Слꙋ́жба прпⷣбнымъ
<<ѻ҃д: 147>>
[глⷡ҇а г҃і] СЛꙊ́ЖБА Ѻ҆́БЩА
прпⷣбнымъ двѣма̀ и҆ мнѡ́гимъ.
Ве́черъ,
На Гдⷭ҇и воззва́хъ, стїхи̑ры. Гла́съ и҃.
Подо́бенъ: Ѽ пресла́внагѡ чꙋдесѐ!
Прпⷣбнїи ѻ҆тцы̀ бг҃омꙋ́дрїи, ꙳ слѣпы̑мъ дае́те свѣ́тъ, ꙳ болѧ́щымъ и҆сцѣле́нїе, ꙳ и҆ хромы̑мъ здра́вїе, ꙳ млⷭ҇тивнѡ приклонѧ́ющесѧ ꙳ къ приходѧ́щымъ вѣ́рою ко хра́мꙋ ва́шемꙋ, ꙳ и҆ просѧ́щымъ по́мощи ва́шеѧ: ꙳ застꙋ́пники бо и҆ предста́тєли вѣ́рнїи всѝ ѡ҆брѣто́хомъ, ꙳ восхвалѧ́юще ва́съ.
Прпⷣбнїи ѻ҆тцы̀ всечтⷭ҇ні́и, ꙳ добродѣ́тельми возше́дше на колесни́цꙋ, ꙳ къ бг҃ꙋ востеко́сте, ꙳ побѣ̑дныѧ по́чєсти прїе́млюще: ꙳ и҆ ꙗ҆́кѡ ми́лѡть на́мъ тѣлеса̀ ва̑ша ꙳ положє́на во гробѣ́хъ, ѻ҆тцы̀, ѡ҆ста́вили є҆стѐ, ꙳ и҆сточа́ти и҆сцѣлє́нїѧ, ꙳ и҆ прогони́ти дꙋ́хи лꙋка̑выѧ: ꙳ тѣ́мже бл҃жи́мъ ва́съ прехва́льнїи.
Ликѡ́мъ по́стничєскимъ сочта́стесѧ, ᲂу҆кра́шшесѧ бл҃же́ннїи ꙳ по́стническимъ житїе́мъ, ꙳ и҆ ны́нѣ въ нбⷭ҇ныхъ ѻ҆би́телехъ живетѐ веселѧ́щесѧ, ꙳ и҆дѣ́же ликꙋ́ютъ а҆́гг҃ли: ꙳ и҆ свѣ́томъ бж҃е́ственнымъ ꙳ вои́стиннꙋ ѡ҆божа́еми, ꙳ помина́йте любо́вїю бл҃жа́щихъ ва́съ на землѝ, ꙳ и҆ ст҃о́е ва́ше творѧ́щихъ пра́зднество.
Сла́ва, и҆ ны́нѣ, бг҃оро́диченъ:
Помышлє́нїѧ нечи̑ста, и҆ ᲂу҆стна̀ льсти̑ва, дѣла́ же моѧ̑ всѧ̑ ѡ҆сквернє́на: и҆ что̀ сотворю̀, ка́кѡ ᲂу҆срѧ́щꙋ сꙋдїю̀; влⷣчце дв҃о, молѝ сн҃а твоего̀ и҆ зижди́телѧ и҆ гдⷭ҇а, ꙗ҆́кѡ да въ покаѧ́нїи прїи́метъ дꙋ́хъ мо́й, ꙗ҆́кѡ є҆ди́нъ бл҃гоꙋтро́бенъ.
Крⷭ҇тобг҃оро́диченъ: Ю҆́ница нескве́рнаѧ, ю҆нца̀ ви́дѧщи на дре́вѣ пригвожда́ема во́лею, рыда́ющи жа́лостнѣ, ᲂу҆вы̀ мнѣ̀, вопїѧ́ше, <<ѻ҃д ѡ҆б.: 148>> люби́мѣйшее ча́до! что́ ти со́нмъ воздадѐ небл҃года́рный є҆вре́йскїй, хотѧ́ мѧ ѡ҆безча́дствовати ѿ тебѐ вселюбе́зне;
А҆́ще и҆́мꙋтъ, самогла́сенъ.
Сла́ва, гла́съ ѕ҃:
Прпⷣбнїи ѻ҆тцы̀, во всю̀ зе́млю и҆зы́де вѣща́нїе и҆справле́нїй ва́шихъ: тѣ́мъ на нб҃сѣ́хъ ѡ҆брѣто́сте мздꙋ̀ трꙋдѡ́въ ва́шихъ, де́мѡнѡвъ разрꙋши́сте полкѝ, а҆́гг҃лѡвъ достиго́сте чи́ны, и҆́хже житїю̀ непоро́чнѡ поревнова́сте: дерзнове́нїе и҆мꙋ́ще ко гдⷭ҇ꙋ, ми́ръ и҆спроси́те дꙋша́мъ на́шымъ.
И҆ ны́нѣ, бг҃оро́диченъ:
Бцⷣе дв҃о чⷭ҇таѧ, моли́сѧ гдⷭ҇ви, ꙗ҆́кѡ да твои́ми мл҃твами пода́стъ дꙋша́мъ на́шымъ грѣхѡ́въ ѡ҆ставле́нїе, и҆ ми́ръ, и҆ ве́лїю млⷭ҇ть.
Крⷭ҇тобг҃оро́диченъ: На дре́вѣ живо́тъ на́шъ зрѧ́щи всенепоро́чнаѧ бцⷣе ви́сѧщъ, мт҃рски рыда́ющи вопїѧ́ла є҆сѝ: сн҃е мо́й, и҆ бж҃е мо́й, сп҃сѝ любо́вїю пою́щыѧ тѧ̀.
[зрѝ] А҆́ще пра́зднꙋеши съ полѷеле́емъ, глаго́ли бг҃оро́диченъ: воскрⷭ҇ный:
Кто̀ тебѐ не ᲂу҆бл҃жи́тъ:
Вхо́дъ. Прокі́менъ днѐ.
и҆ чтє́нїѧ прпⷣбничєскаѧ, [пи̑сана въ концѣ̀ кни́ги сеѧ̀.]
На стїхо́внѣ стїхи̑ры, гла́съ д҃.
Подо́бенъ: Ꙗ҆́кѡ до́блѧ:
Во хрⷭ҇та̀ ѡ҆бле́кшесѧ, ꙳ тлѣ́емагѡ человѣ́ка бг҃омꙋ́дреннѡ совле́кшесѧ, ꙳ тѣ́мъ дꙋхо́вною бл҃года́тїю ꙳ при́снѡ просвѣща́еми, ꙳ ꙗ҆́кѡ ѕвѣ́зды свѣ̑тлыѧ ꙳ мі́рови просїѧ́ли є҆стѐ, ꙳ молѧ́щесѧ ѿ тлѝ и҆ бѣ́дъ и҆зба́витисѧ, ꙳ вѣ́рою соверша́ющымъ ꙳ при́снѡ честнꙋ́ю па́мѧть ва́шꙋ.
Сті́хъ: Чтⷭ҇на̀ пред̾ гдⷭ҇емъ сме́рть прпⷣбныхъ є҆гѡ̀.
Ны́нѣ пи́щꙋ воспрїе́млюще, ꙳ и҆ свѣ́томъ ѡ҆гражда́еми, ꙳ и҆ жи́знь вѣ́чнꙋю наслѣ́дствꙋюще, ꙳ къ ва́мъ прибѣга́ющыѧ ѿ бѣ́дъ и҆зба́вите, ꙳ и҆ и҆скꙋше́нїй разли́чныхъ, ꙳ и҆ всѧ́кагѡ ѡ҆ѕлобле́нїѧ, ꙳ бг҃омꙋ́дреннѡ къ бг҃ꙋ дерзнове́нїе стѧжа́вше, ꙳ и҆ любо́вь показꙋ́юще ꙳ вои́стиннꙋ хрⷭ҇топодо́бнꙋю.
<<ѻ҃є: 149>>
Сті́хъ: Бл҃же́нъ мꙋ́жъ боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀.
Бг҃оно́сцы вседи́внїи, ꙳ трⷪ҇цѣ побо́рницы, ꙳ къ мїродержи́телевꙋ боре́нїю ꙳ мꙋ́жескою мꙋ́дростїю ѡ҆полчи́вшесѧ, ꙳ того̀ низложи́сте тве́рдыми сплетє́нїи, ꙳ и҆ побѣ́дными ᲂу҆вѧзо́стесѧ вѣнцы̀: ꙳ сегѡ̀ ра́ди бж҃е́ственнꙋю ꙳ и҆ свѣтоно́снꙋю соверша́емъ ва́шꙋ па́мѧть, ꙳ ѡ҆сщ҃а́еми бл҃года́тїю.
Сла́ва, гла́съ и҃:
Прпⷣбнїи ѻ҆тцы̀, мі́ра красоты̀ и҆ пи́щи вре́мєнныѧ ѿню́дъ возненави́дѣвше, и҆ и҆́ноческое житїѐ па́че возлю́бльше, а҆́гг҃лѡмъ собесѣ̑дницы бы́сте: и҆ свѣти́льницы многосвѣ́тлїи вселе́ннѣй, чꙋдеса́ми ꙗ҆́коже второ́е со́лнце сїѧ́ете. но ѡ҆ всѣ́хъ на́съ помина́йте, соверша́ющихъ сщ҃е́ннꙋю па́мѧть ва́шꙋ: мы́ бо ча̑да ва́ша, и҆ ѻ҆́вцы слове́сныхъ ва́шихъ ᲂу҆че́нїй, ва́съ на по́мощь призыва́емъ, просѧ́ще ва́ми прїѧ́ти ми́ръ, и҆ ве́лїю млⷭ҇ть.
И҆ ны́нѣ, бг҃оро́диченъ: воскр҃сенъ: Безневѣ́стнаѧ дв҃о:
А҆́ще ли не пра́зднꙋеши, глаго́ли се́й бг҃оро́диченъ:
А҆́зъ, дв҃о ст҃а́ѧ бцⷣе, къ покро́вꙋ твоемꙋ̀ прибѣга́ю: вѣ́мъ, ꙗ҆́кѡ ѡ҆брѧ́щꙋ тобо́ю сп҃се́нїе, мо́жеши бо, чтⷭ҇аѧ, помощѝ мнѣ̀.
Крⷭ҇тобг҃оро́диченъ: Тѧ̀ ви́дѧщи пригвожда́ема на крⷭ҇тѣ̀ і҆и҃се, и҆ стрⷭ҇ти прїе́млюща во́лею влⷣко, дв҃а и҆ мт҃и твоѧ̀, ᲂу҆вы̀ мнѣ̀, вопїѧ́ше, ча́до сла́дкое: ра̑ны непра́веднѡ ка́кѡ терпи́ши, врачꙋ̀ и҆сцѣли́вый человѣ́ческое неможе́нїе, и҆ ѿ тлѝ всѧ̑ и҆зба́вивый бл҃гоꙋтро́бїемъ твои́мъ;
Тропа́рь во ᲂу҆ста́вѣ.
А҆́ще ли нѣ́сть ᲂу҆ста́ва, глаго́ли се́й тропа́рь, гла́съ д҃:
Бж҃е ѻ҆тє́цъ на́шихъ, творѧ́й при́снѡ съ на́ми по твое́й кро́тости, не ѿста́ви млⷭ҇ть твою̀ ѿ на́съ: но мл҃твами и҆́хъ въ ми́рѣ ᲂу҆пра́ви живо́тъ на́шъ.
Сла́ва, и҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.
<<ѻ҃є ѡ҆б.: 150>>
На ᲂу҆́трени,
на Бг҃ъ гдⷭ҇ь, тропа́рь то́йже.
По а҃-мъ стїхосло́вїи сѣда́ленъ, гла́съ д҃.
Подо́бенъ: Ско́рѡ предварѝ:
Свѣти́льницы пресвѣ́тлїи и҆́стины хрⷭ҇то́вы, мі́ръ просвѣти́сте ᲂу҆че́нїемъ ва́шимъ, ѻ҆тцы̀ бг҃оглаго́ливїи: погꙋби́вше є҆́рєси ѕловѣ́рныхъ хꙋ̑льникъ, погаси́сте пла́мєннаѧ хꙋ́лѧщихъ смꙋщє́нїѧ, тѣ́мъ ꙗ҆́кѡ хрⷭ҇то́вы ᲂу҆го́дницы всѣ́хъ просвѣща́ете. [Два́жды.]
Сла́ва, и҆ ны́нѣ, бг҃оро́диченъ:
Дв҃о всенепоро́чнаѧ, ꙗ҆́же пресꙋ́щнаго бг҃а ро́ждшаѧ, со прпⷣбными того̀ непреста́ннѡ молѝ, ѡ҆ставле́нїе прегрѣше́нїй и҆ и҆справле́нїе житїѧ̀ да́ти на́мъ, пре́жде конца̀ вѣ́рою и҆ любо́вїю пою́щымъ тѧ̀ по до́лгꙋ є҆ди́на всепѣ́таѧ.
По в҃-мъ стїхосло́вїи сѣда́ленъ, гла́съ и҃:
Ѿреко́стесѧ пло́ти хрⷭ҇та̀ ра́ди, и҆ дꙋхо́внїи ꙗ҆ви́вшесѧ лю́демъ води́телїе, ᲂу҆слы́шасте словеса̀ та́йныхъ ᲂу҆че́нїй: мона́хѡмъ же ꙗ҆ви́стесѧ пра́вило пра́вости, стра̑сти всѧ̑ крѣ́постїю попра́вше. тѣ́мъ и҆ кѡва́рства бѣсѡ́въ до конца̀ попали́вше, къ немꙋ̀ и҆зрѧ́днѡ всегда̀ бг҃оно́снїи ѻ҆тцы̀ моли́тесѧ грѣхѡ́въ ѡ҆ставле́нїе пода́ти, чтꙋ́щымъ любо́вїю ст҃ꙋ́ю па́мѧть ва́шꙋ. [Два́жды.]
Сла́ва, и҆ ны́нѣ, бг҃оро́диченъ:
Сѐ тебѐ ро́ди родѡ́въ сла́вѧтъ, ꙗ҆́коже прорекла̀ є҆сѝ ѻ҆трокови́це: созда́телѧ во всѣ́хъ была̀ є҆сѝ пала́та и҆ бж҃е́ственный хра́мъ, къ не́мже всели́сѧ вы́шнїй, и҆ пло́тїю ѡ҆бложи́сѧ, да сп҃се́тъ на́съ.
По Хвали́те и҆́мѧ гдⷭ҇не:
Припѣ́въ:
Оу҆бл҃жа́емъ ва́съ прпⷣбнїи ѻ҆тцы̀, и҆ чте́мъ ст҃ꙋ́ю па́мѧть ва́шꙋ, наста́вницы мона́хѡвъ, и҆ собесѣ́дницы а҆́гг҃лѡвъ.
Ѱало́мъ и҆збра́нный: Терпѧ̀ потерпѣ́хъ гдⷭ҇а:
<<ѻ҃ѕ: 151>>
По полѷеле́и сѣда́ленъ, гла́съ и҃.
Подо́бенъ: Премꙋ́дрости:
Є҆гда̀ бл҃же́ннїи къ бжⷭ҇твенномꙋ жела́нїю ᲂу҆́мъ сво́й впери́сте, тогда̀ ѡ҆ста́вили є҆стѐ всѧ̑ до́лꙋ влекꙋ̑щаѧ мꙋдрѡва́нїѧ, и҆ въ пꙋсты́ню все́льшесѧ, ꙗ҆́кѡ крі́нъ процвѣто́сте добродѣ́тельми прекра́снїи, страсте́й и҆скорени́вше те́рнїе, въ не́й насади́сте плоды̀ трꙋдѡ́въ ва́шихъ. тѣ́мже и҆ пожа́вше рꙋкоѧ́ти бога́тство неѿе́млемое на нб҃сѣ́хъ, ѻ҆тцы̀ прпⷣбнїи, моли́те хрⷭ҇та̀ бг҃а, согрѣше́нїй ѡ҆ставле́нїе дарова́ти, чтꙋ́щымъ вѣ́рою ст҃ꙋ́ю па́мѧть ва́шꙋ. [Два́жды.]
Сла́ва, и҆ ны́нѣ, бг҃оро́диченъ:
Ѡ҆ тебѣ̀ ра́дꙋетсѧ, блгⷣтнаѧ, всѧ́каѧ тва́рь, а҆́гг҃льскїй собо́ръ и҆ человѣ́ческїй ро́дъ, ѡ҆сщ҃е́нный хра́ме, и҆ раю̀ слове́сный, двⷭ҇твеннаѧ похвало̀, и҆з̾ неѧ́же бг҃ъ воплоти́сѧ, и҆ млⷣнецъ бы́сть, пре́жде вѣ̑къ сы́й бг҃ъ на́шъ: ложесна́ бо твоѧ̑ прⷭ҇то́лъ сотворѝ, и҆ чре́во твоѐ простра́ннѣе нб҃съ содѣ́ла. ѡ҆ тебѣ̀ ра́дꙋетсѧ, блгⷣтнаѧ, всѧ́каѧ тва́рь, сла́ва тебѣ̀.
Степє́нна, а҃-й а҆нтїфѡ́нъ д҃-гѡ гла́са.
Прокі́менъ: Чтⷭ҇на̀ пред̾ гдⷭ҇емъ сме́рть прпⷣбныхъ є҆гѡ̀.
Сті́хъ: Что̀ возда́мъ гдⷭ҇ви ѡ҆ всѣ́хъ, ꙗ҆̀же воздаде́ ми;
Всѧ́кое дыха́нїе:
Сті́хъ: Хвали́те бг҃а во ст҃ы́хъ є҆гѡ̀:
Є҆ѵⷢ҇лїе прпⷣбныхъ. [Пи́сано въ концѣ̀ кни́ги сеѧ̀].
По н҃-мъ ѱалмѣ̀ стїхи́ра, гла́съ ѕ҃:
И҆́же на землѝ а҆́гг҃ли, и҆ на нб҃сѝ человѣ́цы бж҃їи, мі́ра бл҃го́е ᲂу҆краше́нїе, и҆ бл҃ги́хъ пита́телей ᲂу҆добре́нїе, мона́хѡвъ и҆ прпⷣбныхъ похвалꙋ̀, вели́кихъ ѻ҆тцє́въ почти́мъ: насажде́ни бо въ домꙋ̀ гдⷭ҇и, и҆ процвѣто́ша пра́веднѡ, и҆ ꙗ҆́кѡ ке́дри въ пꙋсты́ни, ᲂу҆мно́жили є҆стѐ ста́до хрⷭ҇то́во слове́сныхъ ѻ҆ве́цъ, въ преподо́бїи и҆ пра́вдѣ.
Канѡ́нъ, гла́съ в҃.
Пѣ́снь а҃.
І҆рмо́съ: Грѧди́те лю́дїе, пои́мъ пѣ́снь хрⷭ҇тꙋ̀ бг҃ꙋ, раздѣ́льшемꙋ мо́ре, и҆ наста́вльшемꙋ лю́ди, ꙗ҆̀же и҆зведѐ и҆з̾ рабо́ты є҆гѵ́петскїѧ, ꙗ҆́кѡ просла́висѧ.
<<ѻ҃ѕ ѡ҆б.: 152>>
Просвѣще́нїемъ трисо́лнечнагѡ бж҃ества̀ ѡ҆зари́вшесѧ премꙋ́дрїи, свѣти̑ла ꙗ҆ви́стесѧ, просвѣща́ете вѣ́рнѡ сїѧ̑, свѣтоно́снꙋю ва́шꙋ па́мѧть чтꙋ́щихъ.
Вы̀ всѝ творцꙋ̀ возложи́вше себѐ, всѐ дꙋхо́вное жела́нїе и҆злїѧ́сте къ немꙋ̀: сегѡ̀ ра́ди дꙋхо́внꙋю бл҃года́ть воспрїѧ́ли є҆стѐ.
Свѣ́томъ бл҃года́ти ѡ҆зарѧ́еми прпⷣбнїи, вѣ́рою па́мѧть ва́шꙋ торжествꙋ́ющихъ просвѣти́те, и҆ ѿ тьмы̀ грѣхо́вныѧ мл҃твами ва́шими и҆зба́вите.
Бг҃оро́диченъ: Пло́тїю безпло́тнаго поро́ждши, бг҃ороди́тельнице пречтⷭ҇аѧ, тѣле́сныхъ на́съ и҆ дꙋше́вныхъ скве́рнъ ѡ҆мы́й, ѡ҆кропле́нїемъ бж҃е́ственныѧ твоеѧ̀ мл҃твы.
Пѣ́снь г҃.
І҆рмо́съ: Оу҆твердѝ на́съ въ тебѣ̀ гдⷭ҇и, дре́вомъ ᲂу҆мерщве́й грѣ́хъ, и҆ стра́хъ тво́й всадѝ въ сердца̀ на́съ пою́щихъ тѧ̀.
Напои́вше дꙋ́шы сле́зными потѡ́ки содѣ́ѧсте и҆̀хъ прпⷣбнїи плодонѡ́сны, добродѣ́тєли всѧ́кїѧ и҆зносѧ́ще чꙋде́съ показа̑нїи пресла́внїи.
И҆сцѣле́нїе содѣва́етъ бж҃е́ственный хра́мъ ва́шъ, и҆ ѿго́нитъ болѣ̑зни человѣ́чєскїѧ, и҆ ᲂу҆крѣплѧ́етъ мꙋдрѡва́нїѧ и҆́хъ, восхвали́ти трꙋды̑ ва́шѧ всечестні́и.
Со враго́мъ дре́вле бо́ршесѧ воздержа́нїемъ, и҆ ны́нѣ крѣ́постїю поста́вивше на него̀ побѣ́дꙋ прпⷣбнїи, мꙋ́жески претерпѣ́сте, и҆ низложи́сте бѣсѡ́въ шата̑нїѧ.
Бг҃оро́диченъ: И҆з̾ ложе́снъ твои́хъ дв҃о, вели́кое сл҃нце возсїѧ̀: пресла́внѡ просвѣти́въ зємна́ѧ, прпⷣбныхъ ли́къ прїѧ́лъ є҆́сть.
Сѣда́ленъ, гла́съ д҃.
Подо́бенъ: Ꙗ҆ви́лсѧ є҆сѝ дне́сь:
Жите́йское мо́ре воздержа́нїемъ без̾ трꙋда̀ преплы́вше, ко приста́нищꙋ мы́сленномꙋ безстра́стїѧ приста́ли є҆стѐ, прпⷣбнїи ѻ҆тцы̀ и҆ бг҃омꙋ́дрїи.
Сла́ва, и҆ ны́нѣ, бг҃оро́диченъ:
Дѣ́вство и҆ ржⷭ҇тво̀ вы́ше є҆стества̀ и҆ сло́ва въ тебѣ̀ бцⷣе, стеко́стасѧ, ꙗ҆́кѡ, бг҃а вопло́щшасѧ породила̀ є҆сѝ сп҃са дꙋ́шъ на́шихъ.
<<ѻ҃з: 153>>
Крⷭ҇тобг҃оро́диченъ: На дре́вѣ ви́дѧщи воздви́жена сн҃а твоего̀, пречⷭ҇таѧ, ᲂу҆тро́бою мт҃рски растерза́ющисѧ, взыва́ла є҆сѝ: ᲂу҆вы̀ мнѣ̀, ка́кѡ заше́лъ є҆сѝ, свѣ́те мо́й безлѣ́тный;
Пѣ́снь д҃.
І҆рмо́съ: Оу҆слы́шахъ, гдⷭ҇и, сла́вное твоѐ смотре́нїе, и҆ просла́вихъ, чл҃вѣколю́бче, непостижи́мꙋю твою̀ си́лꙋ.
Ꙗ҆́кѡ хрⷭ҇то́во смире́нїе возлюби́вше, вознесо́стесѧ безстра́стїемъ, и҆ смири́сте всѧ̑ бѣсѡ́вскїѧ горды̑ни.
Возсїѧ́вше ꙗ҆́кѡ со́лнце ѿ восто́ка, чꙋде́съ лꙋча́ми просвѣща́ете, прпⷣбнїи, всю̀ подсо́лнечнꙋю.
Кади́ло бл҃гоꙋха́нїѧ всеви́дцꙋ прпⷣбнїи, своѧ̑ мл҃твы принесо́сте, ꙗ҆̀же ѡ҆бонѧ̀, и҆ прїѧ́тъ, въ по́стномъ кꙋ́пнѡ пра́здницѣ ᲂу҆строѧ́етъ.
Бг҃оро́диченъ: Бл҃жи́тъ тѧ̀ пречⷭ҇таѧ, прпⷣбныхъ ли́къ, и҆ всѧ́ка дꙋша̀ вѣ́рныхъ: бж҃їе бо сло́во па́че ᲂу҆ма̀ и҆ сло́ва родила̀ є҆сѝ.
Пѣ́снь є҃.
І҆рмо́съ: Свѣ́та пода́телю, и҆ вѣкѡ́въ тво́рче гдⷭ҇и, во свѣ́тѣ твои́хъ повелѣ́нїй наста́ви на́съ: ра́звѣ бо тебѐ и҆но́гѡ бг҃а не зна́емъ.
Є҆ди́ной любвѝ хрⷭ҇то́вѣ вы̀ прило́жшесѧ дꙋша́ми, и҆ потща́вшесѧ и҆спо́лнитєли бы́ти бж҃їихъ за́повѣдей, мно́гихъ чꙋде́съ прїѧ́сте бл҃года́ть пресла́внїи.
Неѕло́бивы и҆ кро́тцы, всѧ̑ ѕлѡ́бы вра̑жїѧ погꙋби́сте, ми́лостиви до конца̀ ꙗ҆́вльшесѧ: ѿ є҆ди́нагѡ же млⷭ҇тивагѡ прїѧ́сте бл҃года́ть и҆́стиннꙋю и҆ сп҃си́тельнꙋю.
Зако́номъ и҆ мл҃твою и҆ посто́мъ всегда̀ претерпѣва́сте, въ безстра́стїе ѡ҆дѣ́ѧстесѧ, пло́тскїй ра́зꙋмъ смири́вше крѣ́постїю ст҃а́гѡ дх҃а.
Бг҃оро́диченъ: Воспо́йте гдⷭ҇ви пѣ́снь но́вꙋ, по́йте же и҆́мени возсїѧ́вшемꙋ бг҃олѣ́пнѡ и҆з̾ чре́ва неискꙋсобра́чныѧ, и҆ сїю̀ вѣ̑рнымъ показа́вшꙋ тве́рдꙋю наде́ждꙋ и҆ похвалꙋ̀.
Пѣ́снь ѕ҃.
І҆рмо́съ: Въ бе́зднѣ грѣхо́внѣй валѧ́ѧсѧ, неизслѣ́днꙋю млⷭ҇рдїѧ твоегѡ̀ призыва́ю бе́зднꙋ: ѿ тлѝ, бж҃е, мѧ̀ возведѝ.
<<ѻ҃з ѡ҆б.: 154>>
Кропле́нїемъ вели́кихъ пѡ́двигъ ва́шихъ ѻ҆тцы̀, побѣди́ли є҆стѐ бѣсѡ́въ ли́ца, распе́ншемꙋсѧ на́съ ра́ди гдⷭ҇ꙋ ᲂу҆гожда́юще прпⷣбнїи.
Бл҃гі̑ѧ нра́вы ѻ҆тцы̀ стѧжа́вше, ѿ бл҃года́телѧ бг҃а да́ръ прїѧ́сте бога́тнѡ, и҆ сего̀ подае́те тре́бꙋющымъ прпⷣбнїи.
Дарова́нїй напо́лнившесѧ дх҃о́вныхъ ѻ҆тцы̀, непрїѧ́знєнныѧ дꙋ́хи повинꙋ́сте ꙗ҆́кѡ ᲂу҆́мны и҆ разꙋ́мны, къ бг҃ꙋ ѿню́дъ прилежа́сте.
Бг҃оро́диченъ: Дꙋшє́вныѧ моѧ̑ стра̑сти и҆сцѣлѝ, безстра́стїѧ бы́вши и҆сто́чникъ, просвѣти́вшаѧ ли́ки прпⷣбныхъ ѻ҆тє́цъ ржⷭ҇тво́мъ твои́мъ.
Конда́къ во ᲂу҆ста́вѣ.
А҆́ще ли нѣ́сть ᲂу҆ста́ва, глаго́ли се́й конда́къ, гла́съ в҃.
Подо́бенъ: Вы́шнихъ и҆щѧ̀:
Волне́нїй мно́жество невла́жнѡ проходѧ́ще, безплѡ́тныѧ врагѝ стрꙋѧ́ми сле́зъ ва́шихъ крѣ́пкѡ погрꙋзи́ли є҆стѐ бг҃омꙋ́дрїи и҆ прпⷣбнїи: и҆ чꙋде́съ да́ръ прїи́мше, моли́те непреста́ннѡ ѡ҆ всѣ́хъ на́съ.
І҆́косъ: Премно́жествомъ добродѣ́телей ва́шихъ прпⷣбнїи, ꙗ҆́кѡ са́дъ кра́сный и҆спо́лнь сꙋ́ще, и҆ ꙗ҆́кѡ ѿ раѧ̀ процвѣлѝ є҆стѐ, поще́нїемъ и҆ мл҃твами, всѣ́хъ бл҃гоꙋха́юще ѿ вонѝ мно́гихъ ва́шихъ трꙋдѡ́въ и҆ по́двигѡвъ, и҆ по́тѡвъ прпⷣбническихъ, въ ни́хже преидо́сте бл҃гоискꙋ́снѡ къ безско́рбномꙋ животꙋ̀, и҆ вѣнце́мъ побѣ́днымъ ᲂу҆вѧзо́стесѧ: моли́те непреста́ннѡ ѡ҆ всѣ́хъ на́съ.
Пѣ́снь з҃.
І҆рмо́съ: Ѡ҆́бразꙋ злато́мꙋ на по́лѣ деи́рѣ слꙋжи́мꙋ, трїѐ твоѝ ѻ҆́троцы небрего́ша безбо́жнагѡ велѣ́нїѧ, посредѣ́ же ѻ҆гнѧ̀ вве́ржени, ѡ҆роша́еми поѧ́хꙋ: бл҃гослове́нъ є҆сѝ бж҃е ѻ҆тє́цъ на́шихъ.
Ѻ҆рꙋ́жїемъ ва́шихъ мл҃твъ прпⷣбнїи, побѣди́вше бѣ́сы лꙋка̑выѧ, съ нб҃сѐ бл҃года́ть прїѧ́сте, и҆сцѣлѧ́ти недꙋ́ги, и҆ прогонѧ́ти дꙋ́хи лꙋка̑выѧ ѿ взыва́ющихъ: бл҃гослове́нъ бг҃ъ ѻ҆тє́цъ на́шихъ.
<<ѻ҃и: 155>>
Плѡ́ти ва́шѧ повинꙋ́сте ѻ҆тцы̀ мꙋ́дрїи дꙋ́хꙋ, воздержа́нїемъ всѧ́цѣмъ пожи́сте въ добродѣѧ́нїи прехва́льнїи, и҆мꙋ́ще чи́стꙋ со́вѣсть и҆ житїѐ нбⷭ҇ное, воспѣва́юще: бл҃гослове́нъ бг҃ъ ѻ҆тє́цъ на́шихъ.
Пꙋте́мъ и҆́стиннымъ входѧ́ще въ бж҃е́ственное поко́ище, ᲂу҆клони́стесѧ напа́стей бѣсо́вскихъ бл҃же́ннїи, бж҃е́ственною покрыва́еми бл҃года́тїю, вопїю́ще: бл҃гослове́нъ бг҃ъ ѻ҆тє́цъ на́шихъ.
Бг҃оро́диченъ: Ѻ҆рꙋ́жїе чⷭ҇таѧ дв҃о, хранѧ́щее пре́жде врата̀ є҆дє́мскаѧ, плещѝ всѣ̑мъ дае́тъ, низложи́вшымъ по́стнически бори́телѧ врага̀, при́снѡ взыва́ющымъ: бл҃гослове́нъ бг҃ъ ѻ҆тє́цъ на́шихъ.
Пѣ́снь и҃.
І҆рмо́съ: Въ кꙋпинѣ̀ мѡѷсе́ю дв҃ы чꙋ́до, на сїна́йстѣй горѣ̀, проѡбрази́вшаго и҆ногда̀, по́йте, бл҃гослови́те и҆ превозноси́те во всѧ̑ вѣ́ки.
Сле́зъ ва́шихъ ка̑пли ᲂу҆гаси́ша ѻ҆́гнь грѣхо́вный, рѣ́кꙋ же чꙋде́съ показа́ша всѣ̑мъ на́мъ, всѧ̑кїѧ стра̑сти потоплѧ́ющꙋю, притека́ющихъ къ ва́мъ пресла́внїи ѻ҆тцы̀.
Вѣ́рꙋ и҆ наде́ждꙋ неразори́мꙋ, и҆ любо́вь и҆́стиннꙋ и҆мѣ́сте ѻ҆тцы̀, и҆ ми́лостивное прилежа́нїе, терпѣ́нїе бл҃го́е и҆ поꙋче́нїе слове́съ дꙋхо́вныхъ, смиренномꙋ́дрство и҆ соверше́нное безѕло́бїе.
Подвиза́стесѧ до́брѣ, побѣди́вше всѧ̑ вра̑жїѧ дѣ̑йства, и҆ на коне́цъ житїѧ̀ вѣнча́стесѧ мꙋ́дрїи, и҆ ко всѣ̑мъ прпⷣбнымъ причто́стесѧ, съ ни́миже ва́съ чти́мъ, и҆ превозно́симъ хрⷭ҇та̀ во вѣ́ки.
Бг҃оро́диченъ: Сп҃си́ мѧ мт҃и бж҃їѧ, сп҃се́нїѧ нача́ло мі́рови ꙗ҆́вльшисѧ, и҆збавлѧ́ющи мѧ̀ молвы̀ нечи́стыхъ страсте́й и҆ всѧ́кїѧ проти́вныѧ ско́рби, да тѧ̀ сла́влю во всѧ̑ вѣ́ки.
Пѣ́снь ѳ҃.
І҆рмо́съ: Ѿ бг҃а бг҃а сло́ва, неизрече́нною мꙋ́дростїю, прише́дшаго ѡ҆бнови́ти а҆да́ма, ꙗ҆́дїю въ тлѣ́нїе па́дшаго лю́тѣ, ѿ ст҃ы́ѧ дв҃ы неизрече́ннѡ воплоти́вшагосѧ на́съ ра́ди, вѣ́рнїи є҆диномꙋ́дреннѡ пѣ́сньми велича́емъ.
<<ѻ҃и ѡ҆б.: 156>>
Сѐ ѿве́рзесѧ ва́мъ ѻ҆тцы̀, црⷭ҇тво нбⷭ҇ное, сконча́вшымъ до́брое тече́нїе, ви́дите, ꙗ҆̀же ви́дѧтъ а҆́гг҃ли, и҆ возда́нїе трꙋдѡ́въ подае́тъ ва́мъ по́чєсти бг҃ъ почита́ѧй вы̀: тѣ́мъ ѻ҆тцы̀ ст҃і́и ᲂу҆бл҃жа́емъ ва́съ.
Сокрꙋше́ннымъ се́рдцемъ бг҃ꙋ ᲂу҆годи́вше, сокрꙋши́сте бѣсѡ́въ кѡ́зни, и҆ сокрꙋшє́нныѧ ѿ ни́хъ и҆спра́висте бг҃оно́сцы: тѣ́мъ ᲂу҆бл҃жа́емъ ва́съ вѣ́рнѡ, кла́нѧющесѧ ра́цѣ моще́й ва́шихъ, бг҃обл҃же́ннїи.
Вы́спрь къ бг҃ꙋ и҆мѣ́вше мы́сль, бг҃оно́снїи ѻ҆тцы̀ прпⷣбнїи земна̑ѧ ѡ҆ста́висте, и҆ нбⷭ҇наѧ воспрїѧ́сте, трꙋдѡ́въ ра́ди ва́шихъ и҆ воздержа́нїѧ неѡсла́бнагѡ: сегѡ̀ ра́ди почита́емъ ва́съ.
Бг҃оро́диченъ: Пощади́ мѧ гдⷭ҇и, пощадѝ, є҆гда̀ хо́щеши мѝ сꙋди́ти, и҆ не ѡ҆сꙋдѝ менѐ во ѻ҆́гнь, ни ꙗ҆́ростїю твое́ю ѡ҆бличѝ менѐ: мо́литъ тѧ̀ хрⷭ҇тѐ, ро́ждшаѧ тѧ̀ дв҃а, и҆ а҆́гг҃льстїи собо́ри, и҆ прпⷣбныхъ соста́вы.
Свѣти́ленъ.
Подо́бенъ: Посѣти́лъ ны̀ є҆́сть:
Процвѣлѝ є҆стѐ ꙗ҆́кѡ фі́нїѯъ дв҃дски ѻ҆тцы̀, ѻ҆би́тєли ꙗ҆ви́стесѧ дх҃а прест҃а́гѡ, и҆ сла́вни вселе́ннѣй показа́вшесѧ, ѡ҆ на́съ непреста́ннѡ моли́те, почита́ющихъ вѣ́рою пречестнꙋ́ю па́мѧть ва́шꙋ прпⷣбнїи.
Бг҃оро́диченъ: Тѧ̀ пѣ́сньми немо́лчными ᲂу҆бл҃жа́емъ дв҃о, ꙗ҆́кѡ ѿ трⷪ҇цы є҆ди́наго родила̀ є҆сѝ бцⷣе, и҆ но́сиши на бж҃е́ствєннꙋю рꙋкꙋ̀ пребога́тое сло́во, непремѣ́ннѡ и҆ неизмѣ́ннѡ.
На хвали́техъ стїхи̑ры, гла́съ д҃.
Подо́бенъ: Да́лъ є҆сѝ зна́менїе:
Свѣтлѣ́йше просїѧ́вши, ꙳ ꙗ҆́коже со́лнце прпⷣбнїи, ꙳ всепра́зднственнаѧ па́мѧть ва́ша, ꙳ лꙋча́ми ѡ҆блистава́етъ ꙳ ва́шихъ добродѣ́тельныхъ дѣѧ́нїй бл҃же́ннїи, ꙳ ѡ҆зарѧ́ющи вѣ́рныхъ чꙋ̑вства свѣ́томъ чꙋде́съ ва́шихъ: сїю̀ ᲂу҆̀бо пра́зднꙋюще ра́достнѡ ва́съ восхвалѧ́емъ, и҆ вѣ́рнѡ ᲂу҆бл҃жа́емъ всепра́зднственнꙋю па́мѧть ва́шꙋ. [Два́жды.]
<<ѻ҃ѳ: 157>>
Ꙗ҆́коже дрꙋзі́и а҆́гг҃ли земні́и пожи́ли є҆стѐ, ꙳ воздержа́нїемъ тѣ́ло своѐ ᲂу҆дрꙋчи́вше всесла́внїи, ꙳ бдѣ́нїемъ и҆ па́мѧтїю сме́ртною, ꙳ приле́жнѡ помышлѧ́юще, ꙳ бжⷭ҇твєнныѧ ѻ҆тцы̀ возраща́хꙋ, ꙳ и҆ вели́кими восхождє́нїи ꙳ къ жела́нїю верхо́вномꙋ. ꙳ тѣ́мъ вои́стиннꙋ прибли́жилисѧ є҆стѐ, ꙳ къ самомꙋ̀ ка́меню хрⷭ҇тꙋ̀ краеꙋго́льномꙋ.
Стра̑сти тѣлє́сныѧ ꙳ воздержа́нїемъ ᲂу҆томи́ли є҆стѐ, ꙳ и҆ приле́жнымъ моле́нїемъ, ꙳ ѕмі́ѧ льсти́ваго сле́зными потѡ́ки ꙳ ᲂу҆дави́ли є҆стѐ ѻ҆тцы̀ прпⷣбнїи: ꙳ и҆ ᲂу҆годи́ли є҆стѐ бг҃ꙋ па́че и҆нѣ́хъ досточꙋ́днїи. ꙳ тѣ́мъ ва́съ ᲂу҆красѝ нбⷭ҇ными дарова́ньми ꙳ і҆и҃съ чл҃вѣколю́бецъ, ꙳ и҆ сп҃съ дꙋ́шъ на́шихъ.
Сла́ва, гла́съ и҃:
Прпⷣбнїи ѻ҆тцы̀, поꙋчи́вшесѧ де́нь и҆ но́щь въ зако́нѣ гдⷭ҇ни, сподо́бистесѧ дре́ва живо́тнагѡ снасажде́ни бы́ти, и҆ пло́дъ ва́шегѡ страда́нїѧ вѣнцы̀ процвѣтѐ. дерзнове́нїе и҆мꙋ́ще къ подвигополо́жникꙋ бг҃ꙋ, и҆ на́мъ и҆спроси́те ѡ҆чище́нїе, и҆ ве́лїю млⷭ҇ть.
И҆ ны́нѣ, бг҃оро́диченъ:
Влⷣчце, прїимѝ мл҃твꙋ ра̑бъ твои́хъ, и҆ и҆зба́ви на́съ ѿ всѧ́кїѧ нꙋ́жды и҆ печа́ли.
Крⷭ҇тобг҃оро́диченъ: Пречⷭ҇таѧ ꙗ҆́кѡ ᲂу҆зрѣ̀ тѧ̀ пло́тїю ви́сѧща на крⷭ҇тѣ̀, и҆ се́рдцемъ растерза́ющисѧ вопїѧ́ше слезѧ́щи: сло́ве, ка́мѡ заше́лъ є҆сѝ, прелюби́мый і҆и҃се сн҃е мо́й гдⷭ҇и; не ѡ҆ста́ви менѐ є҆ди́нꙋ хрⷭ҇тѐ, ро́ждшꙋю тебѐ.
А҆́ще и҆́мꙋтъ на стїхо́внѣ Сла́ва, и҆ ты̀ глаго́ли:
И҆ ны́нѣ, вече́рнїй бг҃оро́диченъ, и҆лѝ крⷭ҇тобг҃оро́диченъ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.