і҆рмосы̀, гла́съ д҃
Гла́съ четве́ртый.
Пѣ́снь а҃.
Мо́рѧ чермнꙋ́ю пꙋчи́нꙋ невла́жными стопа́ми дре́внїй пѣшеше́ствовавъ і҆и҃ль, крⷭ҇тоѡбра́зныма мѡѷсе́овыма рꙋка́ма, а҆мали́ковꙋ си́лꙋ въ пꙋсты́ни побѣди́лъ є҆́сть.
[Бл҃говѣ́щенїѧ:] Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ свѣ́тлѡ торжествꙋ́ѧ, и҆ воспою̀ ра́дꙋѧсѧ тоѧ̀ ꙾чꙋдеса̀.꙾[[[Оу҆спе́нїю:] ꙾ᲂу҆спе́нїе꙾. [Введе́нїю:] ꙾вхожде́нїе.꙾]]
[Въ недѣ́лю ва́їй:] Ꙗ҆ви́шасѧ и҆сто́чницы бе́здны, вла́ги неприча̑стны: и҆ ѿкры́шасѧ мо́рѧ волнꙋ́ющасѧ ѡ҆снова́нїѧ бꙋ́рею: ма́нїемъ бо запрети́лъ є҆сѝ є҆мꙋ̀, и҆зрѧ̑дныѧ же лю́ди спа́слъ є҆сѝ, пою́щыѧ побѣ́днꙋю пѣ́снь тебѣ̀ гдⷭ҇и.
[Въ недѣ́лю и҃-ю:] Бж҃е́ственнымъ покрове́нъ медленноѧзы́чный мра́комъ, и҆звиті́йствова бг҃опи́санный зако́нъ: ти́нꙋ бо ѿтрѧ́съ ѻ҆чесѐ ᲂу҆́мнагѡ, ви́дитъ сꙋ́щаго, и҆ наꙋча́етсѧ дх҃а ра́зꙋмꙋ, хвалѧ̀ бж҃е́ственными пѣ́сньми.
[На преѡбраже́нїи:] Ли́цы і҆и҃льтестїи невла́жными стопа́ми по́нтъ чермны́й, и҆ вла́жнꙋю глꙋбинꙋ̀ прогна́вше, вса́дники трїста́ты врагѝ ви́дѧще въ не́й погрꙋжє́ны, съ весе́лїемъ поѧ́хꙋ: пои́мъ бг҃ꙋ на́шемꙋ, ꙗ҆́кѡ просла́висѧ.
[Ѻ҆смогла́сника:]
Трїста́ты крѣ̑пкїѧ, рожде́йсѧ ѿ дв҃ы, безстра́стїѧ во глꙋбинѣ̀, дꙋшѝ трича́стное потопѝ молю́сѧ, да тебѣ̀ ꙗ҆́кѡ въ тѷмпа́нѣ, во ᲂу҆мерщвле́нїи тѣлесѐ побѣ́дное воспою̀ пѣ́нїе.
Порази́вый є҆гѵ́пта, и҆ фараѡ́на мꙋчи́телѧ погрꙋзи́вый въ мо́ри, лю́ди спа́слъ є҆сѝ и҆з̾ рабо́ты, мѡѷсе́йски пою́щыѧ пѣ́снь побѣ́днꙋю, ꙗ҆́кѡ просла́висѧ.
Пои́мъ гдⷭ҇ви пресла́внѡ погрꙋзи́вшемꙋ фараѡ́на въ мо́ри пѣ́снь побѣ́днꙋю, ꙗ҆́кѡ просла́висѧ.
Воспою̀ тебѣ̀ гдⷭ҇и бж҃е мо́й, ꙗ҆́кѡ и҆зве́лъ є҆сѝ лю́ди и҆з̾ рабѡ́ты є҆гѵ́петскїѧ, покры́лъ же є҆сѝ колесни̑цы фараѡ́нѡвы и҆ си́лꙋ.
Нѣ́сть тебѣ̀ подо́бенъ препросла́вленный гдⷭ҇и, рꙋко́ю бо крѣ́пкою и҆зба́вилъ є҆сѝ лю́ди, ꙗ҆̀же стѧжа́лъ є҆сѝ чл҃вѣколю́бче.
Пои́мъ пѣ́снь но́вꙋю цр҃ю̀ вѣкѡ́въ, ꙗ҆́кѡ просла́висѧ.
Пои́мъ лю́дїе ди́внѡ чꙋдодѣ́йствовавшемꙋ въ чермнѣ́мъ мо́ри хрⷭ҇тꙋ̀ бг҃ꙋ: ꙗ҆́кѡ дре́вле і҆и҃лѧ всевоѡрꙋже́на стопа́ми пѣшеше́ствовати непрохо́днꙋю сотворѝ, и҆ ѕло́бы дѣлода́телѧ фараѡ́на во глꙋбинѣ̀ потопѝ.
Под̾ ѻ҆́блакомъ свѣ́тлымъ и҆ столпо́мъ ѻ҆́гненнымъ наставлѧ́емый проше́дъ мо́ре сꙋ́шею, и҆ сїѐ пѣшеше́ствꙋѧй ꙗ҆́кѡ въ пꙋсты́ни и҆збра́нный тво́й і҆и҃ль, хрⷭ҇тѐ, побѣ́днꙋю пѣ́снь пое́тъ тебѣ̀ гдⷭ҇и.
Колесни̑цы фараѡ́нѡвы, и҆ си́лꙋ є҆гѡ̀ вве́рже въ мо́ре крѣ́пкїй въ бра́нехъ, воспое́мъ пѣ́снь но́вꙋю, ꙗ҆́кѡ просла́висѧ.
Пое́мъ пѣ́снь побѣ́днꙋю є҆ди́номꙋ бг҃ꙋ сотво́ршемꙋ пресла̑внаѧ: дре́вле бо фараѡ́на со всево́инствомъ въ мо́ри погрꙋзѝ.
Предѣли́въ пꙋчи́нꙋ чермнꙋ́ю бг҃ъ, фараѡ́на погрꙋзи́вый въ не́й, прове́дъ мѡѷсе́а немо́креннѡ въ пꙋсты́ню, и҆ ѡ҆дожди́въ ма́ннꙋ въ снѣ́дь лю́демъ і҆и҃лєвымъ, ꙗ҆́кѡ си́ленъ.
Наста́вльшемꙋ дре́вле і҆и҃лѧ, бѣжа́щаго ѿ рабо́ты фараѡ́новы, и҆ въ пꙋсты́ни пита́вшемꙋ, пои́мъ и҆зба́вителю бг҃ꙋ на́шемꙋ, ꙗ҆́кѡ просла́висѧ.
Пресла̑внаѧ сотвори́вый чꙋдеса̀ гдⷭ҇ь рꙋко́ю мѡѷсе́овою, рꙋка́ма ста́рца дне́сь ѡ҆б̾е́млетъсѧ, ꙗ҆́кѡ младе́нецъ во хра́мѣ. томꙋ̀ вѣ́рнѡ возопїи́мъ лю́дїе пѣ́снь побѣ́днꙋю: сла́внѡ бо просла́висѧ.
Чꙋдодѣ́йствовавшемꙋ высо́кою мы́шцею бг҃ꙋ, въ мо́ри чермнѣ́мъ а҆́гг҃льскимъ предпꙋтетворе́нїемъ, и҆ сп҃сшемꙋ і҆и҃лѧ въ концѣ̀ бе́здны, и҆ конегони́телей свѧза́вшемꙋ ѻ҆́си, побѣ́днꙋю пѣ́снь пои́мъ томꙋ̀, ꙗ҆́кѡ просла́висѧ.
Пѣ́снь в҃.
Дади́те лю́дїе вели́чїе хрⷭ҇тꙋ̀ бг҃ꙋ на́шемꙋ, ѿ дв҃ы ро́ждшемꙋсѧ во сп҃се́нїе человѣ́кѡмъ.
Ви́дите ви́дите, ꙗ҆́кѡ а҆́зъ є҆́смь сло́во, во ᲂу҆тро́бꙋ мт҃ре неѡпи́саннѡ вше́дъ, не разлꙋчи́всѧ ѿ ѻ҆ц҃а̀, ꙗ҆́кѡ бг҃ъ же соисполнѧ́ѧ съ го́рними ни̑жнѧѧ, и҆ подава́ѧ ве́лїю млⷭ҇ть.
Дади́мъ вели́чїе хрⷭ҇тꙋ̀ бг҃ꙋ на́шемꙋ, воздви́женномꙋ на крⷭ҇тъ, на сп҃се́нїе всегѡ̀ мі́ра.
Ви́дите ви́дите, ꙗ҆́кѡ а҆́зъ є҆́смь бг҃ъ ᲂу҆мерщвлѧ́ѧ и҆ животворѧ́й, дарова́вый во́дꙋ и҆з̾ ка́мене несѣко́ма, и҆ ѡ҆дожди́вый ма́ннꙋ на пи́щꙋ лю́демъ і҆и҃лєвымъ, ꙗ҆́кѡ си́ленъ.
Пѣ́снь г҃.
Весели́тсѧ ѡ҆ тебѣ̀ цр҃ковь твоѧ̀ хрⷭ҇тѐ, зовꙋ́щи: ты̀ моѧ̀ крѣ́пость гдⷭ҇и, и҆ прибѣ́жище и҆ ᲂу҆твержде́нїе.
[Бл҃говѣ́щенїѧ:] Твоѧ̑ пѣсносло́вцы бцⷣе, живы́й и҆ незави́стный и҆сто́чниче, ли́къ себѣ̀ совокꙋ́пльшыѧ, дх҃о́внѡ ᲂу҆твердѝ, въ бж҃е́ственнѣй твое́й сла́вѣ вѣнцє́въ сла́вы сподо́би.
[Оу҆спе́нїю:] Твоѧ̑ пѣсносло́вцы бцⷣе, живы́й и҆ незави́стный и҆сто́чниче, ли́къ себѣ̀ совокꙋ́пльшыѧ, дх҃о́внѡ ᲂу҆твердѝ, ꙳въ бж҃е́ственнѣй па́мѧти твое́й вѣнцє́въ сла́вы сподо́би.[[[Введе́нїю:] ꙳въ чⷭ҇тнѣ́мъ вхожде́нїи твое́мъ вѣнцє́въ сла́вы сподо́би.]]
[Въ недѣ́лю ва́їй:] Точа́щїй краесѣко́мый повелѣ́нїемъ твои́мъ, тве́рдый сса́ша ка́мень і҆и҃льтестїи лю́дїе. ка́мень же ты̀ є҆сѝ хрⷭ҇тѐ и҆ жи́знь, на не́мже ᲂу҆тверди́сѧ цр҃ковь зовꙋ́щаѧ: ѡ҆са́нна, бл҃гослове́нъ є҆сѝ грѧды́й.
[Въ недѣ́лю и҃-ю:] Разве́рзе ᲂу҆тро́бы неча́дствовавшїѧ ᲂу҆́зы, доса́дꙋ же неꙋдоботерпи́мꙋ бл҃гоча́дствꙋющїѧ, є҆ди́на мл҃тва прⷪ҇ро́чицы дре́вле а҆́нны, носѧ́щїѧ дꙋ́хъ сокрꙋше́нъ, къ си́льномꙋ и҆ бг҃ꙋ ра́зꙋмѡвъ.
[Ѻ҆смогла́сника:]
Съ высоты̀ снизше́лъ є҆сѝ во́лею на зе́млю, превы́шше всѧ́кагѡ нача́ла, и҆ смире́нное возне́слъ є҆сѝ, и҆з̾ а҆́да преиспо́днѧгѡ, є҆стество̀ человѣ́ческое: нѣ́сть бо ст҃ъ па́че тебѐ чл҃вѣколю́бче.
Оу҆твержда́ѧй гро́мъ, и҆ созида́ѧй дх҃ъ, ᲂу҆твердѝ менѐ гдⷭ҇и, да тѧ̀ пою̀ и҆́стиннѡ, и҆ творю̀ во́лю твою̀: ꙗ҆́кѡ нѣ́сть ст҃ъ, ꙗ҆́кѡ ты̀ бж҃е на́шъ.
[На преѡбраже́нїе:] Лꙋ́къ си́льныхъ и҆знемо́же, и҆ немощствꙋ́ющїи препоѧ́сашасѧ си́лою: сегѡ̀ ра́ди ᲂу҆тверди́сѧ въ гдⷭ҇ѣ се́рдце моѐ.
Не мꙋ́дростїю, и҆ си́лою, и҆ бога́тствомъ хва́лимсѧ, но тобо́ю ѻ҆́ч҃ею ѵ҆поста́сною мꙋ́дростїю, хрⷭ҇тѐ: нѣ́сть бо ст҃ъ па́че тебѐ чл҃вѣколю́бче.
Ст҃ъ є҆сѝ гдⷭ҇и бж҃е на́шъ, ᲂу҆твердѝ и҆ на̑ша сердца̀ непреста́ннѡ вопи́ти тебѣ̀: пра́веденъ нѣ́сть па́че тебѐ гдⷭ҇и.
Оу҆твержде́нїе на тѧ̀ надѣ́ющихсѧ: ᲂу҆твердѝ гдⷭ҇и въ вѣ́рѣ правосла́внѣй твое́й, ᲂу҆твердѝ на́съ ꙗ҆́кѡ чл҃вѣколю́бецъ.
Ꙗ҆́кѡ непло́ды родѝ ѿ ꙗ҆зы̑къ цр҃ковь, и҆ мно́гое въ ча́дѣхъ и҆знемо́же со́нмище, чꙋ́дномꙋ бг҃ꙋ на́шемꙋ возопїи́мъ: ст҃ъ є҆сѝ гдⷭ҇и.
Оу҆твержде́нїе вѣ́рныхъ, и҆ похвало̀, и҆ нетлѣ́нїѧ и҆сто́чниче, и҆ бл҃ги́хъ прошенїода́вче хрⷭ҇тѐ, въ любвѝ твое́й ᲂу҆тверди́ мѧ.
Оу҆тверди́сѧ се́рдце моѐ въ гдⷭ҇ѣ, даю́щемъ мл҃твꙋ молѧ́щемꙋсѧ, ꙗ҆́кѡ лꙋ́къ си́льныхъ и҆знемо́же, и҆ немощствꙋ́ющїи препоѧ́сашасѧ си́лою.
Да не хва́литсѧ мꙋ́дръ хвалѧ́йсѧ, но ѡ҆ се́мъ є҆́же разꙋмѣва́ти: ꙗ҆́кѡ нѣ́сть ст҃ъ, ꙗ҆́кѡ бг҃ъ на́шъ возносѧ́й ро́гъ на́шъ, даѧ́й крѣ́пость царє́мъ на́шымъ.
Оу҆тверди́сѧ се́рдце моѐ въ гдⷭ҇ѣ, вознесе́сѧ ро́гъ мо́й въ бз҃ѣ мое́мъ: ꙗ҆́кѡ нѣ́сть ст҃ъ па́че тебѐ гдⷭ҇и.
Вы́шнїй сп҃се си́лъ, коле́блемꙋю дꙋ́шꙋ мою̀ ᲂу҆твердѝ въ во́ли твое́й, да и҆ а҆́зъ сла́влю твоѐ со безпло́тными бж҃е́ственное бл҃голѣ́пїе.
Въ гдⷭ҇ѣ бз҃ѣ мое́мъ се́рдце моѐ ᲂу҆тверди́сѧ. тѣ́мъ немощствꙋ́ющїи препоѧ́сашасѧ си́лою.
А҆́нна, пре́жде безча́днаѧ и҆ непло́днаѧ, ѡ҆бѣща́нїѧ и҆мѧ́ше пло́дъ, самꙋ́ила: ны́нѣ же а҆́нна прⷪ҇ро́чица въ хра́мъ прише́дши, бл҃годарѧ́ше на́съ ра́ди младе́нствовавшаго бг҃а, и҆ ста́рческими ѡ҆б̾ѧ́тїи прїе́млемаго.
Пѣ́снь д҃.
Вознесе́на тѧ̀ ви́дѣвши цр҃ковь на крⷭ҇тѣ̀, сл҃нце пра́ведное, ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й гдⷭ҇и.
[Бл҃говѣ́щенїѧ:] Сѣдѧ́й въ сла́вѣ, на прⷭ҇то́лѣ бж҃ства̀, во ѻ҆́блацѣ ле́гцѣ, прїи́де і҆и҃съ пребж҃е́ственный нетлѣ́нною дла́нїю, и҆ сп҃сѐ зовꙋ́щыѧ: сла́ва хрⷭ҇тѐ си́лѣ твое́й.
Неизслѣ́дный бж҃їй совѣ́тъ, є҆́же ѿ дв҃ы воплоще́нїѧ, тебѐ вы́шнѧгѡ, прⷪ҇ро́къ а҆ввакꙋ́мъ ᲂу҆смотрѧ́ѧ зовѧ́ше: сла́ва си́лѣ твое́й гдⷭ҇и.
[Въ недѣ́лю ва́їй:] Хрⷭ҇то́съ грѧды́й ꙗ҆́вственнѡ бг҃ъ на́шъ: прїи́детъ и҆ не закосни́тъ, ѿ горы̀ прїѡсѣне́нныѧ ча́щи, ѻ҆трокови́цы ражда́ющїѧ неискꙋсомꙋ́жныѧ, прⷪ҇ро́къ дре́вле глаго́летъ. тѣ́мъ всѝ вопїе́мъ: сла́ва си́лѣ твое́й гдⷭ҇и.
[Въ недѣ́лю и҃-ю:] Цр҃ю̀ царе́й, ꙗ҆ковы́й ѿ ꙗ҆кова́гѡ, є҆ди́нъ сло́ве произше́дый, ѿ ѻ҆ц҃а̀ безвино́внагѡ, ровномо́щнаго твоего̀ дх҃а, а҆пⷭ҇лѡмъ и҆́стиннѡ посла́лъ є҆сѝ, ꙗ҆́кѡ бл҃годѣ́телѧ, пою́щымъ: сла́ва держа́вѣ твое́й гдⷭ҇и.
[Ѻ҆смогла́сника:]
Оу҆слы́шахъ слꙋ́хъ тво́й и҆ ᲂу҆боѧ́хсѧ, разꙋмѣ́хъ дѣла̀ твоѧ̑ и҆ ᲂу҆жасо́хсѧ, гдⷭ҇и.
Любвѐ ра́ди ще́дре твоегѡ̀ ѡ҆́браза, на крⷭ҇тѣ̀ твое́мъ ста́лъ є҆сѝ, и҆ раста́ѧшасѧ ꙗ҆зы́цы: ты́ бо є҆сѝ чл҃вѣколю́бче, крѣ́пость моѧ̀ и҆ хвале́нїе.
Се́й бг҃ъ на́шъ, ѿ дв҃ы вопло́щьсѧ, и҆ є҆стество̀ ѡ҆божи́въ, є҆го́же воспѣва́юще вопїе́мъ: сла́ва си́лѣ твое́й гдⷭ҇и.
Оу҆слы́шахъ слꙋ́хъ тво́й гдⷭ҇и, ꙗ҆́кѡ ꙗ҆ви́лсѧ є҆сѝ на землѝ, и҆ просла́вихъ твою̀ си́лꙋ.
Ве́лїе и҆ бг҃олѣ́пное сп҃се слы́шахъ, ꙗ҆́кѡ безсме́ртенъ сы́й и҆ бг҃ъ, ᲂу҆подо́билсѧ є҆сѝ человѣ́кѡмъ, и҆ пребы́лъ є҆сѝ, є҆́же бы́лъ є҆сѝ, и҆ сегѡ̀ ра́ди твою̀ сла́влю си́лꙋ.
[Преѡбраже́нїю:] Оу҆слы́шахъ сла́вное смотре́нїе твоѐ хрⷭ҇тѐ бж҃е, ꙗ҆́кѡ роди́лсѧ є҆сѝ ѿ дв҃ы, да ѿ ле́сти и҆зба́виши зовꙋ́щыѧ: сла́ва си́лѣ твое́й гдⷭ҇и.
Слꙋ́хъ ᲂу҆слы́шахъ, глаго́летъ а҆ввакꙋ́мъ, ꙗ҆́кѡ бг҃ъ и҆з̾ горы̀, и҆з̾ чре́ва дв҃ственнагѡ про́йде неизрече́ннѡ, и҆ ᲂу҆жа́ссѧ взыва́ше: сла́ва си́лѣ твое́й гдⷭ҇и.
Средѣ̀ двою̀ разбѡ́йникꙋ позна́лсѧ є҆сѝ на крⷭ҇тѣ̀ хрⷭ҇тѐ бж҃е, взѧ́тсѧ со́лнце стра́хомъ, и҆ лꙋна̀ ста̀ въ чи́нѣ свое́мъ: сла́ва си́лѣ твое́й гдⷭ҇и.
Приклони́лъ є҆сѝ хрⷭ҇тѐ снизхожде́нїемъ твои́мъ нб҃са̀ въ ра́зꙋмѣ, и҆ ꙗ҆ви́лсѧ є҆сѝ воплоще́нъ на землѝ. тѣ́мъ всѝ вопїе́мъ: си́лѣ твое́й сла́ва чл҃вѣколю́бче.
Оу҆слы́шахъ слꙋ́хъ твоегѡ̀ смотре́нїѧ, ꙗ҆́кѡ ѿ дв҃ы роди́лсѧ є҆сѝ, ро́ждшꙋю не ѡ҆пали́въ, и҆ просла́вихъ сп҃се, снизхожде́нїе твоѐ.
Внегда̀ прибли́житисѧ лѣ́тѡмъ, позна́ешисѧ: внегда̀ прїитѝ вре́мени, ꙗ҆ви́шисѧ: внегда̀ смꙋти́тисѧ дꙋшѝ мое́й, во гнѣ́вѣ ми́лѡсти помѧне́ши: гдⷭ҇и сла́ва тебѣ̀.
Оу҆слы́шахъ бж҃е слꙋ́хъ тво́й и҆ ᲂу҆боѧ́хсѧ: разꙋмѣ́хъ дѣла̀ твоѧ̑, и҆ ᲂу҆жасо́хсѧ гдⷭ҇и, ꙗ҆́кѡ твоегѡ̀ хвале́нїѧ и҆спо́лнь землѧ̀.
Гла́сомъ бл҃гоглаго́ливымъ предразꙋмѣ́въ а҆ввакꙋ́мъ, зрѧ́ше сло́ва воплоще́нїе, и҆ взыва́ше ꙗ҆́вѣ: слꙋ́хъ ᲂу҆слы́шахъ бж҃їѧ совѣ́та. бг҃ъ бо непрело́жнѡ человѣ́кѡмъ возбесѣ́дꙋетъ, и҆з̾ горы̀ грѧды́й дв҃ственнагѡ чре́ва, и҆ мі́ръ и҆збавлѧ́ѧ началоро́дныѧ клѧ́твы.
Є҆го́же прⷪ҇ро́къ а҆ввакꙋ́мъ предзри́тельныма ѻ҆чи́ма ᲂу҆смотрѧ̀, проповѣ́даше бг҃а, ста́рецъ дне́сь во хра́мѣ прїе́млетъ, вопїѧ̀: ны́нѣ ѿпꙋща́еши раба̀ твоего̀ влⷣко въ ми́рѣ, по глаго́лꙋ твоемꙋ̀.
Тѧ̀ возсїѧ́вша ѿ неискꙋсомꙋ́жныѧ мт҃ре, прⷪ҇ро́къ а҆ввакꙋ́мъ прови́дѧ, вопїѧ́ше: въ послѣ̑днѧѧ времена̀ сп҃стѝ пома̑занныѧ твоѧ̑ прише́лъ є҆сѝ, сла́ва си́лѣ твое́й гдⷭ҇и.
Твоегѡ̀ на землѝ ꙗ҆вле́нїѧ хрⷭ҇тѐ бж҃е, проповѣ́даѧ прⷪ҇ро́къ прише́ствїе, съ весе́лїемъ вопїѧ́ше: сла́ва си́лѣ твое́й гдⷭ҇и.
Нб҃са̀ добродѣ́тель твоѧ̀ покры́ла є҆́сть, и҆ землѧ̀ и҆спо́лнисѧ сла́вы твоеѧ̀, хрⷭ҇тѐ. тѣ́мже вѣ́рнѡ вопїе́мъ: сла́ва си́лѣ твое́й гдⷭ҇и.
Оу҆слы́шахъ твоѐ хрⷭ҇тѐ, вои́стиннꙋ пресла́вное, ꙗ҆́кѡ безсме́ртенъ сы́й бг҃ъ, ᲂу҆подо́бисѧ смє́ртнымъ человѣ́кѡмъ, и҆ пребы́сть є҆́же бѣ̀: и҆ тогѡ̀ ра́ди твою̀ сла́влю си́лꙋ.
Пѣ́снь є҃.
Ты̀ гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆з̾ мра́чна невѣ́дѣнїѧ вѣ́рою воспѣва́ющыѧ тѧ̀.
[Бл҃говѣ́щенїѧ:] Оу҆жасо́шасѧ всѧ́чєскаѧ ѡ҆ бж҃е́ственнѣй сла́вѣ твое́й: ты́ бо неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ над̾ всѣ́ми бг҃а, и҆ родила̀ є҆сѝ безлѣ́тнаго сн҃а, всѣ̑мъ воспѣва́ющымъ тѧ̀ ми́ръ подава́ющаѧ.
[Въ недѣ́лю ва́їй:] На го́рꙋ сїѡ́нъ взы́ди бл҃говѣствꙋ́ѧй, и҆ і҆ерⷭ҇ли́мꙋ проповѣ́дꙋѧй въ крѣ́пости вознестѝ гла́съ: пресла̑внаѧ глаго́лашасѧ ѡ҆ тебѣ̀ гра́де бж҃їй, ми́ръ на і҆и҃лѧ, и҆ сп҃се́нїе ꙗ҆зы́кѡвъ.
[Въ недѣ́лю и҃-ю:] Рѣши́тельное ѡ҆чище́нїе грѣхѡ́въ, ѻ҆гнедохнове́ннꙋю прїими́те дх҃а ро́сꙋ, ѽ ча̑да свѣтоѡбра́знаѧ церкѡ́внаѧ, ны́нѣ ѿ сїѡ́на бо и҆зы́де зако́нъ, ѧ҆зыкоѻгнеѡбра́знаѧ дх҃а бл҃года́ть.
[Ѻ҆смогла́сника:]
Ны́нѣ воста́нꙋ, прⷪ҇ро́чески речѐ бг҃ъ, ны́нѣ просла́влюсѧ, ны́нѣ вознесꙋ́сѧ, па́дшаго прїе́мъ ѿ дв҃ы, и҆ къ свѣ́тꙋ ᲂу҆́мномꙋ возносѧ́й моегѡ̀ бж҃ества̀.
Возсїѧ́й мѝ гдⷭ҇и свѣ́тъ повелѣ́нїй твои́хъ, ꙗ҆́кѡ къ тебѣ̀ дꙋ́хъ мо́й ᲂу҆́тренюетъ, и҆ пое́тъ тѧ̀: ты́ бо є҆сѝ бг҃ъ на́шъ, и҆ къ тебѣ̀ прибѣга́ю цр҃ю̀ ми́ра.
Просвѣще́нїе твоѐ гдⷭ҇и, низпослѝ на́мъ, и҆ ѿ мглы̀ прегрѣше́нїй разрѣши́ ны бл҃же, тво́й ми́ръ да́рꙋѧй.
Нечести́вїи не ᲂу҆́зрѧтъ сла́вы твоеѧ̀ хрⷭ҇тѐ, но мы́ тѧ є҆диноро́дне, ѻ҆ч҃ескїѧ сла́вы сїѧ́нїе бж҃ества̀ ѿ но́щи ᲂу҆́тренююще, воспѣва́емъ тѧ̀ чл҃вѣколю́бче.
Зако́номъ за́повѣдей твои́хъ, є҆ди́не человѣколю́бче, просвѣтѝ се́рдце моѐ, молю́сѧ гдⷭ҇и, и҆ поми́лꙋй мѧ̀.
Стѧжа́вый ны̀ и҆збра̑нныѧ лю́ди, кро́вїю твое́ю гдⷭ҇и, тво́й ми́ръ да́ждь на́мъ во є҆диномы́слїи сохранѧ́ѧ ста́до твоѐ.
[Преѡбраже́нїю:] Ѿ свѣ́та пресѣкі́й перворо́дный свѣ́тъ, ꙗ҆́кѡ во свѣ́тѣ дѣла̀ пою́тъ тѧ̀ хрⷭ҇тѐ содѣ́телѧ, во свѣ́тѣ твое́мъ пꙋти̑ на́шѧ напра́ви.
Ре́вность прїе́млетъ лю́ди ненака̑занныѧ, законопрестꙋ̑пныѧ є҆вре́и, и҆ ѻ҆́гнь поѧ́стъ сꙋпоста́ты твоѧ̑, ꙗ҆́кѡ тѧ̀ распѧ́таго, лестца̀ и҆менова́ша.
Ѿ но́щи ᲂу҆́тренююще, всѝ немо́лчнѡ тѧ̀ непристꙋ́пный мо́лимъ свѣ́тъ, бж҃е ще́дрый, ми́ръ тво́й хрⷭ҇тѐ, да́рꙋй на́мъ.
Оу҆́тро свѣ́тлое на́мъ послѝ ꙗ҆́кѡ бл҃гъ: и҆ наста́ви ны̀ въ стра́хъ тво́й влⷣко.
Нощебори́мыхъ страсте́й тимѣ́нїемъ, къ тебѣ̀ ᲂу҆́тренюю є҆ди́номꙋ бл҃гоꙋтро́бномꙋ, дꙋшѝ моеѧ̀ мглꙋ̀ просвѣтѝ, и҆ ю҆́зы пресѣкѝ долгѡ́въ мои́хъ, ꙗ҆́кѡ да твои́мъ соприсносꙋ́щнымъ дх҃омъ просвѣща́емь, пра́вды пꙋ́ть нетлѣ́нный ѡ҆брѧ́щꙋ повелѣ́нїй твои́хъ.
Оу҆́гль ѻ҆́гненный клеща́ми прїе́млетъ и҆са́їа и҆ногда̀ ᲂу҆стна́ма ѡ҆чища́ѧйсѧ: ны́нѣ же дв҃а во хра́мѣ носѧ́щи бг҃а воплоще́нна на́съ ра́ди, рꙋка́ма а҆́ки клеща́ми ста́рцꙋ дае́тъ, ми́ра вино́внаго, и҆ всѣ́хъ пода́телѧ.
Мра́къ разрѣшѝ грѣха̀ моегѡ̀, внегда̀ возсїѧ́ти тѝ, ᲂу҆́тро свѣ́тлое за́повѣдей твои́хъ гдⷭ҇и, непристꙋ́пный свѣ́те.
Возсїѧ́вый свѣ́тъ, и҆ просвѣти́вый ᲂу҆́тро, и҆ показа́вый де́нь, сла́ва тебѣ̀, сла́ва тебѣ̀ і҆и҃се сн҃е бж҃їй.
Свѣ́те и҆́стинный просвѣща́ѧй всѧ́каго человѣ́ка, возсїѧ́й въ на́съ заре́ю за́повѣдей твои́хъ, и҆ ѿженѝ ѿ на́съ но́щь страсте́й, ꙗ҆́кѡ ра́звѣ тебѐ и҆но́гѡ бг҃а не вѣ́мы.
[Оу҆спе́нїю:] Оу҆жасо́шасѧ всѧ́чєскаѧ ѡ҆ чⷭ҇тнѣ́мъ ᲂу҆спе́нїи твое́мъ: ты́ бо неискꙋсобра́чнаѧ дв҃о, ѿ землѝ преста́виласѧ є҆сѝ къ вѣ̑чнымъ ѻ҆би́телемъ, и҆ къ безконе́чнѣй жи́зни, всѣ̑мъ воспѣва́ющымъ тѧ̀ сп҃се́нїе подава́ющаѧ.
[Введе́нїю:] Оу҆жасо́шасѧ всѧ́чєскаѧ въ чⷭ҇тнѣ́мъ вхожде́нїи твое́мъ: ты́ бо неискꙋсобра́чнаѧ дв҃о, внꙋ́трь вошла̀ є҆сѝ въ хра́мъ бж҃їй, ꙗ҆́коже чⷭ҇тнѣ́йшїй хра́мъ, всѣ̑мъ воспѣва́ющымъ тѧ̀ ми́ръ подава́ющаѧ.
И҆з̾ но́щи ᲂу҆́тренююще, просвѣтѝ на́съ животво́рче крⷭ҇те хрⷭ҇то́въ, со стра́хомъ покланѧ́ющыѧсѧ тебѣ̀, и҆ де́нь сп҃си́тельный при́снѡ возсїѧ́й на́мъ.
Ча́сть моѧ̀ є҆сѝ гдⷭ҇и, и҆ сла́ва лица̀ моегѡ̀: ты́ бо мѧ̀ и҆з̾ тьмы̀ невѣ́дѣнїѧ є҆ди́нъ и҆зба́вилъ є҆сѝ бг҃оразꙋ́мїемъ. и҆ тебѣ̀ молю́сѧ хрⷭ҇тѐ: да́рꙋй рабꙋ̀ твоемꙋ̀ ми́ръ, ꙗ҆́кѡ чл҃вѣколю́бецъ.
Пѣ́снь ѕ҃.
Пожрꙋ́ ти со гла́сомъ хвале́нїѧ гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди млⷭ҇ти ѿ ре́бръ твои́хъ и҆сте́кшею кро́вїю.
[Бл҃говѣ́щенїѧ:] Возопѝ проѡбразꙋ́ѧ погребе́нїе тридне́вное прⷪ҇ро́къ і҆ѡ́на, въ ки́тѣ молѧ́сѧ: ѿ тлѝ и҆зба́ви мѧ̀, і҆и҃се цр҃ю̀ си́лъ.
Бж҃е́ственное сїѐ и҆ всечⷭ҇тно́е соверша́юще пра́зднество бг҃омꙋ́дрїи бг҃ома́тере, прїиди́те рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ.
[Въ недѣ́лю ва́їй:] Возопи́ша съ весе́лїемъ првⷣныхъ дꙋ́си: ны́нѣ мі́рꙋ завѣ́тъ но́вый завѣща́етсѧ, и҆ кропле́нїемъ да ѡ҆бновѧ́тсѧ лю́дїе бж҃їѧ кро́ве.
[Въ недѣ́лю и҃-ю:] Ѡ҆чище́нїе на́мъ хрⷭ҇тѐ и҆ сп҃се́нїе влⷣко, возсїѧ́лъ є҆сѝ ѿ дв҃ы, да ꙗ҆́кѡ прⷪ҇ро́ка ѿ ѕвѣ́рѧ морска́гѡ пе́рсей і҆ѡ́нꙋ ѿ тлѝ и҆схити́ши, всего̀ а҆да́ма всеро́дна па́дшаго.
[Ѻ҆смогла́сника:]
Прїидо́хъ во глꙋбины̑ морскі̑ѧ, и҆ потопи́ла мѧ̀ є҆́сть бꙋ́рѧ мно́гихъ грѣхѡ́въ: но ꙗ҆́кѡ бг҃ъ и҆з̾ глꙋбины̀ возведѝ живо́тъ мо́й, многомлⷭ҇тиве.
Пꙋчи́ною жите́йскою дѣѧ́ньми мои́ми снидо́хъ во а҆́дъ, но ꙗ҆́кѡ ѿ ки́та і҆ѡ́на, та́кѡ вопїю̀: и҆з̾ глꙋбины̀ ѕѡ́лъ возведѝ, молю́сѧ, сн҃е бж҃їй и҆ сло́ве.
Ве́черъ, и҆ ᲂу҆́трѡ, и҆ полꙋ́дне, хва́лимъ тѧ̀ гдⷭ҇и бж҃е на́шъ, ᲂу҆слы́ши гла́съ на́шъ.
Бꙋ́рею содержи́мь прегрѣше́нїй, человѣколю́бїѧ сподоблѧ́ѧйсѧ не разꙋмѣ́ю: ꙗ҆́кѡ і҆ѡ́нꙋ прⷪ҇ро́ка и҆ менѐ сп҃сѝ сп҃се.
Въ ки́тѣ хрⷭ҇тѐ тридне́вновавъ і҆ѡ́на, прописа́ тѧ безсме́ртнаго, ꙗ҆́кѡ ме́ртва во́лею, въ се́рдцѣ земнѣ́мъ тридне́вновавша.
Ꙗ҆́кѡ прⷪ҇ро́ка и҆з̾ глꙋбины̀ и҆ тлѝ возве́лъ є҆сѝ: живо́тъ мо́й бл҃же, ѿ прегрѣше́нїй и҆зба́ви бл҃гоꙋтро́бїемъ твои́мъ.
[На преѡбраже́нїе:] Внегда̀ скорбѣ́ти мѝ, возопи́хъ ко гдⷭ҇ꙋ, и҆ ᲂу҆слы́ша мѧ̀ бг҃ъ сп҃се́нїѧ моегѡ̀.
Твоегѡ̀ і҆ѡ́на погребе́нїѧ ѡ҆́бразъ предписа́въ ꙗ҆́вѣ, и҆ сегѡ̀ вои́стиннꙋ и҆звле́клъ ѿ ѕвѣ́рѧ: и҆ менѐ сп҃се, и҆з̾ глꙋбины̀ грѣха̀ возведѝ, и҆ къ животꙋ̀ ꙗ҆́вѣ, молю́сѧ, наста́ви.
Да не погрꙋзи́тъ менѐ бꙋ́рѧ водна́ѧ, нижѐ пожре́тъ менѐ глꙋбина̀: ѿве́рженъ бо є҆́смь во глꙋбины̑ се́рдца морска́гѡ ѕѡ́лъ мои́хъ. тѣ́мъ зовꙋ̀ ꙗ҆́кѡ і҆ѡ́на: да взы́детъ ѿ тлѝ ѕѡ́лъ живо́тъ мо́й къ тебѣ̀ бж҃е.
Ꙗ҆́коже прⷪ҇ро́ка і҆ѡ́нꙋ ѿ ки́та и҆зба́вилъ є҆сѝ хрⷭ҇тѐ бж҃е, и҆ менѐ и҆з̾ глꙋбины̀ прегрѣше́нїи возведѝ, и҆ сп҃си́ мѧ є҆ди́не чл҃вѣколю́бче.
И҆з̾ чре́ва а҆́дова во́плѧ моегѡ̀ ᲂу҆слы́шалъ є҆сѝ гла́съ мо́й, и҆ возве́лъ є҆сѝ ѿ тлѝ бꙋ́ри прегрѣше́нїй, ѡ҆бдержи́тъ бо сп҃се, и҆ погрꙋжа́ти и҆скꙋша́етъ бл҃же: но ꙗ҆́коже пре́жде і҆ѡ́нꙋ возве́лъ є҆сѝ ѿ тлѝ, и҆ менѐ молю́сѧ гдⷭ҇и, предвари́въ сп҃сѝ.
Бꙋ́рѧ мѧ̀ помышле́нїй пости́гши, во глꙋбинꙋ̀ низвлачи́тъ мѧ̀ безмѣ́рныхъ грѣхѡ́въ. но ты̀ ᲂу҆пра́вителю бл҃гі́й, предвари́въ ᲂу҆пра́ви, ꙗ҆́кѡ прⷪ҇ро́ка, и҆ сп҃си́ мѧ.
Бꙋ́рѧ мѧ̀ мно́гихъ согрѣше́нїй мои́хъ потоплѧ́етъ, и҆ и҆знемога́етъ дꙋ́хъ мо́й: но ты̀ гдⷭ҇и, ꙗ҆́кѡ млⷭ҇тивъ, сше́дъ возведѝ живо́тъ мо́й.
Ѡ҆бꙋрева́емꙋ мнѣ̀, ще́дре, бꙋ́рею во́лнъ мои́хъ, молю́сѧ, воззови́ мѧ, и҆ сп҃сѝ гдⷭ҇и, ꙗ҆́кѡ і҆ѡ́нꙋ ѿ ѕвѣ́рѧ ᲂу҆́мнагѡ.
Бꙋ́рею грѣхо́вною погрꙋжа́емь, ꙗ҆́кѡ во чре́вѣ ки́товѣ содержи́мь, съ прⷪ҇ро́комъ зовꙋ́ ти: возведѝ ѿ тлѝ живо́тъ мо́й, гдⷭ҇и, и҆ сп҃си́ мѧ.
І҆ѡ́на прⷪ҇ро́къ во чре́вѣ ки́товѣ ѿ ско́рби возопѝ: глава̀ моѧ̀ понрѐ въ разсѣ̑лины го́ръ гдⷭ҇и. сѷмеѡ́нъ же под̾е́мъ тѧ̀ ра́достнѡ взыва́ше: ны́нѣ ѿпꙋща́еши раба̀ твоего̀, по глаго́лꙋ твоемꙋ̀.
Морско́е рыда́нїе хрⷭ҇тѐ і҆ѡ́нино подража́ѧ зовꙋ̀ тѝ: живо́тъ мо́й ѿ а҆́да прегрѣше́нїй возведѝ, да во хра́мѣ сла́вы твоеѧ̀ со гла́сомъ хвале́нїѧ пожрꙋ́ ти.
Прⷪ҇ро́ка во чре́вѣ ки́товѣ сохрани́вый, ст҃ы́й гдⷭ҇и, помози́ ми.
Пѣ́снь з҃.
Къ пещѝ а҆враа́мстїи ѻ҆́троцы персі́дстѣй, любо́вїю бл҃гоче́стїѧ па́че, не́жели пла́менемъ ѡ҆палѧ́еми взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀ гдⷭ҇и.
[Бл҃говѣ́щенїѧ:] Не послꙋжи́ша тва́ри бг҃омꙋ́дрїи па́че созда́вшагѡ, но ѻ҆́гненное преще́нїе мꙋ́жески попра́вше, ра́довахꙋсѧ пою́ще: препѣ́тый ѻ҆тцє́въ гдⷭ҇ь и҆ бг҃ъ бл҃гослове́нъ є҆сѝ.
[Въ недѣ́лю ва́їй:] Сп҃сы́й во ѻ҆гнѝ а҆враа̑мскїѧ твоѧ̑ ѻ҆́троки, и҆ халдє́и ᲂу҆би́въ, ꙗ҆́же пра́вда пра́веднѡ ᲂу҆ловлѧ́ше, препѣ́тый гдⷭ҇и бж҃е ѻ҆тє́цъ на́шихъ бл҃гослове́нъ є҆сѝ.
[Въ недѣ́лю и҃-ю:] Согла́снаѧ возшꙋмѣ̀ ѻ҆рга́нскаѧ пѣ́снь, почита́ти златосотворе́нный бездꙋ́шный и҆стꙋка́нъ: ᲂу҆тѣ́шителева же свѣтоно́снаѧ бл҃года́ть почествꙋ́етъ, є҆́же вопи́ти: трⷪ҇це є҆ди́наѧ, равноси́льнаѧ, безнача́льнаѧ, бл҃гослове́на є҆сѝ.
[Ѻ҆смогла́сника:]
Ю҆́нѡши трѝ въ вавѷлѡ́нѣ, велѣ́нїе мꙋчи́телево на бꙋ́йство прело́жше, посредѣ̀ пла́мене вопїѧ́хꙋ: бл҃гослове́нъ є҆сѝ гдⷭ҇и, бж҃е ѻ҆тє́цъ на́шихъ.
Ѡ҆́бразꙋ злато́мꙋ не поклони́вшесѧ ѻ҆́троцы а҆враа́мстїи, и҆скꙋша́хꙋсѧ ꙗ҆́кѡ зла́то въ горни́лѣ, въ пещѝ ѻ҆́гненнѣй ꙗ҆́кѡ въ черто́зѣ свѣ́тлѣмъ ликова́хꙋ, пою́ще: бл҃гослове́нъ є҆сѝ бж҃е ѻ҆тє́цъ на́шихъ.
[Преѡбраже́нїю:] А҆враа́мстїи и҆ногда̀ въ вавѷлѡ́нѣ ѻ҆́троцы, пе́щный пла́мень попра́ша, пѣ́сньми взыва́юще: ѻ҆тє́цъ на́шихъ бж҃е бл҃гослове́нъ є҆сѝ.
Въ пещѝ ѻ҆́троки неѡпа́льны соблю́дшаго, и҆ ѻ҆́гнь ᲂу҆гаси́вшаго, воспое́мъ глаго́люще: бл҃гослове́нъ є҆сѝ бж҃е ѻ҆тє́цъ на́шихъ.
Халде́йскꙋю пе́щь, дре́вле а҆́гг҃лъ снизше́дъ ѡ҆росѝ, въ вавѷлѡ́нѣ ѻ҆́троцы сегѡ̀ ра́ди поѧ́хꙋ: ѻ҆тє́цъ на́шихъ бж҃е бл҃гослове́нъ є҆сѝ.
Въ нача́лѣ безнача́льное сло́во, со ѻ҆ц҃е́мъ и҆ дх҃омъ, сн҃ъ є҆диноро́дный, бл҃гослове́нъ є҆сѝ и҆ превозноси́мый бж҃е ѻ҆тє́цъ на́шихъ.
Завѣ́тъ тво́й помѧнꙋ́вый хрⷭ҇тѐ бж҃е, ѻ҆́троки и҆з̾ пла́мене и҆зба́вилъ є҆сѝ, а҆́гг҃ловымъ снизхожде́нїемъ, є҆ди́не и҆́стиннѡ препросла́вленный.
Халде́йскїѧ пе́щи ѻ҆́троцы небрего́ша, и҆́мене ра́ди твоегѡ̀ сп҃се, и҆ и҆гра́юще взыва́хꙋ: бл҃гослове́нъ є҆сѝ бж҃е ѻ҆тє́цъ на́шихъ.
Ѻ҆́гнь палѧ̀ въ пещѝ и҆стрѧса́шесѧ, ѻ҆́троцы ѡ҆роша́хꙋсѧ, и҆ пою́ще глаго́лахꙋ: бл҃гослове́нъ є҆сѝ є҆ди́нъ сы́й бж҃е ѻ҆тє́цъ на́шихъ.
Ѻ҆тє́цъ на́шихъ бж҃е, не посрамѝ на́съ, но да́рꙋй на́мъ со дерзнове́нїемъ вопи́ти тебѣ̀: бл҃гослове́нъ є҆сѝ бж҃е ѻ҆тє́цъ на́шихъ.
Бл҃гослове́нъ є҆сѝ бж҃е, въ пещѝ ѻ҆́троцы и҆сповѣ́дахꙋ, а҆́гг҃ла же слы́шахꙋ вопїю́ща къ ни̑мъ: сѐ ᲂу҆слы́шасѧ моле́нїе ва́ше.
Не преда́ждь на́съ до конца̀ и҆́мене твоегѡ̀ ра́ди, и҆ не разорѝ завѣ́та твоегѡ̀, и҆ не ѿста́ви млⷭ҇ти твоеѧ̀ ѿ на́съ, гдⷭ҇и бж҃е ѻ҆тє́цъ на́шихъ, препѣ́тый во вѣ́ки.
А҆враа́мстїи ѻ҆́троцы вавѷлѡ́нскїй пла́мень попра́ша, проѡбразꙋ́юще въ не́мъ дв҃ы чꙋ́до, є҆го́же сѷмеѡ́нъ прїе́мъ возра́довасѧ вопїѧ̀: ны́нѣ ѿпꙋща́еши раба̀ твоего̀, ѻ҆тцє́въ бж҃е.
Тѧ̀ живописꙋ́ющїй а҆ссѷрі́йскїй пла́мень, ю҆́нѡши трѝ сп҃сѐ гдⷭ҇и, ꙗ҆́коже и҆ дв҃ꙋ не ѡ҆палѝ ѻ҆трокови́цꙋ въ бж҃е́ственномъ ржⷭ҇твѣ̀ твое́мъ, бж҃е́ственнаѧ и҆́скра: препѣ́тый ѻ҆тцє́въ бж҃е бл҃гослове́нъ є҆сѝ.
Глаго́лавый на горѣ̀ съ мѡѷсе́омъ, и҆ ѡ҆́бразъ дѣ́вства ꙗ҆вле́й въ кꙋпинѣ̀, бл҃гослове́нъ є҆сѝ бж҃е ѻ҆тє́цъ на́шихъ.
Пѣ́снь и҃.
Рꙋ́цѣ распросте́ръ данїи́лъ, львѡ́въ зїѧ̑нїѧ въ ро́вѣ затчѐ: ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, бл҃гоче́стїѧ рачи́тели ѻ҆́троцы, взыва́юще: бл҃гослови́те всѧ̀ дѣла̀ гдⷭ҇нѧ гдⷭ҇а.
[Бл҃говѣ́щенїѧ:] Ѻ҆́троки бл҃гочести̑выѧ въ пещѝ, ржⷭ҇тво̀ бг҃оро́дичо сп҃сло̀ є҆́сть. тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки.
Слы́ши ѻ҆трокови́це дв҃о чⷭ҇таѧ, да рече́тъ ᲂу҆́бѡ гаврїи́лъ совѣ́тъ вы́шнѧгѡ дре́внїй и҆́стинный: бꙋ́ди къ прїѧ́тїю гото́ва бж҃їю, тобо́ю бо невмѣсти́мый съ человѣ́ки поживѐ. тѣ́мъ и҆ ра́дꙋѧсѧ вопїю̀: бл҃гослови́те всѧ̑ дѣла̀ гдⷭ҇нѧ гдⷭ҇а.
[Въ недѣ́лю ва́їй:] Весели́сѧ і҆ерⷭ҇ли́ме, торжествꙋ́йте лю́бѧщїи сїѡ́на: црⷭ҇твꙋѧй бо во вѣ́ки гдⷭ҇ь си́лъ прїи́де, да бл҃гоговѣ́етъ всѧ̀ землѧ̀ ѿ лица̀ є҆гѡ̀, и҆ да вопїе́тъ: бл҃гослови́те всѧ̑ дѣла̀ гдⷭ҇нѧ гдⷭ҇а.
[Въ недѣ́лю и҃-ю:] Разрѣша́етъ ᲂу҆́зы ѡ҆роша́етъ пла́мень, трисвѣ́тлый бг҃онача́лїѧ ѡ҆́бразъ пою́тъ ѻ҆́троцы, бл҃гослови́тъ же є҆ди́наго сп҃са и҆ вседѣ́телѧ, ꙗ҆́кѡ бл҃годѣ́телѧ, сотворе́ннаѧ всѧ́ческаѧ тва́рь.
[Ѻ҆смогла́сника:]
И҆зба́вителю всѣ́хъ всеси́льне, посредѣ̀ пла́мене бл҃гоче́ствовавшыѧ, снизше́дъ ѡ҆роси́лъ є҆сѝ, и҆ наꙋчи́лъ є҆сѝ пѣ́ти: всѧ̑ дѣла̀ бл҃гослови́те, по́йте гдⷭ҇а.
Во ѻ҆гнѝ пла́меннѣмъ предстоѧ́тъ тебѣ̀ херꙋві́ми, серафі́ми гдⷭ҇и, и҆ всѧ̀ тва́рь пѣ́снь тебѣ̀ пое́тъ кра́снꙋю: по́йте, бл҃гослови́те, лю́дїе превозноси́те хрⷭ҇та̀, є҆ди́наго содѣ́телѧ во всѧ̑ вѣ́ки.
На крⷭ҇тѣ̀ пло́тїю пригвожде́ннаго, и҆ показа́вшаго на́мъ ѻ҆рꙋ́жїе во сп҃се́нїе, ѻ҆́троцы превозноси́те хрⷭ҇та̀ бг҃а на́шего во вѣ́ки.
Всѧ́чєскаѧ носѧ́й непристꙋ́пною твое́ю си́лою хрⷭ҇тѐ, прпⷣбныѧ твоѧ̑ ѻ҆́троки въ пла́мени ѡ҆роси́лъ є҆сѝ, зовꙋ́щыѧ: бл҃гослови́те всѧ̑ дѣла̀ гдⷭ҇нѧ гдⷭ҇а.
Во ѡ҆́бразѣ а҆́гг҃ла ꙗ҆́вльшагосѧ въ пещѝ ѻ҆́гненнѣй пѣсносло́вцємъ, хрⷭ҇та̀ бг҃а по́йте ѻ҆́троцы, сщ҃е́нницы бл҃гослови́те, лю́дїе превозноси́те во всѧ̑ вѣ́ки.
Пѣ́снь но́вꙋю пои́мъ лю́дїе, соше́дшемꙋ на зе́млю сп҃сти́ ны: во́лею бо на крⷭ҇тѣ̀ пригвозди́сѧ гдⷭ҇ь, показа́вый ꙗ҆зы́кѡмъ, ꙗ҆́кѡ а҆да́ма ра́ди въ ра́бїй ѡ҆́бразъ ѡ҆блече́сѧ, въ вы́шнихъ живы́й во вѣ́ки.
Ра́дꙋющесѧ по ѡ҆сꙋжде́нїи мꙋчи́тельскомъ ѻ҆́троцы, ꙗ҆́кѡ да не богѡ́мъ сквє́рнымъ послꙋ́жатъ всѣ̑мъ, но живо́мꙋ бг҃ꙋ, на ѻ҆́гнь дерзнꙋ́ша, ѿ а҆́гг҃ла же ѡ҆роша́еми пѣ́снь поѧ́хꙋ: дѣла̀ гдⷭ҇нѧ гдⷭ҇а по́йте, и҆ превозноси́те во всѧ̑ вѣ́ки.
[Преѡбраже́нїю:] Въ вавѷлѡ́нѣ ѻ҆́троцы, бж҃е́ственною распала́еми ре́вностїю, мꙋчи́телѧ и҆ пла́мене преще́нїе мꙋ́жески попра́ша, и҆ посредѣ̀ ѻ҆гнѧ̀ вве́ржени ѡ҆роша́еми поѧ́хꙋ: бл҃гослови́те всѧ̑ дѣла̀ гдⷭ҇нѧ гдⷭ҇а.
Всѧ́чєскаѧ влⷣко, премꙋ́дростїю твое́ю соста́вилъ є҆сѝ, земли́ же па́ки ᲂу҆тверди́лъ є҆сѝ, ꙗ҆́коже вѣ́си, дно̀, ѡ҆снова́нїемъ водрꙋзи́вый на вода́хъ безмѣ́рныхъ. тѣ́мъ всѝ вопїе́мъ воспѣва́юще. бл҃гослови́те дѣла̀ гдⷭ҇нѧ непреста́ннѡ гдⷭ҇а.
Цр҃ѧ̀ хрⷭ҇та̀, є҆го́же и҆сповѣ́даша плѣне́ннїи ѻ҆́троцы, въ пещѝ глаго́люще ве́лїимъ гла́сомъ: всѧ̑ дѣла̀ по́йте гдⷭ҇а.
Просте́ршаго бг҃а не́бо ꙗ҆́кѡ ко́жꙋ, и҆ ѡ҆снова́вшаго зе́млю на ᲂу҆твержде́нїи є҆ѧ̀, сщ҃е́нницы гдⷭ҇ни, и҆ рабѝ гдⷭ҇ни, гдⷭ҇а по́йте и҆ превозноси́те во всѧ̑ вѣ́ки.
Землѧ̀, и҆ всѧ̑ ꙗ҆̀же на не́й, мо́ре и҆ всѝ и҆сто́чницы, нб҃са̀ нб҃съ, свѣ́тъ и҆ тьма̀, мра́зъ и҆ зно́й, сы́нове человѣ́честїи, сщ҃е́нницы бл҃гослови́те гдⷭ҇а, и҆ превозноси́те є҆го̀ во вѣ́ки.
Всѧ̑ дѣла̀ бж҃їѧ и҆ всѧ̀ тва́рь бл҃гослови́те гдⷭ҇а, прпⷣбнїи и҆ смире́ннїи се́рдцемъ по́йте є҆го̀, и҆ превозноси́те во всѧ̑ вѣ́ки.
Всѧ̑ дѣла̀ бж҃їѧ и҆ всѧ̀ тва́рь бл҃гослови́те гдⷭ҇а, ꙗ҆́кѡ человѣ́кѡмъ ѿ землѝ возсїѧ̀ свѣ́тъ, и҆ вселе́ннꙋю всю̀ просвѣтѝ, и҆ жи́знь вѣ́чнꙋю мі́рꙋ дарова̀, по́йте лю́дїе, и҆ превозноси́те є҆го̀ во вѣ́ки.
Великоимени́тый пла́мень, плѣне́нныхъ чⷭ҇тымъ соедини́вшїйсѧ тѣлесе́мъ, росода́тельный показа́сѧ, мꙋчи́тельнагѡ ѕлохꙋле́нїѧ сопротивобо́жный и҆стꙋка́нъ ᲂу҆каза́вше, бж҃е́ственнымъ снизхожде́нїемъ, ю҆́ношамъ пою́щымъ: созда̑ннаѧ созда́вшаго бг҃а бл҃гослови́те, ꙗ҆́кѡ зижди́телѧ всѣ́хъ непреста́ннѡ во вѣ́ки.
На прⷭ҇то́лѣ херꙋві́мстѣмъ носи́маго бг҃а и҆ призира́ющаго на смирє́нныѧ, сѷмеѡ́нъ ꙗ҆́кѡ млⷣнца во ѡ҆б̾ѧ́тїихъ но́ситъ во хра́мѣ: є҆го́же бл҃гословѧ́тъ творє́нїѧ всѧ̑ во вѣ́ки.
Находѧ́щыѧ въ пла́мени, беззако́ннагѡ мꙋчи́телѧ велѣ́нїемъ, ѻ҆́троки подража́юще, немо́лчными ᲂу҆стна́ми въ вы́шнихъ похва́льнѡ возопїи́мъ: бл҃же преесте́ственнѡ сы́й прест҃ы́й, пою́щыѧ тѧ̀ свѣ́томъ ᲂу҆́мнымъ твои́мъ ѡ҆зарѝ.
Въ пещѝ ѻ҆́гненнѣй, въ вавѷлѡ́нѣ ѻ҆́троки є҆врє́йскїѧ сп҃сшаго бг҃а, сщ҃е́нницы бл҃гослови́те, лю́дїе превозноси́те є҆го̀ во вѣ́ки.
Въ пла́мень снизше́дшаго пѣсносло́вцємъ сїѡ̑нскимъ, зра́комъ а҆́гг҃льскимъ, ѻ҆́троцы превозноси́те хрⷭ҇та̀ бг҃а на́шего во вѣ́ки.
Пѣ́снь ѳ҃.
Ка́мень нерꙋкосѣ́чный ѿ несѣко́мыѧ горы̀ тебѐ дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стєства̀. тѣ́мъ, веселѧ́щесѧ, тѧ̀ бцⷣе велича́емъ.
[На пра́здники бг҃оро́дичны:] Всѧ́къ земноро́дный да взыгра́етсѧ дх҃омъ просвѣща́емь, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющее сщ҃е́нное ꙾торжество̀꙾[[Оу҆спе́нїѧ вмѣ́стѡ, торжество̀: ꙾преставле́нїе꙾]] бг҃омт҃ре, и҆ да вопїе́тъ: ра́дꙋйсѧ всебл҃же́ннаѧ бцⷣе, чⷭ҇таѧ приснодв҃о.
[Бл҃говѣ́щенїѧ:] Ꙗ҆́кѡ ѡ҆дꙋшевле́нномꙋ бж҃їю кївѡ́тꙋ, да ника́коже ко́снетсѧ рꙋка̀ скве́рныхъ, ᲂу҆стнѣ́ же вѣ́рныхъ бцⷣѣ немо́лчнѡ, гла́съ а҆́гг҃ла воспѣва́юще, съ ра́достїю да вопїю́тъ: ꙳ра́дꙋйсѧ бл҃года́тнаѧ, гдⷭ҇ь съ тобо́ю.꙳[[Введе́нїѧ коне́цъ вмѣ́стѡ, ра́дꙋйсѧ: ꙳и҆́стиннѡ вы́шши всѣ́хъ є҆сѝ дв҃о чⷭ҇таѧ.꙳]]
[Въ недѣ́лю ва́їй:] Бг҃ъ гдⷭ҇ь, и҆ ꙗ҆ви́сѧ на́мъ, соста́вите пра́здникъ, и҆ веселѧ́щесѧ прїиди́те возвели́чимъ хрⷭ҇та̀, ва́їами и҆ вѣ́твьми, пѣ́сньми зовꙋ́ще: бл҃гослове́нъ грѧды́й во и҆́мѧ гдⷭ҇а сп҃са на́шегѡ.
[Въ недѣ́лю и҃-ю:] Ра́дꙋйсѧ цр҃и́це, мт҃родѣ́вственнаѧ сла́во: всѧ̑ка бо ᲂу҆добоѡбраща́тельнаѧ бл҃гоглагѡ́ливаѧ ᲂу҆ста̀ виті́йствовати не мо́гꙋтъ, тебѐ пѣ́ти досто́йнѡ, и҆з̾ꙋмѣва́етъ же ᲂу҆́мъ всѧ́къ твоѐ ржⷭ҇тво̀ разꙋмѣ́ти. тѣ́мже тѧ̀ согла́снѡ сла́вимъ.
[Ѻ҆смогла́сника:]
Є҆́ѵа ᲂу҆́бѡ недꙋ́гѡмъ преслꙋша́нїѧ, клѧ́твꙋ всели́ла є҆́сть: ты́ же дв҃о бцⷣе, прозѧбе́нїемъ чревоноше́нїѧ, мі́рови бл҃гослове́нїе процвѣла̀ є҆сѝ. тѣ́мъ тѧ̀ всѝ велича́емъ.
Сокрове́нное бж҃їе неизрече́нное въ тебѣ̀ соверша́етсѧ ꙗ҆́вственное та́инство, дв҃о пречⷭ҇таѧ: и҆́бо бг҃ъ и҆з̾ тебѐ воплоти́сѧ за млⷭ҇рдїе. тѣ́мже тѧ̀ ꙗ҆́кѡ бцⷣꙋ велича́емъ.
Сотворѝ держа́вꙋ мы́шцею свое́ю, низложи́ бо си̑льныѧ со престѡ́лъ, и҆ вознесѐ смирє́нныѧ бг҃ъ і҆и҃левъ. въ ни́хже посѣтѝ на́съ восто́къ съ высоты̀, и҆ напра́вилъ ны̀ є҆́сть на пꙋ́ть ми́ра.
Тѧ̀ невмѣсти́мое сло́во во ᲂу҆тро́бꙋ вмѣсти́вшꙋю нб҃съ простра́ннѣйшꙋю и҆ херꙋві́мѡвъ сла́внѣйшꙋю, бцⷣе чⷭ҇таѧ, пѣ́сньми велича́емъ.
Тѧ̀ пресла́внꙋю невѣ́стꙋ, и҆ всест҃ꙋ́ю бцⷣꙋ, зижди́телѧ ро́ждшꙋю, неви́димыхъ же и҆ всѣ́хъ ви́димыхъ, пѣ́сньми велича́емъ.
Тѧ̀ неискꙋсобра́чнꙋю бцⷣꙋ, нбⷭ҇ный черто́гъ, ро́ждшꙋю нача́льника сп҃се́нїѧ на́шегѡ, пѣ́сньми велича́емъ.
Го́рнѣйшаѧ премі́рныхъ ᲂу҆мѡ́въ и҆ многоѡбра́зныхъ херꙋві́мѡвъ вы́шшаѧ, пречⷭ҇таѧ мт҃и бж҃їѧ, созда́телѧ зачала̀ є҆сѝ: ты́ бо во тва́ри влады́чествꙋеши всѣ́ми: тѣ́мже пѣ́сньми бцⷣꙋ вѣ́рнїи тѧ̀ велича́емъ.
[Преѡбраже́нїѧ:] Ржⷭ҇тво̀ твоѐ нетлѣ́нно ꙗ҆ви́сѧ: бг҃ъ и҆з̾ бокꙋ̀ твоє́ю про́йде, ꙗ҆́кѡ плотоно́сецъ ꙗ҆ви́сѧ на землѝ, и҆ съ человѣ́ки поживѐ. тѧ̀ бцⷣе тѣ́мъ всѝ велича́емъ.
Ѿ земноро́дныхъ ро́ждшисѧ, и҆ творца̀ ро́ждшаѧ, на́ша похвало̀, бцⷣе чⷭ҇таѧ. тѧ̀ ꙗ҆́кѡ влады́чествꙋющꙋю тва́рьми велича́емъ.
Велича́емъ всѝ человѣколю́бїе твоѐ хрⷭ҇тѐ сп҃се на́шъ, сла́во ра̑бъ твои́хъ, и҆ вѣ́нче вѣ́рныхъ, возвели́чивый па́мѧть ро́ждшїѧ тѧ̀.
Безсѣ́менное ржⷭ҇тво̀ твоѐ, бцⷣе чⷭ҇таѧ, хрⷭ҇та̀ бг҃а на́шегѡ, пѣ́сньми немо́лчными велича́емъ.
Тѧ̀ ꙗ҆́кѡ село̀ пречⷭ҇тагѡ сло́ва, и҆ прїѧ́телище дх҃а, и҆ бл҃говоле́нїѧ дѣ́лателище пое́мъ: въ тебѣ́ бо соизмѣне́нїе сп҃се́нїѧ на́шегѡ содѣ́ласѧ.
Ѻ҆гнеро́снꙋю дре́вле пе́щь халде́йскꙋю и҆ ѻ҆гне́мъ неѡпа́льнымъ кꙋпинꙋ̀ въ сїна́и, бцⷣꙋ всѝ пѣ́сньми велича́емъ.
Ꙗ҆́кѡ сотворѝ мнѣ̀ вели̑чїѧ си́льный, и҆ ст҃о и҆́мѧ є҆гѡ̀, и҆ млⷭ҇ть є҆гѡ̀ въ ро́дъ и҆ ро́дъ боѧ́щымсѧ є҆́гѡ.
Дѣ́ва мч҃нца многострада́льческаѧ дв҃ы мт҃рь многопѣ́тꙋю дне́сь въ є҆ѧ̀ черто́гъ приходѧ́щꙋю ᲂу҆чрежда́етъ: невѣстокраси́тели всѝ ликꙋ́имъ ѻ҆ч҃єскаѧ, бл҃гоче́стнѡ цр҃и́цꙋ велича́юще.
Тѧ̀ па́че всѧ́кїѧ мы́сли, мт҃рь дв҃ꙋ ѻ҆трокови́цꙋ безневѣ́стнаѧ, сп҃са и҆ бг҃а неизрече́ннымъ сло́вомъ ро́ждшꙋю по до́лгꙋ вѣ́рнїи всѝ бл҃гоче́стнѡ велича́емъ.
Непостижи́мое ржⷭ҇тво̀ рожде́нїѧ твоегѡ̀ несказа́нное бога́тство чистоты̀ твоеѧ̀. по ржⷭ҇твѣ́ бо дв҃ствꙋеши є҆ди́на ѿ же́нъ, ꙗ҆́кѡ ро́ждшаѧ творца̀ своего̀, и҆ ро́гъ сп҃си́тельный вѣ̑рнымъ возвы́сившаго чⷭ҇тны́й крⷭ҇тъ, въ не́мже сп҃сшесѧ тобо́ю, бцⷣꙋ вои́стиннꙋ велича́емъ.
Твою̀ пречⷭ҇тꙋю и҆ нетлѣ́ннꙋю ᲂу҆тро́бꙋ дв҃о бцⷣе, бж҃їе бг҃ъ сло́во ѡ҆ст҃и́вый цѣ́лꙋ соблюдѐ, и҆з̾ неѧ́же проше́дъ четыредесѧтодне́вный младе́нецъ ꙗ҆ви́сѧ, и҆́же прино́ситсѧ ꙗ҆́кѡ зако́на творе́цъ и҆ законода́тель: є҆го́же велича́емъ.
Въ тебѣ̀ бцⷣе на́ше ᲂу҆мале́нїе преста̀, неви́димое бо сло́во во ᲂу҆тро́бѣ твое́й прїе́мшаѧ, сꙋгꙋ́ба того̀ родила̀ є҆сѝ, бг҃а вкꙋ́пѣ и҆ чл҃вѣ́ка: на него́же херꙋві́ми воззрѣ́ти не дерза́ютъ: тѣ́мже тѧ̀ велича́емъ пречⷭ҇таѧ.
По ржⷭ҇твѣ̀ тѧ̀ чⷭ҇таѧ, и҆ пре́жде ржⷭ҇тва̀, и҆ въ ржⷭ҇твѣ̀ пречⷭ҇таѧ, всѧ̀ тва́рь проповѣ́дающи, ꙗ҆́кѡ бцⷣꙋ и҆́стиннꙋю велича́емъ.
Пое́мъ тѧ̀ прест҃а́ѧ дв҃о мт҃и сла́внаѧ, ꙗ҆́кѡ прозѧбла̀ є҆сѝ нбⷭ҇ный кла́съ хрⷭ҇та̀ бг҃а, па́че всѧ́кїѧ мы́сли, ѿ тебѐ хлѣ́бъ бы́сть живо́тный вѣ̑рнымъ. тѣ́мъ тѝ зове́мъ: ра́дꙋйсѧ непоро́чнаѧ, пребы́вшаѧ дв҃а по ржⷭ҇твѣ̀ чⷭ҇таѧ.
Мѡѷсе́й на горѣ̀ неѡпали́мꙋю кꙋпинꙋ̀ ви́дѣ, і҆ѡ́сифъ въ верте́пѣ неизрече́нное ржⷭ҇тво̀ слы́ша, нескве́рнаѧ дв҃о, безмꙋ́жнаѧ мт҃и, пѣ́сньми тѧ̀ бцⷣе велича́емъ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.