Слꙋ́жба сщ҃енномч҃нкѡмъ
<<ч҃ѕ: 191>>
[глⷡ҇а з҃і] СЛꙊ́ЖБА Ѻ҆́БЩА
сщ҃енномч҃нкѡмъ двѣма̀, и҆ мнѡ́гимъ.
Ве́чера,
на Гдⷭ҇и воззва́хъ, стїхи̑ры, гла́съ а҃.
Подо́бенъ: Всехва́льнїи мч҃нцы:
Ст҃и́тельскꙋю ѻ҆де́ждꙋ ꙳ свѣ́тлѡ вои́стиннꙋ ᲂу҆краси́сте ꙳ мꙋче́нїѧ кро́вїю, ꙳ и҆ ѻ҆бою́дꙋ свѣ́тлѡ ᲂу҆краси́вшесѧ, ꙳ со а҆́гг҃лы зижди́телю предста́сте, ꙳ ᲂу҆го́дницы сла́внїи, ꙳ є҆гѡ́же моли́те, ꙳ дарова́ти дꙋша́мъ на́шымъ ꙳ ми́ръ и҆ ве́лїю млⷭ҇ть.
Бг҃одꙋхновє́нныѧ ѻ҆рга́ны, ꙳ вои́стиннꙋ на́мъ ꙗ҆ви́стесѧ, ꙳ возвѣща́юще неизречє́ннаѧ бж҃їѧ та̑инства ꙳ писа́нїѧ бж҃е́ственнагѡ, ꙳ і҆́дѡльское безꙋ́мїе ѡ҆блича́юще, ꙳ всѣ́хъ ко хрⷭ҇тꙋ̀ приведо́сте. ꙳ є҆го́же моли́те, ꙳ дарова́ти дꙋша́мъ на́шымъ ꙳ ми́ръ и҆ ве́лїю млⷭ҇ть.
Сло́вомъ бг҃оразꙋ́мїѧ ꙳ лю́ди ѿ невѣ́дѣнїѧ премꙋ́дрїи, ꙳ до конца̀ и҆зба́висте, ꙳ и҆ приведо́сте сп҃се́ны сїѧ̑ ꙳ сло́вꙋ возсїѧ́вшемꙋ, ꙳ и҆з̾ ѻ҆ц҃а̀ рожде́нномꙋ хрⷭ҇тꙋ̀ бг҃ꙋ на́шемꙋ: ꙳ томꙋ̀ помоли́тесѧ, ꙳ дарова́ти дꙋша́мъ на́шымъ ꙳ ми́ръ и҆ ве́лїю млⷭ҇ть.
Сла́ва, и҆ ны́нѣ, бг҃оро́диченъ:
Дв҃о всепѣ́таѧ, ю҆́же въ тебѣ̀ та́йнꙋ мѡѷсе́й проро́ческима ви́дѣ ѻ҆чи́ма, кꙋпинꙋ̀ горѧ́щꙋ и҆ неѡпалѧ́емꙋ: бж҃ества́ бо ѻ҆́гнь ᲂу҆тро́бꙋ твою̀ чⷭ҇таѧ, не ѡ҆палѝ. тѣ́мже мо́лимъ тѧ̀, ꙗ҆́кѡ мт҃рь бг҃а на́шегѡ, ми́ръ и҆спроси́ти мі́рови и҆ ве́лїю млⷭ҇ть.
Крⷭ҇тобг҃оро́диченъ: Оу҆ крⷭ҇та̀ твоегѡ̀ предстоѧ́щи, ꙳ сло́ве бж҃їй, ꙳ а҆́гница и҆ непоро́чнаѧ мт҃и твоѧ̀ ꙳ рыда́ющи вопїѧ́ше: ꙳ ᲂу҆вы̀ мнѣ̀, сн҃е, ꙳ ка́кѡ ᲂу҆мира́еши на крⷭ҇тѣ̀; ꙳ ᲂу҆вы̀ мнѣ̀, свѣ́те мо́й сла́дкїй, ꙳ гдѣ̀ твоеѧ̀ добро́ты ꙳ ны́нѣ за́йде зра́къ, ꙳ краснѣ́йшїй па́че всѣ́хъ человѣ̑къ;
<<ч҃ѕ ѡ҆б.: 192>>
А҆́ще и҆́мать самогла́сенъ. Сла́ва, гла́съ и҃:
Ѿ вре́менныхъ крꙋ̑гъ прише́дше бг҃зва́ннїи, седмери́цею бїе́ми, и҆ стрꙋ́жеми преходѧ́ще, и҆ всѝ распина́еми за хрⷭ҇та̀, ни ѻ҆́гнь, ни ра̑ны, ни ѻ҆рꙋ́жїе, дꙋ́шъ ва́шихъ разсла́биша крѣ́пѡсти, и҆ попра́ли є҆стѐ бѣсо́вскꙋю крѣ́пость, сщ҃енномч҃нцы сла́внїи: тѣ́мъ моли́те хрⷭ҇та̀ бг҃а, сп҃стѝ дꙋ́шы на́шѧ.
И҆ ны́нѣ, бг҃оро́диченъ:
А҆́зъ, дв҃о ст҃а́ѧ бцⷣе, къ покро́вꙋ твоемꙋ̀ прибѣга́ю, вѣ́мъ, ꙗ҆́кѡ ѡ҆брѧ́щꙋ тобо́ю сп҃се́нїе: мо́жеши бо чⷭ҇таѧ, помощѝ мнѣ̀.
Крⷭ҇тобг҃оро́диченъ:
Подо́бенъ: Ѽ пресла́внагѡ чꙋдесѐ!
Тѧ̀ ви́дѧщи пригвожда́ема ꙳ на крⷭ҇тѣ̀ і҆и҃се, ꙳ и҆ стрⷭ҇ти прїе́млюща во́лею влⷣко, ꙳ дв҃а и҆ мт҃и твоѧ̀, ꙳ ᲂу҆вы̀ мнѣ̀, вопїѧ́ше, ꙳ ча́до сла́дкое! ра̑ны непра́веднѡ ка́кѡ терпи́ши; ꙳ врачꙋ̀ и҆сцѣли́вый человѣ́ческое неможе́нїе, ꙳ и҆ ѿ тлѝ всѧ̑ и҆зба́вивый ꙳ бл҃гоꙋтро́бїемъ твои́мъ.
А҆́ще ли пра́зднꙋеши съ полѷеле́емъ, глаго́ли бг҃оро́диченъ воскрⷭ҇ный: Цр҃ь нбⷭ҇ный:
Вхо́дъ. Прокі́менъ днѐ.
Чтє́нїѧ г҃, мч҃нчєскаѧ, [пи̑саны въ концѣ̀ кни́ги сеѧ̀].
На стїхо́внѣ стїхи̑ры, гла́съ д҃.
Подо́бенъ: Ꙗ҆́кѡ до́блѧ:
Ꙗ҆́кѡ ѕвѣ́зды многосвѣ̑тлыѧ ꙳ мы́сленнѡ возсїѧ́вше на цр҃ко́внѣй тве́рди, ꙳ всю̀ тва́рь просвѣща́ете, ꙳ тьмꙋ̀ прогонѧ́юще по́двигомъ свѣ́та, ꙳ и҆ чꙋде́съ сїѧ́ньми: ꙳ тѣ́мъ дне́сь веселѧ́щесѧ, ꙳ соверша́емъ свѣтоно́снꙋю ꙳ и҆ ст҃ꙋ́ю ва́шꙋ па́мѧть, ꙳ сщ҃енномч҃нцы сла́внїи.
Сті́хъ: Сщ҃е́нницы твоѝ ѡ҆блекꙋ́тсѧ въ пра́вдꙋ, и҆ прпⷣбнїи твоѝ возра́дꙋютсѧ:
А҆пⷭ҇лѡмъ равноче́стнїи, ꙳ сщ҃еннонача́льницы бы́вше, ꙳ по́мыслъ кꙋпноревни́тельный воспрїе́мше, ꙳ не ᲂу҆боѧ́вшесѧ безбо́жїѧ мꙋчи́тельскагѡ сꙋровства̀: ꙳ но мꙋ́жески и҆ крѣ́пкѡ сп҃са проповѣ́давше ꙳ <<ч҃з: 193>> претерпѣ́сте многоразли̑чныѧ ѕлѡ́бы, ꙳ тогѡ̀ ра́ди бꙋ̑дꙋщаѧ возда̑нїѧ ꙳ ны́нѣ воспрїе́млете, всемꙋ́дрїи.
Сті́хъ: Бл҃же́нъ мꙋ́жъ боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀.
Слꙋ́жбы приносѧ́ще честны̑ѧ всеси́льнїи, ꙳ и҆ же́ртвꙋ непоро́чнꙋю влⷣцѣ хрⷭ҇тꙋ̀ ꙳ всесожжє́нїѧ совершє́нна ꙳ томꙋ̀ принесо́сте себѐ страда́льчески, ꙳ сщ҃еннонача́льницы бл҃же́ннїи: ꙳ є҆го́же моли́те, ꙳ ѿ тлѝ и҆ бѣ́дъ и҆зба́вити ꙳ вѣ́рою соверша́ющихъ ꙳ чтⷭ҇нꙋ́ю па́мѧть ва́шꙋ.
Сла́ва, гла́съ д҃:
Мч҃нцы непобѣди́мїи, і҆ера́рси прехва́льнїи, и҆ свѣти́льницы всемі́рнїи, столпѝ непобори́мїи бж҃е́ственныѧ цр҃кве, и҆ степе́нь ᲂу҆че́нїй, и҆ наста́вницы бл҃гочести́выхъ, и҆ потреби́телїе бы́сте є҆ресе́й, ѻ҆тцы̀ бг҃омꙋ́дреннїи, свѣ́тлїи наста́вницы дꙋ́шъ на́шихъ, а҆́гг҃лѡмъ собесѣ́дницы, и҆ трⷪ҇цѣ побо́рницы.
И҆ ны́нѣ, бг҃оро́диченъ:
Скве́рнꙋ ѿмы́й страстна́гѡ се́рдца моегѡ̀, бцⷣе всепѣ́таѧ, и҆ всѧ̑ ꙗ҆́звы и҆ гноє́нїѧ сегѡ̀, ꙗ҆́же ѿ грѣха̀ ѡ҆чи́сти чⷭ҇таѧ, и҆ ᲂу҆ма̀ моегѡ̀ ᲂу҆ста́ви непостоѧ́нїе: ꙗ҆́кѡ да си́лꙋ твою̀ и҆ вели́кое застꙋпле́нїе велича́ю ѻ҆каѧ́нный непотре́бный ра́бъ тво́й.
Крⷭ҇тобг҃оро́диченъ.
Подо́бенъ: Ꙗ҆́кѡ до́блѧ:
Распина́ема ви́дѧщи, ꙳ и҆ въ ре́бра пробода́ема копїе́мъ, ꙳ пречⷭ҇таѧ, хрⷭ҇та̀ чл҃вѣколю́бца, ꙳ пла́чꙋщи вопїѧ́ше: ꙳ что̀ сїѐ сн҃е мо́й, ꙳ что̀ тебѣ̀ небл҃года́рнїи лю́дїе возда́ша, ꙳ вмѣ́стѡ ꙗ҆́же сотвори́лъ є҆сѝ дѡ́браѧ и҆̀мъ, ꙳ и҆ тщи́шисѧ безча́дствовати мѧ̀ вселюбе́знѣйше; ꙳ дивлю́сѧ, благоꙋтро́бне, твоемꙋ̀ во́льномꙋ распѧ́тїю.
Тропа́рь во ᲂу҆ста́вѣ.
А҆́ще ли нѣ́сть ᲂу҆ста́ва, глаго́ли се́й тропа́рь, гла́съ д҃:
Бж҃е ѻ҆тє́цъ на́шихъ, творѧ́й при́снѡ съ на́ми по твое́й кро́тости, не ѿста́ви млⷭ҇ть твою̀ ѿ на́съ: но мл҃твами и҆́хъ въ ми́рѣ ᲂу҆пра́ви живо́тъ на́шъ.
Сла́ва, и҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.
<<ч҃з ѡ҆б.: 194>>
На ᲂу҆́трени,
на Бг҃ъ гдⷭ҇ь, тропа́рь то́йже.
По а҃-й каѳі́смѣ сѣда́ленъ, гла́съ и҃.
Подо́бенъ: Премꙋ́дрости:
Пꙋчи́ны премꙋ́дрости ᲂу҆ча́ще, дх҃о́вныѧ глꙋбины̀, трⷪ҇ческое є҆ди́но бжⷭ҇тво̀ проповѣ́дали є҆стѐ прпⷣбнїи, и҆списа́вше а҆́гг҃льскїѧ чи́ны, и҆ та̑йны тѣ́хъ сїѧ́нїй бг҃омꙋ́дрїи: тѣ́мъ и҆ ни́жнее ст҃и́тельство ᲂу҆строѧ́юще, ко є҆ди́номꙋ возведо́стесѧ соедине́нїю сщ҃енномч҃нцы. моли́те хрⷭ҇та̀ бг҃а, согрѣше́нїй ѡ҆ставле́нїе дарова́ти, чтꙋ́щымъ любо́вїю ст҃ꙋ́ю па́мѧть ва́шꙋ. [Два́жды.]
Сла́ва, и҆ ны́нѣ, бг҃оро́диченъ:
Сл҃нца ѻ҆́блаче разꙋ́мнагѡ, бжⷭ҇твеннагѡ свѣ́та свѣти́льниче златокова́нный, нескве́рнаѧ, небла́знаѧ, всенепоро́чнаѧ влⷣчце, ѡ҆мраче́ннꙋю дꙋ́шꙋ мою̀ ѡ҆слѣпле́нїемъ страсте́й, безстра́стїѧ заре́ю просвѣтѝ, молю́сѧ, и҆ ѡ҆скверне́ное моѐ се́рдце ѡ҆мы́й потѡ́ки ᲂу҆миле́нїѧ, покаѧ́нїѧ же слеза́ми: и҆ ѿ тимѣ́нїѧ мѧ̀ ѡ҆чи́сти дѣ́лъ мои́хъ, да любо́вїю зовꙋ́ ти: бцⷣе прⷭ҇нодв҃о, молѝ хрⷭ҇та̀ бг҃а, прегрѣше́нїй ѡ҆ставле́нїе пода́ти мѝ, тебе́ бо и҆мѣ́ю наде́ждꙋ ра́бъ тво́й.
По в҃-й каѳі́смѣ сѣда́ленъ, гла́съ є҃:
Подо́бенъ: Собезнача́льное сло́во:
А҆пⷭ҇льскимъ вѣща́нїемъ ѡ҆гласи́вше сво́й ᲂу҆́мъ, и҆ ᲂу҆па́сше прпⷣбнїи вѣ́рныхъ соста́въ, же́ртвꙋ чи́стꙋ принеслѝ є҆стѐ цр҃ю̀ и҆ творцꙋ̀, вопло́щшемꙋсѧ за ны̀ ѿ дв҃ы бцⷣы, и҆ воскрⷭ҇шемꙋ со сла́вою: є҆го́же пред̾ мꙋчи́тели и҆сповѣ́даша сщ҃енномч҃нцы. [Два́жды.]
Сла́ва, и҆ ны́нѣ, бг҃оро́диченъ:
Те́плаѧ предста́тельнице и҆ непобѣди́маѧ, ᲂу҆пова́нїе и҆звѣ́стное и҆ непосты́дное, стѣно̀ и҆ покро́ве и҆ приста́нище прибѣга́ющымъ къ тебѣ̀, прⷭ҇нодв҃о чⷭ҇таѧ, сн҃а твоего̀ и҆ бг҃а молѝ со а҆́гг҃лы, ми́ръ да́ти мі́рꙋ, и҆ сп҃се́нїе, и҆ ве́лїю млⷭ҇ть.
<<ч҃и: 195>>
По Хвали́те и҆́мѧ гдⷭ҇не:
Припѣ́въ: Велича́емъ ва́съ сщ҃енномч҃нцы хрⷭ҇то́вы, и҆ чте́мъ ст҃ꙋ́ю па́мѧть ва́шꙋ: вы́ бо мо́лите за на́съ хрⷭ҇та̀ бг҃а на́шего.
Ѱало́мъ и҆збра́нный: Оу҆слы́шите сїѧ̑ всѝ ꙗ҆зы́цы:
По полѷеле́и сѣда́ленъ, гла́съ а҃:
Подо́бенъ: Ка́мени запеча́танꙋ:
Пло́дъ бг҃оразꙋ́мїѧ воздѣ́лавше трꙋды̀ свои́ми, и҆з̾ ко́рене безбо́жїѧ и҆сто́ргли є҆стѐ ѻ҆стны̀ ᲂу҆че́нїѧ, и҆ ма́стїю пома́завшесѧ бл҃года́тїю, ᲂу҆паслѝ є҆стѐ лю́ди сщ҃енномч҃нцы, и҆ зако́ннѡ пострада́вше, сꙋгꙋ́бы по́чести ѿ хрⷭ҇та̀ сподо́бистесѧ, сла́ва да́вшемꙋ ва́мъ крѣ́пость: сла́ва вѣнча́вшемꙋ ва́съ: сла́ва даю́щемꙋ ва́ми всѣ̑мъ и҆сцѣле́нїе. [Два́жды.]
Сла́ва, и҆ ны́нѣ, бг҃оро́диченъ:
Рꙋ́цѣ твоѝ бжⷭ҇твеннѣи, и҆́миже созда́телѧ понесла̀ є҆сѝ дв҃о прест҃а́ѧ, вопло́щшагосѧ бл҃гостїю, просте́рши ᲂу҆молѝ є҆го̀, и҆зба́вити на́съ ѿ и҆скꙋше́нїй, и҆ страсте́й, и҆ бѣ́дъ, хва́лѧщихъ тѧ̀ любо́вїю, и҆ вопїю́щихъ: сла́ва все́льшемꙋсѧ въ тѧ̀: сла́ва проше́дшемꙋ и҆з̾ тебѐ: сла́ва и҆зба́вльшемꙋ на́съ ржⷭ҇тво́мъ твои́мъ.
Та́же, степє́нна, а҃-й а҆нтїфѡ́нъ д҃-гѡ гла́са.
Прокі́менъ: Чⷭ҇тна̀ пред̾ гдⷭ҇емъ сме́рть прпⷣбныхъ є҆гѡ̀:
Сті́хъ: Что̀ возда́мъ гдⷭ҇ви ѡ҆ всѣ́хъ ꙗ҆́же воздаде́ ми,
Всѧ́кое дыха́нїе:
Є҆ѵⷢ҇лїе сщ҃енномч҃нкѡмъ, [пи́сано въ концѣ̀ кни́ги сеѧ̀].
По н҃-мъ ѱалмѣ̀ стїхи́ра, гла́съ д҃, самогла́сна:
Ꙗ҆́кѡ столпѝ сꙋ́ще цр҃кве хрⷭ҇то́вы, стѣ́ны разори́ли є҆стѐ невѣ́рствїѧ крѣ́пкѡ, самобра́тїѧ мч҃нцы: тѣ́мъ пре́жде сме́рти є҆реті́ческꙋю бꙋ́рю разрꙋши́сте, молѧ́щесѧ ѡ҆ дꙋша́хъ на́шихъ.
Канѡ́нъ, гла́съ д҃.
Пѣ́снь а҃.
І҆рмо́съ: Мо́рѧ чермнꙋ́ю пꙋчи́нꙋ, невла́жными стопа́ми, дре́внїй пѣшеше́ствовавъ і҆и҃ль, крⷭ҇тоѡбра́зныма мѡѷсе́овыма рꙋка́ма, а҆мали́ковꙋ си́лꙋ въ пꙋсты́ни побѣди́лъ є҆́сть.
<<ч҃ѳ: 197>>
Бж҃їимъ свѣтоли́тїемъ сла́внїи ѡ҆блиста́еми, свѣтоно́сное сїѐ и҆ свѣ́тлое пра́зднество ва́ше бл҃гоче́стнѡ сла́вѧщихъ, страсте́й мглы̀ и҆зба́вите.
Посра́мленъ бы́сть нечести́вый страда́льцы и҆ слꙋжи́тєли твои́ми хрⷭ҇тѐ цр҃ю̀, приложи́всѧ и҆̀мъ и҆ сво́й тꙋ́лъ лꙋка́вый и҆спраздни́въ, низложи́ти не возмо́же тѣ́хъ крѣ́пости.
Во́дъ животворѧ́щихъ и҆ дꙋхо́вныхъ и҆сполнѧ́еми, и҆ста́ѧвшихъ зно́емъ лю́тагѡ безбо́жїѧ напои́сте, и҆ къ водѣ̀ ст҃ѣ́й и҆ сп҃си́тельнѣй наста́висте.
Бг҃оро́диченъ: Разрѣши́сѧ прароди́тельное престꙋпле́нїе па́че ᲂу҆́мнымъ ржⷭ҇тво́мъ твои́мъ пречⷭ҇таѧ, и҆ пе́рвый воспрїѧ́ша ра́йскїй вхо́дъ, велегла́снѡ хва́лѧщїи тѧ̀.
Пѣ́снь г҃.
І҆рмо́съ: Весели́тсѧ ѡ҆ тебѣ̀ цр҃ковь твоѧ̀ хрⷭ҇тѐ, зовꙋ́щи: ты̀ моѧ̀ крѣ́пость гдⷭ҇и, и҆ прибѣ́жище и҆ ᲂу҆твержде́нїе.
Разжиза́еми мы́сленнѡ ᲂу҆тѣ́шителевымъ ѻ҆гне́мъ, погаси́ша лє́сти лю́тагѡ запале́нїѧ, сщ҃енномч҃нцы ра́дꙋющесѧ.
Дх҃а свѣ́томъ сла́внїи, сꙋ́щихъ во тмѣ̀ лю́тѣ привлеко́сте къ свѣ́тꙋ сщ҃е́ннагѡ кр҃ще́нїѧ.
Зла́то и҆скꙋше́но ѻ҆гне́мъ мꙋче́нїѧ ꙗ҆ви́стесѧ, мч҃нческихъ страда́нїй ст҃і́и, и҆мꙋ́ще запечатлѣ́нїе.
Бг҃оро́диченъ: И҆збавлѧ́ющаго человѣ́ки ѿ наси́лїѧ вра́жїѧ, родила̀ є҆сѝ си́льнаго бг҃а, пречⷭ҇таѧ дв҃о всенепоро́чнаѧ.
Сѣда́ленъ, гла́съ г҃.
Подо́бенъ: Бж҃е́ственныѧ вѣ́ры:
Мѵ́ромъ пома́занїѧ ѡ҆ст҃и́вшесѧ, па́стырїе ꙗ҆ви́стесѧ лю́демъ бг҃омꙋ̑дрымъ, и҆ ꙗ҆́кѡ а҆́гнцы чи́сти поже́ршесѧ, принесо́стесѧ сло́вꙋ началопа́стырю поже́ршемꙋсѧ ꙗ҆́кѡ ѻ҆вча́ти, мч҃нцы всехва́льнїи, и҆ свѣти́льницы всемі́рнїи, тѣ́мже торжествꙋ́емъ всю̀ любо́вїю бжⷭ҇твеннꙋю па́мѧть ва́шꙋ.
Сла́ва, и҆ ны́нѣ, бг҃оро́диченъ:
Прибѣ́жище и҆ си́ла на́ша бцⷣе, держа́внаѧ по́мощь мі́ра, <<ч҃ѳ ѡ҆б.: 198>> мл҃твами твои́ми покры́й рабы̑ твоѧ̑ ѿ всѧ́кїѧ нꙋ́жды, є҆ди́на бл҃гослове́ннаѧ.
Крⷭ҇тобг҃оро́диченъ: Же́злъ си́лы стѧжа́вшїи, крⷭ҇тъ сн҃а твоегѡ̀ бцⷣе, тѣ́мъ низлага́емъ врагѡ́въ шата̑нїѧ, любо́вїю тѧ̀ непреста́ннѡ велича́юще.
Пѣ́снь д҃.
І҆рмо́съ: Вознесе́на тѧ̀ ви́дѣвши цр҃ковь на крⷭ҇тѣ̀, сл҃нце првⷣное, ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й гдⷭ҇и.
Сщ҃е́нныхъ мч҃нкъ ли́къ да пое́тсѧ, ст҃и́тельства бл҃года́тїю, и҆ мꙋче́нїемъ ᲂу҆краша́емь, воспѣва́ющихъ съ весе́лїемъ: сла́ва си́лѣ твое́й гдⷭ҇и.
Наꙋче́ни бы́вше бж҃е́ствєннымъ та́йнамъ, ѻ҆тцы̀ бг҃оно́снїи, лю́ди въ преподо́бїи и҆ пра́вдѣ вои́стиннꙋ ᲂу҆пасо́сте, и҆ коне́цъ бж҃е́ственный прїѧ́сте мꙋче́нїемъ.
Оу҆кра́шенъ бы́въ бж҃е́ственными а҆пⷭ҇льскими, и҆ прⷪ҇ро́ческими дарова̑нїи, сщ҃енномч҃нкъ ли́къ бж҃е́ственный взыва́етъ веселѧ́сѧ: сла́ва си́лѣ твое́й гдⷭ҇и.
Бг҃оро́диченъ: Бг҃оглагѡ́ланїи ѡ҆глаша́еми бцⷣе, є҆́же ѡ҆ тебѣ̀ ви́дѧще сбытїѐ, ра́дꙋйсѧ пренепоро́чнаѧ дв҃о, тебѣ̀ зове́мъ, и҆зба́вленнїи ржⷭ҇тво́мъ твои́мъ.
Пѣ́снь є҃.
І҆рмо́съ: Ты̀ гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆з̾ мра́чна невѣ́дѣнїѧ вѣ́рою воспѣва́ющыѧ тѧ̀.
Бжⷭ҇твенными зарѧ́ми премꙋ́драгѡ проповѣ́данїѧ, возсїѧ́сте сѣдѧ́щымъ во тмѣ̀ преле́стнѣй свѣ́тъ бл҃года́тный.
Ны́нѣ зрѧ́ще хрⷭ҇та̀ лице́мъ къ лицꙋ̀, свѣ́та неизрече́ннагѡ наслажда́етесѧ: томꙋ̀ за ны̀ моли́тесѧ.
Бж҃їѧ рѣка̀ хрⷭ҇то́ва ᲂу҆че́нїѧ и҆спо́лншисѧ въ ва́съ, загради́сте пото́ки прелє́стныѧ, и҆ ᲂу҆мы̀ вѣ́рныхъ тве́рдѣ напои́сте.
Бг҃оро́диченъ: Є҆ди́нꙋ ѿ всѣ́хъ родѡ́въ и҆збра́въ тѧ̀ гдⷭ҇ь, бцⷣе, и҆з̾ тебѐ воплоти́сѧ, ѡ҆божи́въ человѣ́чество.
<<ч҃ѳ ѡ҆б.: 198>>
Пѣ́снь ѕ҃.
І҆рмо́съ: Пожрꙋ́ ти со гла́сомъ хвале́нїѧ гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди млⷭ҇ти ѿ ре́бръ твои́хъ и҆сте́кшею кро́вїю.
Мꙋ́жествомъ и҆ мꙋ́дростїю пожи́въ гдⷭ҇и, ст҃ы́хъ твои́хъ ли́къ, пра́вдою и҆ мл҃твою и҆ цѣломꙋ́дрїемъ, ѡ҆ тебѣ̀ ны́нѣ ра́дꙋетсѧ.
Наде́ждею вѣ́чнагѡ живота̀ ᲂу҆крѣплѧ́еми, тѣлє́снаѧ раздроблє́нїѧ веселѧ́щесѧ претерпѣ́сте до́блїи, и҆́же бж҃е́ственнымъ прⷪ҇ро́кѡмъ ст҃і́и ревни́тєли.
Зако́ны воспита́ни дꙋхо́вными премꙋ́дрїи, беззако́ннꙋющымъ зако́ны сп҃си́тєльныѧ предложи́сте, и҆ къ свѣ́тꙋ бл҃говѣ́рїѧ си́хъ приведо́сте.
Бг҃оро́диченъ: Въ ме́ртвость ѿ живота̀ совлече́нъ бы́сть въ раѝ а҆да́мъ, твои́мъ же дв҃о ѡ҆безсме́ртисѧ животворѧ́щимъ ржⷭ҇тво́мъ, пречⷭ҇таѧ бг҃оневѣ́сто.
Конда́къ во ᲂу҆ста́вѣ.
А҆́ще ли нѣ́сть ᲂу҆ста́ва, глаго́ли се́й конда́къ, гла́съ г҃:
Подо́бенъ: Дв҃а дне́сь:
Ꙗ҆́кѡ свѣти́льницы незаходи́мїи разꙋ́мнагѡ сл҃нца, соше́дшесѧ дне́сь восхва́лимъ пѣ́сньми, возсїѧ́ли бо є҆стѐ сꙋ́щымъ во тьмѣ̀ неразꙋ́мїѧ, всѣ́хъ созыва́юще къ высотѣ̀ бл҃гоче́стїѧ сщ҃енномч҃нцы. тѣ́мъ вопїе́мъ ва́мъ: ра́дꙋйтесѧ по́стникѡвъ всѣ́хъ ѡ҆снова́нїе.
І҆́косъ: И҆́же и҆спе́рва бжⷭ҇твеннꙋю добро́тꙋ, і҆и҃се животода́вче, ѡ҆зарѝ мнѣ̀: ꙗ҆́кѡ да воспою̀ твоѧ̑ свѧти́тєли, и҆́же по тебѣ̀ подви́гшыѧсѧ да́же до сме́рти, и҆ вра́жїю си́лꙋ низложи́вше крѣ́пцѣ, и҆ бг҃оме́рзкое нече́стїе ѡ҆бличи́вше, крⷭ҇тною си́лою ᲂу҆тве́рждшесѧ хрⷭ҇тѐ, ѿ тебѐ сла́вꙋ прїѧ́ша досто́йнѡ, тѣ́мже зове́мъ и҆̀мъ: ра́дꙋйтесѧ по́стникѡвъ всѣ́хъ ѡ҆снова́нїе.
Пѣ́снь з҃.
І҆рмо́съ: Въ пещѝ а҆враа́мстїи ѻ҆́троцы персі́дстѣй, любо́вїю бл҃гоче́стїѧ па́че, не́жели пла́менемъ ѡ҆палѧ́еми, взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.
<<р҃: 199>>
Ст҃и́тельства просвѣще́ни мѵ́ромъ бг҃омꙋ́дрїи, бж҃е́ственною мч҃нческою кро́вїю, бг҃олѣ́пнѡ ѻ҆бою́дꙋ прославлѧ́етесѧ, вопїю́ще: бл҃гослове́нъ є҆сѝ въ хра́мѣ сла́вы твоеѧ̀ гдⷭ҇и.
Оу҆пра́вльше ꙗ҆́коже во мгнове́нїе зємна́ѧ мꙋдрѡва́нїѧ, ꙗ҆́кѡ въ кораблѝ пречⷭ҇тыѧ сла́вы прехва́льнїи возвыша́еми, взыва́ша: бл҃гослове́нъ є҆сѝ въ хра́мѣ сла́вы твоеѧ̀ гдⷭ҇и.
Не невѣ́дꙋще проти́внагѡ ᲂу҆мышле́нїѧ, всѧ́ко мꙋчи́тельное вѣ́дѣнїе преле́стное ѿрази́ша сла́внїи сщ҃енномч҃нцы, пою́ще: бл҃гослове́нъ є҆сѝ въ хра́мѣ сла́вы твоеѧ̀ гдⷭ҇и.
Бг҃оро́диченъ: Зе́млю ᲂу҆́бѡ мгло́ю, нб҃о же ѻ҆́блаки ѡ҆дѣва́ѧй гдⷭ҇ь, въ пло́ть ме́ртвеннꙋю и҆з̾ крове́й твои́хъ дв҃це, ѡ҆дѣ́ѧсѧ, во ѻ҆де́ждꙋ сла́вы безсме́ртїѧ ѡ҆дѣва́ѧ человѣ́ки.
Пѣ́снь и҃.
І҆рмо́съ: Рꙋ́цѣ распросте́ръ данїи́лъ, львѡ́въ зїѧ̑нїѧ въ ро́вѣ затчѐ: ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, бл҃гоче́стїѧ рачи́тєли ѻ҆́троцы, взыва́юще: бл҃гослови́те всѧ̑ дѣла̀ гдⷭ҇нѧ гдⷭ҇а.
Бїе́ми жи́лами, и҆ болѣ́зньми плотски́ми, живо́тъ нетлѣ́нный сщ҃енномч҃нцы и҆схода́таили є҆стѐ всѣ̑мъ слꙋжа́щымъ мє́ртвымъ богѡ́мъ, и҆́же, сп҃се́ни бы́вше, съ ва́ми при́снѡ взыва́ютъ: бл҃гослови́те всѧ̑ дѣла̀ гдⷭ҇нѧ гдⷭ҇а.
Гро́здїе вїногра́да мы́сленнагѡ сщ҃енномч҃нцы сꙋ́ще, ны́нѣ вїно̀ и҆сточа́ете и҆сцѣле́нїѧ, и҆ веселитѐ сердца̀ всѣ́хъ вѣ́рою восхвалѧ́ющихъ ва́съ, и҆ вопїю́щихъ: бл҃гослови́те всѧ̑ дѣла̀ гдⷭ҇нѧ гдⷭ҇а.
Сщ҃енномч҃нчестїи гро́би чꙋдеса̀ и҆сточи́ша вселе́ннѣй, всеѕла́гѡ де́мѡна привидѣ́нїѧ лє́стнаѧ сокрꙋша́юще, бл҃голѣ́пнаѧ же и҆сцѣлє́нїѧ подаю́тъ вопїю́щымъ: бл҃гослови́те всѧ̑ дѣла̀ гдⷭ҇нѧ гдⷭ҇а.
Бг҃оро́диченъ: Ви́дѣнъ бы́сть ꙗ҆́кѡ чл҃вѣ́къ, и҆з̾ тебѐ ражда́емь пресꙋ́щный, сꙋгꙋ́бъ є҆стество́мъ пречⷭ҇таѧ, дѣ́йствы же и҆ хотѣ̑нїи, и҆̀мже ᲂу҆подо́бльсѧ во́лею и҆ ꙗ҆́вльсѧ, є҆мꙋ́же пое́мъ вѣ́рою: бл҃гослови́те всѧ̑ дѣла̀ гдⷭ҇нѧ гдⷭ҇а.
<<р҃ ѡ҆б.: 200>>
Пѣ́снь ѳ҃.
І҆рмо́съ: Ка́мень нерꙋкосѣ́чный, ѿ несѣко́мыѧ горы̀ тебѐ дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стєства̀. тѣ́мъ веселѧ́щесѧ, тѧ̀ бцⷣе велича́емъ.
Сщ҃енномч҃нкъ ст҃ы́хъ сщ҃е́ннꙋю соверша́юще па́мѧть, прїиди́те всѝ велегла́снѡ пѣ́сньми сщ҃е́нными си́хъ почти́мъ, ѡ҆ на́съ молѧ́щихсѧ всеще́дромꙋ бг҃ꙋ на́шемꙋ.
Сло́вомъ ᲂу҆тѣ́шени бы́вше, всѧ̑ сквє́рны дꙋ́шъ ва́шихъ ѡ҆чи́стивше, и҆ ко́жныѧ ѻ҆де́жды мꙋ́ками совле́кшесѧ, въ прекра́снꙋю ри́зꙋ сп҃се́нїѧ ѡ҆блеко́стесѧ.
Собра́шасѧ лю́дїе въ па́мѧть стрⷭ҇тоте́рпєцъ ст҃ы́хъ бл҃года̑ти воспрїѧ́ти, и҆ дѡ́блїѧ сщ҃енномч҃нки воспѣ́ти, и҆́же пострада́ша мꙋ́жески, и҆ низложи́ша ѕлонача́льнаго.
Бг҃оро́диченъ: Носѧ́щи на рꙋка́хъ хрⷭ҇та̀, ма́нїемъ носѧ́щаго всѧ́чєскаѧ, сего̀ ꙗ҆́кѡ сн҃а твоего̀ ᲂу҆молѝ, ѿ вра́жїихъ навѣ̑тъ и҆зба́вити мѧ̀ пречⷭ҇таѧ, и҆ бе́здною млⷭ҇ти ѡ҆б̾ѧ́ти, и҆ сп҃сти́ мѧ.
Свѣти́ленъ.
Подо́бенъ: Жєны̀ ᲂу҆слы́шите:
Ны́нѣ бл҃гонаро́читъ ꙗ҆ви́сѧ на́мъ де́нь, и҆мꙋ́щїй сщ҃е́нныхъ преє́мникъ, сщ҃е́нныхъ а҆пⷭ҇лъ, и҆ бг҃онѡ́сныѧ кꙋ́пнѡ проповѣ́дники вѣ́ры, и҆ непобѣди̑мыѧ мч҃нки: и҆́хже моле́бнꙋю па́мѧть вѣ́рнѡ всѝ соверша́емъ.
Бг҃оро́диченъ: Совѣ́та вели́кагѡ а҆́гг҃ла ѻ҆́ч҃а родила̀ є҆сѝ хрⷭ҇та̀ цр҃ѧ̀ сла́вы препѣ́таѧ ѻ҆трокови́це, є҆гѡ́же крⷭ҇тъ сщ҃енномч҃нцы проповѣ́давше, просвѣти́ша ꙗ҆зы́ки, и҆ наꙋчи́ша тѧ̀ бцⷣꙋ сла́вити, и҆ покланѧ́тисѧ твоемꙋ̀ ржⷭ҇твꙋ̀.
На хвали́техъ стїхи̑ры, гла́съ д҃.
Подо́бенъ: Ꙗ҆́кѡ до́блѧ:
Сщ҃е́ннымъ пома́занїемъ, ꙳ и҆ мч҃нческою кро́вїю, ꙳ бг҃ꙋ прибли́жишасѧ сщ҃енномч҃нцы всесла́внїи, ꙳ цвѣ́тъ є҆сте́ственный, ꙳ добро́та слове́снаѧ, ꙳ премꙋ́дрости верхо́вники, ꙳ пра́вости бг҃осло́вїѧ, ꙳ пра́вило вѣ́ры, ꙳ всесоста́вное и҆справле́нїе, ꙳ и҆ цр҃квамъ бл҃голѣ́пїе. [Два́жды.]
<<р҃а: 201>>
Стра́ждꙋщымъ прославле́нїе, ꙳ мч҃нкѡмъ велича́нїе подписꙋ́юще, ꙳ ᲂу҆вѣ́ристесѧ бг҃омꙋ́дрїи, ꙳ дерза́ти до́блественнѡ ꙳ на разли̑чныѧ мꙋ̑ки, ꙳ и҆ ю҆́зы и҆ темни̑цы, ꙳ и҆ тѣле́съ ѡ҆бнажє́нїѧ, ꙳ и҆ вѧза̑нїѧ, ꙳ и҆ стꙋ́дени лю̑тыѧ, ꙳ по́слѣжде и҆ на ра̑ны и҆ сме́рть сщ҃енномч҃нцы.
Многоѡбра́зныхъ ра́ди мꙋче́нїй ꙳ совле́кшесѧ ᲂу҆мерщвле́нїѧ, ꙳ мч҃нцы сла́внїи, ꙳ въ нетлѣ́нїѧ ри́зꙋ ѡ҆блеко́стесѧ, ꙳ и҆ ны́нѣ на нб҃сѣ́хъ живетѐ, ꙳ бж҃е́ственномꙋ прⷭ҇то́лꙋ всегда̀ предстоѧ́ще: ꙳ тѣ́мже вѣ́рою ꙳ всесвѣ́тлꙋю па́мѧть ва́шꙋ пра́зднꙋемъ, ꙳ ра́кꙋ моще́й ва́шихъ ѡ҆блобыза́юще.
Сла́ва, гла́съ и҃:
Во ст҃и́телехъ и҆ мч҃нцѣхъ преидо́сте прпⷣбнїи, вѣ́рнїи ꙗ҆ви́стесѧ па́стырїе, и҆ хрⷭ҇то́вꙋ и҆спи́вше ча́шꙋ. тѣ́мъ во ѻ҆бои́хъ бл҃гоꙋгоди́вше хрⷭ҇тꙋ̀, томꙋ̀ моли́тесѧ ѡ҆ всѣ́хъ на́съ съ го́рними слꙋга́ми, во свѣ́тѣ ны́нѣ водворѧ́ющесѧ.
И҆ ны́нѣ, бг҃оро́диченъ:
А҆рха́гг҃ла гаврїи́ла гла́съ воспрїи́мше рце́мъ: ра́дꙋйсѧ мт҃и бж҃їѧ, ꙗ҆́же жизнода́вца хрⷭ҇та̀ мі́рꙋ ро́ждшаѧ.
Крⷭ҇тобг҃оро́диченъ: Ю҆́ница нескве́рнаѧ, ю҆нца̀ ви́дѧщи на дре́вѣ пригвожда́ема во́лею, рыда́ющи жа́лостнѣ, ᲂу҆вы̀ мнѣ̀, вопїѧ́ше, люби́мѣйшее ча́до! что́ ти со́нмъ воздадѐ неблагода́рный є҆вре́йскїй, хотѧ́ мѧ ѡ҆безча́дствовати ѿ тебѐ вселюбе́зне;
А҆́ще и҆́мꙋтъ Сла́вꙋ на стїхо́внѣ, глаго́ли вече́рнїй.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.