Слꙋ́жба ст҃и́телємъ
<<ѯ҃г ѡ҆б.: 126>>
[глⷡ҇а а҃і] СЛꙊ́ЖБА Ѻ҆́БЩА
ст҃и́телємъ двѣма̀ и҆ мнѡ́гимъ.
Ве́черъ,
на Гдⷭ҇и воззва́хъ, стїхи̑ры, гла́съ д҃.
Подо́бенъ: Ꙗ҆́кѡ до́блѧ:
Ꙗ҆́кѡ ѕвѣ́зды многосвѣ̑тлыѧ, ꙳ ᲂу҆твержде́ни прехва́льнїи, ꙳ мі́ръ ᲂу҆краси́сте всечестні́и, ꙳ и҆ се́й лꙋча́ми просвѣща́ете, ꙳ догма́ты бл҃говѣ́рїѧ, ꙳ и҆ є҆́реси тьмꙋ̀ ѿго́ните ст҃и́телїе: ꙳ моли́тесѧ ѿ тлѝ и҆ бѣ́дъ и҆зба́витисѧ, ꙳ вѣ́рою творѧ́щымъ ꙳ всечтⷭ҇нꙋ́ю па́мѧть ва́шꙋ.
Сїѧ̑нїи дх҃о́вными ꙳ просвѣти́вше вселе́ннꙋю, ꙳ свѣтода́тєльнаѧ сѡ́лнца ꙗ҆ви́стесѧ, ꙳ ꙗ҆́кѡ лꙋчѝ велѣ́нїй ꙳ во всѧ̑ концы̀ простира́юще, ꙳ вѣ́рныхъ сердца̀ просвѣща́ете пребл҃же́ннїи, ꙳ ѿгонѧ́ще тьмꙋ̀ є҆ресе́й бг҃оно́сцы, ꙳ си́лою ѿ дв҃ы возсїѧ́вшагѡ.
Ѿ хрⷭ҇то́вы цр҃кве пребл҃же́ннїи, ꙳ ѿгна́сте мы́слєнныѧ во́лки, жезло́мъ велѣ́нїй ва́шихъ: ꙳ и҆ сїю̀ ѻ҆́крестъ ѡ҆гради́сте ꙳ слове́сною тве́рдостїю, ꙳ и҆ предста́висте ю҆̀ хрⷭ҇тꙋ̀ цѣ́лꙋ и҆ недви́жимꙋ. ꙳ є҆го́же моли́те ꙳ ѿ тлѝ и҆ бѣ́дъ и҆зба́витисѧ, ꙳ вѣ́рою творѧ́щымъ всечтⷭ҇нꙋ́ю па́мѧть ва́шꙋ.
Сла́ва, и҆ ны́нѣ, бг҃оро́диченъ:
Ѡ҆сꙋжде́нїѧ и҆зба́ви, прест҃а́ѧ бг҃оневѣ́сто, и҆ лю́тыхъ прегрѣше́нїй, смире́ннꙋю мою̀ дꙋ́шꙋ и҆ сме́рти и҆змѣнѝ мл҃твами твои́ми, и҆ да́рꙋй ѡ҆правда́нїе ᲂу҆лꙋчи́ти въ де́нь и҆спыта́нїѧ, є҆́же полꙋчи́ша ст҃ы́хъ собо́ри, покаѧ́нїемъ ѡ҆чище́на мѧ̀ пре́жде конца̀ покажѝ, и҆ сле́зными и҆злїѧ̑нїи.
Крⷭ҇тобг҃оро́диченъ: Распина́ема ви́дѧщи, ꙳ и҆ въ ре́бра пробода́ема копїе́мъ, ꙳ пречⷭ҇таѧ, хрⷭ҇та̀ чл҃вѣколю́бца, ꙳ пла́чꙋщи вопїѧ́ше: ꙳ <<ѯ҃д: 127>> что̀ сїѐ сн҃е мо́й; ꙳ что̀ тебѣ̀ неблагода́рнїи лю́дїе возда́ша, ꙳ вмѣ́стѡ ꙗ҆̀же сотвори́лъ є҆сѝ дѡ́браѧ и҆̀мъ; ꙳ и҆ тщи́шисѧ безча́дствовати мѧ̀ вселюбе́знѣйшїй, ꙳ дивлю́сѧ бл҃гоꙋтро́бне, твоемꙋ̀ во́льномꙋ распѧ́тїю.
А҆́ще и҆́мꙋтъ самогла́сенъ.
Сла́ва, гла́съ ѕ҃:
Чл҃вѣ́цы бж҃їи и҆ вѣ́рнїи рабѝ, слꙋжи́телїе гдⷭ҇ни, мꙋ́жїе жела́нїѧ, сосꙋ́ди и҆збра́ннїи, столпѝ и҆ ᲂу҆твержде́нїе цр҃кве, црⷭ҇твїѧ наслѣ̑дницы, не премолчи́те є҆́же ѡ҆ на́съ вопи́ти ко гдⷭ҇ꙋ.
И҆ ны́нѣ, бг҃оро́диченъ:
Бг҃а и҆з̾ тебѐ воплоти́вшагосѧ разꙋмѣ́хомъ, бцⷣе дв҃о: того̀ молѝ ѡ҆ сп҃се́нїи дꙋ́шъ на́шихъ.
Крⷭ҇тобг҃оро́диченъ: Ви́дѧщи тѧ̀ распина́ема хрⷭ҇тѐ, тебѐ ро́ждшаѧ вопїѧ́ше: что̀ стра́нное є҆́же ви́жꙋ та́инство, сн҃е мо́й; ка́кѡ на дре́вѣ ᲂу҆мира́еши, пло́тїю повѣ́шенъ, жи́зни пода́телю;
[зрѝ] А҆́ще пра́зднꙋеши съ полѷеле́емъ, глаго́ли бг҃оро́диченъ: воскрⷭ҇ный:
Кто̀ тебѐ не ᲂу҆бл҃жи́тъ:
Вхо́дъ. Прокі́менъ днѐ.
Чтє́нїѧ ст҃и́тєльскаѧ, [пи́саны въ концѣ̀ кни́ги сеѧ̀.]
На стїхо́внѣ стїхи̑ры, гла́съ а҃:
Подо́бенъ: Всехва́льнїи мч҃нцы:
Таи́нники дꙋхѡ́вныѧ вкꙋ́пѣ ꙳ и҆ словє́сныѧ трꙋбы̑ бж҃їѧ, ꙳ бж҃е́ствєннаѧ зерца̑ла, ꙳ восхва́лимъ дне́сь досто́йнѡ, ꙳ ст҃и́тели бж҃е́ствєнныѧ и҆ ѻ҆гнедохновє́нныѧ, ꙳ точа́щихъ златы̑ѧ стрꙋи̑ ᲂу҆че́нїѧ на́мъ. ꙳ хрⷭ҇тꙋ̀ моли́тесѧ, дарова́ти дꙋша́мъ на́шымъ ми́ръ и҆ ве́лїю млⷭ҇ть.
Сті́хъ: Чтⷭ҇на̀ пред̾ гдⷭ҇емъ сме́рть прпⷣбныхъ є҆гѡ̀.
Степе́нь вѣ́ры ра́зꙋмомъ, ꙳ бж҃е́ствєнныѧ и҆ бѡ́дрыѧ, ꙳ рѣ́ки златострꙋ́йныѧ, ꙳ всесвѣ̑тлыѧ свѣти́льники, ꙳ трⷪ҇ческїѧ побо́рники, ꙳ прїѧ́тєлища бл҃года̑тнаѧ ст҃а́гѡ дх҃а, ꙳ столпы̀ непоколеби̑мыѧ, ꙳ и҆ ᲂу҆тверждє́нїѧ цр҃кве, ꙳ досто́йнѡ пѣ́сньми восхва́лимъ.
<<ѯ҃д ѡ҆б.: 128>>
Сті́хъ: Сщ҃е́нницы твоѝ ѡ҆блекꙋ́тсѧ въ пра́вдꙋ, и҆ прпⷣбнїи твоѝ возра́дꙋютсѧ.
Дх҃о́внїи ѻ҆рга́ни гро́ма, ꙳ бж҃е́ственнагѡ манове́нїѧ, ꙳ мѡ́лнїи проповѣ́данїѧ, ꙳ свѣ́щницы всезлаті́и, ꙳ свѣ́тлїи и҆ свѣтоно́снїи ѡ҆ бз҃ѣ, ꙳ пребл҃же́ннїи ст҃и́телїе, ꙳ ѡ҆ на́съ чтꙋ́щихъ ва́съ хрⷭ҇та̀ моли́те, ꙳ дарова́ти дꙋша́мъ на́шымъ ꙳ ми́ръ и҆ ве́лїю млⷭ҇ть.
Сла́ва, гла́съ ѕ҃:
Та̑йныѧ дне́сь дꙋ́ха трꙋбы̑ бг҃онѡ́сныѧ ѻ҆тцы̀ восхва́лимъ, воспѣ́вшыѧ посредѣ̀ цр҃кве пѣ́снь сли́чнꙋю бг҃осло́вїѧ, трⷪ҇цꙋ є҆ди́нꙋ непремѣ́ннꙋю, сꙋщество́ же и҆ бж҃ество̀: потреби́тєли є҆ресе́й и҆ правосла́вныхъ побо́рники, молѧ́щыѧсѧ всегда̀ гдⷭ҇ꙋ, поми́ловатисѧ дꙋша́мъ на́шымъ.
И҆ ны́нѣ, бг҃оро́диченъ:
Бцⷣе, ты̀ є҆сѝ лоза̀ и҆́стиннаѧ, возрасти́вшаѧ на́мъ пло́дъ живота̀, тебѣ̀ мо́лимсѧ, моли́сѧ влⷣчце со ст҃и́тєли, поми́ловати дꙋ́шы на́шѧ.
Крⷭ҇тобг҃оро́диченъ: Предстоѧ́щи крⷭ҇тꙋ̀ и҆ногда̀, во вре́мѧ распѧ́тїѧ дв҃а, и҆ съ дѣ́вственникомъ ᲂу҆чн҃ко́мъ, пла́чꙋщи вопїѧ́ше: ᲂу҆вы̀ мнѣ̀, ка́кѡ стра́ждеши, всѣ́хъ хрⷭ҇тѐ сы́й безстра́стїе!
Тропа́рь во ᲂу҆ста́вѣ.
А҆́ще ли нѣ́сть ᲂу҆ста́ва, глаго́ли се́й тропа́рь, гла́съ д҃:
Бж҃е ѻ҆тє́цъ на́шихъ, творѧ́й при́снѡ съ на́ми по твое́й кро́тости, не ѿста́ви млⷭ҇ть твою̀ ѿ на́съ, но мл҃твами и҆́хъ въ ми́рѣ ᲂу҆пра́ви живо́тъ на́шъ.
Сла́ва, и҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.
На ᲂу҆́трени,
на Бг҃ъ гдⷭ҇ь, тропа́рь то́йже.
По а҃-мъ стїхосло́вїи сѣда́ленъ, гла́съ є҃.
Подо́бенъ: Собезнача́льное сло́во:
Ꙗ҆́кѡ ца́рское ᲂу҆краше́нїе цр҃кве, ст҃и́телей гдⷭ҇нихъ всѝ восхва́лимъ, догма́тѡвъ сокро́вище неѡскꙋдѣ́емо: си́ми бо са́мъ <<ѯ҃є: 129>> наказа̀ на́съ трⷪ҇цꙋ чествова́ти ст҃ꙋ́ю, соедине́нꙋ ᲂу҆́бѡ сꙋщество́мъ, раздѣле́нꙋ же ѵ҆поста́сьми. [Два́жды.]
Сла́ва, и҆ ны́нѣ, бг҃оро́диченъ:
Прест҃а́ѧ дв҃о, поми́лꙋй на́съ прибѣга́ющихъ вѣ́рою къ тебѣ̀ млⷭ҇рдой, и҆ просѧ́щихъ те́плагѡ твоегѡ̀ застꙋпле́нїѧ: мо́жеши бо ꙗ҆́кѡ бл҃га̀ всѣ́хъ сп҃стѝ, ꙗ҆́кѡ сꙋ́щи мт҃и бг҃а вы́шнѧгѡ, мт҃рними твои́ми мл҃твами, при́снѡ ѡ҆б̾е́млющи, бг҃ора́дованнаѧ.
По в҃-мъ стїхосло́вїи сѣда́ленъ, гла́съ г҃.
Подо́бенъ: Бж҃е́ственныѧ:
Столпѝ бы́сте цр҃кве, и҆ бога́тство некра́домое бл҃гоче́стїѧ ꙗ҆ви́лисѧ є҆стѐ, бг҃ослове́снїи ст҃и́телїе, въ безстра́стїи ѡ҆сїѧ́ли є҆стѐ житїѐ своѐ, и҆ трⷪ҇ческїѧ и҆з̾ѧсни́сте догма́ты, ѻ҆тцы̀ прпⷣбнїи, хрⷭ҇та̀ бг҃а моли́те ѡ҆ сп҃се́нїи дꙋ́шъ на́шихъ. [Два́жды.]
Сла́ва, и҆ ны́нѣ, бг҃оро́диченъ:
Бж҃е́ственнагѡ є҆стества̀ не ѿлꙋ́чьсѧ, пло́ть бы́въ во чре́вѣ твое́мъ: но бг҃ъ вочл҃вѣ́чьсѧ и҆ пребы́сть, и҆́же по ржⷭ҇твѣ̀ мт҃рь тѧ̀ дв҃ꙋ, ꙗ҆́кѡ пре́жде ржⷭ҇тва̀ сохрани́въ всенепоро́чнꙋ, є҆ди́нъ гдⷭ҇ь: того̀ приле́жнѡ молѝ, дарова́ти на́мъ ве́лїю млⷭ҇ть.
По Хвали́те и҆́мѧ гдⷭ҇не:
Припѣ́въ: Велича́емъ ва́съ, ст҃и́телїе вели́цыи, и҆ чте́мъ ст҃ꙋ́ю па́мѧть ва́шꙋ: вы́ бо мо́лите за на́съ хрⷭ҇та̀ бг҃а на́шего.
Ѱало́мъ и҆збра́нный: Оу҆слы́шите сїѧ̑ всѝ ꙗ҆зы́цы:
По полѷеле́и сѣда́ленъ, гла́съ д҃:
Премꙋ́дрїи ᲂу҆чи́телїе вселе́нныѧ, и҆̀же бг҃а просла́вльшїи дѣ́лы и҆ словесы̀ на землѝ, да возвели́чатсѧ дне́сь, ꙗ҆́кѡ сп҃се́нїѧ на́мъ сꙋ́ще хода́таи. [Два́жды.]
Сла́ва, и҆ ны́нѣ, бг҃оро́диченъ:
Предста́тельнице неѡбори́маѧ ѡ҆скорблѧ́емыхъ, и҆ те́плое застꙋпле́нїе ᲂу҆пова́ющихъ на тѧ̀, ѿ бѣ́дъ мѧ̀ и҆зба́ви: ты́ бо є҆сѝ всѣ́хъ помо́щница.
Степє́нна, а҃-й а҆нтїфѡ́нъ д҃-гѡ гла́са.
Прокі́менъ: Чтⷭ҇на̀ пред̾ гдⷭ҇емъ сме́рть прпⷣбныхъ є҆гѡ̀.
(л. ѯ҃є ѡ҆б.)
Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми;
Всѧ́кое дыха́нїе:
Є҆ѵⷢ҇лїе ст҃и́телємъ, [пи́сано въ концѣ̀ кни́ги сеѧ̀.]
По н҃-мъ ѱалмѣ̀ стїхи́ра, гла́съ ѕ҃:
Прпⷣбнїи ѻ҆тцы̀, во всю̀ зе́млю и҆зы́де вѣща́нїе и҆справле́нїй ва́шихъ, тѣ́мъ на нб҃сѣ́хъ ѡ҆брѣто́сте мздꙋ̀ трꙋдѡ́въ ва́шихъ, де́мѡнѡвъ разрꙋши́сте полкѝ, а҆́гг҃лѡвъ достиго́сте чи́ны, и҆́хже житїю̀ непоро́чнѡ поревнова́сте: дерзнове́нїе и҆мꙋ́ще ко гдⷭ҇ꙋ, ми́ръ и҆спроси́те дꙋша́мъ на́шымъ.
Канѡ́нъ, гла́съ и҃.
Пѣ́снь а҃.
І҆рмо́съ: Пои́мъ гдⷭ҇еви, прове́дшемꙋ лю́ди своѧ̑ сквозѣ̀ чермно́е мо́ре, ꙗ҆́кѡ є҆ди́нъ сла́внѡ просла́висѧ.
Возсїѧ́вше въ мі́рѣ ст҃и́телїе премꙋ́дрїи, сїѧ́юще црⷭ҇твꙋющагѡ цр҃ѧ̀ всѣ́хъ бж҃е́ственными велѣ̑нїи: тѣ́мъ хрⷭ҇та̀ воспое́мъ, ꙗ҆́кѡ просла́висѧ.
Ꙗ҆́кѡ просвѣти́вшихсѧ въ мі́рѣ бл҃гоче́стїѧ свѣ́томъ, и҆ нече́стїѧ тьмꙋ̀ ѿгна́вшихъ, почти́мъ вѣ́рнїи, ꙗ҆́кѡ ст҃и́тєли вели̑кїѧ и҆ всечестны̑ѧ.
Ꙗ҆́кѡ предстоѧ́ще со а҆́гг҃лы неприкоснове́нномꙋ цр҃ю̀, соверша́ющымъ па́мѧть ва́шꙋ, помоли́тесѧ дарова́ти на́мъ ѡ҆чище́нїе грѣхѡ́въ, сщ҃еннопроповѣ́дницы сꙋ́ще бг҃оно́снїи.
Бг҃оро́диченъ: Ꙗ҆́кѡ заче́нши превѣ́чное и҆ безнача́льное ѿ ѻ҆ц҃а̀ сло́во, пло́тїю ро́ждши па́че сло́ва пречⷭ҇таѧ, моли́сѧ приле́жнѡ и҆зба́витисѧ на́мъ ѿ бѣ́дъ.
Пѣ́снь г҃.
І҆рмо́съ: Оу҆тверже́й въ нача́лѣ нб҃са̀ ра́зꙋмомъ, и҆ зе́млю на вода́хъ ѡ҆снова́вый, на ка́мени мѧ̀, хрⷭ҇тѐ, за́повѣдей твои́хъ ᲂу҆твердѝ: ꙗ҆́кѡ нѣ́сть ст҃ъ, па́че тебѐ, є҆ди́не чл҃вѣколю́бче.
Воздержа́нїемъ и҆́стиннымъ, и҆ мл҃твою неꙋкло́нною, взыдо́сте въ вы́шнїй гра́дъ добродѣ́телей, прпⷣбнїи и҆ бг҃оно́снїи, и҆дѣ́же пи́щнагѡ пото́ка наслажда́етесѧ при́снѡ.
<<ѯ҃ѕ: 131>>
Ꙗ҆́кѡ и҆мꙋ́ще дерзнове́нїе къ бг҃ꙋ, ст҃и́телїе прпⷣбнїи, моли́тесѧ ѡ҆ на́съ сп҃сти́сѧ на́мъ, вѣ́рою пою́щымъ па́мѧть ва́шꙋ.
Ꙗ҆́кѡ бл҃гочести́выхъ велѣ́нїй, ᲂу҆чи́телїе, премꙋ́дрыхъ бж҃е́ственныхъ слове́съ, повѣсти́телїе и҆́стины, и҆ побѣ́дꙋ на є҆́рєси прїѧ́ли є҆стѐ преподо́бнїи.
Бг҃оро́диченъ: Ꙗ҆́кѡ нб҃о и҆ прⷭ҇то́лъ тѧ̀ бж҃їй воспѣва́емъ всѝ, бг҃ороди́тельнице чⷭ҇таѧ дв҃о, ꙗ҆́кѡ и҆з̾ тебѐ ꙗ҆ви́сѧ і҆и҃съ хрⷭ҇то́съ и҆́стина, на сп҃се́нїе на́ше.
Сѣда́ленъ, гла́съ г҃.
Сосꙋ́ди честні́и воздержа́нїѧ, и҆ бога̑тства некра́дѡмаѧ бл҃гоче́стїѧ ꙗ҆ви́стесѧ вои́стиннꙋ бл҃же́ннїи, безстра́стїемъ житїѐ просвѣти́вше, и҆ тре́бꙋющымъ ѡ҆богаща́юще млⷭ҇ть ѻ҆тцы̀ прпⷣбнїи: хрⷭ҇та̀ бг҃а моли́те, дарова́ти на́мъ ве́лїю млⷭ҇ть.
Сла́ва, и҆ ны́нѣ, бг҃оро́диченъ:
Кі́йждо и҆дѣ́же сп҃са́етсѧ, та́мѡ пра́веднѡ и҆ притека́етъ: и҆ ко́е и҆но́е таково́е прибѣ́жище, ꙗ҆́кѡ ты̀, бцⷣе, покрыва́ющее дꙋ́шы на́шѧ,
Крⷭ҇тобг҃оро́диченъ: Же́злъ си́лы стѧжа́вшїи, крⷭ҇тъ сн҃а твоегѡ̀, бцⷣе, тѣ́мъ низлага́емъ врагѡ́въ шата̑нїѧ, любо́вїю тѧ̀ непреста́ннѡ велича́юще.
Пѣ́снь д҃.
І҆рмо́съ: Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бж҃ество̀.
Ст҃и́тєли премꙋ̑дрыѧ всѝ въ пѣ́снехъ восхва́лимъ, гл҃го́люще: бг҃оно́снїи ѻ҆тцы̀ приле́жнѡ моли́те, сп҃сти́сѧ на́мъ.
Ꙗ҆́кѡ бл҃гочести́выхъ велѣ́нїй сказа́тєли и҆ насади́тєли, и҆ премꙋ̑дрыѧ ᲂу҆чи́тєли и҆ ст҃и́тєли, и҆мꙋ́ще бг҃обл҃же́ннїи вои́стиннꙋ, пѣ́сньми и҆ пѣ́ньми восхвалѧ́емъ ва́съ.
Сщ҃е́ннꙋю па́мѧть ва́шꙋ вѣ́рнїи, наста́вники и҆ пита́телїе прпⷣбнїи, ст҃и́телїе гдⷭ҇ни, пѣ́сньми и҆ пѣ́нїи пра́зднꙋемъ.
Бг҃оро́диченъ: Безневѣ́стнаѧ невѣ́сто, и҆ неискꙋсобра́чнаѧ чтⷭ҇аѧ мт҃и хрⷭ҇та̀ бг҃а, того̀ непреста́ннѡ молѝ, сп҃стѝ дꙋ́шы пою́щихъ тѧ̀.
<<ѯ҃ѕ ѡ҆б.: 132>>
Пѣ́снь є҃.
І҆рмо́съ: Оу҆́тренююще вопїе́мъ тѝ, гдⷭ҇и, сп҃си́ ны: ты́ бо є҆сѝ бг҃ъ на́шъ, ра́звѣ тебѐ и҆но́гѡ не вѣ́мы.
Па́стырски пома́завшесѧ бл҃гоче́стїѧ мѵ́ромъ, бг҃омꙋ́дрїи, тѣ́мъ ꙗ҆́кѡ ст҃и́телей всѝ почти́мъ ва́съ бг҃оно́сцы.
Ꙗ҆́кѡ подо́бницы бы́вше а҆пⷭ҇лѡмъ, бг҃омꙋ́дрїи сла́внїи, болѣ́зньми и҆ бдѣ̑нїи, цр҃ко́вныхъ люде́й предста́тєли.
Ревни́телю и҆лїѝ, и҆ мѡѷсе́ю бг҃ови́дцꙋ возревнова́вше ѻ҆тцы̀ бг҃ови́дцы, є҆ресе́й нача́льники посрами́сте.
Бг҃оро́диченъ: Ꙗ҆́кѡ цр҃и́цꙋ, всѣ́хъ цр҃ѧ̀ ро́ждшꙋю, прїиди́те вѣ́рнїи всѝ, согла́снѡ со а҆́гг҃ломъ бл҃гослове́ннꙋю почти́мъ.
Пѣ́снь ѕ҃.
І҆рмо́съ: Ри́зꙋ мнѣ̀ пода́ждь свѣ́тлꙋ, ѡ҆дѣѧ́йсѧ свѣ́томъ ꙗ҆́кѡ ри́зою, многомлⷭ҇тиве хрⷭ҇тѐ бж҃е на́шъ.
Цр҃ко́внꙋю сла́вꙋ ᲂу҆кра́сили є҆стѐ ѻ҆тцы̀ бл҃же́ннїи, бжⷭ҇твенными ва́шими велѣ̑нїи, и҆ є҆́рєси и҆з̾ ко́рене и҆зсꙋши́ли є҆стѐ.
Ꙗ҆́кѡ свѣти̑ла бл҃гоче́стїѧ, велѣ́нїй добро́тою возсїѧ́ли є҆стѐ, во всю̀ тва́рь ᲂу҆че́ньми сла́внїи, помрачи́вше є҆́рєси сло́вомъ бж҃їимъ.
Вмѣ́стѡ ѻ҆рꙋ́жїѧ ѧ҆зы́къ и҆ сло́во взе́мше прпⷣбнїи, чꙋжда̑ѧ ѿсѣ́кли є҆стѐ ᲂу҆чє́нїѧ всѧ̑, и҆ и҆з̾ѧсни́ли є҆стѐ трⷪ҇цꙋ всѣ̑мъ ꙗ҆́вственнѡ.
Бг҃оро́диченъ: Роди́всѧ ѿ дв҃ы, мі́ръ просвѣти́лъ є҆сѝ, хрⷭ҇тѐ бж҃е: и҆ менѐ ѿ прегрѣше́нїй мои́хъ и҆зба́ви, ꙗ҆́кѡ чл҃вѣколю́бецъ, и҆ ᲂу҆пра́ви живо́тъ мо́й, молю́ тѧ.
Конда́къ, во ᲂу҆ста́вѣ.
А҆́ще ли нѣ́сть ᲂу҆ста́ва, глаго́ли се́й конда́къ, гла́съ и҃.
Подо́бенъ: Ꙗ҆́кѡ нача́тки:
Ꙗ҆́кѡ добродѣ́телей ᲂу҆чи́телїе, и҆ і҆ера́рхѡвъ ᲂу҆краше́нїе, цр҃ковь пою́щи ва́съ сла́витъ: мл҃твами ва́шими пода́йте чтꙋ́щымъ ва́съ любо́вїю, добродѣ́телей и҆справле́нїе, и҆ собла́знѡвъ и҆збавле́нїе, ꙗ҆́кѡ непобѣди́мїи.
<<ѯ҃з: 133>>
І҆́косъ: Рѣ́ки бл҃гоче́стїѧ ꙗ҆́вльшесѧ, ᲂу҆че́нїй ва́шихъ стрꙋѧ́ми всю̀ зе́млю напои́вше, ꙗ҆́кѡ ст҃и́телїе бжⷭ҇твеннїи, и҆ чꙋде́съ тꙋ́чами сквє́рны ѡ҆мы́вше, и҆ пи́щный пото́къ досто́йнѡ наслѣ́дивше. тѣ́мже соше́дшесѧ бл҃гоче́стнѡ ва́съ почита́емъ пѣ́сньми дне́сь, и҆ вѣ́рнѡ вопїе́мъ ва́мъ: моли́те хрⷭ҇та̀ бг҃а непреста́ннѡ ѡ҆ всѣ́хъ на́съ, ꙗ҆́кѡ непобѣди́мїи.
Пѣ́снь з҃.
І҆рмо́съ: Въ нача́лѣ зе́млю ѡ҆снова́вый, и҆ нб҃са̀ сло́вомъ ᲂу҆тверди́вый, бл҃гослове́нъ є҆сѝ во вѣ́ки, гдⷭ҇и бж҃е ѻ҆тє́цъ на́шихъ.
И҆̀же и҆́стинныѧ ст҃и́тели бжⷭ҇твенныѧ, ста́дꙋ твоемꙋ̀ па́стыри показа́вый, бл҃гослове́нъ бг҃ъ ѻ҆тє́цъ на́шихъ.
И҆̀же страсте́й погаси́сте пла́мень, и҆ дꙋ́шы бл҃гочести́выхъ бжⷭ҇твеннѡ ѡ҆роси́сте, вопїю́щихъ: бл҃гослове́нъ бг҃ъ ѻ҆тє́цъ на́шихъ.
Воздержа́нїемъ, и҆ бдѣ́нїемъ, и҆ вѣ́рою и҆́стинною трꙋ́ждшесѧ ст҃и́телїе, помина́йте всѣ́хъ на́съ.
Бг҃оро́диченъ: И҆́же на́съ ра́ди рожде́йсѧ ѿ дв҃ы, и҆ ѿ врага̀ и҆зба́вивый мі́ръ, бл҃гослове́нъ бг҃ъ ѻ҆тє́цъ на́шихъ.
Пѣ́снь и҃.
І҆рмо́съ: На горѣ̀ ст҃ѣ́й просла́вльшасѧ, и҆ въ кꙋпинѣ̀ ѻ҆гне́мъ приснодв҃ы мѡѷсе́ови та́йнꙋ ꙗ҆́вльшаго, гдⷭ҇а по́йте, и҆ превозноси́те во всѧ̑ вѣ́ки.
Мѡѷсе́ю подо́бѧщесѧ ѻ҆тцы̀, на го́рꙋ безстра́стїѧ взыдо́сте, во мра́къ разꙋ́мный, и҆ бл҃года́тный прїѧ́сте зако́нъ ст҃и́тєли. тѣ́мъ воспѣва́емъ хрⷭ҇та̀ во вѣ́ки.
Лю́ди хрⷭ҇то́вы ᲂу҆па́сше прпⷣбнїи, є҆гѵ́петскїѧ ле́сти ѿбѣ́гше, вавѷлѡ́на страстна́гѡ и҆збѣ́гли є҆стѐ, сїѡ́на вы́шнѧгѡ ѡ҆брѣ́тше жили́ще во всѧ̑ вѣ́ки.
Ꙗ҆́кѡ мѵ́ромъ пома́завшесѧ бж҃їи ст҃и́телїе, є҆́же въ сло́вѣ и҆ дѣ́лѣ бл҃гоче́стїѧ, сщ҃еннодѣ́йствꙋете бжⷭ҇твєннаѧ сщ҃е́ннїи: тѣ́мже трⷪ҇цꙋ во є҆ди́номъ сꙋществѣ̀ пое́те во всѧ̑ вѣ́ки.
Бг҃оро́диченъ: Все́льшагосѧ во чре́во ст҃ы́ѧ дв҃ы, и҆ въ се́мъ стра́шнѡ па́че сло́ва, ве́тхаго а҆да́ма ѡ҆бно́вльша, гдⷭ҇а по́йте, и҆ превозноси́те є҆го̀ во вѣ́ки.
<<ѯ҃з ѡ҆б.: 134>>
Пѣ́снь ѳ҃.
І҆рмо́съ: Проѧвле́нное на горѣ̀ законополо́жникꙋ во ѻ҆гнѝ и҆ кꙋпинѣ̀, ржⷭ҇тво̀ приснодв҃ы, въ на́ше вѣ́рныхъ сп҃се́нїе, пѣ́сньми немо́лчными велича́емъ.
И҆̀же безстра́стїемъ и҆ вѣ́рою, наде́ждею и҆ любо́вїю, словеса̀ на́мъ живота̀ вѣ́чнагѡ показа́вше премꙋ́дрїи ст҃и́телїе, моли́тесѧ сп҃сти́сѧ дꙋша́мъ на́шымъ.
Жезло́мъ дх҃а ст҃а́гѡ ꙗ҆́кѡ ᲂу҆па́сшыѧ лю́ди, и҆ ѿ бж҃їѧ цр҃кве ѿгна́вшыѧ є҆́рєси бг҃обо́рныхъ, ст҃и́телїе всечⷭ҇тні́и: тѣ́мже ва́съ пѣ́сньми восхвалѧ́емъ.
Ꙗ҆́кѡ цр҃кѡ́внаѧ свѣти̑ла ст҃и́тєли въ пѣ́снехъ и҆ пѣ́нїихъ почита́емъ всѝ немо́лчнѡ, ра́кꙋ моще́й ва́шихъ, бл҃же́ннїи ѻ҆тцы̀, досто́йнѡ велича́юще.
Бг҃оро́диченъ: Ра́дꙋйсѧ, присноживо́тный и҆сто́чниче нетлѣ́нїѧ, ра́дꙋйсѧ всесвѣ́тлый со́лнца ѻ҆́блаче. ра́дꙋйсѧ, колесни́це всегѡ̀ бж҃ества̀. ра́дꙋйсѧ, ковче́же ѡ҆сщ҃е́нїѧ.
Свѣти́ленъ.
Свѣтоза̑рныѧ свѣти́льники, па́че со́лнечныхъ лꙋ̑чь ѿ свѣтонача́льныѧ трⷪ҇цы и҆ трисо́лнечныѧ є҆ди́ницы, преесте́ственнѡ смѣ́шены, бг҃онѡ́сныѧ восхва́лимъ ѻ҆тцы̀.
Бг҃оро́диченъ: Тебѐ пѣ́сньми немо́лчными ᲂу҆бл҃жа́емъ, дв҃о, ꙗ҆́же ѿ трⷪ҇цы є҆ди́наго во чре́вѣ прїи́мши, бцⷣе, бж҃е́ственными рꙋка́ми пресꙋ́щное сло́во носи́ла є҆сѝ, непрело́жнѡ и҆ неизмѣ́ннѡ.
На хвали́техъ стїхи̑ры, гла́съ ѕ҃.
Подо́бенъ: Тридне́венъ:
Бл҃года́ть превозмо́же, ꙳ вѣ́ра преꙋкрѣпи́сѧ, ꙳ и҆ и҆спо́лнишасѧ всѧ̑ ꙳ ра́зꙋма бж҃їѧ, ꙳ а҆пⷭ҇лъ и҆ ᲂу҆чи́телей ра́ди, ꙳ сп҃се́нїемъ ѡ҆богати́хомсѧ. [Два́жды.]
Нбⷭ҇ныхъ та́инствъ, ꙳ и҆ человѣ́ческихъ ᲂу҆че́нїй ꙳ бл҃года́тей стече́нїе со и҆справле́ньми, ꙳ побѣжда́ющими всѧ́кое є҆реті́ческое сло́во, ꙳ ст҃и́тели твоѧ̑ ᲂу҆диви́лъ є҆сѝ, гдⷭ҇и.
<<ѯ҃и: 135>>
Премꙋ́дрїи ᲂу҆чи́телїе вселе́нныѧ, ꙳ и҆̀же бг҃а сла́вѧще, ꙳ словесы̀ и҆ дѣ́лы на землѝ, ꙳ да возвели́чатсѧ дне́сь, ꙳ ꙗ҆́кѡ сп҃се́нїѧ всѣ̑мъ на́мъ пода́телїе.
Сла́ва, гла́съ ѕ҃:
До́брїи рабѝ, бл҃зі́и и҆ вѣ́рнїи, до́брїи дѣ́лателїе вїногра́да хрⷭ҇то́ва, и҆̀же и҆ тѧготꙋ̀ дневнꙋ́ю поне́сшїи, и҆ да́нный ва́мъ тала́нтъ возрасти́вшїи, и҆ по ва́съ прише́дшымъ не зави́дѣвшїи: тѣ́мже и҆ врата̀ ва́мъ нбⷭ҇наѧ ѿверзо́шасѧ. вше́дше ᲂу҆̀бо въ ра́дость влⷣки хрⷭ҇та̀, моли́те ѡ҆ на́съ ст҃і́и ᲂу҆чи́телїе.
И҆ ны́нѣ, бг҃оро́диченъ:
Бцⷣе, ты̀ є҆сѝ лоза̀ и҆́стиннаѧ:
Крⷭ҇тобг҃оро́диченъ: Пречтⷭ҇аѧ, ꙗ҆́кѡ ви́дѣ тѧ̀ на крⷭ҇тѣ̀ повѣ́шена, пла́чꙋщи вопїѧ́ше ма́терски: сн҃е мо́й, и҆ бж҃е мо́й, сладча́йшее моѐ ча́до, ка́кѡ терпи́ши стра́сть поно́снꙋю;
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.