Слꙋ́жба сщ҃енноисповѣ́дникꙋ и҆ прпⷣбноисповѣ́дникꙋ
<<р҃м: 279>>
[глⷡ҇а к҃є] СЛꙊ́ЖБА Ѻ҆́БЩА
сщ҃енноисповѣ́дникꙋ и҆ прпⷣбноисповѣ́дникꙋ.
Ве́чера,
на Гдⷭ҇и воззва́хъ, стїхи̑ры, гла́съ д҃.
Подо́бенъ: Ꙗ҆́кѡ до́блѧ:
И҆́стины водрꙋже́нїе, ꙳ и҆ вѣ́ры ᲂу҆твержде́нїе, ꙳ и҆ догма́тѡвъ предложи́телѧ тѧ̀ зна́емъ, ꙳ бл҃гоче́стїѧ согла́сника, ꙳ чистоты̀ селе́нїе, ꙳ и҆ прїѧ́телище и҆збра́нное, ꙳ бл҃гово́нїе дх҃а, ꙳ и҆ превели́кое сокро́вище ᲂу҆че́нїй, ꙳ и҆ ѡ҆снова́нїе хрⷭ҇то́вы цр҃кве, ꙳ сщ҃енноѧвле́нне бг҃одꙋхнове́нне, и҆́мⷬ҇къ.
А҆пⷭ҇лѡвъ прее́мника, ꙳ страда́льцєвъ є҆динонра́вна, ꙳ по́стникѡвъ є҆диноревни́телѧ восхвалѧ́емъ тѧ̀, ꙳ и҆ ᲂу҆чи́телей печа́ть, ꙳ и҆ бж҃е́ственное и҆з̾ѡбраже́нїе, ꙳ хрⷭ҇то́ва тайноводи́телѧ бг҃оно́се всехва́льне, ꙳ и҆ бг҃ото́чнꙋю рѣкꙋ̀ ꙳ разꙋмѣ́нїй беззако́нникѡвъ и҆ хꙋ́льникѡвъ мы̑сли потоплѧ́юща, ꙳ премꙋ́дре, и҆́мⷬ҇къ.
Премꙋ́дрости тала́нтъ ꙳ ᲂу҆мно́живъ пребога́те, ꙳ ра́дости сподо́билсѧ є҆сѝ гдⷭ҇а твоегѡ̀. ꙳ и҆спещре́нъ бл҃года́тїю ꙳ бж҃е́ственнагѡ сїѧ́нїѧ, ꙳ и҆ заре́ю мы́сленнѡ сїѧ́ѧ дꙋхо́вною, ꙳ ны́нѣ предстои́ши десни́цѣ жизноно́снѣй, ꙳ ѿтꙋ́дꙋ лꙋча́ми ꙳ всегда̀ ѡ҆блиста́емь сла́вне, и҆́мⷬ҇къ.
Сла́ва, и҆ ны́нѣ, бг҃оро́диченъ.
Скве́рнꙋ ѿмы́й стра́стнагѡ се́рдца моегѡ̀, бцⷣе всепѣ́таѧ, и҆ всѧ̑ ꙗ҆́звы и҆ гноє́нїѧ сегѡ̀, ꙗ҆́же ѿ грѣха̀ ѡ҆чи́сти, чⷭ҇таѧ, и҆ ᲂу҆ма̀ моегѡ̀ ᲂу҆ста́ви непостоѧ́нїе: ꙗ҆́кѡ да си́лꙋ твою̀ и҆ вели́кое застꙋпле́нїе велича́ю, ѻ҆каѧ́нный и҆ непотре́бный ра́бъ тво́й.
<<р҃м ѡ҆б.: 280>>
Крⷭ҇тобг҃оро́диченъ: Распина́ема ви́дѧщи, ꙳ и҆ въ рє́бра пробода́ема копїе́мъ, ꙳ пречⷭ҇таѧ, хрⷭ҇та̀ чл҃вѣколю́бца, ꙳ пла́чꙋщи вопїѧ́ше: ꙳ что̀ сїѐ сн҃е мо́й, ꙳ что̀ тебѣ̀ неблагода́рнїи лю́дїе возда́ша, ꙳ вмѣ́стѡ ꙗ҆̀же сотвори́лъ є҆сѝ дѡ́браѧ и҆̀мъ, ꙳ и҆ тщи́шисѧ безча́дствовати мѧ̀ вселюбе́знѣйше; ꙳ дивлю́сѧ бл҃гоꙋтро́бне, ꙳ твоемꙋ̀ во́льномꙋ распѧ́тїю.
А҆́ще и҆́мать, самогла́сенъ. Сла́ва, гла́съ ѕ҃:
И҆злїѧ́сѧ бл҃года́ть во ᲂу҆стна́хъ твои́хъ прпⷣбне ѻ҆́тче, и҆́мⷬ҇къ, и҆ бы́лъ є҆сѝ па́стырь хрⷭ҇то́вы цр҃кве, ᲂу҆чѧ̀ словє́сныѧ ѻ҆́вцы вѣ́ровати въ трⷪ҇цꙋ є҆диносꙋ́щнꙋю во є҆ди́номъ бж҃ествѣ̀.
Бг҃оро́диченъ: Никто́же притека́ѧ къ тебѣ̀, посра́мленъ ѿ тебѐ и҆схо́дитъ, пречⷭ҇таѧ бцⷣе дв҃о: но про́ситъ бл҃года́ти, и҆ прїе́млетъ дарова́нїе къ поле́зномꙋ проше́нїю.
Крⷭ҇тобг҃оро́диченъ: Пречⷭ҇таѧ, ꙗ҆́кѡ ви́дѣ тебѐ на крⷭ҇тѣ̀ повѣ́шена, пла́чꙋщи вопїѧ́ше мт҃рски: сн҃е мо́й и҆ бж҃е мо́й, сладча́йшее моѐ ча́до, ка́кѡ терпи́ши стрⷭ҇ть поно́снꙋю;
А҆́ще пра́зднꙋеши съ полѷеле́емъ, глаго́ли бг҃оро́диченъ воскрⷭ҇ный: Кто̀ тебѐ не ᲂу҆бл҃жи́тъ:
Вхо́дъ. Прокі́менъ днѐ.
Чтє́нїѧ преподо́бничєскаѧ, [пи̑сана въ концѣ̀ кни́ги сеѧ̀.]
На стїхо́внѣ стїхи̑ры, гла́съ и҃.
Подо́бенъ: Ѽ пресла́внагѡ чꙋдесѐ!
Ѻ҆́тче всемꙋ́дре, и҆́мⷬ҇къ, ꙳ цр҃ковь хрⷭ҇то́вꙋ ꙳ ᲂу҆ѧсни́лъ є҆сѝ пѣ́сньми, ꙳ бж҃е́ствєннаѧ поѧ̀ пресла́вне, ꙳ дѣ́йствомъ ѻ҆́тче дх҃а твою̀ цѣвни́цꙋ ᲂу҆дарѧ́ѧ, ꙳ всеподо́бнѣй дв҃довѣ подо́бѧсѧ: ꙳ є҆́юже возглаша́ѧ, ꙳ бж҃е́ственными пѣ́сньми всѧ̑ привле́клъ є҆сѝ.
Сті́хъ: Чⷭ҇тна̀ пред̾ гдⷭ҇емъ сме́рть преподо́бныхъ є҆гѡ̀.
Ѻ҆́тче пресла́вне, и҆́мⷬ҇къ, мїрскі́ѧ ѿстꙋ́пль мѧте́жныѧ молвы̀, ꙳ ко хрⷭ҇то́вѣ прите́клъ є҆сѝ тишинѣ̀ прпⷣбне, ꙳ и҆ видѣ̑нїи бж҃е́ственныхъ дѣѧ́нїй, ꙳ всебога́тыми ꙗ҆́вѣ свѣтлостьмѝ, ꙳ вои́стиннꙋ ѡ҆богати́лсѧ є҆сѝ, ꙳ и҆ вѣ̑рнымъ пре́далъ є҆сѝ, ꙳ бг҃олѣ́пнымъ сїѧ́ѧ ꙳ житїе́мъ пребл҃же́нне.
<<рм҃а: 281>>
Сті́хъ: Бл҃же́нъ мꙋ́жъ боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀.
Прїиди́те земноро́днїи, ꙳ пѣ́сньми сщ҃е́нное и҆ чтⷭ҇но́е ꙳ прпⷣбнагѡ торжество̀, и҆́мⷬ҇къ, ꙳ дне́сь бл҃гоче́стнѡ воспои́мъ: ꙳ се́ бо вои́стиннꙋ бж҃е́ственнагѡ сїѧ́нїѧ ꙳ сподо́бисѧ свѣ́тъ прїѧ́ти. ꙳ ѽ неизрече́ннагѡ бл҃госе́рдїѧ твоегѡ̀ влⷣко гдⷭ҇и, ꙳ и҆́мже мы̀ позна́хомъ, ꙳ сла́вити тѧ̀ пребл҃га́го!
Сла́ва, гла́съ и҃:
Мона́хѡвъ мно́жєства, наста́вника тѧ̀ почита́емъ ѻ҆́тче на́шъ, и҆́мⷬ҇къ: твое́ю бо стезе́ю вои́стиннꙋ пра́вѡ ходи́ти позна́хомъ, бл҃же́нъ є҆сѝ хрⷭ҇тꙋ̀ рабо́тавъ, и҆ вра́жїю ѡ҆бличи́лъ є҆сѝ си́лꙋ, а҆́гг҃лѡвъ собесѣ́дниче, прпⷣбныхъ соприча́стниче и҆ пра́ведныхъ, съ ни́миже моли́сѧ гдⷭ҇ви, поми́ловатисѧ дꙋша́мъ на́шымъ.
И҆ ны́нѣ, бг҃оро́диченъ воскрⷭ҇нъ: Безневѣ́стнаѧ дв҃о:
А҆́ще ли не пра́зднꙋеши, глаго́ли се́й бг҃оро́диченъ:
А҆́зъ дв҃о ст҃а́ѧ бцⷣе, къ покро́вꙋ твоемꙋ̀ прибѣга́ю: вѣ́мъ, ꙗ҆́кѡ ѡ҆брѧ́щꙋ тобо́ю сп҃се́нїе: мо́жеши бо чⷭ҇таѧ, помощѝ мнѣ̀.
Крⷭ҇тобг҃оро́диченъ: Ю҆́ница нескве́рнаѧ, ю҆нца̀ ви́дѧщи на дре́вѣ пригвожда́ема во́лею, рыда́ющи жа́лостнѣ, ᲂу҆вы̀ мнѣ̀ вопїѧ́ше, люби́мѣйшее ча́до! что́ ти со́нмъ воздадѐ безблагода́тный є҆вре́йскїй, хотѧ́ мѧ ѡ҆безча́дствовати ѿ тебѐ вселюбе́зне;
Тропа́рь во ᲂу҆ста́вѣ.
А҆́ще ли нѣ́сть ᲂу҆ста́ва, глаго́ли се́й тропа́рь, гла́съ и҃:
Правосла́вїѧ наста́вниче, бл҃гоче́стїѧ ᲂу҆чт҃лю и҆ чтⷭ҇оты̀, вселе́нныѧ свѣти́льниче, а҆рхїере́євъ бг҃одꙋхнове́нное ᲂу҆добре́нїе, и҆́мⷬ҇къ, премꙋ́дре, ᲂу҆че́ньми твои́ми всѧ̑ просвѣти́лъ є҆сѝ, цѣвни́це дх҃о́внаѧ. молѝ хрⷭ҇та̀ бг҃а сп҃сти́сѧ дꙋша́мъ на́шымъ.
Сла́ва, и҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.
<<рм҃а ѡ҆б.: 282>>
На ᲂу҆́трени,
на Бг҃ъ гдⷭ҇ь, тропа́рь то́йже.
По а҃-й каѳі́смѣ, сѣда́ленъ, гла́съ д҃.
Подо́бенъ: Вознесы́йсѧ:
Земны́хъ и҆ тлѣ́нныхъ наслажде́нїѧ, и҆ мі́ра красоты̀, и҆ пи́щи вре́менныѧ небре́глъ є҆сѝ, въ пꙋсты́ни житїѐ возлюби́лъ є҆сѝ: ѿсю́дꙋ сподо́билсѧ є҆сѝ мч҃нческомꙋ и҆ по́стническомꙋ ли́кꙋ сочета́тисѧ. съ ни́миже молѝ сп҃стѝ рабы̑ твоѧ̑. [Два́жды.]
Сла́ва, и҆ ны́нѣ, бг҃оро́диченъ:
Чтⷭ҇аѧ, всенепоро́чнаѧ и҆ неискꙋсобра́чнаѧ, є҆ди́на безлѣ́тнаго сн҃а и҆ сло́ва бж҃їѧ въ лѣ́тѣ ро́ждшаѧ: того̀ со ст҃ы́ми и҆ честны́ми а҆пⷭ҇лы, мч҃нки и҆ прⷪ҇ро́ки и҆ прпⷣбными, молю̀ дарова́ти на́мъ ѡ҆чище́нїе, и҆ ве́лїю млⷭ҇ть.
По в҃-й каѳі́смѣ сѣда́ленъ, гла́съ д҃:
Подо́бенъ: Ско́рѡ предварѝ:
Хрⷭ҇тꙋ̀ послѣ́довавъ, мі́ръ ѡ҆ста́вилъ є҆сѝ, и҆ пло́ть покори́въ воздержа́нїемъ ꙗ҆́вѣ, пребл҃же́нне, и҆́мⷬ҇къ, ѿѻнꙋ́дꙋже сщ҃е́нїѧ пома́занїе и҆мѣ́лъ є҆сѝ. ны́нѣ же къ невеще́ствєннымъ преста́вилсѧ є҆сѝ ликѡ́мъ, молѧ̀ ѡ҆ всѣ́хъ на́съ восхвалѧ́ющихъ тѧ̀. [Два́жды.]
Сла́ва, и҆ ны́нѣ, бг҃оро́диченъ:
Є҆ди́на ро́ждшаѧ творца̀ всѣ́хъ, є҆ди́на ᲂу҆краси́вшаѧ человѣ́чество ржⷭ҇тво́мъ твои́мъ пречⷭ҇таѧ, и҆зба́ви мѧ̀ сѣ́тей льсти̑вагѡ велїа́ра: поста́ви мѧ̀ на ка́мени хрⷭ҇то́выхъ хотѣ́нїй, того̀ молѧ́щи прилѣ́жнѡ, є҆го́же воплоти́ла є҆сѝ.
По Хвали́те и҆́мѧ гдⷭ҇не,
припѣ́въ свѧщенноисповѣ́дникꙋ:
Велича́емъ тѧ̀ ст҃и́телю ѻ҆́тче, и҆́мⷬ҇къ:
Ѱало́мъ: Оу҆слы́шите сїѧ̑ всѝ ꙗ҆зы́цы:
Прпⷣбноисповѣ́дникꙋ же припѣ́въ:
Оу҆бл҃жа́емъ тѧ̀ прпⷣбне ѻ҆́тче, и҆́мⷬ҇къ:
Ѱало́мъ: Терпѧ̀ потерпѣ́хъ:
<<рм҃в: 283>>
По полѷеле́и сѣда́ленъ, гла́съ г҃:
Подо́бенъ: Бж҃е́ственныѧ вѣ́ры:
Бж҃е́ственнымъ дх҃омъ просвѣще́нъ, проповѣ́далъ є҆сѝ со дерзнове́нїемъ правосла́вїѧ преда́нїе, всеблаже́нне, и҆́мⷬ҇къ, и҆ мꙋчи́телѧ беззако́нна посрами́лъ є҆сѝ, въ заточє́нїѧ непра́веднѡ ѿсыла́емь: ѻ҆́тче прпⷣбне, хрⷭ҇та̀ бг҃а молѝ, грѣхѡ́въ ѡ҆ставле́нїе пода́ти, чтꙋ́щымъ любо́вїю ст҃ꙋ́ю па́мѧть твою̀. [Два́жды.]
Сла́ва, и҆ ны́нѣ, бг҃оро́диченъ:
Кі́йждо и҆дѣ́же сп҃са́етсѧ, та́мѡ пра́веднѡ и҆ притека́етъ: и҆ ко́е и҆но́е таково́е прибѣ́жище, ꙗ҆́кѡ ты̀ бцⷣе, покрыва́ющее дꙋ́шы на́шѧ;
Степє́нна, а҃-й а҆нтїфѡ́нъ д҃-гѡ гла́са.
Прокі́менъ: Чтⷭ҇на̀ пред̾ гдⷭ҇емъ сме́рть прпⷣбныхъ є҆гѡ̀.
Сті́хъ: Что̀ возда́мъ гдⷭ҇ви ѡ҆ всѣ́хъ, ꙗ҆̀же воздаде́ ми;
Всѧ́кое дыха́нїе:
Є҆ѵⷢ҇лїе, пи́сано въ концѣ̀ кни́ги сеѧ̀.
По н҃-мъ ѱалмѣ̀, стїхи́ра, гла́съ ѕ҃.
Прпⷣбне ѻ҆́тче, во всю̀ зе́млю и҆зы́де вѣща́нїе и҆справле́нїй твои́хъ: тѣ́мъ на нб҃сѣ́хъ ѡ҆брѣ́лъ є҆сѝ мздꙋ̀ трꙋдѡ́въ твои́хъ, де́монѡвъ погꙋби́лъ є҆сѝ полкѝ, а҆́гг҃лѡвъ пости́глъ є҆сѝ чи́ны, и҆́хже житїю̀ непоро́чнѡ поревнова́лъ є҆сѝ: дерзнове́нїе и҆мѣ́ѧ ко хрⷭ҇тꙋ̀ бг҃ꙋ, ми́ръ и҆спросѝ дꙋша́мъ на́шымъ.
Канѡ́нъ, гла́съ ѕ҃.
Пѣ́снь а҃.
І҆рмо́съ: Ꙗ҆́кѡ по сꙋ́хꙋ пѣшеше́ствовавъ і҆и҃ль, по бе́зднѣ стопа́ми, гони́телѧ фараѡ́на ви́дѧ потоплѧ́ема, бг҃ꙋ побѣ́днꙋю пѣ́снь пои́мъ вопїѧ́ше.
Всемы́сленнѡ тебѐ сп҃се возлюбѝ сщ҃е́нный, и҆́мⷬ҇къ, ко страда́нїю приложи́всѧ крѣ́пкѡ, скѡ́рби и҆ болѣ̑зни и҆ по́двиги терпѧ̀, до́ндеже ѡ҆брѣ́те пи́щꙋ безконе́чнꙋю.
Кро́вными кроплє́нїи сла́ное невѣ́рствїѧ мо́ре ᲂу҆толи́лъ є҆сѝ: рѣка̀ бы́лъ є҆сѝ хрⷭ҇то́ва, напаѧ́ѧ вои́стиннꙋ цр҃ковь при́снѡ.
<<рм҃в ѡ҆б.: 284>>
Распростє́ртыѧ по́двиги на землѝ, прине́слъ є҆сѝ бг҃ꙋ сла́вне, и҆́мⷬ҇къ, и҆ црⷭ҇твїѧ нбⷭ҇нагѡ сподо́бивсѧ вѣнцы̀ прїѧ́ти, и҆ вѣ́чнꙋющїй живо́тъ нерꙋши́мый.
Бг҃оро́диченъ: Оу҆кра́шена добро́тою добродѣ́телей, бг҃омт҃и чтⷭ҇аѧ, бг҃а и҆́стиннаго добродѣ́тель зачала̀ є҆сѝ, на́съ бж҃е́ственными добродѣ́тельми просвѣти́вшаго.
Пѣ́снь г҃
І҆рмо́съ: Нѣ́сть ст҃ъ, ꙗ҆́коже ты̀ гдⷭ҇и бж҃е мо́й, вознесы́й ро́гъ вѣ́рныхъ твои́хъ, бл҃же, и҆ ᲂу҆тверди́вый на́съ на ка́мени и҆сповѣ́данїѧ твоегѡ̀.
Ни вѣ́ждома дрема́нїѧ, ни ѻ҆чи́ма сна̀ вда́лъ є҆сѝ прпⷣбне ѻ҆́тче, и҆́мⷬ҇къ, до́ндеже до́мъ ꙗ҆ви́лсѧ є҆сѝ ст҃ы́ѧ трⷪ҇цы, и҆ премꙋ́дрости сокро́вище, мі́ръ ѡ҆богаща́ѧ златоза́рными ᲂу҆чє́нїи бл҃же́нне.
Бж҃е́ственныхъ повелѣ́нїй храни́тель бы́въ бг҃омꙋ́дре, и҆́мⷬ҇къ, въ темни́цахъ затворе́нъ бы́лъ є҆сѝ, ѿверза́ѧ вѣ̑рнымъ затво́ръ ᲂу҆чи́тельнагѡ пꙋтѝ, на широтꙋ̀ ра́зꙋма вводѧ́щагѡ.
Си́лою бж҃е́ственною ᲂу҆крѣпи́всѧ, безкрѣ́постнꙋю де́рзость беззако́нныхъ низложи́лъ є҆сѝ, и҆сповѣ́данїемъ тве́рдымъ, всесщ҃е́нный, и҆́мⷬ҇къ, страда́льче, ꙗ҆́кѡ ѻ҆рꙋ́жникъ бж҃е́ственнагѡ полка̀.
Бг҃оро́диченъ: Премꙋ́дрость и҆ сло́во ѻ҆́ч҃ее, пре́жде сы́й всѣ́хъ вѣ̑къ, въ послѣ̑днѧѧ лѣ̑та неизрече́ннѡ воплоти́выйсѧ ѿ неискꙋсобра́чныѧ тебѐ мт҃ре, бцⷣꙋ тѧ̀ содѣ́ла.
Сѣда́ленъ, гла́съ д҃.
Подо́бенъ: Ꙗ҆ви́лсѧ є҆сѝ дне́сь:
Сла́вное сл҃нце, ꙗ҆́кѡ денни́цꙋ на высотѣ̀ поста́ви тѧ̀ свое́й цр҃кви, вѣ̑рныѧ просвѣща́ѧ словесы̀ твои́ми, нбⷭ҇ный таи́нниче, и҆́мⷬ҇къ, бг҃омꙋ́дре ѻ҆́тче на́шъ.
Сла́ва, и҆ ны́нѣ, бг҃оро́диченъ:
Чтⷭ҇аѧ всенепоро́чнаѧ, и҆ неискꙋсобра́чнаѧ, є҆ди́на безлѣ́тнаго сн҃а и҆ сло́ва бж҃їѧ, въ лѣ́тѣ ро́ждшаѧ: того̀ со ст҃ы́ми и҆ чⷭ҇тны́ми а҆пⷭ҇лы, мч҃нки, и҆ прⷪ҇ро́ки, и҆ прпⷣбными, молѝ дарова́ти на́мъ ѡ҆чище́нїе и҆ ве́лїю млⷭ҇ть.
<<рм҃г: 285>>
Крⷭ҇тобг҃оро́диченъ: На крⷭ҇тѣ́ тѧ воздви́жена ꙗ҆́кѡ ᲂу҆зрѣ̀ пречⷭ҇таѧ мт҃и твоѧ̀ сло́ве бж҃їй, мт҃рски рыда́ющи вѣща́ше: что̀ но́вое и҆ стра́нное сн҃е мо́й, чꙋ́до; ка́кѡ жи́знь всѣ́хъ приближа́ешисѧ сме́рти, ѡ҆живи́ти хотѧ̀ ᲂу҆ме́ршыѧ, ꙗ҆́кѡ млⷭ҇рдъ;
Пѣ́снь д҃.
І҆рмо́съ: Хрⷭ҇то́съ моѧ̀ си́ла, бг҃ъ и҆ гдⷭ҇ь, чтⷭ҇на́ѧ цр҃ковь бг҃олѣ́пнѡ пое́тъ взыва́ющи, ѿ смы́сла чи́ста ѡ҆ гдⷭ҇ѣ пра́зднꙋющи.
Копїе́мъ словесы̀ твои́ми безбо́жїе пронзи́лъ є҆сѝ, и҆ страда̑нїи твои́ми ꙗ҆́кѡ мече́мъ бѣсѡ́вскїѧ полкѝ побѣди́лъ є҆сѝ, и҆́хже ѕло́бы и҆зба́ви чтꙋ́щыѧ тѧ̀ всехва́льне, и҆́мⷬ҇къ.
Не жрꙋ̀ бѣсѡ́мъ, ни ᲂу҆страша́юсѧ сме́рти, ни мꙋ́къ веще́й, сщ҃енномч҃нкъ, и҆́мⷬ҇къ, взыва́ше: но є҆ди́наго бг҃а и҆сповѣ́дꙋю въ трⷪ҇цѣ познава́ема.
Ви́дѣвъ гдⷭ҇и твоегѡ̀ смире́нїѧ пресла́внꙋю высотꙋ̀, свы́ше строе́нїѧ тебѣ̀ сло́во да́рꙋетъ: и҆́мже є҆ресе́й лю̑таѧ смири́шасѧ возношє́нїѧ, ѻ҆́тче.
Бг҃оро́диченъ: Ꙗ҆́кѡ две́рь приводѧ́щꙋю къ бж҃е́ственномꙋ вхо́дꙋ, ꙗ҆́кѡ ра́й бж҃е́ственный, ꙗ҆́кѡ мы́сленное мѣ́сто сщ҃е́нїѧ, ꙗ҆́кѡ добро́тꙋ і҆а́кѡвлю дв҃ꙋ ᲂу҆бл҃жа́емъ.
Пѣ́снь є҃.
І҆рмо́съ: Бж҃їимъ свѣ́томъ твои́мъ, бл҃же, ᲂу҆́тренюющихъ тѝ дꙋ́шы любо́вїю ѡ҆зарѝ, молю́сѧ, тѧ̀ вѣ́дѣти сло́ве бж҃їй, и҆́стиннаго бг҃а, ѿ мра́ка грѣхо́внагѡ взыва́юща.
Сле́зъ твои́хъ тече́нїемъ всемꙋ́дре ѻ҆́тче, и҆́мⷬ҇къ, сласте́й и҆зсꙋши́лъ є҆сѝ пꙋчи́нꙋ, и҆ и҆зли́тїемъ ᲂу҆че́нїй твои́хъ є҆ресе́й пото́ки бл҃же́нне загради́лъ є҆сѝ.
Цр҃ковь бы́лъ є҆сѝ вмѣсти́тельна ѻ҆́тче, и҆́мⷬ҇къ, трⷪ҇цѣ вои́стиннꙋ, ᲂу҆кра́шенъ бл҃года́тїю, и҆ ѡ҆заре́нїемъ честны́хъ добродѣ́телей, и҆ ᲂу҆чи́тельнымъ смире́нїемъ.
Терпѣ́нїемъ твои́мъ низложи́въ всѧ̑ шата̑нїѧ лꙋка́вагѡ, тогѡ̀ вре́да мѧ̀ и҆зба́ви, бо́дра всѧ́чески содѣва́ѧ, стезѧ́ми приводѧ́щими къ бг҃ꙋ сла́вне, и҆́мⷬ҇къ.
<<рм҃г ѡ҆б.: 286>>
Бг҃оро́диченъ: Пое́мъ, всечⷭ҇таѧ, и҆з̾ тебѐ пло́ть стрⷭ҇тнꙋю и҆ сме́ртнꙋю на́съ ра́ди прїе́мшаго, и҆ ви́димо ржⷭ҇тво̀ смѣ́шеною несли́тною ѵ҆поста́сїю.
Пѣ́снь ѕ҃.
І҆рмо́съ: Жите́йское мо́ре, воздвиза́емое зрѧ̀ напа́стей бꙋ́рею, къ ти́хомꙋ приста́нищꙋ твоемꙋ̀ прите́къ, вопїю́ ти: возведѝ ѿ тлѝ живо́тъ мо́й, многомлⷭ҇тиве.
Свѣти́ло бы́въ страда́нїй твои́хъ свѣ́томъ просвѣща́ѧ концы̀, и҆сповѣ́далъ є҆сѝ и҆́мѧ хрⷭ҇то́во пред̾ мꙋчи́тєли стрⷭ҇тоте́рпче гдⷭ҇нь всехва́льне, и҆́мⷬ҇къ.
Ѧ҆зы́къ тво́й ꙗ҆́кѡ тро́сть скоропи́сца кни́жника, вои́стиннꙋ бы́сть, и҆сповѣ́даѧ ра́зꙋмъ всече́стенъ, въ скрижа́лѣхъ серде́цъ начерта́ѧй ѻ҆́тче, и҆́мⷬ҇къ, зако́на дꙋхо́внагѡ.
Твоегѡ̀ пла́вающїи поꙋче́нїѧ стѧжава́юще тишинꙋ̀, ѻ҆́тче бг҃оглаго́ливе, пꙋчи́ны треволне́нїѧ и҆збавлѧ́ютсѧ дꙋшевре́днагѡ, и҆ ѿ и҆ны́хъ є҆ресе́й приходѧ́щїи вѣ́рою сп҃са́ютсѧ.
Бг҃оро́диченъ: Дх҃ъ ст҃ы́й на тѧ̀, чтⷭ҇аѧ, дѣ́вства храни́ло наше́дъ, содѣ́ла чтⷭ҇но́е селе́нїе всенепоро́чнаѧ сн҃а вы́шнѧгѡ всебл҃же́ннаѧ.
Конда́къ во ᲂу҆ста́вѣ.
А҆́ще ли нѣ́сть ᲂу҆ста́ва, глаго́ли се́й конда́къ, гла́съ в҃:
Наслади́всѧ бг҃омꙋ́дре воздержа́нїѧ, и҆ жела́нїѧ плѡтска́ѧ ты̀ ᲂу҆спи́лъ є҆сѝ, ꙗ҆ви́всѧ вѣ́рою возраща́емь, и҆ ꙗ҆́кѡ живота̀ дре́во ра́йское процвѣ́лъ є҆сѝ, и҆́мⷬ҇къ, ѻ҆́тче сщ҃е́нный.
І҆́косъ: Ѿве́рзи мѝ ᲂу҆стнѣ̀ пресщ҃е́нне, бг҃опрїѧ́тными твои́ми мл҃твами, предстоѧ̀ бг҃ꙋ всесла́вне прпⷣбне мч҃нче, да воспою̀ бл҃же́нное твоѐ житїѐ, и҆ возглаго́лю досто́йнѡ добродѣ́тєли твоѧ̑, ꙗ҆̀же на землѝ те́плою любо́вїю соверши́лъ є҆сѝ: и҆сповѣ́дникъ бо бы́лъ є҆сѝ крѣ́покъ, воздержа́нїе вѣ́рою и҆спра́вивъ, бдѣ́нїе и҆ чистотꙋ̀ возлюби́лъ є҆сѝ, и҆́мⷬ҇къ, ѻ҆́тче сщ҃е́нный.
Пѣ́снь з҃.
І҆рмо́съ: Росода́тельнꙋ ᲂу҆́бѡ пе́щь содѣ́ла а҆́гг҃лъ прпⷣбнымъ ѻ҆трокѡ́мъ, халдє́и же ѡ҆палѧ́ющее велѣ́нїе бж҃їе, мꙋчи́телѧ ᲂу҆вѣща̀ вопи́ти: бл҃гослове́нъ є҆сѝ, бж҃е ѻ҆тє́цъ на́шихъ.
<<рм҃д: 287>>
Ꙗ҆́кѡ пресвѣ́тло житїѐ твоѐ бы́сть бг҃омꙋ́дре поще́нїѧ ра́ди, та́кѡ ꙗ҆ви́сѧ твоѐ страда́нїе тве́рдо: хрⷭ҇та́ бо просла́вилъ є҆сѝ ꙗ҆́вѣ, вопїѧ̀: бл҃гослове́нъ бг҃ъ ѻ҆тє́цъ на́шихъ.
Цѣломꙋ́дрїѧ чистоты̀ препоѧ́савсѧ мꙋ́жествомъ, бг҃оꙋго́дный ѻ҆́тче, и҆́мⷬ҇къ, и҆ мꙋче́нїѧ вѣне́цъ свѣ́телъ воспрїи́мъ бл҃года́тїю, вопїѧ́лъ є҆сѝ: бл҃гослове́нъ бг҃ъ ѻ҆тє́цъ на́шихъ.
Некла́нѧющїисѧ пречⷭ҇тѣй і҆кѡ́нѣ твое́й, сп҃се, нечести́вїи слꙋгꙋ̀ твоего̀ многора́ннѡ ѡ҆скорблѧ́хꙋ, при́снѡ глаго́люща, и҆ вопїю́ща къ тебѣ̀: бл҃гослове́нъ бг҃ъ ѻ҆тє́цъ на́шихъ.
Бг҃оро́диченъ: Сѣдѧ́й въ нѣ́дрѣхъ роди́тельныхъ неѡпи́санъ пречⷭ҇таѧ, ны́нѣ же ѿ твои́хъ нѣ́дръ произше́дъ сѣди́тъ ѡ҆пи́санъ, твоемꙋ̀ подо́бѧсѧ ѡ҆́бразꙋ, за є҆́же сп҃стѝ а҆да́ма, а҆да́мъ бы́въ.
Пѣ́снь и҃.
І҆рмо́съ: И҆з̾ пла́мене прпⷣбнымъ ро́сꙋ и҆сточи́лъ є҆сѝ, и҆ првⷣнагѡ же́ртвꙋ водо́ю попали́лъ є҆сѝ: всѧ̑ бо твори́ши, хрⷭ҇тѐ, то́кмѡ є҆́же хотѣ́ти. тѧ̀ превозно́симъ во всѧ̑ вѣ́ки.
Свѣтоно́сно показа́лсѧ є҆сѝ, ꙗ҆́коже дрꙋго́е со́лнце, поꙋче́нїе посыла́ѧ концє́мъ, тьмꙋ̀ несвѣтѧ́щꙋю всѧ́кагѡ грѣха̀ ѿима́ѧ бл҃же́нне, и҆́мⷬ҇къ, свѣ́томъ покаѧ́нїѧ.
Стрꙋѧ́ми бж҃е́ственныхъ ᲂу҆че́нїй ѡ҆гражда́емь, рѣка̀ ꙗ҆́коже ѿ дрꙋга́гѡ є҆де́ма и҆зше́лъ є҆сѝ, лицѐ землѝ напоѧ́ѧ бг҃оꙋго́дниче, и҆́мⷬ҇къ, и҆ нече́стїѧ пле́вєлы потоплѧ́ѧ.
Оу҆красова́лсѧ є҆сѝ всебл҃же́нне добро́тою слове́съ твои́хъ, ст҃а́гѡ бо дх҃а ꙗ҆ви́лсѧ є҆сѝ тро́сть, написꙋ́ѧ вѣ̑рнымъ бл҃гочести́внѡ ра́зꙋмъ бж҃е́ственный, превозносѧ̀ хрⷭ҇та̀ во вѣ́ки.
Бг҃оро́диченъ: Ко твоемꙋ̀ прибѣга́ю покро́вꙋ всенепоро́чнаѧ, и҆ застꙋпле́нїе ны́нѣ животꙋ̀ моемꙋ̀ тѧ̀ предлага́ю, ꙗ҆́же па́че ᲂу҆ма̀ бг҃а сло́ва ро́ждшаѧ: є҆го́же превозно́симъ во вѣ́ки.
Пѣ́снь ѳ҃.
І҆рмо́съ: Бг҃а человѣ́кѡмъ невозмо́жно ви́дѣти, на него́же не смѣ́ютъ чи́ни а҆́гг҃льстїи взира́ти: тобо́ю же, всечⷭ҇таѧ, ꙗ҆ви́сѧ человѣ́кѡмъ сло́во воплоще́нно, є҆го́же велича́юще, съ нбⷭ҇ными вѡ́и тѧ̀ ᲂу҆бл҃жа́емъ.
<<рм҃д ѡ҆б.: 288>>
Ꙗ҆́кѡ свѣ́тъ, ꙗ҆́кѡ лꙋна̀, ꙗ҆́кѡ вели́кое со́лнце, ꙗ҆́кѡ мо́лнїѧ хрⷭ҇то́вѣ цр҃кви возсїѧ́въ, и҆ вѣ́рныхъ мы̑сли просвѣти́лъ є҆сѝ, въ невече́рнѣмъ свѣ́тѣ всели́всѧ, поѧ̀ трист҃ы́ми гла́сы трⷪ҇цꙋ несозда́ннꙋю.
Землѧ̀ ст҃ы́мъ гро́бомъ ѡ҆богати́сѧ, и҆́мⷬ҇къ, и҆ сщ҃е́ннымъ всехва́льне твои́мъ тѣ́ломъ, и҆ првⷣныхъ взыгра́шасѧ дꙋ́си, а҆́гг҃ли же, бл҃же́нне, дꙋ́хъ тво́й прїѧ́ша: съ ни́миже всѣ́хъ на́съ помина́й пою́щихъ тебѐ.
Хра́мъ дх҃а прест҃а́гѡ бы́въ, и҆ рѣка̀ во́дъ живо́тныхъ наполнѧ́ема, и҆ цр҃кве ѡ҆снова́нїе недви́жимое, степе́нь правосла́вїѧ, стрꙋѧ̀ приснотекꙋ́щаѧ, бж҃е́ственнагѡ покаѧ́нїѧ и҆сто́чникъ достоди́вный, и҆́мⷬ҇къ.
Бг҃оро́диченъ: Ꙗ҆́коже ка́плѧ нбⷭ҇наѧ во твоѐ чре́во, дв҃о, до́ждь сни́де, и҆ и҆зсꙋшѝ лє́стнаѧ течє́нїѧ, и҆сточи́въ нетлѣ̑нїѧ и҆ и҆збавлє́нїѧ всѣ̑мъ человѣ́кѡмъ, тобо́ю бг҃обл҃года́тнаѧ.
Свѣти́ленъ.
Страда́нїе ᲂу҆́бѡ пе́рвѣе до́брѣ и҆скꙋси́всѧ, второ́е посто́мъ тече́нїе бж҃е́ственное соверши́въ, на нб҃са̀ возше́лъ є҆сѝ, и҆ хрⷭ҇тꙋ̀ предстои́ши, и҆́мⷬ҇къ, ѻ҆́тче прпⷣбне: за на́съ моли́сѧ те́плѣ пою́щихъ тѧ̀.
Бг҃оро́диченъ: Ра́дость неизрече́ннꙋю ро́ждши гдⷭ҇а, ра́дости на́съ нбⷭ҇ныѧ прича́стники сотворѝ, всѣ́хъ тебѐ почита́ющихъ пречⷭ҇таѧ, и҆ бл҃годаре́нїе ѿ дꙋшѝ приносѧ́щихъ тебѣ̀: не забꙋ́ди рабѡ́въ твои́хъ, бл҃гослове́ннаѧ мр҃і́е.
На хвали́техъ стїхи̑ры, гла́съ д҃.
Подо́бенъ: Да́лъ є҆сѝ зна́менїе:
Бл҃года́ть дх҃а, ѻ҆́тче и҆́мⷬ҇къ, ꙳ тебѣ̀ возсїѧ́вши, ꙳ свѣ́тлѡ просвѣти́ тѧ: ꙳ ѿсю́дꙋ ᲂу҆ма́лилъ є҆сѝ страсте́й но́щь, ꙳ и҆ безстра́стїѧ де́нь пости́глъ є҆сѝ, ꙳ чи́стѣ чистѣ́йшемꙋ свѣ́тꙋ совокꙋ́пльсѧ, ꙳ въ не́мже жи́тельствꙋѧ ꙳ , не забꙋ́ди бг҃огла́се, ꙳ вѣ́рою пою́щихъ сщ҃е́ннꙋю твою̀ па́мѧть. [Два́жды.]
Бл҃года́ть жела́ннꙋю тебѣ̀, ꙳ и҆́мⷬ҇къ, носѧ̀ нбⷭ҇нꙋю, ꙳ земны́хъ небре́глъ є҆сѝ: ꙳ сегѡ̀ ра́ди ꙗ҆́кѡ безпло́тенъ, ꙳ страда́тельное <<рм҃є: 289>> и҆збра́лъ є҆сѝ житїѐ, ꙳ ꙗ҆́кѡ присносꙋ́щныѧ сла́дости пото́ка, ꙳ бл҃гоче́стнѡ наслади́тисѧ хотѧ̀ бг҃опрїѧ́тне, ꙳ и҆ слеза́ми прпⷣбне и҆зсꙋши́лъ є҆сѝ ꙳ мꙋ́тный и҆сто́чникъ страсте́й, ꙳ и҆ напои́лъ є҆сѝ дꙋшепи̑щныѧ кла́сы. ꙳
Бл҃года́ть и҆сцѣле́нїй, и҆́мⷬ҇къ, ꙳ ѿ бл҃года́ти бж҃е́ственныѧ досто́йнѡ прїѧ́лъ є҆сѝ: ꙳ ѿсю́дꙋ дꙋхѡ́въ тебѣ̀ лꙋка́выхъ ꙳ низлага́етсѧ пре́лесть, ꙳ и҆ недꙋ̑гъ неꙋдо́бныхъ тлѝ ѿбѣ́гъ преше́лъ є҆сѝ: ꙳ и҆сточа́еши бо прпⷣбне ꙗ҆́кѡ во́ды бл҃года̑тныѧ твоѧ̑ стрꙋи̑, ѿ ни́хже напоѧ́еми, ꙳ воспѣва́емъ па́мѧть твою̀.
Сла́ва, гла́съ є҃.
Прпⷣбне ѻ҆́тче, не да́лъ є҆сѝ сна̀ твои́ма ѻ҆чи́ма, ни вѣ́ждома твои́ма дрема́нїѧ, до́ндеже дꙋ́шꙋ и҆ тѣ́ло ѿ страсте́й свободи́лъ є҆сѝ, и҆ тебѐ сама́го ᲂу҆гото́валъ є҆сѝ дх҃ꙋ жили́ще: прише́дъ бо хрⷭ҇то́съ со ѻ҆ц҃е́мъ, ѻ҆би́тель ᲂу҆ тебѐ сотворѝ, и҆ є҆диносꙋ́щныѧ трⷪ҇цы ᲂу҆го́дникъ бы́въ, великопроповѣ́дниче ѻ҆́тче на́шъ, и҆́мⷬ҇къ, моли́сѧ ѡ҆ дꙋша́хъ на́шихъ.
И҆ ны́нѣ, бг҃оро́диченъ:
Бл҃жи́мъ тѧ̀ бцⷣе дв҃о, и҆ сла́вимъ тѧ̀ вѣ́рнїи по до́лгꙋ, гра́дъ непоколеби́мый, стѣ́нꙋ неѡбори́мꙋю, тве́рдꙋю предста́тельницꙋ, и҆ прибѣ́жище дꙋ́шъ на́шихъ.
Крⷭ҇тобг҃оро́диченъ: Зрѧ́щи дре́вле а҆́гнца и҆ сн҃а своего̀, дв҃а мт҃и и҆ всебл҃же́ннаѧ ѻ҆трокови́ца на крⷭ҇тъ воздви́жена, вопїѧ́ше слезѧ́щи: ᲂу҆вы̀ мнѣ̀ сн҃е мо́й, ка́кѡ ᲂу҆мира́еши, бг҃ъ є҆стество́мъ сы́й безсме́ртенъ;
А҆́ще и҆́мать на стїхо́внѣ Сла́вꙋ, глаго́ли вече́рнїй.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.