Чи́нъ ма́лыѧ вече́рни.
ТѶПІКО́НЪ,
си́рѣчь,
и҆з̾ѡбраже́нїе цр҃ко́внагѡ послѣ́дованїѧ во і҆ерⷭ҇ли́мѣ ст҃ы́ѧ ла́ѵры, прпⷣбнагѡ и҆ бг҃оно́снагѡ ѻ҆тца̀ на́шегѡ са́ввы. То́жде послѣ́дованїе быва́етъ и҆ въ про́чихъ во і҆ерⷭ҇ли́мѣ честны́хъ ѻ҆би́телехъ: подо́бнѣ и҆ въ про́чихъ ст҃ы́хъ бж҃їихъ цр҃квахъ.
[глⷡ҇а а҃] Чи́нъ ма́лыѧ вече́рни.
Пре́жде со́лнечнагѡ захожде́нїѧ днѐ сꙋббѡ́тнагѡ, прихо́дитъ параекклисїа́рхъ [си́рѣчь кандиловжига́тель] къ предстоѧ́телю, и҆ твори́тъ поклоне́нїе є҆мꙋ̀, зна́менꙋѧ прише́ствїемъ свои́мъ вре́мѧ клепа́нїѧ. И҆ взе́мъ бл҃гослове́нїе, и҆зше́дъ кле́плетъ въ ма́лый кампа́нъ. И҆ собра́вшымсѧ бра́тїѧмъ въ притво́ръ, твори́тъ сщ҃е́нникъ нача́ло: Бл҃гослове́нъ бг҃ъ на́шъ: И҆ ᲂу҆чине́нный чте́цъ глаго́летъ: Сла́ва тебѣ̀ бж҃е на́шъ, сла́ва тебѣ̀. Та́же, Цр҃ю̀ нбⷭ҇ный: Трист҃о́е: И҆ по Ѻ҆́ч҃е на́шъ: Возгла́съ ѿ сщ҃е́нника, и҆ чте́тъ чте́цъ ѳ҃-й ча́съ по ѻ҆бы́чаю. Та́же, по концѣ̀ тогѡ̀ и҆ по ѿпꙋ́стѣ вхо́димъ въ хра́мъ: и҆ ста́нетъ кі́йждо на свое́мъ мѣ́стѣ. А҆́ще же ѳ҃-й ча́съ глаго́летсѧ въ хра́мѣ, тогда̀ ѿпꙋ́стъ ѳ҃-гѡ часа̀ не быва́етъ, но а҆́бїе і҆ере́й начина́етъ, глаго́лѧ: Бл҃гослове́нъ бг҃ъ на́шъ: И҆ чте́цъ глаго́летъ: Прїиди́те поклони́мсѧ: три́жды, и҆ вече́рнїй ѱало́мъ: Бл҃гословѝ дꙋшѐ моѧ̀ гдⷭ҇а: ти́хѡ и҆ кро́ткимъ гла́сомъ. По ѱалмѣ́ же, Сла́ва, и҆ ны́нѣ, а҆ллилꙋ́їа. три́жды. І҆ере́й же є҆ктенїѝ не глаго́летъ, но чте́цъ глаго́летъ: Гдⷭ҇и поми́лꙋй, три́жды. Сла́ва, и҆ ны́нѣ: И҆ а҆́бїе, Гдⷭ҇и воззва́хъ: И҆ ста́вимъ стїхѝ д҃. И҆ пое́мъ стїхи̑ры воскрⷭ҇ны гла́са, трѝ, повторѧ́юще а҃. Сла́ва, и҆ ны́нѣ, бг҃оро́диченъ. Та́же, Свѣ́те ти́хїй: Прокі́менъ, Гдⷭ҇ь воцр҃и́сѧ: Сті́хъ: Ѡ҆блече́сѧ гдⷭ҇ь въ си́лꙋ и҆ препоѧ́сасѧ. И҆ па́ки, Гдⷭ҇ь воцр҃и́сѧ: Та́же, Сподо́би гдⷭ҇и въ ве́черъ се́й: И҆ а҆́бїе пое́мъ стїхо́вны стїхи́рꙋ є҆ди́нꙋ воскрⷭ҇нꙋ. И҆ дрꙋгі̑ѧ стїхи̑ры бцⷣы, подо́бны г҃, съ припѣ́вы и҆́хъ. Сла́ва, и҆ ны́нѣ, бг҃оро́диченъ и҆́хъ. Та́же, Ны́нѣ ѿпꙋща́еши: Трист҃о́е, и҆ по Ѻ҆́ч҃е на́шъ: Тропа́рь воскрⷭ҇нъ. Сла́ва, и҆ ны́нѣ, бг҃оро́диченъ є҆гѡ̀. Посе́мъ глаго́летъ і҆ере́й є҆ктенїю̀ ма́лꙋю: Поми́лꙋй на́съ бж҃е, по вели́цѣй млⷭ҇ти твое́й, мо́лимъ ти сѧ ᲂу҆слы́ши и҆ поми́лꙋй. Ли́къ: Гдⷭ҇и поми́лꙋй, три́жды. Є҆щѐ мо́лимсѧ ѡ҆ бл҃гочести́вѣйшемъ, самодержа́внѣйшемъ, вели́комъ гдⷭ҇рѣ на́шемъ і҆мпера́торѣ нїкола́ѣ а҆леѯа́ндровичѣ, всеѧ̀ рѡссі́и: ѡ҆ сꙋпрꙋ́гѣ є҆гѡ̀ бл҃гочести́вѣйшей гдⷭ҇рнѣ, і҆мператрі́цѣ а҆леѯа́ндрѣ ѳео́дѡровнѣ: ѡ҆ ма́тери є҆гѡ̀ бл҃гочести́вѣйшей гдⷭ҇рнѣ і҆мператрі́цѣ марі́и ѳео́дѡровнѣ: ѡ҆ наслѣ́дникѣ є҆гѡ̀, бл҃говѣ́рномъ гдⷭ҇рѣ, цесаре́вичѣ и҆ вели́комъ кн҃зѣ, а҆леѯі́и нїкола́евичѣ, и҆ ѡ҆ все́мъ ца́рствꙋющемъ до́мѣ. Ли́къ: Гдⷭ҇и поми́лꙋй, три́жды. Є҆щѐ мо́лимсѧ ѡ҆ ст҃ѣ́йшемъ прави́тельствꙋющемъ сѷно́дѣ: Ли́къ: Гдⷭ҇и поми́лꙋй, три́жды. Є҆щѐ мо́лимсѧ за всю̀ бра́тїю и҆ за всѧ̑ хрⷭ҇тїа́ны. Ли́къ: Гдⷭ҇и поми́лꙋй, три́жды. Возгла́съ: ꙗ҆́кѡ млⷭ҇тивъ и҆ чл҃вѣколю́бецъ бг҃ъ є҆сѝ, и҆ тебѣ̀ сла́вꙋ возсыла́емъ ѻ҆ц҃ꙋ̀ и҆ сн҃ꙋ, и҆ ст҃о́мꙋ дх҃ꙋ, ны́нѣ и҆ при́снѡ, и҆ во вѣ́ки вѣкѡ́въ. Та́же, Сла́ва тебѣ̀ хрⷭ҇тѐ бж҃е: [зрѝ] И҆ ѿпꙋ́стъ ма́лый, и҆ многолѣ́тїе. И҆ вше́дше въ трапе́зꙋ, глаго́лемъ: Ꙗ҆дѧ́тъ ᲂу҆бо́зїи и҆ насы́тѧтсѧ, и҆ восхва́лѧтъ гдⷭ҇а взыска́ющїи є҆го̀: жива̑ бꙋ́дꙋтъ сердца̀ и҆́хъ въ вѣ́къ вѣ́ка. Сла́ва, и҆ ны́нѣ: Гдⷭ҇и поми́лꙋй, три́жды. Бл҃гословѝ. И҆ бл҃гословлѧ́етъ сщ҃е́нникъ трапе́зꙋ. И҆ вкꙋша́емъ предста́влєннаѧ на́мъ поле́гкꙋ. да не ѡ҆тѧгчи́мсѧ на бдѣ́нїе. По ꙗ҆де́нїи же, Сла́ва, и҆ ны́нѣ: Бы́сть чре́во твоѐ ст҃а́ѧ трапе́за, и҆мꙋ́щаѧ нбⷭ҇наго хлѣ́ба, хрⷭ҇та̀ бг҃а на́шего, ѿ негѡ́же всѧ́къ ꙗ҆ды́й не ᲂу҆мира́етъ, ꙗ҆́коже речѐ всѣ́хъ бг҃ороди́тельнице пита́тель. И҆ посе́мъ, Чⷭ҇тнѣ́йшꙋю херꙋві̑мъ: Та́же, Возвесели́лъ ны̀ є҆сѝ гдⷭ҇и въ творе́нїихъ твои́хъ, и҆ въ дѣ́лѣхъ рꙋкꙋ̀ твоє́ю возра́дꙋемсѧ: зна́менасѧ на на́съ свѣ́тъ лица̀ твоегѡ̀ гдⷭ҇и, да́лъ є҆сѝ весе́лїе въ се́рдцѣ мое́мъ, ѿ плода̀ пшени́цы, вїна̀ и҆ є҆ле́а своегѡ̀ ᲂу҆мно́жишасѧ. въ ми́рѣ вкꙋ́пѣ ᲂу҆снꙋ̀, и҆ почі́ю, ꙗ҆́кѡ ты̀ гдⷭ҇и є҆ди́наго на ᲂу҆пова́нїи всели́лъ мѧ̀ є҆сѝ. Сла́ва, и҆ ны́нѣ: Гдⷭ҇и поми́лꙋй, три́жды. Бл҃гословѝ. Сщ҃е́нникъ: Съ на́ми бг҃ъ, свое́ю бл҃года́тїю и҆ чл҃вѣколю́бїемъ, всегда̀, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.