Слꙋ́жба сщ҃енномч҃нкꙋ

Слꙋ́жба сщ҃енномч҃нкꙋ

<<ч҃ ѡ҆б.: 180>>

[глⷡ҇а ѕ҃і] СЛꙊ́ЖБА Ѻ҆́БЩА

сщ҃енномч҃нкꙋ є҆ди́номꙋ.

Ве́черъ,

на Гдⷭ҇и воззва́хъ, стїхи̑ры, гла́съ а҃.

Подо́бенъ: Всехва́льнїи мч҃нцы:

Бг҃омꙋ́дре бл҃же́нне, и҆́мⷬ҇къ, ꙳ ѡ҆червле́ньми твоеѧ̀ кро́ве, ꙳ сщ҃е́ннꙋю твою̀ ѻ҆де́ждꙋ ᲂу҆краси́лъ є҆сѝ: ꙳ ѿ си́лы бо благоче́стнѡ въ си́лꙋ, ꙳ и҆ ѿ сла́вы въ сла́вꙋ бж҃е́ственнꙋю ꙳ ра́дꙋѧсѧ преше́лъ є҆сѝ, ꙳ и҆ ны́нѣ моли́сѧ, ꙳ дарова́ти дꙋша́мъ на́шымъ ꙳ ми́ръ и҆ ве́лїю млⷭ҇ть.

Же́ртвꙋ пе́рвѣе ꙳ бг҃ꙋ приносѧ̀ безкро́внꙋю, ꙳ ꙗ҆́кѡ свѧще́нникъ зако́ннѣйшїй, ꙳ бг҃оглаго́ливе всече́стне, ꙳ по́слѣжде ꙗ҆́кѡ всепло́дїе ꙳ и҆ прїѧ́тнꙋ же́ртвꙋ, ꙳ тебѐ сама́го кро́вїю, ꙳ ꙗ҆́кѡ мꙋ́ченикъ и҆́стиннѣйшїй, ꙳ хрⷭ҇тꙋ̀ прине́слъ є҆сѝ, є҆го́же молѝ ѡ҆ пою́щихъ тѧ̀.

Мч҃нкъ вѡ́инства, ꙳ хрⷭ҇тꙋ̀ ѻ҆́тче, приве́лъ є҆сѝ ꙳ ᲂу҆чє́нїи твои́ми и҆ наказа̑нїи, ꙳ ᲂу҆чѧ̀ и҆ наказꙋ́ѧ, ꙳ и҆ ꙗ҆́вѣ ѡ҆́бразъ бг҃омꙋ́дре, тебѐ сама́го предлага́ѧ. ꙳ съ ни́миже моли́сѧ, ꙳ дарова́ти дꙋша́мъ на́шымъ ꙳ ми́ръ и҆ ве́лїю млⷭ҇ть.

Сла́ва, и҆ ны́нѣ, бг҃оро́диченъ:

Прегрѣше́нїй пꙋчи́ною ѡ҆бꙋрева́емь, къ ти́хомꙋ приста́нищꙋ твоеѧ̀ пречⷭ҇тыѧ мольбы̀ бцⷣе, прибѣ́гъ, взыва́ю тѝ: сп҃си́ мѧ, держа́внꙋю твою̀ просте́рши десни́цꙋ рабꙋ̀ твоемꙋ̀, пренепоро́чнаѧ.

Крⷭ҇тобг҃оро́диченъ: Оу҆ крⷭ҇та̀ предстоѧ́щи сн҃а и҆ бг҃а твоегѡ̀, и҆ долготерпѣ́нїе тогѡ̀ смотрѧ́ющи, глаго́лаше пла́чꙋщи мт҃и чтⷭ҇аѧ: ᲂу҆вы̀ мнѣ̀, ча́до сладча́йшее, что̀ сїѧ̑ стра́ждеши не пра́веднѡ, сло́ве бж҃їй, да сп҃се́ши человѣ́чество;

<<ч҃а: 181>>

А҆́ще и҆́мать самогла́сенъ, Сла́ва, гла́съ ѕ҃:

Сщ҃е́нникъ законнѣ́йшїй, да́же до кончи́ны твоеѧ̀ бы́лъ є҆сѝ, бл҃же́нне и҆́мⷬ҇къ: свѧщеннодѣ́йствꙋѧ бо бж҃е́ствєннаѧ и҆ неизглагѡ́ланнаѧ та̑инства, кро́вь твою̀ и҆злїѧ́лъ є҆сѝ за хрⷭ҇та̀ бг҃а, и҆ же́ртвꙋ бл҃гопрїѧ́тнꙋ себѐ приве́лъ є҆сѝ. тѣ́мъ дерзнове́нїе и҆мѣ́ѧ къ немꙋ̀, прилѣ́жнѡ моли́сѧ ѡ҆ вѣ́рою и҆ любо́вїю соверша́ющихъ твою̀ пречестнꙋ́ю па́мѧть, и҆ почита́ющымъ сїю̀ и҆зба́витисѧ напа́стей и҆ всѧ́кихъ бѣ́дъ и҆ ѡ҆бстоѧ́нїй.

И҆ ны́нѣ бг҃оро́диченъ:

Бг҃а и҆з̾ тебѐ воплоти́вшагосѧ разꙋмѣ́хомъ, бцⷣе дв҃о: того̀ молѝ ѡ҆ сп҃се́нїи дꙋ́шъ на́шихъ.

Крⷭ҇тобг҃оро́диченъ: Ви́дѧщи тѧ̀ распина́ема, хрⷭ҇тѐ, тебѐ ро́ждшаѧ, вопїѧ́ше: что̀ стра́нное є҆́же ви́жꙋ та́инство, сн҃е мо́й; ка́кѡ на дре́вѣ ᲂу҆мира́еши пло́тїю повѣ́шенъ, жи́зни пода́телю;

А҆́ще пра́зднꙋеши съ полѷеле́емъ, и҆ ты̀ глаго́ли бг҃оро́диченъ воскрⷭ҇ный: Кто̀ тебѐ не ᲂу҆бл҃жи́тъ:

Вхо́дъ. Прокі́менъ днѐ.

Чтє́нїѧ г҃ ст҃и́тєльскаѧ, [пи̑саны въ концѣ̀ кни́ги сеѧ̀].

На стїхо́внѣ стїхи̑ры, самогла́сны, гла́съ ѕ҃.

Кро́вїю ѡ҆багри́въ твою̀ сщ҃е́ннꙋю ѻ҆де́ждꙋ, вше́лъ є҆сѝ во ст҃а̑ѧ ст҃ы́хъ, ст҃ъ ты̀ бы́въ, и҆́мⷬ҇къ, сла́вне, и҆ ꙗ҆́вѣ всегда̀ наслажда́ѧсѧ ѡ҆боже́нїѧ, ᲂу҆краша́емь и҆ мꙋче́нїемъ сїѧ́ѧ, и҆ а҆́гг҃лъ показꙋ́ѧсѧ чистѣ́йшими причащє́нїи. тѣ́мъ тѧ̀ чти́мъ, и҆ любо́вїю пра́зднꙋемъ твоѐ сщ҃е́ннѣйшее торжество̀ достобл҃же́нне.

Сті́хъ: Првⷣникъ ꙗ҆́кѡ фі́нїѯъ процвѣте́тъ, ꙗ҆́кѡ ке́дръ, и҆́же въ лїва́нѣ, ᲂу҆мно́житсѧ.

Желѣ́зомъ ѡ҆ко́ванъ, непреткнове́ннѡ стезю̀ ше́ствовалъ є҆сѝ, прпⷣбне, къ нбⷭ҇номꙋ гра́дꙋ ведꙋ́щꙋю, чⷭ҇тны́ми твои́ми ра́нами, и҆́мⷬ҇къ, всемꙋ́дре, ꙗ҆́коже ᲂу҆́тварїю ѡ҆бложе́нъ. въ него́же вше́дъ ꙗ҆́кѡ побѣди́тель и҆́стиннѣйшїй и҆ мч҃нкъ непобѣди́мь, и҆ сщ҃еннодѣ́йственникъ сщ҃е́ннѣйшїй, пое́ши со а҆́гг҃лы пѣснопѣ́нїе бж҃е́ственное чи́стѡ: ст҃ъ, ст҃ъ, ст҃ъ, трⷪ҇це є҆диносꙋ́щнаѧ.

<<ч҃а ѡ҆б.: 182>>

Сті́хъ: Насажде́ни въ домꙋ̀ гдⷭ҇ни, во дво́рѣхъ бг҃а на́шегѡ процвѣтꙋ́тъ.

Восхо́дный степе́нь цр҃ковь стѧжа̀, сщ҃є́нныѧ твоѧ̑ по́двиги, сщ҃енномч҃нче и҆́мⷬ҇къ, ю҆́же и҆ храни́ши незы́блемꙋ и҆ ненавѣ́тнꙋ ѿ волкѡ́въ держа́вныхъ, проповѣ́дающꙋю до́блєсти твоѧ̑, и҆ велича́ющꙋю твоѧ̑ страда̑нїѧ, ꙗ҆̀же за хрⷭ҇та̀ зако́ннѡ пострада́лъ є҆сѝ бл҃же́нне.

Сла́ва, гла́съ д҃.

Въ це́рковь нбⷭ҇нꙋю сщ҃е́ннѡ вше́лъ є҆сѝ, сщ҃е́ннѡ ѡ҆блива́емь бл҃же́нне, кро́вїю, и҆ трⷪ҇цѣ предстои́ши, бога́тнѡ сїѧ́ѧ ѿтꙋ́дꙋ блиста̑нїи и҆стека́ющими пребога́те. тѣ́мже дне́сь, и҆́мⷬ҇къ, твою̀ па́мѧть свѣтоно́снꙋю соверша́юще, чꙋ̑вствїѧ дꙋшѝ просвѣща́емъ.

И҆ ны́нѣ, бг҃оро́диченъ: воскрⷭ҇ный.

А҆́ще ли не пра́зднꙋеши, глаго́ли се́й бг҃оро́диченъ:

Тꙋ́чами дх҃а прест҃а́гѡ пречⷭ҇таѧ, мою̀ мы́сль ѡ҆росѝ, ꙗ҆́же ка́плю ро́ждшаѧ хрⷭ҇та̀, неизче́тнѡ безмѣ̑рнаѧ беззакѡ́нїѧ человѣ́кѡмъ щедро́тами и҆змы́вшꙋю: и҆зсꙋшѝ и҆сто́чникъ страсте́й мои́хъ, и҆ пото́ка мѧ̀ сподо́би пи́щи живы́ѧ при́снѡ, мл҃твами твои́ми.

Крⷭ҇тобг҃оро́диченъ: На крⷭ҇тѣ́ тѧ ꙗ҆́кѡ ᲂу҆зрѣ̀ ꙳ пригвожде́на гдⷭ҇и, ꙳ а҆́гница и҆ мт҃и твоѧ̀ дивлѧ́шесѧ, ꙳ и҆ что̀ видѣ́нїе сїѐ, взыва́ше, ꙳ сн҃е возжелѣ́нне; ꙳ сїѧ̑ тѝ невѣ́рный собо́ръ воздадѐ беззако́нный, ꙳ и҆́же мно́гихъ твои́хъ чꙋде́съ наслади́выйсѧ, ꙳ но сла́ва неизглаго́ланномꙋ ꙳ соше́ствїю твоемꙋ̀ влⷣко.

Тропа́рь во ᲂу҆ста́вѣ.

А҆́ще ли нѣ́сть ᲂу҆ста́ва, глаго́ли се́й тропа́рь, гла́съ д҃:

И҆ нра́вѡмъ прича́стникъ, и҆ престо́лѡмъ намѣ́стникъ а҆пⷭ҇лѡмъ бы́въ, дѣѧ́нїе ѡ҆брѣ́лъ є҆сѝ бг҃одꙋхнове́нне, въ видѣ́нїѧ восхо́дъ: сегѡ̀ ра́ди сло́во и҆́стины и҆справлѧ́ѧ, и҆ вѣ́ры ра́ди пострада́лъ є҆сѝ да́же до кро́ве, сщ҃енномч҃нче и҆́мⷬ҇къ, молѝ хрⷭ҇та̀ бг҃а сп҃сти́сѧ дꙋша́мъ на́шымъ.

Сла́ва, и҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.

<<ч҃в: 183>>

На ᲂу҆́трени,

на Бг҃ъ гдⷭ҇ь, тропа́рь то́йже.

По а҃-й каѳі́смѣ сѣда́ленъ, гла́съ г҃.

Подо́бенъ: Бж҃е́ственныѧ вѣ́ры:

Мо́ремъ вѣ́ры и҆сповѣ́данїѧ, пре́лести ᲂу҆гаси́лъ є҆сѝ ѕлосла́вїе, ѡ҆бличи́въ і҆́дѡльское безбо́жїе, и҆ всесожже́нїе бж҃е́ственное бы́въ, чꙋдотворе́нїемъ ѡ҆зарѧ́еши концы̀ ѻ҆́тче прпⷣбне. хрⷭ҇та̀ бг҃а молѝ дарова́ти на́мъ ве́лїю млⷭ҇ть. [Два́жды.]

Сла́ва, и҆ ны́нѣ, бг҃оро́диченъ:

Бж҃е́ственнаѧ ски́нїѧ была̀ є҆сѝ сло́ва, є҆ди́на пречⷭ҇таѧ дв҃о мт҃и, чистото́ю а҆́гг҃лы превозше́дшаѧ, па́че всѣ́хъ менѐ пе́рсть бы́вша, ѡ҆скверне́на плотски́ми прегрѣше́ньми, ѡ҆чи́сти мл҃твъ твои́хъ бжⷭ҇твенными вода́ми, подаю́щи чтⷭ҇аѧ, ве́лїю млⷭ҇ть.

По в҃-й каѳі́смѣ сѣда́ленъ, гла́съ д҃.

Подо́бенъ: Ꙗ҆ви́лсѧ є҆сѝ дне́сь:

Возсїѧ́въ ꙗ҆́коже со́лнца зарѧ̀, блиста́еши прпⷣбне всемꙋ̀ мі́рꙋ свѣ́тлѡ ᲂу҆че́нїи твои́ми бг҃огла́се и҆́мⷬ҇къ, свѣтоно́сне мч҃нкѡмъ похвало̀. [Два́жды.]

Сла́ва, и҆ ны́нѣ, бг҃оро́диченъ:

Пречⷭ҇тѣи рꙋцѣ̀ твоѝ дв҃о мт҃и, просте́рши, покры́й ᲂу҆пова́ющыѧ на тѧ̀, и҆ сн҃ꙋ твоемꙋ̀ зовꙋ́щыѧ: всѣ̑мъ пода́ждь хрⷭ҇тѐ, млⷭ҇ти твоѧ̑.

По Хвали́те и҆́мѧ гдⷭ҇не:

Припѣ́въ:

Велича́емъ тѧ̀ сщ҃енномч҃нче, и҆́мⷬ҇къ, и҆ чте́мъ ст҃ꙋ́ю па́мѧть твою̀: ты́ бо мо́лиши за на́съ хрⷭ҇та̀ бг҃а на́шего.

Ѱало́мъ и҆збра́нный: Оу҆слы́шите сїѧ̑ всѝ ꙗ҆зы́цы:

По полѷеле́и сѣда́ленъ, гла́съ и҃.

Подо́бенъ: Премꙋ́дрости:

Ѡ҆кормлѧ́емь си́лою вседѣ́тельною, и҆ вѣ́триломъ ѡ҆крилѧ́емь крⷭ҇тнымъ, легкѡ̀ преплы́лъ є҆сѝ жите́йскꙋю бꙋ́рю, и҆ къ бж҃е́ствєннымъ <<ч҃в ѡ҆б.: 184>> приста́нищємъ вои́стиннꙋ дости́глъ є҆сѝ, добродѣ́телей кꙋ́плю мно́гꙋ стѧжа́въ, ю҆́же влⷣцѣ всѣ́хъ прине́слъ є҆сѝ, и҆ є҆́же бл҃гі́й ра́бе, слы́шалъ є҆сѝ, и҆ си̑мъ послѣ̑дꙋющаѧ: тѣ́мже, и҆́мⷬ҇къ, бл҃же́нне, молѝ хрⷭ҇та̀ бг҃а, грѣхѡ́въ ѡ҆ставле́нїе пода́ти, чтꙋ́щымъ любо́вїю ст҃ꙋ́ю па́мѧть твою̀. [Два́жды.]

Сла́ва, и҆ ны́нѣ, бг҃оро́диченъ:

Въ напа̑сти многоплетє́нныѧ впа́дъ, ѿ вра̑гъ ви́димыхъ и҆ неви́димыхъ, бꙋ́рею ѡ҆держи́мь безчи́сленныхъ согрѣше́нїй мои́хъ: и҆ ꙗ҆́кѡ къ те́пломꙋ защище́нїю и҆ покро́вꙋ моемꙋ̀, чⷭ҇таѧ, къ приста́нищꙋ притека́ю твоеѧ̀ бл҃гости. тѣ́мже пречⷭ҇таѧ, и҆з̾ тебѐ воплоще́нномꙋ безсѣ́меннѡ моли́сѧ прилѣ́жнѡ ѡ҆ всѣ́хъ рабѣ́хъ твои́хъ, непреста́ннѡ молѧ́щихъ ти сѧ, бцⷣе пречⷭ҇таѧ, молѧ́щи є҆го̀ при́снѡ, согрѣше́нїй ѡ҆ставле́нїе дарова́ти, воспѣва́ющымъ досто́йнѡ сла́вꙋ твою̀.

Степє́нна, а҃-й а҆нтїфѡ́нъ д҃-гѡ гла́са.

Прокі́менъ: Чⷭ҇тна̀ пред̾ гдⷭ҇емъ сме́рть прпⷣбныхъ є҆гѡ̀.

Сті́хъ: Что̀ возда́мъ гдⷭ҇ви ѡ҆ всѣ́хъ, ꙗ҆́же воздадѐ мѝ;

Всѧ́кое дыха́нїе:

Є҆ѵⷢ҇лїе сщ҃енномч҃нкꙋ, [пи́сано въ концѣ̀ кни́ги сеѧ̀].

По н҃-мъ ѱалмѣ̀ стїхи́ра, гла́съ д҃:

Сосꙋ́дъ сщ҃е́нъ дх҃а ст҃а́гѡ бы́лъ є҆сѝ, дꙋ́шꙋ ѡ҆чи́стивъ ѿ страсте́й сщ҃е́нне, ѿсю́дꙋ бж҃е́ственное пома́занїе ст҃о́е прїѧ́лъ є҆сѝ, ст҃и́тель ты̀ бы́въ, и҆ наста́вникъ люде́й бг҃омꙋ́дрыхъ, и҆ мч҃нкъ непобѣди́мь, на́съ ра́ди стрⷭ҇ти претерпѣ́вшагѡ, и҆ безстра́стїе и҆сточи́вшагѡ, страда́льче и҆́мⷬ҇къ.

Канѡ́нъ, гла́съ в҃.

Пѣ́снь а҃.

І҆рмо́съ: Грѧди́те лю́дїе, пои́мъ пѣ́снь хрⷭ҇тꙋ̀ бг҃ꙋ, раздѣ́льшемꙋ мо́ре, и҆ наста́вльшемꙋ лю́ди, ꙗ҆̀же и҆зведѐ и҆з̾ рабо́ты є҆гѵ́петскїѧ: ꙗ҆́кѡ просла́висѧ.

Хрⷭ҇то́вымъ свѣтоли́тїемъ просвѣща́емь, сщ҃енномч҃нче сла́вне, и҆́мⷬ҇къ мл҃твами твои́ми пребл҃же́нне, ѡ҆мраче́ннꙋю дꙋ́шꙋ мою̀ просвѣтѝ, ꙗ҆́кѡ да воспѣва́ю тѧ̀.

<<ч҃г: 185>>

Просвѣще́нїемъ сп҃си́тельнагѡ проповѣ́данїѧ, чтⷭ҇омꙋ срⷣцꙋ твоемꙋ̀, ꙗ҆́кѡ зерца́ло нескве́рное ѻ҆́тче возсїѧ́въ, лꙋчы̀ всѣ̑мъ и҆спꙋсти́лъ є҆сѝ.

Посто́мъ твои́мъ страстна̑ѧ и҆гра̑нїѧ всѧ̑, и҆ воздержа́нїемъ жела́нїе претвори́лъ є҆сѝ, и҆ разли́чными по́двиги взѧ́лсѧ къ безстра́стнѣй высотѣ̀.

Бг҃оро́диченъ: Бг҃а и҆з̾ тебѐ вопло́щшагосѧ свѣ́мы, безсѣ́меннагѡ хотѣ́нїѧ, сꙋ́щаго пре́жде всеѧ̀ тва́ри, и҆ пре́жде всѣ́хъ вѣ̑къ: тѣ́мже тѧ̀ сꙋ́щꙋю бцⷣꙋ воспѣва́емъ.

Пѣ́снь г҃.

І҆рмо́съ: Оу҆твердѝ на́съ въ тебѣ̀, гдⷭ҇и, дре́вомъ ᲂу҆мерщве́й грѣ́хъ, и҆ стра́хъ тво́й всадѝ въ сердца̀ на́съ пою́щихъ тѧ̀.

Всесоверше́ннꙋ же́ртвꙋ жи́вꙋ, себѐ хрⷭ҇тꙋ̀ прине́слъ є҆сѝ мꙋче́нїемъ, со́вѣстїю мч҃нческою, предѝ пострада́въ воздержа́нїемъ.

Житїѐ твоѐ сщ҃е́нно, и҆ сло́во бжⷭ҇твенно, и҆ дѣѧ̑нїѧ бж҃е́ствєннаѧ, прїе́млѧ восхождє́нїѧ въ се́рдцы твое́мъ, и҆́стиннагѡ бг҃овидѣ́нїѧ, є҆го́же полꙋчи́лъ є҆сѝ.

Оу҆пра́вивъ бг҃оразꙋ́мнѡ прпⷣбне, ᲂу҆́мъ тво́й, за́повѣдьми сп҃совыми, досто́инъ ꙗ҆ви́лсѧ є҆сѝ, и҆ вѣ́ры побо́рникъ ненобѣди́мый.

Бг҃оро́диченъ: Ѿ ме́ртвости ᲂу҆́мъ на́шъ ѿтрѧсла̀ є҆сѝ, ро́ждши сꙋ́щее безсме́ртїе, и҆ ѻ҆де́ждꙋ на́мъ и҆зтка́ла є҆сѝ нетлѣ́нїѧ, дв҃це, ржⷭ҇тво́мъ твои́мъ.

Сѣда́ленъ, гла́съ г҃:

Бж҃е́ственнымъ дх҃омъ просвѣще́нъ, сверѣ́пство мꙋчи́телей, дерзнове́нїемъ па́стырскимъ сщ҃енномч҃нче велемꙋ́дреннѡ посрами́лъ є҆сѝ: и҆ преше́дъ пре́лести пꙋчи́нꙋ, ко приста́нищꙋ бж҃е́ственномꙋ дости́глъ є҆сѝ ѻ҆́тче прпⷣбне. хрⷭ҇та̀ бг҃а молѝ дарова́ти на́мъ ве́лїю млⷭ҇ть.

Сла́ва, и҆ ны́нѣ, бг҃оро́диченъ:

Кі́йждо и҆дѣ́же сп҃са́етсѧ, та́мѡ пра́веднѡ и҆ притека́етъ: и҆ ко́е и҆но́е таково́е прибѣ́жище, ꙗ҆́кѡ ты̀ бцⷣе, покрыва́ющее дꙋ́шы на́шѧ;

<<ч҃г ѡ҆б.: 186>>

Крⷭ҇тобг҃оро́диченъ: Же́злъ си́лы стѧжа́вшїи, крⷭ҇тъ сн҃а твоегѡ̀ бцⷣе, тѣ́мъ низлага́емъ врагѡ́въ шата̑нїѧ, любо́вїю тѧ̀ непреста́ннѡ велича́юще.

Пѣ́снь д҃.

І҆рмо́съ: Оу҆слы́шахъ гдⷭ҇и, сла́вное твоѐ смотре́нїе, и҆ просла́вихъ чл҃вѣколю́бче непостижи́мꙋю твою̀ си́лꙋ.

Всесожже́нїе бж҃е́ственное ты̀, и҆ чиста̀ же́ртва прине́слсѧ є҆сѝ сп҃сꙋ всѣ́хъ, сщ҃енномч҃нче премꙋ́дре.

Ста́до хрⷭ҇то́во, прпⷣбне, наставлѧ́ѧ къ свѣ́тꙋ бг҃оразꙋ́мїѧ, безбо́жїѧ тьмꙋ̀ ѿгна́лъ є҆сѝ.

Безбо́жїѧ глꙋбинꙋ̀ рѣко́ю твои́хъ по́тѡвъ, ѻ҆́тче, ꙗ҆́кѡ сщ҃енномч҃нкъ и҆зсꙋши́лъ є҆сѝ.

Бг҃оро́диченъ: Просвѣтѝ пречⷭ҇таѧ, ѡ҆мраче́ннꙋю дꙋ́шꙋ мою̀ свѣ́томъ твои́мъ, ꙗ҆́же свѣ́тъ ро́ждшаѧ є҆ди́нъ ѵ҆поста́сный.

Пѣ́снь є҃.

І҆рмо́съ: Свѣ́та пода́телю, и҆ вѣкѡ́въ тво́рче гдⷭ҇и, во свѣ́тѣ твои́хъ повелѣ́нїй наста́ви на́съ: ра́звѣ бо тебѐ и҆но́гѡ бг҃а не зна́емъ.

Бога́тство и҆ сла́вꙋ свѣ́тлꙋю, и҆ долготꙋ̀ жи́зни, и҆ живо́тъ нетлѣ́ненъ, и҆́стиннаѧ премꙋ́дрость хрⷭ҇то́съ, тебѣ̀ дарова̀ бл҃же́нне, ꙗ҆́кѡ и҆зрѧ́днѣ того̀ возлю́бльшꙋ.

Жезло́мъ вѣ́ры ѿгонѧ́еши є҆ресе́й лови̑твы, и҆ сою́зомъ любвѐ спрѧ́гъ ста́до твоѐ, наде́ждею и҆ вѣ́рою сохранѧ́еши невре́дно.

Ѿрази́въ воздержа́нїемъ пи́щꙋ, накорми́лъ є҆сѝ дꙋ́шꙋ твою̀, пи́щꙋ и҆мѣ́ѧ непреста̑нныѧ мл҃твы и҆ поꙋче́нїе, и҆ є҆́же къ бг҃ꙋ возносѧ́щее смире́нїе.

Бг҃оро́диченъ: Тѧ̀ застꙋ́пницꙋ чⷭ҇таѧ, и҆ наде́ждꙋ тве́рдꙋ, и҆ держа́вꙋ и҆ покро́въ, и҆ стѣ́нꙋ стѧжа́хомъ всѝ, и҆ въ црⷭ҇тво нбⷭ҇ное вводѧ́щїй мо́стъ.

Пѣ́снь ѕ҃.

І҆рмо́съ: Въ бе́зднѣ грѣхо́внѣй валѧ́ѧсѧ, неизслѣ́днꙋю млⷭ҇рдїѧ твоегѡ̀ призыва́ю бе́зднꙋ: ѿ тлѝ бж҃е мѧ̀ возведѝ.

<<ч҃д: 187>>

Же́ртва и҆ жри́тель бы́въ, поже́рлъ є҆сѝ себѐ бг҃ꙋ вѣ́ры ра́ди: и҆ соблюда́еши безскве́рнено томꙋ̀ слꙋжи́тельства твоегѡ̀ соверше́нїе.

Оу҆мертви́лсѧ є҆сѝ, бг҃оглаго́ливе, мі́рꙋ всемꙋ̀, є҆ди́номꙋ же бг҃ꙋ жи́въ пребыва́ѧ, ко хрⷭ҇тꙋ̀ преста́вилсѧ є҆сѝ живото́мъ нетлѣ́ннымъ ѡ҆богаща́емь.

Ны́нѣ въ безконе́чнꙋю сла́вꙋ преше́дъ ѿ землѝ, ѻ҆каѧ́ннꙋю дꙋ́шꙋ мою̀ страстьмѝ, прпⷣбне, прилѣ́жнымъ ѡ҆чище́нїемъ твоеѧ̀ мл҃твы ᲂу҆врачꙋ́й.

Бг҃оро́диченъ: Взе́млющаго грѣхѝ всегѡ̀ мі́ра пречⷭ҇таѧ, хрⷭ҇та̀ заче́нши пренепоро́чнаѧ, не преста́й просѧ́щи грѣхѡ́въ проще́нїѧ рабѡ́мъ твои̑мъ.

Конда́къ во ᲂу҆ста́вѣ.

А҆́ще ли нѣ́сть ᲂу҆ста́ва, глаго́ли се́й конда́къ, гла́съ д҃:

Подо́бенъ: Вознесы́йсѧ на крⷭ҇тъ:

Во ст҃и́телехъ бл҃гоче́стнѡ пожи́въ, и҆ мꙋче́нїѧ пꙋ́ть проше́дъ, і҆́дѡльскїѧ ᲂу҆гаси́лъ є҆сѝ жє́ртвы, и҆ побо́рникъ бы́въ твоемꙋ̀ ста́дꙋ, бг҃омꙋ́дре. тѣ́мже тѧ̀ почита́юще та́йнѡ вопїе́мъ тѝ: ѿ бѣ́дъ и҆зба́ви ны̀ при́снѡ твои́ми мольба́ми, ѻ҆́тче на́шъ, и҆́мⷬ҇къ.

І҆́косъ: Вѣ́рнѡ любо́вїю совокꙋ́пльшесѧ въ па́мѧть сщ҃е́ннагѡ страда́льца, и҆ сегѡ̀ пѣ́сньми восхва́лимъ дне́сь, ꙗ҆́кѡ да бл҃года́ти ѿ негѡ̀ наслади́мсѧ: дꙋ́шы бо сп҃са́етъ ѿ страсте́й и҆ бѣ́дъ, ꙗ҆́кѡ мч҃нкъ, и҆ ꙗ҆́кѡ вѣ́ренъ ст҃и́тель, и҆ побо́рникъ молѧ́щихъ є҆го̀ ѿ дꙋшѝ. тѣ́мже вопїе́мъ є҆мꙋ̀: ѿ бѣ́дъ и҆зба́ви ны̀ при́снѡ твои́ми мольба́ми ѻ҆́тче на́шъ, и҆́мⷬ҇къ.

Пѣ́снь з҃.

І҆рмо́съ: Ѡ҆́бразꙋ злато́мꙋ на по́лѣ деи́рѣ слꙋжи́мꙋ, трїѐ твоѝ ѻ҆́троцы небрего́ша безбо́жнагѡ велѣ́нїѧ, посредѣ́ же ѻ҆гнѧ̀ вве́ржени, ѡ҆роша́еми поѧ́хꙋ: бл҃гослове́нъ є҆сѝ бж҃е ѻ҆тє́цъ на́шихъ.

Премꙋ́дрости ча́ша ꙗ҆ви́лсѧ є҆сѝ добродѣ́тели и҆спо́лнена, и҆ созва́въ проповѣ́данїемъ высо́кагѡ житїѧ̀ твоегѡ̀ ста́до твоѐ, сїѐ ᲂу҆пра́вилъ є҆сѝ бг҃омꙋ́дре, и҆ съ ни́ми ѻ҆́тче взыва́еши: бл҃гослове́нъ бг҃ъ ѻ҆тє́цъ на́шихъ.

<<ч҃д ѡ҆б.: 188>>

Въ хра́мы та́мѡ сꙋ́щыѧ, въ жили́ще че́стно дости́глъ є҆сѝ, со а҆́гг҃лы водворѧ́ѧсѧ, и҆ съ ни́ми ѻ҆́тче ликꙋ́еши. тѣ́мже тѧ̀ чтꙋ́ще пребл҃же́нне, со дерзнове́нїемъ зове́мъ: бл҃гослове́нъ бг҃ъ ѻ҆тє́цъ на́шихъ.

Бл҃же́нъ є҆сѝ, и҆ добро́ ти є҆́сть ны́нѣ водвори́вшꙋсѧ, и҆дѣ́же првⷣныхъ вѡ́инства, и҆дѣ́же мч҃нчєскаѧ селє́нїѧ, и҆дѣ́же премꙋ́дрыхъ а҆пⷭ҇лъ ли́цы вопїю́тъ: бл҃гослове́нъ бг҃ъ ѻ҆тє́цъ на́шихъ.

Бг҃оро́диченъ: Ты̀ є҆ди́на бг҃ꙋ всѧ́чєскаѧ мꙋ́дростїю созда́вшемꙋ мт҃и позна́ласѧ є҆сѝ неискꙋсобра́чнаѧ, дв҃о пречⷭ҇таѧ. тѣ́мже тѝ бл҃гоче́стнѡ взыва́юще глаго́лемъ: бл҃гослове́на ꙗ҆́же бг҃а пло́тїю ро́ждши.

Пѣ́снь и҃.

І҆рмо́съ: Въ пе́щь ѻ҆́гненнꙋю ко ѻ҆трокѡ́мъ є҆врє́йскимъ снизше́дшаго, и҆ пла́мень въ ро́сꙋ прело́жшаго бг҃а, по́йте дѣла̀ ꙗ҆́кѡ гдⷭ҇а, и҆ превозноси́те во всѧ̑ вѣ́ки.

Сщ҃еннодѣ́йствовавъ бл҃гоче́стнѡ хрⷭ҇то́вꙋ слꙋ́жбꙋ та́йнꙋю, слове́сное ѻ҆вча̀ са́мъ прине́слсѧ є҆сѝ є҆мꙋ̀ же́ртва прїѧ́тна и҆ бл҃гоꙋго́дна, всесоверша́ема кро́вїю, пребл҃же́нне.

Сщ҃е́нства ѻ҆де́ждꙋ дѣ́лы твои́ми премꙋ́дре, ᲂу҆краси́въ, ꙗ҆ви́лсѧ є҆сѝ цѣломꙋ́дрїѧ ключа́рь, воздержа́нїѧ пи́ща и҆́стиннаѧ, мл҃твы ᲂу҆чи́тель, покаѧ́нїѧ наста́вникъ, и҆ зако́нъ жи́зни.

Предложе́нїю вре́мѧ, покаѧ́нїю пло́дъ при́снѡ предлага́емь, и҆ смоко́вница непло́днаѧ посѣче́нїемъ прети́тъ: дꙋшѐ моѧ̀, проклѧ́тїѧ ᲂу҆бо́йсѧ, воспрїими́ же хрⷭ҇та̀, бл҃гопло́дїе добродѣ́тельное.

Бг҃оро́диченъ: Не пре́зри, застꙋ́пнице стра́шнаѧ, гла́са ра̑бъ твои́хъ и҆ ѿ всѧ́кїѧ бѣды̀ и҆ преще́нїѧ лю́тагѡ, дв҃о ст҃а́ѧ, всѣ́хъ и҆схитѝ: преклонѧ́етъ бо бг҃а мт҃рнѧѧ мл҃тва твоѧ̀.

Пѣ́снь ѳ҃.

І҆рмо́съ: Ѿ бг҃а бг҃а сло́ва, неизече́нною мꙋ́дростїю, прише́дшаго ѡ҆бнови́ти а҆да́ма, ꙗ҆́дїю въ тлѣ́нїе па́дшаго лю́тѣ, ѿ ст҃ы́ѧ дв҃ы неизрече́ннѡ воплоти́вшагосѧ на́съ ра́ди, вѣ́рнїи є҆диномꙋ́дреннѡ пѣ́сньми велича́емъ.

<<ч҃є: 189>>

Оу҆вѧди́лъ є҆сѝ ѻ҆́тче, разли̑чныѧ вра̑жїѧ стрѣ́лы, ѻ҆гне́мъ воздержа́нїѧ, и҆ чистоты̀ ᲂу҆́глїемъ, пло́тскꙋю попали́въ ти́нꙋ, и҆́стинныѧ та́мѡ сꙋ́щїѧ свѣ́тлости пресла́внѡ сподо́билсѧ є҆сѝ.

Свѣтоно́снаѧ твоѧ̀, ѻ҆́тче, возсїѧ́вши па́мѧть, просвѣща́етъ дꙋ́шы бл҃гоговѣ́йнѡ сїю̀ соверша́ющихъ, досточꙋ́дне, и҆ прича́стники бж҃їѧ свѣ́та ꙗ҆вле́ннѡ си́хъ соверша́етъ: ю҆́же досто́йнѡ, бг҃омꙋ́дре, пѣ́сньми велича́емъ.

Вѣне́цъ носѧ́ща тѧ̀, ѻ҆́тче, и҆ по́честь побѣ́ды прїи́мша ѿ бж҃їѧ десни́цы, и҆ по́двиги сконча́вша, и҆ свѣ́та и҆спо́лньшасѧ бж҃їѧ, вѣ́рꙋюще вѣ́рнїи ко хрⷭ҇тꙋ̀ моле́бника те́пла тѧ̀ предлага́емъ.

Бг҃оро́диченъ: Ꙗ҆́кѡ бцⷣꙋ тѧ̀, дв҃о и҆ мт҃рь сло́ва, хода́таицꙋ сꙋ́щꙋю на́мъ, присносꙋ́щнагѡ бж҃їѧ живота̀, и҆ пра́вды со́лнце возсїѧ́вшꙋю на́мъ, вѣ́рнїи є҆диномꙋ́дреннѡ пѣ́сньми велича́емъ.

Свѣти́ленъ.

Подо́бенъ: Нб҃о ѕвѣзда́ми:

Ꙗ҆́кѡ сщ҃енномч҃нкъ, вѧза́ти и҆ рѣша́ти и҆мѣ́ѧй вла́сть, разрѣшѝ ѕѡ́лъ мои́хъ сою́зъ, и҆ къ любвѝ бж҃їей причти́ мѧ и҆ црⷭ҇твїѧ прича́стника, бл҃же́нне, содѣ́лай мл҃твами твои́ми.

Бг҃оро́диченъ: Просвѣтѝ чтⷭ҇аѧ, дꙋ́шꙋ мою̀ грѣхѝ потемнѣ́вшꙋю, и҆ вѣ́чнꙋющагѡ мѧ̀ пла́мене и҆ мра́ка и҆зба́ви хода́тайствомъ твои́мъ, ꙗ҆́кѡ да съ весе́лїемъ хвалю̀ твоѐ вели́чїе.

На хвали́техъ стїхи̑ры, гла́съ д҃.

Подо́бенъ: Да́лъ є҆сѝ зна́менїе:

Бл҃года́ть дꙋхо́внаѧ, ꙳ и҆́мⷬ҇къ, ѻ҆́тче тебѣ̀ возсїѧ́вши, ꙳ свѣ́тлѡ просвѣти́ тѧ: ꙳ ѿсю́дꙋ ᲂу҆ма́ли страстнꙋ́ю но́щь, ꙳ и҆ безстра́стїѧ де́нь пости́же, ꙳ чи́стѣ чтⷭ҇ѣ́йшемꙋ свѣ́тꙋ совокꙋ́пльсѧ. ꙳ ѡ҆ не́мже жи́тельствꙋѧ, ꙳ не забꙋ́ди бг҃огла́се сщ҃енномч҃нче, ꙳ вѣ́рою пою́щихъ па́мѧть твою̀. [Два́жды.]

Бл҃года́ть жела́ннꙋю, ꙳ сщ҃енномч҃нче, и҆́мⷬ҇къ, носѧ̀ нбⷭ҇нꙋю, ꙳ земны́ѧ же небре́глъ є҆сѝ: ꙳ сегѡ̀ ра́ди ꙗ҆́кѡ безпло́тенъ, ꙳ страда́льческое и҆збра́лъ є҆сѝ житїѐ, ꙳ ꙗ҆́кѡ присносꙋ́щнагѡ пото́ка пи́щи, ꙳ бл҃гонаслади́тисѧ хотѧ̀ бг҃опрїѧ́тне, ꙳ и҆ слеза́ми мѝ <<ч҃є ѡ҆б.: 190>> и҆зсꙋши́лъ є҆сѝ, мꙋ́тный и҆сто́чникъ страсте́й, и҆ напои́лъ є҆сѝ дꙋшепи̑щныѧ кла́сы.

Тѣ́ло преѡби́дѣлъ є҆сѝ ꙳ ᲂу҆ранѧ́емое бїе́ньми, ꙳ и҆ ѻ҆гню̀ приближа́емое: ꙳ ᲂу҆́мъ бо впери́лъ є҆сѝ непобѣди́мымъ жела́нїемъ, ꙳ прекра́сною добро́тою, ꙳ бжⷭ҇твеннагѡ рачи́телѧ, ꙳ є҆гѡ́же сла́дкимъ ᲂу҆ѧзви́всѧ жела́нїемъ, ꙳ мч҃нкѡвъ ᲂу҆добре́нїе, ст҃и́телей ᲂу҆краше́нїе, ꙳ страда́льче, и҆́мⷬ҇къ, а҆́гг҃лѡвъ собесѣ́дниче.

Сла́ва, гла́съ д҃:

Но́въ са́дъ ꙗ҆́коже ма́слина, на бж҃їей трапе́зѣ положи́лсѧ є҆сѝ, ꙗ҆́кѡ сы́нъ ходѧ́щихъ по пꙋтѝ гдⷭ҇ню: мꙋче́нїѧ ра́ди бл҃гословѝ тѧ̀ гдⷭ҇ь, и҆ ᲂу҆́зриши бл҃га̑ѧ вы́шнѧгѡ сїѡ́на, наслажда́ѧсѧ бж҃е́ственнагѡ ра́дованїѧ со всѣ́ми ст҃ы́ми, сщ҃енномч҃нче, и҆́мⷬ҇къ, достойнопѣ́тый: и҆̀мже ѻ҆́бщники на́съ бы́ти мольба́ми твои́ми сотворѝ.

И҆ ны́нѣ, бг҃оро́диченъ:

Бцⷣе, всѣ́хъ цр҃и́це, правосла́вныхъ похвало̀, є҆реті́чествꙋющихъ шата̑нїѧ разорѝ, и҆ ли́ца и҆́хъ посрамѝ, не кла́нѧющихсѧ нижѐ чтꙋ́щихъ пречⷭ҇таѧ, чⷭ҇тны́й тво́й ѡ҆́бразъ.

Крⷭ҇тобг҃оро́диченъ: Распина́ема ви́дѧщи, ꙳ и҆ въ ре́бра пробода́ема копїе́мъ, пречⷭ҇таѧ, хрⷭ҇та̀ чл҃вѣколю́бца, ꙳ пла́чꙋщи вопїѧ́ше: ꙳ что̀ сїѐ сн҃е мо́й; ꙳ что̀ тебѣ̀ неблагода́рнїи лю́дїе возда́ша, ꙳ вмѣ́стѡ ꙗ҆̀же сотвори́лъ є҆сѝ дѡ́браѧ и҆̀мъ, ꙳ и҆ тщи́шисѧ безча́дствовати мѧ̀ вселюбе́знѣйше; ꙳ дивлю́сѧ бл҃гоꙋтро́бне, ꙳ твоемꙋ̀ во́льномꙋ распѧ́тїю.

А҆́ще и҆́мать, Сла́вꙋ на стїхо́внѣ, глаго́ли вече́рнїй.

И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.

Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.