Слꙋ́жба чтⷭно́мꙋ и҆ животворѧ́щемꙋ крⷭтꙋ̀
<<и҃і: 35>>
[глⷡ҇а г҃] СЛꙊ́ЖБА Ѻ҆́БЩА
чтⷭ҇но́мꙋ и҆ животворѧ́щемꙋ крⷭ҇тꙋ̀.
На Гдⷭ҇и воззва́хъ, стїхи̑ры, гла́съ д҃.
Подо́бенъ: Зва́нный свы́ше:
Дне́сь ра́дꙋетсѧ вѣ́рныхъ мно́жество безчи́сленное: ꙳ ꙗ҆влѧ́етсѧ бо нбⷭ҇ный крⷭ҇тъ концє́мъ, ꙳ ѡ҆сїѧва́етъ тве́рдь свѣ́томъ непристꙋ́пнымъ, ꙳ воздꙋ́хъ ѡ҆зарѧ́етъ, ꙳ и҆ землѝ лицѐ ᲂу҆краша́етъ, ꙳ пое́тъ бж҃е́ственными пѣ́сньми цр҃ковь хрⷭ҇то́ва и҆ слꙋ́житъ, ꙳ почита́ющи крⷭ҇тъ бж҃е́ственный и҆ пречꙋ́дный. ꙳ є҆гѡ́же си́лою ᲂу҆крѣплѧ́еми, ꙳ влⷣцѣ пристꙋ́пимъ зовꙋ́ще: ꙳ ᲂу҆мирѝ мі́ръ, ꙳ и҆ просвѣтѝ дꙋ́шы на́шѧ.
Да ра́дꙋетсѧ тва́рь и҆ и҆гра́етъ: ꙳ дне́сь бо ѡ҆блиста̀ крⷭ҇тъ въ концѣ́хъ съ нб҃сѐ, ꙳ зємна́ѧ просвѣща́ѧ, и҆ совокꙋ́плены показа̀ расточє́нныѧ. ꙳ дне́сь ликꙋ́етъ съ ли́ки а҆́гг҃льскими человѣ́цы: ꙳ и҆́бо бранѧ́щее средогра́дїе, ꙳ крⷭ҇то́мъ разоре́но, ꙳ во є҆ди́но всѧ̑ ꙗ҆́вѣ совокꙋпѝ. ꙳ тѣ́мъ предсїѧ́ѧ па́че со́лнца, ꙳ всю̀ тва́рь просвѣща́етъ бл҃года́тїю, ꙳ и҆ ᲂу҆ѧснѧ́етъ, и҆ сп҃са́етъ вѣ́рнѡ ꙳ того̀ чтꙋ́щыѧ.
Па́че со́лнечныѧ зарѝ, ꙳ хотѧ́й мі́рови ꙗ҆́коже че́стенъ, ꙳ цр҃ѧ̀ хрⷭ҇та̀ ски́петръ, ꙳ кончи́нꙋ показа́ти, ꙳ крⷭ҇тъ бж҃е́ственный: ꙳ се́й предсїѧ́етъ ꙗ҆́снѡ въ концѣ́хъ. ꙳ се́й возведѐ и҆з̾ а҆́да ро́дъ человѣ́чь: ꙳ а҆́да вельмѝ плѣни́въ, ꙳ врага̀ низложи́въ, ꙳ де́монѡвъ горды́ню до конца̀ погꙋбѝ, ꙳ ны́нѣ же проѧвлѧ́етъ воскрⷭ҇нїе сп҃сово, ꙳ и҆ сп҃са́етъ зовꙋ́щыѧ: ꙳ ᲂу҆мирѝ мі́ръ, и҆ просвѣтѝ дꙋ́шы на́шѧ.
Сла́ва, и҆ ны́нѣ, гла́съ и҃:
Є҆го́же дре́вле мѡѷсе́й проѡбразова́въ собо́ю, а҆мали́ка низложи́въ побѣдѝ: и҆ дв҃дъ пѣснопѣ́вецъ подно́жїю твоемꙋ̀, <<и҃і ѡ҆б.: 36>> вопїѧ̀, кла́нѧтисѧ повелѣва́ше. чтⷭ҇но́мꙋ крⷭ҇тꙋ̀ твоемꙋ̀, хрⷭ҇тѐ бж҃е, дне́сь грѣ́шнїи кла́нѧемсѧ, ᲂу҆стна́ми недосто́йными, тѧ̀ и҆зво́лившаго пригвозди́тисѧ на не́мъ, воспѣва́юще мо́лимсѧ: гдⷭ҇и, съ разбо́йникомъ црⷭ҇твїѧ твоегѡ̀ сподо́би на́съ.
Вхо́дъ. Прокі́менъ днѐ. Чтє́нїѧ г҃.
И҆схо́да чте́нїе. [Главы̑ є҃і и҆ ѕ҃і.]
Поѧ́тъ мѡѷсе́й сы́ны і҆и҃лєвы ѿ мо́рѧ чермна́гѡ, и҆ ведѐ ты̑ѧ въ пꙋсты́ню сꙋ́ръ: и҆ и҆дѧ́хꙋ трѝ дни̑ въ пꙋсты́ни, и҆ не ѡ҆брѣта́хꙋ воды̀, да бы́ша пи́ли. Прїидо́ша же въ ме́ррꙋ, и҆ не можа́хꙋ пи́ти воды̀ и҆з̾ ме́рры, горька́ бо бѣ̀: сегѡ̀ ра́ди нарече́сѧ и҆́мѧ мѣ́стꙋ томꙋ̀ го́ресть. И҆ ропта́хꙋ лю́дїе на мѡѷсе́а, глаго́люще: что̀ пїе́мъ; Возопи́ же мѡѷсе́й ко гдⷭ҇ꙋ, и҆ показа̀ є҆мꙋ̀ гдⷭ҇ь дре́во: и҆ вложѝ то́е въ во́дꙋ, и҆ сладка̀ бы́сть вода̀. Та́мѡ положѝ є҆мꙋ̀ бг҃ъ ѡ҆правда̑нїѧ и҆ сꙋды̀, и҆ та́мѡ и҆скꙋша́ше є҆го̀, и҆ речѐ: А҆́ще слꙋ́хомъ ᲂу҆слы́шиши гла́съ гдⷭ҇а бг҃а твоегѡ̀, и҆ ᲂу҆гѡ́днаѧ пред̾ ни́мъ сотвори́ши: и҆ внꙋши́ши за́пѡвѣди є҆гѡ̀, и҆ сохрани́ши всѧ̑ ѡ҆правда̑нїѧ є҆гѡ̀: всѧ́кꙋ болѣ́знь, ю҆́же наведо́хъ є҆гѵ́птѧнѡмъ, не наведꙋ̀ на тѧ̀: а҆́зъ бо є҆́смь гдⷭ҇ь и҆сцѣлѧ́ѧй тѧ̀. И҆ прїидо́ша во є҆лі́мъ, и҆ бѧ́хꙋ та́мѡ двана́десѧть и҆сто́чникѡвъ во́дъ, и҆ се́дмьдесѧтъ сте́блїй фі́нїковыхъ: и҆ ѡ҆полчи́шасѧ та́мѡ при вода́хъ. И҆ воздвиго́шасѧ ѿ є҆лі́ма, и҆ прїи́де ве́сь со́нмъ сынѡ́въ і҆и҃левыхъ въ пꙋсты́ню сі́нъ, ꙗ҆́же є҆́сть междꙋ̀ є҆лі́момъ и҆ междꙋ̀ сі́ною.
При́тчей чте́нїе. [Глава̀ г҃.]
Сы́не, не пренебрега́й наказа́нїѧ гдⷭ҇нѧ, нижѐ ѡ҆слабѣва́й ѿ негѡ̀ ѡ҆блича́емый: є҆го́же бо лю́битъ гдⷭ҇ь, наказꙋ́етъ: бїе́тъ же всѧ́каго сы́на, є҆го́же прїе́млетъ. Бл҃же́нъ человѣ́къ, и҆́же ѡ҆брѣ́те премꙋ́дрость: и҆ сме́ртенъ, и҆́же ᲂу҆вѣ́дѣ ра́зꙋмъ. Лꙋ́чше бо сїю̀ кꙋпова́ти, не́жели зла́та и҆ сребра̀ сокрѡ́вища. Честнѣ́йшаѧ же є҆́сть ка́менїй многоцѣ́нныхъ, не сопротивлѧ́етсѧ є҆́й ничто́же лꙋка́вое, бл҃горазꙋ́мна є҆́сть всѣ̑мъ лю́бѧщымъ ю҆̀: всѧ́кое же честно́е недосто́йно є҆ѧ̀ є҆́сть. <<ѳ҃і: 37>> Долгота́ бо житїѧ̀, и҆ лѣ̑та жи́зни въ десни́цѣ є҆ѧ̀: Въ шꙋ́йцѣ же є҆ѧ̀ бога́тство и҆ сла́ва: и҆зъ ᲂу҆́стъ є҆ѧ̀ и҆схо́дитъ пра́вда, зако́нъ же и҆ млⷭ҇ть на ѧ҆зы́цѣ но́ситъ. Пꙋтїѐ є҆ѧ̀, пꙋтїѐ добры̀, и҆ всѧ̀ стєзѝ є҆ѧ̀ съ ми́ромъ. Дре́во живота̀ є҆́сть всѣ̑мъ держа́щымсѧ є҆ѧ̀, и҆ восклонѧ́ющымсѧ на ню̀, ꙗ҆́кѡ на гдⷭ҇а, тверда̀.
Проро́чества и҆са́їина чте́нїе. [Глава̀ ѯ҃.]
Сїѧ̑ глаго́летъ гдⷭ҇ь: ѿве́рзꙋтсѧ врата̀ твоѧ̑, і҆ерⷭ҇ли́ме, вы́нꙋ де́нь и҆ но́щь, и҆ не затворѧ́тсѧ, є҆́же ввестѝ къ тебѣ̀ си́лꙋ ꙗ҆зы́кѡвъ, и҆ царѝ и҆́хъ ведѡ́мыѧ. Ꙗ҆зы́цы бо и҆ ца́рїе, и҆̀же тебѣ̀ не порабо́таютъ, поги́бнꙋтъ: и҆ ꙗ҆зы́цы запꙋстѣ́нїемъ запꙋстѣ́ютъ. И҆ сла́ва лїва́нова къ тебѣ̀ прїи́детъ, въ кѷпарі́сѣ, и҆ пе́ѵкѣ, и҆ ке́дрѣ вкꙋ́пѣ, просла́вити мѣ́сто ст҃о́е моѐ, и҆ мѣ́сто но́гъ мои́хъ просла́влю. И҆ по́йдꙋтъ къ тебѣ̀ боѧ́щесѧ сы́нове смири́вшихъ тѧ̀, и҆ прогнѣ́вавшихъ тѧ̀, и҆ покло́нѧтсѧ слѣдѡ́мъ но́гъ твои́хъ всѝ прогнѣ́вавшїи тѧ̀, и҆ нарече́шисѧ гра́дъ гдⷭ҇ень, сїѡ́нъ ст҃а́гѡ і҆и҃лева. За є҆́же бы́ти тебѣ̀ ѡ҆ста́вленꙋ и҆ возненави́дѣнꙋ, и҆ не бѣ̀ помога́ѧй тебѣ̀, и҆ положꙋ́ тѧ въ ра́дость вѣ́чнꙋю, весе́лїе родѡ́мъ родѡ́въ. И҆ и҆зссе́ши млеко̀ ꙗ҆зы́кѡвъ, и҆ бога́тство царе́й снѣ́си, и҆ разꙋмѣ́еши, ꙗ҆́кѡ а҆́зъ гдⷭ҇ь сп҃са́ѧй тѧ̀, и҆ и҆збавлѧ́ѧй тѧ̀ бг҃ъ і҆и҃левъ.
На стїхо́внѣ стїхи̑ры, гла́съ в҃.
Подо́бенъ: До́ме є҆ѵфра́ѳовъ:
Водо́ю бг҃отво́рною, ꙳ и҆ кро́вїю твое́ю, сло́ве, ꙳ свѣ́тлѡ цр҃ковь ᲂу҆краша́етсѧ, ꙳ ꙗ҆́кѡ невѣ́ста, ꙳ крⷭ҇та̀ сла́вꙋ пою́щи.
Сті́хъ. Возноси́те гдⷭ҇а бг҃а на́шего, и҆ покланѧ́йтесѧ подно́жїю нѡ́гꙋ є҆гѡ̀, ꙗ҆́кѡ ст҃о є҆́сть.
Копїѐ со крⷭ҇то́мъ, ꙳ гво́здїе и҆ и҆на̑ѧ, ꙳ и҆́миже живоно́сное ꙳ хрⷭ҇то́во пригвозди́сѧ тѣ́ло, ꙳ возносѧ́ще поклони́мсѧ.
Сті́хъ. Бг҃ъ же цр҃ь на́шъ пре́жде вѣ́ка, содѣ́ла сп҃се́нїе посредѣ̀ землѝ.
Є҆гда̀ а҆мали́ка ꙳ мѡѷсе́й побѣжда́ше: ꙳ на высотꙋ̀ рꙋ́цѣ и҆мѣ́ѧ ꙳ крⷭ҇тоѧвле́ннѡ, ꙳ ѡ҆бразова́ше хрⷭ҇то́вꙋ стрⷭ҇ть пречтⷭ҇ꙋю.
<<ѳ҃і ѡ҆б.: 38>>
Сла́ва, и҆ ны́нѣ, гла́съ а҃:
Проѡбразꙋ́ѧ крⷭ҇тъ тво́й, хрⷭ҇тѐ, патрїа́рхъ і҆а́кѡвъ, внꙋ́кѡмъ бл҃гослове́нїе да́рꙋѧ, на глава́хъ премѣне́ны рꙋ́ки сотворѝ. є҆го́же, сп҃се, мы̀ дне́сь возносѧ́ще, взыва́емъ: да́рꙋй правосла́внымъ хрⷭ҇тїа́нѡмъ побѣ̑ды, ꙗ҆́кѡ кѡнстанті́нꙋ ѡ҆долѣ́нїе.
Ны́нѣ ѿпꙋща́еши: Трист҃о́е, И҆ по Ѻ҆́ч҃е на́шъ. Тропа́рь: Сп҃сѝ, гдⷭ҇и, лю́ди твоѧ̑:
И҆ ѿпꙋ́стъ.
На ᲂу҆́трени,
на Бг҃ъ гдⷭ҇ь, тропа́рь то́йже, три́жды.
По а҃-й каѳі́смѣ сѣда́ленъ, гла́съ ѕ҃:
То́кмѡ водрꙋзи́сѧ дре́во, хрⷭ҇тѐ, крⷭ҇та̀ твоегѡ̀, ѡ҆снова̑нїѧ поколеба́шасѧ сме́рти, гдⷭ҇и: є҆го́же бо пожрѐ жела́нїемъ а҆́дъ, ѿпꙋстѝ тре́петомъ. ꙗ҆ви́лъ є҆сѝ на́мъ сп҃се́нїе твоѐ, ст҃ы́й, и҆ славосло́вимъ тѧ̀, сн҃е бж҃їй: поми́лꙋй на́съ.
Сла́ва, и҆ ны́нѣ, то́йже.
По в҃-й каѳі́смѣ сѣда́ленъ, гла́съ ѕ҃:
Дне́сь прⷪ҇ро́ческое и҆спо́лнисѧ сло́во: се́ бо покланѧ́емсѧ на мѣ́сто, и҆дѣ́же стоѧ́стѣ но́зѣ твоѝ гдⷭ҇и: и҆ дре́во сп҃се́нїѧ прїе́мше, грѣхо́вныхъ страсте́й свобо́дꙋ полꙋчи́хомъ, мл҃твами бцⷣы, є҆ди́не чл҃вѣколю́бче.
Сла́ва, и҆ ны́нѣ, то́йже.
По Хвали́те и҆́мѧ гдⷭ҇не:
Припѣ́въ: Велича́емъ тѧ̀, живода́вче хрⷭ҇тѐ, и҆ чте́мъ крⷭ҇тъ тво́й ст҃ы́й, и҆́мже на́съ спа́слъ є҆сѝ ѿ рабо́ты вра́жїѧ.
Ѱало́мъ и҆збра́нный. Сꙋдѝ, гдⷭ҇и, ѡ҆би́дѧщыѧ мѧ̀, поборѝ борю́щыѧ мѧ̀.
По полѷеле́и Сѣда́ленъ, гла́съ и҃.
Подо́бенъ: Повелѣ́нное та́йнѡ:
Въ раи́ мѧ пре́жде дре́во ѡ҆бнажѝ, ѡ҆ вкꙋше́нїи вра́гъ приносѧ̀ ᲂу҆мерщвле́нїе: крⷭ҇та́ же дре́во живота̀ ѡ҆дѣѧ́нїе человѣ́кѡмъ <<к҃: 39>> носѧ̀, водрꙋзи́сѧ на землѝ, и҆ мі́ръ ве́сь и҆спо́лнисѧ всѧ́кїѧ ра́дости, то́же зрѧ́ще возвыша́ема, бг҃ꙋ вѣ́рою лю́дїе согла́снѡ возопїи́мъ: и҆спо́лнь сла́вы до́мъ тво́й.
Сла́ва, и҆ ны́нѣ, то́йже.
Степє́нна, а҃-й а҆нтїфѡ́нъ д҃-гѡ гла́са.
Прокі́менъ, гла́съ д҃:
Ви́дѣша всѝ концы̀ землѝ сп҃се́нїе бг҃а на́шегѡ.
Сті́хъ: Воспо́йте гдⷭ҇еви пѣ́снь но́вꙋ.
Всѧ́кое дыха́нїе: Є҆ѵⷢ҇лїе пи́сано въ концѣ̀ кни́ги сеѧ̀.
По н҃-мъ ѱалмѣ̀ стїхи́ра, гла́съ ѕ҃:
Крⷭ҇те хрⷭ҇то́въ, хрⷭ҇тїа́нъ ᲂу҆пова́нїе, заблꙋ́ждшихъ наста́вниче, ѡ҆бꙋрева́емыхъ приста́нище, въ бране́хъ побѣ́да, вселе́нныѧ ᲂу҆твержде́нїе, недꙋ́жныхъ врачꙋ̀, ме́ртвыхъ воскрⷭ҇нїе, поми́лꙋй на́съ.
Канѡ́нъ чтⷭ҇но́мꙋ и҆ животворѧ́щемꙋ крⷭ҇тꙋ̀.
[Творе́нїе григо́рїа сїнаи́та.]
І҆рмосы̀ по два́жды: тропарѝ на в҃і. Гла́съ д҃.
Пѣ́снь а҃.
І҆рмо́съ: Ѿве́рзꙋ ᲂу҆ста̀ моѧ̑:
Крⷭ҇те всеси́льне, а҆пⷭ҇лѡвъ похвала̀, прпⷣбныхъ ᲂу҆твержде́нїе, и҆ вѣ́рныхъ зна́менїе, и҆ і҆ера́рхѡвъ и҆ мч҃нкѡвъ сла́ва, побѣ́да и҆ ᲂу҆твержде́нїе всѣ́хъ хва́лѧщихъ тѧ̀.
Крⷭ҇те всечтⷭ҇ны́й, четвероконе́чнаѧ си́ла, а҆пⷭ҇лѡвъ бл҃голѣ́пїе, и҆ мч҃нкѡвъ крѣ́пость, немощны́хъ здра́вїе показа́лсѧ є҆сѝ, ме́ртвыхъ воскрⷭ҇нїе, па́дающихъ воздви́женїе.
Крⷭ҇те, ты̀ мѝ си́ла бꙋ́ди, крѣ́пость и҆ держа́ва, и҆зба́витель и҆ предра́тникъ на борю́щыѧ мѧ̀, щи́тъ и҆ храни́тель, побѣ́да и҆ ᲂу҆твержде́нїе моѐ, при́снѡ соблюда́ѧ мѧ̀ и҆ покрыва́ѧ.
Бг҃оро́диченъ: На крⷭ҇тѣ̀, всенепоро́чнаѧ, твоего̀ сн҃а ꙗ҆́кѡ ᲂу҆зрѣ́ла є҆сѝ, ѡ҆рꙋ́жїе ско́рбное ᲂу҆тро́бꙋ твою̀ растерза̀: и҆ восклица́ла є҆сѝ рыда́ющи въ болѣ́зни: но а҆́бїе просла́вила є҆сѝ крⷭ҇та̀ си́лꙋ.
Катава́сїа: Крⷭ҇тъ начерта́въ мѡѷсе́й.
Пѣ́снь г҃.
І҆рмо́съ: Твоѧ̑ пѣсносло́вцы, бцⷣе.
<<к҃ ѡ҆б.: 40>>
Крⷭ҇те, прпⷣбныхъ ѡ҆рꙋ́жїе, ѻ҆бою́дный ме́чь хрⷭ҇то́въ, вѣ́рныхъ ᲂу҆добре́нїе, болѧ́щихъ и҆сцѣле́нїе и҆ застꙋпле́нїе, и҆ воздвиже́нїе ᲂу҆ме́ршихъ, всечтⷭ҇не.
Крⷭ҇те, ѡ҆снова́нїе бл҃гоче́стїѧ, бѣсѡ́мъ показа́лсѧ є҆сѝ гꙋби́тель, цр҃квамъ бл҃голѣ́пїе, нечести̑вымъ поги́бель, врагѡ́мъ посрамле́нїе въ де́нь сꙋ́дный.
Крⷭ҇те живоно́сный, ты́ ми бꙋ́ди крѣ́пость, и҆ побѣ́да, и҆ щи́тъ, и҆ стѣна̀ нера́тꙋема, бѣсѡ́въ ѿгна́нїе, и҆ помыслѡ́въ погаше́нїе, и҆ ᲂу҆ма̀ моегѡ̀ сохране́нїе.
Бг҃оро́диченъ: Распѧ́тїе поно́сное, дв҃о влⷣчце, тво́й сн҃ъ претерпѣ̀, и҆ сме́рть неподо́бнꙋю: но возне́ссѧ, низве́рже проти̑вныѧ вра̑жїѧ си̑лы, ꙗ҆́кѡ безсме́ртенъ.
Катава́сїа: Же́злъ во ѡ҆́бразъ:
Сѣда́ленъ, гла́съ и҃.
Подо́бенъ: Повелѣ́нное та́йнѡ:
Проѡбража́ше та́йнѡ дре́вле і҆исꙋ́съ наѵи́нъ крⷭ҇та̀ ѡ҆́бразъ, є҆гда̀ рꙋ́цѣ прострѐ крⷭ҇тови́днѡ, сп҃се мо́й, и҆ ста̀ со́лнце, до́ндеже врагѝ низложѝ противостоѧ́щыѧ тѝ бг҃ꙋ: ны́нѣ же за́йде, на крⷭ҇тѣ̀ тѧ̀ зрѧ̀, до́ндеже держа́вꙋ сме́ртнꙋю разрꙋши́въ, ве́сь мі́ръ совоздви́глъ є҆сѝ.
Сла́ва, и҆ ны́нѣ, то́йже.
Пѣ́снь д҃.
І҆рмо́съ: Сѣдѧ́й въ сла́вѣ, на прⷭ҇то́лѣ бж҃ества̀:
Четвероконе́чный сы́й мі́ръ, и҆ ꙗ҆́кѡ триѻбою́дный ме́чь, нача̑ла тмы̀ сѣче́ши, на́ми воѡбража́емь, крⷭ҇те, ѡ҆рꙋ́жїе вели́кое хрⷭ҇то́во, и҆ непобѣди́мое побѣди́тельство всеси́льное.
Твоѧ̀ высота̀, живоно́сне крⷭ҇те, воздꙋ́шнаго кнѧ́зѧ бїе́тъ: и҆ глꙋбина̀ всеѧ̀ бе́здны закала́етъ ѕмі́ѧ, широтꙋ̀ па́ки воѡбража́етъ, низлага́ѧ мїрска́гѡ кнѧ́зѧ крѣ́постїю твое́ю.
Возне́ссѧ сопривле́клъ є҆сѝ па́дшыѧ, воздви́глъ є҆сѝ є҆стество̀ земно́е, прⷭ҇то́лꙋ бж҃їю просла́вилсѧ є҆сѝ. крⷭ҇те, высото̀ вели́каѧ, мїрскі́й мо́сте, дꙋ́шꙋ мою̀ ѿ страсте́й глꙋбины̀ вознесѝ вско́рѣ.
<<к҃а: 41>>
Бг҃оро́диченъ: Крⷭ҇тоѡбра́знѡ, пречтⷭ҇аѧ, ѻ҆трокови́це бцⷣе, дла̑ни твоѧ̑ распросте́рши къ воздви́женомꙋ на крⷭ҇тѣ̀, и҆ мл҃твы, дв҃о, ны́нѣ принесѝ, за всѣ́хъ вѣ́рнѡ молѧ́щихсѧ тебѣ̀.
Катава́сїа: Оу҆слы́шахъ, гдⷭ҇и, смотре́нїѧ твоегѡ̀ та́инство:
Пѣ́снь є҃.
І҆рмо́съ: Оу҆жасо́шасѧ всѧ́чєскаѧ ѡ҆ бж҃е́ственнѣй сла́вѣ:
Крⷭ҇те, нбⷭ҇наѧ лѣ́ствице ст҃ы́ни, степе́нємъ наста́вниче, хрⷭ҇то́ва высота̀ и҆ сла́ва є҆сѝ, бж҃їй ѡ҆́бразъ назна́менателенъ мі́рꙋ, неви́димомꙋ же и҆ ви́димомꙋ, є҆диноче́стне.
Крⷭ҇те, ѡ҆́бразе неиспи́санный си́лою, ѡ҆сщ҃е́нїе вода́мъ, ѡ҆чище́нїе воздꙋ́хꙋ ѡ҆сщ҃е́нїе и҆ просвѣще́нїе всѧ́комъ, мꙋ́жества зна́менїе, и҆ хрⷭ҇то́въ ски́петръ непрело́жный показа́лсѧ є҆сѝ, проти̑вныѧ въ зе́млю попира́ѧ.
Крⷭ҇те всеси́льне, ѕлочести̑выѧ низложѝ врагѝ, ненави́дѧщыѧ и҆ хꙋ́лѧщыѧ тѧ̀ безꙋ́мнѡ: ꙗ҆зы́ки попалѝ, и҆ ᲂу҆гасѝ шата̑нїѧ и҆́хъ. ѽ крⷭ҇те всест҃ы́й и҆ хрⷭ҇тоно́сный, сохранѝ на́съ держа́вою твое́ю.
Бг҃оро́диченъ: Всѣ́хъ цр҃и́це влⷣчце, ски́петромъ ржⷭ҇тва̀ твоегѡ̀ разрꙋшѝ, дв҃о, воста́нїе хꙋ́лѧщихъ крⷭ҇тнꙋю си́лꙋ, да́ждь на́мъ крѣ́пость и҆ ѡ҆чище́нїе, побѣ́дꙋ и҆ по́мощь.
Катава́сїа: Ѽ требл҃же́нное дре́во:
Пѣ́снь ѕ҃.
І҆рмо́съ: Бж҃е́ственное сїѐ и҆ всечтⷭ҇но́е:
Крⷭ҇тъ всѣ́хъ воскрⷭ҇нїе, крⷭ҇тъ па́дшихъ и҆справле́нїе, страсте́й ᲂу҆мерщвле́нїе, и҆ пло́ти пригвожде́нїе, крⷭ҇тъ дꙋша́мъ сла́ва, и҆ свѣ́тъ вѣ́чный.
Крⷭ҇тъ врагѡ́въ гꙋби́тель, крⷭ҇тъ ѕлочести́выхъ ꙗ҆́зва и҆ плѣне́нїе, и҆ вѣ́рныхъ держа́ва, бл҃гочести́выхъ храни́тель и҆ бѣсѡ́въ ѿгони́тель.
Крⷭ҇тъ страсте́й па́гꙋба, крⷭ҇тъ помыслѡ́въ ѿгна́нїе, крⷭ҇тъ сокрꙋше́нїе ꙗ҆зы́ческое и҆скꙋси́тельно, и҆ дꙋховѡ́мъ показа́сѧ лови́тельство.
Крⷭ҇тъ воздви́жетсѧ, и҆ па́даютъ дꙋхѡ́въ воздꙋ́шныхъ чи́нове: <<к҃а ѡ҆б.: 42>> крⷭ҇тъ снизхо́дитъ, и҆ нечести́вїи всѝ ᲂу҆жаса́ютсѧ, ꙗ҆́кѡ мо́лнїѧ ви́дѧще крⷭ҇тнꙋю си́лꙋ.
Катава́сїа: Во́днагѡ ѕвѣ́рѧ:
Конда́къ, гла́съ д҃. Подо́бенъ:
Вознесы́йсѧ на крⷭ҇тъ во́лею, тезоимени́томꙋ твоемꙋ̀ но́вомꙋ жи́тельствꙋ, щедрѡ́ты твоѧ̑ да́рꙋй, хрⷭ҇тѐ бж҃е. возвеселѝ на́съ си́лою твое́ю, побѣ̑ды даѧ̀ на́мъ на сопоста́ты, посо́бїе и҆мꙋ́щымъ твоѐ ѡ҆рꙋ́жїе ми́ра ‑ непобѣди́мꙋю побѣ́дꙋ.
І҆́косъ: И҆́же до тре́тїѧгѡ нб҃сѐ восхище́нъ бы́сть въ ра́й, и҆ глаго́лы слы́шавъ неизречє́нныѧ и҆ бжⷭ҇твєнныѧ, и҆́хже не лѣ́ть ѧ҆зы́ки [человѣ́ческими] глаго́лати, что̀ гала́тѡмъ пи́шетъ, ꙗ҆́кѡ рачи́телїе писа́нїй прочто́сте и҆ позна́сте: мнѣ̀, глаго́летъ, хвали́тисѧ да не бꙋ́детъ, то́кмѡ во є҆ди́номъ крⷭ҇тѣ̀ гдⷭ҇ни, на не́мже страда́въ ᲂу҆бѝ стра̑сти. того̀ ᲂу҆́бѡ и҆ мы̀ и҆звѣ́стнѡ держи́мъ, крⷭ҇тъ гдⷭ҇ень, хвалꙋ̀ всѝ: є҆́сть ко на́мъ сп҃си́тельное сїѐ дре́во, ѡ҆рꙋ́жїе ми́ра, непобѣди́маѧ побѣ́да.
Пѣ́снь з҃.
І҆рмо́съ: Не послꙋжи́ша тва́ри бг҃омꙋ́дрїи:
Нераздѣ́льнꙋю трⷪ҇цꙋ и҆ неслїѧ́ннꙋ, є҆стество̀ є҆ди́нствомъ бг҃осло́вимъ, ѻ҆ц҃а̀ нерожде́нна, и҆ рожде́нна сн҃а, и҆ ст҃а́го и҆сходи́тельнаго бж҃е́ственнаго дх҃а пѣ́сньми пою́ще: бл҃гослове́нъ бг҃ъ ѻ҆тє́цъ на́шихъ.
Незаходи́тельными мо́лнїѧми твои́ми, трїѷпоста́сне, на́шѧ ѡ҆зарѝ ᲂу҆́мныѧ ѻ҆́чи, добро́тꙋ твою̀, трисвѣ́тне, пресꙋ́щественнꙋю зрѣ́ти, ꙗ҆́же человѣ́кѡмъ невѣ́домаѧ и҆ непристꙋ́пнаѧ а҆́гг҃лѡмъ.
Лꙋча́ми свѣ́та твоегѡ̀ па́дшꙋю мою̀ дꙋ́шꙋ возведѝ ѿ глꙋбины̀, бл҃гі́й бж҃е, препѣ́тый и҆ всеси́льный, попо́лзшасѧ ѿ свѣ́та благода́тнагѡ, и҆ во тмꙋ̀ воглꙋ́бльшꙋюсѧ.
Бг҃оро́диченъ: Крⷭ҇тоѡбра́знѡ просте́рши рꙋцѣ̀, чтⷭ҇аѧ, къ распросте́ршемꙋ своѝ рꙋцѣ̀ на дре́вѣ крⷭ҇тнѣмъ, и҆ возне́сшемꙋ є҆стество̀ на́ше, и҆ ᲂу҆мертви́вшемꙋ враждє́бныѧ полкѝ, молѧ́щи не преста́й.
<<к҃в: 43>>
Катава́сїа: Безꙋ́мное велѣ́нїе мꙋчи́телѧ:
Пѣ́снь и҃.
І҆рмо́съ: Ѻ҆́троки бл҃гочєсти́выѧ въ пещѝ:
Высота̀ хрⷭ҇то́выхъ стрⷭ҇те́й, и҆ лꙋ́къ и҆ ѡ҆рꙋ́жїе и҆ ме́чь, ѡ҆рꙋ́жїе непосты́дное, и҆ си́ла непобѣди́маѧ, хрⷭ҇то́во подно́жїе, и҆ побѣди́тельство на врагѝ: зна́менїѧ црⷭ҇твїѧ, ски́петръ вѣ́рныхъ, показа́лсѧ є҆сѝ, крⷭ҇те побѣдоно́сне.
Воздви́глъ є҆сѝ на́ше па́дшее є҆стество̀, хрⷭ҇то́мъ распе́ншимсѧ и҆ совозста́вилъ: высото̀ бж҃е́ственнаѧ, глꙋбино̀ низглаго́ланнаѧ, хрⷭ҇то́во ты̀ є҆сѝ зна́менїе, крⷭ҇те пребога́те, и҆ широта̀ безмѣ́рнаѧ, и҆ зна́менїе непостижи́мыѧ трⷪ҇цы, жизноно́сче.
Оу҆стна́ми, дꙋше́ю же и҆ се́рдцемъ крⷭ҇тъ гдⷭ҇ень лобыза́юще, прїиди́те ны́нѣ вознесе́мъ всѝ и҆ возвели́чимъ, покланѧ́ющесѧ рце́мъ вкꙋ́пѣ пѣ́снь пречтⷭ҇ꙋю, вопїю́ще: ра́дꙋйсѧ, вели́кое бога́тство, крⷭ҇те, цр҃ко́вное ᲂу҆краше́нїе.
Дре́во жи́зни и҆ сп҃се́нїѧ, дре́во безсме́ртїѧ, дре́во ра́зꙋма, дре́во трилюбе́зное: нетлѣ́нное и҆ неизнꙋрѧ́емое, крⷭ҇тъ трисоста́вный, чтⷭ҇но́е дре́во: трⷪ҇цы бо но́ситъ трїѷпоста́сныѧ ѡ҆́бразъ.
Катава́сїа: Бл҃гослови́те, ѻ҆́троцы:
Пѣ́снь ѳ҃.
І҆рмо́съ: Всѧ́къ земноро́дный да взыгра́етсѧ дх҃омъ:
Кто̀ слы̑шана сотвори́тъ, ꙗ҆́коже пи́шетъ, дѣ̑йствїѧ твоѧ̑, мїролюбе́зный крⷭ҇те, си̑лы и҆ чꙋдеса̀, ᲂу҆ме́ршихъ воста́нїе, и҆ мі́ръ ве́сь совозне́слъ є҆сѝ, вознесы́йсѧ къ бг҃ꙋ многожела́емый.
Оу҆твержде́нїе вѣ́рныхъ крⷭ҇тъ требл҃же́нный, зна́менїе и҆ похвала̀, дре́во всеси́льное, крⷭ҇тъ хрⷭ҇то́въ вели́кїй и҆ соверше́нный, а҆пⷭ҇лѡвъ похвала̀, прпⷣбныхъ ᲂу҆твержде́нїе, и҆ мч҃нкѡвъ крѣ́пость, побѣ́да и҆ похвала̀.
Ра́дꙋйсѧ, крⷭ҇те, ѡ҆́бразе неѡпи́санный и҆ многоимени́тый, дре́во требога́тное, стра́шное же и҆ всебл҃же́нное: ра́дꙋйсѧ, крⷭ҇те всест҃ы́й и҆ всеси́льный, ра́дꙋйсѧ, храни́телѧ жи́зни на́шеѧ, гдⷭ҇ень крⷭ҇те многопѣ́тый.
<<к҃в ѡ҆б.: 44>>
Крⷭ҇те чтⷭ҇ны́й, храни́тель дꙋшѝ и҆ тѣ́лꙋ бꙋ́ди мѝ, ѡ҆́бразомъ свои́мъ бѣ́сы низлага́ѧ, врагѝ ѿгонѧ́ѧ, стра̑сти ᲂу҆пражнѧ́ѧ, и҆ бл҃гослове́нїе да́рꙋѧ мѝ, и҆ жи́знь и҆ си́лꙋ, содѣ́йствїемъ ст҃а́гѡ дх҃а, и҆ честны́ми пречтⷭ҇ыѧ мольба́ми.
Катава́сїа: Та́инъ є҆сѝ, бцⷣе, ра́й:
Свѣти́ленъ.
Крⷭ҇тъ, храни́тель всеѧ̀ вселе́нныѧ: крⷭ҇тъ, красота̀ цр҃кве: крⷭ҇тъ, вѣ́рныхъ ᲂу҆твержде́нїе: крⷭ҇тъ, а҆́гг҃лѡвъ сла́ва, и҆ де́монѡвъ ꙗ҆́зва. [Три́жды.]
На хвали́техъ стїхи̑ры, гла́съ а҃:
Подо́бенъ: Нбⷭ҇ныхъ чинѡ́въ ра́дованїе:
Нбⷭ҇наѧ шє́ствїѧ, ꙳ крⷭ҇тъ чтⷭ҇ны́й гото́витъ всѣ̑мъ, ꙳ томꙋ̀ покланѧ́ющымсѧ вѣ́рою несꙋмнѣ́нною: ꙳ и҆ ликѡ́мъ невеще́ственныхъ си́лъ, ꙳ и҆́же на не́мъ пригвозди́выйсѧ, ꙳ сочета́етъ любо́вїю пою́щыѧ того̀.
Кла́нѧющесѧ вѣ́рою крⷭ҇тꙋ̀ чтⷭ҇но́мꙋ, ꙳ на не́мъ распе́ншагосѧ воспое́мъ влⷣкꙋ: ꙳ тогѡ̀ манове́нїемъ, ᲂу҆стнѣ̀ вкꙋ́пѣ и҆ дꙋ́шꙋ ѡ҆чища́юще, ꙳ и҆ сїѧ̑нїи сегѡ̀ мы́сленными ᲂу҆ѧсни́мсѧ, ꙳ хва́лѧще є҆го̀.
Го́ресть дре́вле ᲂу҆слажда́ѧ мѡѷсе́й, ꙳ и҆зба́ви і҆и҃лѧ, ꙳ ѡ҆́бразъ крⷭ҇та̀ написꙋ́ѧ: ꙳ мы́ же сего̀, всѝ вѣ́рнїи, ꙳ та́йнѡ и҆ бж҃е́ственнѡ воѡбража́юще въ сердца́хъ на́шихъ, ꙳ всегда̀ сп҃са́емсѧ держа́вою є҆гѡ̀.
Сла́ва, и҆ ны́нѣ, гла́съ д҃.
Пособи́вый, гдⷭ҇и, кро́ткомꙋ дв҃дꙋ покори́ти и҆ноплеме́нника, ѡ҆рꙋ́жїемъ крⷭ҇та̀ низложѝ врагѝ на́шѧ, покажѝ, бл҃гоꙋтро́бне, на на́съ дрє́внїѧ млⷭ҇ти твоѧ̑: и҆ да разꙋмѣ́ютъ вои́стиннꙋ, ꙗ҆́кѡ ты̀ є҆сѝ бг҃ъ, и҆ на тѧ̀ надѣ́ющїисѧ побѣжда́емъ, молѧ́щїисѧ ѡ҆бы́чнѡ пречтⷭ҇ѣй твое́й мт҃ри, дарова́тисѧ на́мъ ве́лїей млⷭ҇ти.
Славосло́вїе вели́кое. И҆ ѿпꙋ́стъ.
На лїтꙋргі́и бл҃жє́нна ѿ канѡ́на, пѣ́снь г҃-ѧ и҆ ѕ҃-ѧ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.