і҆рмосы̀, гла́съ з҃
Гла́съ седмы́й.
Пѣ́снь а҃.
Ма́нїемъ твои́мъ на земны́й ѡ҆́бразъ преложи́сѧ, пре́жде ᲂу҆доборазлива́емое водно́е є҆стество̀, гдⷭ҇и. тѣ́мже немо́креннѡ пѣшеше́ствовавъ і҆и҃ль, пое́тъ тебѣ̀ пѣ́снь побѣ́днꙋю.
[Въ недѣ́лю и҃-ю:] По́нтомъ покры̀ фараѡ́на съ колесни́цами, сокрꙋша́ѧй бра̑ни мы́шцею высо́кою: пои́мъ є҆мꙋ̀, ꙗ҆́кѡ просла́висѧ.
[Ѻ҆смогла́сника:]
Поспѣ́шествовавшемꙋ бг҃ꙋ во є҆гѵ́птѣ мѡѷсе́ови, и҆звестѝ і҆и҃лѧ, томꙋ̀ є҆ди́номꙋ пои́мъ, ꙗ҆́кѡ просла́висѧ.
Сокрꙋши́вшемꙋ бра̑ни мы́шцею свое́ю, вса́дники трїста́ты погрꙋзи́вшемꙋ, пои́мъ є҆мꙋ̀, ꙗ҆́кѡ и҆зба́вителю на́шемꙋ бг҃ꙋ, ꙗ҆́кѡ просла́висѧ.
И҆стрѧ́сшемꙋ бг҃ꙋ фараѡ́на въ мо́ри чермнѣ́мъ, пѣ́снь побѣ́днꙋю пои́мъ, ꙗ҆́кѡ просла́висѧ.
Ѿ стрꙋ́й чермна́гѡ, стѣ́нꙋ сотво́ршемꙋ лю́демъ, и҆ покры́вшемꙋ глꙋбино́ю фараѡ́на со всево́инствомъ, пои́мъ гдⷭ҇еви: сла́внѡ бо просла́висѧ.
Погрꙋзи́вшемꙋ фараѡ́на въ чермнѣ́мъ мо́ри, побѣ́днꙋю пѣ́снь пои́мъ, ꙗ҆́кѡ просла́висѧ.
Мѡѷсе́йскїй же́злъ бж҃е́ственною си́лою чермно́е про́йде мо́ре, и҆ проведѐ лю́ди пою́щыѧ и҆ глаго́лющыѧ: пои́мъ ди́вномꙋ бг҃ꙋ на́шемꙋ побѣ́днꙋю пѣ́снь, ꙗ҆́кѡ просла́висѧ.
Пои́мъ гдⷭ҇еви погрꙋзи́вшемꙋ всю̀ си́лꙋ фараѡ́новꙋ въ мо́ри, побѣ́днꙋю пѣ́снь, ꙗ҆́кѡ просла́висѧ.
И҆змѣ́ншемꙋ бг҃ꙋ і҆и҃лѧ ѿ мо́рѧ чермна́гѡ, побѣ́днꙋю пѣ́снь пои́мъ, ꙗ҆́кѡ просла́висѧ.
Пѣ́снь в҃.
Лю́дїе, внемли́те бж҃їю снизхожде́нїю, ꙗ҆́кѡ ѿ дв҃ы ст҃ы́ѧ роди́сѧ, ꙗ҆́кѡ бл҃говолѝ: томꙋ̀ дади́мъ сла́вꙋ и҆ хвале́нїе.
Ви́дите ви́дите, ꙗ҆́кѡ а҆́зъ є҆́смь бг҃ъ ва́шъ, двє́ри нбⷭ҇ныѧ ѿве́рзый, и҆ ѡ҆дожди́вый ма́ннꙋ лю́демъ и҆збра̑ннымъ, ꙗ҆́кѡ возмѡ́жна мнѣ̀ всѧ̑: творю́ бо, є҆ли̑ка хощꙋ̀.
Вонмѝ нб҃о, и҆ возглаго́лю, и҆ воспою̀ хрⷭ҇та̀ сп҃са мі́ра є҆ди́наго, чл҃вѣколю́бца.
Пѣ́снь г҃.
Въ нача́лѣ нб҃са̀ всеси́льнымъ сло́вомъ твои́мъ ᲂу҆твержде́й гдⷭ҇и сп҃се, и҆ вседѣ́тельнымъ и҆ бж҃їимъ дх҃омъ всю̀ си́лꙋ и҆́хъ, на недви́жимѣмъ мѧ̀ ка́мени и҆сповѣ́данїѧ твоегѡ̀ ᲂу҆твердѝ.
[Въ недѣ́лю и҃-ю:] Съ высоты̀ си́лою ᲂу҆ч҃нкѡ́мъ хрⷭ҇тѐ, до́ндеже ѡ҆блеце́тесѧ, ре́клъ є҆сѝ сѣди́те во і҆ерⷭ҇ли́мѣ: а҆́зъ же ꙗ҆́кѡ менѐ ᲂу҆тѣ́шителѧ и҆но́го, дх҃а моего́ же и҆ ѻ҆́ч҃а послю̀, въ не́мже ᲂу҆твердите́сѧ.
[Ѻ҆смогла́сника:]
Оу҆тверди́сѧ се́рдце моѐ въ гдⷭ҇ѣ, вознесе́сѧ ро́гъ мо́й въ бз҃ѣ мое́мъ, разшири́шасѧ на врагѝ моѧ̑, ᲂу҆ста̀ моѧ̑, возвесели́хсѧ ѡ҆ сп҃се́нїи твое́мъ.
Оу҆тверди́сѧ вѣ́рою хрⷭ҇то́ва цр҃ковь, и҆́бо непреста́ннѡ пѣ́сньми вопїе́тъ, пою́щи: ст҃ъ є҆сѝ гдⷭ҇и: и҆ тѧ̀ пое́тъ дꙋ́хъ мо́й.
Нб҃са̀ ᲂу҆тверди́вый сло́вомъ, и҆ земно́е ѡ҆снова́нїе ᲂу҆крѣпи́вый на вода́хъ мно́гихъ, ᲂу҆твердѝ мо́й ᲂу҆́мъ въ во́лю твою̀ чл҃вѣколю́бче.
На вода́хъ зе́млю ѡ҆снова́вый, сло́ве хрⷭ҇тѐ бж҃е, и҆ на̑ша сердца̀ сла́вити тѧ̀ ᲂу҆твердѝ.
Оу҆тверди́ мѧ хрⷭ҇тѐ къ твоемꙋ̀ славосло́вїю, и҆ ᲂу҆крѣпѝ пѣ́ти а҆́ннинꙋ пѣ́снь тебѣ̀, поѧ̀ во всѣ́хъ: ст҃ъ є҆сѝ гдⷭ҇и, содержа́й всѧ̑.
Въ правосла́вной вѣ́рѣ и҆сповѣ́данїѧ ᲂу҆твердѝ мѧ̀ гдⷭ҇и, да не подви́гнетъ мѧ̀ вра́гъ до конца̀.
И҆́же ѿ безнача́льнагѡ ѻ҆ц҃а̀ сло́ве, сн҃е є҆диноро́дный, просвѣтѝ сердца̀ на̑ша.
Оу҆твержде́нїе мнѣ̀ бꙋ́ди, сло́вомъ ᲂу҆тверди́вый нб҃са̀ и҆ ᲂу҆крѣпи́вый зе́млю на вода́хъ, и҆ и҆зба́ви ꙗ҆́кѡ бг҃ъ, ѿ всѧ́кагѡ ѡ҆бстоѧ́нїѧ.
Въ мокрота́хъ тѧ́жестнꙋ зе́млю ᲂу҆крѣпи́вый всеси́льне водны́хъ, и҆ нб҃са̀ на ничесо́мъ сло́вомъ водрꙋзи́вый, внꙋ́треннѧго слѧче́наго моего̀ страстьмѝ человѣ́ка возвлекі́й хрⷭ҇тѐ, недви́жимомъ твоеѧ̀ вѣ́ры ка́мени ᲂу҆твердѝ.
Пѣ́снь д҃.
Ѻ҆́ч҃а нѣ́дра не ѡ҆ста́вль, и҆ соше́дъ на зе́млю хрⷭ҇тѐ бж҃е та́йнꙋ ᲂу҆слы́шахъ смотре́нїѧ твоегѡ̀, и҆ просла́вихъ тѧ̀ є҆ди́не чл҃вѣколю́бче.
[Въ недѣ́лю и҃-ю:] Смотрѧ́ѧй прⷪ҇ро́къ въ послѣ̑днѧѧ твоѐ хрⷭ҇тѐ прише́ствїе, вопїѧ́ше: твою̀ ᲂу҆слы́шахъ гдⷭ҇и си́лꙋ, ꙗ҆́кѡ всѧ̑ сп҃стѝ пома̑заннаѧ твоѧ̑ прише́лъ є҆сѝ.
[Ѻ҆смогла́сника:]
Покры́ла є҆́сть нб҃са̀ хрⷭ҇тѐ бж҃е, смотре́нїемъ твои́мъ, добродѣ́тель неизрече́нныѧ мꙋ́дрости твоеѧ̀, чл҃вѣколю́бче.
Оу҆слы́шахъ слꙋ́хъ тво́й, и҆ ᲂу҆боѧ́хсѧ, разꙋмѣ́хъ дѣла̀ твоѧ̑, и҆ ᲂу҆жасо́хсѧ, гдⷭ҇и.
Плотско́е прише́ствїе твоѐ хрⷭ҇тѐ ᲂу҆вѣрѧ́ѧ прⷪ҇ро́къ а҆ввакꙋ́мъ взыва́ше: сла́ва си́лѣ твое́й гдⷭ҇и.
Оу҆слы́шахъ слꙋ́хъ тво́й гдⷭ҇и, ꙗ҆́кѡ ꙗ҆ви́лсѧ є҆сѝ на землѝ, за є҆́же сп҃сти́ ны. тѣ́мъ вопїе́мъ: сла́ва си́лѣ твое́й гдⷭ҇и.
Оу҆слы́шахъ слꙋ́хъ тво́й, и҆ ᲂу҆боѧ́хсѧ, гдⷭ҇и, разꙋмѣ́хъ дѣла̀ твоѧ̑, и҆ ᲂу҆жасо́хсѧ: ꙗ҆́кѡ крⷭ҇то́мъ твои́мъ разрꙋши́лъ є҆сѝ сме́рть, живо́тъ на́мъ дарова́вый.
Нб҃са̀ покры́ла є҆́сть добродѣ́тель твоѧ̀ гдⷭ҇и, и҆ твоегѡ̀ хвале́нїѧ всѧ̑ и҆спо́лнилъ є҆сѝ: сла́ва си́лѣ твое́й чл҃вѣколю́бче.
Бж҃е́ственнымъ пред̾ѧвле́ннѣ а҆ввакꙋ́мъ ѡ҆чи́стивсѧ дх҃омъ, междꙋ̀ двою̀ живѡ́тнꙋ прише́ствїе твоѐ проповѣ́да: тре́петомъ же содержи́мь хрⷭ҇тѐ мо́й, слꙋ́хъ ди́вныхъ твои́хъ ᲂу҆слы́шавъ, взыва́ше, ᲂу҆боѧ́хсѧ.
Пѣ́снь є҃.
Но́щь не свѣтла̀ невѣ́рныхъ хрⷭ҇тѐ, вѣ̑рнымъ же просвѣще́нїе въ сла́дости слове́съ твои́хъ. сегѡ̀ ра́ди къ тебѣ̀ ᲂу҆́треннюю, и҆ воспѣва́ю твоѐ бж҃ество̀.
[Въ недѣ́лю и҃-ю:] Стра́ха ра́ди твоегѡ̀ зача́тый гдⷭ҇и, во чре́вѣ прⷪ҇ро́кѡвъ, и҆ рожде́нный на землѝ дх҃ъ сп҃се́нїѧ, а҆пⷭ҇льскаѧ сердца̀ созида́етъ чи̑ста: и҆ въ вѣ́рныхъ пра́вый ѡ҆бновлѧ́етсѧ: свѣ́тъ бо и҆ ми́ръ, занѐ твоѧ̑ повелѣ́нїѧ.
[Ѻ҆смогла́сника:]
Оу҆́тренююще сло́ве, въ сла́вꙋ твою̀ и҆ хвалꙋ̀, восхвалѧ́емъ непреста́ннѡ ѡ҆́бразъ крⷭ҇та̀ твоегѡ̀, є҆го́же да́лъ є҆сѝ на́мъ ѻ҆рꙋ́жїе въ по́мощь.
Разгна́вый но́щь страстнꙋ́ю, возсїѧ́й мѝ свѣ́тъ ᲂу҆́мный, началоро́днꙋю тьмꙋ̀ ѿгна́въ бе́здны, и҆ первозда́нный свѣ́тъ возсїѧ́вый мі́рꙋ, содѣ́телю всѣ́хъ.
Гдⷭ҇и бж҃е мо́й, ѿ но́щи ᲂу҆́треневавъ тебѣ̀ молю́сѧ: пода́ждь мѝ ѡ҆ставле́нїе прегрѣше́нїй мои́хъ, и҆ къ свѣ́тꙋ твои́хъ повелѣ́нїй пꙋти̑ моѧ̑ напра́ви, молю́сѧ.
Оу҆́тренюетъ дꙋ́хъ мо́й къ тебѣ̀ бж҃е, занѐ свѣ́тъ є҆сѝ, и҆ твоѧ̑ повелѣ̑нїѧ бы́ша и҆сцѣлє́нїѧ рабѡ́мъ твои̑мъ чл҃вѣколю́бче.
Свѣ́та мнѣ́нїемъ ко тьмѣ̀ низри́нꙋвшаѧ помрачи́сѧ пре́лесть: свѣ́тъ бо вои́стиннꙋ непристꙋ́пный и҆ и҆́стинный бг҃оѧвле́нїѧ возсїѧ̀. тѣ́мже бж҃е́ственнѣ ѿ но́щи ᲂу҆́тренююще, пѣ́снь воспѣва́емъ.
Роса̀, ꙗ҆̀же ѿ тебѐ хрⷭ҇тѐ бж҃е, и҆сцѣле́нїе вѣ̑рнымъ на́мъ ꙗ҆ви́сѧ: земли́ же нече́ствꙋющихъ ѕлочести́во паде́нїе ѡ҆бѣща́етсѧ. тѣ́мже ѿ но́щи ᲂу҆́тренююще, пѣ́снь тѝ прино́симъ.
Но́щїю мѧ̀ страсте́й помраче́ннаго, ѡ҆зарѝ свѣ́те непристꙋ́пный воздви́жима, да ᲂу҆́тренюѧ зовꙋ́ ти: свѣ́тъ и҆ ми́ръ повелѣ̑нїѧ твоѧ̑.
Къ тебѣ̀ ᲂу҆́тренюю, и҆ тебѣ̀ вопїю̀ бл҃гоꙋтро́бне гдⷭ҇и: ѡ҆мраче́ннꙋю грѣхмѝ дꙋ́шꙋ мою̀, свѣ́томъ ѡ҆зари́въ за́повѣдей твои́хъ, наста́ви.
Пѣ́снь ѕ҃.
І҆ѡ́на и҆з̾ чре́ва а҆́дова вопїѧ́ше: возведѝ ѿ тлѝ живо́тъ мо́й. мы́ же тебѣ̀ вопїе́мъ: всеси́льне сп҃се, поми́лꙋй на́съ.
[Въ недѣ́лю и҃-ю:] Пла́вающаго въ молвѣ̀ жите́йскихъ попече́нїй, съ корабле́мъ потоплѧ́ема грѣхѝ. и҆ дꙋшетлѣ́нномꙋ ѕвѣ́рю примета́ема, ꙗ҆́кѡ і҆ѡ́на хрⷭ҇тѐ вопїю́ тѝ: и҆з̾ смертоно́сныѧ глꙋбины̀ возведи́ мѧ.
[Ѻ҆смогла́сника:]
Во глꙋбинꙋ̀ грѣхо́внꙋю впа́дсѧ, бл҃же, ꙗ҆́кѡ і҆ѡ́на ѿ ки́та вопїю́ ти. возведѝ ѿ тлѝ живо́тъ мо́й, и҆ сп҃си́ мѧ чл҃вѣколю́бче.
И҆з̾ глꙋбины̀ возве́лъ є҆сѝ і҆ѡ́нꙋ прⷪ҇ро́ка твоего̀ гдⷭ҇и, и҆ менѐ вопїю́ща и҆з̾ глꙋбины̀ безмѣ́рныхъ мои́хъ прегрѣше́нїй возведѝ млⷭ҇тиве, ꙗ҆́кѡ чл҃вѣколю́бецъ.
Возопи́хъ, гдⷭ҇и внегда̀ скорбѣ́ти мѝ къ тебѣ̀, и҆ возве́лъ є҆сѝ живо́тъ мо́й многоми́лостиве.
Возопи́хъ внегда̀ скорбѣ́ти мѝ къ тебѣ̀: ᲂу҆глѣбо́хъ бо въ тимѣ́нїи глꙋбины̀ прегрѣше́нїй мно́гихъ, и҆ ꙗ҆́вльсѧ возведи́ мѧ ѿ тлѝ.
Возопи́хъ, гдⷭ҇и, внегда̀ скорбѣ́ти мѝ и҆ сп҃со́хсѧ, и҆ воспою́ тѧ сп҃са моего̀.
Ѿ мно́жества прегрѣше́нїй мои́хъ, ꙗ҆́кѡ і҆ѡ́нꙋ ѿ ки́та и҆зба́ви мѧ̀, є҆ди́не чл҃вѣколю́бче.
Пѣ́снь з҃.
Пе́щь ѻ҆́троцы ѻ҆гнепа́льнꙋ дре́вле, росоточа́щꙋ показа́ша, є҆ди́наго бг҃а воспѣва́юще и҆ глаго́люще: превозноси́мый ѻ҆тцє́въ бг҃ъ и҆ препросла́вленъ.
[Въ недѣ́лю и҃-ю:] Въ пе́щь ѻ҆́гненнꙋю вве́ржени прпⷣбнїи ѻ҆́троцы, ѻ҆́гнь въ ро́сꙋ преложи́ша, воспѣва́нїемъ си́це вопїю́ще. бл҃гослове́нъ є҆сѝ, гдⷭ҇и бж҃е ѻ҆тє́цъ на́шихъ.
[Ѻ҆смогла́сника:]
Пе́щь горѧ́щꙋю ѡ҆роси́лъ є҆сѝ сп҃се, ѻ҆́троки сп҃слъ є҆сѝ пою́щыѧ и҆ глаго́лющыѧ: бл҃гослове́нъ є҆сѝ во вѣ́ки, гдⷭ҇и бж҃е ѻ҆тє́цъ на́шихъ.
Сꙋ́щымъ въ пещѝ ѻ҆трокѡ́мъ твои̑мъ сп҃се не прикоснꙋ́сѧ, нижѐ стꙋжѝ ѻ҆́гнь, тогда̀ трїѐ ꙗ҆́кѡ є҆ди́нѣми ᲂу҆сты̀ поѧ́хꙋ, и҆ бл҃гословлѧ́хꙋ глаго́люще: бл҃гослове́нъ є҆сѝ бж҃е ѻ҆тє́цъ на́шихъ.
Въ пещѝ ѡ҆бличи́лъ є҆сѝ ꙗ҆́вльсѧ персі́йское безꙋ́мное златотво́рное и҆гра́нїе. тѣ́мже ѻ҆́троцы позна́вше тѧ̀ неизмѣ́ннаго ѡ҆́браза ѻ҆́ч҃а, бл҃гослове́нъ є҆сѝ, зовѧ́хꙋ, бж҃е ѻ҆тє́цъ на́шихъ.
А҆́гг҃ломъ ѻ҆́троки въ пещѝ сп҃сы́й, и҆ пла́мень въ ро́сꙋ и҆̀мъ преложи́вый, бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ.
Херꙋві́мѡвъ ѡ҆бꙋзда́телю, и҆ созда́телю всѣ́хъ, ѻ҆́троки въ пещѝ сп҃сы́й, бл҃гослове́нъ є҆сѝ во вѣ́ки гдⷭ҇и бж҃е ѻ҆тє́цъ на́шихъ.
Мꙋчи́телева повелѣ́нїѧ ѻ҆́троцы не послꙋ́шаша, пе́щи не ᲂу҆боѧ́шасѧ, бг҃ꙋ же воспѣва́хꙋ: ѻ҆тцє́въ бж҃е бл҃гослове́нъ є҆сѝ.
Въ пещѝ сꙋ́ще халде́йстѣй, а҆враа́мстїи ѻ҆́троцы ликова́хꙋ со а҆́гг҃ломъ, глаго́люще: ѻ҆тє́цъ на́шихъ бж҃е бл҃гослове́нъ є҆сѝ.
Пѣ́снь и҃.
Въ пещѝ ѻ҆́троки подража́юще, дх҃о́внꙋю ро́сꙋ прїе́мшїи, вѣ́рою зове́мъ: бл҃гослови́те дѣла̀ гдⷭ҇нѧ гдⷭ҇а.
[Въ недѣ́лю и҃-ю:] Неѡпа́льнаѧ ѻ҆гню̀ въ сїна́и прича́щшаѧсѧ кꙋпина̀ бг҃а ꙗ҆вѝ: медленноѧзы́чномꙋ и҆ гꙋгни́вомꙋ мѡѷсе́ови, и҆ ѻ҆́троки ре́вность бж҃їѧ трѝ непребори̑мыѧ во ѻ҆гнѝ пѣвцы̀ показа̀: всѧ̑ дѣла̀ гдⷭ҇нѧ гдⷭ҇а по́йте, и҆ превозноси́те во всѧ̑ вѣ́ки.
[Ѻ҆смогла́сника:]
Є҆ди́наго безнача́льнаго цр҃ѧ̀ сла́вы, є҆го́же бл҃гословѧ́тъ нбⷭ҇ныѧ си̑лы, и҆ трепе́щꙋтъ чи́ни а҆́гг҃льстїи, по́йте сщ҃е́нницы, лю́дїе превозноси́те є҆го̀ во вѣ́ки.
А҆́гг҃льми немо́лчнѡ въ вы́шнихъ сла́вимаго бг҃а, нб҃са̀ нб҃съ, землѧ̀ и҆ го́ры и҆ хо́лми, и҆ глꙋбина̀, и҆ ве́сь ро́дъ человѣ́ческїй, пѣ́сньми того̀ ꙗ҆́кѡ созда́телѧ и҆ и҆зба́вителѧ бл҃гослови́те.
Всѣ́хъ зижди́телѧ, и҆ сп҃са дꙋ́шъ на́шихъ, по́йте лю́дїе хрⷭ҇та̀ бг҃а на́шего, и҆ превозноси́те є҆го̀ во вѣ́ки.
Гдⷭ҇а всѧ̑ дѣла̀ бл҃гослови́те, ꙗ҆́кѡ зижди́телѧ и҆ творца̀ всѣ́хъ.
Ѻ҆́троцы зовѧ́хꙋ въ пещѝ ѡ҆роше́ни: тва́рь да бл҃гослови́тъ всѧ́чєскаѧ сло́вомъ созда́вшаго, и҆ превозно́ситъ є҆го̀ во вѣ́ки.
Вои́стиннꙋ сꙋ́щаго бг҃а, и҆ всѣ́хъ сꙋщества̀ вино́внаго, хрⷭ҇та̀ превозно́симъ, и҆ славосло́вимъ во всѧ̑ вѣ́ки.
Пе́щь дре́вле ѻ҆гне́мъ ѡ҆палѧ́емꙋю бг҃очести́вїи попра́ша ѻ҆́троцы. не бо̀ стра́хъ мꙋчи́телевꙋ покори́шасѧ, но любо́вїю же па́че бг҃оче́стїѧ пали́ми глаго́лахꙋ: бл҃гослови́те всѧ̑ дѣла̀ гдⷭ҇нѧ гдⷭ҇а.
Стра́шнаго херꙋві́мѡмъ, и҆ чꙋ́днаго серафі́мѡмъ, и҆ мі́рꙋ творца̀, сщ҃е́нницы, и҆ рабѝ, и҆ дꙋ́си првⷣныхъ, по́йте, бл҃гослови́те, и҆ превозноси́те є҆го̀ во вѣ́ки.
Пѣ́снь ѳ҃.
Па́че є҆стества̀ мт҃рь, и҆ по є҆стествꙋ̀ дв҃ꙋ, є҆ди́нꙋ въ жена́хъ бл҃гослове́ннꙋю, пѣ́сньми вѣ́рнїи бцⷣꙋ велича́емъ.
[Въ недѣ́лю и҃-ю:] Нетлѣ́нїѧ и҆скꙋше́нїемъ ро́ждшаѧ, и҆ всехитрецꙋ̀ сло́вꙋ пло́ть взаимода́вшаѧ, мт҃и неискꙋсомꙋ́жнаѧ дв҃о бцⷣе, прїѧ́телище нестерпи́магѡ, село̀ невмѣсти́магѡ, зижди́телѧ твоегѡ̀, тѧ̀ велича́емъ.
[Ѻ҆смогла́сника:]
Всепѣ́таѧ нб҃съ превы́шшаѧ, безнача́льное сло́во безсѣ́меннѡ заче́ншаѧ, и҆ воплоще́ннаго бг҃а ро́ждшаѧ человѣ́кѡмъ: тѣ́мъ тѧ̀ всѝ велича́емъ.
Мт҃и бж҃їѧ и҆ дв҃а, ро́ждшаѧ и҆ дв҃ствꙋющаѧ па́ки, не є҆стества̀ дѣ́ло, но бж҃їѧ снизхожде́нїѧ: тѣ́мъ ꙗ҆́кѡ є҆ди́нꙋ бж҃їихъ чꙋде́съ сподо́бльшꙋюсѧ, тѧ̀ при́снѡ велича́емъ.
Воплоще́ннаго сло́ва безсѣ́меннѡ ѿ тебѐ бг҃олѣ́пнѡ родила̀ є҆сѝ дв҃о бцⷣе, и҆ тѧ̀ велича́емъ.
Безсѣ́менно ржⷭ҇тва̀ зача́тїе кто̀ ска́жетъ ѿ человѣ̑къ; нетлѣ́ннагѡ ржⷭ҇тва̀ рожде́нїю кто̀ не почꙋди́тсѧ ѿ земноро́дныхъ; тѣ́мъ тѧ̀ племена̀ земна̑ѧ бцⷣе велича́емъ.
Тѧ̀ ски́нїю ст҃ꙋ́ю, ѡ҆дꙋшевле́нный ковче́гъ, ю҆́же премꙋ́дрость бж҃їѧ созда̀, и҆́стиннꙋю бцⷣꙋ пѣ́сньми велича́емъ.
Тѧ̀ пречⷭ҇тꙋю мт҃рь и҆ дв҃ꙋ, невмѣсти́мое сло́во во ᲂу҆тро́бꙋ вмѣсти́вшꙋю, и҆ роди́вшꙋю пло́тїю, пѣ́сньми велича́емъ.
Ра́дꙋйсѧ невѣ́сто свѣ́тлаѧ, мт҃и свѣтода́вца, ра́дꙋйсѧ вмѣсти́вшаѧ невмѣсти́маго во ᲂу҆тро́бѣ твое́й: ра́дꙋйсѧ самѣ́хъ херꙋві́мѡвъ чⷭ҇тнѣ́йшаѧ, ро́ждшаѧ сп҃са дꙋ́шъ на́шихъ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.