Слꙋ́жба мч҃нкѡмъ
<<п҃є: 169>>
[глⷡ҇а є҃і] СЛꙊ́ЖБА Ѻ҆́БЩА
мч҃нкѡмъ, двѣма̀ и҆ мнѡ́гимъ.
Ве́чера,
на Гдⷭ҇и воззва́хъ, стїхи̑ры, гла́съ д҃.
Подо́бенъ: Ꙗ҆́кѡ до́блѧ:
Просвѣти́вшесѧ дх҃омъ ст҃ы́мъ прехва́льнїи, ꙳ на мїроде́ржца ѡ҆полчи́стесѧ, ꙳ и҆ кѡ́зни є҆гѡ̀ мꙋ́жески побѣди́сте, ꙳ посо́бїемъ бж҃їимъ ꙳ на него̀ подви́гшесѧ. ꙳ тѣ́мъ дне́сь пресвѣ́тлꙋю ва́шꙋ па́мѧть соверша́юще, ꙳ по до́лгꙋ хвала́ми ва́ше ꙳ почита́емъ страда́нїе.
Ра́намъ преда́вшесѧ ꙳ и҆ мꙋ́камъ ст҃і́и, ꙳ непрекло́нни премꙋ́дростїю пребы́сте, ꙳ ꙗ҆́кѡ свѣ́щы разже́гшесѧ ꙳ теплото́ю дꙋхо́вною, ꙳ просвѣти́сте сердца̀ вѣ́рныхъ бл҃года́тїю. ꙳ тѣ́мже всѧ́ческїй ро́дъ и҆ во́зрастъ ꙳ пра́зднꙋетъ ст҃ꙋ́ю ва́шꙋ па́мѧть, ꙳ пѣ́сньми сла́вѧще гдⷭ҇а.
Свѣ́тлостїю мч҃нцы чꙋде́съ ва́шихъ ꙳ всю̀ просвѣти́сте тва́рь, ꙳ ѿгна́вше мглꙋ̀ страсте́й и҆ скорбе́й ꙳ ѿ притека́ющихъ къ ва́мъ, ꙳ и҆ вѣ́рою просѧ́щихъ ꙳ ва́шегѡ застꙋпле́нїѧ, ꙳ до́блїи страда́льцы сп҃совы: ꙳ тѣ́мже вѣ́рою ст҃о́е и҆ свѣтоно́сное ва́ше соверша́емъ торжество̀.
Сла́ва, и҆ ны́нѣ, бг҃оро́диченъ:
Де́мѡнскими преклоне́на прилѡ́ги, и҆ въ ро́въ поги́бели вве́ржена, ᲂу҆ще́дри влⷣчце, и҆ ᲂу҆тверди́ мѧ на ка́мени добродѣ́тели, и҆ навѣ́ты вра̑жїѧ разори́вши, сподо́би мѧ̀ твори́ти повелѣ̑нїѧ твоегѡ̀ сн҃а, и҆ бг҃а на́шегѡ: ꙗ҆́кѡ да ᲂу҆лꙋчꙋ̀ ѡ҆ставле́нїе въ де́нь сꙋда̀.
<<п҃є ѡ҆б.: 170>>
Крⷭ҇тобг҃оро́диченъ: Распина́ема ви́дѧщи, ꙳ и҆ въ ре́бра пробода́ема копїе́мъ, ꙳ пречⷭ҇таѧ хрⷭ҇та̀ чл҃вѣколю́бца, ꙳ пла́чꙋщи вопїѧ́ше: ꙳ что̀ сїѐ сн҃е мо́й; ꙳ что̀ тебѣ̀ неблагода́рнїи лю́дїе возда́ша, ꙳ вмѣ́стѡ ꙗ҆̀же сотвори́лъ є҆сѝ дѡ́браѧ и҆̀мъ, ꙳ и҆ тщи́шисѧ безча́дствовати мѧ̀ вселюбе́знѣйше; ꙳ дивлю́сѧ бл҃гоꙋтро́бне, твоемꙋ̀ во́льномꙋ распѧ́тїю.
А҆́ще и҆́мꙋтъ самогла́сенъ, Сла́ва, гла́съ г҃:
Сѐ ко́ль добро̀, и҆ ко́ль красно̀, самобра́тнаѧ любо́вь мч҃нкъ твои́хъ хрⷭ҇тѐ бж҃е: и҆̀хже бо ржⷭ҇тво̀ плотско́е бра́тїй не сотворѝ, но братолю́бнаѧ вѣ́ра мꙋ́дрствовати и҆ до кро́ве наꙋчи́ла є҆́сть: мл҃твами и҆́хъ, хрⷭ҇тѐ бж҃е, сп҃сѝ дꙋ́шы на́шѧ.
И҆ ны́нѣ, бг҃оро́диченъ:
Бцⷣе предста́тельнице всѣ́хъ молѧ́щихсѧ тебѣ̀. тобо́ю дерза́емъ, и҆ тобо́ю хва́лимсѧ, и҆ къ тебѣ̀ всѐ ᲂу҆пова́нїе на́ше є҆́сть: молѝ ро́ждшагосѧ и҆з̾ тебѐ за непотрє́бныѧ рабы̑ твоѧ̑.
Крⷭ҇тобг҃оро́диченъ.
Подо́бенъ: Ве́лїѧ крⷭ҇та̀ твоегѡ̀:
Зрѧ́щи ро́ждшагосѧ ѿ тебѐ всенепоро́чнаѧ, повѣ́шена на дре́вѣ, пла́чꙋщи вопїѧ́ла є҆сѝ: возлю́бленное моѐ ча́до, гдѣ̀ твоѧ̀ за́йде добро́та свѣтоно́снаѧ, ᲂу҆добри́вшагѡ ро́дъ человѣ́ческїй;
А҆́ще пра́зднꙋеши съ полѷеле́емъ. И҆ ны́нѣ, бг҃оро́диченъ воскрⷭ҇ный: Ка́кѡ не диви́мсѧ:
Вхо́дъ. Прокі́менъ днѐ.
Чтє́нїѧ г҃ мч҃нчєскаѧ, [пи̑саны въ концѣ̀ кни́ги сеѧ̀.]
На стїхо́внѣ стїхи̑ры, гла́съ д҃.
Подо́бенъ: Ꙗ҆́кѡ до́блѧ:
Ꙗ҆́кѡ ѕвѣ́зды многосвѣ̑тлыѧ, ꙳ стрⷭ҇тоте́рпцы прехва́льнїи, ꙳ бж҃е́ственными свѣтлостьмѝ ꙳ ѡ҆зарѧ́ете вселе́нныѧ концы̀, ꙳ де́мѡнскагѡ ѡ҆мраче́нїѧ, ꙳ и҆ страсте́й тлетво́рныхъ и҆ бѣ́дъ и҆з̾има́юще. ꙳ тѣ́мже дне́сь свѣ́тлое и҆ свѣтоно́сное ꙳ и҆ ст҃о́е ва́ше торжество̀, ꙳ соше́дшесѧ восхва́лимъ сла́внїи.
<<п҃ѕ: 171>>
Сті́хъ: Воззва́ша првⷣнїи, и҆ гдⷭ҇ь ᲂу҆слы́ша и҆̀хъ.
Чꙋ́днїи бжⷭ҇твеннїи, ꙳ премꙋ́дрїи стрⷭ҇тоте́рпцы, ꙳ пѣ́сньми сщ҃е́нными ꙳ да почтꙋ́тсѧ: ꙳ трⷪ҇цꙋ бо несозда́ннꙋю ꙳ пред̾ врагѝ сщ҃е́ннѡ проповѣ́дающе, ꙳ многобо́жнꙋю ᲂу҆гаси́ша ле́сть кро́вными и҆злїѧ̑нїи, ꙳ и҆ сла́вꙋ прїѧ́ша неꙋвѧда́емꙋю.
Сті́хъ: Мно́ги скѡ́рби првⷣнымъ, и҆ ѿ всѣ́хъ и҆̀хъ и҆зба́витъ ѧ҆̀ гдⷭ҇ь.
Мꙋчи́телѧ беззако́нна, ꙳ беззако́ннѡ повелѣва́ющаго, поклони́тисѧ ꙳ и҆ чє́сти принестѝ безслове́снымъ богѡ́мъ бездꙋ̑шнымъ ꙳ бл҃же́ннїи, мꙋ́дрѣ посрами́сте, ꙳ мч҃нцы великоимени́тїи. ꙳ и҆ пострада́вше терпѣли́внѡ и҆ зако́ннѡ, ꙳ вѣнцы̀ и҆сплето́сте побѣ́ды, ѡ҆ мі́рѣ молѧ́щесѧ.
Сла́ва, гла́съ ѕ҃: По́лкъ бг҃овѣнча́ненъ ны́нѣ ꙗ҆́вльшихсѧ мч҃нкъ, заколе́нїе непоро́чное за хрⷭ҇та̀ пожре́ное ᲂу҆се́рднѡ, ст҃оизбра́нное во́инство, мч҃нколю́бцы прїиди́те, всесщ҃е́ннꙋю па́мѧть дꙋхо́внѡ соверши́вше возопїе́мъ къ ни̑мъ: сокрꙋши́те сверѣ́пство а҆га́рѧнъ безбо́жныхъ, и҆ и҆зба́вите лю́ди бл҃гочестномꙋ́дрєнныѧ мл҃твами ва́шими всѧ́кагѡ ѡ҆бстоѧ́нїѧ.
И҆ ны́нѣ, бг҃оро́диченъ:
Бг҃а и҆з̾ тебѐ воплоти́вшагосѧ разꙋмѣ́хомъ, бцⷣе дв҃о: того̀ молѝ ѡ҆ сп҃се́нїи дꙋ́шъ на́шихъ.
Крⷭ҇тобг҃оро́диченъ: Зрѧ́щи ро́ждшагосѧ непоро́чнаѧ и҆ бг҃оневѣ́стнаѧ ꙗ҆́кѡ ѡ҆сꙋжде́на, и҆ ко крⷭ҇тꙋ̀ пригвожда́ема, вопїѧ́ше: сла́ва твоемꙋ̀, сн҃е мо́й, долготерпѣ́нїю, и҆ мно́гомꙋ млⷭ҇рдїю.
Тропа́рь во ᲂу҆ста́вѣ.
А҆́ще нѣ́сть ᲂу҆ста́ва, глаго́ли се́й тропа́рь, гла́съ а҃:
Болѣ́зньми ст҃ы́хъ, и҆́миже ѡ҆ тебѣ̀ пострада́ша, ᲂу҆моле́нъ бꙋ́ди гдⷭ҇и, и҆ всѧ̑ на́шѧ болѣ̑зни и҆сцѣлѝ, чл҃вѣколю́бче, мо́лимсѧ.
Сла́ва, и҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.
<<п҃ѕ ѡ҆б.: 172>>
На ᲂу҆́трени,
на Бг҃ъ гдⷭ҇ь, тропа́рь то́йже.
По а҃-й каѳі́смѣ сѣда́ленъ, гла́съ д҃.
Подо́бенъ: Ꙗ҆ви́лсѧ є҆сѝ:
Чⷭ҇тнꙋ́ю тве́рдь цр҃ко́внꙋю, ꙗ҆́кѡ ѕвѣ́зды велича́йшыѧ просвѣща́ете при́снѡ, и҆ вѣ̑рныѧ ѡ҆зарѧ́ете, мч҃нцы бж҃е́ственнїи хрⷭ҇то́вы во́ини. [Два́жды.]
Сла́ва, и҆ ны́нѣ, бг҃оро́диченъ:
Въ кро́въ тво́й, пречⷭ҇таѧ дв҃о, прибѣга́ющихъ, мольбꙋ̀ прїе́млеши ѿ на́съ, не преста́й молѧ́щи чл҃вѣколю́бца, сп҃стѝ рабы̑ твоѧ̑.
По в҃-й каѳі́смѣ, сѣда́ленъ, гла́съ д҃.
Подо́бенъ: Вознесы́йсѧ:
Мꙋ́жественнѣйшимъ по́мысломъ преше́дше мꙋче́нїе, чꙋ́днїи стрⷭ҇тоте́рпцы сквозѣ̀ ѻ҆́гнь и҆ во́дꙋ проидо́сте, и҆ преминꙋ́сте ко сп҃се́нїѧ широтѣ̀, наслѣ́дїе прїе́мше нбⷭ҇ное црⷭ҇тво. въ не́мже твори́те ѡ҆ на́съ бж҃е́ствєнныѧ мольбы̑, мꙋ́дрїи великомч҃нцы. [Два́жды.]
Сла́ва, и҆ ны́нѣ, бг҃оро́диченъ:
И҆̀же бл҃года́рнѡ воспѣва́ющїи ѿ се́рдца, и҆ просѧ́щїи прилѣ́жнѡ твоѧ̑ млⷭ҇ти, бцⷣе влⷣчце, рабы̑ твоѧ̑ зовꙋ́тъ и҆ глаго́лютъ: прест҃а́ѧ дв҃о, предварѝ и҆ и҆зба́ви ѿ вра̑гъ ви́димыхъ и҆ неви́димыхъ, и҆ всѧ́кагѡ преще́нїѧ: ты́ бо є҆сѝ на́ше застꙋпле́нїе.
По Хвали́те и҆́мѧ гдⷭ҇не:
Припѣ́въ: Велича́емъ ва́съ, стрⷭ҇тоте́рпцы ст҃і́и: и҆ чте́мъ чтⷭ҇на̑ѧ страда̑нїѧ ва̑ша, ꙗ҆̀же за хрⷭ҇та̀ претерпѣ́ли є҆стѐ.
Ѱало́мъ и҆збра́нный: Бг҃ъ на́мъ прибѣ́жище и҆ си́ла:
По полѷеле́и, сѣда́ленъ, гла́съ и҃:
Ведо́ми бы́сте свѧ́зани ѿ врагѡ́въ, и҆ въ темни́цѣ заключе́ни на времена̀ мнѡ́га, вѣ́рою соблюда́еми, невре́дни пребы́сте <<п҃з: 173>> и҆ ѿрѣ́шшесѧ мечѝ тѣле́съ, ст҃і́и, бжⷭ҇твеннымъ жела́нїемъ ꙗ҆́вѣ свѧза́стесѧ: тѣ́мже ꙗ҆́кѡ свѣти̑ла просїѧ́сте въ мі́рѣ, всѧ̑ просвѣща́юще дх҃а бл҃года́тїю, стрⷭ҇тоте́рпцы бл҃же́ннїи. моли́те хрⷭ҇та̀ бг҃а, грѣхѡ́въ ѡ҆ставле́нїе дарова́ти, пра́зднꙋющымъ любо́вїю ст҃ꙋ́ю па́мѧть ва́шꙋ. [Два́жды.]
Сла́ва, и҆ ны́нѣ, бг҃оро́диченъ:
Ꙗ҆́кѡ дв҃ꙋ и҆ є҆ди́нꙋ въ жена́хъ, тѧ̀ без̾ сѣ́мене ро́ждшꙋю бг҃а пло́тїю, всѝ ᲂу҆бл҃жа́емъ ро́ди человѣ́честїи: ѻ҆́гнь бо всели́сѧ въ тѧ̀ бжⷭ҇тва̀, и҆ ꙗ҆́кѡ млⷣнца дои́ши зижди́телѧ и҆ гдⷭ҇а. тѣ́мъ а҆́гг҃льскїй и҆ человѣ́ческїй ро́дъ, досто́йнѡ сла́вимъ прест҃о́е ржⷭ҇тво̀ твоѐ, и҆ согла́снѡ вопїе́мъ тѝ: молѝ хрⷭ҇та̀ бг҃а, согрѣше́нїй ѡ҆ставле́нїе дарова́ти, покланѧ́ющымсѧ вѣ́рою прест҃о́мꙋ ржⷭ҇твꙋ̀ твоемꙋ̀.
Степє́нна, а҃-й а҆нтїфѡ́нъ д҃-гѡ гла́са.
Прокі́менъ: Воззва́ша првⷣнїи, и҆ гдⷭ҇ь ᲂу҆слы́ша и҆̀хъ.
Сті́хъ: Мнѡ́ги скѡ́рби првⷣнымъ, и҆ ѿ всѣ́хъ и҆́хъ и҆зба́витъ ѧ҆̀ гдⷭ҇ь.
Всѧ́кое дыха́нїе: Є҆ѵⷢ҇лїе мч҃нческое.
По н҃-мъ ѱалмѣ̀, стїхи́ра, гла́съ в҃:
Прїиди́те возра́дꙋемсѧ гдⷭ҇ви, въ па́мѧть стрⷭ҇тоте́рпцєвъ, ѽ празднолю́бцы! прїиди́те воспое́мъ та́йнѡ, восхвалѧ́юще страда́лєцъ хрⷭ҇то́выхъ, ле́сть і҆́дѡльскꙋю па́гꙋбѣ преда́вшихъ, и҆ хрⷭ҇та̀ посредѣ̀ сꙋди́ща ꙗ҆́снѡ проповѣ́давшихъ. тѣ́мже, ѽ всебл҃же́ннїи и҆ многострада́льнїи, не преста́йте молѧ́щесѧ ѡ҆ дꙋша́хъ на́шихъ.
А҆́ще ли м҃ мч҃нкъ, и҆ ты̀ глаго́ли прокі́менъ:
Проидо́хомъ сквозѣ̀ ѻ҆́гнь и҆ во́дꙋ, и҆ и҆зве́лъ є҆сѝ ны̀ въ поко́й.
Сті́хъ: Разже́глъ ны̀ є҆сѝ, ꙗ҆́коже разжиза́етсѧ сребро̀.
Стїхи́ра, гла́съ в҃:
Прⷪ҇ро́чески вопїѧ́ше дв҃дъ во ѱалмѣ́хъ: проидо́хомъ сквозѣ̀ ѻ҆́гнь и҆ во́дꙋ, и҆ и҆зве́лъ ны̀ є҆сѝ въ поко́й: вы́ же мч҃нцы хрⷭ҇то́вы, самѣ́ми дѣ́лы сло́во и҆сполнѧ́юще, проидо́сте сквозѣ̀ ѻ҆́гнь и҆ во́дꙋ, и҆ внидо́сте въ црⷭ҇тво нбⷭ҇ное. тѣ́мже моли́тесѧ четы́редесѧте сꙋ́ще страда́льцы, дарова́ти на́мъ ве́лїю млⷭ҇ть.
<<п҃з ѡ҆б.: 174>>
Канѡ́нъ, гла́съ є҃.
Пѣ́снь а҃.
І҆рмо́съ: Сп҃си́телю бг҃ꙋ, въ мо́ри лю́ди немо́крыми нога́ми наста́вльшемꙋ, и҆ фараѡ́на со всево́инствомъ пото́пльшемꙋ, томꙋ̀ є҆ди́номꙋ пои́мъ, ꙗ҆́кѡ просла́висѧ.
Бг҃омꙋ́дреннѡ вѣ́рнїи, во́ины хрⷭ҇то́вы и҆ стрⷭ҇тоте́рпцы воспое́мъ ꙗ҆́кѡ потреби́тєли ле́сти, и҆ побѣди́тєли свѣ́тлы, бг҃ꙋ побѣ́днꙋю пѣ́снь пою́ще: ꙗ҆́кѡ просла́висѧ.
На землѝ страда́льцы подвиза́вшесѧ свѣ́тлѡ, мꙋ̑ки претерпѣ́сте, и҆ на нб҃сѣ́хъ вѣнцы̀ прїѧ́сте, согла́снѡ воспѣва́юще пѣ́снь побѣ́днꙋю: ꙗ҆́кѡ просла́висѧ.
Є҆ди́нствомъ дꙋше́внымъ свѧ́зани вѣ́рнѡ, ѿ ле́сти ѿврати́стесѧ, и҆ побѣди́тєли вѣнцено́сцы ꙗ҆ви́стесѧ, согла́снѡ воспѣва́юще пѣ́снь побѣ́днꙋю: ꙗ҆́кѡ просла́висѧ.
Бг҃оро́диченъ: Пречⷭ҇таѧ мт҃и бж҃їѧ, воплоще́ннаго и҆з̾ тебѐ, и҆ ѿ нѣ́дръ роди́тельныхъ не ѿлꙋчи́вшагосѧ бг҃а непреста́ннѡ молѝ, ѿ всѧ́кагѡ ѡ҆бстоѧ́нїѧ сп҃стѝ, ꙗ҆̀же созда̀.
Пѣ́снь г҃.
І҆рмо́съ: Си́лою крⷭ҇та̀ твоегѡ̀ хрⷭ҇тѐ, ᲂу҆твердѝ моѐ помышле́нїе, во є҆́же пѣ́ти и҆ сла́вити сп҃си́тельное твоѐ вознесе́нїе.
Ра́зꙋмомъ хрⷭ҇то́вымъ во́ини ᲂу҆кра́шени, нечести́ваго врага̀ потопи́сте стрꙋѧ́ми крове́й ва́шихъ.
Тѣ́ло своѐ преда́вше гѡ́рькимъ и҆ лю̑тымъ мꙋ́камъ достохва́льнїи мч҃нцы, бж҃е́ственное наслѣ́дїе воспрїѧ́сте вѣ́рою.
Ка́меннымъ стрⷭ҇тоте́рпцы мета́нїемъ повелѣ́нїемъ мꙋчи́телѧ сокрꙋша́еми, бл҃говѣ́рїѧ держа́вꙋ крѣ́пкѡ соблюдо́сте.
Бг҃оро́диченъ: Непреста́ннѡ молѝ чⷭ҇таѧ, съ мч҃нки, проше́дшаго и҆з̾ чре́слъ твои́хъ, и҆зба́вити ѿ ле́сти дїа́воли пою́щыѧ тѧ̀ всенепоро́чнаѧ.
Сѣда́ленъ, гла́съ д҃.
Подо́бенъ: Вознесы́йсѧ:
Во́ини хрⷭ҇то́вы до́блїи, подви́гшесѧ до́брѣ, лꙋка́ваго врага̀ до конца̀ потопи́ша кро́вными стрꙋѧ́ми, ка́менїемъ сокрꙋша́еми <<п҃и: 175>> и҆ мечѝ ссѣка́еми, ѻ҆гне́мъ сожига́еми и҆ въ во́дꙋ вмета́еми, вѣнцено́сцы показа́шасѧ ꙗ҆́вѣ: тѣ́мже что́ми сꙋ́ть, и҆ вѣ́рою сла́вими.
Сла́ва, и҆ ны́нѣ, бг҃оро́диченъ:
Не премолчи́мъ при́снѡ бцⷣе дв҃о, бл҃года́рственнѡ воспѣва́ти ѿ се́рдца твоѧ̑ млⷭ҇ти влⷣчце, рабѝ твоѝ вопїю́ще и҆ глаго́люще: прест҃а́ѧ дв҃о, предварѝ, и҆ и҆зба́ви на́съ ѿ вра̑гъ ви́димыхъ и҆ неви́димыхъ, и҆ ѿ нꙋ́жды и҆ всѧ́кагѡ преще́нїѧ, ты́ бо є҆сѝ на́ше застꙋпле́нїе.
Крⷭ҇тобг҃оро́диченъ:
Дв҃а и҆ а҆́гница ви́дѣвши на крⷭ҇тѣ̀ без̾ сѣ́мене и҆з̾ неѧ̀ а҆́гнца ро́ждшагосѧ, и҆ копїе́мъ прободе́на, печа́ли ᲂу҆ѧ́звлена стрѣла́ми, вопїѧ́ше болѣ́зненнѡ восклица́ющи: что̀ но́вое та́инство, ка́кѡ ᲂу҆мира́еши, и҆́же живота̀ є҆ди́нъ гдⷭ҇ь, тѣ́мже воскрⷭ҇нѝ, па́дшаго воздвиза́ѧ пра́ѻтца.
Пѣ́снь д҃.
І҆рмо́съ: Оу҆слы́шахъ слꙋ́хъ си́лы крⷭ҇та̀, ꙗ҆́кѡ ра́й ѿве́рзесѧ и҆́мъ, и҆ возопи́хъ: сла́ва си́лѣ твое́й, гдⷭ҇и.
Бг҃олюби́выми содержи́ми ѻ҆бы́чаи, бг҃опроти́внаго врага̀ страда́льческїй ли́къ побѣди́лъ є҆́сть, бл҃года́тїю сп҃совою ᲂу҆крѣплѧ́емь.
Бг҃озва́нный по́лкъ стрⷭ҇тоте́рпєцъ хрⷭ҇то́выхъ, бг҃опроти́вныхъ мно́жество ѕлочести́выхъ вра̑гъ побѣди́сте, воспѣва́юще: сла́ва си́лѣ твое́й гдⷭ҇и.
Свѣ́тъ непристꙋ́пный ви́дѣвше стрⷭ҇тоте́рпцы, въ темни́цѣ сѣдѧ́ще, многобо́жїѧ тьмꙋ̀ і҆́дѡльскїѧ ле́сти разори́ша, бж҃їею си́лою ᲂу҆крѣплѧ́еми.
Бг҃оро́диченъ: Ѡ҆сѣни́ тѧ, дв҃о, вы́шнѧгѡ си́ла, и҆ ра́й содѣ́ла тѧ̀, живо́тное дре́во и҆мꙋ́щи посредѣ̀, хода́таѧ и҆ гдⷭ҇а.
Пѣ́снь є҃.
І҆рмо́съ: Оу҆́тренююще вопїе́мъ тѝ, гдⷭ҇и, сп҃си́ ны: ты́ бо є҆сѝ бг҃ъ на́шъ, ра́звѣ бо тебѐ и҆но́гѡ не зна́емъ.
<<п҃и ѡ҆б.: 176>>
Словесы̀ воспита́ни дх҃а ст҃а́гѡ, і҆́дѡльское безслове́сїе мч҃нцы ᲂу҆праздни́ша.
Ѕвѣ́зды свѣтонѡ́сныѧ бы́вше стрⷭ҇тоте́рпцы, и҆ цвѣ́ты вѣ́ры, бл҃гоꙋха̑нїѧ и҆спꙋща́юще.
Ни́ва ꙗ҆ви́стесѧ ст҃і́и вы́шнѧгѡ, серпы̀ мꙋче́нїѧ пожина́еми всехва́льнїи.
Бг҃оро́диченъ: Не преста́й молѧ́щи бцⷣе, є҆го́же родила̀ є҆сѝ, сп҃стѝ дꙋ́шы на́шѧ, прилѣ́жнѡ воспѣва́ющихъ тѧ̀.
Пѣ́снь ѕ҃.
І҆рмо́съ: Ѡ҆бы́де мѧ̀ бе́здна, гро́бъ мнѣ̀ ки́тъ бы́сть, а҆́зъ же возопи́хъ къ тебѣ̀ чл҃вѣколю́бцꙋ, и҆ сп҃се́ мѧ десни́ца твоѧ̀, гдⷭ҇и.
Веселѧ́щесѧ мч҃нцы вопїѧ́хꙋ: въ рꙋцѣ̀ твоѝ, влⷣко чл҃вѣколю́бче, прїимѝ дꙋ́хи на́шѧ, и҆ поко́й и҆̀хъ, тебе́ бо лю́бимъ є҆ди́наго многомлⷭ҇тиваго.
А҆́гг҃лѡмъ равносе́льницы бы́ша ли́къ мч҃нкъ твои́хъ чл҃вѣколю́бче: тече́нїе бо сконча́вше, ны́нѣ мо́лѧтъ сп҃сти́сѧ дꙋша́мъ на́шымъ.
Мч҃нческаѧ сла́ва, мч҃нческаѧ красота̀, мч҃нческїй ли́че бг҃оизбра́нный, прилѣ́жно моли́те сп҃сти́сѧ всѣ̑мъ прибѣга́ющымъ къ ва́мъ.
Бг҃оро́диченъ: Зача́тїѧ твоегѡ̀ безсѣ́меннагѡ чꙋ́до, ко́е сло́во и҆зрещѝ мо́жетъ, пренепоро́чнаѧ; бг҃а бо зачала̀ є҆сѝ, за млⷭ҇рдїе къ на́мъ прише́дшаго.
Конда́къ во ᲂу҆ста́вѣ.
А҆́ще ли нѣ́сть ᲂу҆ста́ва, глаго́ли се́й конда́къ, гла́съ и҃:
Подо́бенъ: Вы́шнихъ и҆щѧ̀:
Свѣти́льницы свѣ́тлїи ꙗ҆́вльшесѧ, бж҃е́ственнїи мч҃нцы, тва́рь всю̀ свѣ́тлостїю чꙋде́съ ѡ҆зарѧ́ете, недꙋ́ги разрѣша́юще, и҆ глꙋбо́кꙋю тьмꙋ̀ всегда̀ ѿгонѧ́юще, хрⷭ҇тꙋ̀ бг҃ꙋ молѧ́щесѧ непреста́ннѡ ѡ҆ всѣ́хъ на́съ.
І҆́косъ: Кра́сный ли́че, свѣтоза́рнїи и҆ бж҃е́ственнїи свѣти́льницы, свѣ́тꙋ вели́комꙋ предстоѧ́ще при́снѡ, бг҃обл҃же́ннїи мч҃нцы, и҆ ѿтꙋ́дꙋ и҆спꙋща́емыми невече́рнѧгѡ бжⷭ҇тва̀ сїѧ̑нїи, <<п҃ѳ: 177>> всегда̀ просвѣща́еми и҆ ѡ҆божа́еми, вѣ́рою па́мѧть ва́шꙋ соверша́ющыѧ бж҃е́ственнꙋю просвѣти́те, и҆ ѡ҆мраче́нїѧ и҆ страсте́й и҆ бѣ́дъ и҆ ѕло́бы и҆зба́вите, молѧ́щесѧ непреста́ннѡ ѡ҆ всѣ́хъ на́съ.
Пѣ́снь з҃.
І҆рмо́съ: Въ пещѝ ѻ҆́гненнѣй пѣсносло́вцы сп҃сы́й ѻ҆́троки, бл҃гослове́нъ бг҃ъ ѻ҆тє́цъ на́шихъ.
Въ пещѝ хрⷭ҇тѐ, стрⷭ҇тоте́рпцы твоѝ вопїѧ́хꙋ: бл҃гослове́нъ бг҃ъ ѻ҆тє́цъ на́шихъ.
Просвѣще́ни свѣ́томъ трⷪ҇ческимъ страда́льцы, съ весе́лїемъ дꙋ́шы своѧ̑ преда́ша, пою́ще: бл҃гослове́нъ бг҃ъ ѻ҆тє́цъ на́шихъ.
Предстоѧ́ще бг҃ꙋ вѣнцено́сцы страда́льцы съ весе́лїемъ, томꙋ̀ за ны̀ моли́тесѧ.
Бг҃оро́диченъ: Ꙗ҆́кѡ сп҃се́нїе на́ше, тѧ̀ бцⷣе, мо́лимъ: молѝ за ны̀ вопло́щшагосѧ и҆з̾ тебѐ.
Пѣ́снь и҃.
І҆рмо́съ: И҆з̾ ѻ҆ц҃а̀ пре́жде вѣ̑къ рожде́ннаго сн҃а и҆ бг҃а, и҆ въ послѣ̑днѧѧ лѣ̑та воплоще́ннаго ѿ дв҃ы мт҃ре, свѧще́нницы по́йте, лю́дїе превозноси́те во всѧ̑ вѣ́ки.
Съ мч҃нки бꙋ́ди проше́нїе на́ше вѣ́рныхъ, и҆ тѣ́хъ наслѣ́дїѧ прича́стницы бꙋ́демъ, хрⷭ҇та̀ пою́ще, и҆ превозносѧ́ще є҆го̀ во вѣ́ки.
Ра́достїю серде́чною, ли́къ терпѣли́выхъ страда́лєцъ, ѿ хрⷭ҇та̀ вѣнцы̀ бг҃олѣ́пнѡ прїе́млетъ, и҆ свѣ́тлѡ пое́тъ, и҆ превозно́ситъ є҆го̀ во вѣ́ки.
Стрꙋѧ́ми крове́й ва́шихъ ѡ҆багри́вшесѧ достохва́льнїи, и҆ на нб҃сѣ́хъ во вѣ́ки со хрⷭ҇то́мъ ца́рствꙋете, бл҃гоче́стнѡ пою́ще, и҆ превозносѧ́ще є҆го̀ во вѣ́ки.
Бг҃оро́диченъ: Херꙋві̑мъ вы́шши ꙗ҆ви́ласѧ є҆сѝ, бцⷣе чтⷭ҇аѧ, во чре́вѣ твое́мъ сѣдѧ́щаго на ни́хъ поне́сши: є҆го́же со безпло́тными земні́и славосло́вимъ, и҆ превозно́симъ во вѣ́ки.
Пѣ́снь ѳ҃.
І҆рмо́съ: Тѧ̀ па́че ᲂу҆ма̀ и҆ словесѐ мт҃рь бж҃їю, въ лѣ́то безлѣ́тнаго неизрече́ннѡ ро́ждшꙋю, вѣ́рнїи є҆диномꙋ́дреннѡ велича́емъ.
<<п҃ѳ ѡ҆б.: 178>>
За ѻ҆́бщее сп҃се́нїе моли́тесѧ, пресла́внїи мч҃нцы, хрⷭ҇тꙋ̀ предстоѧ́ще, є҆гѡ́же ра́ди и҆ мꙋ̑ки претерпѣ́сте.
Си́лою крѣ́пкою преле́стнꙋю тве́рдость низложи́сте непобѣди́мїи, и҆ ны́нѣ въ жили́щахъ нбⷭ҇ныхъ со а҆́гг҃лы жи́ти сподо́бистесѧ.
Зако́нными ѻ҆бы̑чаи мч҃нческими побѣди́вше го́рдаго мꙋчи́телѧ, и҆ вѣнцы̀ прїѧ́сте пра́вєдныѧ всечестні́и.
Бг҃оро́диченъ: Ра́дꙋйсѧ бцⷣе мт҃и хрⷭ҇та̀ бг҃а, є҆го́же родила̀ є҆сѝ, молѝ съ мч҃нки, грѣхѡ́въ ѡ҆ставле́нїе дарова́ти вѣ́рою воспѣва́ющымъ тѧ̀.
Свѣти́ленъ:
Взѧ́стесѧ стрⷭ҇тоно́сцы, во свѣтови̑днаѧ ра̑йскаѧ селє́нїѧ, ѡ҆блача́еми во свѣ́тлꙋю ри́зꙋ, ю҆́же и҆стка́сте многови́дными ка́зньми, и҆ предстоитѐ прⷭ҇то́лꙋ зижди́телевꙋ, ѡ҆ всѣ́хъ прилѣ́жнѡ молѧ́щесѧ.
Бг҃оро́диченъ: Держа́внымъ твои́мъ покро́вомъ чтⷭ҇аѧ, на́съ рабѡ́въ твои́хъ сохранѧ́й всегда̀, ѿ навѣ̑тъ вра́жїихъ неврежде́нныхъ: тѧ́ бо є҆ди́нꙋ стѧжа́хомъ прибѣ́жище въ напа́стехъ.
На хвали́техъ стїхи̑ры, гла́съ и҃.
Подо́бенъ: Ѽ пресла́внагѡ чꙋдесѐ!
Мч҃нцы хрⷭ҇то́вы прехва́льнїи, ꙳ гони́телей стремлє́нїѧ, ꙳ и҆ нꙋ́жднꙋю сме́рть нивочто́же вмѣни́вше, ꙳ и҆ бл҃годе́рзостнѡ ѡ҆полчи́вшесѧ, ꙳ мꙋжемꙋ́дреннѡ къ боре́нїємъ, ꙳ побѣдоно́сною сла́вою ѡ҆дѣ́ѧстесѧ, ꙳ и҆ причто́стесѧ всѣ̑мъ пра́вєднымъ, ꙳ съ ни́миже ва́съ всегда̀ хва́лѧще, ᲂу҆бл҃жа́емъ. [Два́жды.]
Мч҃нцы хрⷭ҇то́вы пребл҃же́ннїи, ꙳ на во́льное заколе́нїе ꙳ са́ми себѐ преда́сте, ꙳ и҆ зе́млю кро́вьми ва́шими ѡ҆ст҃и́сте, ꙳ и҆ воздꙋ́хъ просвѣти́сте преставле́нїемъ. ꙳ ны́нѣ же живетѐ на нб҃сѣ́хъ во свѣ́тѣ невече́рнѣмъ, ꙳ ѡ҆ на́съ всегда̀ молѧ́щесѧ бг҃ови́дцы.
Мч҃нцы хрⷭ҇то́вы непобѣди́мїи, ꙳ мꙋ́къ разжже́нїе ꙳ росо́ю бжⷭ҇твенныѧ блгⷣти ꙳ без̾ вре́да преидо́сте, ꙳ и҆ на водѣ̀ поко́йнѣ жи́ти сподо́бистесѧ, ꙳ вѣнцы̀ побѣ́ды прїе́мше. ꙳ тѣ́мъ ра́дꙋющесѧ дне́сь, пра́зднꙋемъ ст҃ꙋ́ю ва́шꙋ па́мѧть, ꙳ хрⷭ҇та̀ сла́вѧще.
<<ч҃: 179>>
Сла́ва, гла́съ и҃:
Во́инствовавше хрⷭ҇тꙋ̀, ꙗ҆̀же на землѝ кра̑снаѧ ѡ҆ста́висте, и҆ крⷭ҇тъ на ра́мена взе́мше, мꙋ́къ ра́ди многоплете́нныхъ томꙋ̀ послѣ́довали є҆стѐ, и҆ пред̾ царѝ и҆ мꙋчи́тели мно́гими не ѿверго́стесѧ є҆гѡ̀, а҆́гг҃ли вѣнцы̀ побѣ́дными главы̑ ва́шѧ ᲂу҆вѧзо́ша, дерзнове́ннїи дꙋше́ю, свѣ́тлѡ въ черто́гъ вели́кїй внидо́сте. тѣ́мже дерзнове́нїе и҆мꙋ́ще ко сп҃сꙋ всѣ́хъ, моли́тесѧ ѡ҆ дꙋша́хъ на́шихъ.
И҆ ны́нѣ, бг҃оро́диченъ:
А҆рха́гг҃ла гаврїи́ла гла́съ воспрїи́мше рце́мъ: ра́дꙋйсѧ, мт҃и бж҃їѧ, ꙗ҆́же жизнода́вца хрⷭ҇та̀ мі́рꙋ ро́ждши.
Крⷭ҇тобг҃оро́диченъ: Гдⷭ҇и, ꙳ є҆гда̀ тѧ̀ сл҃нца првⷣнаго ꙳ ви́дѣ со́лнце на дре́вѣ повѣ́шена, ꙳ лꙋчы̀ скры̀, ꙳ и҆ лꙋна̀ свѣ́тъ во тьмꙋ̀ преложѝ: ꙳ всенепоро́чнаѧ же твоѧ̀ мт҃и ꙳ ᲂу҆тро́бою ᲂу҆ѧзвлѧ́шесѧ.
А҆́ще и҆́мать Сла́вꙋ на стїхо́внѣ, и҆ ты̀ глаго́ли вече́рнїй.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.