́вѣ Мр҃і́и.
И҆ па́ки глаго́лютъ лю́дїе, ꙗ҆́коже пе́рвѣе:
Помѧнѝ, Гдⷭ҇и Бж҃е на́шъ.
А҆рхїере́й же (и҆лѝ і҆ере́й) моли́твꙋ та́йнѡ:
Свѧта́го І҆ѡа́нна сла́внаго проро́ка, предте́чꙋ и҆ крести́телѧ, свѧты̑ѧ а҆по́столы, свѧты̑ѧ проро́ки и҆ патрїа́рхи и҆ пра́вєдныѧ, свѧты̑ѧ мꙋ́ченики и҆ и҆сповѣ́дники.
Помѧнѝ, Гдⷭ҇и Бж҃е, свѧты̑ѧ ѻ҆тцы̀ на́шѧ и҆ а҆рхїепі́скопы и҆ всѧ́кꙋю пло́ть, ю҆́же помѧнꙋ́хомъ и҆ ю҆́же не помѧнꙋ́хомъ. Та́мѡ и҆̀хъ ᲂу҆поко́й, во странѣ̀ живы́хъ, во ца́рствїи твое́мъ, въ наслажде́нїи раѧ̀, въ нѣ́дрѣхъ А҆враа́ма, и҆ І҆саа́ка, и҆ І҆а́кѡва свѧты́хъ ѻ҆тє́цъ на́шихъ, ѿню́дꙋже ѿбѣжи́тъ болѣ́знь, печа́ль и҆ воздыха́нїе, и҆дѣ́же присѣща́етъ свѣ́тъ лица̀ твоегѡ̀ и҆ просвѣща́етъ вы́нꙋ.
Сконча́нїе же живота̀ на́шегѡ хрїстїа́нское и҆ благоꙋго́дное, и҆ безгрѣ́шное въ ми́рѣ ᲂу҆стро́й, Гдⷭ҇и, собира́ѧ ны̀ под̾ но́ги и҆збра́нныхъ твои́хъ, є҆гда̀ хо́щеши и҆ ка́кѡ хо́щеши, є҆ди́нѣ то́кмѡ без̾ стыда̀ и҆ прегрѣше́нїй, ра́ди є҆диноро́днагѡ твоегѡ̀ Сн҃а, Гдⷭ҇а же и҆ Бг҃а и҆ Сп҃са на́шегѡ І҆и҃са Хрⷭ҇та̀, то́й бо є҆ди́нъ є҆́сть безгрѣ́шенъ ꙗ҆ви́выйсѧ на землѝ.
А҆́ще а҆рхїере́й лїтꙋргїса́етъ, глаго́лютъ со слꙋжа́щїи всѝ вкꙋ́пѣ, а҆́ще же нѣ́сть а҆рхїере́а, глаго́летъ сїѧ̑ слꙋжа́й і҆ере́й:
Въ пе́рвыхъ помѧнѝ, Гдⷭ҇и, ѻ҆тца̀ и҆ патрїа́рха на́шего (и҆лѝ є҆пі́скопа, и҆́мѧ ре́къ), є҆го́же да́рꙋй свѧтѣ́й твое́й це́ркви въ ми́рѣ цѣ́ла, че́стна, здра́ва и҆ долгоде́нствꙋюща, пра́вѡ пра́вѧща сло́во твоеѧ̀ и҆́стины.
Дїа́конъ глаго́летъ зрѧ̀ къ лю́демъ, а҆́ще и҆ є҆ди́нъ і҆ере́й слꙋ́житъ:
И҆ ѡ҆ ми́рѣ и҆ благостоѧ́нїи всегѡ̀ мі́ра и҆ свѧты́хъ бо́жїихъ церкве́й, и҆ ѡ҆ ни́хъ за ни́хже кі́йждо принесѐ, и҆лѝ въ помышле́нїи и҆́мать, и҆ ѡ҆ предстоѧ́щихъ лю́дехъ, и҆ ѡ҆ всѣ́хъ и҆ за всѧ̑.
А҆́бїе а҆рхїере́й, и҆лѝ і҆ере́й возгла́съ:
Да́ждь и҆ на́мъ, и҆ и҆̀мъ, ꙗ҆́кѡ благі́й и҆ человѣколю́бецъ, Влады́ко.
Лю́дїе же всѝ вкꙋ́пѣ глаго́лютъ во гла́съ ѕ҃:
Ѡ҆сла́би, ѡ҆ста́ви, простѝ, Бж҃е, прегрѣшє́нїѧ на́шѧ, вѡ́льнаѧ же и҆ невѡ́льнаѧ, ꙗ҆̀же въ вѣ́дѣнїи и҆ невѣ́дѣнїи.
А҆рхїере́й возгла́съ:
Благода́тїю и҆ щедро́тами и҆ человѣколю́бїемъ Хрⷭ҇та̀ твоегѡ̀, съ ни́мже благослове́нъ є҆сѝ и҆ препросла́вленъ со всесвѧты́мъ и҆ благи́мъ и҆ животворѧ́щимъ твои́мъ Дх҃омъ, ны́нѣ и҆ при́снѡ, и҆ во вѣ́ки вѣкѡ́въ.
Лю́дїе: А҆ми́нь.
А҆рхїере́й (и҆лѝ і҆ере́й) зна́менꙋетъ лю́ди, глаго́лѧ:
Ми́ръ всѣ̑мъ.
Лю́дїе: И҆ дꙋ́хови твоемꙋ̀.
А҆́бїе дїа́конъ, и҆зше́дъ сѣ́верными две́рьми и҆ ста́въ на ѡ҆бы́чнѣмъ мѣ́стѣ глаго́летъ дїа̑конства сїѧ̑ зрѧ̀ къ лю́демъ, ничто́же лю́демъ ѿвѣща́ющымъ:
Па́ки и҆ па́ки, и҆ непреста́ннѡ ми́ромъ Гдⷭ҇ꙋ помо́лимсѧ.
Ѡ҆ принесе́нныхъ и҆ ѡ҆свѧще́нныхъ честны́хъ пренебе́сныхъ, неизрече́нныхъ, пречи́стыхъ, сла́вныхъ, стра́шныхъ, ᲂу҆жа́сныхъ, боже́ственныхъ дарѣ́хъ, Гдⷭ҇ꙋ Бг҃ꙋ на́шемꙋ помо́лимсѧ.
Ꙗ҆́кѡ да Гдⷭ҇ь Бг҃ъ на́шъ, прїе́мь ѧ҆̀ во свѧты́й и҆ пренебе́сный, мы́сленный и҆ дꙋхо́вный сво́й же́ртвенникъ, въ воню̀ благоꙋха́нїѧ, возниспо́слетъ на́мъ боже́ственнꙋю благода́ть и҆ да́ръ всесвѧта́гѡ Дх҃а, помо́лимсѧ.
Соедине́нїе вѣ́ры и҆ прича́стїе всесвѧта́гѡ є҆гѡ̀ и҆ покланѧ́емагѡ Дх҃а и҆спроси́вше, са́ми себѐ, и҆ дрꙋ́гъ дрꙋ́га, и҆ ве́сь живо́тъ на́шъ Хрⷭ҇тꙋ̀ Бг҃ꙋ на́шемꙋ предади́мъ.
Здѣ̀ лю́дїе ѿвѣща́ютъ: Тебѣ̀ Гдⷭ҇и,
Глаго́лємымъ дїа́конствамъ си̑мъ, мо́литсѧ а҆рхїере́й (и҆лѝ і҆ере́й) та́йнѡ:
Бж҃е и҆ Ѻ҆́ч҃е Гдⷭ҇а и҆ Бг҃а и҆ Сп҃са на́шего І҆и҃са Хрⷭ҇та̀, великоимени́те Гдⷭ҇и, блаже́нное є҆стество̀, незави́стнаѧ благосты́не, всѧ́ческихъ Бж҃е и҆ влады́ко, сы́й благослове́нный во вѣ́ки вѣкѡ́въ, сѣдѧ́й на херꙋві́мѣхъ и҆ прославлѧ́емый ѿ серафі̑мъ, є҆мꙋ́же предстоѧ́тъ ты́сѧщы ты́сѧщъ и҆ тьмы̑ тє́мъ свѧты́хъ а҆́гг҃лъ и҆ а҆рха̑гг҃лъ вѡ́инства, принесє́ннаѧ ᲂу҆́бѡ тебѣ̀ да́ры, даѧ̑нїѧ, приношє́нїѧ, въ воню̀ благоꙋха́нїѧ прїимѝ, и҆̀хже ѡ҆свѧти́ти и҆ соверши́ти сподо́билъ є҆сѝ, бла́же, благода́тїю Хрⷭ҇та̀ твоегѡ̀ и҆ всесвѧта́гѡ твоегѡ̀ Дх҃а, ѡ҆свѧтѝ, Влады́ко, и҆ на́шѧ дꙋ́ши, и҆ тѣлеса̀, и҆ дх҃и, и҆ прикосни́сѧ помышле́нїй, и҆ и҆спыта́й сѡ́вѣсти, и҆ ѿве́ржи ѿ на́съ всѧ́кое помышле́нїе лꙋка́вое, всѧ́кїй по́мыслъ сра́мный, всѧ́кꙋю стра́сть и҆ по́хоть посты́днꙋю, всѧ́кое сло́во неподо́бное, всѧ́кꙋю за́висть, и҆ сꙋемꙋ́дрїе, и҆ лицемѣ́рїе, всѧ́кꙋ лжꙋ̀, всѧ́кое лꙋка́вство, всѧ́кое и҆скꙋше́нїе жите́йское, всѧ́кое любостѧжа́нїе, всѧ́кое тщесла́вїе, всѧ́ко ѕло̀, всѧ́кꙋ ꙗ҆́рость, всѧ́кїй гнѣ́въ, всѧ́кое ѕлопомнѣ́нїе, всѧ́кое ѡ҆клевета́нїе, всѧ́кое сребролю́бїе и҆ нерадѣ́нїе, всѧ́кое движе́нїе ѕло́е пло́ти же и҆ дх҃а, чꙋ́ждое во́ли свѧты́ни твоеѧ̀.
Возгла́съ: И҆ сподо́би на́съ, Влады́ко человѣколю́бче Гдⷭ҇и, со дерзнове́нїемъ неѡсꙋжде́ннѡ чи́стымъ се́рдцемъ, дꙋше́ю просвѣще́нною, непосты́днымъ лице́мъ, ѡ҆свѧще́нными ᲂу҆сты̀ смѣ́ти призыва́ти тебѐ, и҆́же на небесѣ́хъ свѧта́го Бг҃а Ѻ҆ц҃а̀, и҆ глаго́лати:
И҆ глаго́лютъ лю́дїе всѝ вкꙋ́пѣ:
Ѻ҆́ч҃е на́шъ, и҆́же є҆сѝ на небесѣ́хъ, да свѧти́тсѧ и҆́мѧ твоѐ: да прїи́детъ ца́рствїе твоѐ: да бꙋ́детъ во́лѧ твоѧ̀, ꙗ҆́кѡ на небесѝ, и҆ на землѝ. Хлѣ́бъ на́шъ насꙋ́щный да́ждь на́мъ дне́сь: и҆ ѡ҆ста́ви на́мъ до́лги на́шѧ, ꙗ҆́коже и҆ мы̀ ѡ҆ставлѧ́емъ должникѡ́мъ на́шымъ, и҆ не введѝ на́съ во и҆скꙋше́нїе, но и҆зба́ви на́съ ѿ лꙋка́вагѡ.
Глаго́лемꙋ семꙋ̀, мо́литсѧ а҆рхїере́й (и҆лѝ і҆ере́й) та́йнѡ:
И҆ не введѝ на́съ во и҆скꙋше́нїе, Гдⷭ҇и, Гдⷭ҇и си̑лъ, вѣ́дый не́мощь на́шꙋ, но и҆зба́ви на́съ ѿ лꙋка́вагѡ и҆ ѿ дѣ́лъ є҆гѡ̀ и҆ ѿ всѧ́кагѡ ѡ҆скорбле́нїѧ и҆ ко́зни тогѡ̀, ра́ди и҆́мене твоегѡ̀ свѧта́гѡ, нарече́ннагѡ на на́шемъ смире́нїи.
Возгла́съ: Ꙗ҆́кѡ твоѐ є҆́сть ца́рство, и҆ си́ла, и҆ сла́ва, Ѻ҆ц҃а̀ и҆ Сн҃а и҆ свѧта́гѡ Дх҃а, ны́нѣ и҆ при́снѡ и҆ во вѣ́ки вѣкѡ́въ.
Лю́дїе: А҆ми́нь.
А҆рхїере́й (и҆лѝ і҆ере́й) благословлѧ́етъ лю́ди, глаго́лѧ:
Ми́ръ всѣ̑мъ.
Лю́дїе: И҆ дꙋ́хови твоемꙋ̀.
Дїа́конъ: Главы̑ на́шѧ Гдⷭ҇еви прикло́нимъ.
Лю́дїе: Тебѣ̀, Гдⷭ҇и.
А҆рхїере́й и҆лѝ і҆ере́й та́йнѡ моли́твꙋ:
Тебѣ̀ приклони́хомъ, рабѝ твоѝ, Гдⷭ҇и, своѧ̑ вы̑и, пред̾ свѧты́мъ твои́мъ же́ртвенникомъ, ча́юще ѿ тебє̀ бога́тыѧ ми́лости, бога́тꙋю и҆ ны́нѣ благода́ть твою̀ и҆ благослове́нїе твоѐ низпослѝ на́мъ, Влады́ко, и҆ ѡ҆свѧтѝ на́шѧ дꙋ́ши и҆ тѣлеса̀ и҆ дꙋ́хи, ꙗ҆́кѡ да досто́йны бꙋ́демъ прича̑стницы и҆ ᲂу҆ча̑стницы бы́ти свѧты́хъ твои́хъ та̑инъ во ѡ҆ставле́нїе грѣхѡ́въ и҆ въ жи́знь вѣ́чнꙋю.
Возгла́съ: Ты́ бо є҆сѝ покланѧ́емый и҆ препросла́вленный Бг҃ъ на́шъ, и҆ є҆диноро́дный тво́й Сн҃ъ, и҆ Дх҃ъ тво́й всесвѧты́й, ны́нѣ, и҆ при́снѡ, и҆ во вѣ́ки вѣкѡ́въ.
И҆ зна́менꙋетъ а҆рхїере́й ді́скосъ и҆ ча́шꙋ.
Лю́дїе же ѿвѣща́ютъ: А҆ми́нь.
И҆ и҆зше́дъ а҆рхїере́й (и҆лѝ і҆ере́й) свѧты́ми две́рьми на сѡлею̀, глаго́летъ къ лю́демъ благослове́нїе сїѐ, воздви́гъ рꙋ́цѣ своѝ:
И҆ да бꙋ́детъ благода́ть и҆ ми́лость свѧты́ѧ и҆ є҆диносꙋ́щныѧ, несозда́нныѧ, и҆ нераздѣ́льныѧ, и҆ покланѧ́емыѧ Трⷪ҇цы со всѣ́ми ва́ми.
Лю́дїе: И҆ со дꙋ́хомъ твои́мъ.
И҆ зна́менꙋетъ десно́ю рꙋко́ю лю́ди, та́же возвраща́етсѧ ко свѧтѣ́й трапе́зѣ.
Дїа́конъ, зрѧ̀ къ лю́демъ и҆ воздви́гъ деснꙋ́ю рꙋ́кꙋ свою̀ глаго́летъ:
Со стра́хомъ бо́жїимъ во́нмемъ.
А҆рхїере́й же и҆лѝ і҆ере́й, возно́ситъ свѧты́й хлѣ́бъ кра́йними пє́рсты своє́ю рꙋкꙋ̑, де́ржитъ є҆го̀ ма́лѡ под̾е́мь и҆ глаго́летъ моли́твꙋ сїю̀ та́йнѡ, быва́етъ же до́ндеже мо́литсѧ а҆рхїере́й и҆лѝ і҆ере́й, молча́нїе ве́лїе во хра́мѣ, лю́демъ приклони́вшымъ главы̑ своѧ̑.
Ст҃е, во свѧты́хъ почива́ѧй, Гдⷭ҇и, ѡ҆свѧти́ ны сло́вомъ твоеѧ̀ благода́ти и҆ наи́тїемъ всесвѧта́гѡ твоегѡ̀ Дх҃а, ты́ бо є҆сѝ рекі́й, Влады́ко: свѧ́ти бꙋ́дите ꙗ҆́коже а҆́зъ свѧ́тъ є҆́смь. Гдⷭ҇и Бж҃е на́шъ, непостижи́ме Бж҃е, Сло́ве, Ѻ҆ц҃ꙋ̀ и҆ всесвѧто́мꙋ Дх҃ꙋ є҆диносꙋ́щне, совѣ́чне, нераздѣ́льне, прїимѝ чи́стꙋю пѣ́снь во свѧты́хъ же́ртвахъ твои́хъ безкро́вныхъ же́ртвахъ съ херꙋві́мы и҆ серафі́мы и҆ ѿ менє̀ грѣ́шнагѡ, вопїю́ща и҆ глаго́люща:
Возгла́снѡ: Свѧта̑ѧ свѧты̑мъ.
Лю́дїе: Є҆ди́нъ свѧ́тъ, є҆ди́нъ Гдⷭ҇ь І҆и҃съ Хрⷭ҇то́съ, во сла́вꙋ Бг҃а Ѻ҆ц҃а̀ со свѧты́мъ Дх҃омъ, є҆мꙋ́же сла́ва во вѣ́ки вѣкѡ́въ.
Дїа́конъ зрѧ̀ къ лю́демъ:
Ѡ҆ спасе́нїи и҆ застꙋпле́нїи свѧтѣ́йшагѡ ѻ҆тца̀ и҆ а҆рхїепі́скопа на́шегѡ (и҆́мѧ ре́къ) и҆ ѡ҆ всѧ́кой дꙋшѝ скорбѧ́щей и҆ ѡ҆ѕло́бленнѣй, ми́лости и҆ по́мощи бж҃їѧ тре́бꙋющей, и҆ ѡ҆ ѡ҆браще́нїи заблꙋ́ждшихъ, и҆сцѣле́нїи болѧ́щихъ, свобожде́нїи плѣне́нныхъ, ᲂу҆покое́нїи преждепочи́вшихъ ѻ҆тє́цъ же и҆ бра́тїй, всѝ ᲂу҆се́рднѡ рце́мъ: Гдⷭ҇и, поми́лꙋй.
Лю́дїе: Гдⷭ҇и, поми́лꙋй в҃і, во гла́съ ѕ҃.
Є҆гда́ же глаго́летъ дїа́конъ дїа̑конства сїѧ̑, а҆рхїере́й и҆лѝ і҆ере́й преломлѧ́етъ свѧты́й и҆ хлѣ́бъ, є҆го́же де́ржитъ ѻ҆бѣ́ма рꙋка́ма, на двѣ̀ ча̑сти пе́рвѣе зна́менавъ є҆го̀:
!image
Ча́сть, ю҆́же де́ржитъ въ шꙋ́йцѣ, полага́етъ па́ки на ді́скосъ. Ча́сть же, ю҆́же де́ржитъ въ деснѣ́й рꙋцѣ̀, па́ки преломлѧ́етъ на двѣ̀ ча́сти, ꙗ҆́коже здѣ̀ и҆з̾ѡбрази́хомъ, держѧ̀ ча́сть съ печа́тїю ХС въ деснѣ́й рꙋцѣ̀, ча́сть же съ печа́тїю КА въ шꙋ́ей, и҆ зна́менавъ па́ки десно́ю рꙋко́ю ча́сть ХС, є҆ѧ́же прелага́етъ въ шꙋ́йцꙋ, полага́етъ десни́цею во свѧты́й поти́ръ, глаго́лѧ та́йнѡ:
Соедине́нїе пресвѧта́гѡ тѣ́ла и҆ честны́ѧ кро́ве Гдⷭ҇а и҆ Бг҃а и҆ Сп҃са на́шегѡ І҆и҃са Хрⷭ҇та̀. Соедини́сѧ и҆ ѡ҆свѧти́сѧ и҆ соверши́сѧ во и҆́мѧ Ѻ҆ц҃а̀, и҆ Сн҃а, и҆ свѧта́гѡ Дх҃а.
Сїю̀ ча́сть во свѧты́й поти́ръ.
!image
Сїю̀ па́ки на ді́скосъ.
Ча́сть КА полага́етъ на ді́скосѣ. Та́же преломлѧ́етъ ча́сть, є҆́же бы́сть пе́рвѣе въ шꙋ́йцѣ, на не́йже печа́ти ІС и҆ НІ сꙋ́ть, глаго́лѧ:
Сѐ а҆́гнецъ бж҃їй, Сн҃ъ ѻ҆те́чь, взе́млѧй грѣ́хъ мі́ра, закла́нный за мі́ра живо́тъ и҆ спасе́нїе.
Та́же раздроблѧ́етъ рꙋко́ю ча́сти ІС, НІ и҆ КА за є҆́же дово́льно бы́ти всѣ̑мъ хотѧ́щымъ причасти́тисѧ, глаго́лѧ:
Ча́стъ свѧта́ѧ Хрⷭ҇то́ва, и҆спо́лнена благода́ти и҆ и҆́стины, Ѻ҆ц҃а̀ и҆ Ст҃а́гѡ Дх҃а, є҆мꙋ́же сла́ва и҆ держа́ва во вѣ́ки вѣкѡ́въ.
Є҆гда́ же сконча́ютъ лю́дїе Гдⷭ҇и поми́лꙋй, глаго́летъ дїа́конъ зрѧ̀ въ восто́кꙋ:
Гдⷭ҇и, благословѝ.
А҆рхїере́й (и҆лѝ і҆ере́й) воздѣ́въ рꙋ́цѣ возглаша́етъ:
Гдⷭ҇ь благослови́тъ ны̀ и҆ неѡсꙋждє́нны соблюде́тъ ны̀ въ причаще́нїи пречи́стыхъ є҆гѡ̀ дарѡ́въ, ны́нѣ и҆ при́снѡ, и҆ во вѣ́ки вѣкѡ́въ.
Лю́дїе: А҆ми́нь:
Дїа́конъ, та́кожде: Гдⷭ҇и, Благословѝ.
А҆рхїере́й (и҆лѝ і҆ере́й) ѻ҆бы́чнѡ:
Гдⷭ҇ь благослови́тъ и҆ сподо́битъ ны̀ непоро́чными пє́рсты прїѧ́ти разжже́нный ᲂу҆́гль, и҆ вложи́ти во ᲂу҆ста̀ вѣ́рныхъ, во ѡ҆чище́нїе и҆ ѡ҆бновле́нїе дꙋ́шъ и҆́хъ и҆ тѣле́съ, ны́нѣ и҆ при́снѡ, и҆ во вѣ́ки вѣкѡ́въ.
Лю́дїе: А҆ми́нь.
А҆рхїере́й (и҆лѝ і҆ере́й), зрѧ̀ къ лю́демъ, чрезъ свѧты̑ѧ двє́ри возглаша́етъ:
Вкꙋси́те и҆ ви́дите, ꙗ҆́кѡ Хрⷭ҇то́съ Гдⷭ҇ь, раздѣлѧ́емый и҆ нераздѣли́мый, и҆ вѣ́рнымъ раздае́мый, и҆ неиждива́емый, во ѡ҆ставле́нїе грѣхѡ́въ, и҆ въ жи́знь вѣ́чнꙋю, ны́нѣ и҆ при́снѡ и҆ во вѣ́ки вѣкѡ́въ.
Лю́дїе: А҆ми́нь.
Та́же дїа́конъ къ лю́демъ:
Въ ми́рѣ Хрⷭ҇то́вѣ пои́мъ.
И҆ вхо́дѧтъ дїа́коны во свѧты́й ѻ҆лта́рь ма́лыми две́рьми, лю́дїе же пою́тъ прича́стенъ:
Вкꙋси́те и҆ ви́дите, ꙗ҆́кѡ Хрⷭ҇то́съ Гдⷭ҇ь, А҆ллилꙋ́їа.
Затворѧ́ютсѧ же здѣ̀ ца̑рскїѧ двє́ри и҆ завѣ́са, до́ндеже причастѧ́тсѧ свѧщеннослꙋжи́телїе.
Є҆гда́ же раздробле́нъ бꙋ́детъ свѧты́й хлѣ́бъ и҆ дїа́коны вни́дꙋтъ во свѧты́й ѻ҆лта́рь, ста́нꙋтъ всѝ благоговѣ́йнѡ ѻ҆́крестъ свѧты́ѧ трапе́зы, а҆рхїере́й же, (и҆лѝ і҆ере́й), прекло́нь главꙋ̀ мо́литсѧ пред̾ свѧто́ю трапе́зою си́це, во є҆́же слы́шанꙋ бы́ти сослꙋжа́щими:
Моли́тва пре́жде свѧта́гѡ причаще́нїѧ:
Влады́ко Хрⷭ҇тѐ Бж҃е на́шъ, небе́сный хлѣ́бе, пи́ще всегѡ̀ мі́ра, согрѣши́хъ на не́бо и҆ пред̾ тобо́ю, и҆ нѣ́смь досто́инъ причасти́тисѧ свѧты́хъ и҆ пречи́стыхъ твои́хъ та̑инъ, но ра́ди бла́гости твоеѧ̀ и҆ неизрече́ннагѡ долготерпѣ́нїѧ, досто́йна мѧ̀ сотворѝ и҆ неѡсꙋжде́нна, и҆ непосты́дна, причасти́тисѧ всесвѧта́гѡ тѣ́ла и҆ честны́ѧ кро́ве во ѡ҆ставле́нїе грѣхѡ́въ и҆ въ жи́знь вѣ́чнꙋю.
(Здѣ̀ въ закѷнѳѣ влива́етсѧ теплота̀ во свѧты́й поти́ръ, мы́ же во і҆ерꙋсали́мѣ сегѡ̀ не прїѧ́хомъ).
И҆ причаща́етсѧ а҆рхїере́й и҆лѝ і҆ере́й свѧта́гѡ тѣ́ла, глаго́лѧ въ себѣ̀: Тѣ́ло Хрⷭ҇то́во.
И҆ є҆гда̀ причасти́тсѧ, а҆рхїере́й преподае́тъ всѣ̑мъ і҆ере́ѡмъ и҆ дїа́конѡмъ свѧто́е тѣ́ло, глаго́лѧ прѝ ко́емждо даѧ́нїи: Тѣ́ло Хрⷭ҇то́во.
И҆ ѿвѣща́етъ прїе́млѧй ча́сть по ѻ҆бы́чаю на дла̑ни своѧ̑, глаго́лѧ А҆ми́нь.
И҆ а҆́бїе снѣда́етъ свѧты́й хлѣ́бъ. И҆ є҆гда̀ причасти́тъ а҆рхїере́й сослꙋжа́щыѧ, прїе́млетъ свѧты́й поти́ръ съ пла́томъ, ꙗ҆́коже ѻ҆бы́чай є҆́сть и҆ причаща́етсѧ по ѻ҆бы́чаю, глаго́лѧ: Кро́вь Хрⷭ҇то́ва, ча́ша жи́зни.
И҆ прихо́дѧтъ і҆ере́и и҆ дїа́коны, и҆ причаща́етъ и҆̀хъ по ѻ҆бы́чаю глаго́лѧ: Кро́вь Хрⷭ҇то́ва, ча́ша жи́зни.
И҆ ѿвѣща́етъ причаща́ющїйсѧ: А҆ми́нь.
Зрѝ: да ча́сти, ꙗ҆́же сꙋ́ть на свѧтѣ́мъ ді́скосѣ ника́коже по причаще́нїи въ поти́ръ вло́жиши.
Си́це быва́етъ причаще́нїе, и҆ прїе́млетъ а҆рхїере́й (и҆лѝ і҆ере́й), и҆ дїа́коны теплотꙋ̀ и҆ помыва́ютъ ᲂу҆стнѣ̀ своѝ, по ѻ҆бы́чаю: є҆ди́нъ дїа́конъ, хотѧ́й потреблѧ́ти свѧта̑ѧ, не прїе́млетъ теплоты̀.
Є҆гда́ же соверши́тсѧ во свѧтѣ́мъ ѻ҆лтарѣ̀ причаще́нїе, и҆ приспѣ́етъ вре́мѧ причаще́нїѧ мїрѧ́нъ, ѿверза́етсѧ завѣ́са, и҆ ца̑рскїѧ двє́ри, и҆ глаго́летъ дїа́конъ, ста́въ ᲂу҆ десны́ѧ страны̀ свѧты́ѧ трапе́зы:
Гдⷭ҇и, благословѝ.
А҆рхїере́й (и҆лѝ і҆ере́й) подае́тъ ча́шꙋ дїа́конꙋ глаго́лѧ:
Сла́ва Бг҃ꙋ, ѡ҆свѧти́вшемꙋ и҆ ѡ҆свѧща́ющемꙋ всѣ́хъ на́съ.
Дїа́конъ, прїе́млѧ ѿ а҆рхїере́а и҆лѝ і҆ере́а свѧтꙋ́ю ча́шꙋ:
Вознеси́сѧ на небеса̀, Бж҃е, и҆ по все́й землѝ сла́ва твоѧ̀, и҆ ца́рство твоѐ пребыва́етъ во вѣ́ки вѣкѡ́въ.
А҆рхїере́й (и҆лѝ і҆ере́й):
Благослове́но и҆́мѧ Гдⷭ҇а Бг҃а на́шегѡ, во вѣ́ки вѣкѡ́въ.
Та́же взе́млетъ а҆рхїере́й (и҆лѝ і҆ере́й) ді́скосъ со свѧты́мъ хлѣ́бомъ. И҆ и҆схо́дитъ дїа́конъ съ ча́шею во свѧты̑ѧ двє́ри, и҆ показꙋ́ѧ ча́шꙋ лю́демъ возглаша́етъ:
Со стра́хомъ бж҃їимъ, и҆ вѣ́рою и҆ любо́вїю пристꙋпи́те.
Лю́дїе пою́тъ: Благослове́нъ грѧды́й во и҆́мѧ гдⷭ҇не. И҆спо́лни ᲂу҆ста̀ моѧ̑ хвале́нїѧ, Гдⷭ҇и, и҆ ра́дости и҆спо́лни ᲂу҆стнѣ̀ моѝ, ꙗ҆́кѡ да воспою̀ сла́вꙋ твою̀.
И҆ ста́нетъ дїа́конъ зрѧ̀ къ лю́демъ ᲂу҆ і҆кѡ́ны пресвѧты́ѧ бцⷣы, а҆рхїере́й же (и҆лѝ і҆ере́й) съ ді́скосомъ ста́нетъ во свѧты́хъ две́рехъ.
И҆ а҆́ще сꙋ́ть причаща́ющыѧсѧ мїрѧ́не, прихо́дѧтъ со смире́нїемъ ко а҆рхїере́ю (и҆лѝ і҆ере́ю), и҆ то́й, держѧ̀ въ шꙋ́йцѣ ді́скосъ со свѧты́мъ хлѣ́бомъ, глаго́летъ: Тѣ́ло Хрⷭ҇то́во. И҆ ѿвѣща́етъ приходѧ́й: А҆ми́нь. И҆ влагае́тъ а҆рхїере́й (и҆лѝ і҆ере́й) ча́сть свѧта́гѡ хлѣ́ба во ᲂу҆ста̀ є҆мꙋ̀, и҆ то́й снѣда́етъ ю҆̀ и҆ прихо́дитъ къ дїа́конꙋ, и҆ глаго́летъ дїа́конъ: Кро́вь Хрⷭ҇то́ва, ча́ша жи́зни. И҆ ѿвѣща́етъ приходѧ́й: А҆ми́нь. И҆ дае́тъ є҆мꙋ̀ дїа́конъ пи́ти и҆зъ ча́ши ма́лѡ. И҆ си́це причаща́ютсѧ лю́дїе.
А҆́ще и҆ правосла́внѡ сїѐ и҆ лѣ́пѡ є҆́сть, ѻ҆ба́че не ѻ҆бы́ченъ є҆́сть въ дни̑ на́ши сицевы́й чи́нъ: подоба́етъ, глаго́летъ а҆рхїепі́скопъ закѵ́нѳскїй Дїонѵ́сїй, да потрє́бныѧ ча̑сти свѧта́гѡ хлѣ́ба положи́тъ а҆рхїере́й (и҆лѝ і҆ере́й) во свѧты́й поти́ръ по є҆́же причасти́тисѧ слꙋжа́щымъ, и҆ причаща́етъ здѣ̀ лю́ди приходѧ́щыѧ, а҆́ще бꙋ́дꙋтъ, тѣ́ла и҆ кро́ве хрⷭ҇то́вы вкꙋ́пѣ лжи́цею, ꙗ҆́коже ны́нѣ ѻ҆бы́чай правосла̑внымъ хрїстїа́нѡмъ є҆́сть.
Є҆гда́ же сконча́ютъ причаще́нїе, благословлѧ́етъ а҆рхїере́й (и҆лѝ і҆ере́й) ді́скосомъ лю́ди глаго́лѧ:
Спасѝ, Бж҃е, лю́ди твоѧ̑, и҆ благословѝ достоѧ́нїе твоѐ.
Лю́дїе: Благодари́мъ тѧ̀ Хрⷭ҇тѐ Бж҃е на́шъ, ꙗ҆́кѡ сподо́билъ є҆сѝ на́съ причасти́тисѧ тѣ́ла и҆ кро́ве твоеѧ̀ во ѡ҆ставле́нїе грѣхѡ́въ и҆ въ жи́знь вѣ́чнꙋю, неѡсꙋждє́нны ны̀ сохранѝ, мо́лимсѧ, ꙗ҆́кѡ бла́гъ и҆ человѣколю́бецъ.
И҆ вхо́дѧтъ а҆рхїере́й и҆ дїа́конъ во свѧты́й ѻ҆лта́рь и҆ поставлѧ́ютъ свѧта̑ѧ на свѧтѣ́й трапе́зѣ: а҆рхїере́й (ᲂу҆́бѡ ді́скосъ, дїа́конъ же свѧты́й поти́ръ, и҆ влага́етъ а҆рхїере́й (и҆лѝ і҆ере́й) ча́сти свѧта́гѡ хлѣ́ба во свѧтꙋ́ю ча́шꙋ и҆ ѡ҆прѧ́таетъ по ѻ҆бы́чаю свѧты́й ді́скосъ, и҆ прїе́мь кади́льницꙋ кади́тъ свѧта̑ѧ, глаго́лѧ моли́твꙋ сїю̀ та́йнѡ:
Возвесели́лъ є҆сѝ ны̀, Бж҃е, въ є҆дине́нїи твое́мъ, и҆ тебѣ̀ прино́симъ пѣ́снь благода́рственнꙋю пло́дъ ᲂу҆́стъ, и҆сповѣ́дающе благода́ть твою̀, съ кади́ломъ си́мъ да взы́детъ къ тебѣ̀, Бж҃е, да не возврати́тсѧ тщѝ, но пода́ждь на́мъ є҆гѡ̀ ра́ди благоꙋха́нїе всесвѧта́гѡ твоегѡ̀ Дх҃а, мѵ́ро пречи́стое и҆ неѿе́млемое и҆спо́лни ᲂу҆ста̀ на́шѧ хвале́нїѧ, и҆ ᲂу҆стнѣ̀ ра́дованїѧ, и҆ се́рдце ра́дости и҆ весе́лїѧ, во Хрⷭ҇тѣ̀ І҆и҃сѣ Гдⷭ҇ѣ на́шемъ, съ ни́мже благослове́нъ є҆сѝ, со всесвѧты́мъ твои́мъ Дх҃омъ, ны́нѣ и҆ при́снѡ, и҆ во вѣ́ки вѣкѡ́въ.
И҆ ѿно́ситъ свѧта̑ѧ є҆ди́нъ ѿ і҆ере́євъ ѿ свѧты́ѧ трапе́зы на же́ртвенникъ ничто́же глаго́лѧ, дїа́конъ та́кожде ѿно́ситъ ді́скосъ, без̾ кажде́нїѧ, а҆нтїми́нсъ же подоба́етъ сви́ти, и҆зше́дъ же сѣ́верными две́рьми ста́нетъ дїа́конъ на свое́мъ мѣ́стѣ, зрѧ̀ къ лю́демъ, и҆ глаго́летъ дїа̑конства:
Па́ки и҆ па́ки, непреста́ннѡ ми́ромъ Гдⷭ҇ꙋ помо́лимсѧ. Ꙗ҆́кѡ да бꙋ́детъ на́мъ причаще́нїе свѧты́нь є҆гѡ̀ во ѿвраще́нїе всѧ́кагѡ лꙋка́вагѡ дѣѧ́нїѧ, въ напꙋ́тїе живота̀ вѣ́чнагѡ, въ причаще́нїе и҆ да́ръ свѧта́гѡ Дх҃а, помо́лимсѧ. Пресвѧтꙋ́ю, пречи́стꙋю, пресла́внꙋю, благослове́ннꙋю Влады́чицꙋ на́шꙋ Богоро́дицꙋ и҆ приснодѣ́вꙋ Мр҃і́ю, со всѣ́ми свѧты́ми и҆ пра́ведными помѧнꙋ́вше, са́ми себѐ, и҆ дрꙋ́гъ дрꙋ́га, и҆ ве́сь живо́тъ на́шъ Хрⷭ҇тꙋ̀ Бг҃ꙋ предади́мъ.
Лю́дїе: Тебѣ̀ Гдⷭ҇и.
Глаго́лємымъ же дїа́конствамъ си̑мъ, мо́литсѧ а҆рхїере́й (и҆лѝ і҆ере́й) пред̾ свѧто́ю трапе́зою та́йнѡ си́це:
Бж҃е, вели́кагѡ ра́ди и҆ неизрече́ннагѡ благоꙋтро́бїѧ снизше́дый не́мощи рабѡ́въ твои́хъ, и҆ сподо́бивый на́съ причасти́тисѧ сеѧ̀ пренебе́сныѧ трапе́зы, не ѡ҆сꙋдѝ на́съ, Влады́ко, грѣ́шныхъ ѡ҆ причаще́нїи пречи́стыхъ твои́хъ та̑инъ, но сохранѝ ны̀, бла́же, во ѡ҆свѧще́нїи, ꙗ҆́кѡ да досто́йны бы́вше всесвѧта́гѡ твоегѡ̀ Дх҃а, ѡ҆брѧ́щемъ ча́стъ и҆ наслѣ́дїе со всѣ́ми свѧты́ми, є҆́же ѿ вѣ́ка тебѣ̀ благоꙋгоди́вшими, во свѣ́тѣ лица̀ твоегѡ̀, щедро́тами є҆диноро́днагѡ твоегѡ̀ Сн҃а, Гдⷭ҇а же и҆ Сп҃са на́шегѡ І҆и҃са Хрⷭ҇та̀, съ ни́мже благослове́нъ є҆сѝ, со всесвѧты́мъ, и҆ благи́мъ, и҆ животворѧ́щимъ твои́мъ Дх҃омъ, ны́нѣ, и҆ при́снѡ, и҆ во вѣ́ки вѣкѡ́въ.
Возгла́съ: Ꙗ҆́кѡ благослови́сѧ и҆ свѧти́сѧ и҆ препросла́висѧ всечестно́е и҆ великолѣ́пое свѧто́е и҆́мѧ твоѐ, Ѻ҆ц҃а̀ и҆ Сн҃а и҆ свѧта́гѡ Дх҃а, ны́нѣ, и҆ при́снѡ, и҆ во вѣ́ки вѣкѡ́въ.
Лю́дїе: А҆ми́нь.
А҆рхїере́й (и҆лѝ і҆ере́й) благословлѧ́етъ лю́ди глаго́лѧ:
Ми́ръ всѣ̑мъ.
Дїа́конъ же а҆́бїе глаго́летъ: Главы̑ на́шѧ Гдⷭ҇еви прикло́нимъ.
Лю́дїе: Тебѣ̀ Гдⷭ҇и.
А҆рхїере́й же (и҆лѝ і҆ере́й) моли́твꙋ сїю̀ та́йнѡ:
Бж҃е вели́кїй и҆ ди́вный, при́зри на рабы̑ твоѧ̑, ꙗ҆́кѡ тебѣ̀ приклони́хомъ вы̑и, и҆ прострѝ рꙋ́кꙋ твою̀ держа́внꙋю, и҆спо́лненꙋ благослове́нїй, и҆ благословѝ лю́ди твоѧ̑, и҆ сохранѝ достоѧ́нїе твоѐ, ꙗ҆́кѡ да всегда̀ и҆ непреста́ннѡ прославлѧ́емъ тѧ̀, є҆ди́наго жива́го и҆ и҆́стиннаго Бг҃а на́шего, свѧтꙋ́ю и҆ є҆диносꙋ́щнꙋю Трⷪ҇цꙋ, Ѻ҆ц҃а̀ и҆ Сн҃а и҆ свѧта́го Дх҃а.
Возгла́съ: Тебѣ́ бо подоба́етъ и҆ до́лженствꙋетъ ѿ всѣ́хъ на́съ всѧ́кое славосло́вїе, че́сть, поклоне́нїе и҆ благодаре́нїе, Ѻ҆ц҃ꙋ̀ и҆ Сн҃ꙋ, и҆ свѧто́мꙋ Дх҃ꙋ, ны́нѣ, и҆ при́снѡ, и҆ во вѣ́ки вѣкѡ́въ.
Лю́дїе: А҆ми́нь.
Дїа́конъ: Съ ми́ромъ Хрⷭ҇то́вымъ и҆зы́демъ.
А҆рхїере́й же (и҆лѝ і҆ере́й) и҆зше́дъ свѧты́ми две́рьми и҆зъ ѻ҆лтарѧ̀, и҆ ста́въ средѝ наро́да, глаго́летъ моли́твꙋ сїю̀, зрѧ̀ къ восто́кꙋ:
Ѿ си́лы въ си́лꙋ восходѧ́ще, и҆ всю̀ є҆́же въ хра́мѣ твое́мъ и҆спо́лнивъ боже́ственнꙋю слꙋ́жбꙋ, и҆ ны́нѣ мо́лимсѧ тебѣ̀, Гдⷭ҇и Бж҃е на́шъ: соверше́ннагѡ человѣколю́бїѧ сподо́би на́съ, и҆спра́ви пꙋ́ть на́шъ, ᲂу҆коренѝ на́съ во стра́сѣ твое́мъ, всѣ́хъ поми́лꙋй и҆ пренебе́снагѡ ца́рствїѧ твоегѡ̀ достѡ́йны покажѝ, во Хрⷭ҇тѣ̀ І҆и҃сѣ Гдⷭ҇ѣ на́шемъ, съ ни́мже подоба́етъ тебѣ̀ сла́ва, че́сть, держа́ва, вкꙋ́пѣ со всесвѧты́мъ Дх҃омъ, ны́нѣ, и҆ при́снѡ, и҆ во вѣ́ки вѣкѡ́въ.
Дїа́конъ къ лю́демъ:
Ѿпꙋща́етесѧ въ ми́рѣ.
А҆рхїере́й и҆лѝ і҆ере́й:
Благослови́сѧ Бг҃ъ, благословлѧ́ѧй и҆ ѡ҆свѧща́ѧй на́съ причаще́нїемъ свѧты́хъ и҆ пречи́стыхъ є҆гѡ̀ та̑инъ, ны́нѣ, и҆ при́снѡ, и҆ во вѣ́ки вѣкѡ́въ.
Лю́дїе: А҆ми́нь.
И҆ ѿхо́дѧтъ лю́дїе съ ми́ромъ въ до́мы своѧ̑, свѧще́нницы же совлача́ютсѧ свѧты́хъ ѻ҆де́ждъ, то́жде твори́тъ и҆ дїа́конъ потреби́въ свѧта̑ѧ, и҆ и҆́дꙋтъ въ до́мы своѧ̑ благодарѧ́ще Бо́га.
Си́це соверши́сѧ боже́ственнаѧ лїтꙋргі́а свѧта́гѡ а҆по́стола І҆а́кѡва.
Коне́цъ и҆ Бг҃ꙋ сла́ва.[[Внесены незначительные правки, исправлены опечатки. Прим. orthlib.ru.]]
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.