Лїтꙋргі́а вседне́внаѧ

Лїтꙋргі́а вседне́внаѧ

Послѣ́дованїе цр҃ко́вныхъ сочине́нїй, бж҃е́ственныѧ и҆ сщ҃е́нныѧ лїтꙋргі́и.

По пе́рвомъ проше́нїи глаго́летъ пе́рвый ли́къ, гла́съ и҃:

а҃ Бл҃гословѝ дꙋшѐ моѧ̀ гдⷭ҇а. Бл҃гослове́нъ є҆сѝ гдⷭ҇и. Бл҃гословѝ дꙋшѐ моѧ̀ гдⷭ҇а, и҆ всѧ̑ внꙋ́трєннѧѧ моѧ̑ и҆́мѧ ст҃о́е є҆гѡ̀.

Вторы́й ли́къ:

в҃ Бл҃гословѝ дꙋшѐ моѧ̀ гдⷭ҇а и҆ не забыва́й всѣ́хъ воздаѧ́нїй є҆гѡ̀.

а҃ Ѡ҆чища́ющаго всѧ̑ беззакѡ́нїѧ твоѧ̑, и҆сцѣлѧ́ющаго всѧ̑ недꙋ́ги твоѧ̑: в҃ И҆збавлѧ́ющаго ѿ и҆стлѣ́нїѧ живо́тъ тво́й, вѣнча́ющаго тѧ̀ млⷭ҇тїю и҆ щедро́тами: а҃ И҆сполнѧ́ющаго во бл҃ги́хъ жела́нїе твоѐ, ѡ҆бнови́тсѧ ꙗ҆́кѡ ѻ҆́рлѧ ю҆́ность твоѧ̀. в҃ Творѧ́й млⷭ҇тыни гдⷭ҇ь, и҆ сꙋдьбꙋ̀ всѣ̑мъ ѡ҆би̑димымъ, сказа̀ пꙋти̑ своѧ̑ мѡѷсе́ови, сыновѡ́мъ і҆и҃лєвымъ хотѣ̑нїѧ своѧ̑. а҃ Ще́дръ и҆ млⷭ҇тивъ гдⷭ҇ь, долготерпѣли́въ и҆ многомлⷭ҇тивъ. в҃ Не до конца̀ прогнѣ́ваетсѧ, нижѐ въ вѣ́къ враждꙋ́етъ: не по беззако́нїємъ на́шымъ сотвори́лъ є҆́сть на́мъ, нижѐ но грѣхѡ́мъ на́шымъ возда́лъ є҆́сть на́мъ. а҃ Ꙗ҆́кѡ по высотѣ̀ нбⷭ҇нѣй ѿ землѝ, ᲂу҆тверди́лъ є҆́сть гдⷭ҇ь млⷭ҇ть свою̀ на боѧ́щихсѧ є҆гѡ̀. в҃ Є҆ли́кѡ ѿстоѧ́тъ восто́цы ѿ за̑падъ, ᲂу҆да́лилъ є҆́сть ѿ на́съ беззакѡ́нїѧ на̑ша. а҃ Ꙗ҆́коже ще́дритъ ѻ҆те́цъ сы́ны, ᲂу҆ще́дри гдⷭ҇ь боѧ́щихсѧ є҆гѡ̀. в҃ Ꙗ҆́кѡ то́й позна̀ созда́нїе на́ше, помѧнꙋ̀, ꙗ҆́кѡ пе́рсть є҆смы̀. а҃ Человѣ́къ, ꙗ҆́кѡ трава̀ дні́е є҆гѡ̀, ꙗ҆́кѡ цвѣ́тъ се́льный, та́кѡ ѡ҆цвѣте́тъ. ꙗ҆́кѡ дꙋ́хъ про́йде въ не́мъ, и҆ не бꙋ́детъ, и҆ не позна́етъ ктомꙋ̀ мѣ́ста своегѡ̀. а҃ Млⷭ҇ть же гдⷭ҇нѧ ѿ вѣ́ка и҆ до вѣ́ка на боѧ́щихсѧ є҆гѡ̀. в҃ И҆ пра́вда є҆гѡ̀ на сынѣ́хъ сынѡ́въ хранѧ́щихъ завѣ́тъ є҆гѡ̀, и҆ по́мнѧщихъ за́пѡвѣди є҆́гѡ, твори́ти ѧ҆̀. а҃ Гдⷭ҇ь на нб҃сѝ ᲂу҆гото́ва прⷭ҇то́лъ сво́й и҆ црⷭ҇тво є҆гѡ̀ всѣ́ми ѡ҆блада́етъ. в҃ Бл҃гослови́те гдⷭ҇а всѝ а҆́гг҃ли є҆гѡ̀, си́льнїи крѣ́постїю, творѧ́щїи сло́во є҆гѡ̀, ᲂу҆слы́шати гла́съ слове́съ є҆гѡ̀. а҃ Бл҃гослови́те гдⷭ҇а всѧ̑ си̑лы є҆гѡ̀, слꙋги̑ є҆гѡ̀ творѧ́щїи во́лю є҆гѡ̀. в҃ Бл҃гослови́те гдⷭ҇а всѧ̑ дѣла̀ є҆гѡ̀, на всѧ́комъ мѣ́стѣ влады́чества є҆гѡ̀.

Пе́рвый ли́къ вы́шшимъ гла́сомъ:

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ.

Вторы́й ли́къ:

И҆ ны́нѣ, и҆ при́снѡ, и҆ во вѣ́ки вѣкѡ́въ, а҆ми́нь.

Па́ки пе́рвый ли́къ:

а҃ Бл҃гословѝ дꙋшѐ моѧ̀ гдⷭ҇а, и҆ всѧ̑ внꙋ́трєннѧѧ моѧ̑ и҆́мѧ ст҃о́е є҆гѡ̀: Бл҃гослове́нъ є҆сѝ гдⷭ҇и.

По є҆ктенїѝ вторы́й ли́къ:

в҃ Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ.

Хвалѝ дꙋшѐ моѧ̀ гдⷭ҇а, восхвалю̀ гдⷭ҇а въ животѣ̀ мое́мъ, пою̀ бг҃ꙋ моемꙋ̀, до́ндеже є҆́смь.

Пе́рвый ли́къ:

а҃ Не надѣ́йтесѧ на кнѧ́зи, на сы́ны человѣ́чєскїѧ, въ ни́хже нѣ́сть сп҃се́нїѧ.

в҃ И҆зы́детъ дꙋ́хъ є҆гѡ̀, и҆ возврати́тсѧ въ зе́млю свою̀, въ то́й де́нь поги́бнꙋтъ всѧ̑ помышлє́нїѧ є҆гѡ̀. а҃ Бл҃же́нъ, є҆мꙋ́же бг҃ъ і҆а́кѡвль помо́щникъ є҆гѡ̀, ᲂу҆пова́нїе є҆гѡ̀ на гдⷭ҇а бг҃а своего̀: в҃ Сотво́ршаго нб҃о и҆ зе́млю, мо́ре, и҆ всѧ̑ ꙗ҆̀же въ ни́хъ: а҃ Хранѧ́щаго и҆́стинꙋ въ вѣ́къ, творѧ́щаго сꙋ́дъ ѡ҆би̑димымъ, даю́щаго пи́щꙋ а҆́лчꙋщымъ. в҃ Гдⷭ҇ь рѣши́тъ ѡ҆кова̑нныѧ, гдⷭ҇ь ᲂу҆мꙋдрѧ́етъ слѣпцы̀, гдⷭ҇ь возво́дитъ низве́ржєнныѧ, гдⷭ҇ь лю́битъ првⷣники. а҃ Гдⷭ҇ь храни́тъ прише́льцы, си́ра и҆ вдовꙋ̀ прїи́метъ, и҆ пꙋ́ть грѣ́шныхъ погꙋби́тъ. в҃ Воцр҃и́тсѧ гдⷭ҇ь во вѣ́къ, бг҃ъ тво́й сїѡ́не, въ ро́дъ и҆ ро́дъ.

И҆ ны́нѣ, гла́съ ѕ҃.

Є҆диноро́дный сн҃е и҆ сло́ве бж҃їй, безсме́ртенъ сы́й, и҆ и҆зво́ливый сп҃се́нїѧ на́шегѡ ра́ди воплоти́тисѧ ѿ ст҃ы́ѧ бцⷣы, и҆ приснодв҃ы мр҃і́и, непрело́жнѡ вочл҃вѣ́чивыйсѧ: распны́йсѧ же, хрⷭ҇тѐ бж҃е, сме́ртїю сме́рть попра́вый, є҆ди́нъ сы́й ст҃ы́ѧ трⷪ҇цы, спрославлѧ́емый ѻ҆ц҃ꙋ̀, и҆ ст҃о́мꙋ дх҃ꙋ, сп҃сѝ на́съ.

Та́же бл҃жє́нны:

На в҃і: а҃ Во црⷭ҇твїи твое́мъ помѧнѝ на́съ гдⷭ҇и. Бл҃же́ни ни́щїи дх҃омъ, ꙗ҆́кѡ тѣ́хъ є҆́сть црⷭ҇тво нбⷭ҇ное. в҃ Бл҃же́ни пла́чꙋщїи ꙗ҆́кѡ ті́и ᲂу҆тѣ́шатсѧ.

На де́сѧть: а҃ Бл҃же́ни кро́тцыи, ꙗ҆́кѡ ті́и наслѣ́дѧтъ зе́млю. в҃ Бл҃же́ни а҆́лчꙋщїи и҆ жа́ждꙋщїи пра́вды, ꙗ҆́кѡ ті́и насы́тѧтсѧ.

На ѻ҆́смь: а҃ Бл҃же́ни млⷭ҇тивїи, ꙗ҆́кѡ ті́и поми́ловани бꙋ́дꙋтъ. в҃ Бл҃же́ни чи́стїи се́рдцемъ, ꙗ҆́кѡ ті́и бг҃а ᲂу҆́зрѧтъ.

На ше́сть: а҃ Бл҃же́ни миротво́рцы, ꙗ҆́кѡ ті́и сы́нове бж҃їи нарекꙋ́тсѧ. в҃ Бл҃же́ни и҆згна́ни пра́вды ра́ди, ꙗ҆́кѡ тѣ́хъ є҆́сть црⷭ҇тво нбⷭ҇ное.

На четы́ре: а҃ Бл҃же́ни є҆стѐ, є҆гда̀ поно́сѧтъ ва́мъ, и҆ и҆зженꙋ́тъ, и҆ рекꙋ́тъ всѧ́къ ѕо́лъ глаго́лъ, на вы̀ лжꙋ́ще менѐ ра́ди. в҃ Ра́дꙋйтесѧ и҆ весели́тесѧ, ꙗ҆́кѡ мзда̀ ва́ша мно́га на нб҃сѣ́хъ.

а҃ Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ.

в҃ И҆ ны́нѣ и҆ при́снѡ и҆ во вѣ́ки вѣкѡ́въ, а҆ми́нь.

Во и҆ны̑ѧ же дни̑, ꙗ҆́коже ᲂу҆ста́въ и҆з̾ѧвлѧ́етъ, пою́тсѧ а҆нтїфѡ́ны сі́и:

А҆нтїфѡ́нъ а҃:

Бл҃го є҆́сть и҆сповѣ́датисѧ гдⷭ҇еви.

Припѣ́въ: Мл҃твами бцⷣы сп҃се сп҃сѝ на́съ.

Сті́хъ: Бл҃го є҆́сть и҆сповѣ́датисѧ гдⷭ҇еви, и҆ пѣ́ти и҆́мени твоемꙋ̀ вы́шнїй. [Припѣ́въ.]

Сті́хъ: Возвѣща́ти заꙋ́тра млⷭ҇ть твою̀ и҆ и҆́стинꙋ твою̀ на всѧ́кꙋ но́щь. [Припѣ́въ.]

Сті́хъ: Ꙗ҆́кѡ пра́въ гдⷭ҇ь бг҃ъ на́шъ, и҆ нѣ́сть непра́вды въ не́мъ. [Припѣ́въ.]

Сла́ва: [Припѣ́въ.] И҆ ны́нѣ: [Припѣ́въ.]

А҆нтїфѡ́нъ в҃:

Гдⷭ҇ь воцр҃и́сѧ, въ лѣ́потꙋ ѡ҆блече́сѧ.

Припѣ́въ: Мл҃твами ст҃ы́хъ твои́хъ, сп҃се сп҃сѝ на́съ.

Сті́хъ: Гдⷭ҇ь воцр҃и́сѧ, въ лѣ́потꙋ ѡ҆блече́сѧ, ѡ҆блече́сѧ гдⷭ҇ь въ си́лꙋ, и҆ препоѧ́сасѧ. [Припѣ́въ.]

Сті́хъ: И҆́бо ᲂу҆твердѝ вселе́ннꙋю, ꙗ҆́же не подви́житсѧ. [Припѣ́въ.]

Сті́хъ: Свидѣ̑нїѧ твоѧ̑ ᲂу҆вѣ́ришасѧ ѕѣлѡ̀: до́мꙋ твоемꙋ̀ подоба́етъ ст҃ы́нѧ гдⷭ҇и, въ долготꙋ̀ дні́й. [Припѣ́въ.]

Сла́ва, и҆ ны́нѣ: Є҆диноро́дный сн҃е:

А҆нтїфѡ́нъ г҃:

Прїиди́те возра́дꙋемсѧ гдⷭ҇еви, воскли́кнемъ бг҃ꙋ сп҃си́телю на́шемꙋ.

Припѣ́въ: Сп҃си́ ны сн҃е бж҃їй, во ст҃ы́хъ ди́венъ сы́й, пою́щыѧ тѝ: а҆ллилꙋ́їа.

Сті́хъ: Предвари́мъ лицѐ є҆гѡ̀ во и҆сповѣ́данїи, и҆ во ѱалмѣ́хъ воскли́кнемъ є҆мꙋ̀: [Припѣ́въ.]

Сті́хъ: Ꙗ҆́кѡ бг҃ъ ве́лїй гдⷭ҇ь, и҆ цр҃ь ве́лїй по все́й землѝ. [Припѣ́въ.]

Сті́хъ: Ꙗ҆́кѡ въ рꙋцѣ̀ є҆гѡ̀ всѝ концы̀ землѝ, и҆ высоты̀ го́ръ тогѡ̀ сꙋ́ть. [Припѣ́въ.]

Сті́хъ: Ꙗ҆́кѡ тогѡ̀ є҆́сть мо́ре, и҆ то́й сотворѝ є҆̀, и҆ сꙋ́шꙋ рꙋ́цѣ є҆гѡ̀ созда́стѣ. [Припѣ́въ.]

По вхо́дѣ же є҆ѵⷢ҇лїа:

Прїиди́те, поклони́мсѧ и҆ припаде́мъ ко хрⷭ҇тꙋ̀. [Припѣ́въ.]

А҆́ще же недѣ́лѧ, припѣ́въ:

Сп҃си́ ны сн҃е бж҃їй, воскр҃сы́й и҆з̾ ме́ртвыхъ пою́щыѧ тѝ: а҆ллилꙋ́їа.

Посе́мъ тропарѝ по чи́нꙋ.

Та́же трист҃о́е. Пе́рвый ли́къ:

Ст҃ы́й бж҃е, ст҃ы́й крѣ́пкїй, ст҃ы́й безсме́ртный поми́лꙋй на́съ. [ѻ҆́ба ли̑ка, три́жды.]

Сла́ва, и҆ ны́нѣ:

Ст҃ы́й безсме́ртный поми́лꙋй на́съ.

Пе́рвый ли́къ вы́шшимъ гла́сомъ:

Ст҃ы́й бж҃е, ст҃ы́й крѣ́пкїй, ст҃ы́й безсме́ртный поми́лꙋй на́съ.

Прокі́менъ, а҆по́столъ, а҆ллилꙋ́їа, є҆ѵⷢ҇лїе.

Сла́ва тебѣ̀ гдⷭ҇и, сла́ва тебѣ̀.

Та́же є҆ктєнїѝ, и҆ херꙋві́мскаѧ пѣ́снь:

И҆̀же херꙋві́мы та́йнѡ ѡ҆бразꙋ́юще, и҆ животворѧ́щей трⷪ҇цѣ трист҃ꙋ́ю пѣ́снь припѣва́юще, всѧ́кое ны́нѣ жите́йское ѿложи́мъ попече́нїе.

Ꙗ҆́кѡ да цр҃ѧ̀ всѣ́хъ под̾и́мемъ, а҆́гг҃льскими неви́димѡ дорѷноси́ма чи́нми. а҆ллилꙋ́їа, а҆ллилꙋ́їа, а҆ллилꙋ́їа.

А҆ сїѐ въ вели́кїй четверто́къ то́чїю пое́тсѧ:

Ве́чери твоеѧ̀ та́йныѧ, дне́сь сн҃е бж҃їй, прича́стника мѧ̀ прїимѝ, не бо̀ врагѡ́мъ твои̑мъ та́йнꙋ повѣ́мъ, ни лобза́нїѧ тѝ да́мъ ꙗ҆́кѡ і҆ꙋ́да, но ꙗ҆́кѡ разбо́йникъ и҆сповѣ́даю тѧ̀: помѧни́ мѧ гдⷭ҇и во црⷭ҇твїи твое́мъ. а҆ллилꙋ́їа, а҆ллилꙋ́їа, а҆ллилꙋ́їа.

Въ вели́кꙋю же сꙋббѡ́тꙋ пою́тъ сїѐ:

Да молчи́тъ всѧ́каѧ пло́ть человѣ́ча, и҆ да стои́тъ со стра́хомъ и҆ тре́петомъ, и҆ ничто́же земно́е въ себѣ̀ да помышлѧ́етъ: цр҃ь бо ца́рствꙋющихъ, и҆ гдⷭ҇ь госпо́дствꙋющихъ прихо́дитъ закла́тисѧ, и҆ да́тисѧ въ снѣ́дь вѣ̑рнымъ. предхо́дѧтъ же семꙋ̀ ли́цы а҆́гг҃льстїи, со всѧ́кимъ нача́ломъ и҆ вла́стїю: многоѻчи́тїи херꙋві́ми, и҆ шестокрила́тїи серафі́ми, ли́ца закрыва́юще, и҆ вопїю́ще пѣ́снь: а҆ллилꙋ́їа, а҆ллилꙋ́їа, а҆ллилꙋ́їа.

Сщ҃е́нникъ, є҆ктєнїѝ. Лю́дїе: Гдⷭ҇и поми́лꙋй. и҆ Пода́й гдⷭ҇и, по ѻ҆бы́чаю:

По є҆ктенїа́хъ, сщ҃е́нникъ: Ми́ръ всѣ̑мъ. Лю́дїе: И҆ дꙋ́хови твоемꙋ̀. Сщ҃е́нникъ: Возлю́бимъ дрꙋ́гъ дрꙋ́га, да є҆диномы́слїемъ и҆сповѣ́мы. Лю́дїе: Ѻ҆ц҃а̀, и҆ сн҃а, и҆ ст҃а́гѡ дх҃а, трⷪ҇цꙋ є҆диносꙋ́щнꙋю и҆ нераздѣ́льнꙋю.

Ст҃ы́й сѷмво́лъ:

Вѣ́рꙋю во є҆ди́наго бг҃а ѻ҆ц҃а̀ вседержи́телѧ, творца̀ нб҃ꙋ и҆ землѝ, ви̑димымъ же всѣ̑мъ и҆ неви̑димымъ. И҆ во є҆ди́наго гдⷭ҇а і҆и҃са хрⷭ҇та̀ сн҃а бж҃їѧ, є҆диноро́днаго, и҆́же ѿ ѻ҆ц҃а̀ рожде́ннаго пре́жде всѣ́хъ вѣ̑къ. Свѣ́та ѿ свѣ́та, бг҃а и҆́стинна ѿ бг҃а и҆́стинна, рожде́нна, не сотворе́нна, є҆диносꙋ́щна ѻ҆ц҃ꙋ̀, и҆́мже всѧ̑ бы́ша. На́съ ра́ди человѣ̑къ, и҆ на́шегѡ ра́ди сп҃се́нїѧ сше́дшаго съ нб҃съ, и҆ воплоти́вшагосѧ ѿ дх҃а ст҃а и҆ мр҃і́и дв҃ы, и҆ вочеловѣ́чшасѧ. Распѧ́таго же за ны̀ при понті́йстѣмъ пїла́тѣ, и҆ страда́вша, и҆ погребе́на, и҆ воскрⷭ҇шаго въ тре́тїй де́нь по писа́нїємъ. И҆ возше́дшаго на нб҃са̀, и҆ сѣдѧ́ща ѡ҆деснꙋ́ю ѻ҆ц҃а̀. И҆ па́ки грѧдꙋ́щаго со сла́вою, сꙋди́ти живы̑мъ и҆ мє́ртвымъ, є҆гѡ́же црⷭ҇твїю не бꙋ́детъ конца̀. И҆ въ дх҃а ст҃а́го, гдⷭ҇а, животворѧ́щаго, и҆́же ѿ ѻ҆ц҃а̀ и҆сходѧ́щаго, и҆́же со ѻ҆ц҃е́мъ и҆ сн҃омъ спокланѧ́ема и҆ ссла́вима, глаго́лавшаго прⷪ҇ро́ки. Во є҆ди́нꙋ ст҃ꙋ́ю собо́рнꙋю и҆ а҆пⷭ҇льскꙋю цр҃ковь. И҆сповѣ́дꙋю є҆ди́но кр҃ще́нїе во ѡ҆ставле́нїе грѣхѡ́въ. Ча́ю воскрⷭ҇нїѧ ме́ртвыхъ: И҆ жи́зни бꙋ́дꙋщагѡ вѣ́ка. А҆ми́нь.

Сщ҃е́нникъ: Ста́немъ до́брѣ: Лю́дїе: Млⷭ҇ть ми́ра, же́ртвꙋ хвале́нїѧ. Сщ҃е́нникъ: Бл҃года́ть гдⷭ҇а: Лю́дїе: И҆ со дх҃омъ твои́мъ. Сщ҃е́нникъ: Горѣ̀ и҆мѣ́имъ сердца̀. Лю́дїе: И҆́мамы ко гдⷭ҇ꙋ. Сщ҃е́нникъ: Бл҃годари́мъ гдⷭ҇а. Лю́дїе: Досто́йно и҆ пра́ведно є҆́сть покланѧ́тисѧ ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ: трⷪ҇цѣ є҆диносꙋ́щнѣй и҆ нераздѣ́льнѣй. Сщ҃е́нникъ: Побѣ́днꙋю пѣ́снь: Лю́дїе: Ст҃ъ, ст҃ъ, ст҃ъ гдⷭ҇ь саваѡ́ѳъ, и҆спо́лнь нб҃о и҆ землѧ̀ сла́вы твоеѧ̀: ѡ҆са́нна въ вы́шнихъ, бл҃гослове́нъ грѧды́й во и҆́мѧ гдⷭ҇не, ѡ҆са́нна въ вы́шнихъ. Сщ҃е́нникъ: Прїими́те, ꙗ҆ди́те: Лю́дїе: А҆ми́нь. Сщ҃е́нникъ: Пі́йте ѿ неѧ̀ всѝ: Лю́дїе: А҆ми́нь. Сщ҃е́нникъ: Твоѧ̑ ѿ твои́хъ: Лю́дїе: Тебѐ пое́мъ, тебѐ бл҃гослови́мъ, тебѐ бл҃годари́мъ гдⷭ҇и, и҆ мо́лимъ ти сѧ бж҃е на́шъ. Сщ҃е́нникъ: И҆зрѧ́днѡ ѡ҆ прест҃ѣ́й: Лю́дїе: Досто́йно є҆́сть ꙗ҆́кѡ вои́стиннꙋ бл҃жи́ти тѧ̀ бцⷣꙋ: приснобл҃же́ннꙋю, и҆ пренепоро́чнꙋю, и҆ мт҃рь бг҃а на́шегѡ. Чⷭ҇тнѣ́йшꙋю херꙋві̑мъ, и҆ сла́внѣйшꙋю без̾ сравне́нїѧ серафі̑мъ, без̾ и҆стлѣ́нїѧ бг҃а сло́ва ро́ждшꙋю, сꙋ́щꙋю бцⷣꙋ тѧ̀ велича́емъ.

А҆́ще же лїтꙋргі́а вели́кагѡ васі́лїа:

Ѡ҆ тебѣ̀ ра́дꙋетсѧ, бл҃года́тнаѧ, всѧ́каѧ тва́рь, а҆́гг҃льскїй собо́ръ и҆ человѣ́ческїй ро́дъ, ѡ҆сщ҃е́нный хра́ме и҆ раю̀ слове́сный, дв҃ственнаѧ похвало̀, и҆з̾ неѧ́же бг҃ъ воплоти́сѧ, и҆ млⷣнецъ бы́сть, пре́жде вѣ̑къ сы́й бг҃ъ на́шъ: ложесна̀ бо твоѧ̑ престо́лъ сотворѝ, и҆ чре́во твоѐ простра́ннѣе нб҃съ содѣ́ла. ѡ҆ тебѣ̀ ра́дꙋетсѧ, бл҃года́тнаѧ, всѧ́каѧ тва́рь, сла́ва тебѣ̀.

Сщ҃е́нникъ, є҆ктєнїѝ. Лю́дїе: Гдⷭ҇и поми́лꙋй, по ѻ҆бы́чаю. Сщ҃е́нникъ: И҆ сподо́би на́съ влⷣко: Лю́дїе: Ѻ҆́ч҃е на́шъ, и҆́же є҆сѝ на нб҃сѣ́хъ, да ст҃и́тсѧ и҆́мѧ твоѐ: да прїи́детъ црⷭ҇твїе твоѐ: да бꙋ́детъ во́лѧ твоѧ̀, ꙗ҆́кѡ на нб҃сѝ и҆ на землѝ: хлѣ́бъ на́шъ насꙋ́щный да́ждь на́мъ дне́сь: и҆ ѡ҆ста́ви на́мъ до́лги на́шѧ, ꙗ҆́коже и҆ мы̀ ѡ҆ставлѧ́емъ должникѡ́мъ на́шымъ: и҆ не введѝ на́съ во и҆скꙋше́нїе: но и҆зба́ви на́съ ѿ лꙋка́вагѡ.

И҆ про́чее по ѻ҆бы́чаю, до: Во́нмемъ. Ст҃а̑ѧ ст҃ы̑мъ. Лю́дїе: Є҆ди́нъ ст҃ъ, є҆ди́нъ гдⷭ҇ь, і҆и҃съ хрⷭ҇то́съ, въ сла́вꙋ бг҃а ѻ҆ц҃а̀, а҆ми́нь.

Прича̑стны седми́цы.

Прича́стный въ недѣ́лю, гла́съ и҃:

Хвали́те гдⷭ҇а съ нб҃съ: А҆ллилꙋ́їа, [три́жды.]

Въ понедѣ́льникъ, гла́съ а҃:

Творѧ́й а҆́гг҃лы своѧ̑ дх҃и, и҆ слꙋги̑ своѧ̑ пла́мень ѻ҆́гненный. А҆ллилꙋ́їа, [три́жды.].

Во вто́рникъ, гла́съ и҃:

Въ па́мѧть вѣ́чнꙋю бꙋ́детъ првⷣникъ: А҆ллилꙋ́їа, [три́жды].

Въ сре́дꙋ, гла́съ ѕ҃:

Ча́шꙋ сп҃се́нїѧ прїимꙋ̀, и҆ и҆́мѧ гдⷭ҇не призовꙋ̀. А҆ллилꙋ́їа, [три́жды.].

Въ четверто́къ, гла́съ ѕ҃:

Во всю̀ зе́млю и҆зы́де вѣща́нїе и҆́хъ и҆ въ концы̀ вселе́нныѧ глаго́лы и҆́хъ. А҆ллилꙋ́їа, [три́жды.].

Въ пѧто́къ, гла́съ ѕ҃:

Сп҃се́нїе содѣ́лалъ є҆сѝ посредѣ̀ землѝ, бж҃е. А҆ллилꙋ́їа, [три́жды.].

Въ сꙋббѡ́тꙋ, гла́съ є҃:

Бл҃же́ни ꙗ҆̀же и҆збра́лъ и҆ прїѧ́лъ є҆сѝ гдⷭ҇и, и҆ па́мѧть и҆́хъ въ ро́дъ и҆ ро́дъ. А҆ллилꙋ́їа, [три́жды.].

Въ ꙗ҆вле́нїе ст҃ы́хъ дарѡ́въ, сщ҃е́нникъ рече́тъ:

Со стра́хомъ бж҃їимъ, и҆ вѣ́рою пристꙋпи́те.

Лю́дїе: Бл҃гослове́нъ грѧды́й во и҆́мѧ гдⷭ҇не, бг҃ъ гдⷭ҇ь, и҆ ꙗ҆ви́сѧ на́мъ.

Сщ҃е́нникъ: Сп҃сѝ бж҃е лю́ди твоѧ̑:

Лю́дїе: Ви́дѣхомъ свѣ́тъ и҆́стинный, прїѧ́хомъ дх҃а нбⷭ҇нагѡ, ѡ҆брѣто́хомъ вѣ́рꙋ и҆́стиннꙋю, нераздѣ́льнѣй трⷪ҇цѣ покланѧ́емсѧ, та́ бо на́съ сп҃сла̀ є҆́сть.

Сщ҃е́нникъ: Всегда̀, ны́нѣ и҆ при́снѡ:

Лю́дїе: А҆ми́нь. Да и҆спо́лнѧтсѧ ᲂу҆ста̀ на̑ша хвале́нїѧ твоегѡ̀ гдⷭ҇и, ꙗ҆́кѡ да пое́мъ сла́вꙋ твою̀: ꙗ҆́кѡ сподо́билъ є҆сѝ на́съ причасти́тисѧ ст҃ы̑мъ твои̑мъ, бж҃е́ствєннымъ, безсмє́ртнымъ, и҆ животворѧ́щымъ та́йнамъ: соблюдѝ на́съ во твое́й ст҃ы́ни, ве́сь де́нь поꙋча́тисѧ пра́вдѣ твое́й. А҆ллилꙋ́їа, [три́жды.].

Сщ҃е́нникъ є҆ктенїю̀ и҆ заамвѡ́ннꙋю мл҃твꙋ, и҆ раздае́тъ а҆нті́дѡръ лю́демъ.

Ли́къ: Бꙋ́ди и҆́мѧ гдⷭ҇не бл҃гослове́нно ѿ ны́нѣ и҆ до вѣ́ка. [Три́жды].

Ѱало́мъ: Бл҃гословлю̀ гдⷭ҇а на всѧ́кое вре́мѧ: ве́сь до конца̀.

Сщ҃е́нникъ: Бл҃гослове́нїе гдⷭ҇не на ва́съ: и҆ Сла́ва тебѣ̀ хрⷭ҇тѐ бж҃е, ᲂу҆пова́нїе на́ше, сла́ва тебѣ̀.

Лю́дїе: Сла́ва, и҆ ны́нѣ: Гдⷭ҇и поми́лꙋй, три́жды. Бл҃гословѝ.

Сщ҃е́нникъ ѿпꙋ́стъ.

Лю́дїе многолѣ́тствꙋютъ по ѻ҆бы́чаю.

Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.