Слꙋ́жба безме́здникѡмъ и҆ чꙋдотво́рцємъ
<<рм҃є ѡ҆б.: 290>>
[глⷡ҇а к҃ѕ] СЛꙊ́ЖБА Ѻ҆́БЩА
безме́здникѡмъ и҆ чꙋдотво́рцємъ.
Ве́черъ,
на Гдⷭ҇и воззва́хъ, стїхи̑ры, гла́съ д҃.
Подо́бенъ: Да́лъ є҆сѝ зна́менїе:
Вода́ми дх҃о́вными ꙳ ꙗ҆́кѡ рѣ́ки наводнѧ́емы, ꙳ и҆ ꙗ҆́вѣ напо́лншесѧ, тва́рь напоѧ́ете бг҃озна́меньми, ꙳ и҆ пресла́вными и҆сцѣле́нїй дарова̑нїи, ꙳ и҆ дꙋшетлѣ̑нныѧ стра̑сти и҆зсꙋша́ете, ꙳ и҆ недꙋ́ги и҆сцѣлѧ́ете, ꙳ и҆ ѿгонѧ́ете дꙋ́хи, ꙳ бг҃оно́снїи безсре́бреницы, и҆́мⷬ҇къ, ꙳ мл҃твенницы ѡ҆ дꙋша́хъ на́шихъ.
Стра̑сти безсловє́сныѧ ꙳ поко́рше ст҃і́и, ꙳ дш҃е́вными си́лами, ꙳ человѣ́кѡмъ и҆ скотѡ́мъ бл҃годѣѧ́нїе подава́ете, ꙳ ѿ хрⷭ҇та̀ дарова́нїемъ и҆сцѣле́нїй ѡ҆бога́щшесѧ. ꙳ тѣ́мже сщ҃е́нное ва́ше, ꙳ и҆ свѣтоно́сное торжество̀ соверша́юще, ꙳ про́симъ ѡ҆чище́нїѧ дꙋша́мъ на́шымъ.
Ст҃ы́й хра́мъ ва́шъ, ꙳ ꙗ҆́кѡ не́бо показа́сѧ свѣтоза́рное и҆ сп҃си́тельное, ꙳ и҆ ꙗ҆́кѡ ѕвѣ́зды чꙋдеса̀ сп҃си́тєльнаѧ ны́нѣ притѧжа́вше, ꙳ ꙗ҆́коже со́лнце свѣ́тло, ꙳ бж҃е́ственныхъ и҆сцѣле́нїй дѣ́йство, и҆́мⷬ҇къ, пребл҃же́нне, ꙳ и҆́мⷬ҇къ, пресла́вне, ꙳ гдⷭ҇ни слꙋжи́тєли, и҆ мл҃твенницы ѡ҆ дꙋша́хъ на́шихъ.
А҆́ще и҆́мать самогла́сенъ, Сла́ва, гла́съ и҃.
Кто̀ не ᲂу҆диви́тсѧ; кто̀ не просла́витъ; кто̀ не воспое́тъ вѣ́рнѡ мꙋ́дрыхъ и҆ пресла́вныхъ безсре́бренникѡвъ чꙋдеса̀; ꙗ҆́кѡ и҆ по ст҃о́мъ и҆́хъ преставле́нїи всѣ̑мъ подаю́тъ притека́ющымъ вѣ́рою бога́тно врачева́нїе: и҆ чⷭ҇тны̑ѧ и҆ ст҃ы̑ѧ мо́щи тѣ́хъ то́чатъ бл҃года́ть врачева́нїй. ѽ дво́ице ст҃а́ѧ! ѽ чтⷭ҇ны̑ѧ главы̑! ѽ мꙋ́дросте и҆ сла́во, ѿ бг҃а да́нныѧ ва́мъ бл҃года́ти! <<рм҃ѕ: 291>> тѣ́мже пѣ́сньми зове́мъ бл҃годѣ́телю бг҃ꙋ, показа́вшемꙋ ты̑ѧ на врачева́нїе дꙋ́шъ и҆ тѣле́съ на́шихъ.
И҆ ны́нѣ, бг҃оро́диченъ:
Ра́дꙋйсѧ, вселе́нныѧ похвало̀. ра́дꙋйсѧ, хра́ме гдⷭ҇нь. ра́дꙋйсѧ, горо̀ прїѡсѣне́ннаѧ. ра́дꙋйсѧ, всѣ́хъ прибѣ́жище. ра́дꙋйсѧ, свѣ́щниче златы́й. ра́дꙋйсѧ, сла́во правосла́вныхъ чтⷭ҇на́ѧ. ра́дꙋйсѧ, мр҃і́е мт҃и хрⷭ҇та̀ бг҃а. ра́дꙋйсѧ, раю̀. ра́дꙋйсѧ, бж҃е́ственнаѧ трапе́зо. ра́дꙋйсѧ, сѣ́не. ра́дꙋйсѧ, рꙋ́чко всезлата́ѧ. ра́дꙋйсѧ, всѣ́хъ ᲂу҆пова́нїе.
Крⷭ҇тобг҃оро́диченъ:
Подо́бенъ: Гдⷭ҇и, а҆́ще и҆ на сꙋди́щи:
На крⷭ҇тѣ̀ повѣ́шена зрѧ́щи чи́стѡ тебѐ ро́ждшаѧ гдⷭ҇а, и҆ бли́зъ бы́вши, пла́чꙋщи глаго́лаше: ча́до, что̀ сїѐ стра́ждеши пло́тїю, и҆ тщи́шисѧ безча́дствовати мѧ̀; потщи́сѧ просла́витисѧ, ꙗ҆́кѡ да возвели́чꙋсѧ стрⷭ҇тїю твое́ю.
А҆́ще пра́зднꙋеши съ полѷеле́емъ, глаго́ли бг҃оро́диченъ воскрⷭ҇ный: Цр҃ь нбⷭ҇ный:
Вхо́дъ. Прокі́менъ днѐ.
Чтє́нїѧ г҃ мч҃нчєскаѧ, [пи̑сана въ концѣ̀ кни́ги сеѧ̀.]
На стїхо́внѣ стїхи̑ры, гла́съ а҃:
Подо́бенъ: Нбⷭ҇ныхъ чинѡ́въ:
Чꙋде́съ лꙋча́ми ѡ҆блиста́вше ꙳ вселе́ннꙋю всю̀ просвѣти́сте, ꙳ ст҃і́и безме́здницы, ꙳ пресвѣ́тлїи свѣти́льницы, ꙳ нб҃сѝ ᲂу҆подо́бистесѧ бл҃года́тїю, ꙳ высо́кагѡ жи́тельства добродѣ́тельми, ꙳ ѕвѣ́зды предлага́еми.
Сті́хъ: Ст҃ы̑мъ, и҆̀же сꙋ́ть на землѝ є҆гѡ̀, ᲂу҆дивѝ гдⷭ҇ь всѧ̑ хотѣ̑нїѧ своѧ̑ въ ни́хъ.
Дождерѡ́дныѧ ѡ҆́блаки преизѧ́ществꙋющѧ, ꙳ многотекꙋ́щими бл҃года́тей чꙋдесы̀, ꙳ мч҃нцы гдⷭ҇ни, ꙳ всю̀ зе́млю мы́сленнѡ напоѧ́ете, ꙳ здра̑ваѧ пѣснопѣ̑нїѧ бг҃ꙋ ꙳ приноси́ти понꙋжда́ющѧ.
Сті́хъ: Сѐ что̀ добро̀ и҆лѝ что̀ красно̀, но є҆́же жи́ти бра́тїи вкꙋ́пѣ.
И҆сцѣлѧ́ти стра̑сти дꙋшѝ и҆ тѣлесѐ, ꙳ хи́трость ѿ бг҃а и҆́стиннѡ прїе́мше, ꙳ мч҃нцы гдⷭ҇ни, ꙳ преесте́ственнѡ и҆сцѣлѧ́ете <<рм҃ѕ ѡ҆б.: 292>> всѧ̑, ꙳ не человѣ́ческими лѣчба́ми враче́бными, ꙳ но бж҃е́ственными дохнове́ньми.
Сла́ва, гла́съ д҃:
И҆сто́чникъ и҆сцѣле́нїй и҆мꙋ́ще ст҃і́и безсре́бреницы, и҆́мⷬ҇къ, и҆сцѣлє́нїѧ подае́те всѣ̑мъ тре́бꙋющымъ, ꙗ҆́кѡ велича́йшихъ дарѡ́въ сподо́бльшесѧ ѿ приснотекꙋ́щагѡ и҆сто́чника сп҃са хрⷭ҇та̀. рече́ бо къ ва́мъ гдⷭ҇ь, ꙗ҆́кѡ є҆диноревни́телємъ а҆пⷭ҇лѡвъ: сѐ да́хъ ва́мъ вла́сть над̾ дꙋ́хи нечи́стыми, ꙗ҆́коже ты̑ѧ и҆згони́ти, и҆ цѣли́ти всѧ́къ недꙋ́гъ и҆ всѧ́кꙋ ꙗ҆́зю. тѣ́мже въ повелѣ́нїихъ є҆гѡ̀ до́брѣ пожи́вше, тꙋ́не прїѧ́сте, тꙋ́не подае́те, врачꙋ́юще стра̑сти дꙋ́шъ и҆ тѣле́съ на́шихъ.
И҆ ны́нѣ, бг҃оро́диченъ воскрⷭ҇ный: При́зри на молє́нїѧ:
А҆́ще ли не пра́зднꙋеши, глаго́ли се́й бг҃оро́диченъ:
Бцⷣе всѣ́хъ цр҃и́це, правосла́вныхъ похвало̀, є҆реті́чествꙋющихъ шата̑нїѧ разорѝ, и҆ ли́ца и҆́хъ посрамѝ не кла́нѧющихсѧ, нижѐ чтꙋ́щихъ, пречⷭ҇таѧ, чтⷭ҇ны́й тво́й ѡ҆́бразъ.
Крⷭ҇тобг҃оро́диченъ: Распина́ема ви́дѧщи, ꙳ и҆ въ ре́бра пробода́ема копїе́мъ, ꙳ пречⷭ҇таѧ, хрⷭ҇та̀ чл҃вѣколю́бца, ꙳ пла́чꙋщи вопїѧ́ше: ꙳ что̀ сїѐ сн҃е мо́й; ꙳ что̀ тебѣ̀ неблагода́рнїи лю́дїе возда́ша, ꙳ вмѣ́стѡ ꙗ҆̀же сотвори́лъ є҆сѝ дѡ́браѧ и҆̀мъ; ꙳ и҆ тщи́шисѧ безча́дствовати мѧ̀ вселюбе́знѣйше; ꙳ дивлю́сѧ бл҃гоꙋтро́бне, твоемꙋ̀ во́льномꙋ распѧ́тїю.
Тропа́рь во ᲂу҆ста́вѣ.
А҆́ще ли нѣ́сть ᲂу҆ста́ва, глаго́ли се́й тропа́рь, гла́съ и҃:
Ст҃і́и безсре́бреницы и҆ чꙋдотво́рцы, посѣти́те не́мѡщи на́шѧ: тꙋ́не прїѧ́сте, тꙋ́не дади́те на́мъ.
Сла́ва, и҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.
<<рм҃з: 293>>
На ᲂу҆́трени,
на Бг҃ъ гдⷭ҇ь, тропа́рь то́йже.
По а҃-й каѳі́смѣ сѣда́ленъ, гла́съ в҃.
Вели́кихъ досто́йни бы́вше дарова́нїй сла́внїи, во смире́ннѣмъ житїѝ на землѝ пожи́сте, и҆ преходѧ́ще всю́дꙋ, тꙋ́не болѧ́щымъ недꙋ́ги и҆ стра̑сти и҆сцѣлѧ́юще, ꙗ҆ви́стесѧ а҆́гг҃лѡмъ собесѣ́дницы, и҆́мⷬ҇къ, вѣ́рнїи, бра́тїе прекра́снїи, и҆ на́шѧ стра̑сти мл҃твами ва́шими и҆сцѣли́те. [Два́жды.]
Сла́ва, и҆ ны́нѣ, бг҃оро́диченъ:
Млⷭ҇рдїѧ сꙋ́щи и҆сто́чникъ, млⷭ҇ти сподо́би на́съ бцⷣе, при́зри на лю́ди согрѣши́вшыѧ, ꙗ҆вѝ ꙗ҆́кѡ при́снѡ си́лꙋ твою̀: на тѧ́ бо ᲂу҆пова́юще, ра́дꙋйсѧ, вопїе́мъ тѝ, ꙗ҆́коже и҆ногда̀ гаврїи́лъ, безпло́тныхъ а҆рхїстрати́гъ.
По в҃-й каѳі́смѣ сѣда́ленъ, гла́съ а҃.
Стрⷭ҇тоте́рпцы хрⷭ҇то́вы, и҆́мⷬ҇къ, моли́тесѧ за ны̀, вѣ́рою приходѧ́щыѧ къ ва́мъ: вы́ бо мл҃твами ва́шими подае́те и҆сцѣле́нїѧ бл҃года́ть, и҆ премнѡ́гїѧ недꙋ́ги ѿгонѧ́ете, ꙗ҆́кѡ сохра́нницы жи́зни на́шеѧ. [Два́жды.]
Сла́ва, и҆ ны́нѣ, бг҃оро́диченъ:
Пречⷭ҇таѧ бцⷣе, на нб҃сѣ́хъ бл҃гослове́ннаѧ, и҆ на землѝ славосло́вимаѧ, ра́дꙋйсѧ невѣ́сто неневѣ́стнаѧ.
По Хвали́те и҆́мѧ гдⷭ҇не, припѣ́въ:
Велича́емъ ва́съ чꙋдотво́рцы сла́внїи, и҆́мⷬ҇къ, и҆ чте́мъ чтⷭ҇на̑ѧ страда́нїѧ ва̑ша, ꙗ҆̀же за хрⷭ҇та̀ претерпѣ́ли є҆стѐ.
Ѱало́мъ и҆збра́нный: Бг҃ъ на́мъ прибѣ́жище и҆ си́ла:
По полѷеле́и, сѣда́ленъ, гла́съ є҃:
Подо́бенъ: Собезнача́льное сло́во:
Возсїѧ̀ дне́сь пра́зднество стрⷭ҇тоте́рпцєвъ, и҆́мⷬ҇къ, и҆мѣ́ютъ бо съ нб҃сѐ зарю̀. ли́къ а҆́гг҃льскїй торжествꙋ́етъ, и҆ человѣ́ческїй ро́дъ спра́зднꙋетъ: тѣ́мже сі́и мо́лѧтъ ѡ҆ дꙋша́хъ на́шихъ. [Два́жды.]
<<рм҃з ѡ҆б.: 294>>
Сла́ва, и҆ ны́нѣ, бг҃оро́диченъ:
Ди́вныѧ дв҃ы та́йна, всемꙋ̀ мі́рꙋ ꙗ҆ви́сѧ сп҃се́нїе, и҆з̾ неѧ́же роди́сѧ ра́дость: гдⷭ҇и, сла́ва тебѣ̀.
Степє́нна, а҃-й а҆нтїфѡ́нъ, д҃-гѡ гла́са.
Прокі́менъ: Ст҃ы̑мъ, и҆̀же сꙋ́ть на землѝ є҆гѡ̀, ᲂу҆дивѝ гдⷭ҇ь всѧ̑ хѡтѣ́нїѧ своѧ̑ въ ни́хъ.
Сті́хъ: Предзрѣ́хъ гдⷭ҇а предо мно́ю вы́нꙋ:
Всѧ́кое дыха́нїе:
Є҆ѵⷢ҇лїе, [пи́сано въ концѣ̀ кни́ги сеѧ̀.]
По н҃-мъ ѱалмѣ̀ стїхи́ра, гла́съ а҃:
Свѣтоза́рнаѧ, и҆ ст҃а́ѧ, и҆ бл҃гоѡбра́знаѧ мч҃нкѡвъ, и҆́мⷬ҇къ, всепра́зднственнаѧ па́мѧть, ꙗ҆́же всю̀ зе́млю просвѣща́ющи, мра́къ грѣхо́вный ѿгонѧ́ющи, лѣчба́мъ бл҃года́ть и҆сточа́етъ.
Канѡ́нъ, гла́съ и҃.
Пѣ́снь а҃.
І҆рмо́съ: И҆стрѧ́сшемꙋ въ мо́ри мꙋчи́тельство фараѡ́не, и҆ і҆и҃лѧ сꙋ́шею наста́вльшемꙋ пои́мъ хрⷭ҇тꙋ̀: ꙗ҆́кѡ просла́висѧ во вѣ́ки.
Ꙗ҆́вльшаго во все́мъ мі́рѣ безме́здники и҆ врачѝ, и҆́мⷬ҇къ, и҆ всѣ́хъ и҆сцѣлѧ́ющыѧ недꙋ́ги бл҃года́тїю, воспои́мъ и҆зба́вителѧ сп҃са хрⷭ҇та̀: ꙗ҆́кѡ просла́висѧ во вѣ́ки.
Ѿ дх҃о́вныхъ бл҃года́тей рѣ́ки чꙋдє́сныѧ и҆сточа́ютъ ст҃і́и, и҆ недꙋ́ги и҆сцѣлѧ́ютъ, восхва́лимъ вѣ́рнїи да́вшаго и҆̀мъ вла́сть сїю̀: ꙗ҆́кѡ просла́висѧ во вѣ́ки.
Молє́нїѧ безсре́бреницы вра́чеве, бг҃ꙋ принеси́те, ꙗ҆́кѡ да и҆зба́витъ ны̀ и҆скꙋше́нїй и҆ скорбе́й мно́гихъ, и҆ тре́петнагѡ и҆ стра́шнагѡ тогда̀ мꙋче́нїѧ.
Бг҃оро́диченъ: Застꙋ́пнице при́снѡ скорбѧ́щихъ, сп҃се́нїе и҆ ᲂу҆пова́нїе неча́емыхъ бцⷣе всехва́льнаѧ, молѝ при́снѡ хрⷭ҇та̀, и҆зба́витисѧ на́мъ ѿ бѣ́дъ.
Пѣ́снь г҃.
І҆рмо́съ: Оу҆тверди́сѧ се́рдце моѐ во гдⷭ҇ѣ, вознесе́сѧ ро́гъ мо́й въ бз҃ѣ мое́мъ, разшири́шасѧ на врагѝ моѧ̑ ᲂу҆ста̀ моѧ̑, возвесели́хсѧ ѡ҆ сп҃се́нїи твое́мъ.
<<рм҃и: 295>>
Та̑йныѧ лꙋчѝ земны̑мъ ꙗ҆ви́лъ є҆сѝ гдⷭ҇и, ст҃ы̑ѧ твоѧ̑, и҆́мⷬ҇къ, просвѣща́ющыѧ ве́сь мі́ръ, ꙗ҆вѝ и҆ на на́съ млⷭ҇ти твоѧ̑!
Ꙗ҆́кѡ тꙋ́не прїѧ́сте да́ръ ѿ бг҃а, тꙋ́не и҆ подае́те и҆сцѣлє́нїѧ, прогонѧ́юще бѣ́сы, по глаго́лꙋ гдⷭ҇а бг҃а на́шегѡ.
Мі́ръ пое́тъ ва̑ша, ст҃і́и, всегда̀ мнѡ́гаѧ бл҃годѣѧ̑нїѧ, и҆ чꙋде́съ мно́жество, чꙋдотво́рцы вра́чеве, а҆́гг҃лъ всѣ́хъ равностоѧ́телє.
Бг҃оро́диченъ: Прозѧ́бшꙋю ѿ дв҃да на землѝ, и҆ бг҃а ро́ждшꙋю воплоще́ннаго и҆з̾ тебѐ, хва́лимъ тѧ̀ пречⷭ҇таѧ, ꙗ҆́кѡ сѣ́нь и҆ прⷭ҇то́лъ, и҆ две́рь бж҃їю.
Сѣда́ленъ, гла́съ д҃.
Подо́бенъ: Вознесы́йсѧ на крⷭ҇тъ:
До́лꙋ влекꙋ́щыѧ сла́сти попра́вше, къ мꙋче́нїѧ страда́льцы бжⷭ҇твеннѣй высотѣ̀ свѣ́тлѡ взѧ́стесѧ бл҃года́тїю, и҆́мⷬ҇къ, и҆ и҆́мⷬ҇къ, вселе́нныѧ свѣти́льницы. тѣ́мже мо́лимсѧ, ѡ҆мраче́нїѧ грѣха̀ и҆ недꙋ́гѡвъ и҆зба́вите ны̀, сꙋ́щаго над̾ всѣ́ми бг҃а молѧ́ще.
Сла́ва, и҆ ны́нѣ, бг҃оро́диченъ:
Стѣна̀ непобѣди́маѧ на́мъ хрⷭ҇тїа́нѡмъ є҆сѝ бцⷣе дв҃о, къ тебѣ́ бо прибѣга́юще, невреди̑мы пребыва́емъ, и҆ па́ки согрѣша́юще, и҆́мамы тѧ̀ мл҃твенницꙋ. тѣ́мъ бл҃годарѧ́ще вопїе́мъ тѝ: ра́дꙋйсѧ бл҃года́тнаѧ, гдⷭ҇ь съ тобо́ю.
Крⷭ҇тобг҃оро́диченъ: Дв҃о пренепоро́чнаѧ мт҃и хрⷭ҇та̀ бг҃а, ѻ҆рꙋ́жїе про́йде твою̀ прест҃ꙋ́ю дꙋ́шꙋ, є҆гда̀ распина́ема ви́дѣла є҆сѝ во́лею сн҃а и҆ бг҃а твоего̀: є҆го́же бл҃гослове́ннаѧ молѧ́щи не преста́й, проще́нїе прегрѣше́нїй на́мъ дарова́ти.
Пѣ́снь д҃.
І҆рмо́съ: Та́йнѡ прⷪ҇ро́къ предзрѧ̀, ѿ дв҃ы тѧ̀, сло́ве, воплоща́ема, пѣ́сненнѡ вопїѧ́ше: сла́ва си́лѣ твое́й гдⷭ҇и.
Ди́венъ сп҃съ є҆́сть бг҃ъ на́шъ, ꙗ҆́кѡ лежа́тъ во гробѣ́хъ ст҃ы́хъ є҆гѡ̀ на́ги кѡ́сти, и҆ дѣ́йствꙋютъ въ мі́рѣ чꙋдеса̀ ди̑вна и҆ стра̑шна: сла́ва си́лѣ твое́й гдⷭ҇и.
<<рм҃и ѡ҆б.: 296>>
Земна̑ѧ ѡ҆ста́вльше ꙗ҆́кѡ тлѣ́ємаѧ, сїѡ́на бы́сте наслѣ́дницы, и҆ хрⷭ҇то́ва црⷭ҇твїѧ досто́йни гра́ждане, ст҃і́и.
Досто́йнѡ хвали́ми є҆стѐ на землѝ и҆сцѣли́тели недꙋ́жныхъ безме́здницы, и҆́мⷬ҇къ: ꙗ҆́кѡ и҆ по кончи́нѣ всѧ̑ ѿ недꙋ̑гъ свобожда́ете.
Бг҃оро́диченъ: Ра́дꙋйсѧ, ски́нїе бж҃їѧ сла́вы: ра́дꙋйсѧ, ѻ҆рꙋ́жїе и҆ прⷭ҇то́ле ѻ҆́гненный: ра́дꙋйсѧ, горо̀ прїѡсѣне́ннаѧ, ѿ неѧ́же ѿсѣче́сѧ ка́мень, хрⷭ҇то́съ.
Пѣ́снь є҃.
І҆рмо́съ: Оу҆́тренююще вопїе́мъ тѝ, гдⷭ҇и, сп҃си́ ны: ты́ бо є҆сѝ бг҃ъ на́шъ, ра́звѣ тебѐ и҆но́гѡ не вѣ́мы.
Прїи́мше вла́сть ѿ бг҃а безме́здницы, и҆́мⷬ҇къ, всѣ́хъ и҆сцѣлѧ́ете недꙋ́жныхъ бѡлѣ́зни.
Ве́лїѧ дарова́нїѧ гдⷭ҇нѧ, слꙋжи́тєли ст҃і́и, сподо́бившесѧ, тꙋ́не врачꙋ́ете всѣ́хъ.
Мл҃твами ст҃ы́хъ слꙋжи́телей, и҆́мⷬ҇къ, ты̀ сп҃се на́шъ, да́ждь мі́рꙋ всемꙋ̀ твоѧ̑ млⷭ҇ти, ꙗ҆́кѡ млⷭ҇рдъ.
Бг҃оро́диченъ: Дв҃ꙋ по ржⷭ҇твѣ̀ хва́лимъ тѧ̀ бцⷣе: ты́ бо мі́рꙋ сло́во бж҃їе пло́тїю родила̀ є҆сѝ.
Пѣ́снь ѕ҃.
І҆рмо́съ: Ꙗ҆́коже прⷪ҇ро́ка и҆зба́вилъ є҆сѝ и҆з̾ глꙋбины̀ преиспо́днїѧ, хрⷭ҇тѐ бж҃е, и҆ менѐ ѿ грѣхѡ́въ мои́хъ и҆зба́ви ꙗ҆́кѡ чл҃вѣколю́бецъ, и҆ ᲂу҆пра́ви живо́тъ мо́й, молю́сѧ.
Ꙗ҆́коже въ мо́ри жите́йстѣмъ без̾ бꙋ́ри преше́дше пꙋчи́нꙋ, во сп҃си́тельное приста́нище въ вы́шнее црⷭ҇тво, безме́здницы, бл҃гоче́стнѡ приста́сте.
И҆сто́чники приснотекꙋ́щїи, чꙋде́снꙋю бл҃года́ть и҆сточа́ете, недꙋ́ги ѿгонѧ́юще безме́здницы ст҃і́и: моли́тесѧ ѡ҆ дꙋша́хъ на́шихъ.
Живꙋ́ще мч҃нцы ра́достнѡ на нб҃сѣ́хъ, въ чтⷭ҇ны́й хра́мъ ва́шъ прїитѝ потщи́тесѧ, и҆ на́шѧ недꙋ́ги тѣлє́сныѧ, и҆ сердє́чныѧ стра̑сти и҆сцѣли́те.
<<рм҃ѳ: 297>>
Бг҃оро́диченъ: Вы́шшꙋю херꙋві̑мъ и҆ всеѧ̀ тва́ри, восхва́лимъ є҆ди́нꙋ ро́ждшꙋю зижди́телѧ и҆ гдⷭ҇а, и҆ ѿве́рзшꙋю двє́ри ра̑йскїѧ на́мъ.
Конда́къ во ᲂу҆ста́вѣ.
А҆́ще ли нѣ́сть ᲂу҆ста́ва, глаго́ли се́й конда́къ, гла́съ в҃:
Бл҃года́ть прїи́мше и҆сцѣле́нїй, простира́ете здра́вїе сꙋ́щымъ въ нꙋ́ждахъ вра́чеве, чꙋдотво́рцы пресла́внїи: но ва́шимъ посѣще́нїемъ ра́тникѡвъ де́рзѡсти низложи́те, мі́ръ и҆сцѣлѧ́юще чꙋдесы̀.
І҆́косъ: Всѧ́кагѡ ра́зꙋма и҆ мꙋ́дрости прехо́дитъ сло́во мꙋ́дрыхъ враче́й, и҆ всѣ̑мъ ра́зꙋмъ подае́тъ: вы́шнѧгѡ бо бл҃года́ть прїе́мше, неви́димѡ здра́вїе да́рꙋютъ всѣ̑мъ. ѿню́дꙋже и҆ мое́й по́вѣсти бл҃года́ть дарова́сѧ пѣ́ти, ꙗ҆́кѡ бг҃онѡ́сныѧ ᲂу҆го́дники хрⷭ҇тѡ́вы и҆ слꙋжи́тєли, и҆сцѣле́нїй мно́жество подаю́щыѧ: болѣ́зни бо всѣ́хъ и҆збавлѧ́ютъ мі́ръ, и҆сцѣлѧ́юще чꙋдесы̀.
Пѣ́снь з҃.
І҆рмо́съ: Въ нача́лѣ зе́млю ѡ҆снова́вый, и҆ нб҃са̀ сло́вомъ ᲂу҆тверди́вый, бл҃гослове́нъ є҆сѝ во вѣ́ки, гдⷭ҇и бж҃е ѻ҆тє́цъ на́шихъ.
Возвели́чивый па́мѧть сла́внѡ премꙋ́дрыхъ безме́здникѡвъ на землѝ, бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ.
Показа́вый верстꙋ̀ честнꙋ́ю, ст҃ы̑ѧ чꙋдотво́рцы всѣ̑мъ, бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ.
Па́мѧть чтⷭ҇нꙋ́ю творѧ́ще безме́здникѡвъ, ра́достїю вопїе́мъ тѝ ще́дре: бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ.
Бг҃оро́диченъ: Всели́выйсѧ во чре́во дв҃ы, и҆ въ не́мъ а҆да́ма ѡ҆бнови́вый, бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ.
Пѣ́снь и҃.
І҆рмо́съ: На горѣ̀ ст҃ѣ́й просла́вльшасѧ, и҆ въ кꙋпинѣ̀ ѻ҆гне́мъ приснодв҃ы мѡѷсе́ови та́йнꙋ ꙗ҆́вльшаго, гдⷭ҇а по́йте, и҆ превозноси́те во всѧ̑ вѣ́ки.
Пода́вшаго свы́ше дарова̑нїѧ и҆сцѣле́нїй свои̑мъ безме́здникѡмъ, тꙋ́не и҆сцѣли́ти недꙋ́ги, гдⷭ҇а по́йте, и҆ превозноси́те є҆го̀ во вѣ́ки.
<<рм҃ѳ ѡ҆б.: 298>>
Да́вшаго бл҃года́ть ст҃ы̑мъ и҆сцѣлѧ́ти недꙋ́жныхъ не́мощи, и҆ дꙋ́шъ врачева́ти стра̑сти, гдⷭ҇а по́йте, и҆ превозноси́те є҆го̀ во вѣ́ки.
Житїѐ ᲂу҆́бѡ па́че человѣ̑къ, и҆ добродѣ́тельнꙋю жи́знь, кі́й человѣ́къ безме́здникѡвъ не восхва́литъ; вє́лїѧ бо чꙋдеса̀ на землѝ творѧ́хꙋ при́снѡ. гдⷭ҇а по́йте, и҆ превозноси́те є҆го̀ во вѣ́ки.
Бг҃оро́диченъ: Все́льшагосѧ во чре́во дв҃ы, и҆з̾ неѧ́же стра́шнѡ па́че словесѐ, ве́тхаго а҆да́ма ѡ҆бно́вльшаго, гдⷭ҇а по́йте, и҆ превозноси́те є҆го̀ во вѣ́ки.
Пѣ́снь ѳ҃.
І҆рмо́съ: Проѧвле́нное на горѣ̀ законополо́жникꙋ во ѻ҆гнѝ и҆ кꙋпинѣ̀, ржⷭ҇тво̀ приснодв҃ы, въ на́ше вѣ́рныхъ сп҃се́нїе, пѣ́сньми немо́лчными велича́емъ.
Вселе́нское врачевство̀ ѿве́рзесѧ, ра́ка ва́ша ст҃і́и безме́здники, и҆́мⷬ҇къ, къ не́йже притека́юще вѣ́рнїи достодо́лжнѡ, всѝ и҆сцѣле́нїе взе́млютъ.
Прїиди́те и҆сцѣли́тесѧ ѿ разли́чныхъ недꙋ̑гъ, человѣ́цы болѧ́щїи: грѧди́те же и҆ ско́ти, ꙗ҆́кѡ и҆сто́чникъ чꙋде́съ ѿ ра́ки ст҃ы́хъ и҆стека́етъ.
Въ сє́ла вы̑шнѧѧ вселѧ́еми ст҃і́и, посредѣ̀ на́съ бы́вше неви́димѡ милосе́рдствꙋете, посредѣ̀ хра́ма ва́шегѡ пѣ́сни возсыла́ющихъ вседержи́телю, и҆ бл҃жа́щихъ прилѣ́жнѡ ва́съ всехва́льнїи.
Бг҃оро́диченъ: Ты̀ є҆сѝ бцⷣе стѣна̀ на́ша и҆ ѻ҆рꙋ́жїе, ты̀ є҆сѝ застꙋ́пнице притека́ющихъ къ тебѣ̀: тебѣ́ же ны́нѣ всѝ мо́лимсѧ, да и҆збꙋ́демъ ѿ вра̑гъ на́шихъ.
Свѣти́ленъ.
Подо́бенъ: Нб҃о ѕвѣзда́ми:
Чꙋдодѣ́йственнїи свѣти́льницы, и҆́мⷬ҇къ, со и҆́мⷬ҇къ, дꙋшє́вныѧ на́шѧ недꙋ́ги и҆ тѣлє́сныѧ и҆сцѣли́те, ѿ гдⷭ҇а прїе́мше бл҃года́ть и҆сцѣле́нїй.
<<р҃н: 299>>
Бг҃оро́диченъ: Ѿ бг҃а мі́рови пода́нныхъ бл҃ги́хъ, ты̀ вина̀ была̀ є҆сѝ бцⷣе: но и҆ ны́нѣ молѝ ѡ҆ ѻ҆́бщемъ сп҃се́нїи бл҃гопремѣ́ннаго бг҃а.
На хвали́техъ стїхи̑ры, гла́съ в҃.
Вра́чеве немощствꙋ́ющихъ, сокрѡ́вища врачева́нїй, сп҃си́телїе вѣ́рныхъ, безсре́бреницы всесла́внїи, въ нꙋ́ждахъ зовꙋ́щыѧ и҆ болѧ́щыѧ и҆сцѣли́те, молѧ́ще бг҃а бл҃га́го, и҆зба́витисѧ на́мъ ѿ сѣ́тей вра́жїихъ. [Два́жды.]
И҆сто́чникъ и҆сцѣле́нїй, є҆ди́наго то́кмѡ въ лѣ́тѣ и҆сцѣлева́ше, хра́мъ же безсре́бреникѡвъ, всѐ мно́жество и҆сцѣлѧ́етъ недꙋ́гꙋющихъ: неѡскꙋ́дно бо є҆́сть и҆ неиждива́емое бога́тство ст҃ы́хъ. тѣ́хъ мл҃твами хрⷭ҇тѐ поми́лꙋй на́съ.
Ра́дꙋетсѧ ли́къ ст҃ы́хъ во вѣ́ки, црⷭ҇тво во нбⷭ҇ное наслѣ́доваша: землѧ̀ мѡ́щи и҆́хъ прїе́мши, бл҃гово́нїе возвѣ́ѧ: рабѝ хрⷭ҇тѡ́вы бы́ша, всели́вшесѧ въ жи́знь вѣ́чнꙋю.
Сла́ва, гла́съ ѕ҃:
Безконе́чна є҆́сть ст҃ы́хъ бл҃года́ть, ю҆́же ѿ хрⷭ҇та̀ прїѧ́ша. тѣ́мже и҆ мѡ́щи и҆́хъ ѿ бж҃е́ственныѧ си́лы непреста́ннѡ дѣ́йствꙋютъ чꙋдеса̀: и҆́хже и҆мена̀ вѣ́рою призыва́єма, неисцѣ̑льныѧ болѣ̑зни и҆сцѣлѧ́ютъ. и҆́миже гдⷭ҇и, и҆ на́съ дꙋше́вныхъ и҆ тѣле́сныхъ страсте́й свободѝ, ꙗ҆́кѡ чл҃вѣколю́бецъ.
И҆ ны́нѣ, бг҃оро́диченъ:
Преложе́нїе скорбѧ́щихъ, премѣне́нїе болѧ́щихъ є҆сѝ бцⷣе всепѣ́таѧ, сп҃сѝ гра́дъ и҆ лю́ди: бори́мыхъ ᲂу҆мире́нїе, ѡ҆бꙋрева́емыхъ тишина̀, є҆ди́на предста́тельнице вѣ́рныхъ.
Крⷭ҇тобг҃оро́диченъ: Пречⷭ҇таѧ ꙗ҆́кѡ ви́дѣ тѧ̀ на крⷭ҇тѣ̀ повѣ́шена, пла́чꙋщи вопїѧ́ше мт҃рски: бж҃е мо́й, сладча́йшее ча́до моѐ, ка́кѡ терпи́ши стрⷭ҇ть поно́снꙋю;
А҆́ще и҆́мꙋтъ на стїхо́внѣ Сла́вꙋ, глаго́ли вече́рнїй:
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.