Слꙋ́жба ст҃ы̑мъ ѻ҆ц҃є́мъ
<<л҃є ѡ҆б.: 70>>
[глⷡ҇а ѕ҃] СЛꙊ́ЖБА Ѻ҆́БЩА
ст҃ы́хъ ѻ҆тє́цъ, на собо́ры.
Пое́мъ въ недѣ́лю седмꙋ́ю по па́сцѣ: И҆ і҆ꙋ́лїа въ ѕ҃і де́нь, по па́мѧти ст҃а́гѡ сщ҃енномч҃нка а҆ѳиноге́на: И҆ ѻ҆ктѡ́врїа въ а҃і, по па́мѧти ст҃а́гѡ а҆пⷭ҇ла фїлі́ппа.
Въ сꙋббо́тꙋ ве́чера, на Гдⷭ҇и воззва́хъ, стїхи̑ры, гла́съ ѕ҃.
Подо́бенъ: Ѿча́ѧннаѧ:
И҆з̾ чре́ва роди́лсѧ є҆сѝ пре́жде денни́цы, ѿ ѻ҆ц҃а̀ безма́теренъ пре́жде вѣ̑къ, а҆́ще и҆ а҆́рїй тва́рь тѧ̀, а҆ не бг҃а сла́витъ, де́рзостїю смѣша́ѧ тѧ̀ зижди́телѧ тва́ремъ безꙋ́мнѡ, вещество̀ ѻ҆гнѧ̀ вѣ́чнагѡ себѣ̀ сокро́вищствꙋѧй: но собо́ръ, и҆́же въ нїке́и, сн҃а бж҃їѧ тѧ̀ проповѣ́да, гдⷭ҇и, ѻ҆ц҃ꙋ̀ и҆ дх҃ꙋ сопрⷭ҇то́льна.
Кто̀ твою̀, сп҃се, ри́зꙋ раздра̀; а҆́рїй, ты̀ ре́клъ є҆сѝ, и҆́же трⷪ҇цы пресѣчѐ є҆диночестно́е нача́ло въ раздѣлє́нїѧ. се́й ѿве́рже тѧ̀ бы́ти є҆ди́наго ѿ трⷪ҇цы: се́й и҆ несто́рїа ᲂу҆чи́тъ бцⷣꙋ не глаго́лати. но собо́ръ, и҆́же въ нїке́и, сн҃а бж҃їѧ тѧ̀ проповѣ́да, гдⷭ҇и, ѻ҆ц҃ꙋ̀ и҆ дх҃ꙋ сопрⷭ҇то́льна.
Въ бре́гъ па́даетъ грѣха̀, а҆́рїй возненави́дѣвый свѣ́та ви́дѣти, и҆ бж҃е́ственною растерза́етсѧ ᲂу҆́дицею внꙋ́треннихъ, всѐ и҆зда́ти сꙋщество̀ и҆ дꙋ́шꙋ нꙋ́жнѡ, дрꙋгі́й і҆ꙋ́да бы́въ нра́вомъ и҆ ѡ҆́бразомъ. но собо́ръ, и҆́же въ нїке́и, сн҃а бж҃їѧ тѧ̀ проповѣ́да, гдⷭ҇и, ѻ҆ц҃ꙋ̀ и҆ дх҃ꙋ сопрⷭ҇то́льна.
А҆́рїй безꙋ́мный прест҃ы́ѧ трⷪ҇цы пресѣчѐ є҆динонача́лїе въ трѝ беззакѡ́ннаѧ же и҆ несра́слєннаѧ сꙋщєства̀. тѣ́мже ѻ҆тцы̀ бг҃оно́снїи соше́дшесѧ ᲂу҆се́днѡ, ре́вностїю разжи́заеми, ꙗ҆́коже ѳесві́тѧнинъ и҆лїа̀, дꙋхо́внымъ посѣка́ютъ мече́мъ, стꙋдꙋ̀ наꙋчи́вшаго хꙋ́льника, ꙗ҆́коже дх҃ъ вѣща́ше.
<<л҃ѕ: 71>>
Сла́ва, гла́съ ѕ҃:
Та́инствєнныѧ дне́сь дх҃а трꙋбы̑, бг҃онѡ́сныѧ ѻ҆тцы̀ восхва́лимъ, пѣснопѣ́вшыѧ посредѣ̀ цр҃кве, пѣ́снь сли́чнꙋю бг҃осло́вїѧ, трⷪ҇цꙋ є҆ди́нꙋ непремѣ́ннꙋю, сꙋщество́ же и҆ бж҃ество̀, низложи́тели а҆́рїевы и҆ правосла́вныхъ побо́рники, молѧ́щыѧсѧ всегда̀ гдⷭ҇ꙋ поми́ловатисѧ дꙋша́мъ на́шымъ.
И҆ ны́нѣ, бг҃оро́диченъ:
Кто̀ тебѐ не ᲂу҆бл҃жи́тъ, прест҃а́ѧ дв҃о:
Вхо́дъ. Прокі́менъ днѐ.
Бытїѧ̀ чте́нїе. [Глава̀ д҃і].
Слы́шавъ а҆вра́мъ, ꙗ҆́кѡ плѣне́нъ бы́сть лѡ́тъ брата́ничь є҆гѡ̀, сочтѐ свои́хъ си домоча́децъ три́ста и҆ ѻ҆смьна́десѧть, и҆ погна̀ во слѣ́дъ и҆́хъ да́же до да́на. И҆ нападѐ на нѧ̀ но́щїю са́мъ, и҆ ѻ҆́троцы є҆гѡ̀ съ ни́мъ: и҆ поразѝ и҆̀хъ, и҆ гонѝ и҆̀хъ до хова́ла, є҆́же є҆́сть ѡ҆шꙋ́юю дама́ска. И҆ возвратѝ всѧ́каго конѧ̀ содо́мскаго, и҆ лѡ́та брата́нича своего̀ возвратѝ, и҆ всѧ̑ и҆мѣ̑нїѧ є҆гѡ̀, и҆ жєны̀ и҆ лю́ди. И҆зы́де же ца́рь содо́мскїй въ срѣ́тенїе є҆мꙋ̀, повнегда̀ врати́тисѧ є҆мꙋ̀ ѿ сѣ́ча ходоллогомо́рскагѡ, и҆ съ царьмѝ и҆̀же съ ни́мъ, во ᲂу҆до́ль са́винъ: сїе́ же бѧ́ше по́ле царе́во. И҆ мелхїседе́къ ца́рь сали́мскїй и҆знесѐ хлѣ́бы и҆ вїно̀: бѧ́ше же сщ҃е́нникъ бг҃а вы́шнѧгѡ. И҆ бл҃гословѝ а҆вра́ма, и҆ речѐ: бл҃гослове́нъ а҆вра́мъ бг҃омъ вы́шнимъ, и҆́же созда̀ нб҃о и҆ зе́млю: и҆ бл҃гослове́нъ бг҃ъ вы́шнїй, и҆́же предадѐ врагѝ твоѧ̑ под̾ рꙋ́ки тебѣ̀.
Втора́гѡ зако́на чте́нїе [глава̀ а҃].
Во дне́хъ ѻ҆́нѣхъ, речѐ мѡѷсе́й къ сынѡ́мъ і҆и҃левымъ: ви́дите, преда́хъ пред̾ лице́мъ ва́шимъ зе́млю: вше́дше наслѣ́дꙋйте зе́млю, ю҆́же клѧ́тсѧ гдⷭ҇ь ѻ҆тцє́мъ ва́шымъ, а҆враа́мꙋ и҆ і҆саа́кꙋ и҆ і҆а́кѡвꙋ да́ти и҆̀мъ, и҆ сѣ́мени и҆́хъ по ни́хъ. И҆ реко́хъ къ ва́мъ во вре́мѧ ѻ҆́но, глаго́лѧ: не возмогꙋ̀ є҆ди́нъ води́ти ва́съ. Гдⷭ҇ь бг҃ъ на́шъ ᲂу҆мно́жилъ вы̀ є҆́сть, и҆ сѐ є҆стѐ дне́сь ꙗ҆́кѡ ѕвѣ́зды нбⷭ҇ныѧ мно́жествомъ. Гдⷭ҇и бг҃ъ ѻ҆тє́цъ на́шихъ да приложи́тъ ва́мъ, ꙗ҆́кѡ да бꙋ́дете ты́сѧщами <<л҃ѕ ѡ҆б.: 72>> сꙋгꙋ́бѡ, и҆ да бл҃гослови́тъ ва́съ, ꙗ҆́коже глаго́ла ва́мъ. И҆ взѧ́хъ ѿ ва́съ мꙋ́жи мꙋ̑дры, и҆ свѣ́дѡмы, и҆ смы́слєнны, и҆ поста́вихъ и҆̀хъ владѣ́ти над̾ ва́ми тысѧщенача́льники, и҆ стонача́льники, и҆ пѧтдесѧтонача́льники, и҆ десѧтонача́льники, и҆ писмоводи́тєли сꙋдїѧ́мъ ва́шымъ. И҆ заповѣ́дахъ сꙋдїѧ́мъ ва́шымъ во вре́мѧ ѻ҆́но, глаго́лѧ: разслꙋ́шайте посредѣ̀ бра́тїй ва́шихъ, и҆ сꙋди́те пра́веднѡ посредѣ̀ мꙋ́жа, и҆ посредѣ̀ бра́та є҆гѡ̀ и҆ посредѣ̀ прише́льца є҆гѡ̀. Да не позна́ете лица̀ въ сꙋдѣ̀, ма́ломꙋ и҆ вели́комꙋ сꙋ́диши, и҆ не ᲂу҆стыди́шисѧ лица̀ человѣ́ческа, ꙗ҆́кѡ сꙋ́дъ бж҃їй є҆́сть.
Втора́гѡ зако́на чте́нїе. [Глава̀ і҃].
Во дне́хъ ѻ҆́нѣхъ, речѐ мѡѷсе́й къ сынѡ́мъ і҆и҃лєвымъ: Сѐ гдⷭ҇а бг҃а твоегѡ̀ нб҃о, и҆ нб҃о нб҃сѐ, землѧ̀ и҆ всѧ̑ є҆ли̑ка сꙋ́ть на не́й. Ѡ҆ба́че ѻ҆тцы̀ ва́шѧ произво́ли гдⷭ҇ь люби́ти ѧ҆̀: и҆ и҆збра̀ сѣ́мѧ и҆́хъ по ни́хъ ва́съ па́че всѣ́хъ ꙗ҆зы̑къ, въ де́нь се́й. И҆ ѡ҆брѣ́жите жестосе́рдїе ва́ше, и҆ вы̑ѧ ва́шѧ не ѡ҆жесточи́те ктомꙋ̀. И҆́бо гдⷭ҇ь бг҃ъ на́шъ, се́й бг҃ъ богѡ́въ, и҆ гдⷭ҇ь господе́й: бг҃ъ вели́кїй и҆ крѣ́пкїй, и҆ стра́шный, и҆́же не диви́тсѧ лицꙋ̀ нижѐ взе́млетъ да́ръ. Творѧ́й сꙋ́дъ прише́льцꙋ и҆ сиротѣ̀ и҆ вдовѣ̀, и҆ лю́битъ прише́льца, да́ти є҆мꙋ̀ хлѣ́бъ и҆ ри́зꙋ. И҆ возлюби́те прише́льца, прише́льцы бо бѣ́сте въ землѝ є҆гѵ́петстѣй. Гдⷭ҇а бг҃а твоегѡ̀ да ᲂу҆бои́шисѧ, и҆ томꙋ̀ є҆ди́номꙋ послꙋ́жиши, и҆ къ немꙋ̀ прилѣпи́шисѧ, и҆ и҆́менемъ є҆гѡ̀ клене́шисѧ. То́й хвала̀ твоѧ̀, и҆ то́й бг҃ъ тво́й, и҆́же сотворѝ тебѣ̀ вели̑каѧ и҆ сла̑внаѧ сїѧ̑, ꙗ҆̀же ви́дѣстѣ ѻ҆́чи твоѝ.
На лїті́и стїхи́ра хра́ма. Сла́ва, гла́съ г҃:
А҆пⷭ҇льскихъ преда́нїй и҆звѣ́стнїи храни́телїе бы́сте ст҃і́и ѻ҆тцы̀: ст҃ы́ѧ бо трⷪ҇цы є҆диносꙋ́щное, правосла́внѡ проповѣ́давше, а҆́рїево хꙋле́нїе собо́рнѣ низложи́сте, съ ни́мже и҆ македо́нїа дх҃обо́рца ѡ҆бличи́вше, ѡ҆сꙋди́сте нестѡ́рїа, є҆втѵ́хїа и҆ дїоско́ра, саве́ллїа же и҆ севи́ра безгла́внаго: и҆́хже пре́лести и҆зба́витисѧ на́мъ и҆спроси́те, нескве́рнꙋ на́шемꙋ житїю̀ въ вѣ́рѣ сохрани́тисѧ, мо́лимсѧ.
<<л҃з: 73>>
И҆ ны́нѣ, бг҃оро́диченъ: Без̾ сѣ́мене ѿ бжⷭ҇твеннагѡ:
На стїхо́внѣ ѻ҆ктѡ́иха.
Сла́ва, ѻ҆тцє́мъ, гла́съ д҃:
Моле́бнꙋю па́мѧть дне́сь бг҃оно́сныхъ ѻ҆тцє́въ, ѿ всеѧ̀ вселе́нныѧ собра́вшихсѧ, во свѣ́тлѣмъ гра́дѣ нїке́йстѣмъ правосла́вныхъ собра́нїѧ, бл҃гоче́ствꙋюще вѣ́рнѡ пра́зднꙋемъ: сі́и бо лю́тагѡ а҆́рїа безбо́жное велѣ́нїе бл҃гочестномꙋ́дреннѣ низложи́ша, и҆ ѿ собо́рныѧ цр҃кве собо́рнѣ того̀ и҆згна́ша: и҆ ꙗ҆́снѡ сн҃а бж҃їѧ є҆диносꙋ́щна и҆ соприсносꙋ́щна пре́жде вѣ̑къ сꙋ́ща, всѣ́хъ наꙋчи́ша и҆сповѣ́дати, во и҆з̾ѡбраже́нїи вѣ́ры и҆звѣ́стнѡ и҆ бл҃гоче́стнѡ сїѐ и҆зложи́вше, тѣ́мже и҆ мы̀ бжⷭ҇твеннымъ и҆́хъ повелѣ́нїємъ послѣ́дствꙋюще, и҆звѣ́стнѡ вѣ́рꙋюще слꙋ́жимъ, со ѻ҆ц҃е́мъ сн҃ꙋ, и҆ дх҃ꙋ всест҃о́мꙋ во є҆ди́номъ бж҃ествѣ̀, трⷪ҇цѣ є҆диносꙋ́щнѣй.
И҆ ны́нѣ, бг҃оро́диченъ: При́зри на молє́нїѧ:
На бл҃гослове́нїи хлѣ́бѡвъ: Тропа́рь: Бцⷣе дв҃о: [Два́жды.]
И҆ ѻ҆тцє́въ, гла́съ и҃:
Препросла́вленъ є҆сѝ, хрⷭ҇тѐ бж҃е на́шъ, свѣти̑ла на землѝ ѻ҆тцы̀ на́шѧ ѡ҆снова́вый, и҆ тѣ́ми ко и҆́стиннѣй вѣ́рѣ всѧ̑ ны̀ наста́вивый: многобл҃гоꙋтро́бне, сла́ва тебѣ̀. [Є҆ди́ножды.]
На ᲂу҆́трени,
на Бг҃ъ гдⷭ҇ь, тропа́рь воскрⷭ҇нъ два́жды.
Сла́ва, ѻ҆тцє́въ.
И҆ ны́нѣ, бг҃оро́диченъ: И҆́же на́съ ра́ди рожде́йсѧ:
По каѳі́смахъ сѣда́льны ѻ҆ктѡ́иха.
Канѡ́нъ воскрⷭ҇нъ со і҆рмосо́мъ на д҃, и҆ крⷭ҇товоскрⷭ҇нъ на в҃, и҆ бцⷣѣ на в҃, и҆ ѻ҆тцє́въ на ѕ҃. [Творе́нїе сщ҃е́ннагѡ и҆ вселе́нскагѡ патрїа́рха кѵ́ръ ге́рмана.] Гла́съ ѕ҃.
Пѣ́снь а҃.
І҆рмо́съ: Ꙗ҆́кѡ по сꙋ́хꙋ пѣшеше́ствовавъ і҆и҃ль, по бе́зднѣ стопа́ми, гони́телѧ фараѡ́на ви́дѧ потоплѧ́ема, бг҃ꙋ побѣ́днꙋю пѣ́снь пои́мъ, вопїѧ́ше.
<<л҃з ѡ҆б.: 74>>
И҆́же ѿ нїке́и, ꙗ҆́коже ѿ нѣ́коегѡ нб҃сѐ, всю́дꙋ возгремѣ́вше сло́во жива́гѡ ѻ҆ц҃а̀, и҆ сегѡ̀ показа́вше врагѝ гро́момъ и҆збїє́ны, сщ҃е́нными словесы̑ да почтꙋ́тсѧ.
Дꙋхобо́рцєвъ дꙋ́хъ лꙋка́вый, ст҃ы̑мъ дх҃омъ хрⷭ҇то́съ ѿ своеѧ̀ цр҃кве дале́че ѿгна̀, вторы̑мъ дѣ́йствомъ собо́ра совокꙋпи́въ.
Хрїстобо́рца пре́лесть и҆згна̀ нестѡ́рїа, кѷрі́ллъ собо́ра нача́льникъ, и҆́же ꙗ҆́снѡ дв҃ꙋ мр҃і́ю и҆сповѣ́да бг҃ꙋ мт҃рь чтⷭ҇ꙋю.
Бг҃оро́диченъ: Несозда́нныѧ трⷪ҇цы є҆ди́наго хрⷭ҇та̀ во двою̀ є҆стествꙋ̀ и҆ хотѣ̑нїю, чтⷭ҇аѧ, ражда́еши, соедине́нїе человѣ́кѡмъ и҆ а҆́гг҃лѡмъ тебє̀ ра́ди содѣ́лавшаго.
Пѣ́снь г҃.
І҆рмо́съ: Нѣ́сть ст҃ъ, ꙗ҆́коже ты̀ гдⷭ҇и бж҃е мо́й, вознесы́й ро́гъ вѣ́рныхъ твои́хъ, бл҃же, и҆ ᲂу҆тверди́вый на́съ на ка́мени и҆сповѣ́данїѧ твоегѡ̀.
Тва́ри слꙋжи́тель ꙗ҆́вльсѧ а҆́рїй безꙋ́мный, и҆ македо́нїй па́ки ме́рзокъ ꙗ҆́вльсѧ въ гее́ннѣ ѻ҆́гненнѣй ра́внѡ мꙋ́чатсѧ со є҆́ллины.
Седмїю̀ собѡ́ры сщ҃е́нными ст҃ы́хъ ѻ҆тє́цъ чтⷭ҇нꙋ́ю цр҃ковь ᲂу҆ѧсни́лъ є҆сѝ, хрⷭ҇тѐ, ꙗ҆́коже седми́хъ свѣти́льникъ свѣ́томъ пре́лести тмꙋ̀ прогна́въ дале́че.
Ста́до твоѐ, сло́ве, погꙋблѧ́етъ многоѡбра́знаѧ кра́ста є҆ретїкѡ́въ: па́стырїе же твои́хъ слове́сныхъ ѻ҆ве́цъ ᲂу҆че́нїемъ сїѐ премѣни́ша.
Бг҃оро́диченъ: Є҆ди́наго родила̀ є҆сѝ, пречтⷭ҇аѧ, ѿ несозда́нныѧ трⷪ҇цы, во двою̀ сꙋществꙋ̀ и҆ хотѣ̑нїю: є҆гѡ́же ѡ҆́бразꙋ чтⷭ҇но́мꙋ покланѧ́емсѧ бл҃года́ти и҆сполнѧ́еми.
Конда́къ и҆ і҆́косъ воскрⷭ҇нъ.
Та́же сѣда́ленъ ѻ҆тцє́въ, гла́съ д҃.
Подо́бенъ: Ско́рѡ предварѝ:
Свѣти́льницы пресвѣ́тлїи и҆́стины хрⷭ҇то́вы мі́рꙋ ꙗ҆ви́стесѧ на землѝ, вои́стиннꙋ бл҃же́ннѣйшїи, ѻ҆тцы̀ бг҃овѣща́ннїи, и҆зсꙋши́вше є҆́рєси хꙋ́льныхъ ѧ҆зыковре́дїй, и҆ ᲂу҆гаси́вше пламенови̑днаѧ ѕлосла́вныхъ смꙋщє́нїѧ. тѣ́мже ꙗ҆́кѡ ст҃и́телїе хрⷭ҇то́вы, моли́тесѧ сп҃сти́сѧ на́мъ. [Два́жды.]
<<л҃и: 75>>
Сла́ва, и҆ ны́нѣ, бг҃оро́диченъ:
Ѡ҆бнови́ла є҆сѝ, чтⷭ҇аѧ, бж҃е́ственнымъ ржⷭ҇тво́мъ твои́мъ, и҆стлѣ́вшее во страсте́хъ земноро́дныхъ ме́ртвенное сꙋщество̀, и҆ воздви́гла є҆сѝ всѧ̑ ѿ сме́рти къ животꙋ̀ нетлѣ́нїѧ. тѣ́мже тѧ̀ по до́лгꙋ бл҃жи́мъ всѝ, дв҃о препросла́вленнаѧ, ꙗ҆́коже прорекла̀ є҆сѝ.
Пѣ́снь д҃.
І҆рмо́съ: Хрⷭ҇то́съ моѧ̀ си́ла, бг҃ъ и҆ гдⷭ҇ь, чтⷭ҇на́ѧ цр҃ковь бг҃олѣ́пнѡ пое́тъ взыва́ющи, ѿ смы́сла чи́ста ѡ҆ гдⷭ҇ѣ пра́зднꙋющи.
Вразѝ твоѝ возшꙋмѣ́ша, и҆ ненави́дѧщїи тѧ̀ главꙋ̀ воздвиго́ша, сп҃се, вма́лѣ, но а҆́бїе падо́ша не терпѧ́ще гла́са трꙋ́бъ дх҃о́вныхъ.
Сл҃нца сл҃нцы сꙋгꙋ́бѡ ѡ҆зари́ша, сн҃ъ и҆ дх҃ъ ѿ ѻ҆ц҃а̀, несозда́нни, собезнача́льни: ѻ҆бои̑мъ ѻ҆ц҃ъ є҆ди́нъ вино́венъ вѣ́рꙋетсѧ.
Се́дмь ᲂу҆́бѡ дх҃ѡ́въ, и҆̀же почи́ша на хрⷭ҇тѣ̀, и҆са́їа сїѐ речѐ: на седми́хъ же собо́рѣхъ почѝ хрⷭ҇то́съ, со ѻ҆ц҃е́мъ и҆ бж҃е́ственнымъ дх҃омъ.
Бг҃оро́диченъ: Бг҃а родила̀ є҆сѝ пло́ть носи́вшаго ѿ чтⷭ҇ыхъ твои́хъ крове́й, ѻ҆трокови́це чтⷭ҇аѧ: то́же сꙋгꙋ́ба є҆стество́мъ, во ѵ҆поста́си же є҆ди́нѣй, ѻ҆тцы̀ проповѣ́даша.
Пѣ́снь є҃.
І҆рмо́съ: Бж҃їимъ свѣ́томъ твои́мъ, бл҃же, ᲂу҆́тренюющихъ тѝ дꙋ́шы любо́вїю ѡ҆зарѝ, молю́сѧ, тѧ̀ вѣ́дѣти, сло́ве бж҃їй, и҆́стиннаго бг҃а, ѿ мра́ка грѣхо́внагѡ взыва́юща.
Бж҃е́ственный вїногра́дъ хрⷭ҇то́въ, и҆́же ѿ є҆гѵ́пта пренесе́нъ, те́мнагѡ ѿча́ѧнна гꙋби́телѧ ѕвѣ́рїе пе́рвѣе поѧда́хꙋ: пра́щею же ст҃ы́хъ ѻ҆тє́цъ дале́че ѿгна́шасѧ.
Бж҃е́ственнымъ сїѧ́нїемъ трисїѧ́ннымъ, ᲂу҆́мъ просвѣ́щше честні́и ѻ҆тцы̀, є҆ди́наго проповѣ́даша чтⷭ҇ны́ѧ трⷪ҇цы хрⷭ҇та̀ гдⷭ҇а, сꙋгꙋ́ба є҆стествы̀ и҆ хотѣ̑нїи.
Трⷪ҇ченъ: Въ ве́щныхъ, ꙗ҆́коже въ серафі́мскихъ мꙋ́дрыми ѻ҆тцы̀, ѽ трⷪ҇це, цр҃ковь ѡ҆нб҃си́сѧ, трист҃ꙋ́ю пѣ́снь при́снѡ тебѣ̀ пою́щи, собира́етъ трⷪ҇ческое твоѐ є҆ди́но бж҃ество̀.
<<л҃и ѡ҆б.: 76>>
Бг҃оро́диченъ: Мт҃и и҆ раба̀ твоегѡ̀ сн҃а была̀ є҆сѝ, чтⷭ҇аѧ: и҆́бо и҆́же и҆з̾ тебє̀ пре́жде тебє̀ бѧ́ше, ꙗ҆́кѡ содѣ́тель тво́й, є҆го́же во двою̀ сꙋществꙋ̑ познава́емъ, и҆ соединѧ́емъ сло́вомъ ѵ҆поста́снымъ.
Пѣ́снь ѕ҃.
І҆рмо́съ: Жите́йское мо́ре, воздвиза́емое зрѧ̀ напа́стей бꙋ́рею, къ ти́хомꙋ приста́нищꙋ твоемꙋ̀ прите́къ, вопїю́ ти: возведѝ ѿ тлѝ живо́тъ мо́й, многомлⷭ҇тиве.
Бг҃ъ богѡ́въ гдⷭ҇ь, дв҃дъ пре́жде воспѣ́въ глаго́ла, и҆ призва̀ ѿ востѡ́къ, ѿ конє́цъ всеѧ̀ землѝ да́же до за̑падъ и҆́хъ, вселє́нскїѧ собо́ры ѻ҆тє́цъ назна́менꙋѧ.
Се́дмь столпѡ́въ ᲂу҆твердѝ премꙋ́дрость бж҃їѧ, твою̀ цр҃ковь влⷣко, седмочи́сленными собѡ́ры сщ҃е́нныхъ ѻ҆тє́цъ, неꙋкло́ннꙋ соблюда́емꙋ ѿ всѧ́кихъ є҆ресе́й.
Сты́дъ лица̀ да покры́етъ є҆ѵтѵ́ха и҆ дїоско́ра, слїѧ́нїе бꙋесло́вѧщихъ є҆стества̀ хрⷭ҇то́ва: не въ привидѣ́нїи бо, но во ѡ҆боже́нїи є҆стество̀ земноро́дныхъ прїѧ́тъ.
Бг҃оро́диченъ: Да во́зметсѧ нестѡ́рїй въ є҆врє́йскїѧ тє́мныѧ собо́ры, и҆ ѧ҆зы́къ же ѿсѣче́тсѧ хꙋ́льный: бг҃а бо родѝ дв҃а мр҃і́а, плотоно́сца на́мъ.
Конда́къ, гла́съ и҃.
Подо́бенъ: Ꙗ҆́кѡ нача́тки:
А҆пⷭ҇лъ проповѣ́данїе, и҆ ѻ҆тє́цъ догма́ты, цр҃кве є҆ди́нꙋ вѣ́рꙋ запечатлѣ́ша: ꙗ҆́же и҆ ри́зꙋ носѧ́щи и҆́стины, и҆стка́нꙋ ѿ є҆́же свы́ше бг҃осло́вїѧ, и҆справлѧ́етъ и҆ сла́витъ бл҃гоче́стїѧ вели́кое та́инство.
І҆́косъ: Высо́кимъ проповѣ́данїемъ, бж҃їю цр҃ковь ᲂу҆слы́шимъ вопїю́щꙋ: жа́ждай да грѧде́тъ ко мнѣ̀, и҆ пїе́тъ ча́шꙋ, ю҆́же держꙋ̀, ча́ша є҆́сть премꙋ́дрости, сїѐ питїѐ и҆́стины, сло́вомъ почерпо́хъ, во́дꙋ пролива́ющꙋю не прекосло́вїѧ, но и҆сповѣ́данїѧ, ю҆́же пїѧ̀ ны́нѣшнїй і҆и҃ль, бг҃а зри́тъ вѣща́юща: ви́дите ви́дите, ꙗ҆́кѡ са́мъ а҆́зъ є҆́смь, и҆ не премѣнѧ́юсѧ: а҆́зъ бг҃ъ пе́рвый, а҆́зъ же и҆ по си́хъ, и҆ ра́звѣ менє̀ нѣ́сть и҆но́гѡ <<л҃ѳ: 77>> ѿню́дъ, ѿсю́дꙋ причаща́ющїисѧ, насы́тѧтсѧ, и҆ восхва́лѧтъ бл҃гоче́стїѧ вели́кое та́инство.
Пѣ́снь з҃.
І҆рмо́съ: Росода́тельнꙋ ᲂу҆́бѡ пе́щь содѣ́ла а҆́гг҃лъ прпⷣбнымъ ѻ҆трокѡ́мъ, халдє́и же ѡ҆палѧ́ющее велѣ́нїе бж҃їе, мꙋчи́телѧ ᲂу҆вѣща̀ вопи́ти: бл҃гослове́нъ є҆сѝ, бж҃е ѻ҆тє́цъ на́шихъ.
Вавѷлѡ́нскаго ᲂу҆́бѡ ѕмі́ѧ разразѝ данїи́лъ пе́рвѣе, мл҃твами же ѻ҆тє́цъ просѧ́десѧ лю́тый є҆гѵ́петскїй ѕмі́й, ꙗ҆́вѣ а҆́рїй, поѧда́ющїй хрⷭ҇то́во ста́до.
Непроще́ннымъ нече́стїемъ негодова̀ во́лкъ македо́нїй, прирази́всѧ дх҃ꙋ, ѡ҆божа́ющемꙋ человѣ́ки, и҆ всѧ̑ ба́нею кр҃ще́нїѧ на пе́рвꙋю добро́тꙋ воѡбража́ющи вѣ̑рныѧ.
Дїоско́ръ, и҆ є҆ѵтѵ́хъ, и҆ севи́ръ левїаѳа́нъ, трїѐ слива́ющїи и҆ смѣша́ющїи хрⷭ҇то́ва сꙋщєства̀ смѣше́нїемъ ᲂу҆́мнымъ, къ трⷪ҇цѣ чтⷭ҇нѣ́й прирази́шасѧ де́рзостїю.
Бг҃оро́диченъ: Плотска́гѡ твоегѡ̀ зра́ка ѡ҆́бразъ, влⷣко, че́стнѡ ѡ҆блобыза́емъ, и҆ мт҃ре твоеѧ̀, и҆ ст҃ы́хъ всѣ́хъ по́честь вѣ́дѧще пра́вымъ по́мысломъ, преходи́ти до́брѣ къ первоѡбра́зномꙋ.
Пѣ́снь и҃.
І҆рмо́съ: И҆з̾ пла́мене прпⷣбнымъ ро́сꙋ и҆сточи́лъ є҆сѝ, и҆ првⷣнагѡ же́ртвꙋ водо́ю попали́лъ є҆сѝ: всѧ̑ бо твори́ши, хрⷭ҇тѐ, то́кмѡ є҆́же хотѣ́ти, тѧ̀ превозно́симъ во всѧ̑ вѣ́ки.
Ꙗ҆́коже є҆ди́нагѡ ко́рене ѻ҆́трасли бг҃оса̑дны, сн҃ъ и҆ дх҃ъ возсїѧ́вше: и҆́бо ѻ҆ц҃ъ є҆диновино́венъ є҆́сть, безлѣ́тный безлѣ̑тнымъ ли́цамъ є҆диноче́стенъ.
И҆з̾ чре́ва невеще́ственна безлѣ́тнѡ возсїѧ́лъ є҆сѝ, є҆диносꙋ́щное сло́во ѻ҆ц҃ꙋ̀ и҆ дх҃ꙋ, но на́съ ра́ди въ лѣ́тнюю всели́сѧ веще́ственнꙋю ᲂу҆тро́бꙋ є҆ди́ныѧ бцⷣы.
Разжє́нныѧ стрѣ́лы ѻ҆гне́мъ дꙋхо́внымъ, въ стꙋдє́наѧ сердца̀ врагѡ́въ вонзо́шасѧ є҆ретїкѡ́въ, и҆ на сме́рть ᲂу҆дави́ша и҆̀хъ совокꙋплє́нїи ѻ҆тє́цъ седмочи́сленныхъ и҆ бжⷭ҇твенныхъ.
<<л҃ѳ ѡ҆б.: 78>>
Бг҃оро́диченъ: Не ли́цы є҆ди́наго хрⷭ҇та̀ сла́вимъ, не смѣше́нїемъ сꙋщества̀ сего̀ соединѧ́емъ: є҆ди́нъ бо сы́й и҆ то́йже лице́мъ, раздвоѧ́етсѧ є҆стествы̀, дв҃о, тво́й сн҃ъ и҆ содѣ́тель.
Пѣ́снь ѳ҃.
І҆рмо́съ: Бг҃а человѣ́кѡмъ не возмо́жно ви́дѣти, на него́же не смѣ́ютъ чи́ни а҆́гг҃льстїи взира́ти: тобо́ю же, всечтⷭ҇аѧ, ꙗ҆ви́сѧ человѣ́кѡмъ сло́во воплоще́нно, є҆го́же велича́юще, съ нбⷭ҇ными вѡ́и тѧ̀ ᲂу҆бл҃жа́емъ.
Не подоба́етъ приложи́ти, и҆лѝ ѡ҆ста́вити что̀ сщ҃е́ннагѡ преда́нїѧ правосла́вныѧ на́шеѧ вѣ́ры: въ не́йже бо вѣ́рнѡ крⷭ҇ти́хомсѧ. а҆ и҆̀же преложи́тєли сеѧ̀ вѣ́ры, впра́вдꙋ пре́дани бꙋ́дꙋтъ преще́нїю проклѧ́тїѧ.
Ра́достїю се́рдца всѝ взыгра́имъ, сщ҃е́нныѧ собо́ры ѻ҆тє́цъ совокꙋ́пльше: тѣ́хъ бо ра́ди свѣ́тъ ви́дѣхомъ правосла́вїѧ. свѣти́льницы бо ꙗ҆ви́шасѧ, всѧ̑ наставлѧ́юще къ пра̑вымъ ᲂу҆че́нїѧ ѡ҆брѣ́тенїємъ.
Дꙋша́мъ и҆спро́симъ ѡ҆чище́нїе, и҆ бл҃гоче́стнѡ житїѐ препроводи́ти потщи́мсѧ: ꙗ҆́кѡ да прича́стницы бꙋ́демъ ст҃ы̑мъ ѻ҆тцє́мъ, и҆̀же скры́ша пра́выхъ ᲂу҆че́нїй бога́тство на́мъ ча́дѡмъ и҆́хъ.
Бг҃оро́диченъ: Бг҃ъ ѿ бокꙋ̀ твоє́ю возсїѧ̀, мт҃и бж҃їѧ, и҆ человѣ́ческїй ро́дъ ѡ҆божѝ, и҆ сла́вы своеѧ̀ сподо́би, и҆ наслѣ́дники всѧ̑ показа̀, и҆̀же тѧ̀ бцⷣꙋ вои́стиннꙋ при́снѡ проповѣ́дающыѧ.
Свѣти́ленъ.
Подо́бенъ: Жєны̀, ᲂу҆слы́шите:
Ѻ҆тє́цъ бж҃е́ственныхъ дне́сь па́мѧть пра́зднꙋюще, моле́ньми тѣ́хъ мо́лимъ, всеще́дре: всѧ́кагѡ вре́да є҆ресе́й и҆зба́ви лю́ди твоѧ̑, гдⷭ҇и, и҆ всѧ̑ сподо́би ѻ҆тца̀, сло́во, сла́вити, и҆ всест҃а́го дх҃а.
Бг҃оро́диченъ.
Подо́бенъ:
Ра́дꙋйсѧ, бж҃їѧ пала́то, ра́дꙋйсѧ, горо̀ присѣ́ннаѧ. ра́дꙋйсѧ, неѡпали́маѧ кꙋпино̀. ра́дꙋйсѧ, прⷭ҇то́ле сла́вы. ра́дꙋйсѧ, бж҃е́ственнаѧ <<м҃: 79>> трапе́зо. ра́дꙋйсѧ, рꙋ́чко всезлата́ѧ, ра́дꙋйсѧ, свѣти́льниче всесвѣ́тлый. ра́дꙋйсѧ, ле́гкїй ѡ҆́блаче, дв҃о мт҃и мр҃і́е.
На хвали́техъ стїхи̑ры воскрⷭ҇ны д҃, и҆ ѻ҆тцє́въ д҃. Гла́съ ѕ҃.
Подо́бенъ: Всю̀ ѿложи́вше:
Всѐ собра́вше ꙳ дꙋше́вное хꙋдо́жество, ꙳ и҆ бжⷭ҇твеннымъ дх҃омъ сразсмотри́вше, ꙳ нбⷭ҇ный и҆ честны́й сѷмво́лъ вѣ́ры, ꙳ честні́и ѻ҆тцы̀ бг҃опи́саннѣ начерта́ша, ꙳ въ не́мже ꙗ҆́вственнѣйше, ꙳ ро́ждшемꙋ собезнача́льнаго сло́ва наꙋча́ютъ, ꙳ и҆ всеи́стиннѡ є҆диносꙋ́щнаго: ꙳ а҆пⷭ҇льскимъ послѣ́дꙋюще ꙗ҆́вѣ ᲂу҆че́нїємъ, ꙳ бл҃госла́внїи и҆ пребога́тїи, ꙳ вои́стиннꙋ и҆ бг҃омꙋ́дрїи. [Два́жды.]
Сті́хъ: Бл҃гослове́нъ є҆сѝ, гдⷭ҇и бж҃е ѻ҆тє́цъ на́шихъ, и҆ хва́льно и҆ просла́влено и҆́мѧ твоѐ во вѣ́ки.
Всѐ прїе́мше ꙳ ᲂу҆́мное сїѧ́нїе ст҃а́гѡ дх҃а, ꙳ преесте́ственное бл҃госло́вїе, ꙳ кра́ткими глаго́лы, и҆ мно́гимъ ра́зꙋмомъ, ꙳ бг҃одꙋхнове́ннѡ провѣща́ша, ꙳ ꙗ҆́кѡ хрⷭ҇то́вы проповѣ́дницы, ꙳ є҆ѵⷢ҇льскихъ предста́телїе ᲂу҆че́нїй бл҃же́ннїи: ꙳ и҆ бл҃гочести́выхъ преда́нїй, ꙳ свы́ше прїе́мше си́хъ ѿкрове́нїе ꙗ҆́вѣ, и҆ просвѣ́щшесѧ и҆зложи́ша вѣ́рꙋ бг҃онаꙋче́ннꙋю.
Сті́хъ: Собери́те є҆мꙋ̀ прпⷣбныѧ є҆гѡ̀.
Всѐ собра́вше ꙳ па́стырское и҆скꙋ́сство, ꙳ и҆ ꙗ҆́рость подви́гше ны́нѣ пра́веднѣйшꙋю, ꙳ ѿмсти́тельнѣ тѧ̑жкїѧ ѿгна́ша и҆ па̑гꙋбныѧ во́лки, ꙳ пра́щею дх҃а и҆зве́ргше ꙳ ѿ цр҃ко́внагѡ и҆сполне́нїѧ, ꙳ па́дшыѧ ꙗ҆́кѡ къ сме́рти, ꙳ и҆ ꙗ҆́кѡ неисцѣ́льнѡ недꙋ́говавшыѧ, бж҃е́ственнїи па́стырїе, ꙳ ꙗ҆́кѡ рабѝ и҆́стиннѣйшїи хрⷭ҇то́вы, ꙳ и҆ бж҃е́ственнагѡ проповѣ́данїѧ ꙳ таи́нницы сщ҃е́ннѣйшїи.
Сла́ва, гла́съ и҃. [Геѡ́ргїа нїкомиді́йскагѡ:]
Ст҃ы́хъ ѻ҆тцє́въ ли́къ ѿ конє́цъ вселе́нныѧ сте́кшїйсѧ, ѻ҆ц҃а̀, и҆ сн҃а, и҆ дх҃а ст҃а́гѡ є҆ди́но сꙋщество̀ наꙋчи́ша, и҆ є҆стество̀, и҆ та́йнꙋ бг҃осло́вїѧ ꙗ҆́снѡ преда́ша цр҃кви. и҆̀хже похвалѧ́юще вѣ́рою ᲂу҆бл҃жи́мъ, глаго́люще: ѽ бжⷭ҇твенный по́лче, бг҃оглаго́ливїи ѡ҆рꙋ́жницы ѡ҆полче́нїѧ гдⷭ҇нѧ! ѕвѣ́зды многосвѣ̑тлыѧ мы́сленныѧ тве́рди: та́инственнагѡ сїѡ́на неѡбори́мїи столпѝ: <<м҃ ѡ҆б.: 80>> мѷродохнове́ннїи цвѣ́ти ра́йстїи: всезлата̑ѧ ᲂу҆ста̀ сло́ва, нїке́йскаѧ похвало̀, вселе́нныѧ ᲂу҆краше́нїе, прилѣ́жнѡ моли́тесѧ ѡ҆ дꙋша́хъ на́шихъ.
И҆ ны́нѣ: Пребл҃гослове́нна є҆сѝ, бцⷣе дв҃о:
Славосло́вїе вели́кое:
По трист҃о́мъ тропа́рь воскрⷭ҇нъ то́чїю. Є҆ктєнїѝ, И҆ ѿпꙋ́стъ. И҆ ѡ҆глаше́нїе стꙋді́тово. И҆ и҆схожде́нїе въ притво́ръ. Сла́ва, и҆ ны́нѣ, стїхи́ра є҆ѵⷢ҇льскаѧ, и҆ ча́съ а҃: и҆ коне́чный ѿпꙋ́стъ.
На часѣ́хъ тропа́рь воскрⷭ҇нъ. Сла́ва ѻ҆тцє́въ. И҆ ны́нѣ, бг҃оро́диченъ часѡ́въ. По Ѻ҆́ч҃е на́шъ: Конда́къ воскрⷭ҇нъ.
На лїтꙋргі́и, Бл҃жє́нна ѻ҆ктѡ́иха на ѕ҃, и҆ ѻ҆тцє́въ, пѣ́снь г҃-ѧ, на д҃. По вхо́дѣ тропа́рь воскрⷭ҇нъ, и҆ ѻ҆тцє́въ. Та́же конда́къ воскрⷭ҇нъ. Сла́ва, ѻ҆тцє́въ: И҆ ны́нѣ, хра́ма бцⷣы, и҆лѝ, Предста́тельство хрⷭ҇тїа́нъ:
Прокі́менъ гла́са: И҆ ѻ҆тцє́въ пѣ́снь, гла́съ д҃: Бл҃гослове́нъ є҆сѝ, гдⷭ҇и бж҃е ѻ҆тє́цъ на́шихъ, и҆ хва́льно и҆ просла́влено и҆́мѧ твоѐ во вѣ́ки.
А҆пⷭ҇лъ днѐ, и҆ ѻ҆тцє́въ, ко є҆вре́ємъ, зача́ло тл҃д. А҆ллилꙋ́їа, гла́са, и҆ ѻ҆тцє́въ, гла́съ а҃: Бг҃ъ богѡ́въ гдⷭ҇ь глаго́ла. Сті́хъ: Собери́те є҆мꙋ̀ прпⷣбныѧ є҆гѡ̀.
Є҆ѵⷢ҇лїе днѐ, и҆ ѻ҆тцє́въ, і҆ѡа́нна, зача́ло н҃ѕ.
Прича́стенъ: Хвали́те гдⷭ҇а съ нб҃съ: И҆ ѻ҆тцє́въ: Ра́дꙋйтесѧ првⷣнїи ѡ҆ гдⷭ҇ѣ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.