і҆рмосы̀, гла́съ г҃
Гла́съ тре́тїй.
Пѣ́снь а҃.
Во́ды дре́вле ма́нїемъ бж҃е́ственнымъ во є҆ди́но со́нмище совокꙋпи́вый, и҆ раздѣли́вый мо́ре, і҆и҃льтєскимъ лю́демъ, се́й бг҃ъ на́шъ, препросла́вленъ є҆́сть: томꙋ̀ є҆ди́номꙋ пои́мъ, ꙗ҆́кѡ просла́висѧ.
[Срѣ́тенїѧ:] Сꙋ́шꙋ глꙋбороди́тельнꙋю зе́млю со́лнце наше́ствова и҆ногда̀, ꙗ҆́кѡ стѣна́ бо ѡ҆гꙋстѣ̀ ѻ҆бапо́лы вода̀, лю́демъ пѣшомореходѧ́щымъ, и҆ бг҃оꙋго́днѡ пою́щымъ: пои́мъ гдⷭ҇ви, сла́внѡ бо просла́висѧ.
Ѡ҆землени́вый мо́ре жезло́мъ, мѡѷсе́емъ чермно́е, рꙋка́ма ста́рца дне́сь ѡ҆б̾е́млетсѧ бг҃ъ и҆́же без̾ мт҃ре ѿ ѻ҆ц҃а̀ въ послѣ̑днѧѧ же во́лею мт҃рїю но́ситсѧ.
[Ѻ҆смогла́сника:]
Фараѡ́ни колесни̑цы глꙋбино́ю покры́въ гдⷭ҇и, мо́ре разве́рглъ є҆сѝ, и҆ сп҃слъ є҆сѝ пѣ́сньми пою́щыѧ тѧ̀, лю́ди і҆и҃льтєскїѧ.
Ди́внѡ, сла́внѡ творѧ́й чꙋдеса̀ ты̀ є҆сѝ бж҃е бе́зднꙋ ѡ҆землени́вый, и҆ колесни̑цы потопи́вый, и҆ лю́ди сп҃сы́й пою́щыѧ тебѣ̀, ꙗ҆́кѡ цр҃ю̀ на́шемꙋ и҆ бг҃ꙋ.
И҆зба́вльшемꙋ і҆и҃лѧ ѿ рабо́ты, и҆ фараѡ́на погрꙋзи́вшемꙋ въ мо́ри, пои́мъ сп҃сꙋ хрⷭ҇тꙋ̀: ꙗ҆́кѡ просла́висѧ во вѣ́ки.
Пои́мъ гдⷭ҇ви, сотво́ршемꙋ ди̑внаѧ чꙋдеса̀ въ чермнѣ́мъ мо́ри, по́нтомъ бо покры̀ проти̑вныѧ, и҆ сп҃сѐ і҆и҃лѧ: томꙋ̀ є҆ди́номꙋ пои́мъ, ꙗ҆́кѡ просла́висѧ.
Пресѣка́емое мо́ре жезло́мъ дре́вле, і҆и҃ль про́йде ꙗ҆́кѡ по пꙋсты́ни, и҆ крⷭ҇тоѡбра́знѡ ꙗ҆́вѣ пред̾ꙋготовлѧ́етъ стєзѝ. сегѡ̀ ра́ди пои́мъ во хвале́нїи чꙋ́дномꙋ бг҃ꙋ на́шемꙋ, ꙗ҆́кѡ просла́висѧ.
Пѣ́снь но́вꙋю пои́мъ лю́дїе, ѿ дв҃ы ро́ждшемꙋсѧ во сп҃се́нїе на́ше, и҆ є҆ди́но сотво́ршемꙋ съ нбⷭ҇ными земна̑ѧ, ꙗ҆́кѡ просла́висѧ.
Сп҃сшемꙋ бг҃ꙋ въ мо́ри лю́ди, и҆ погрꙋзи́вшемꙋ проти̑вныѧ, томꙋ̀ є҆ди́номꙋ пои́мъ, ꙗ҆́кѡ просла́висѧ.
Пѣ́снь в҃.
Ви́дите ви́дите, ꙗ҆́кѡ а҆́зъ є҆́смь сп҃съ мі́ра, свѣ́тъ и҆́стинный, и҆сто́чникъ жи́зни, сн҃ъ бж҃їй.
Вонмѝ землѐ и҆ нб҃о, и҆ внꙋшѝ глаго́лы моѧ̑: возглаго́лю бо на землѝ бж҃їѧ чꙋдеса̀.
Ꙗ҆́кѡ тꙋ́ча на тро́скотъ, и҆ ꙗ҆́коже и҆́ней на сѣ́но, да сни́дꙋтъ на зе́млю глаго́ли моѝ.
Пѣ́снь г҃.
И҆́же ѿ несꙋ́щихъ всѧ̑ приведы́й, сло́вомъ созида́емаѧ, соверша́ємаѧ дх҃омъ, вседержи́телю вы́шнїй, въ любвѝ твое́й ᲂу҆твердѝ менѐ.
[Срѣ́тенїѧ:] Оу҆твержде́нїе на тѧ̀ надѣ́ющихсѧ, ᲂу҆твердѝ гдⷭ҇и цр҃ковь, ю҆́же стѧжа́лъ є҆сѝ чⷭ҇тно́ю твое́ю кро́вїю.
[Ѻ҆смогла́сника:]
Оу҆твержа́йсѧ дꙋшѐ въ гдⷭ҇ѣ бз҃ѣ, и҆ возопі́й хва́лѧщисѧ: нѣ́сть ст҃ъ, па́че тебѐ гдⷭ҇и.
Непло́днаѧ дꙋшѐ и҆ безча́днаѧ, стѧжѝ пло́дъ бл҃госла́вный, веселѧ́щисѧ возопі́й: ᲂу҆тверди́хсѧ тобо́ю бж҃е, нѣ́сть ст҃ъ, нѣ́сть првⷣнъ, па́че тебѐ гдⷭ҇и.
Оу҆твердѝ гдⷭ҇и сердца̀ на̑ша: и҆ просвѣтѝ къ твоемꙋ̀ пѣснопѣ́нїю, є҆́же сла́вити тѧ̀ сп҃се во вѣ́къ вѣ́ка.
Оу҆тверди́сѧ се́рдце моѐ въ гдⷭ҇ѣ, вознесе́сѧ ро́гъ мо́й въ бз҃ѣ мое́мъ: ꙗ҆́кѡ нѣ́сть ст҃ъ, па́че тебѐ гдⷭ҇и.
Лꙋ́къ сокрꙋши́лъ є҆сѝ вра́жїй, и҆ щиты̀ сте́рлъ є҆сѝ крѣ́постїю влⷣко хрⷭ҇тѐ, ᲂу҆твержде́нїе на́ше: ст҃ъ є҆сѝ гдⷭ҇и.
Оу҆тверже́нїе и҆ ѡ҆чище́нїе пода́ждь на́мъ сн҃е бж҃їй, и҆ сп҃си́ ны, ꙗ҆́кѡ чл҃вѣколю́бецъ.
Оу҆твердѝ менѐ гдⷭ҇и, є҆ди́не многомлⷭ҇тиве, и҆ простри́ ми рꙋ́кꙋ, ꙗ҆́кѡ петро́ви, и҆ сп҃си́ мѧ.
Ѡ҆снова́вый зе́млю на тве́рди є҆ѧ̀, и҆ нб҃са̀ ᲂу҆тверже́й крѣ́постїю, ᲂу҆твердѝ всѧ̑ ны̀, хва́лѧщыѧ тѧ̀ вѣ́рнѡ.
Пѣ́снь д҃.
Положи́лъ є҆сѝ къ на́мъ тве́рдꙋю любо́вь гдⷭ҇и, є҆диноро́днаго бо твоего̀ сн҃а за ны̀ на сме́рть да́лъ є҆сѝ. тѣ́мже тѝ зове́мъ бл҃годарѧ́ще: сла́ва си́лѣ твое́й гдⷭ҇и.
[Срѣ́тенїѧ:] Покры́ла є҆́сть нб҃са̀ добродѣ́тель твоѧ̀ хрⷭ҇тѐ: и҆з̾ кївѡ́та бо проше́дъ, ст҃ы́ни твоеѧ̀ нетлѣ́нныѧ мт҃ре, въ хра́мѣ сла́вы твоеѧ̀ ꙗ҆ви́лсѧ є҆сѝ, ꙗ҆́кѡ млⷣнецъ рꙋконоси́мь: и҆ и҆спо́лнишасѧ всѧ̑ твоегѡ̀ хвале́нїѧ.
Гора̀ прїѡсѣне́ннаѧ ꙗ҆ви́сѧ ᲂу҆тро́ба дв҃ы, рꙋ́чка, и҆ трапе́за є҆́сть мт҃и гдⷭ҇нѧ. и҆з̾ неѧ́ бо про́йде ꙗ҆́вѣ, и҆ сѷмеѡ́нъ ѡ҆б̾ѧ́тьми под̾ѧ́тъ. сла́ва си́лѣ твое́й гдⷭ҇и.
[Ѻ҆смогла́сника:]
Є҆да̀ въ рѣка́хъ прогнѣ́ваешисѧ гдⷭ҇и; є҆гда̀ въ рѣка́хъ ꙗ҆́рость твоѧ̀ и҆лѝ въ мо́ри ᲂу҆стремле́нїе твоѐ;
Стра́нна и҆ неизрече́нна ржⷭ҇тва̀ твоегѡ̀ та́йна: ᲂу҆слы́шахъ слꙋ́хъ тво́й, и҆ ᲂу҆боѧ́хсѧ, и҆ веселѧ́сѧ вопїю́ ти: си́лѣ твое́й сла́ва чл҃вѣколю́бче.
Прїѡсѣне́ннꙋю го́рꙋ, а҆ввакꙋ́мъ прозрѧ́ши пречⷭ҇тꙋю твою̀ ᲂу҆тро́бꙋ чⷭ҇таѧ, тѣ́мъ взыва́ше: ѿ ю҆́га прїи́детъ бг҃ъ, и҆ ст҃ы́й ѿ горы̀ прїѡсѣне́нныѧ ча́щи.
Что̀ ᲂу҆жа́слсѧ є҆сѝ а҆ввакꙋ́ме; комꙋ̀ зове́ши и҆ вопїе́ши: ѿ ю҆́га прїи́детъ бг҃ъ; сло́во пло́ть бы́сть, и҆ всели́сѧ въ ны̀, и҆ ви́дѣхомъ, во хвале́нїи пою́ще ди́вномꙋ бг҃ꙋ на́шемꙋ, ꙗ҆́кѡ просла́висѧ.
Пѣ́снь є҃.
Къ тебѣ̀ ᲂу҆́тренюю всѣ́хъ творцꙋ̀, преимꙋ́щемꙋ всѧ́къ ᲂу҆́мъ ми́рови, занѐ свѣ́тъ повелѣ̑нїѧ твоѧ̑, въ ни́хже наста́ви мѧ̀.
[Срѣ́тенїѧ:] Ꙗ҆́кѡ ви́дѣ и҆са́їа ѡ҆бра́знѡ на прⷭ҇то́лѣ превознесе́на бг҃а, ѿ а҆́гг҃лъ сла́вы дорѷноси́ма, ѽ ѻ҆каѧ́нный, вопїѧ́ше, а҆́зъ: прови́дѣхъ бо воплоща́ема бг҃а, свѣ́та невече́рнѧ, и҆ ми́ромъ влады́чествꙋюща.
Во тьмѣ̀ пою́ща возста́ви бл҃года́телю, и҆ дꙋшѝ моеѧ̀ мглꙋ̀ просвѣтѝ свѣ́томъ лица̀ твоегѡ̀ чл҃вѣколю́бче, и҆ тво́й ми́ръ пода́ждь мѝ, ꙗ҆́кѡ и҆ногда̀ ста́рцꙋ неизмѣ́нне.
[Ѻ҆смогла́сника:]
Свѣ́томъ твои́мъ невече́рнимъ хрⷭ҇тѐ, ѡ҆зарѝ бж҃е смире́ннꙋю мою̀ дꙋ́шꙋ, и҆ наста́ви на стра́хъ тво́й, занѐ свѣ́тъ повелѣ̑нїѧ твоѧ̑.
На землѝ неви́димый ꙗ҆ви́лсѧ є҆сѝ, и҆ человѣ́кѡмъ во́лею сожи́лъ є҆сѝ непостижи́мый, и҆ къ тебѣ̀ ᲂу҆́тренююще, воспѣва́емъ тѧ̀ чл҃вѣколю́бче.
Оу҆́тренююще воспѣва́емъ тѧ̀ сло́ве, сн҃е бж҃їй є҆диноро́дне: тво́й ми́ръ да́ждь на́мъ, и҆ поми́лꙋй ны̀ пою́щыѧ тѧ̀, и҆ вѣ́рнѡ покланѧ́ющыѧсѧ.
Тво́й ми́ръ да́ждь на́мъ сн҃е бж҃їй, и҆но́гѡ бо ра́звѣ тебѐ бг҃а не вѣ́мы, въ вы́шнихъ со ѻ҆ц҃е́мъ и҆ дх҃омъ сла́вимагѡ.
Къ тебѣ̀ ᲂу҆́тренюю, ѿ ѻ҆ц҃а̀ пре́жде денни́цы возсїѧ́вшемꙋ ᲂу҆́тро мі́рови, помраче́нна согрѣше́ньми сп҃се, предвари́въ ѡ҆зарѝ бж҃е.
Дꙋшѝ моеѧ̀ мглꙋ̀ разори́въ свѣ́томъ твои́мъ хрⷭ҇тѐ: прїими́ мѧ є҆ди́не бл҃гоꙋтро́бне, ѿ но́щи тебѣ̀ зовꙋ̀: ѡ҆зарѝ мою̀ мы́сль.
Вопїе́тъ тѝ хрⷭ҇тѐ пѣ́снь немо́лчнꙋю, ѿ но́щи ᲂу҆́тренюѧ дх҃ъ мо́й: ты́ бо свѣ́тъ и҆́стинный, и҆ незаходѧ́й, просвѣща́ѧй всѧ́каго человѣ́ка, въ мі́ръ грѧдꙋ́ща.
Къ тебѣ̀ ᲂу҆́тренюемъ хрⷭ҇тѐ бж҃е, ᲂу҆́тренюю и҆́стинꙋ, возсїѧ́вшꙋ на́мъ ѿ дв҃ы, и҆ бг҃оразꙋ́мїемъ ѡ҆зари́вшꙋ, сꙋ́щымъ во мра́цѣ невѣ́дѣнїѧ.
Началобы́тнꙋю тьмꙋ̀, свѣ́томъ разрꙋши́въ мра́къ се́рдца моегѡ̀, заре́ю повелѣ́нїй твои́хъ ѿженѝ хрⷭ҇тѐ, да ᲂу҆́тренюю тѝ свѣ́тлѡ, неприкоснове́нномꙋ свѣ́тꙋ.
Пѣ́снь ѕ҃.
Бе́здна послѣ́днѧѧ грѣхѡ́въ ѡ҆бы́де мѧ̀, и҆ и҆счеза́етъ дꙋ́хъ мо́й: но простры́й влⷣко высо́кꙋю твою̀ мы́шцꙋ, ꙗ҆́кѡ петра̀ мѧ̀ ᲂу҆пра́вителю сп҃сѝ.
[Срѣ́тенїѧ:] Возопѝ къ тебѣ̀ ви́дѣвъ ста́рецъ ѻ҆чи́ма сп҃се́нїе, є҆́же лю́демъ прїи́де ѿ бг҃а: хрⷭ҇тѐ, ты̀ бг҃ъ мо́й.
Глꙋбина̀ грѣхѡ́въ воста̀ на мѧ̀ сп҃се, и҆ бꙋ́рѧ ѿча́ѧнїѧ. тѣ́мже вѣ́рнѡ вопїю́ ти, ꙗ҆́кѡ ѿ ки́та і҆ѡ́на: возведѝ живо́тъ мо́й ѿ тлѝ, менѐ ра́ди младе́нствовавый, и҆ во ѡ҆б̾ѧ́тїихъ сѷмеѡ́на дне́сь въ хра́мъ приведы́йсѧ.
[Ѻ҆смогла́сника:] И҆̀же въ концы̀ вѣкѡ́въ доше́дшыѧ чл҃вѣколю́бче, и҆ треволне́ньми напа́стей поги́бнꙋти бѣ́дствꙋющыѧ, вопїю́щыѧ не пре́зри: сп҃сѝ сп҃се, ꙗ҆́коже сп҃слъ є҆сѝ ѿ ѕвѣ́рѧ прⷪ҇ро́ка.
Глꙋбина̀ страсте́й воста̀ на мѧ̀, и҆ бꙋ́рѧ проти́вныхъ вѣ́трѡвъ. но предвари́въ мѧ̀ ты̀ сп҃сѝ сп҃се, и҆ и҆зба́ви ѿ тлѝ, ꙗ҆́кѡ сп҃слъ є҆сѝ ѿ ѕвѣ́рѧ прⷪ҇ро́ка.
Возведѝ ѿ тли́ мѧ гдⷭ҇и бж҃е мо́й, і҆ѡ́на вопїѧ́ше, и҆ а҆́зъ вопїю́ ти: и҆з̾ глꙋбины̀ и҆зба́ви мѧ̀ сп҃се мно́гихъ мои́хъ ѕѡ́лъ, и҆ къ свѣ́тꙋ твоемꙋ̀, молю́сѧ, наста́ви.
Селе́нїѧ і҆ѡ́на, є҆́же въ преиспо́днѣмъ а҆́дѣ, є҆сте́ственный ѡ҆́бразъ бы́въ, вопїѧ́ше: возведѝ ѿ тлѝ живо́тъ мо́й, чл҃вѣколю́бче.
Воззва́хъ воздыха́нїи немо́лчными къ ще́дромꙋ бг҃ꙋ, и҆ ᲂу҆слы́ша мѧ̀ ѿ а҆́да преиспо́днѧгѡ, и҆ возведѐ ѿ тлѝ живо́тъ мо́й.
Во глꙋбинꙋ̀ се́рдца морска́гѡ беззако́нїй ѿве́рженъ бы́хъ, ꙗ҆́кѡ і҆ѡ́на вопїю́ тѝ: возведи́ мѧ ѿ тлѝ, да возда́мъ тѝ мл҃твы моѧ̑ гдⷭ҇и.
Пѣ́снь з҃.
Ꙗ҆́коже дре́вле, бл҃гочести̑выѧ трѝ ѻ҆́троки ѡ҆роси́лъ є҆сѝ, въ пла́мени халде́йстѣмъ, свѣ́тлымъ бж҃ества̀ ѻ҆гне́мъ и҆ на́съ ѡ҆зарѝ, бл҃гослове́нъ є҆сѝ взыва́ющыѧ, бж҃е ѻ҆тє́цъ на́шихъ.
[Срѣ́тенїѧ:] Тебѐ во ѻ҆гнѝ ѡ҆роси́вшаго, ѻ҆́троки бг҃ослови́вшыѧ, и҆ въ дв҃ꙋ нетлѣ́ннꙋ все́льшагосѧ, бг҃а сло́ва пои́мъ, бл҃гоче́стнѡ пою́ще: бл҃гослове́нъ бг҃ъ ѻ҆тє́цъ на́шихъ.
Пе́щь горѧ́щаѧ, не ѡ҆брѣ́тесѧ ѡ҆роша́ющаѧ, то́кмѡ вавѷлѡ́нскаѧ: безмꙋ́жнаѧ и҆на́ѧ мт҃и и҆ дв҃а не ꙗ҆ви́сѧ. ѻ҆́ва ᲂу҆́бѡ ѻ҆́троки сохранѝ неѡпали̑мы, сїѧ́ же носѝ во ѡ҆б̾ѧ́тїихъ, є҆го́же воспѣва́юще глаго́лемъ: бл҃гослове́нъ є҆сѝ бж҃е ѻ҆тє́цъ на́шихъ.
[Ѻ҆смогла́сника:]
Трїѐ ѻ҆́троцы въ пещѝ, трⷪ҇цꙋ проѡбрази́вше, преще́нїе ѻ҆́гненное попра́ша, и҆ пою́ще вопїѧ́хꙋ: бл҃гослове́нъ є҆сѝ бж҃е ѻ҆тє́цъ на́шихъ.
Го́рдый мꙋчи́тель, но дѣте́й бы́сть и҆гра́лище, ꙗ҆́коже бо пе́рсть попра́вше седмери́чный пла́мень, поѧ́хꙋ: бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ.
Пла́мень ѡ҆роси́вый пе́щный, и҆ ѻ҆́троки неѡпали̑мы сп҃сы́й, бл҃гослове́нъ є҆сѝ во вѣ́ки, гдⷭ҇и бж҃е ѻ҆тє́цъ на́шихъ.
Пре́жде ѡ҆́бразꙋ злато́мꙋ, персі́дскомꙋ чти́лищꙋ: ѻ҆́троцы не поклони́шасѧ, трїѐ пою́ще посредѣ̀ пе́щи: ѻ҆тцє́въ бж҃е бл҃гослове́нъ є҆сѝ.
Ꙗ҆́кѡ зла́то въ горни́лѣ, ѻ҆́троки и҆скꙋша́хꙋсѧ въ пещѝ и҆ показа́шасѧ свѣ́тли, не внегда̀ слїѧ́тисѧ, но внегда̀ храни́тисѧ: не внегда̀ горѣ́ти, но внегда̀ пѣ́ти непреста́ннѡ: бл҃гослове́нъ є҆сѝ бж҃е ѻ҆тє́цъ на́шихъ.
Въ пещѝ пла́мень ᲂу҆гаси́ша ѻ҆́троцы, и҆ нбⷭ҇нꙋю ро́сꙋ прїѧ́ша вѣ́рою: бл҃гослове́нъ є҆сѝ бж҃е ѻ҆тє́цъ на́шихъ.
Прохлажде́й пла́мень пе́щный и҆ дв҃ꙋ сохранѝ ро́ждшꙋю тѧ̀ бцⷣꙋ: бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ.
Пѣ́снь и҃.
[Се́й и҆ срѣ́тенїѧ:] Нестерпи́момꙋ ѻ҆гню̀ соедини́вшесѧ, бг҃оче́стїѧ предстоѧ́ще ю҆́нѡши, пла́менемъ же неврежде́ни, бж҃е́ственнꙋю пѣ́снь поѧ́хꙋ: бл҃гослови́те всѧ̑ дѣла̀ гдⷭ҇нѧ гдⷭ҇а, и҆ превозноси́те во всѧ̑ вѣ́ки.
Ꙗ҆́кѡ пе́щь дре́вле, прїе́мшаѧ ѻ҆́троки не ѡ҆палѝ, та́кѡ и҆ дв҃а заче́нши зижди́телѧ, не ѡ҆пали́сѧ ᲂу҆тро́бою. Ѽле чꙋдесѐ! неизмѣ́нный ви́дитсѧ пло́тїю, и҆ во хра́мъ приво́дитсѧ. сегѡ̀ ра́ди вѣ́рою пою́ще глаго́лемъ: бл҃гослови́те дѣла̀ гдⷭ҇а.
[Ѻ҆смогла́сника:]
Въ пла́мень ко ѻ҆трокѡ́мъ є҆врє́йскимъ снизше́дшаго, бж҃їею си́лою, и҆ ꙗ҆́вльшагосѧ гдⷭ҇а, сщ҃е́нницы бл҃гослови́те, и҆ превозноси́те во всѧ̑ вѣ́ки.
Веще́ственнагѡ ѻ҆гнѧ̀ пла́мень, невеще́ственнымъ ᲂу҆вѧди́ша бг҃озри́мїи ѻ҆́троцы, и҆ поѧ́хꙋ: бл҃гослови́те всѧ̑ дѣла̀ гдⷭ҇нѧ гдⷭ҇а.
А҆́гг҃льми немо́лчнѡ въ вы́шнихъ сла́вимаго бг҃а, нб҃са̀ нб҃съ, землѧ̀, и҆ го́ры, и҆ хо́лми, и҆ глꙋбина̀, и҆ ве́сь ро́дъ человѣ́ческїй, пѣ́сньми того̀ ꙗ҆́кѡ созда́телѧ, и҆ и҆зба́вителѧ бл҃гослови́те, и҆ превозноси́те во всѧ̑ вѣ́ки.
Вавѷлѡ́нскаѧ пе́щь ѻ҆́троки не ѡ҆палѝ, нижѐ бж҃ества̀ ѻ҆́гнь дв҃ꙋ растлѝ. тѣ́мъ со ѻ҆́троки вѣ́рнїи возопїе́мъ: бл҃гослови́те дѣла̀ гдⷭ҇нѧ гдⷭ҇а.
Слꙋжи́ти живо́мꙋ бг҃ꙋ, въ вавѷлѡ́нѣ ѻ҆́троцы претерпѣ́вше, ѡ҆ мꙋсїкі́йскихъ ѻ҆рга́нѣхъ неради́ша, и҆ посредѣ̀ пла́мене стоѧ́ще, бг҃олѣ́пнꙋю пѣ́снь воспѣва́хꙋ, глаго́люще: бл҃гослови́те всѧ̑ дѣла̀ гдⷭ҇нѧ гдⷭ҇а.
Покланѧ́емаго ѿ ст҃ы́хъ а҆́гг҃лъ, и҆ сла́вимаго непреста́ннѡ, сщ҃е́нницы по́йте, лю́дїе превозноси́те во всѧ̑ вѣ́ки.
На престо́лѣ херꙋві́мстѣ носи́маго, сщ҃е́нницы по́йте, лю́дїе превозноси́те во всѧ̑ вѣ́ки.
И҆з̾ безнача́льнагѡ ѻ҆ц҃а̀ рожде́ннаго пре́жде вѣ̑къ бг҃а, и҆ въ послѣ̑днѧѧ ѿ бцⷣы въ пло́ть ѡ҆бле́кшасѧ, ꙗ҆́кѡ соверше́нна чл҃вѣ́ка и҆ бг҃а и҆́стинна, по́йте, бл҃гослови́те и҆ превозноси́те во всѧ̑ вѣ́ки.
Бл҃годѣ́телѧ и҆ бг҃а и҆ и҆зба́вителѧ всѣ́хъ и҆ творца̀ всегѡ̀ мі́ра сщ҃е́нницы по́йте, лю́дїе превозноси́те во всѧ̑ вѣ́ки.
Ѡ҆бра́знѡ во а҆́гг҃льстѣмъ ꙗ҆́вльшасѧ зра́цѣ, и҆ дѣ́ти прохла́ждша посредѣ̀ горѧ́щїѧ пе́щи, бл҃гослови́те дѣла̀ гдⷭ҇нѧ гдⷭ҇а.
Пѣ́снь ѳ҃.
Но́вое чꙋ́до и҆ бг҃олѣ́пное дв҃ческꙋю бо две́рь затворе́ннꙋю ꙗ҆́вѣ прохо́дитъ гдⷭ҇ь, на́гъ во вхо́дѣ, и҆ плотоно́сецъ ꙗ҆ви́сѧ во и҆схо́дѣ бг҃ъ, и҆ пребыва́етъ две́рь затворе́на: сїю̀ неизрече́ннѡ, ꙗ҆́кѡ бг҃омт҃рь велича́емъ.
[Срѣ́тенїѧ:] Въ зако́нѣ сѣ́ни и҆ писа́нїй, ѡ҆́бразъ ви́димъ вѣ́рнїи: всѧ́къ мꙋ́жескїй по́лъ ложесна̀ разверза́ѧ, ст҃ъ бг҃ꙋ. тѣ́мъ перворожде́нное сло́во ѻ҆ц҃а̀ безнача́льна, сн҃а первородѧ́щасѧ мт҃рїю неискꙋсомꙋ́жнѡ, велича́емъ.
Пречⷭ҇таѧ бцⷣе, мт҃и безневѣ́стнаѧ, пра́веднѡ тѧ̀ пою́тъ чи́нове а҆́гг҃лѡвъ, и҆ ста́рецъ сѷмеѡ́нъ ржⷭ҇тво̀ твоѐ зрѧ̀ взыва́ше: ны́нѣ ѿпꙋща́еши раба̀ твоего̀ влⷣко, по глаго́лꙋ твоемꙋ̀, ꙗ҆́кѡ да сп҃се́ши хрⷭ҇тѐ, тѧ̀ съ ро́ждшею велича́ющыѧ.
Тѧ̀ живописꙋ́ющїй а҆ссѷрі́йскїй пла́мень, дв҃о мт҃и мр҃і́е: ѻ҆́гнь бо бж҃ества̀ во ᲂу҆тро́бꙋ твою̀ всели́всѧ чⷭ҇таѧ, неѡпа́льнѡ соблюдѐ пречⷭ҇таѧ. ложесна̀ твоѧ̑. тѣ́мже и҆ хрⷭ҇то́съ тобо́ю въ хра́мъ ст҃ы́й ѡ҆б̾ѧ́тьми приведы́йсѧ, на́съ ѡ҆бновѝ велича́ющыѧ твоѐ ржⷭ҇тво̀.
[Ѻ҆смогла́сника:]
На сїна́йстѣй горѣ̀ ви́дѣ тѧ̀ въ кꙋпинѣ̀ мѡѷсе́й, неѡпа́льнѡ ѻ҆́гнь бж҃ества̀ заче́ншꙋю во чре́вѣ: данїи́лъ же тѧ̀ ви́дѣ го́рꙋ несѣко́мꙋю, же́злъ прозѧ́бшїй, и҆са́їа взыва́ше, ѿ ко́рене дв҃дова.
Сла́дкою пречⷭ҇тагѡ твоегѡ̀ ржⷭ҇тва̀ стрѣло́ю ᲂу҆ѧзвле́ни, чи́стаѧ, твое́й достожела́ннѣй добро́тѣ дивѧ́щесѧ, пѣ́сньми а҆́гг҃льскими досто́йнѡ тѧ̀ ꙗ҆́кѡ мт҃рь бж҃їю велича́емъ.
Кꙋпино́ю и҆ ѻ҆гне́мъ пропи́санною въ сїна́и законополо́жникꙋ мѡѷсе́ю, и҆ бж҃їй во чре́вѣ неѡпа́льнѡ заче́ншꙋю ѻ҆́гнь, всесвѣ́тлꙋю и҆ негаси́мꙋю свѣщꙋ̀, сꙋ́щꙋю бцⷣꙋ пѣ́сньми чтꙋ́ще велича́емъ.
Тебѐ неѡпали́мꙋю кꙋпинꙋ̀, и҆ ст҃ꙋ́ю дв҃ꙋ, мт҃рь свѣ́та, и҆ бцⷣꙋ наде́ждꙋ всѣ́хъ на́съ велича́емъ.
Бл҃гослове́нъ гдⷭ҇ь бг҃ъ і҆и҃левъ, воздви́гнꙋвый ро́гъ спасе́нїѧ на́мъ въ домꙋ̀ дв҃да ѻ҆́трока своегѡ̀, милосе́рдїѧ ра́ди ми́лости, въ ни́хже посѣтѝ на́съ восто́къ съ высоты̀, и҆ напра́вилъ ны̀ є҆́сть на пꙋ́ть ми́ра.
Несѣко́мꙋю го́рꙋ, краесѣко́мый ка́мень, є҆го́же ви́дѣ данїи́лъ прⷪ҇ро́къ, бцⷣꙋ мр҃і́ю пѣ́сньми велича́емъ.
Тѧ̀ неискꙋсобра́чнꙋю бцⷣꙋ въ па́мѧти ст҃ы́хъ велича́емъ, ꙗ҆́кѡ ро́ждшꙋю спасе́нїе дꙋ́шъ на́шихъ.
Тебѐ, безсме́ртный и҆сто́чникъ, и҆ ст҃ы́хъ и҆сцѣлє́нїѧ человѣ́чꙋ ро́дꙋ подаю́щꙋ при́снѡ велича́емъ, ꙗ҆́кѡ сп҃са́еши дꙋ́шы на́шѧ.
Бл҃года́тнаѧ ра́дꙋйсѧ, гдⷭ҇ь съ тобо́ю, бл҃гослове́на ты̀ въ жена́хъ, и҆ тѧ̀ велича́емъ.
Мт҃рь свѣ́та, и҆ по ржⷭ҇твѣ̀ дв҃ꙋ, и҆ дꙋ́шъ на́шихъ спасе́нїѧ приста́нище, вѣ́рнїи є҆диномꙋ́дреннѡ пѣ́сньми велича́емъ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.