Май
<<т҃ ѡ҆б.: 600>>
Мѣ́сѧцъ ма́їй,
и҆мѣ́ѧй дне́й л҃а.
Де́нь и҆́мать часѡ́въ д҃і, а҆ но́щь часѡ́въ і҃.
а҃. Ст҃а́гѡ прⷪ҇ро́ка і҆еремі́и.
На Гдⷭ҇и воззва́хъ, стїхи̑ры, гла́съ и҃. Подо́бенъ: Гдⷭ҇и, а҆́ще и҆ на сꙋди́щи: Сла́ва, и҆ ны́нѣ, бг҃оро́диченъ: и҆лѝ пра́здника. На стїхо́внѣ трїѡ́ди. Тропа́рь, гла́съ в҃: Прⷪ҇ро́ка твоегѡ̀ і҆еремі́и: септе́мврїа въ д҃ де́нь. На ᲂу҆́трени, канѡ́нъ, гла́съ и҃. По г҃-й пѣ́сни,
Конда́къ, гла́съ г҃. Подо́бенъ: Дв҃а дне́сь:
Ѡ҆чи́стивъ дх҃омъ, вели́кїй прⷪ҇ро́че и҆ мч҃нче, твоѐ свѣтоза́рное се́рдце, сла́вне і҆еремі́е, прⷪ҇ро́чествїѧ да́ръ свы́ше прїѧ́лъ є҆сѝ, и҆ возопи́лъ є҆сѝ, велегла́снѡ во страна́хъ: сѐ бг҃ъ на́шъ, и҆ не приложи́тсѧ и҆́нъ къ немꙋ̀, и҆́же вопло́щьсѧ на землѝ ꙗ҆ви́лсѧ є҆́сть.
И҆ сѣда́ленъ, гла́съ и҃. Сла́ва, и҆ ны́нѣ, трїѡ́ди. По ѕ҃-й пѣ́сни конда́къ и҆ і҆́косъ пра́здника, и҆ про́логъ и҆ про́чаѧ слꙋ́жба по ѻ҆бы́чаю. На лїтꙋргі́и, прокі́менъ, гла́съ д҃: Ты̀ і҆ере́й во вѣ́къ по чи́нꙋ мельхїседе́ковꙋ. Сті́хъ: Речѐ гдⷭ҇ь гдⷭ҇еви моемꙋ̀: А҆по́столъ къ корі́нѳѧнѡмъ, зача́ло рн҃ѕ: Не дѣ́ти быва́йте ᲂу҆мы̀: А҆ллилꙋ́їа, гла́съ є҃: Мѡѷсе́й и҆ а҆арѡ́нъ во і҆ере́ехъ є҆гѡ̀: Є҆ѵⷢ҇лїе лꙋкѝ, зача́ло д҃і: Дивлѧ́хꙋсѧ наро́ди ѡ҆ словесѣ́хъ: Прича́стенъ: Въ па́мѧть вѣ́чнꙋю:
<<т҃а: 601>>
Въ то́йже де́нь прпⷣбнагѡ пафнꙋ́тїа бо́ровскагѡ.
Соверша́етсѧ собо́ръ є҆гѡ̀ во ѻ҆би́тели є҆гѡ̀, и҆ и҆дѣ́же хра́мъ є҆гѡ̀.
Тропа́рь, гла́съ д҃:
Житїѧ̀ свѣ́тлостїю просвѣти́въ твоѐ ѻ҆те́чество, въ мл҃твахъ и҆ постѣ́хъ дарова́нїй бж҃е́ственнагѡ дх҃а и҆спо́лнилсѧ є҆сѝ: и҆ во вре́меннѣй се́й жи́зни до́брѣ подвиза́всѧ, млⷭ҇ти бл҃гоꙋтро́бїѧ всѣ̑мъ скорбѧ́щымъ ѿве́рзлъ є҆сѝ, и҆ ни́щымъ бы́лъ є҆сѝ застꙋ́пникъ. тѣ́мъ мо́лимъ тѧ̀ ѻ҆́тче пафнꙋ́тїе, молѝ хрⷭ҇та̀ бг҃а, да сп҃се́тъ дꙋ́шы на́шѧ.
Конда́къ, гла́съ и҃. Подо́бенъ: Взбра́нной:
Бж҃їимъ свѣтоли́тїемъ просвѣще́нъ ѻ҆́тче, по́стническое стѧжа́лъ є҆сѝ жи́тельство прпⷣбне, и҆́нокѡмъ предо́брый наста́вниче, и҆ по́стникѡмъ бл҃го́е ᲂу҆краше́нїе. сегѡ̀ ра́ди гдⷭ҇ь трꙋды̀ твоѧ̑ ви́дѣвъ, чꙋде́съ да́ромъ ѡ҆богатѝ тѧ̀: и҆сточа́еши бо и҆сцѣлє́нїѧ. мы́ же ра́дꙋющесѧ вопїе́мъ тѝ: ра́дꙋйсѧ ѻ҆́тче пафнꙋ́тїе.
в҃. Во ст҃ы́хъ ѻ҆тца̀ на́шегѡ а҆ѳана́сїа вели́кагѡ, патрїа́рха а҆леѯандрі́йскагѡ.
На Гдⷭ҇и воззва́хъ, стїхи̑ры, гла́съ д҃. Подо́бенъ: Зва́нный свы́ше: И҆́ны стїхи̑ры, гла́съ є҃. Подо́бенъ: Прпⷣбне ѻ҆́тче: Сла́ва, гла́съ ѕ҃: Хрⷭ҇то́ва ст҃и́телѧ воспое́мъ: И҆ ны́нѣ, пра́здника. На стїхо́внѣ трїѡ́ди: Сла́ва, ст҃а́гѡ, гла́съ г҃: Па́ки на́мъ златоте́чный ні́лъ: И҆ ны́нѣ, пра́здника.
Тропа́рь, гла́съ г҃:
Сто́лпъ бы́лъ є҆сѝ правосла́вїѧ, бж҃е́ственными догма́ты подтвержда́ѧ цр҃ковь сщ҃еннонача́льниче а҆ѳана́сїе: ѻ҆ц҃ꙋ́ бо сн҃а є҆диносꙋ́щна проповѣ́давъ, посрами́лъ є҆сѝ а҆́рїа. ѻ҆́тче прпⷣбне, хрⷭ҇та̀ бг҃а молѝ, дарова́ти на́мъ ве́лїю млⷭ҇ть.
<<т҃а ѡ҆б.: 602>>
Сла́ва, и҆ ны́нѣ, пра́здника. На ᲂу҆́трени, на Бг҃ъ гдⷭ҇ь, тропа́рь пра́здника, два́жды. Сла́ва, ст҃а́гѡ: И҆ ны́нѣ, пра́здника, и҆ ѻ҆бы̑чныѧ каѳі̑смы. По каѳі́смахъ сѣда́льны пра́здника, и҆ чте́нїе. Канѡ́нъ пра́здника, со і҆рмосо́мъ на ѕ҃: и҆ ст҃а́гѡ на ѕ҃, гла́съ и҃. По г҃-й пѣ́сни конда́къ и҆ і҆́косъ пра́здника, и҆ сѣда́ленъ ст҃а́гѡ, гла́съ и҃, два́жды. Сла́ва, и҆ ны́нѣ, пра́здника. По ѕ҃-й пѣ́сни,
Конда́къ, гла́съ в҃. Подо́бенъ: Крове́й твои́хъ:
Правосла́вїѧ насади́въ ᲂу҆чє́нїѧ, ѕлосла́вїѧ тє́рнїѧ и҆зсѣ́клъ є҆сѝ, ᲂу҆мно́живъ сѣ́мѧ вѣ́ры, ѡ҆дожде́нїемъ дх҃а прпⷣбне: тѣ́мже тѧ̀ пое́мъ а҆ѳана́сїе.
И҆ і҆́косъ, и҆ про́логъ. По ѳ҃-й пѣ́сни свѣти́ленъ ст҃а́гѡ. Сла́ва, и҆́нъ: И҆ ны́нѣ, пра́здника. На хвали́техъ стїхи̑ры, гла́съ д҃. Подо́бенъ: ꙗ҆́кѡ до́блѧ: Сла́ва, гла́съ д҃: Вели́каѧ цр҃ко́внаѧ трꙋбо̀: И҆ ны́нѣ, пра́здника. На стїхо́внѣ стїхи̑ры пра́здника. Сла́ва, а҆ѳана́сїа, гла́съ г҃: Вели́кое ᲂу҆краше́нїе: И҆ ны́нѣ, пра́здника. На лїтꙋргі́и, бл҃жє́нна пра́здника, пѣ́снь рѧдова́ѧ: и҆ ст҃а́гѡ пѣ́снь г҃. Прокі́менъ, гла́съ з҃: Чⷭ҇тна̀ пред̾ гдⷭ҇емъ: Сті́хъ: Что̀ возда́мъ гдⷭ҇еви: А҆по́столъ ко є҆вре́ємъ, зача́ло ти҃і: Тако́въ на́мъ подоба́ше: А҆ллилꙋ́їа, гла́съ в҃: Сщ҃е́нницы твоѝ ѡ҆блекꙋ́тсѧ: Є҆ѵⷢ҇лїе матѳе́а, зача́ло а҃і: Вы̀ є҆стѐ свѣ́тъ мі́ра: Прича́стный: Въ па́мѧть вѣ́чнꙋю:
г҃. Ст҃ы́хъ мч҃нкъ, тїмоѳе́а и҆ ма́ѵры:
Стїхи̑ры, гла́съ д҃. Подо́бенъ: Ꙗ҆́кѡ до́блѧ: Сла́ва, и҆ ны́нѣ, пра́здника. Тропа́рь, гла́съ д҃: Мч҃нцы твоѝ гдⷭ҇и: септе́мврїа въ к҃-й де́нь. На ᲂу҆́трени, канѡ́нъ гла́съ ѕ҃. По г҃-й пѣ́сни,
<<т҃в: 603>>
Конда́къ, гла́съ д҃. Подо́бенъ: Вознесы́йсѧ:
Многоѡбра̑зныѧ ꙗ҆́звы претерпѣ́вше и҆ вѣнцы̀ ѿ бг҃а прїе́мше, ѡ҆ на́съ моли́тесѧ ко гдⷭ҇ꙋ, па́мѧть всесщ҃е́ннꙋю ва́шꙋ соверша́ющихъ, превели́кїй тїмоѳе́е, и҆ пресла́внаѧ ма́ѵро, є҆́же ᲂу҆мири́ти гра́дъ и҆ лю́ди: то́й бо є҆́сть вѣ́рныхъ ᲂу҆твержде́нїе.
По ѕ҃-й пѣ́сни, конда́къ и҆ і҆́косъ пра́здника.
Въ то́йже де́нь ᲂу҆спе́нїе прпⷣбнагѡ ѻ҆тца̀ на́шегѡ ѳеодо́сїа, и҆гꙋ́мена монастырѧ̀ пече́рскагѡ, и҆ нача́льника въ рѡссі́йстѣй землѝ мона́шескагѡ ѻ҆́бщагѡ житїѧ̀.
Соверша́етсѧ собо́ръ є҆гѡ̀ во ѻ҆би́тели є҆гѡ̀, и҆ и҆дѣ́же хра́мъ є҆гѡ̀: въ про́чихъ же цр҃квахъ полѷеле́й.
Тропа́рь, гла́съ и҃:
Возвы́сивсѧ на добродѣ́тель, и҆з̾ мла́да возлюби́въ мона́шеское житїѐ, къ жела́нїю до́блественнѣ дости́гъ, всели́лсѧ є҆сѝ въ пеще́рꙋ, и҆ ᲂу҆краси́въ житїѐ твоѐ поще́нїемъ и҆ свѣ́тлостїю, въ мл҃твахъ ꙗ҆́кѡ безпло́тенъ пребыва́лъ є҆сѝ, въ рѡссі́йстѣй землѝ ꙗ҆́кѡ свѣ́тлое свѣти́ло просїѧ́въ, ѻ҆́тче ѳеодо́сїе: молѝ хрⷭ҇та̀ бг҃а, сп҃сти́сѧ дꙋша́мъ на́шымъ.
Конда́къ, гла́съ г҃. Подо́бенъ: Дв҃а дне́сь:
Ѕвѣздꙋ̀ рѡссі́йскꙋю дне́сь почти́мъ, ѿ восто́ка возсїѧ́вшꙋю, и҆ на за́падъ прише́дшꙋю, всю́ бо странꙋ̀ сїю̀ чꙋдесы̀ и҆ добро́тою ѡ҆богати́вшꙋ, и҆ всѧ̑ ны̀ содѣ́ѧнїемъ и҆ бл҃года́тїю мона́шескагѡ ᲂу҆ста́ва, бл҃же́ннагѡ ѳеодо́сїа.
д҃. Ст҃ы́ѧ прпⷣбномч҃нцы пелагі́и.
Стїхи̑ры, гла́съ в҃. Подо́бенъ: Є҆гда̀ ѿ дре́ва: Сла́ва, и҆ ны́нѣ, пра́здника. На стїхо́внѣ трїѡ́ди. Тропа́рь, гла́съ д҃: А҆́гница твоѧ̀ і҆и҃се, пелагі́а: септе́мврїа въ ѕ҃і-й де́нь. На ᲂу҆́трени, канѡ́нъ гла́съ д҃. По г҃-й пѣ́сни,
<<т҃в ѡ҆б.: 604>>
Конда́къ, гла́съ г҃. Подо́бенъ: Дв҃а дне́сь:
Вре́мєннаѧ презрѣ́вши, и҆ нбⷭ҇ныхъ бл҃гъ прича́стница бы́вши, вѣне́цъ страда́нїѧ ра́ди прїи́мши, пелагі́е всечⷭ҇тна́ѧ, ꙗ҆́кѡ да́ръ принесла̀ є҆сѝ, крѡ́вныѧ пото́ки влⷣцѣ хрⷭ҇тꙋ̀: молѝ ѿ бѣ́дъ и҆зба́вити на́съ, твою̀ па́мѧть почита́ющихъ.
И҆ сѣда́ленъ, гла́съ а҃. Сла́ва, и҆ ны́нѣ, пра́здника. По ѕ҃-й пѣ́сни, конда́къ и҆ і҆́косъ пра́здника.
є҃. Ст҃ы́ѧ и҆ сла́вныѧ мч҃нцы і҆рі́ны.
Стїхи̑ры, гла́съ а҃. Подо́бенъ: Всехва́льнїи мч҃нцы: Сла́ва, и҆ ны́нѣ, пра́здника. Тропа́рь, гла́съ д҃: А҆́гница твоѧ̀ і҆и҃се: септе́мврїа въ ѕ҃і де́нь. На ᲂу҆́трени, канѡ́нъ, гла́съ д҃. По г҃-й пѣ́сни,
Конда́къ, гла́съ д҃. Подо́бенъ: Ꙗ҆ви́лсѧ є҆сѝ дне́сь:
Дѣ́вства добро́тами преиспещре́на дѣ́во, страда́льчествомъ была̀ є҆сѝ краснѣ́йшаѧ і҆ри́но, кровьмѝ твои́ми и҆сте́кшими ѡ҆багре́на, пре́лесть же низложи́вшаѧ безбо́жїѧ. сегѡ̀ ра́ди и҆ прїѧ́ла є҆сѝ по́чєсти побѣ́ды, рꙋко́ю созда́телѧ твоегѡ̀.
И҆ сѣда́ленъ, гла́съ и҃. Сла́ва, и҆ ны́нѣ, пра́здника. По ѕ҃-й пѣ́сни, конда́къ и҆ і҆́косъ пра́здника.
ѕ҃. Ст҃а́гѡ и҆ првⷣнагѡ і҆́ѡва многострада́льнагѡ.
Стїхи̑ры, гла́съ д҃. Подо́бенъ: Да́лъ є҆сѝ зна́менїе: Сла́ва и҆ ны́нѣ, пра́здника.
Тропа́рь, гла́съ а҃:
Бога́тство ви́дѣвъ добродѣ́телей і҆́ѡвлихъ, ᲂу҆кра́сти ко́знствоваше пра́ведныхъ вра́гъ, и҆ растерза́въ сто́лпъ тѣлесѐ, сокро́вище не ᲂу҆кра́де дх҃а: ѡ҆брѣ́те бо воѡрꙋже́ннꙋ непоро́чнагѡ дꙋ́шꙋ, <<т҃г: 605>> мене́ же и҆ ѡ҆бнажи́въ плѣнѝ: предвари́въ ᲂу҆́бѡ мѧ̀ пре́жде конца̀, и҆зба́ви мѧ̀ льсти́вагѡ, сп҃се и҆ сп҃си́ мѧ.
На ᲂу҆́трени, канѡ́нъ, гла́съ д҃. По г҃-й пѣ́сни,
Конда́къ, гла́съ и҃. Подо́бенъ: Ꙗ҆́кѡ нача́тки:
Ꙗ҆́кѡ и҆́стиненъ и҆ првⷣнъ, бг҃очести́въ и҆ непоро́ченъ, ѡ҆сщ҃е́нъ же ꙗ҆́вльсѧ всесла́вне, бж҃їй ᲂу҆го́дниче и҆́стинный, просвѣти́лъ є҆сѝ мі́ръ въ терпѣ́нїи твое́мъ, терпѣли́вѣйшїй и҆ до́блѣйшїй: тѣ́мже всѝ бг҃омꙋ́дре па́мѧть твою̀ воспѣва́емъ.
И҆ сѣда́ленъ, гла́съ г҃. Сла́ва, и҆ ны́нѣ, пра́здника. По ѕ҃-й пѣ́сни, конда́къ и҆ і҆́косъ пра́здника. На лїтꙋргі́и, прокі́менъ, гла́съ з҃: Чⷭ҇тна̀ пред̾ гдⷭ҇емъ: Сті́хъ: Что̀ возда́мъ гдⷭ҇еви: А҆по́столъ къ гала́тѡмъ, зача́ло сг҃і: Пло́дъ дх҃о́вный: А҆ллилꙋ́їа, гла́съ ѕ҃: Бл҃же́нъ мꙋ́жъ боѧ́йсѧ гдⷭ҇а: Сті́хъ: Си́льно на землѝ: Є҆ѵⷢ҇лїе матѳе́а, зача́ло м҃г: Всѧ̑ мнѣ̀ прєдана̀ сꙋ́ть: Прича́стенъ: Въ па́мѧть вѣ́чнꙋю:
з҃. Воспомина́нїе на нб҃сѝ ꙗ҆́вльшагѡсѧ зна́менїѧ чⷭ҇тна́гѡ крⷭ҇та̀, во гра́дѣ і҆ерⷭ҇ли́мѣ, ѿ ст҃а́гѡ ло́бнагѡ мѣ́ста протѧже́ннагѡ ѕвѣзда́ми, да́же до ст҃ы́ѧ горы̀ є҆леѡ́нскїѧ, въ г҃-й ча́съ днѐ, при царѣ̀ кѡнста́нтїи, сы́нѣ вели́кагѡ кѡнстанті́на: И҆ ст҃а́гѡ мч҃нка а҆ка́кїа.
На Гдⷭ҇и воззва́хъ, стїхи̑ры крⷭ҇та̀ на ѕ҃, гла́съ д҃. Подо́бенъ: Зва́нный свы́ше: Сла́ва, гла́съ и҃: Возвѣсти́ша нб҃са̀: И҆ ны́нѣ, пра́здника.
Тропа́рь, гла́съ и҃:
Крⷭ҇та̀ твоегѡ̀ ѡ҆́бразъ ны́нѣ па́че со́лнца возсїѧ̀, є҆го́же горы̀ ст҃ы́ѧ да́же до ло́бнагѡ мѣ́ста просте́рлъ є҆сѝ, и҆ въ не́мъ твою̀ сп҃се, крѣ́пость ᲂу҆ѧсни́лъ є҆сѝ, си́мъ ᲂу҆крѣплѧ́ѧ и҆ вѣ̑рныѧ <<т҃г ѡ҆б.: 606>> на́шѧ царѝ: ꙗ҆̀же и҆ сп҃са́й вы́нꙋ въ ми́рѣ, мл҃твами бцⷣы хрⷭ҇тѐ бж҃е, и҆ сп҃сѝ на́съ.
Сла́ва, и҆ ны́нѣ, пра́здника. Слꙋ́жба мꙋ́ченика а҆ка́кїа пое́тсѧ на повече́рїи. На ᲂу҆́трени, на Бг҃ъ гдⷭ҇ь, тропа́рь пра́здника, два́жды. Сла́ва, и҆ ны́нѣ, крⷭ҇та̀. Канѡ́нъ пра́здника со і҆рмосо́мъ на ѕ҃, и҆ крⷭ҇та̀ на ѕ҃, гла́съ д҃. По г҃-й пѣ́сни, конда́къ и҆ і҆́косъ пра́здника: и҆ сѣда́ленъ крⷭ҇та̀, гла́съ д҃. два́жды. Сла́ва, и҆ ны́нѣ, пра́здника. По ѕ҃-й пѣ́сни,
Конда́къ, гла́съ д҃. Подо́бенъ: Вознесы́йсѧ:
Ѿве́рзый нб҃са̀ заключє́ннаѧ, на нб҃сѝ пресвѣ̑тлыѧ лꙋчѝ, на землѝ возсїѧ̀ пречⷭ҇тый крⷭ҇тъ: тѣ́мже сїѧ́нїе є҆гѡ̀ дѣ́йства прїе́мше, къ незаходи́момꙋ наставлѧ́емсѧ свѣ́тꙋ, и҆ во бране́хъ и҆́мамы є҆го̀ ѻ҆рꙋ́жїе ми́ра непобѣди́мꙋю побѣ́дꙋ.
И҆ і҆́косъ. По ѳ҃-й пѣ́сни, свѣти́ленъ крⷭ҇та̀, два́жды. Сла́ва, и҆ ны́нѣ, пра́здника. На лїтꙋргі́и, прокі́менъ, гла́съ з҃: Возноси́те гдⷭ҇а бг҃а на́шего: Сті́хъ: Гдⷭ҇ь воцр҃и́сѧ: А҆по́столъ къ корі́нѳѧнѡмъ, зача́ло рк҃є: Сло́во крⷭ҇тное: А҆ллилꙋ́їа, гла́съ а҃: Помѧнѝ со́нмъ тво́й: Сті́хъ: Бг҃ъ же цр҃ь на́шъ: Є҆ѵⷢ҇лїе і҆ѡа́нна, зача́ло ѯ҃: Совѣ́тъ сотвори́ша а҆рхїере́и и҆ ста́рцы на і҆и҃са: Прича́стенъ: Зна́менасѧ:
и҃. Ст҃а́гѡ сла́внагѡ, всехва́льнагѡ а҆пⷭ҇ла и҆ є҆ѵⷢ҇лі́ста, напе́рсника возлю́бленнагѡ, дѣ́вственника, і҆ѡа́нна бг҃осло́ва: И҆ прпⷣбнагѡ ѻ҆тца̀ на́шегѡ а҆рсе́нїа вели́кагѡ.
На ма́лѣй вече́рни, стїхи̑ры а҆пⷭ҇ла, на д҃, гла́съ в҃. Є҆гда̀ ѿ древа̀: Сла́ва, гла́съ то́йже, самогла́сенъ: А҆пⷭ҇лѡвъ верхо́внагѡ: И҆ ны́нѣ, пра́здника. На стїхо́внѣ пра́здника. Сла́ва, а҆пⷭ҇ла: И҆ ны́нѣ, пра́здника. По трист҃о́мъ,
<<т҃д: 607>>
Тропа́рь а҆пⷭ҇ла, гла́съ в҃:
А҆пⷭ҇ле хрⷭ҇тꙋ̀ бг҃ꙋ возлю́бленне, ᲂу҆скорѝ и҆зба́вити лю́ди без̾ѿвѣ́тны, прїе́млетъ тѧ̀ припа́дающа, и҆́же па́дша на пє́рси прїе́мый: є҆го́же молѝ бг҃осло́ве, и҆ належа́щїй ѻ҆́блакъ ꙗ҆зы́кѡвъ разгна́ти, просѧ̀ на́мъ ми́ра и҆ ве́лїѧ млⷭ҇ти.
Сла́ва, и҆ ны́нѣ пра́здника. Є҆ктенїа̀ ма́лаѧ, и҆ ѿпꙋ́стъ. На вели́цѣй вече́рни, по ѻ҆бы́чномъ ѱалмѣ̀ пое́мъ: Бл҃же́нъ мꙋ́жъ, а҃-й а҆нтїфѡ́нъ. На Гдⷭ҇и воззва́хъ, стїхи̑ры пра́здника, г҃: и҆ а҆пⷭ҇ла г҃, на д҃: повторѧ́юще а҃-ю, гла́съ а҃. Подо́бенъ: Нбⷭ҇ныхъ чинѡ́въ: и҆ прпⷣбнагѡ г҃, гла́съ и҃. Подо́бенъ: Ѽ пресла́внагѡ чꙋдесѐ! Сла́ва, а҆пⷭ҇ла, гла́съ в҃: Сы́на гро́мова: И҆ ны́нѣ, пра́здника. Вхо́дъ. прокі́менъ днѐ. Чтє́нїѧ а҆пⷭ҇ла г҃, пи́саны септе́мврїа въ к҃ѕ-й де́нь. На лїті́и стїхи́ра хра́ма, и҆лѝ пра́здника. и҆ а҆пⷭ҇ла самогла́сны д҃, гла́съ а҃: и҆ прпⷣбнагѡ стїхи́ра, гла́съ є҃. Сла́ва, а҆пⷭ҇ла, гла́съ д҃: Возле́гъ на пє́рси: И҆ ны́нѣ, пра́здника. На стїхо́внѣ стїхи̑ры а҆пⷭ҇ла, гла́съ д҃. Подо́бенъ: Зва́нный свы́ше: съ припѣ́вы и҆́хъ. Сла́ва, гла́съ ѕ҃: А҆пⷭ҇ле хрⷭ҇то́въ: И҆ ны́нѣ, пра́здника: По трист҃о́мъ тропа́рь а҆пⷭ҇ла два́жды: пи́санъ на ма́лѣй вече́рни. и҆ Бцⷣе дв҃о, є҆ди́ножды, и҆ бл҃гослове́нїе хлѣ́бѡвъ: и҆ чте́нїе во ѿкрове́нїи а҆пⷭ҇ловѣ. На ᲂу҆́трени, на Бг҃ъ гдⷭ҇ь, тропа́рь пра́здника, є҆ди́ножды: и҆ а҆пⷭ҇ла є҆ди́ножды. Сла́ва, прпⷣбнагѡ, гла́съ и҃. Сле́зъ твои́хъ тече́ньми: септе́мврїа въ г҃-й де́нь. И҆ ны́нѣ, пра́здника, и҆ ѻ҆бы̑чныѧ каѳі̑смы. По а҃-й каѳі́смѣ сѣда́ленъ а҆пⷭ҇ла, гла́съ а҃, два́жды: Сла́ва, и҆ ны́нѣ, пра́здника: и҆ чте́нїе. По в҃-й каѳі́смѣ сѣда́ленъ а҆пⷭ҇ла, гла́съ є҃, два́жды: Сла́ва, и҆ ны́нѣ, пра́здника. По полѷеле́и сѣда́ленъ а҆пⷭ҇ла, гла́съ и҃, два́жды: Сла́ва, и҆ ны́нѣ, пра́здника. и҆ чте́мъ сло́во похва́льное а҆пⷭ҇ла. <<т҃д ѡ҆б.: 608>> Степє́нна, а҃-й а҆нтїфѡ́нъ д҃-гѡ гла́са. Прокі́менъ, гла́съ д҃: Во всю̀ зе́млю: Сті́хъ: Нб҃са̀ повѣ́даютъ: Всѧ́кое дыха́нїе: Є҆ѵⷢ҇лїе і҆ѡа́нна, зача́ло ѯ҃з: Ꙗ҆ви́сѧ і҆и҃съ ᲂу҆ч҃нкѡ́мъ свои̑мъ: По н҃-мъ ѱалмѣ̀ стїхи́ра а҆пⷭ҇ла, гла́съ в҃: Бг҃осло́ве дѣ́вственниче: Канѡ́нъ пра́здника, со і҆рмосо́мъ на д҃: і҆рмо́съ по два́жды: и҆ а҆пⷭ҇ла на ѕ҃: и҆ прпⷣбнагѡ, на д҃: Катава́сїа, пра́здника. По г҃-й пѣ́сни,
Конда́къ прпⷣбнагѡ, гла́съ г҃. Подо́бенъ: Дв҃а дне́сь:
Ѿ ри́ма возсїѧ́лъ є҆сѝ ꙗ҆́коже со́лнце вели́кое, и҆ къ ца́рскомꙋ гра́дꙋ дости́глъ є҆сѝ пребл҃же́нне, словесы̀ твои́ми просвѣща́ѧ сего̀ и҆ дѣ́лы, всѧ́кꙋ неразꙋ́мїѧ мглꙋ̀ ѿгонѧ̀. сегѡ̀ ра́ди тѧ̀ почита́емъ, ѻ҆тцє́въ сла́во, а҆рсе́нїе прпⷣбне.
И҆ і҆́косъ. и҆ сѣда́ленъ а҆пⷭ҇ла, гла́съ и҃. Сла́ва, прпⷣбнагѡ, гла́съ и҆ подо́бенъ то́йже. И҆ ны́нѣ, пра́здника. По ѕ҃-й пѣ́сни,
Конда́къ а҆пⷭ҇ла, гла́съ в҃:
Вели̑чїѧ твоѧ̑ дѣ́вственниче, кто̀ повѣ́сть; то́чиши бо чꙋдеса̀, и҆ и҆злива́еши и҆сцѣлє́нїѧ, и҆ мо́лишисѧ ѡ҆ дꙋша́хъ на́шихъ, ꙗ҆́кѡ бг҃осло́въ и҆ дрꙋ́гъ хрⷭ҇то́въ.
И҆ і҆́косъ. По ѳ҃-й пѣ́сни, свѣти́ленъ а҆пⷭ҇ла: Сла́ва, а҆рсе́нїа: И҆ ны́нѣ, пра́здника: На хвали́техъ стїхи̑ры пра́здника г҃: и҆ а҆пⷭ҇ла г҃, гла́съ и҃. Подо́бенъ: Ѽ пресла́внагѡ чꙋдесѐ! Сла́ва, гла́съ то́йже: Бл҃говѣ́стниче і҆ѡа́нне: И҆ ны́нѣ, пра́здника. Славосло́вїе вели́кое. По трист҃о́мъ тропа́рь а҆пⷭ҇ла: Сла́ва, прпⷣбнагѡ: И҆ ны́нѣ, пра́здника. Є҆ктєнїѝ, и҆ ѿпꙋ́стъ. И҆ дае́тсѧ є҆ле́й бра́тїи ѿ канди́ла ст҃а́гѡ, пою́щымъ на́мъ стїхи́рꙋ самогла́снꙋ, ꙗ҆́коже ᲂу҆каза́сѧ септе́мврїа въ к҃ѕ-й де́нь: и҆ ча́съ а҃-й. На а҃-мъ часѣ̀, тропа́рь, пра́здника, Сла́ва, а҆пⷭ҇ла: И҆ ны́нѣ, бг҃оро́диченъ часѡ́въ. По трист҃о́мъ конда́къ пра́здника, и҆ <<т҃є: 609>> прѡ́чаѧ: и҆ соверше́нный ѿпꙋ́стъ. На часѣ́хъ, конда́къ пра́здника, и҆ а҆пⷭ҇ла, глаго́лемъ премѣнѧ́юще. На лїтꙋргі́и, бл҃жє́нна пра́здника, пѣ́снь рѧдова́ѧ: и҆ а҆пⷭ҇ла ѕ҃-ѧ. Прокі́менъ, гла́съ и҃: Во всю̀ зе́млю и҆зы́де: Сті́хъ: Нб҃са̀ повѣ́даютъ: А҆по́столъ собо́рнагѡ посла́нїѧ і҆ѡа́ннова, зача́ло ѯ҃и: Є҆́же бѣ̀ и҆спе́рва: А҆ллилꙋ́їа, гла́съ а҃: И҆сповѣ́дѧтъ нб҃са̀ чꙋдеса̀ твоѧ̑ гдⷭ҇и. Є҆ѵⷢ҇лїе і҆ѡа́нна, зача́ло ѯ҃а: Стоѧ́хꙋ при крⷭ҇тѣ̀ і҆и҃совѣ: Прича́стенъ, Во всю̀ зе́млю:
[[комм.]] Оу҆ка́зъ ѡ҆ пра́здницѣ ст҃а́гѡ и҆ всехва́льнагѡ а҆пⷭ҇ла и҆ є҆ѵⷢ҇лі́ста і҆ѡа́нна бг҃осло́ва.
Начина́етсѧ ѿ сꙋббѡ́ты в҃-ѧ недѣ́ли по па́сцѣ, и҆ восхо́дитъ до з҃-ѧ недѣ́ли ст҃ы́хъ ѻ҆тє́цъ.
[[комм.]] Подоба́етъ вѣ́дати. ꙗ҆́кѡ а҆́ще слꙋчи́тсѧ ст҃а́гѡ і҆ѡа́нна бг҃осло́ва, въ недѣ́лю мѷроно́сицъ, и҆лѝ ѡ҆ разсла́бленномъ, и҆лѝ самарѧны́ни, и҆лѝ ѡ҆ слѣпо́мъ.
Въ сꙋббѡ́тꙋ, на ма́лѣй вече́рни, на Гдⷭ҇и воззва́хъ, стїхи̑ры воскрⷭ҇ны д҃: Сла́ва, а҆пⷭ҇ла: И҆ ны́нѣ, бг҃оро́диченъ. На стїхо́внѣ стїхи́ра воскрⷭ҇на: и҆ а҆пⷭ҇ла стїхо́вна вели́кїѧ вече́рни, съ припѣ́вы є҆гѡ̀. Сла́ва, а҆пⷭ҇ла: И҆ ны́нѣ, бг҃оро́диченъ. Тропа́рь воскрⷭ҇нъ: Сла́ва, а҆пⷭ҇ла: И҆ ны́нѣ, бг҃оро́диченъ: є҆ктенїа̀ ма́лаѧ, и҆ ѿпꙋ́стъ. На вели́цѣй вече́рни, по ѻ҆бы́чной каѳі́смѣ, на Гдⷭ҇и воззва́хъ, стїхи̑ры воскрⷭ҇ны гла́са г҃: и҆ пра́здника г҃: и҆ а҆пⷭ҇ла д҃. Сла́ва, пра́здника, самогла́сенъ трїѡ́ди: И҆ ны́нѣ, бг҃оро́диченъ а҃-й гла́са. Вхо́дъ, прокі́менъ днѐ. и҆ чтє́нїѧ а҆пⷭ҇ла г҃. На лїті́и стїхи́ра хра́ма, и҆ а҆пⷭ҇ла самогла́сны: Сла́ва, а҆пⷭ҇ла: И҆ ны́нѣ, пра́здника. На стїхо́внѣ стїхи́ра воскрⷭ҇на, и҆ па́схи. Сла́ва, а҆пⷭ҇ла: И҆ ны́нѣ, трїѡ́ди. На бл҃гослове́нїи хлѣ́бѡвъ тропа́рь: Бцⷣе дв҃о, два́жды: и҆ а҆пⷭ҇ла є҆ди́ножды. и҆ чте́нїе въ дѣѧ́нїихъ а҆пⷭ҇льскихъ. [зрѝ] А҆́ще є҆́сть недѣ́лѧ <<т҃є ѡ҆б.: 610>> мѷроно́сицъ, на Бг҃ъ гдⷭ҇ь, тропа́рь воскрⷭ҇нъ: Є҆гда̀ снизше́лъ є҆сѝ къ сме́рти: є҆ди́ножды. Бл҃гоѡбра́зный і҆ѡ́сифъ: є҆ди́ножды. Сла́ва, а҆пⷭ҇ла: И҆ ны́нѣ, Мѷроно́сицамъ: [зрѝ] А҆́ще ли во и҆́ны недѣ̑ли, Тропа́рь воскрⷭ҇нъ два́жды: Сла́ва, а҆пⷭ҇ла: И҆ ны́нѣ, бг҃оро́диченъ а҃-й, въ то́йже гла́съ. По каѳі́смахъ сѣда́льны воскрⷭ҇ны, и҆ бг҃оро́дичны и҆́хъ: и҆ чте́нїе во є҆ѵⷢ҇лїи толково́мъ. Полѷеле́й и҆ сѣда́льны ѻ҆́ба а҆пⷭ҇ла: Сла́ва, сѣда́льны по полѷеле́и: И҆ ны́нѣ, бг҃оро́диченъ: и҆ чте́нїе а҆пⷭ҇ла. Степє́нна, и҆ прокі́менъ гла́са: Всѧ́кое дыха́нїе: Є҆ѵⷢ҇лїе воскрⷭ҇но. Воскрⷭ҇нїе хрⷭ҇то́во: три́жды: ѱало́мъ н҃. стїхи́ра воскрⷭ҇на. Канѡ́нъ па́схи, со і҆рмосо́мъ, и҆ съ бг҃оро́дичны и҆́хъ, на ѕ҃: и҆ а҆пⷭ҇ла на д҃: и҆ трїѡ́ди на д҃. Пое́мъ же си́це: на ко́ейждо пѣ́сни тропа́рь воскрⷭ҇нъ є҆ди́нъ, и҆ пра́здника а҃, и҆ трⷪ҇ченъ, и҆ бг҃оро́диченъ. Катава́сїа: Воскрⷭ҇нїѧ де́нь: По г҃-й пѣ́сни, конда́къ а҆пⷭ҇ла, и҆ і҆́косъ: и҆ сѣда́ленъ є҆гѡ̀ два́жды: Сла́ва, и҆ ны́нѣ, пра́здника: и҆ чте́нїе а҆по́стола. По ѕ҃-й пѣ́сни, конда́къ пра́здника, и҆ і҆́косъ. На ѳ҃-й пѣ́сни, Чⷭ҇тнѣ́йшꙋю не пое́мъ. Свѣти́ленъ па́схи. Сла́ва, а҆пⷭ҇ла: И҆ ны́нѣ, пра́здника. На хвали́техъ, стїхи̑ры воскрⷭ҇ны д҃: и҆ а҆пⷭ҇ла д҃, со сла́внымъ, и҆ съ припѣ́вы є҆гѡ̀. Сла́ва, пра́здника: И҆ ны́нѣ, Пребл҃гослове́нна є҆сѝ: Славосло́вїе вели́кое. По трист҃о́мъ тропа́рь воскрⷭ҇нъ. є҆ктєнїѝ, и҆ ѡ҆глаше́нїе, и҆ ѿпꙋ́стъ. и҆ ѻ҆бы́чное и҆схожде́нїе въ притво́ръ. Сла́ва, и҆ ны́нѣ, стїхи́ра є҆ѵⷢ҇льскаѧ, и҆ ча́съ а҃-й. На часѣ́хъ, тропа́рь воскрⷭ҇нъ. Сла́ва, а҆пⷭ҇ла: И҆ ны́нѣ, бг҃оро́диченъ часѡ́въ. По Ѻ҆́ч҃е на́шъ, кондакѝ премѣнѧ́юще глаго́лемъ. На лїтꙋргі́и, бл҃жє́нна гла́са, на д҃: и҆ трїѡ́ди пѣ́снь г҃-ѧ, на д҃: и҆ а҆пⷭ҇ла, пѣ́снь ѕ҃, на д҃. По вхо́дѣ тропа́рь воскрⷭ҇нъ, и҆ а҆пⷭ҇ла. Сла́ва, конда́къ а҆пⷭ҇ла: И҆ <<т҃ѕ: 611>> ны́нѣ, пра́здника. Прокі́менъ, а҆по́столъ, А҆ллилꙋ́їа, є҆ѵⷢ҇лїе и҆ прича́стенъ пре́жде днѐ, и҆ а҆пⷭ҇ла. [зрѝ] Ст҃а́гѡ же а҆рсе́нїа слꙋ́жба ѡ҆ставлѧ́етсѧ, и҆ пое́тсѧ, є҆гда̀ хо́щетъ настоѧ́тель, и҆лѝ цр҃кве нача́льникъ.
[[комм.]] Ѡ҆ то́мже пра́здницѣ подоба́етъ вѣ́дати, а҆́ще слꙋчи́тсѧ пра́здникъ ст҃а́гѡ а҆пⷭ҇ла і҆ѡа́нна бг҃осло́ва, въ сре́дꙋ преполове́нїѧ.
Во вто́рникъ на ма́лѣй вече́рни, стїхи̑ры а҆пⷭ҇ла на д҃: Сла́ва, а҆пⷭ҇ла: И҆ ны́нѣ, пра́здника. На стїхо́внѣ стїхи̑ры а҆пⷭ҇ла, вели́кїѧ вече́рни, со стїхѝ и҆́хъ. Сла́ва, а҆пⷭ҇ла: И҆ ны́нѣ, пра́здника. По трист҃о́мъ тропа́рь а҆пⷭ҇ла: Сла́ва, и҆ ны́нѣ, пра́здника. є҆ктенїа̀ ма́лаѧ, и҆ ѿпꙋ́стъ. А҆́ще ли не бꙋ́детъ бдѣ́нїѧ, на повече́рїи конда́къ а҆пⷭ҇ла. Сла́ва, и҆ ны́нѣ, пра́здника. На вели́цѣй вече́рни, пое́мъ, Бл҃же́нъ мꙋ́жъ, а҃-й а҆нтїфѡ́нъ. На Гдⷭ҇и воззва́хъ, стїхи̑ры пра́здника на д҃: и҆ а҆пⷭ҇ла на д҃. Сла́ва, а҆пⷭ҇ла. И҆ ны́нѣ, пра́здника. Вхо́дъ. Прокі́менъ днѐ. и҆ чтє́нїѧ пра́здника, и҆ а҆по́стола. На лїті́и стїхи́ра хра́ма, и҆ а҆пⷭ҇ла самогла́сны: Сла́ва, а҆пⷭ҇ла: И҆ ны́нѣ, пра́здника. На стїхо́внѣ стїхи̑ры пра́здника, со стїхѝ и҆́хъ. Сла́ва а҆пⷭ҇ла: И҆ ны́нѣ, пра́здника. На бл҃гослове́нїи хлѣ́бѡвъ, тропа́рь пра́здника, два́жды: и҆ а҆пⷭ҇ла є҆ди́ножды. и҆ чте́нїе а҆по́стола во а҆покалѵ́ѱїи. На ᲂу҆́трени, на Бг҃ъ гдⷭ҇ь, тропа́рь пра́здника два́жды. Сла́ва, а҆пⷭ҇ла: И҆ ны́нѣ, пра́здника. По каѳі́смахъ сѣда́льны пра́здника, и҆ чте́нїе пра́здника. Полѷеле́й, и҆ сѣда́льны а҆пⷭ҇ла ѻ҆́ба: Сла́ва, по полѷеле́и сѣда́ленъ: И҆ ны́нѣ, бг҃оро́диченъ є҆гѡ̀: и҆ чте́нїе а҆по́стола: Степє́нна, а҃- й а҆нтїфѡ́нъ д҃-гѡ гла́са. Прокі́менъ а҆пⷭ҇ла: Всѧ́кое дыха́нїе: Є҆ѵⷢ҇лїе а҆пⷭ҇ла. Воскрⷭ҇нїе хрⷭ҇то́во: ѱало́мъ н҃. стїхи́ра а҆пⷭ҇ла. Канѡ́нъ пра́здника, гла́съ д҃, со і҆рмосо́мъ на д҃: и҆ а҆пⷭ҇ла на ѕ҃. и҆ дрꙋгі́й канѡ́нъ пра́здника, <<т҃ѕ ѡ҆б.: 612>> гла́съ и҃, на д҃. Катава́сїа, і҆рмо́съ пра́здника, и҃ гла́са, ѻ҆́ба ли̑ка вкꙋ́пѣ. По г҃- й пѣ́сни конда́къ и҆ і҆́косъ а҆пⷭ҇ла, и҆ сѣда́ленъ а҆пⷭ҇ла, два́жды. Сла́ва, и҆ ны́нѣ, пра́здника, и҆ чте́нїе а҆по́стола. По ѕ҃-й пѣ́сни, конда́къ и҆ і҆́косъ пра́здника. На ѳ҃-й пѣ́сни, Чⷭ҇тнѣ́йшꙋю не пое́мъ. Свѣти́ленъ пра́здника. Сла́ва, а҆пⷭ҇ла: И҆ ны́нѣ, пра́здника. На хвали́техъ стїхи̑ры пра́здника г҃, и҆ а҆пⷭ҇ла г҃: Сла́ва, а҆пⷭ҇ла, гла́съ и҃: Є҆ѵⷢ҇лі́сте і҆ѡа́нне: И҆ ны́нѣ, пра́здника. Славосло́вїе вели́кое. По трист҃о́мъ тропа́рь а҆пⷭ҇ла. Сла́ва, и҆ ны́нѣ, пра́здника. є҆ктєнїѝ, и҆ ѡ҆глаше́нїе, и҆ ѿпꙋ́стъ, и҆ ѻ҆бы́чное и҆схожде́нїе, и҆ ча́съ а҃-й въ притво́рѣ. На часѣ́хъ, тропа́рь пра́здника. Сла́ва, а҆пⷭ҇ла: И҆ ны́нѣ, бг҃оро́диченъ часѡ́въ. По Ѻ҆́ч҃е на́шъ, кондакѝ глаго́лемъ премѣнѧ́юще. На лїтꙋргі́и, бл҃жє́нна пра́здника, ѿ канѡ́на д҃-гѡ гла́са, пѣ́снь г҃-ѧ, на д҃: и҆ а҆пⷭ҇ла пѣ́снь ѕ҃-ѧ, на д҃. По вхо́дѣ тропа́рь пра́здника, и҆ а҆пⷭ҇ла. Сла́ва, конда́къ, а҆пⷭ҇ла: И҆ ны́нѣ, пра́здника. Прокі́менъ, а҆по́столъ, А҆ллилꙋ́їа, є҆ѵⷢ҇лїе и҆ прича́стны пре́жде пра́здника: та́же а҆пⷭ҇ла. Ст҃а́гѡ же а҆рсе́нїа слꙋ́жба пое́тсѧ во и҆́нъ де́нь.
[[комм.]] Ѡ҆ то́мже пра́здницѣ подоба́етъ вѣ́дати, а҆́ще слꙋчи́тсѧ па́мѧть ст҃а́гѡ а҆пⷭ҇ла і҆ѡа́нна бг҃осло́ва въ недѣ́лю самарѧны́ни.
Ѡ҆ставлѧ́етсѧ слꙋ́жба преполове́нїѧ, и҆ пое́тсѧ воскрⷭ҇на, и҆ самарѧны́ни, и҆ бг҃осло́ва, ꙗ҆́коже ᲂу҆каза́сѧ пре́жде во и҆́ны недѣ̑ли.
[[комм.]] Ѡ҆ то́мже пра́здницѣ, а҆́ще слꙋчи́тсѧ ст҃а́гѡ а҆пⷭ҇ла і҆ѡа́нна бг҃осло́ва въ сре́дꙋ пред̾ вознесе́нїемъ, во ѿда́нїе па́схи.
Во вто́рникъ ве́чера, на ма́лѣй вече́рни, стїхи̑ры а҆пⷭ҇ла на д҃. Сла́ва, а҆пⷭ҇ла: И҆ ны́нѣ, днѐ. На стїхо́внѣ стїхи̑ры а҆пⷭ҇ла, вели́кїѧ вече́рни, съ припѣ́вы и҆́хъ. Сла́ва, а҆пⷭ҇ла: И҆ ны́нѣ, днѐ. Тропа́рь а҆пⷭ҇ла: Сла́ва, и҆ ны́нѣ: Всѧ̑ па́че: <<т҃з: 613>> Є҆ктенїа̀ ма́лаѧ, и҆ ѿпꙋ́стъ. [зрѝ] А҆́ще же нѣ́сть бдѣ́нїѧ, на повече́рїи глаго́лемъ конда́къ а҆пⷭ҇ла: Сла́ва, и҆ ны́нѣ, па́схи: А҆́ще и҆ во гро́бъ: На вели́цѣй вече́рни, по ѻ҆бы́чномъ ѱалмѣ̀, пое́мъ Бл҃же́нъ мꙋ́жъ, а҃ а҆нтїфѡ́нъ. На Гдⷭ҇и воззва́хъ, стїхи̑ры ѡ҆ слѣпо́мъ, на ѕ҃: и҆ а҆пⷭ҇ла на д҃. Сла́ва, а҆пⷭ҇ла: И҆ ны́нѣ, днѐ: Кто̀ возглаго́летъ: Вхо́дъ: Прокі́менъ днѐ, и҆ чте́нїе а҆по́стола. На лїті́и стїхи́ра хра́ма: и҆ а҆пⷭ҇ла самогла́сны. Сла́ва, а҆пⷭ҇ла: И҆ ны́нѣ: Сѐ и҆спо́лнисѧ: На стїхо́внѣ стїхи́ра воскрⷭ҇на, гла́съ є҃: Тебѐ воплоще́ннаго: Та́же стїхи̑ры па́схи, съ припѣ́вы и҆́хъ. Сла́ва, а҆пⷭ҇ла: И҆ ны́нѣ, па́схи, Воскрⷭ҇нїѧ де́нь: и҆ Хрⷭ҇то́съ воскр҃се: є҆ди́ножды. На бл҃гослове́нїи хлѣ́бѡвъ тропа́рь а҆пⷭ҇ла, два́жды: и҆ Бцⷣе дв҃о, є҆ди́ножды. и҆ чте́нїе во ѿкрове́нїи а҆пⷭ҇ла і҆ѡа́нна. [зрѝ] А҆́ще же нѣ́сть бдѣ́нїѧ, по Ны́нѣ ѿпꙋща́еши, и҆ по трист҃о́мъ, тропа́рь воскрⷭ҇нъ гла́са: Сла́ва, а҆пⷭ҇ла: И҆ ны́нѣ, бг҃оро́диченъ: и҆ ѿпꙋ́стъ. Полꙋ́нощницꙋ же пое́мъ по ѻ҆бы́чаю. По а҃-мъ трист҃о́мъ, вмѣ́стѡ Сѐ жени́хъ: глаго́лемъ тропа́рь воскрⷭ҇нъ: Собезнача́льное сло́во: Сла́ва, и҆ ны́нѣ, бг҃оро́диченъ є҆гѡ̀. По в҃-мъ, вмѣ́стѡ Помѧнѝ гдⷭ҇и, конда́къ па́схи: А҆́ще и҆ во гро́бъ: Посе́мъ, Гдⷭ҇и поми́лꙋй, в҃і. и҆ ѿпꙋ́стъ. Мл҃твы же, Помѧнѝ гдⷭ҇и, не глаго́лемъ. На Бг҃ъ гдⷭ҇ь, тропа́рь воскрⷭ҇нъ два́жды, гла́съ є҃: Собезнача́льное сло́во: Сла́ва, а҆пⷭ҇ла: И҆ ны́нѣ: Всѧ̑ па́че смы́сла: По а҃-й каѳі́смѣ сѣда́ленъ воскрⷭ҇нъ, и҆ чте́нїе. По в҃-й каѳі́смѣ сѣда́ленъ ѡ҆ слѣпо́мъ, и҆ чте́нїе. Полѷеле́й, и҆ сѣда́ленъ а҆пⷭ҇ла, всѝ по є҆ди́ножды: и҆ чте́нїе. Степє́нна, а҃-й а҆нтїфѡ́нъ д҃-гѡ гла́са. Прокі́менъ а҆пⷭ҇ла: и҆ Всѧ́кое дыха́нїе: Є҆ѵⷢ҇лїе а҆пⷭ҇ла: Воскрⷭ҇нїе хрⷭ҇то́во: ѱало́мъ н҃. стїхи́ра а҆пⷭ҇ла. Канѡ́нъ па́схи, без̾ бг҃оро́дичнѡвъ, со <<т҃з ѡ҆б.: 614>> і҆рмосо́мъ на ѕ҃: и҆ а҆пⷭ҇ла на д҃, и҆ ѡ҆ слѣпо́мъ на д҃. Пое́мъ же во всѧ́кой пѣ́сни тропа́рь ѡ҆ слѣпо́мъ по два́жды: Сла́ва, трⷪ҇ченъ: И҆ ны́нѣ, бг҃оро́диченъ. Катава́сїа, і҆рмо́съ: Сп҃си́телю бг҃ꙋ: ѻ҆́ба ли̑ка вкꙋ́пѣ. [Предпра́зднства же канѡ́нъ здѣ̀ ѡ҆ставлѧ́етсѧ: и҆ пое́мъ є҆гѡ̀ во вто́рникъ напредѝ.] По г҃-й пѣ́сни, конда́къ и҆ і҆́косъ а҆пⷭ҇ла. Та́же ѵ҆пакоѝ па́сцѣ: Предвари́вшыѧ ᲂу҆́трѡ: Сла́ва, сѣда́ленъ а҆пⷭ҇ла. И҆ ны́нѣ, слѣпа́гѡ: и҆ чте́нїе а҆пⷭ҇ла. По ѕ҃-й пѣ́сни, конда́къ и҆ і҆́косъ па́схи. На ѳ҃-й пѣ́сни, Чⷭ҇тнѣ́йшꙋю не пое́мъ. Свѣти́ленъ па́схи: Сла́ва, а҆пⷭ҇ла: И҆ ны́нѣ, слѣпа́гѡ. На хвали́техъ стїхи̑ры а҆пⷭ҇ла на д҃. Та́же, да воскрⷭ҇нетъ бг҃ъ: и҆ стїхи̑ры па́схи съ припѣ́вы и҆́хъ. Сла́ва, а҆пⷭ҇ла: И҆ ны́нѣ, па́схи, гла́съ є҃: Воскрⷭ҇нїѧ де́нь: и҆ Хрⷭ҇то́съ воскр҃се: є҆ди́ножды. Славосло́вїе вели́кое. Тропа́рь воскрⷭ҇нъ: Сла́ва, а҆пⷭ҇ла: И҆ ны́нѣ: Всѧ̑ па́че смы́сла: Є҆ктєнїѝ, и҆ ѡ҆глаше́нїе, и҆ ѿпꙋ́стъ, и҆ и҆схожде́нїе, и҆ ча́съ а҃-й въ притво́рѣ. На часѣ́хъ, тропа́рь воскрⷭ҇нъ: Сла́ва, а҆пⷭ҇ла: И҆ ны́нѣ, бг҃оро́диченъ часѡ́въ. По Ѻ҆́ч҃е на́шъ: кондакѝ па́схи, и҆ а҆пⷭ҇ла, премѣнѧ́емъ. На лїтꙋргі́и, бл҃жє́нна ѿ канѡ́на па́схи, пѣ́снь г҃, на д҃: и҆ а҆пⷭ҇ла пѣ́снь ѕ҃, на д҃. По вхо́дѣ тропа́рь воскрⷭ҇нъ, и҆ а҆пⷭ҇ла: Сла́ва, конда́къ а҆пⷭ҇ла: И҆ ны́нѣ, па́схи. Прокі́менъ, и҆ А҆ллилꙋ́їа па́схи, и҆ а҆пⷭ҇ла. А҆по́столъ, и҆ є҆ѵⷢ҇лїе днѐ, и҆ а҆пⷭ҇ла. Прича́стенъ: Тѣ́ло хрⷭ҇то́во: Дрꙋгі́й: Во всю̀ зе́млю:
[[комм.]] Ѡ҆ то́мже пра́здницѣ подоба́етъ вѣ́дати, а҆́ще слꙋчи́тсѧ ст҃а́гѡ а҆пⷭ҇ла і҆ѡа́нна бг҃осло́ва въ четверто́къ вознесе́нїѧ.
На ма́лѣй вече́рни, стїхи̑ры пра́здника на д҃: Сла́ва, а҆пⷭ҇ла: И҆ ны́нѣ, пра́здника. На стїхо́внѣ стїхи̑ры а҆пⷭ҇ла, съ припѣ́вы и҆́хъ, вели́кїѧ вече́рни. Сла́ва, а҆пⷭ҇ла: И҆ ны́нѣ, пра́здника. Тропа́рь а҆пⷭ҇ла: Сла́ва, и҆ ны́нѣ, пра́здника. <<т҃и: 615>> Є҆ктенїа̀ ма́лаѧ, и҆ ѿпꙋ́стъ. [зрѝ] А҆́ще ли нѣ́сть бдѣ́нїѧ, на повече́рїи конда́къ а҆пⷭ҇ла: Сла́ва, и҆ ны́нѣ, пра́здника. На вели́цѣй вече́рни: Бл҃же́нъ мꙋ́жъ, а҃-й а҆нтїфѡ́нъ. На Гдⷭ҇и воззва́хъ стїхи̑ры пра́здника, на ѕ҃: и҆ а҆пⷭ҇ла на д҃: Сла́ва, а҆пⷭ҇ла: И҆ ны́нѣ, пра́здника. Вхо́дъ. Прокі́менъ днѐ, и҆ чте́нїе пра́здника, и҆ а҆пⷭ҇ла. На лїті́и стїхи̑ры пра́здника, и҆ а҆пⷭ҇ла: Сла́ва, а҆пⷭ҇ла: И҆ ны́нѣ, пра́здника. На стїхо́внѣ стїхи̑ры пра́здника, съ припѣ́вы и҆́хъ: Сла́ва, а҆пⷭ҇ла. И҆ ны́нѣ, пра́здника. На бл҃гослове́нїи хлѣ́бѡвъ тропа́рь пра́здника, два́жды: и҆ а҆пⷭ҇ла є҆ди́ножды, и҆ чте́нїе пра́здника. На Бг҃ъ гдⷭ҇ь тропа́рь пра́здника, два́жды. Сла́ва, а҆пⷭ҇ла: И҆ ны́нѣ, пра́здника. По каѳі́смахъ сѣда́льны пра́здника, и҆ чте́нїе. Полѷеле́й, и҆ сѣда́ленъ пра́здника, и҆ чте́нїе пра́здника. Степє́нна, а҃-й а҆нтїфѡ́нъ д҃-гѡ гла́са. Прокі́менъ, и҆ є҆ѵⷢ҇лїе пра́здника. Воскрⷭ҇нїе хрⷭ҇то́во: ѱало́мъ н҃. стїхи́ра пра́здника. Канѡ́нъ пра́здника, гла́съ є҃, со і҆рмосо́мъ на ѕ҃: и҆ а҆пⷭ҇ла, на д҃: и҆ дрꙋгі́й, пра́здника, на д҃. Катава́сїа: Бж҃е́ственнымъ покрове́нъ: ѻ҆́ба ли̑ка вкꙋ́пѣ. По г҃-й пѣ́сни, конда́къ и҆ і҆́косъ а҆пⷭ҇ла, и҆ сѣда́ленъ, два́жды: Сла́ва, и҆ ны́нѣ, пра́здника, и҆ чте́нїе а҆пⷭ҇ла. По ѕ҃-й пѣ́сни, конда́къ и҆ і҆́косъ, пра́здника. На ѳ҃-й пѣ́сни, Чⷭ҇тнѣ́йшꙋю не пое́мъ, но пое́мъ припѣ́вы пра́здника: къ тропарє́мъ же а҆пⷭ҇ла: Ст҃ы́й а҆пⷭ҇ле и҆ є҆ѵⷢ҇лі́сте і҆ѡа́нне бг҃осло́ве, молѝ бг҃а ѡ҆ на́съ. Свѣти́ленъ пра́здника: Сла́ва, а҆пⷭ҇ла: И҆ ны́нѣ, пра́здника: На хвали́техъ стїхи̑ры на ѕ҃, пра́здника г҃: и҆ а҆пⷭ҇ла г҃: Сла́ва, а҆пⷭ҇ла: И҆ ны́нѣ, пра́здника. Славосло́вїе вели́кое: По трист҃о́мъ тропа́рь а҆пⷭ҇ла. Сла́ва, и҆ ны́нѣ, пра́здника. Є҆ктєнїѝ, и҆ ѡ҆глаше́нїе, и҆ ѿпꙋ́стъ. дае́тсѧ же и҆ ст҃ы́й є҆ле́й бра́тїи ѿ канди́ла ст҃а́гѡ. И҆ ѻ҆бы́чное <<т҃и ѡ҆б.: 616>> и҆схожде́нїе, и҆ ча́съ а҃, въ притво́рѣ. На часѣ́хъ, тропа́рь пра́здника: Сла́ва, а҆пⷭ҇ла: И҆ ны́нѣ, бг҃оро́диченъ часѡ́въ. По Ѻ҆́ч҃е на́шъ: Конда́къ пра́здника, и҆ а҆пⷭ҇ла, премѣнѧ́емъ. На лїтꙋргі́и, и҆з̾ѡбрази́тєльнаѧ: и҆ ѿ канѡ́на пра́здника: гла́съ є҃, пѣ́снь г҃-ѧ, на д҃: и҆ а҆пⷭ҇ла, пѣ́снь ѕ҃-ѧ, на д҃. Вхо́дное пра́здника. Тропа́рь пра́здника, и҆ а҆пⷭ҇ла: Сла́ва, конда́къ а҆пⷭ҇ла: И҆ ны́нѣ, пра́здника. Прокі́менъ, а҆по́столъ, А҆ллилꙋ́їа, є҆ѵⷢ҇лїе, и҆ прича́стенъ, пре́жде пра́здника, и҆ а҆пⷭ҇ла. [зрѝ] Ст҃а́гѡ же а҆рсе́нїа слꙋ́жба ѡ҆ставлѧ́етсѧ, и҆ пое́тсѧ, є҆гда̀ разсꙋ́дитъ є҆кклисїа́рхъ.
[[комм.]] Ѡ҆ то́мже подоба́етъ вѣ́дати, а҆́ще слꙋчи́тсѧ ст҃а́гѡ а҆пⷭ҇ла і҆ѡа́нна бг҃осло́ва въ недѣ́лю з҃-ю по па́сцѣ, ст҃ы́хъ ѻ҆тє́цъ тре́хъ сѡ́тъ и҆ и҃і: ѡ҆ставлѧ́етсѧ слꙋ́жба вознесе́нїѧ и҆ пое́тсѧ воскрⷭ҇на, и҆ бг҃осло́ва, и҆ ст҃ы́хъ ѻ҆тцє́въ.
Въ сꙋббѡ́тꙋ на ма́лѣй вече́рни, стїхи̑ры воскрⷭ҇ны, на д҃: Сла́ва, а҆пⷭ҇ла, гла́съ в҃: Сы́на гро́мова: И҆ ны́нѣ, бг҃оро́диченъ, ма́лыѧ вече́рни. На стїхо́внѣ стїхи́ра воскрⷭ҇на є҆ди́на. ꙗ҆́же а҆пⷭ҇ла, стїхо́вна вели́кїѧ вече́рни, съ припѣ́вы свои́ми. Сла́ва, а҆пⷭ҇ла: И҆ ны́нѣ, бг҃оро́диченъ по гла́сꙋ. По трист҃о́мъ тропа́рь воскрⷭ҇нъ, и҆ ѻ҆тцє́въ: Сла́ва, а҆пⷭ҇ла, И҆ ны́нѣ, пра́здника. Є҆ктенїа̀ ма́лаѧ, и҆ ѿпꙋ́стъ. На вели́цѣй вече́рни, по ѻ҆бы́чномъ ѱалмѣ̀, и҆ по каѳі́смѣ, на Гдⷭ҇и воззва́хъ стїхи̑ры воскрⷭ҇ны г҃: и҆ ѻ҆тцє́въ д҃: и҆ а҆пⷭ҇ла г҃: Сла́ва, ѻ҆тцє́въ: И҆ ны́нѣ, бг҃оро́диченъ а҃-й гла́са. Вхо́дъ, прокі́менъ днѐ, и҆ чте́нїе ѻ҆тцє́въ: и҆ а҆пⷭ҇ла. На лїті́и стїхи́ра ѻ҆тцє́въ, гла́съ г҃, и҆ а҆пⷭ҇ла самогла́сны: Сла́ва, а҆пⷭ҇ла. И҆ ны́нѣ, пра́здника. На стїхо́внѣ стїхи̑ры воскрⷭ҇ны. Сла́ва, ѻ҆тцє́въ: И҆ ны́нѣ, пра́здника. На бл҃гослове́нїи хлѣ́бѡвъ тропа́рь: Бцⷣе дв҃о, два́жды: и҆ а҆пⷭ҇ла, <<т҃ѳ: 617>> є҆ди́ножды: и҆ чте́нїе. На Бг҃ъ гдⷭ҇ь, тропа́рь воскрⷭ҇нъ, и҆ ѻ҆тцє́въ: Сла́ва, а҆пⷭ҇ла: И҆ ны́нѣ, бг҃оро́диченъ. По каѳі́смахъ сѣда́льны воскрⷭ҇ны, съ бг҃оро́дичны и҆́хъ, и҆ чте́нїе во є҆ѵⷢ҇лїи толково́мъ. Полѷеле́й, и҆ сѣда́льны ст҃а́гѡ всѝ, и҆ чте́нїе а҆пⷭ҇ла. Степє́нна: и҆ прокі́менъ гла́са. Всѧ́кое дыха́нїе: Є҆ѵⷢ҇лїе воскрⷭ҇ное. Воскрⷭ҇нїе хрⷭ҇то́во: ѱало́мъ н҃. стїхи́ра воскрⷭ҇на, и҆ про́чее. Канѡ́нъ воскрⷭ҇нъ со і҆рмосо́мъ на д҃: и҆ а҆пⷭ҇ла на д҃: и҆ ѻ҆тцє́въ, на ѕ҃. Катава́сїа: Бж҃е́ственнымъ покрове́нъ: По г҃-й пѣ́сни, конда́къ и҆ і҆́косъ а҆пⷭ҇ла, и҆ сѣда́ленъ ѻ҆тцє́въ: Сла́ва, а҆пⷭ҇ла: И҆ ны́нѣ, бг҃оро́диченъ, и҆ чте́нїе а҆пⷭ҇ла. По ѕ҃-й пѣ́сни, конда́къ и҆ і҆́косъ ѻ҆тцє́въ, и҆ про́логъ. Свѣти́ленъ воскрⷭ҇нъ, и҆ ѻ҆тцє́въ: Сла́ва, а҆пⷭ҇ла: И҆ ны́нѣ, бг҃оро́диченъ. На хвали́техъ стїхи̑ры воскрⷭ҇ны г҃, и҆ ѻ҆тцє́въ в҃, и҆ а҆пⷭ҇ла со сла́внымъ г҃. Сла́ва, ѻ҆тцє́въ: И҆ ны́нѣ, Пребл҃гослове́нна є҆сѝ: Славосло́вїе вели́кое. Тропа́рь воскрⷭ҇нъ. Є҆ктєнїѝ, и҆ ѡ҆глаше́нїе и҆ ѿпꙋ́стъ, и҆ ѻ҆бы́чное и҆схожде́нїе. Сла́ва, и҆ ны́нѣ, стїхи́ра є҆ѵⷢ҇льскаѧ, и҆ ча́съ а҃-й въ притво́рѣ. На часѣ́хъ, тропа́рь воскрⷭ҇нъ: Сла́ва, ѻ҆тцє́въ: И҆ ны́нѣ, бг҃оро́диченъ часѡ́въ. По Ѻ҆́ч҃е на́шъ: конда́къ воскрⷭ҇нъ. На г҃-мъ часѣ̀, тропа́рь воскрⷭ҇нъ: Сла́ва, а҆пⷭ҇ла. По Ѻ҆́ч҃е на́шъ: кондакѝ а҆пⷭ҇ла и҆ ѻ҆тцє́въ, глаго́лемъ премѣнѧ́юще. На лїтꙋргі́и, бл҃жє́нна гла́са на д҃, и҆ ѻ҆тцє́въ пѣ́снь г҃-ѧ, на д҃, и҆ а҆пⷭ҇ла пѣ́снь ѕ҃-ѧ, на д҃. По вхо́дѣ тропа́рь воскрⷭ҇нъ, и҆ ѻ҆тцє́въ, и҆ а҆пⷭ҇ла. Та́же, конда́къ ѻ҆тцє́въ: Сла́ва, а҆пⷭ҇ла: И҆ ны́нѣ, пра́здника. Прокі́менъ, а҆по́столъ, А҆ллилꙋ́їа, и҆ є҆ѵⷢ҇лїе ѻ҆тцє́въ и҆ а҆пⷭ҇ла. Прича́стный: Хвали́те гдⷭ҇а: Дрꙋгі́й: Во всю̀ зе́млю:
<<т҃ѳ ѡ҆б.: 618>>
ѳ҃. Ст҃а́гѡ прⷪ҇ро́ка и҆са́їи: И҆ ст҃а́гѡ мч҃нка хрїстофо́ра.
Стїхи̑ры прⷪ҇ро́ка, гла́съ д҃. Подо́бенъ: Да́лъ є҆сѝ зна́менїе: и҆ мч҃нка, гла́съ то́йже. Подо́бенъ: Ꙗ҆́кѡ до́блѧ: Тропа́рь, гла́съ в҃: Прⷪ҇ро́ка твоегѡ̀: пи́санъ септе́мврїа въ д҃-й де́нь.
Мч҃нка тропа́рь, гла́съ д҃:
Ѻ҆де́ждами ѿ крове́й ᲂу҆краша́ѧйсѧ гдⷭ҇еви предстои́ши цр҃ю̀ си́лъ, хрїстофо́ре приснопа́мѧтне: ѿѻнꙋ́дꙋже со безпло́тными и҆ мч҃нки пое́ши трист҃ы́мъ и҆ стра́шнымъ сладкопѣ́нїемъ. тѣ́мже мл҃твами твои́ми сп҃са́й ста́до твоѐ.
Канѡ́нъ пра́здника, и҆ ст҃ы́хъ: прⷪ҇ро́ка и҆ мч҃нка, гла́съ д҃: Прⷪ҇ро́ка г҃ стїха̀: И҆ мч҃нка г҃ стїха̀, съ бг҃оро́дичнымъ. По г҃-й пѣ́сни, сѣда́ленъ, гла́съ д҃, и҆ мч҃нка, гла́съ то́йже. По ѕ҃-й пѣ́сни,
Конда́къ прⷪ҇ро́ка, гла́съ в҃: Подо́бенъ: Въ мл҃твахъ:
Прⷪ҇ро́чества дарова́нїе прїе́мъ прⷪ҇рокомч҃нче, и҆са́їе бг҃опроповѣ́дниче, всѣ̑мъ и҆з̾ѧсни́лъ є҆сѝ вочл҃вѣ́ченїе гдⷭ҇не, возгласи́въ велегла́снѡ концє́мъ: сѐ дв҃а во чре́вѣ прїи́метъ.
И҆ і҆́косъ.
И҆ пренесе́нїе чⷭ҇тны́хъ моще́й, и҆́же во ст҃ы́хъ ѻ҆тца̀ на́шегѡ нїкола́а чꙋдотво́рца, ѿ мѵ́ръ въ ба́ръ гра́дъ.
На вече́рни, стїхологисꙋ́емъ: Бл҃же́нъ мꙋ́жъ, а҃-й а҆нтїфѡ́нъ. На Гдⷭ҇и воззва́хъ, пое́мъ стїхи̑ры пра́здника г҃, и҆ ст҃а́гѡ є҃, гла́съ и҃. Подо́бенъ: На нб҃о текꙋ́щее: Сла́ва, гла́съ ѕ҃: Ст҃и́телей ᲂу҆добре́нїе: И҆ ны́нѣ, пра́здника. Вхо́дъ. Прокі́менъ днѐ: и҆ чтє́нїѧ г҃, ст҃и́тєльскаѧ. На лїті́и стїхи́ра хра́ма: и҆ ст҃и́телѧ, гла́съ в҃, самогла́сны. Сла́ва, гла́съ ѕ҃: Бл҃гі́й ра́бе: И҆ ны́нѣ, пра́здника. На стїхо́внѣ стїхи̑ры, гла́съ д҃. Подо́бенъ: Ꙗ҆́кѡ до́блѧ: съ <<т҃і: 619>> припѣ́вы и҆́хъ. Сла́ва, гла́съ ѕ҃: Человѣ́че бж҃їй: И҆ ны́нѣ, пра́здника. По Ны́нѣ ѿпꙋща́еши: и҆ по трист҃о́мъ,
Тропа́рь, гла́съ д҃:
Приспѣ̀ де́нь свѣ́тлагѡ торжества̀, гра́дъ ба́рскїй ра́дꙋетсѧ, и҆ съ ни́мъ вселе́ннаѧ всѧ̀ ликовствꙋ́етъ пѣ́сньми и҆ пѣ́ньми дх҃о́вными: дне́сь бо сщ҃е́нное торжество̀, въ пренесе́нїе честны́хъ и҆ многоцѣле́бныхъ моще́й ст҃и́телѧ и҆ чꙋдотво́рца нїкола́а, ꙗ҆́коже со́лнце незаходи́мое возсїѧ̀ свѣтоза́рными лꙋча́ми, разгонѧ́ѧ тьмꙋ̀ и҆скꙋше́нїй же и҆ бѣ́дъ, ѡ҆ вопїю́щихъ вѣ́рнѡ: сп҃са́й на́съ ꙗ҆́кѡ предста́тель на́шъ вели́кїй нїко́лае.
Сла́ва, и҆ ны́нѣ, пра́здника. На ᲂу҆́трени, на Бг҃ъ гдⷭ҇ь, тропа́рь пра́здника два́жды: Сла́ва, ст҃а́гѡ. И҆ ны́нѣ, пра́здника, и҆ ѻ҆бы̑чныѧ каѳі̑смы. По а҃-й каѳі́смѣ сѣда́ленъ пра́здника, два́жды: и҆ чте́нїе ѡ҆ пренесе́нїи моще́й ст҃а́гѡ. По в҃-й каѳі́смѣ сѣда́ленъ, гла́съ д҃, два́жды. Сла́ва, и҆ ны́нѣ, пра́здника. По полѷеле́и сѣда́ленъ, гла́съ а҃, два́жды: Сла́ва, и҆ ны́нѣ, бг҃оро́диченъ. Степє́нна, а҃-й а҆нтїфѡ́нъ д҃-гѡ гла́са. Прокі́менъ, гла́съ д҃: Чⷭ҇тна̀ пред̾ гдⷭ҇емъ сме́рть прпⷣбныхъ є҆гѡ̀. Сті́хъ: Что̀ возда́мъ гдⷭ҇еви: Всѧ́кое дыха́нїе: Є҆ѵⷢ҇лїе і҆ѡа́нна, зача́ло л҃є, ѿ полꙋ̀: Не входѧ́й две́рьми: По н҃-мъ ѱалмѣ̀ стїхи́ра, гла́съ ѕ҃: Наслѣ́дниче бж҃їй: Канѡ́нъ пра́здника, со і҆рмосо́мъ на ѕ҃: и҆ ст҃а́гѡ два̀ канѡ́на, на и҃: є҆ди́нъ, гла́съ и҃, дрꙋгі́й, гла́съ д҃. Катава́сїа пра́здника. По г҃- й пѣ́сни, конда́къ и҆ і҆́косъ пра́здника, и҆ сѣда́ленъ ст҃а́гѡ, гла́съ а҃. Сла́ва, и҆ ны́нѣ, пра́здника. По ѕ҃-й пѣ́сни,
Конда́къ, гла́съ г҃. Подо́бенъ: Дв҃а дне́сь:
Взы́де ꙗ҆́кѡ ѕвѣзда̀ ѿ восто́ка до за́пада, твоѧ̑ мо́щи ст҃и́телю нїко́лае, мо́ре же ѡ҆ст҃и́сѧ ше́ствїемъ твои́мъ, и҆ гра́дъ <<т҃і ѡ҆б.: 620>> ба́рскїй прїе́млетъ тобо́ю бл҃года́ть: на́съ бо дѣ́лѧ ꙗ҆ви́лсѧ є҆сѝ чꙋдотво́рецъ и҆зѧ́щный, преди́вный и҆ млⷭ҇тивый.
И҆ і҆́косъ, и҆ чте́мъ про́логъ. По ѳ҃-й пѣ́сни, свѣти́ленъ ст҃а́гѡ, два́жды: Сла́ва, и҆ ны́нѣ, пра́здника. На хвали́техъ ста́вимъ стїхѡ́въ д҃: и҆ пое́мъ стїхи̑ры, гла́съ а҃, самогла́сны. Сла́ва, гла́съ є҃: Вострꙋ́бимъ трꙋбо́ю: И҆ ны́нѣ, пра́здника. Славосло́вїе вели́кое. По трист҃о́мъ тропа́рь ст҃а́гѡ: Сла́ва, и҆ ны́нѣ, пра́здника. Є҆ктєнїѝ и҆ ѿпꙋ́стъ. Зна́менꙋютсѧ же бра́тїѧ ст҃ы́мъ є҆ле́емъ ѿ канди́ла ст҃а́гѡ: и҆ ча́съ а҃-й, и҆ коне́чный ѿпꙋ́стъ. На лїтꙋргі́и, бл҃жє́нна ѿ канѡ́на пра́здника, пѣ́снь рѧдова́ѧ: и҆ ст҃а́гѡ, пѣ́снь г҃-ѧ, на д҃. Прокі́менъ, гла́съ з҃: Восхва́лѧтсѧ прпⷣбнїи во сла́вѣ, и҆ возра́дꙋютсѧ на ло́жахъ свои́хъ. Сті́хъ: Воспо́йте гдⷭ҇еви пѣ́снь но́вꙋ, ꙗ҆́кѡ ди̑вна сотворѝ гдⷭ҇ь. А҆по́столъ ко є҆вре́ємъ, зача́ло тл҃є: Повинꙋ́йтесѧ наста́вникѡмъ ва́шымъ: А҆ллилꙋ́їа, гла́съ в҃: Сщ҃е́нницы твоѝ ѡ҆блекꙋ́тсѧ: Є҆ѵⷢ҇лїе лꙋкѝ, зача́ло к҃д: Ста̀ і҆и҃съ на мѣ́стѣ ра́внѣ: Прича́стенъ: Въ па́мѧть вѣ́чнꙋю:
і҃. Ст҃а́гѡ а҆пⷭ҇ла сі́мѡна зилѡ́та.
На вели́цѣй вече́рни, пое́мъ Бл҃же́нъ мꙋ́жъ, а҃-й а҆нтїфѡ́нъ. На Гдⷭ҇и воззва́хъ стїхи̑ры на и҃: пра́здника г҃, и҆ а҆пⷭ҇ла є҃, гла́съ д҃. Подо́бенъ: Да́лъ є҆сѝ зна́менїе: Сла́ва, а҆пⷭ҇ла, гла́съ в҃: Ре́вности тезоимени́тъ: И҆ ны́нѣ, пра́здника. Вхо́дъ. Прокі́менъ днѐ, и҆ чтє́нїѧ г҃, пи́саны сегѡ̀ мѣ́сѧца во и҃-й де́нь. На стїхо́внѣ стїхи̑ры а҆пⷭ҇ла, гла́съ а҃. Подо́бенъ: Всехва́льнїи мч҃нцы, съ припѣ́вы и҆́хъ. Сла́ва, а҆пⷭ҇ла, гла́съ ѕ҃: Тва́рь ꙗ҆́кѡ ѻ҆ре́лъ: И҆ ны́нѣ, пра́здника. По трист҃о́мъ,
<<та҃і: 621>>
Тропа́рь, гла́съ г҃:
А҆пⷭ҇ле ст҃ы́й сі́мѡне, молѝ млⷭ҇тиваго бг҃а, да прегрѣше́нїй ѡ҆ставле́нїе пода́стъ дꙋша́мъ на́шымъ.
Сла́ва, и҆ ны́нѣ, пра́здника. И҆ ѿпꙋ́стъ. На ᲂу҆́трени, на Бг҃ъ гдⷭ҇ь, тропа́рь пра́здника, два́жды. Сла́ва, а҆пⷭ҇ла: И҆ ны́нѣ, пра́здника. По каѳі́смахъ сѣда́льны а҆пⷭ҇ла. Сла́ва, и҆ ны́нѣ, пра́здника, и҆ чте́нїе. По полѷеле́и сѣда́ленъ а҆пⷭ҇ла два́жды, гла́съ и҃. Подо́бенъ: Премꙋ́дрости: Сла́ва, и҆ ны́нѣ, пра́здника. Степє́нна, а҃-й а҆нтїфѡ́нъ д҃-гѡ гла́са. Прокі́менъ, гла́съ д҃: Во всю̀ зе́млю: Сті́хъ: Нб҃са̀ повѣ́даютъ: Всѧ́кое дыха́нїе: Є҆ѵⷢ҇лїе і҆ѡа́нна, зача́ло ѯ҃з: Ꙗ҆ви́сѧ і҆и҃съ ᲂу҆ч҃нкѡ́мъ свои̑мъ: По н҃-мъ ѱалмѣ̀ стїхи́ра, гла́съ ѕ҃: И҆́же бж҃е́ственнагѡ дх҃а: Канѡ́нъ пра́здника, со і҆рмосо́мъ на ѕ҃, и҆ а҆пⷭ҇ла на и҃. Катава́сїа пра́здника. По г҃-й пѣ́сни, конда́къ и҆ і҆́косъ пра́здника: и҆ сѣда́ленъ а҆пⷭ҇ла два́жды, гла́съ г҃. Подо́бенъ: Бж҃е́ственныѧ вѣ́ры: Сла́ва, и҆ ны́нѣ, пра́здника. По ѕ҃-й пѣ́сни,
Конда́къ а҆пⷭ҇ла, гла́съ в҃. Подо́бенъ: Твє́рдыѧ:
И҆звѣ́стнѡ премꙋ́дрости ᲂу҆чє́нїѧ въ дꙋша́хъ бл҃гоче́ствꙋющихъ поло́жшаго, во хвале́нїи ᲂу҆бл҃жи́мъ, ꙗ҆́кѡ бг҃оглаго́ливаго всѝ сі́мѡна: прⷭ҇то́лꙋ бо сла́вы ны́нѣ предстои́тъ, и҆ со безпло́тными весели́тсѧ, молѧ́сѧ непреста́ннѡ ѡ҆ всѣ́хъ на́съ.
И҆ і҆́косъ, и҆ про́логъ. По ѳ҃-й пѣ́сни, свѣти́ленъ а҆пⷭ҇ла, два́жды. Подо́бенъ: Дх҃омъ во ст҃и́лищи: Сла́ва, и҆ ны́нѣ, пра́здника. На хвали́техъ стїхи̑ры пра́здника г҃, и҆ а҆пⷭ҇ла г҃, гла́съ и҃. Подо́бенъ: Что̀ вы̀ нарече́мъ: Сла́ва, гла́съ в҃: Ѡ҆ста́вивъ земна̑ѧ: И҆ ны́нѣ, пра́здника. Славосло́вїе вели́кое. По трист҃о́мъ тропа́рь а҆пⷭ҇ла. Сла́ва, и҆ ны́нѣ, пра́здника. Є҆ктєнїѝ, и҆ ѿпꙋ́стъ, и҆ ча́съ а҃-й. На лїтꙋргі́и, бл҃жє́нна на и҃, ѿ канѡ́на пра́здника, пѣ́снь рѧдова́ѧ: <<та҃і ѡ҆б.: 622>> и҆ а҆пⷭ҇ла, пѣ́снь ѕ҃-ѧ. Прокі́менъ, гла́съ и҃: Во всю̀ зе́млю: Сті́хъ: Нб҃са̀ повѣ́даютъ: А҆по́столъ къ корі́нѳѧнѡмъ, зача́ло рл҃а: Бг҃ъ ны̀ посла́нники: А҆ллилꙋ́їа, гла́съ а҃: И҆сповѣ́дѧтъ нб҃са̀ чꙋдеса̀ твоѧ̑ гдⷭ҇и: Є҆ѵⷢ҇лїе матѳе́а, зача́ло н҃ѕ: Прїи́де і҆и҃съ во ѻ҆те́чествїе своѐ: Прича́стенъ: Во всю̀ зе́млю:
а҃і. Ѡ҆бновле́нїе царѧ̀ гра́да: И҆ ст҃а́гѡ сщ҃енномч҃нка мѡкі́а.
Стїхи̑ры, гла́съ д҃. Подо́бенъ: Ꙗ҆́кѡ до́блѧ: Сла́ва, и҆ ны́нѣ, пра́здника. Тропа́рь, гла́съ д҃: И҆ нра́вѡмъ прича́стникъ: септе́мврїа въ г҃-й де́нь. На ᲂу҆́трени, канѡ́нъ, гла́съ д҃. По г҃-й пѣ́сни,
Конда́къ, гла́съ в҃. Подо́бенъ: Твє́рдыѧ:
Воѡрꙋжи́всѧ щито́мъ вѣ́ры, нечести́выхъ ѡ҆полчє́нїѧ сте́рлъ є҆сѝ сщ҃енномч҃нче, и҆ вѣне́цъ ѿ хрⷭ҇та̀ взѧ́лъ є҆сѝ мѡкі́е: тѣ́мъ и҆ со а҆́гг҃лы ра́дꙋѧсѧ, сп҃са́й ѿ бѣ́дъ пою́щыѧ тѧ̀, молѧ̀ непреста́ннѡ ѡ҆ всѣ́хъ на́съ.
Сѣда́ленъ, гла́съ д҃. По ѕ҃-й пѣ́сни, конда́къ пра́здника. На лїтꙋргі́и, прокі́менъ, гла́съ з҃: Возвесели́тсѧ првⷣникъ: Сті́хъ: Оу҆слы́ши бж҃е: А҆по́столъ къ тїмоѳе́ю, зача́ло сч҃в: Ча́до тїмоѳе́е, возмога́й: Є҆ѵⷢ҇лїе і҆ѡа́нна, зача́ло н҃а: Ꙗ҆́коже возлюби́ мѧ ѻ҆ц҃ъ: Прича́стенъ: Въ па́мѧть вѣ́чнꙋю:
И҆ и҆̀же во ст҃ы́хъ ѻ҆тє́цъ на́шихъ, равноапⷭ҇льныхъ меѳо́дїа и҆ кѷрі́лла, ᲂу҆чи́телей слове́нскихъ.
Тропа́рь, гла́съ д҃:
Ꙗ҆́кѡ а҆пⷭ҇лѡмъ є҆динонра́внїи и҆ слове́нскихъ стра́нъ ᲂу҆чи́телїе, кѷрі́лле и҆ меѳо́дїе бг҃омꙋ́дрїи, влⷣкꙋ всѣ́хъ моли́те, всѧ̑ ꙗ҆зы́ки <<тв҃і: 623>> словє́нскїѧ ᲂу҆тверди́ти въ правосла́вїи и҆ є҆диномы́слїи, ᲂу҆мири́ти мі́ръ, и҆ сп҃стѝ дꙋ́шы на́шѧ.
Конда́къ, гла́съ г҃:
Сщ҃е́ннꙋю дво́ицꙋ просвѣти́телей на́шихъ почти́мъ, бж҃е́ственныхъ писа́нїй преложе́нїемъ и҆сто́чникъ бг҃опозна́нїѧ на́мъ и҆сточи́вшихъ, и҆з̾ негѡ́же да́же до дне́сь неѡскꙋ́днѡ почерпа́юще, ᲂу҆бл҃жа́емъ ва́съ, кѷрі́лле и҆ меѳо́дїе, прⷭ҇то́лꙋ вы́шнѧгѡ предстоѧ́щихъ и҆ те́плѣ молѧ́щихсѧ ѡ҆ дꙋша́хъ на́шихъ.
в҃і. И҆̀же во ст҃ы́хъ ѻ҆тє́цъ на́шихъ, є҆пїфа́нїа є҆пⷭ҇кпа кѵ́прскагѡ и҆ ге́рмана патрїа́рха кѡнстантїнопо́льскагѡ.
Стїхи̑ры є҆пїфа́нїа г҃, гла́съ є҃. Подо́бенъ: Ра́дꙋйсѧ: и҆ ге́рмана г҃, гла́съ а҃. Подо́бенъ: Всехва́льнїи: Сла́ва, и҆ ны́нѣ, пра́здника. Тропа́рь, гла́съ д҃: Бж҃е ѻ҆тє́цъ на́шихъ: ное́мврїа въ к҃-й де́нь. Сла́ва, и҆ ны́нѣ, пра́здника. На ᲂу҆́трени, канѡ́нъ є҆пїфа́нїа, гла́съ а҃: и҆ ге́рмана, гла́съ то́йже. По г҃-й пѣ́сни, конда́къ и҆ і҆́косъ пра́здника, и҆ сѣда́ленъ є҆пїфа́нїа, гла́съ и҃. Сла́ва, ге́рмана, гла́съ то́йже: И҆ ны́нѣ, пра́здника. По ѕ҃-й пѣ́сни,
Конда́къ, гла́съ д҃. Подо́бенъ: Вознесы́йсѧ:
Сщ҃еннонача̑льникъ чꙋ́днꙋю дво́ицꙋ восхва́лимъ вѣ́рнїи по до́лгꙋ, съ ге́рманомъ бж҃е́ственнаго є҆пїфа́нїа: сі́и бо попали́ша безбо́жныхъ ѧ҆зы́ки, догма́ты премꙋ́дрѣйшыѧ возло́жше всѣ̑мъ, правосла́внѡ пою́щымъ при́снѡ бл҃гоче́стїѧ вели́кое та́инство.
И҆ і҆́косъ. По ѳ҃-й пѣ́сни, свѣти́ленъ ст҃ы́хъ: Сла́ва, и҆ ны́нѣ, пра́здника. На лїтꙋргі́и, прокі́менъ, гла́съ а҃: Оу҆ста̀ моѧ̑ возглаго́лютъ премꙋ́дрость: Сті́хъ: Оу҆слы́шите сїѧ̑ всѝ ꙗ҆зы́цы: А҆по́столъ ко є҆вре́ємъ, зача́ло ти҃і. Тако́въ на́мъ: А҆ллилꙋ́їа, гла́съ в҃: Оу҆ста̀ првⷣнагѡ поꙋча́тсѧ <<тв҃і ѡ҆б.: 624>> премꙋ́дрости: Сті́хъ: Зако́нъ бг҃а є҆гѡ̀ въ се́рдцѣ є҆гѡ̀: Є҆ѵⷢ҇лїе матѳе́а, зача́ло а҃і: Вы̀ є҆стѐ свѣ́тъ мі́ра: Прича́стенъ: Въ па́мѧть:
г҃і. Ст҃ы́ѧ мч҃нцы глѷке́рїи:
Стїхи̑ры, гла́съ и҃. Подо́бенъ: Мч҃нцы твоѝ: Сла́ва, и҆ ны́нѣ, пра́здника. Тропа́рь, гла́съ д҃: А҆́гница твоѧ̀ і҆и҃се: септе́мврїа въ ѕ҃і-й де́нь. На ᲂу҆́трени, канѡ́нъ, гла́съ и҃. По г҃-й пѣ́сни,
Конда́къ, гла́съ г҃. Подо́бенъ: Дв҃а дне́сь:
Дв҃ꙋ лю́бѧщи и҆ бцⷣꙋ мр҃і́ю, соблюла̀ є҆сѝ нетлѣ́нно твоѐ дв҃ство: любо́вїю же ко гдⷭ҇ꙋ ᲂу҆се́рдствовавши, пострада́ла є҆сѝ мꙋжемꙋ́дреннѡ да́же до сме́рти. сегѡ̀ ра́ди и҆ сꙋгꙋ́бымъ тѧ̀ дѣ́во мч҃нце вѣнце́мъ вѣнча́етъ хрⷭ҇то́съ бг҃ъ.
И҆ сѣда́ленъ, гла́съ д҃: Сла́ва, и҆ ны́нѣ, пра́здника. По ѕ҃-й пѣ́сни, конда́къ и҆ і҆́косъ пра́здника.
д҃і. Ст҃а́гѡ мч҃нка і҆сі́дѡра, и҆́же во ѻ҆́стровѣ хі́осѣ.
Стїхи̑ры, гла́съ д҃. Подо́бенъ: Да́лъ є҆сѝ зна́менїе: Тропа́рь, гла́съ д҃: Мч҃нкъ тво́й гдⷭ҇и і҆сі́дѡръ: септе́мврїа во в҃-й де́нь. На ᲂу҆́трени, канѡ́нъ, гла́съ и҃. По г҃-й пѣ́сни,
Конда́къ ст҃а́гѡ, гла́съ д҃: Подо́бенъ: Ꙗ҆ви́лсѧ є҆сѝ:
Оу҆пра́витель превели́кїй вселе́ннѣй ты̀ ꙗ҆ви́лсѧ є҆сѝ свѧ́те, твои́ми къ бг҃ꙋ мл҃твами: тѣ́мже воспѣва́емъ тѧ̀ дне́сь, мч҃нче бг҃омꙋ́дре і҆сі́дѡре пресла́вне.
И҆ сѣда́ленъ, гла́съ г҃: Сла́ва, и҆ ны́нѣ, пра́здника. По ѕ҃-й пѣ́сни, конда́къ и҆ і҆́косъ пра́здника.
<<тг҃і: 625>>
Въ то́йже де́нь ст҃а́гѡ і҆сі́дѡра, хрⷭ҇та̀ ра́ди ю҆ро́дивагѡ, росто́вскагѡ чꙋдотво́рца.
Соверша́етсѧ собо́ръ є҆гѡ̀ въ росто́вѣ, съ разсꙋжде́нїемъ та́мошнѧгѡ а҆рхїере́а.
Тропа́рь, гла́съ д҃:
Просвѣти́всѧ бж҃е́ственною бл҃года́тїю бг҃омꙋ́дре, цѣломꙋ́дрїемъ мно́гимъ и҆ терпѣ́нїемъ, во вре́меннѣй жи́зни тече́нїе до́брѣ сконча́лъ є҆сѝ. тѣ́мъ и҆ по сме́рти ꙗ҆ви́ тѧ свѣ́тлость житїѧ̀ твоегѡ̀: и҆сточа́еши бо и҆сцѣле́нїй бл҃года́ть, и҆̀же съ вѣ́рою притека́ющымъ ко ст҃о́мꙋ твоемꙋ̀ гро́бꙋ, і҆сі́дѡре бл҃же́нне, молѝ хрⷭ҇та̀ бг҃а, да сп҃се́тъ дꙋ́шы на́шѧ.
Конда́къ, гла́съ и҃. Подо́бенъ: Взбра́нной:
Взбра́нномꙋ и҆ ди́вномꙋ въ пра́ведницѣхъ, и҆́же ᲂу҆́бѡ ѿ хрⷭ҇та̀ да́ръ чꙋде́съ прїи́мшемꙋ, похва̑льныѧ ны́нѣ принесе́мъ глаго́лы: но ꙗ҆́кѡ и҆мѣ́ѧ дерзнове́нїе ко ст҃ѣ́й трⷪ҇цѣ, ю҆́же молѝ и҆зба́витисѧ ѿ бѣ́дъ рабѡ́мъ твои̑мъ, да зове́мъ тѝ: ра́дꙋйсѧ бг҃омꙋ́дре і҆сі́дѡре.
є҃і. Прпⷣбнагѡ ѻ҆тца̀ на́шегѡ пахѡ́мїа вели́кагѡ.
Стїхи̑ры пра́здника, г҃, и҆ прпⷣбнагѡ г҃, гла́съ ѕ҃. Подо́бенъ: Всю̀ ѿложи́вше: Сла́ва, гла́съ то́йже, самогла́сенъ. Є҆́же по ѡ҆́бразꙋ соблю́дъ: И҆ ны́нѣ, пра́здника. На стїхо́внѣ пра́здника. Сла́ва, ст҃а́гѡ, гла́съ ѕ҃: Прпⷣбне ѻ҆́тче, во всю̀ зе́млю: И҆ ны́нѣ, пра́здника. Тропа́рь, гла́съ и҃: Сле́зъ твои́хъ тече́ньми: септе́мврїа въ г҃-й де́нь. Сла́ва, и҆ ны́нѣ, пра́здника. На ᲂу҆́трени, канѡ́нъ пра́здника, со і҆рмосо́мъ на ѕ҃, и҆ ст҃а́гѡ на ѕ҃, гла́съ в҃. По г҃-й пѣ́сни, конда́къ пра́здника и҆ сѣда́ленъ, гла́съ и҃, два́жды. Сла́ва, и҆ ны́нѣ, пра́здника. По ѕ҃-й пѣ́сни,
<<тг҃і ѡ҆б.: 626>>
Конда́къ, гла́съ в҃. Подо́бенъ: Вы́шнихъ и҆щѧ̀:
Свѣти́льникъ свѣ́телъ показа́лсѧ є҆сѝ въ концѣ́хъ: пꙋсты́ню же гра́ды сотвори́лъ є҆сѝ мно́жествы мона́шескими, са́мъ себѐ распе́нъ, крⷭ҇тъ тво́й на ра́мо взе́мъ, и҆ воздержа́нїемъ тѣ́ло и҆знꙋри́лъ є҆сѝ, молѧ̀ непреста́ннѡ ѡ҆ всѣ́хъ на́съ.
И҆ і҆́косъ. По ѳ҃-й пѣ́сни, свѣти́ленъ ст҃а́гѡ, два́жды: Сла́ва, и҆ ны́нѣ, пра́здника. На стїхо́внѣ пра́здника: Сла́ва, ст҃а́гѡ, гла́съ и҃: Мона́хѡвъ мно́жєства: И҆ ны́нѣ, пра́здника. На лїтꙋргі́и, бл҃жє́нна пра́здника, пѣ́снь рѧдова́ѧ: и҆ ст҃а́гѡ, пѣ́снь г҃. Прокі́менъ, гла́съ з҃: Чⷭ҇тна̀ пред̾ гдⷭ҇емъ: Сті́хъ: Что̀ возда́мъ гдⷭ҇еви: А҆по́столъ къ корі́нѳѧнѡмъ: зача́ло рѻ҃ѕ: Бг҃ъ рекі́й и҆з̾ тьмы̀ свѣ́тꙋ возсїѧ́ти: А҆ллилꙋ́їа, гла́съ ѕ҃: Бл҃же́нъ мꙋ́жъ боѧ́йсѧ гдⷭ҇а: Сті́хъ: Си́льно на землѝ: Є҆ѵⷢ҇лїе лꙋкѝ, зача́ло ѻ҃з: И҆дѧ́хꙋ со і҆и҃сомъ наро́ди: Прича́стенъ: Въ па́мѧть:
Въ то́йже де́нь, и҆́же во ст҃ы́хъ ѻ҆тца̀ на́шегѡ и҆са́їи є҆пⷭ҇кпа, росто́вскагѡ чꙋдотво́рца.
Соверша́етсѧ собо́ръ є҆гѡ̀, и҆дѣ́же лежа́тъ мо́щи є҆гѡ̀, и҆ и҆дѣ́же хра́мъ є҆гѡ̀.
Тропа́рь, гла́съ и҃:
Правосла́вїѧ наста́вниче, бл҃гоче́стїѧ ᲂу҆чи́телю и҆ чистоты̀, росто́вꙋ пресвѣ́тлый свѣти́льниче, ст҃и́телємъ бг҃одохнове́нное ᲂу҆добре́нїе, и҆са́їе премꙋ́дре: ᲂу҆че́нїемъ бо твои́мъ всѧ̑ рѡссі̑йскїѧ концы̀ просвѣти́лъ є҆сѝ бл҃года́тїю дх҃о́вною, ст҃и́телю бл҃же́нне, молѝ хрⷭ҇та̀ бг҃а, да сп҃се́тъ дꙋ́шы на́шѧ.
Конда́къ, гла́съ г҃. Подо́бенъ: Дв҃а дне́сь:
Ꙗ҆́кѡ гро́мъ возгремѣ́лъ є҆сѝ бж҃е́ственными твои́ми ᲂу҆че́нїи въ рѡссі́йстѣй землѝ, и҆ ꙗ҆ви́лсѧ є҆сѝ свѣти́льникъ пресвѣ́телъ, ѡ҆сїѧ́ѧ свѣ́томъ бг҃оразꙋ́мїѧ, и҆са́їе бл҃же́нне. тѣ́мже вопїе́мъ тѝ: хрⷭ҇та̀ бг҃а молѝ непреста́ннѡ ѡ҆ всѣ́хъ на́съ.
<<тд҃і: 627>>
И҆ ᲂу҆бїе́нїе ст҃а́гѡ бл҃говѣ́рнагѡ царе́вича кн҃зѧ дими́трїа моско́вскагѡ, и҆ всеѧ̀ рѡссі́и но́вагѡ чꙋдотво́рца.
Тропа́рь, гла́съ в҃:
Ца́рскꙋю дїаді́мꙋ ѡ҆багри́лъ є҆сѝ кро́вїю твое́ю бг҃омꙋ́дре мч҃нче, за ски́птръ крⷭ҇тъ въ рꙋкꙋ̀ прїи́мъ, ꙗ҆ви́лсѧ є҆сѝ побѣдоно́сецъ, и҆ же́ртвꙋ непоро́чнꙋ влⷣцѣ прине́слъ є҆сѝ себѐ: ꙗ҆́кѡ бо а҆́гнецъ неѕло́бивъ ѿ раба̀ заколе́нъ є҆сѝ: и҆ ны́нѣ ра́дꙋѧсѧ предстои́ши ст҃ѣ́й трⷪ҇цѣ, моли́сѧ ѡ҆ держа́вѣ сро́дникѡвъ твои́хъ бг҃оꙋго́днѣй бы́ти, и҆ сыновѡ́мъ рѡссі̑йскимъ сп҃сти́сѧ.
Конда́къ, гла́съ и҃.
Возсїѧ̀ дне́сь въ сла́внѣй па́мѧти твое́й вѣ̑рнымъ весе́лїе, ꙗ҆́кѡ бо доброра́сленный гре́знъ прозѧ́блъ є҆сѝ, и҆ хрⷭ҇тꙋ̀ красе́нъ пло́дъ прине́слъ є҆сѝ себѐ. тѣ́мже и҆ по ᲂу҆бїе́нїи твое́мъ соблюдѐ тѣ́ло твоѐ нетлѣ́нно страда́льчески ѡ҆багре́ное кро́вїю, бл҃горо́дне свѧ́те дими́трїе, соблюда́й ѻ҆те́чество твоѐ, и҆ гра́дъ тво́й невреди́мь: томꙋ́ бо є҆сѝ ᲂу҆твержде́нїе.
ѕ҃і. Прпⷣбнагѡ ѻ҆тца̀ на́шегѡ ѳео́дѡра ѡ҆сщ҃е́ннагѡ, ᲂу҆ченика̀ прпⷣбнагѡ пахѡ́мїа вели́кагѡ.
Стїхи̑ры, гла́съ ѕ҃. Подо́бенъ: Всю̀ ѿложи́вше: Сла́ва, и҆ ны́нѣ, пра́здника. Тропа́рь, гла́съ а҃: Пꙋсты́нный жи́тель: септе́мврїа въ к҃ѳ-й де́нь. На ᲂу҆́трени, канѡ́нъ, гла́съ в҃. По г҃-й пѣ́сни,
Конда́къ, гла́съ в҃. Подо́бенъ: Вы́шнихъ и҆щѧ̀:
Въ домꙋ̀ бж҃їи ꙗ҆́кѡ фі́нїѯъ процвѣ́лъ є҆сѝ, плоды́ же добродѣ́телей гдⷭ҇еви прине́слъ, поще́нїемъ и҆зрѧ́днымъ ѻ҆́тче прпⷣбне: тѣ́мже и҆ ᲂу҆бл҃жа́ешисѧ, ꙗ҆́кѡ безпло́тныхъ равностоѧ́теленъ.
Сѣда́ленъ, гла́съ г҃: Сла́ва, и҆ ны́нѣ, пра́здника. По ѕ҃-й пѣ́сни, конда́къ и҆ і҆́косъ пра́здника.
<<тд҃і ѡ҆б.: 628>>
И҆ прпⷣбнагѡ ѻ҆тца̀ на́шегѡ є҆фре́ма переко́мскагѡ, новогоро́дскагѡ чꙋдотво́рца.
Тропа́рь, гла́съ д҃:
Ѿ ю҆́ности твоеѧ̀ ве́сь бг҃ови порабо́тилсѧ є҆сѝ бл҃же́нне: и҆ тогѡ̀ ра́ди любвѐ ѻ҆те́чество и҆ ро́дъ ѡ҆ста́вилъ є҆сѝ въ пꙋсты́ню всели́всѧ, въ не́йже жесто́кое житїѐ показа́въ, и҆ чꙋде́съ дарова̑нїѧ ѿ бг҃а прїѧ́лъ є҆сѝ є҆фре́ме прпⷣбне, молѝ хрⷭ҇та̀ бг҃а, да сп҃се́тъ дꙋ́шы на́шѧ.
Конда́къ, гла́съ и҃. Подо́бенъ: Взбра́нной:
А҆́гг҃льскомꙋ житїю̀ поревнова́въ прпⷣбне, всѧ̑ земна̑ѧ ѡ҆ста́вивъ ко хрⷭ҇тꙋ̀ прите́клъ є҆сѝ: и҆ тогѡ̀ за́повѣдьми ѡ҆гра́ждсѧ, ꙗ҆ви́лсѧ є҆сѝ сто́лпъ непоколеби́мь ѿ вра́жїихъ напа́данїй. тѣ́мъ зове́мъ тѝ: ра́дꙋйсѧ є҆фре́ме, свѣти́ло пресвѣ́тлое.
з҃і. Ст҃а́гѡ а҆пⷭ҇ла а҆ндроні́ка, и҆ и҆̀же съ ни́мъ.
Ѿ сегѡ̀ днѐ начина́етсѧ по́стъ ст҃ы́хъ а҆пⷭ҇лъ, є҆гда̀ клю́чь пасха́лїи бꙋ́детъ, А.
Стїхи̑ры, гла́съ и҃. Подо́бенъ: Ѽ пресла́внагѡ чꙋдесѐ! Тропа́рь, гла́съ г҃: А҆пⷭ҇ли ст҃і́и: ѻ҆ктѡ́врїа въ л҃а-й де́нь. На ᲂу҆́трени, канѡ́нъ, на д҃. По г҃-й пѣ́сни,
Конда́къ, гла́съ в҃. Подо́бенъ: Вы́шнихъ и҆щѧ̀:
Ѕвѣздꙋ̀ пресвѣ́тлꙋю, бг҃оразꙋ́мїѧ свѣ́томъ просвѣ́щшаго ꙗ҆зы́ки, а҆пⷭ҇ла хрⷭ҇то́ва а҆ндроні́ка восхва́лимъ, и҆ съ ни́мъ во бл҃говѣ́стїи потрꙋди́вшꙋюсѧ і҆ꙋ́нїю премꙋ́дрꙋю, вопїю́ще: моли́те хрⷭ҇та̀ бг҃а непреста́ннѡ ѡ҆ всѣ́хъ на́съ.
И҆ сѣда́ленъ, гла́съ д҃: Сла́ва, и҆ ны́нѣ, пра́здника. По ѕ҃-й пѣ́сни, конда́къ и҆ і҆́косъ пра́здника. По ѳ҃-й пѣ́сни, свѣти́ленъ пра́здника.
<<тє҃і: 629>>
и҃і. Ст҃а́гѡ мч҃нка ѳеодо́та, и҆́же во а҆гкѵ́рѣ: И҆ ст҃ы́хъ мч҃нкъ, петра̀, дїонѵ́сїа, и҆ и҆̀же съ ни́ми: И҆ ст҃ы́хъ седмѝ дѣ́въ.
Стїхи̑ры, гла́съ а҃. Подо́бенъ: Нбⷭ҇ныхъ чинѡ́въ: и҆ мч҃нкѡвъ, гла́съ д҃. Подо́бенъ: Да́лъ є҆сѝ зна́менїе: Сла́ва, и҆ ны́нѣ, бг҃оро́диченъ: и҆лѝ пра́здника. На стїхо́внѣ трїѡ́ди, и҆лѝ ѻ҆ктѡ́иха. На ᲂу҆́трени, канѡ́нъ ѳеодо́та, гла́съ д҃: и҆ мч҃нкѡвъ, гла́съ то́йже. По г҃-й пѣ́сни,
Конда́къ, гла́съ в҃. Подо́бенъ: Вы́шнихъ и҆щѧ̀:
Страда́льчески подвиза́всѧ до́брѣ, со страда́льцы твои́ми ѳеодо́те, и҆ вѣнцы̀ по́чести прїѧ́сте, съ честны́ми стрⷭ҇тоте́рпицами дѣ́вами: тѣ́мже хрⷭ҇та̀ бг҃а моли́те непреста́ннѡ ѡ҆ всѣ́хъ на́съ.
И҆ сѣда́ленъ ѳеодо́та, гла́съ д҃: Сла́ва, мч҃нкѡвъ, гла́съ и҃: И҆ ны́нѣ, бг҃оро́диченъ, и҆лѝ пра́здника. По ѕ҃-й пѣ́сни, конда́къ и҆ і҆́косъ пра́здника.
ѳ҃і. Ст҃а́гѡ сщ҃енномч҃нка патрїкі́а, є҆пⷭ҇кпа прꙋ́сскагѡ, и҆ дрꙋжи́ны є҆гѡ̀.
А҆ллилꙋ́їа. Стїхи̑ры, гла́съ ѕ҃. Подо́бенъ: Всю̀ ѿложи́вше: Сла́ва, и҆ ны́нѣ, пра́здника, и҆лѝ бг҃оро́диченъ. На ᲂу҆́трени, канѡ́нъ, гла́съ и҃. По г҃-й пѣ́сни,
Конда́къ, гла́съ д҃. Подо́бенъ: Ꙗ҆ви́лсѧ є҆сѝ дне́сь:
Ꙗ҆́кѡ свѣтосїѧ́ненъ добро́тою сщ҃е́нства, и҆ мꙋче́нїѧ кро́вїю преꙋкра́шенъ съ пострада́вшими съ тобо́ю патрїкі́е хрⷭ҇тꙋ̀ предстоѧ̀, ѡ҆ на́съ помина́й, ꙗ҆́кѡ страда́лецъ честны́й.
И҆ сѣда́ленъ, гла́съ и҃. Сла́ва, и҆ ны́нѣ, пра́здника, и҆лѝ бг҃оро́диченъ. По ѕ҃-й пѣ́сни, конда́къ пра́здника.
И҆ прпⷣбнагѡ ѻ҆тца̀ на́шегѡ корни́лїа чꙋдотво́рца коме́льскагѡ.
<<тє҃і ѡ҆б.: 630>>
Тропа́рь, гла́съ д҃:
Ѿ ю҆́ности горѧ́щимъ жела́нїемъ бж҃е́ственныѧ любвѐ разжига́емь, житє́йскїѧ мѡлвы̀ ѡ҆ста́вилъ є҆сѝ прпⷣбне, ревни́тель а҆нтѡ́нїю вели́комꙋ бы́сть, безмо́лвїемъ и҆ жесто́кимъ пребыва́нїемъ послѣ́дꙋѧ хрⷭ҇тꙋ̀, бдѣ́нїемъ и҆ мл҃твами и҆ посто́мъ ѡ҆́бразъ бы́въ свои̑мъ ᲂу҆ченикѡ́мъ. тѣ́мже моли́сѧ гдⷭ҇еви корни́лїе бл҃же́нне, сп҃сти́сѧ дꙋша́мъ на́шымъ.
Конда́къ, гла́съ и҃:
Гдⷭ҇еви ѿ ст҃ы́ѧ дв҃ы возсїѧ́вшꙋ мі́рови, и҆ томꙋ̀ и҆змла́да ꙗ҆́кѡ а҆́гг҃лъ послꙋжи́лъ є҆сѝ бл҃же́нне, и҆ си́лою є҆гѡ̀ пꙋсты́ню ꙗ҆́кѡ гра́дъ сотвори́лъ є҆сѝ: мно́жество же ᲂу҆чєни́къ въ не́й собра́лъ є҆сѝ, и҆̀хже бг҃одохнове́нными ᲂу҆че́ньми просвѣти́лъ є҆сѝ. тѣ́мъ вопїе́мъ тѝ: ра́дꙋйсѧ ѻ҆́тче на́шъ корни́лїе, и҆́нокѡмъ бж҃е́ственное ᲂу҆добре́нїе.
к҃. Ст҃а́гѡ мч҃нка ѳалале́а.
Стїхи̑ры, гла́съ д҃. Подо́бенъ: Ꙗ҆́кѡ до́блѧ: Сла́ва, и҆ ны́нѣ, бг҃оро́диченъ, и҆лѝ пра́здника. Тропа́рь, гла́съ д҃: Мч҃нкъ тво́й гдⷭ҇и: септе́мврїа во в҃-й де́нь. Канѡ́нъ, гла́съ и҃. По г҃-й пѣ́сни, сѣда́ленъ, гла́съ д҃. По ѕ҃-й пѣ́сни,
Конда́къ, гла́съ г҃. Подо́бенъ: Дв҃а дне́сь:
Мч҃нкѡмъ сострада́лецъ ꙗ҆́вльсѧ и҆ ѻ҆рꙋ́жникъ, во́инъ и҆зрѧ́дный цр҃ѧ̀ сла́вы бы́лъ є҆сѝ, и҆скꙋше́ньми и҆ мꙋ́кою: возвыше́нїе і҆дѡлослꙋжи́телей попра́лъ є҆сѝ, сегѡ̀ ра́ди честнꙋ́ю твою̀ пое́мъ па́мѧть, мꙋ́дре ѳалале́е.
И҆ і҆́косъ:
Ѡ҆брѣ́тенїе честны́хъ моще́й, и҆́же во ст҃ы́хъ ѻ҆тца̀ на́шегѡ а҆леѯі́а митрополі́та кі́евскагѡ и҆ всеѧ̀ рѡссі́и чꙋдотво́рца.
Бдѣ́нїе во ѻ҆би́тели є҆гѡ̀, и҆ въ вели́цѣй цр҃кви: повсю́дꙋ же полѷеле́й.
<<тѕ҃і: 631>>
Тропа́рь, гла́съ в҃:
Ꙗ҆́кѡ сокро́вище пребога́тое, многолѣ́тнѡ въ землѝ сокрове́нное, честны̑ѧ мо́щи твоѧ̑ ѡ҆брѣто́шасѧ чꙋдоточа́щыѧ, всебл҃же́нне ѻ҆́тче ст҃и́телю а҆леѯі́е: ѿ ни́хже врачевство̀ прїе́млюще ѡ҆богаща́емсѧ, и҆ хрⷭ҇та̀ славосло́вимъ глаго́люще: сла́ва прославлѧ́ющемꙋ ст҃ы̑ѧ своѧ̑.
И҆́нъ тропа́рь, гла́съ д҃:
А҆пⷭ҇льскихъ прее́мникѡвъ, а҆рхїере́євъ сопресто́льниче, рѡссі́и всеѧ̀ па́стырю и҆ ᲂу҆чи́телю, всебл҃же́нне ѻ҆́тче а҆леѯі́е, влⷣцѣ всѣ́хъ моли́сѧ, ми́ръ па́ствѣ твое́й дарова́ти, и҆ сп҃се́нїе дꙋша́мъ, и҆ ве́лїю млⷭ҇ть.
Конда́къ, гла́съ и҃:
Ꙗ҆́кѡ со́лнце незаходи́мое ѿ гро́ба возсїѧ̀ на́мъ, ѿ мнѡ́гъ лѣ́тъ сокрове́ны честны̑ѧ твоѧ̑ мо́щи нетлѣ́нны, ст҃и́телю а҆леѯі́е, тобо́ю бл҃года́ть прїе́млемъ: всю́ бо странꙋ̀ сїю̀, и҆ всѧ̑ ны̀ чꙋдесы̀ и҆ добро́тою ѡ҆богаща́еши, дѣ́йствомъ бл҃года́ти, да пое́мъ тѝ: ра́дꙋйсѧ ѻ҆́тче, свѣти́ло рѡссі́и.
к҃а. Ст҃ы́хъ вели́кихъ царе́й и҆ равноапⷭ҇лѡвъ кѡнстанті́на и҆ є҆ле́ны.
Ве́черъ, по ѻ҆бы́чномъ ѱалмѣ̀, пое́мъ: Бл҃же́нъ мꙋ́жъ, а҃-й а҆нтїфѡ́нъ. На Гдⷭ҇и воззва́хъ, стїхи̑ры пра́здника г҃: и҆ ст҃ы́хъ є҃, гла́съ д҃. Подо́бенъ: Да́лъ є҆сѝ зна́менїе: Сла́ва, гла́съ в҃: Бога́тыхъ дарѡ́въ: И҆ ны́нѣ, пра́здника, и҆лѝ бг҃оро́диченъ. Вхо́дъ. прокі́менъ днѐ: и҆ чтє́нїѧ ст҃ы́хъ: Ца́рствъ тре́тїихъ: Ста̀ соломо́нъ пред̾ лице́мъ же́ртвенника гдⷭ҇нѧ: Прⷪ҇ро́чества и҆са́їина: Да возра́дꙋетсѧ дꙋша̀ моѧ̀ ѡ҆ гдⷭ҇ѣ: Прⷪ҇ро́чества и҆са́їина же: Свѣти́сѧ, свѣти́сѧ і҆ерⷭ҇ли́ме: На лїті́и стїхи́ра хра́ма: и҆ ст҃ы́хъ, гла́съ а҃. Сла́ва, гла́съ є҃: Це́рковь дне́сь ᲂу҆краси́вшисѧ: И҆ ны́нѣ, пра́здника, и҆лѝ бг҃оро́диченъ. На стїхо́внѣ <<тѕ҃і ѡ҆б.: 632>> стїхи̑ры, гла́съ в҃. Подо́бенъ: Є҆гда̀ ѿ дре́ва: съ припѣ́вы: а҃-й припѣ́въ: Вознесо́хъ и҆збра́ннаго ѿ люде́й мои́хъ: в҃-й: Сегѡ̀ ра́ди пома́за тѧ̀ бж҃е бг҃ъ тво́й є҆ле́емъ ра́дости: Сла́ва, гла́съ и҃: Свѣ́тъ пресвѣ́тлый: И҆ ны́нѣ, пра́здника.
Тропа́рь, гла́съ и҃:
Крⷭ҇та̀ твоегѡ̀ ѡ҆́бразъ на нб҃сѝ ви́дѣвъ, и҆ ꙗ҆́коже па́ѵелъ зва́нїе не ѿ человѣ̑къ прїе́мъ, въ царѣ́хъ а҆пⷭ҇лъ тво́й гдⷭ҇и, ца́рствꙋющїй гра́дъ въ рꙋцѣ̀ твое́й положѝ: є҆го́же сп҃са́й всегда̀ въ ми́рѣ, мл҃твами бцⷣы, є҆ди́не чл҃вѣколю́бче.
На ᲂу҆́трени, на Бг҃ъ гдⷭ҇ь, тропа́рь пра́здника, два́жды: Сла́ва, ст҃ы́хъ: И҆ ны́нѣ, пра́здника. По а҃-й каѳі́смѣ сѣда́ленъ, гла́съ г҃, два́жды: Сла́ва, и҆ ны́нѣ, пра́здника, и҆лѝ бг҃оро́диченъ. По в҃-й каѳі́смѣ сѣда́ленъ, гла́съ ѕ҃, два́жды: Сла́ва, и҆ ны́нѣ, пра́здника. По полѷеле́и сѣда́ленъ, гла́съ д҃, два́жды: Сла́ва, и҆ ны́нѣ, пра́здника. Степє́нна, а҃-й а҆нтїфѡ́нъ д҃-гѡ гла́са. Прокі́менъ, гла́съ д҃: Вознесо́хъ и҆збра́ннаго ѿ люде́й мои́хъ: Сті́хъ: Сегѡ̀ ра́ди пома́за тѧ̀ бж҃е бг҃ъ тво́й: Всѧ́кое дыха́нїе: Є҆ѵⷢ҇лїе і҆ѡа́нна, зача́ло л҃ѕ. По н҃-мъ ѱалмѣ̀, Сла́ва, Мл҃твами бг҃овѣнча́нныхъ царе́й: И҆ ны́нѣ, Мл҃твами бцⷣы: Та́же, Поми́лꙋй мѧ̀ бж҃е: Посе́мъ стїхи́ра: Бл҃гочести́ваго кѡнстанті́на: и҆щѝ на лїті́и. Канѡ́нъ пра́здника на ѕ҃: и҆ ст҃ы́хъ на и҃, гла́съ и҃. Катава́сїа пра́здника: и҆лѝ: Ѿве́рзꙋ ᲂу҆ста̀ моѧ̑: По г҃-й пѣ́сни, конда́къ и҆ і҆́косъ пра́здника: та́же сѣда́ленъ ст҃ы́хъ, гла́съ и҃, два́жды: Сла́ва, и҆ ны́нѣ, пра́здника. По ѕ҃-й пѣ́сни,
Конда́къ, гла́съ г҃. Подо́бенъ: Дв҃а дне́сь:
Кѡнстанті́нъ дне́сь съ ма́терїю є҆ле́ною крⷭ҇тъ ꙗ҆влѧ́ютъ, всечⷭ҇тно́е дре́во, всѣ́хъ ᲂу҆́бѡ і҆ꙋде́ѡвъ посрамле́нїе сꙋ́ще, ѻ҆рꙋ́жїе же <<тз҃і: 633>> на проти̑вныѧ вѣ́рныхъ царе́й: на́съ бо ра́ди ꙗ҆ви́сѧ зна́менїе ве́лїе, и҆ во бранѣ́хъ гро́зное.
И҆ і҆́косъ. По ѳ҃-й пѣ́сни, свѣти́ленъ ст҃ы́хъ. Сла́ва, и҆́нъ: И҆ ны́нѣ, пра́здника, и҆лѝ бг҃оро́диченъ. На хвали́техъ стїхи̑ры пра́здника г҃: и҆ ст҃ы́хъ г҃, гла́съ и҃. Подо́бенъ: Ѽ пресла́внагѡ чꙋдесѐ! Сла́ва, гла́съ и҃. Цр҃ь царе́й, и҆ бг҃ъ: И҆ ны́нѣ, пра́здника. Славосло́вїе вели́кое. Є҆ктєнїѝ, и҆ ѿпꙋ́стъ. На лїтꙋргі́и, бл҃жє́нна пра́здника, пѣ́снь рѧдова́ѧ: и҆ ст҃ы́хъ, пѣ́снь ѕ҃, на д҃. Прокі́менъ, гла́съ и҃. Во всю̀ зе́млю: Сті́хъ: Нб҃са̀ повѣ́даютъ сла́вꙋ бж҃їю: А҆по́столъ къ гала́тѡмъ, зача́ло г҃. А҆́ще же пѧтидесѧ́тница, а҆по́столъ дѣѧ́нїй, зача́ло м҃ѳ. А҆ллилꙋ́їа, гла́съ а҃: Вознесо́хъ и҆збра́ннаго ѿ люде́й мои́хъ. Сті́хъ: Гдⷭ҇и си́лою твое́ю возвесели́тсѧ цр҃ь: Є҆ѵⷢ҇лїе і҆ѡа́нна, зача́ло л҃є, ѿ полꙋ̀. Прича́стенъ: Во всю̀ зе́млю:
[зрѝ] Вѣ́стно бꙋ́ди, а҆́ще слꙋчи́тсѧ па́мѧть ст҃а́гѡ цр҃ѧ̀ кѡнстанті́на въ четверто́къ вознесе́нїѧ, и҆лѝ въ недѣ́лю з҃-ю ст҃ы́хъ ѻ҆тє́цъ, слꙋ́жбꙋ є҆гѡ̀ пѣ́ти ꙗ҆́коже і҆ѡа́ннꙋ бг҃осло́вꙋ по тѣ̑мже глава́мъ.
Въ то́йже де́нь пра́зднꙋемъ срѣ́тенїе чꙋдотво́рныѧ і҆кѡ́ны прест҃ы́ѧ бцⷣы влади́мїрскїѧ.
Тропа́рь, гла́съ д҃:
Дне́сь свѣ́тлѡ красꙋ́етсѧ сла́внѣйшїй гра́дъ москва̀, ꙗ҆́кѡ зарю̀ со́лнечнꙋю воспрїе́мши влⷣчце, чꙋдотво́рнꙋю твою̀ і҆кѡ́нꙋ, къ не́йже ны́нѣ мы̀ притека́юще, и҆ молѧ́щесѧ тебѣ̀, взыва́емъ си́це: пречꙋ́днаѧ влⷣчце бцⷣе, моли́сѧ и҆з̾ тебѐ воплоще́нномꙋ хрⷭ҇тꙋ̀ бг҃ꙋ на́шемꙋ, да и҆зба́витъ гра́дъ се́й, и҆ всѧ̑ гра́ды и҆ страны̑ хрїстїа̑нскїѧ невреди́мы ѿ всѣ́хъ навѣ̑тъ вра́жїихъ, и҆ сп҃се́тъ дꙋ́шы на́шѧ ꙗ҆́кѡ милосе́рдъ.
<<тз҃і ѡ҆б.: 634>>
Конда́къ, гла́съ и҃:
Взбра́нной воево́дѣ побѣди́тєльнаѧ, ꙗ҆́кѡ и҆зба́вльшесѧ ѿ ѕлы́хъ прише́ствїемъ твоегѡ̀ честна́гѡ ѡ҆́браза, влⷣчце бцⷣе, свѣ́тлѡ сотворѧ́емъ празднество̀ срѣ́тенїѧ твоегѡ̀, и҆ ѻ҆бы́чнѡ зове́мъ тѝ: ра́дꙋйсѧ невѣ́сто неневѣ́стнаѧ.
Въ то́йже де́нь па́мѧть ст҃а́гѡ бл҃говѣ́рнагѡ кн҃зѧ кѡнстанті́на и҆ ча̑дъ є҆гѡ̀, мїхаи́ла и҆ ѳео́дѡра, мꙋ́ромскихъ чꙋдотво́рцєвъ.
Собо́ръ и҆́хъ соверша́етсѧ въ мꙋ́ромѣ.
Тропа́рь, гла́съ д҃:
Кѡнстанті́нъ дне́сь ве́селѡ ликовствꙋ́етъ, предстоѧ̀ прⷭ҇то́лꙋ ст҃ы́ѧ трⷪ҇цы, ви́дѧ ѻ҆те́чествїе своѐ ма́стїю дх҃о́вною сїѧ́ющее: є҆мꙋ́же послѣ́доваша, мїхаи́лъ и҆ ѳео́дѡръ, сы́нове є҆гѡ̀, и҆ мо́лѧтсѧ всѝ трїѐ вкꙋ́пѣ ѡ҆ дꙋша́хъ на́шихъ.
Конда́къ, гла́съ и҃. Подо́бенъ: Взбра́нной:
И҆зрѧ́дномꙋ воево́дѣ, и҆ правовѣ́рномꙋ кн҃зю кѡнстанті́нꙋ, съ сыно́ма є҆гѡ̀ вкꙋ́пѣ, ѻ҆те́чество є҆гѡ̀ хва́лѧщисѧ вопїе́тъ, и҆мѣ́ющее є҆го̀ нача́льника и҆ застꙋ́пника, ꙗ҆́кѡ и҆зба́вльшеесѧ и҆́мъ ѿ пре́лести и҆ скве́рны і҆́дѡльскїѧ. сегѡ̀ ра́ди вопїе́мъ є҆мꙋ̀ си́це: ра́дꙋйсѧ кн҃же кѡнстанті́не пребл҃же́нне.
к҃в. Ст҃а́гѡ мч҃нка васїлі́ска:
А҆ллилꙋ́їа, и҆лѝ тропа́рь. Стїхи̑ры, гла́съ д҃. Подо́бенъ: Ꙗ҆́кѡ до́блѧ: Тропа́рь: Мч҃нкъ тво́й гдⷭ҇и: септе́мврїа во в҃-й де́нь. На ᲂу҆́трени, канѡ́нъ гла́съ и҃. По г҃-й пѣ́сни, сѣда́ленъ, гла́съ а҃-й. По ѕ҃-й пѣ́сни,
Конда́къ, гла́съ и҃. Подо́бенъ: Взбра́нной:
Во страда́нїи крѣ́покъ и҆ мꙋ́жественъ ꙗ҆ви́лсѧ є҆сѝ, и҆ въ чꙋдесѣ́хъ преди́венъ, ꙗ҆вле́ннѡ хрⷭ҇то́во и҆́мѧ предносѧ̀, мꙋчи́телѧ <<ти҃і: 635>> посрами́лъ є҆сѝ. тѣ́мъ тѧ̀ почита́емъ васїлі́ске, при́снѡ зовꙋ́ще всече́стне: ра́дꙋйсѧ мꙋ́ченикѡвъ свѣ́тлаѧ добро́то.
к҃г. Прпⷣбнагѡ ѻ҆тца̀ на́шегѡ и҆ и҆сповѣ́дника мїхаи́ла, є҆пⷭ҇кпа сѷна́дскагѡ.
Стїхи̑ры, гла́съ и҃. Подо́бенъ: Ѽ пресла́внагѡ чꙋдесѐ! Сла́ва, и҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. На ᲂу҆́трени, канѡ́нъ, гла́съ в҃. По г҃-й пѣ́сни, сѣда́ленъ, гла́съ а҃. По ѕ҃-й пѣ́сни,
Конда́къ, гла́съ и҃. Подо́бенъ: Ꙗ҆́кѡ нача́тки:
Ꙗ҆́кѡ а҆рхїере́й всече́стенъ, и҆ бл҃гоче́стїѧ сщ҃еннострада́лецъ, преще́нїѧ ѕлоимени́тагѡ не ᲂу҆боѧ́всѧ, є҆реті́ческое тогѡ̀ противле́нїе побѣди́лъ є҆сѝ, свобо́днымъ гла́сомъ велегла́снѡ вопїѧ̀: і҆кѡ́нѣ покланѧ́юсѧ хрⷭ҇то́вѣ, и҆ пречи́стыѧ є҆гѡ̀ мт҃ре: сегѡ̀ ра́ди тѧ̀ почита́емъ мїхаи́ле.
Въ то́йже де́нь ѡ҆брѣ́тенїе чⷭ҇тны́хъ моще́й, и҆́же во ст҃ы́хъ ѻ҆тца̀ на́шегѡ лео́нтїа є҆пⷭ҇кпа, росто́вскагѡ чꙋдотво́рца.
Соверша́етсѧ собо́ръ є҆гѡ̀, и҆дѣ́же лежа́тъ мо́щи є҆гѡ̀, и҆ и҆дѣ́же хра́мъ є҆гѡ̀.
Тропа́рь, гла́съ д҃:
А҆пⷭ҇лѡмъ соприча́стникъ, и҆ къ бг҃ꙋ моле́бникъ вѣ́ренъ, добродѣ́тельми возше́дъ на нбⷭ҇наѧ, и҆ любо́вь возложи́лъ є҆сѝ къ лю́бѧщемꙋ тѧ̀, и҆ невѣ̑рныѧ лю́ди ѡ҆брати́лъ є҆сѝ въ вѣ́рꙋ. тѣ́мъ ны́нѣ со а҆́гг҃лы ликꙋ́ѧ, предстои́ши престо́лꙋ сла́вы всѣ́хъ цр҃ѧ̀ хрⷭ҇та̀ бг҃а: моли́сѧ ст҃и́телю лео́нтїе, да сп҃се́тъ дꙋ́шы на́шѧ.
Конда́къ, гла́съ д҃. Подо́бенъ: Ꙗ҆ви́лсѧ є҆сѝ:
Житїѧ̀ ра́ди чистоты̀, всеви́децъ гдⷭ҇ь, свѣ́тъ сво́й насадѝ въ дꙋшѝ твое́й, вразꙋми́ти лю́ди мнѡ́гїѧ твои́ми ᲂу҆че́нїи, лео́нтїе прпⷣбне.
<<ти҃і ѡ҆б.: 636>>
к҃д. Прпⷣбнагѡ ѻ҆тца̀ на́шегѡ сѷмеѡ́на, и҆́же на ди́внѣй горѣ̀.
Стїхи̑ры ст҃а́гѡ на ѕ҃, гла́съ и҃. Подо́бенъ: Ѽ пресла́внагѡ чꙋдесѐ! Сла́ва, гла́съ ѕ҃: Ѻ҆́тче досточꙋ́дне: И҆ ны́нѣ, пра́здника, и҆лѝ бг҃оро́диченъ. На стїхо́внѣ днѐ. Сла́ва, гла́съ в҃: На горꙋ̀ высо́кꙋю: И҆ ны́нѣ, пра́здника, и҆лѝ бг҃оро́диченъ. По трист҃о́мъ тропа́рь, гла́съ а҃: Пꙋсты́нный жи́тель: септе́мврїа въ к҃ѳ- й де́нь. На ᲂу҆́трени, ѻ҆́ба канѡ́на ѻ҆ктѡ́иха, без̾ мꙋ́ченичнѡвъ. А҆́ще ли пѧтидесѧ́тница, канѡ́нъ пра́здника со і҆рмосо́мъ на ѕ҃: и҆ ст҃а́гѡ на ѕ҃: гла́съ и҃. По г҃-й пѣ́сни, сѣда́ленъ ст҃а́гѡ, гла́съ и҃, два́жды: Сла́ва, и҆ ны́нѣ, бг҃оро́диченъ. По ѕ҃-й пѣ́сни,
Конда́къ, гла́съ в҃. Подо́бенъ: Вы́шнихъ и҆щѧ̀:
Вы̑шнѧѧ жела́ѧ, дѡ́льнаѧ ѿложи́въ, и҆ ꙗ҆́кѡ нб҃о сто́лпъ содѣ́лавый: тѣ́мъ ѡ҆блиста́лъ є҆сѝ чꙋде́съ заре́ю прпⷣбне, и҆ хрⷭ҇тꙋ̀ всѣ́хъ бг҃ꙋ мо́лишисѧ непреста́ннѡ ѡ҆ всѣ́хъ на́съ.
И҆ і҆́косъ. По ѳ҃-й пѣ́сни, свѣти́ленъ ст҃а́гѡ. На стїхо́внѣ стїхи̑ры днѐ. Сла́ва, гла́съ ѕ҃: Прпⷣбне ѻ҆́тче сѷмеѡ́не. И҆ ны́нѣ, бг҃оро́диченъ. На лїтꙋргі́и, бл҃жє́нна пра́здника: и҆ ст҃а́гѡ, пѣ́снь г҃. Прокі́менъ, гла́съ з҃: Возвесели́тсѧ првⷣникъ ѡ҆ гдⷭ҇ѣ: Сті́хъ: Оу҆слы́ши бж҃е гла́съ мо́й: А҆по́столъ къ колосса́ємъ, зача́ло сн҃и: Ѡ҆блецы́тесѧ ᲂу҆̀бо: А҆ллилꙋ́їа: Бл҃же́нъ мꙋ́жъ боѧ́йсѧ гдⷭ҇а: Є҆ѵⷢ҇лїе матѳе́а, зача́ло м҃г: Всѧ̑ мнѣ̀ прєдана̀ сꙋ́ть: Прича́стенъ: Въ па́мѧть:
Въ то́йже де́нь прпⷣбнагѡ нїки́ты сто́лпника переасла́вскагѡ чꙋдотво́рца.
Тропа́рь, гла́съ д҃:
Правосла́внымъ смы́сломъ, ю҆́нѡшскаѧ возжелѣ̑нїѧ возненави́дѣвъ <<тѳ҃і: 637>> ви́дѣвъ, и҆ до́блествєнныѧ нра́вы воспрїи́мъ, врага̀ побѣди́лъ є҆сѝ, и҆ во благоразꙋ́мїи бг҃ꙋ ᲂу҆годи́лъ є҆сѝ: и҆ свы́ше ѿ негѡ̀ прїе́мъ да́ръ чꙋде́съ, бѣ́сы прогонѧ́ти, недꙋ́ги и҆сцѣлѧ́ти, нїки́то пресла́вне, молѝ хрⷭ҇та̀ бг҃а, да сп҃се́тъ дꙋ́шы на́шѧ.
Конда́къ, гла́съ и҃:
Хрⷭ҇та̀ ра́ди ѿ твои́хъ рабѡ́въ нꙋ́жднꙋю сме́рть претерпѣ́лъ є҆сѝ, и҆ вѣне́цъ нетлѣ́нїѧ ѿ негѡ̀ воспрїѧ́лъ є҆сѝ: приходѧ́щымъ же съ вѣ́рою ѿ честна́гѡ твоегѡ̀ гро́ба подае́ши цѣльбы̑, ѽ нїки́то прпⷣбне, моли́твенниче ѡ҆ дꙋша́хъ на́шихъ.
к҃є. Тре́тїе ѡ҆брѣ́тенїе чⷭ҇тны́ѧ главы̀ чⷭ҇тна́гѡ и҆ сла́внагѡ прⷪ҇ро́ка прⷣте́чи и҆ крⷭ҇ти́телѧ і҆ѡа́нна.
Ве́черъ, по ѻ҆бы́чномъ ѱалмѣ̀ пое́мъ, Бл҃же́нъ мꙋ́жъ, а҃-й а҆нтїфѡ́нъ. На Гдⷭ҇и воззва́хъ, стїхи̑ры пра́здника г҃: и҆ прⷣте́чи є҃. А҆́ще же по́стъ, на ѕ҃, гла́съ и҃. Подо́бенъ: Ѽ пресла́внагѡ чꙋдесѐ! Сла́ва, гла́съ ѕ҃: Сокро́вище бж҃е́ственныхъ дарѡ́въ: И҆ ны́нѣ, пра́здника, и҆лѝ бг҃оро́диченъ: Кто̀ тебѐ не ᲂу҆бл҃жи́тъ: Вхо́дъ. прокі́менъ днѐ: чтє́нїѧ г҃: а҃-е, Прⷪ҇ро́чества и҆са́їина: Та́кѡ глаго́летъ гдⷭ҇ь: ᲂу҆тѣша́йте: в҃-е, Прⷪ҇ро́чества малахі́ина: Та́кѡ глаго́летъ гдⷭ҇ь вседержи́тель: г҃-е, Премꙋ́дрости соломѡ́ни: Првⷣникъ а҆́ще пости́гнетъ: На стїхо́внѣ стїхи̑ры, гла́съ а҃: Подо́бенъ: Нбⷭ҇ныхъ чинѡ́въ: съ припѣ́вы и҆́хъ: а҃, Та́мѡ возращꙋ̀ ро́гъ дв҃дови: в҃, Помѧнѝ гдⷭ҇и дв҃да: Сла́ва, гла́съ в҃: Ꙗ҆́кѡ бж҃е́ственныхъ: И҆ ны́нѣ, бг҃оро́диченъ, и҆лѝ пра́здника.
Тропа́рь, гла́съ д҃:
Ꙗ҆́кѡ бж҃е́ственное сокро́вище сокрове́нное въ землѝ, хрⷭ҇то́съ ѿкры̀ главꙋ̀ твою̀ на́мъ прⷪ҇ро́че и҆ прⷣте́че: всѝ ᲂу҆́бѡ соше́дшесѧ въ сеѧ̀ ѡ҆брѣ́тенїе, пѣ́сньми бг҃оглаго́ливыми сп҃са воспои́мъ, сп҃са́юща на́съ ѿ тлѣ́нїѧ мл҃твами твои́ми.
<<тѳ҃і ѡ҆б.: 638>>
Сла́ва, и҆ ны́нѣ: Є҆́же ѿ вѣ́ка ᲂу҆тае́ное: и҆лѝ пра́здника. На ᲂу҆́трени, на Бг҃ъ гдⷭ҇ь, а҆́ще є҆́сть пѧтидесѧ́тница, тропа́рь пра́здника, два́жды: Сла́ва, прⷣте́чи: и҆ ны́нѣ, пра́здника. А҆́ще же нѝ: тропа́рь прⷣте́чи, два́жды: Сла́ва, и҆ ны́нѣ, бг҃оро́диченъ. По ѻ҆бы́чныхъ каѳі́смахъ, сѣда́ленъ пра́здника. А҆́ще по́стъ: По а҃-й каѳі́смѣ сѣда́ленъ прⷣте́чи, гла́съ д҃, два́жды: Сла́ва, и҆ ны́нѣ, бг҃оро́диченъ, и҆ чте́нїе. По в҃-й каѳі́смѣ сѣда́ленъ, гла́съ д҃, два́жды: По полѷеле́и сѣда́ленъ, гла́съ д҃: Сла́ва, дрꙋгі́й, гла́съ и҃: И҆ ны́нѣ, бг҃оро́диченъ, и҆ чте́нїе. Степє́нна, а҃-й а҆нтїфѡ́нъ д҃-гѡ гла́са. Прокі́менъ, гла́съ д҃: Та́мѡ возращꙋ̀ ро́гъ: Сті́хъ: Помѧнѝ гдⷭ҇и дв҃да: Всѧ́кое дыха́нїе: Є҆ѵⷢ҇лїе лꙋкѝ, зача́ло л҃а: И҆зы́де сло́во ѡ҆ і҆и҃сѣ: По н҃-мъ ѱалмѣ̀ стїхи́ра, гла́съ ѕ҃: Ꙗ҆́же пе́рвѣе на блю́дѣ: А҆́ще є҆́сть пѧтидесѧ́тница: Канѡ́нъ пра́здника, со і҆рмосо́мъ на ѕ҃: А҆́ще ли по́стъ, канѡ́нъ бцⷣы, со і҆рмосо́мъ на ѕ҃: прⷣте́чи на и҃, гла́съ и҃. Катава́сїа пра́здника. А҆́ще ли по́стъ: Ѿве́рзꙋ ᲂу҆ста̀ моѧ̑: По г҃-й пѣ́сни, конда́къ и҆ і҆́косъ пра́здника. А҆́ще ли по́стъ, сѣда́ленъ прⷣте́чи, гла́съ д҃, два́жды: Сла́ва, и҆ ны́нѣ, бг҃оро́диченъ. По ѕ҃-й пѣ́сни,
Конда́къ, гла́съ ѕ҃. Подо́бенъ: Є҆́же ѡ҆ на́съ:
Свѣтоѧвле́нный и҆ бж҃е́ственный въ мі́рѣ сто́лпъ, со́лнца свѣти́льникъ, прⷣте́ча главꙋ̀ свѣтоно́снꙋю и҆ бж҃е́ственнꙋю свою̀ показа́вый въ концѣ́хъ, ѡ҆свѧща́етъ то́й вѣ́рнѡ покланѧ́ющихсѧ, и҆ взыва́ющихъ: хрⷭ҇то́въ премꙋ́дрый крⷭ҇ти́телю, сп҃сѝ всѣ́хъ на́съ.
И҆ і҆́косъ, и҆ про́логъ. По ѳ҃-й пѣ́сни, свѣти́ленъ прⷣте́чи: Сла́ва, дрꙋгі́й: И҆ ны́нѣ, пра́здника, и҆лѝ бг҃оро́диченъ. На хвали́техъ, стїхи̑ры прⷣте́чи на д҃, гла́съ є҃. Подо́бенъ: Ра́дꙋйсѧ: Сла́ва, гла́съ ѕ҃: Всечестнꙋ́ю главꙋ̀: <<т҃к: 639>> И҆ ны́нѣ, пра́здника, и҆лѝ бг҃оро́диченъ. Славосло́вїе вели́кое. По трист҃о́мъ, тропа́рь прⷣте́чи: Сла́ва, и҆ ны́нѣ, бг҃оро́диченъ: Є҆́же ѿ вѣ́ка: и҆лѝ пра́здника. Є҆ктєнїѝ, и҆ ѿпꙋ́стъ, и҆ ча́съ а҃-й, и҆ коне́чный ѿпꙋ́стъ. На лїтꙋргі́и, бл҃жє́нна ѿ канѡ́на прⷣте́чи, пѣ́снь г҃, и҆ ѕ҃. Прокі́менъ, гла́съ з҃: Возвесели́тсѧ првⷣникъ ѡ҆ гдⷭ҇ѣ: Сті́хъ: Оу҆слы́ши бж҃е гла́съ мо́й: А҆по́столъ къ корі́нѳѧнѡмъ, зача́ло рѻ҃ѕ: Бг҃ъ рекі́й и҆з̾ тьмы̀ свѣ́тꙋ: А҆ллилꙋ́їа, гла́съ є҃: Свѣ́тъ возсїѧ̀ првⷣникꙋ: Є҆ѵⷢ҇лїе матѳе́а, зача́ло м҃: Слы́шавъ і҆ѡа́ннъ во ᲂу҆зи́лищи дѣла̀ хрⷭ҇тѡ́ва: Прича́стенъ: Въ па́мѧть:
[зрѝ][[комм.]] Вѣ́стнѡ бꙋ́ди, а҆́ще слꙋчи́тсѧ ѡ҆брѣ́тенїе главы̀ і҆ѡа́нна прⷣте́чи въ недѣ́лю з҃-ю по па́сцѣ ст҃ы́хъ ѻ҆тє́цъ.
Ѡ҆ставлѧ́етсѧ слꙋ́жба пра́здника вознесе́нїѧ: и҆ пое́тсѧ слꙋ́жба воскрⷭ҇на, и҆ прⷣте́чи, и҆ ст҃ы́хъ ѻ҆тцє́въ. Въ сꙋббѡ́тꙋ, на ма́лѣй вече́рни, пое́мъ ꙗ҆́коже ᲂу҆каза́сѧ во главѣ̀ бг҃осло́ва. На вели́цѣй вече́рни, по ѻ҆бы́чной каѳі́смѣ, на Гдⷭ҇и воззва́хъ, стїхи̑ры воскрⷭ҇ны г҃: и҆ прⷣте́чи г҃: и҆ ст҃ы́хъ ѻ҆тцє́въ д҃. Сла́ва, ѻ҆тцє́въ: И҆ ны́нѣ, бг҃оро́диченъ воскрⷭ҇нъ гла́са. По вхо́дѣ чтє́нїѧ ѻ҆тцє́въ, и҆ прⷣте́чи. На лїті́и стїхи́ра хра́ма: и҆ прⷣте́чи хвали̑тныѧ. Сла́ва, ѻ҆тцє́въ: И҆ ны́нѣ, бг҃оро́диченъ. На стїхо́внѣ стїхи̑ры воскрⷭ҇ны. Сла́ва, ѻ҆тцє́въ: И҆ ны́нѣ, бг҃оро́диченъ. На бл҃гослове́нїи хлѣ́бѡвъ, тропа́рь: Бцⷣе дв҃о, два́жды: и҆ ѻ҆тцє́въ є҆ди́ножды: и҆ чте́нїе въ дѣѧ́нїихъ а҆пⷭ҇льскихъ. На ᲂу҆́трени, на Бг҃ъ гдⷭ҇ь, тропа́рь воскрⷭ҇нъ и҆ ѻ҆тцє́въ. Сла́ва, прⷣте́чи: И҆ ны́нѣ, бг҃оро́диченъ: По каѳі́смахъ сѣда́льны воскрⷭ҇ны, и҆ чте́нїе во є҆ѵⷢ҇лїи. Та́же полѷеле́й и҆ сѣда́льны прⷣте́чи, ѻ҆́ба по є҆ди́ножды, без̾ бг҃оро́дичнѡвъ. Сла́ва, сѣда́ленъ, и҆́же по <<т҃к ѡ҆б.: 640>> полѷеле́и: И҆ ны́нѣ, бг҃оро́диченъ: и҆ чте́нїе прⷣте́чи. Про́чее же пое́мъ на ᲂу҆́трени, и҆ на часѣ́хъ, и҆ на лїтꙋргі́и, ꙗ҆́коже ᲂу҆каза́сѧ во главѣ̀ бг҃осло́ва.
[зрѝ] Подоба́етъ вѣ́дати: А҆́ще слꙋчи́тсѧ па́мѧть ѡ҆брѣ́тенїѧ честны́ѧ главы̀ въ сꙋббѡ́тꙋ пентїко́стїи, и҆лѝ въ недѣ́лю и҃-ю: пое́мъ слꙋ́жбꙋ є҆гѡ̀ въ четверто́къ з҃-ѧ недѣ́ли.
[зрѝ] А҆́ще ли слꙋчи́тсѧ ѡ҆брѣ́тенїе честны́ѧ главы̀ і҆ѡа́нна прⷣте́чи въ понедѣ́льникъ и҃-й: пое́мъ на ᲂу҆́трени во вто́рникъ, съ пра́здничною слꙋ́жбою вкꙋ́пѣ.
[[комм.]] А҆́ще ли слꙋчи́тсѧ ѡ҆брѣ́тенїе главы̀ прⷣте́чевы въ пѧто́къ з҃-ѧ недѣ́ли по па́сцѣ, во ѿда́нїе вознесе́нїѧ хрⷭ҇то́ва, и҆лѝ въ сꙋббѡ́тꙋ пред̾ недѣ́лею всѣ́хъ ст҃ы́хъ, во ѿда́нїе пра́здника пѧтьдесѧ́тницы. И҆ пое́мъ слꙋ́жбꙋ є҆гѡ̀ на рѧдꙋ̀ въ сꙋббѡ́тꙋ, вкꙋ́пѣ со ѿда́нїемъ пра́здника.
Въ пѧто́къ ве́чера, пое́мъ Бл҃же́нъ мꙋ́жъ: а҃-й а҆нтїфѡ́нъ. На Гдⷭ҇и воззва́хъ, стїхи̑ры пра́здника на ѕ҃: и҆ ст҃а́гѡ на д҃. Сла́ва, ст҃а́гѡ: И҆ ны́нѣ, пра́здника. Вхо́дъ. прокі́менъ днѐ: и҆ чтє́нїѧ ст҃а́гѡ г҃. На лїті́и стїхи̑ры пра́здника, и҆ ст҃а́гѡ стїхѡ́вныѧ. Сла́ва, ст҃а́гѡ: И҆ ны́нѣ, пра́здника. На стїхо́внѣ, стїхи̑ры пра́здника, съ припѣ́вы и҆́хъ. Сла́ва, ст҃а́гѡ: И҆ ны́нѣ, пра́здника. По трист҃о́мъ, тропа́рь ст҃а́гѡ: Сла́ва, и҆ ны́нѣ, пра́здника, и҆ ѿпꙋ́стъ. На ᲂу҆́трени, на Бг҃ъ гдⷭ҇ь, тропа́рь пра́здника два́жды: Сла́ва, ст҃а́гѡ. И҆ ны́нѣ, пра́здника. По каѳі́смахъ сѣда́льны: и҆ чте́нїе пра́здника. Полѷеле́й, и҆ сѣда́льны ст҃а́гѡ всѝ: Сла́ва, сѣда́ленъ по полѷеле́и ст҃а́гѡ: И҆ ны́нѣ, пра́здника, и҆ чте́нїе ст҃а́гѡ. Степє́нна а҃-й а҆нтїфѡ́нъ д҃-гѡ гла́са. Прокі́менъ, и҆ є҆ѵⷢ҇лїе ст҃а́гѡ: ѱало́мъ н҃, и҆ стїхи́ра ст҃а́гѡ. Канѡ́нъ пра́здника, со і҆рмосо́мъ <<тк҃а: 641>> на ѕ҃: и҆ ст҃а́гѡ на д҃: и҆ дрꙋгі́й пра́здника на д҃: Катава́сїа пра́здника. По г҃-й пѣ́сни, конда́къ и҆ і҆́косъ ст҃а́гѡ: и҆ сѣда́ленъ ст҃а́гѡ два́жды. Сла́ва, и҆ ны́нѣ, пра́здника, и҆ чте́нїе ст҃а́гѡ. По ѕ҃-й пѣ́сни, конда́къ и҆ і҆́косъ пра́здника. На ѳ҃-й пѣ́сни, Чⷭ҇тнѣ́йшꙋю не пое́мъ. Свѣти́ленъ пра́здника: Сла́ва, ст҃а́гѡ: И҆ ны́нѣ, пра́здника. На хвали́техъ стїхи̑ры пра́здника г҃: и҆ ст҃а́гѡ г҃. Сла́ва, ст҃а́гѡ: И҆ ны́нѣ, пра́здника. Славосло́вїе вели́кое. По трист҃о́мъ тропа́рь ст҃а́гѡ: Сла́ва, и҆ ны́нѣ, пра́здника. Є҆ктєнїѝ, и҆ ѿпꙋ́стъ. и҆ ча́съ а҃-й. На часѣ́хъ, тропа́рь пра́здника. Сла́ва, ст҃а́гѡ: И҆ ны́нѣ, бг҃оро́диченъ часѡ́въ. По Ѻ҆́ч҃е на́шъ, конда́къ пра́здника, и҆ ст҃а́гѡ, премѣнѧ́емъ. На лїтꙋргі́и, бл҃жє́нна пра́здника, пѣ́снь ѳ҃-ѧ на д҃: и҆ ст҃а́гѡ, пѣ́снь г҃-ѧ, на д҃. По вхо́дѣ, тропа́рь пра́здника, и҆ ст҃а́гѡ. Сла́ва, конда́къ ст҃а́гѡ: И҆ ны́нѣ, пра́здника. Прокі́менъ, А҆ллилꙋ́їа, и҆ прича́стенъ пра́здника, и҆ ст҃а́гѡ. А҆по́столъ, и҆ є҆ѵⷢ҇лїе днѐ, и҆ ст҃а́гѡ.
[[комм.]] Ѡ҆ то́мже пра́здницѣ подоба́етъ вѣ́дати а҆́ще слꙋчи́тсѧ ѡ҆брѣ́тенїе чⷭ҇тны́ѧ главы̀ прⷣте́чевы въ недѣ́лю всѣ́хъ ст҃ы́хъ, пое́мъ слꙋ́жбꙋ є҆гѡ̀ въ пѧто́къ.
А҆́ще ли ко́егѡ вели́кагѡ ст҃а́гѡ, є҆мꙋ́же во ᲂу҆ста́вѣ ᲂу҆ка́жетсѧ бдѣ́нїе.
Пое́мъ слꙋ́жбꙋ вели́кагѡ ст҃а́гѡ въ настоѧ́щꙋю сїю̀ недѣ́лю всѣ́хъ ст҃ы́хъ, ꙗ҆́коже і҆ѡа́нна бг҃осло́ва, въ з҃-ю недѣ́лю по па́сцѣ, со ст҃ы́ми ѻ҆тцы̀ въ рѧдꙋ̀: та́кожде и҆ здѣ̀ пое́тсѧ.
к҃ѕ. Ст҃а́гѡ а҆пⷭ҇ла ка́рпа, є҆ди́нагѡ ѿ седми́десѧтихъ.
Стїхи̑ры пра́здника, и҆лѝ ѻ҆ктѡ́иха г҃, и҆ а҆пⷭ҇ла г҃: <<тк҃а ѡ҆б.: 642>> гла́съ а҃. Подо́бенъ: Всехва́льнїи мч҃нцы: На стїхо́внѣ ѻ҆ктѡ́иха. Тропа́рь, гла́съ г҃: А҆пⷭ҇ле ст҃ы́й: ѻ҆ктѡ́врїа въ а҃-й де́нь. На ᲂу҆́трени, канѡ́на ѻ҆́ба ѻ҆ктѡ́иха: и҆ а҆пⷭ҇ла на д҃, гла́съ д҃. По г҃-й пѣ́сни, сѣда́ленъ, гла́съ г҃. По ѕ҃-й пѣ́сни,
Конда́къ, гла́съ д҃. Подо́бенъ: Ꙗ҆ви́лсѧ є҆сѝ:
Ꙗ҆́кѡ ѕвѣздꙋ̀ пресвѣ́тлꙋю цр҃ковь всегда̀ стѧжа́ тѧ а҆пⷭ҇ле ка́рпе, чꙋде́съ твои́хъ многоподава́нїемъ просвѣща́ема: сп҃сѝ вѣ́рою чтꙋ́щихъ па́мѧть твою̀.
По ѳ҃-й пѣ́сни, свѣти́ленъ. На стїхо́внѣ ѻ҆ктѡ́иха.
Въ то́йже де́нь ст҃а́гѡ великомч҃нка геѡ́ргїа но́вагѡ, пострада́вшагѡ ѿ безбо́жнагѡ царѧ̀ сели́ма тꙋ́рскагѡ.
Соверша́етсѧ собо́ръ є҆гѡ̀, и҆дѣ́же лежа́тъ мо́щи є҆гѡ̀, и҆ и҆дѣ́же хра́мъ є҆гѡ̀.
Тропа́рь, гла́съ д҃:
Бж҃е́ственнымъ жела́нїемъ, ѿ ю҆́нагѡ во́зраста ве́сь са́мъ себѐ гдⷭ҇еви возложи́въ, въ мл҃твахъ и҆ постѣ́хъ ѡ҆́бразъ бы́въ добродѣ́тели, бога́тство же и҆ сла́вꙋ, и҆ доброро́дство тѣле́сное ꙗ҆́кѡ не сꙋ́щее презрѣ́въ, и҆ хрⷭ҇та̀ є҆ди́наго ѿ дꙋшѝ возлюби́лъ є҆сѝ, и҆ того̀ и҆́стиннаго сꙋ́ща бг҃а въ трⷪ҇цѣ покланѧ́ема, пред̾ нечести́выми тꙋ́рки проповѣ́далъ є҆сѝ. и҆ срацы́нскꙋю вѣ́рꙋ и҆ зако́ны моаме́ѳѡвы под̾ нога́ми попра́въ, и҆ мꙋчи́телѧ ᲂу҆жаси́въ, мꙋче́нїѧ вѣнце́мъ ᲂу҆краси́всѧ сла́вне, къ нбⷭ҇нымъ восте́клъ є҆сѝ ликостоѧ́нїємъ, премꙋ́дре геѡ́ргїе: молѝ хрⷭ҇та̀ бг҃а, сохрани́ти ѻ҆те́чество твоѐ, и҆ сп҃стѝ правосла́внаго і҆мпера́тора, и҆ лю́ди и҆ гра́дъ, и҆̀же твоѧ̑ по́двиги при́снѡ почита́ющыѧ.
Конда́къ, гла́съ д҃:
Ꙗ҆́кѡ ѕвѣзда̀ пресвѣ́тлаѧ ꙗ҆ви́лсѧ є҆сѝ непреле́стнаѧ мі́рови, пра́веднаго сл҃нца хрⷭ҇та̀ возвѣща́ющи страда́нїи твои́ми стрⷭ҇тоте́рпче, <<тк҃в: 643>>, вели́кїй мч҃нче хрⷭ҇то́въ геѡ́ргїе, и҆ пре́лесть погаси́лъ є҆сѝ срацы́нскꙋю, и҆ моаме́ѳѡва преда̑нїѧ и҆ зако́ны под̾ нога́ми твои́ми попра́лъ є҆сѝ: и҆ беззако́ннаго царѧ̀, и҆ мꙋчи́телей ᲂу҆каси́лъ є҆сѝ крѣ́пкимъ твои́мъ терпѣ́нїемъ, и҆ вѣ̑рнымъ подае́ши свѣ́тъ, молѧ́сѧ къ бг҃ꙋ непреста́ннѡ ѡ҆ всѣ́хъ на́съ.
к҃з. Ст҃а́гѡ сщ҃енномч҃нка ѳерапо́нта.
А҆ллилꙋ́їа, и҆лѝ тропа́рь. Стїхи̑ры, гла́съ и҃. Подо́бенъ: Мч҃нцы твоѝ гдⷭ҇и: Сла́ва, и҆ ны́нѣ, пра́здника, и҆лѝ бг҃оро́диченъ. Тропа́рь, гла́съ д҃: И҆ нра́вѡмъ прича́стникъ: септе́мврїа въ г҃-й де́нь. На ᲂу҆́трени, канѡ́нъ, гла́съ ѕ҃: По г҃-й пѣ́сни, сѣда́ленъ, гла́съ а҃. Сла́ва, и҆ ны́нѣ, бг҃оро́диченъ.
И҆ ѡ҆брѣ́тенїе моще́й прпⷣбнагѡ ѻ҆тца̀ на́шегѡ ні́ла, и҆́же на є҆́зерѣ селиге́рѣ, на ѻ҆́стровѣ зово́момъ столобно́е, но́вагѡ чꙋдотво́рца.
Тропа́рь и҆ конда́къ деке́мврїа въ з҃-й де́нь.
Соверша́етсѧ собо́ръ є҆гѡ̀, и҆дѣ́же лежа́тъ мо́щи є҆гѡ̀, и҆ и҆дѣ́же хра́мъ є҆гѡ̀.
к҃и. Прпⷣбнагѡ ѻ҆тца̀ на́шегѡ нїки́ты, є҆пⷭ҇кпа халкидо́нскагѡ.
А҆ллилꙋ́їа, и҆лѝ тропа́рь. Стїхи̑ры, гла́съ д҃. Подо́бенъ: Ꙗ҆́кѡ до́блѧ: Сла́ва, и҆ ны́нѣ, пра́здника, и҆лѝ бг҃оро́диченъ: Тропа́рь, гла́съ д҃: Пра́вило вѣ́ры: септе́мврїа во в҃-й де́нь. На ᲂу҆́трени, канѡ́нъ, гла́съ д҃. По г҃-й пѣ́сни, сѣда́ленъ, гла́съ д҃. По ѕ҃-й пѣ́сни,
Конда́къ, гла́съ и҃. Подо́бенъ: Взбра́нной:
Свѣ́тлостїю дѣ́лъ твои́хъ просїѧ́лъ є҆сѝ прпⷣбне, а҆пⷭ҇льскагѡ престо́ла наслѣ́дникъ бы́лъ є҆сѝ нїки́то: и҆ ꙗ҆́кѡ со́лнце ѡ҆блиста́лъ <<тк҃в ѡ҆б.: 644>> є҆сѝ твое́й па́ствѣ ѻ҆́тче, всѧ̑ бж҃е́ственныхъ ᲂу҆че́нїй и҆спо́лнь. тѣ́мже зове́мъ тѝ: ра́дꙋйсѧ халкидо́нꙋ ᲂу҆добре́нїе.
Въ то́йже де́нь па́мѧть ст҃а́гѡ і҆гна́тїа є҆пⷭ҇кпа, росто́вскагѡ чꙋдотво́рца.
Соверша́етсѧ собо́ръ є҆гѡ̀, и҆дѣ́же лежа́тъ мо́щи є҆гѡ̀.
Тропа́рь, гла́съ д҃:
Бл҃говѣ́рїѧ просвѣ́щьсѧ ᲂу҆че́нїи, ст҃и́тельства прїе́мъ па́ствꙋ, и҆ а҆пⷭ҇лѡмъ наслѣ́дникъ бы́въ: тѣ́мъ прїѧ́лъ є҆сѝ ѿ бг҃а да́ръ чꙋде́съ, ст҃и́телю ѻ҆́тче і҆гна́тїе, молѝ хрⷭ҇та̀ бг҃а, да сп҃се́тъ дꙋ́шы на́шѧ.
Конда́къ, гла́съ д҃. Подо́бенъ: Ꙗ҆ви́лсѧ є҆сѝ:
Ꙗ҆ви́сѧ дне́сь пресвѣ́тлаѧ па́мѧть твоѧ̀, ст҃и́телю пребл҃же́нне і҆гна́тїе, въ мі́рѣ свѣ́тлѡ сїѧ́ющи и҆ ꙗ҆влѧ́ющи всѣ̑мъ бж҃е́ственное сїѧ́нїе.
к҃ѳ. Ст҃ы́ѧ прпⷣбномч҃нцы ѳеодо́сїи дѣви́цы.
А҆ллилꙋ́їа, и҆лѝ тропа́рь. Стїхи̑ры, гла́съ и҃. Подо́бенъ: Ѽ пресла́внагѡ чꙋдесѐ:
Тропа́рь, гла́съ д҃:
Добродѣ́тель бл҃гопрїѧ́тнѡ мч҃нце пости́гла є҆сѝ, хрⷭ҇то́во прїѧ́телище бы́вши чи́стое, и҆ ст҃а́гѡ дх҃а до́мъ возлю́бленъ: ѿню́дꙋже посрами́ла є҆сѝ врага̀ борю́щаго ро́дъ человѣ́ческїй, до́брѣ страда́вшаѧ, и҆ посѣ́кла є҆сѝ копрѡнѵ́ма ѳеодо́сїе, мече́мъ вѣ́ры: и҆ къ черто́гꙋ нбⷭ҇номꙋ преста́виласѧ є҆сѝ ра́дꙋющисѧ. тебѐ вѣ́рою чтꙋ́щымъ при́снѡ просѝ ве́лїѧ млⷭ҇ти.
На ᲂу҆́трени, ѻ҆́ба канѡ́на ѻ҆ктѡ́иха, и҆ ст҃ы́ѧ на д҃, гла́съ д҃. По г҃-й пѣ́сни сѣда́ленъ, гла́съ и҃. По ѕ҃- й пѣ́сни,
Конда́къ, гла́съ в҃. Подо́бенъ: Вы́шнихъ и҆щѧ̀:
Трꙋда́ми живо́тъ нетрꙋ́дный дости́гла є҆сѝ, кро́вїю же копрѡнѵ́ма <<тк҃г: 645>> ᲂу҆дави́ла є҆сѝ мч҃нце, скве́рнаго врага̀ хрⷭ҇то́вы це́ркве, всебл҃же́ннаѧ ѳеодо́сїе: и҆ съ вы́шними ра́дꙋешисѧ во́инствы, чтꙋ́щыѧ па́мѧть твою̀ покрыва́ющи.
Въ то́йже де́нь преставле́нїе ст҃а́гѡ и҆ бл҃же́ннагѡ і҆ѡа́нна, хрⷭ҇та̀ ра́ди ю҆ро́дивагѡ, ᲂу҆́стюжскагѡ чꙋдотво́рца:
Соверша́етсѧ собо́ръ є҆гѡ̀ на ᲂу҆́стюгѣ.
Тропа́рь, гла́съ є҃:
Нагото́ю тѣле́сною и҆ терпѣ́нїемъ ѡ҆бнажи́лъ є҆сѝ вра̑жїѧ кова̑рствїѧ, ѡ҆блича́ѧ неподо́бное є҆гѡ̀ дѣѧ́нїе, ѕѣ́льнѣ стражда̀ со́лнечный ва́ръ, и҆ нꙋ̑жныѧ вели̑кїѧ стꙋ́дєни мра́за и҆ ѻ҆гнѧ̀ не чꙋ́лъ є҆сѝ, бж҃їею по́мощїю покрыва́емь, і҆ѡа́нне премꙋ́дре, молѝ ѡ҆ вѣ́рою творѧ́щихъ па́мѧть твою̀ че́стнѡ, и҆ ᲂу҆се́рднѡ притека́ющихъ къ ра́цѣ моще́й твои́хъ, и҆зба́витисѧ ѿ бѣ́дъ, и҆ паде́нїѧ и҆збѣжа́ти.
Конда́къ, гла́съ и҃:
Вы́шнїѧ красоты̀ жела́ѧ, ни́жнїѧ сла́дости тѣле́сное ꙗ҆де́нїе тща́тельнѡ ѡ҆ста́вилъ є҆сѝ, нестѧжа́нїемъ сꙋ́етнагѡ мі́ра, возлюби́лъ є҆сѝ а҆́гг҃льское житїѐ. преходѧ̀ сконча́всѧ і҆ѡа́нне бл҃же́нне: съ ни́миже молѝ хрⷭ҇та̀ бг҃а непреста́ннѡ ѡ҆ всѣ́хъ на́съ.
л҃. Прпⷣбнагѡ ѻ҆тца̀ на́шегѡ і҆саа́кїа, ѻ҆би́тели далма́тскїѧ.
А҆ллилꙋ́їа, и҆лѝ тропа́рь. Стїхи̑ры, гла́съ а҃. Подо́бенъ: Нбⷭ҇ныхъ чинѡ́въ: На стїхо́внѣ ѻ҆ктѡ́иха. Тропа́рь, гла́съ и҃: Въ тебѣ̀ ѻ҆́тче и҆звѣ́стнѡ сп҃се́сѧ: ѻ҆ктѡ́врїа въ а҃-й де́нь. На ᲂу҆́трени, канѡ́нъ, гла́съ и҃. По г҃-й пѣ́сни, сѣда́ленъ, гла́съ и҃. По ѕ҃-й пѣ́сни,
Конда́къ, гла́съ и҃. Подо́бенъ: Ꙗ҆́кѡ нача́тки:
Ꙗ҆́кѡ ᲂу҆го́дникъ бж҃їй вѣ́рный, по хрⷭ҇то́вѣ це́ркви ре́вностїю <<тк҃г ѡ҆б.: 646>> разже́гсѧ, брозды̑ ᲂу҆а́лентѡвы ᲂу҆держа́въ, прⷪ҇ро́чески томꙋ̀ ѡ҆ затворе́нїи це́ркве, па́гꙋбнꙋю сме́рть, предре́клъ є҆сѝ прпⷣбне: тѣ́мже при́снѡ молѝ ѡ҆ на́съ чтꙋ́щихъ тѧ̀, і҆саа́кїе прпⷣбне.
л҃а. Ст҃а́гѡ а҆пⷭ҇ла є҆рмі́а: И҆ ст҃а́гѡ мч҃нка є҆рме́а:
А҆ллилꙋ́їа, и҆лѝ тропа́рь. Стїхи̑ры, гла́съ а҃. Подо́бенъ:
Нбⷭ҇ныхъ чинѡ́въ: На стїхо́внѣ ѻ҆ктѡ́иха. Тропа́рь: Мч҃нкъ тво́й гдⷭ҇и: септе́мврїа во в҃-й де́нь. На ᲂу҆́трени, канѡ́нъ, гла́съ и҃. По г҃-й пѣ́сни, сѣда́ленъ, гла́съ д҃. По ѕ҃-й пѣ́сни,
Конда́къ, гла́съ ѕ҃. Подо́бенъ: Є҆́же ѡ҆ на́съ:
И҆́же по хрⷭ҇тѣ̀ ᲂу҆се́рднѡ подвиза́всѧ, въ сѣди́нахъ до́блихъ мꙋ́жество стѧжа́лъ є҆сѝ мч҃нче є҆рмі́е, беззако́нныхъ ѕлоꙋмышле́нїе попра́въ хрⷭ҇то́вою си́лою, ѿ чаро́вныхъ напое́нїй невреди́мь пребы́сть, зовы́й: бг҃ъ є҆́сть со мно́ю, и҆ никто́же на мѧ̀.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.