і҆рмосы̀, гла́съ в҃
Гла́съ вторы́й.
Пѣ́снь а҃.
Во глꙋбинѣ̀ постла̀ и҆ногда̀ фараѡни́тское всево́инство преѡрꙋже́ннаѧ си́ла, вопло́щшеесѧ же сло́во всеѕло́бный грѣ́хъ потреби́ло є҆́сть, препросла́вленный гдⷭ҇ь, сла́внѡ бо просла́висѧ.
[Ст҃ы́хъ бг҃оѧвле́нїй:] Глꙋбины̀ ѿкры́лъ є҆́сть дно̀, и҆ сꙋ́шею своѧ̑ влече́тъ: въ не́й покры́въ проти̑вныѧ, крѣ́пкїй во бране́хъ гдⷭ҇ь, ꙗ҆́кѡ просла́висѧ.
Ше́ствꙋетъ морскꙋ́ю волнѧ́щꙋюсѧ бꙋ́рю: сꙋ́шꙋ а҆́бїе і҆и҃ль ꙗ҆́вльшꙋюсѧ: че́рмный же по́нтъ, трїста́ты є҆гѵ́пєтскїѧ покры̀ кꙋ́пнѡ, водостла́ненъ гро́бъ, си́лою крѣ́пкою десни́цы влⷣчни.
[Ѻ҆смогла́сника, и҆ на ржⷭ҇тво̀ бцⷣы:]
Грѧди́те лю́дїе, пои́мъ пѣ́снь хрⷭ҇тꙋ̀ бг҃ꙋ, раздѣ́льшемꙋ мо́ре, и҆ наста́вльшемꙋ лю́ди, ꙗ҆̀же и҆зведѐ и҆з̾ рабо́ты є҆гѵ́петскїѧ, ꙗ҆́кѡ просла́висѧ.
Нетре́нꙋ, неѻбы́чнꙋ, немо́креннѡ морскꙋ́ю ше́ствовавъ стезю̀, и҆збра́нный вопїѧ́ше і҆и҃ль: гдⷭ҇ви пои́мъ, ꙗ҆́кѡ просла́висѧ.
Пои́мъ гдⷭ҇ви, въ мо́ри дре́вле лю́ди наста́вльшемꙋ, и҆ въ не́мъ фараѡ́на со всево́инствомъ погрꙋзи́вшемꙋ, пѣ́снь побѣ́днꙋю, ꙗ҆́кѡ просла́висѧ.
Непроходи́мое волнѧ́щеесѧ мо́ре, бж҃їимъ свои́мъ велѣ́нїемъ и҆зсꙋши́вшемꙋ, и҆ пѣшеше́ствовати сквозѣ̀ є҆̀ і҆и҃льтєскїѧ лю́ди наста́вльшемꙋ, гдⷭ҇ви пои́мъ: сла́внѡ бо просла́висѧ.
Пои́мъ гдⷭ҇ви пѣ́снь но́вꙋю, ꙗ҆́кѡ пресла́внѡ і҆и҃лѧ сп҃сѐ, рабо́ты и҆зба́вивъ, и҆ мꙋ́чащыѧ врагѝ покры́ло є҆́сть мо́ре.
Мѡѷсе́йскꙋю пѣ́снь воспрїи́мши, возопі́й дꙋшѐ: помо́щникъ и҆ покрови́тель бы́сть мнѣ̀ во сп҃се́нїе, се́й мо́й бг҃ъ, и҆ просла́влю є҆го̀.
Ѡ҆брати́вшемꙋ мо́ре въ сꙋ́шꙋ, и҆ прове́дшемꙋ і҆и҃лѧ сквозѣ̀ є҆̀, пои́мъ гдⷭ҇ви бг҃ꙋ, ꙗ҆́кѡ просла́висѧ.
Высоковы́йный въ колесни́цахъ, и҆ въ крѣ́пкихъ трїста́тахъ фараѡ́нъ, въ чермнѣ́мъ потопи́сѧ со всево́инствомъ: мѡѷсе́й же і҆и҃лѧ ꙗ҆́кѡ по сꙋ́хꙋ прове́дъ бж҃е́ственнымъ велѣ́нїемъ, поѧ́ше: пои́мъ гдⷭ҇ви, сла́внѡ бо просла́висѧ.
Бе́здны дре́вле безмѣ́рное, мѡѷсе́й крⷭ҇тоѡбра́знѡ пресѣчѐ жезло́мъ, и҆ фараѡ́ново всево́инство въ не́мъ потопѝ. і҆и҃льтѧне же на ѻ҆́нъ по́лъ мо́рѧ преходѧ́ще, пѣ́снь воспѣва́хꙋ: пои́мъ гдⷭ҇ви, сла́внѡ бо просла́висѧ.
По бе́зднѣ ходѧ́ще і҆и҃льтєскїѧ лю́ди, воспѣва́хꙋ рꙋко́ю крѣ́пкою си́льномꙋ, сокрꙋши́вшемꙋ бра̑ни фараѡ́на мꙋчи́телѧ: пои́мъ гдⷭ҇ви, сла́внѡ бо просла́висѧ.
Во́ды дре́вле чермна́гѡ растерза́лъ є҆сѝ жезло́мъ законоположи́телѧ, и҆ лю́ди и҆збра̑нныѧ немо́креннѡ сп҃сы́й, побѣ́днꙋю пою́щыѧ пѣ́снь, побѣди́тельнѣй твое́й хрⷭ҇тѐ десни́цѣ.
Стопа́ми невла́жными і҆и҃ль прохожда́ше: сѣче́нїемъ во́дъ проѧвлѧ́ше крⷭ҇тъ, вхо́домъ погребе́нїе, и҆схо́домъ чⷭ҇тно́е и҆ бж҃е́ственное воскресе́нїе, поѧ̀ въ похвале́нїи и҆зба́вителю побѣ́днꙋю.
Пои́мъ гдⷭ҇ви пѣ́снь но́вꙋю: стра́шно бо чꙋ́до, ꙗ҆́кѡ дв҃а породѝ бг҃а вочл҃вѣ́чшасѧ, и҆ по ржⷭ҇твѣ̀ па́ки дв҃а пребы́сть.
Пѣ́снь в҃.
Нб҃о и҆ землѧ̀ да во́нметъ, и҆ хрⷭ҇тꙋ̀ да воспою́тъ, во і҆ѻрда́нѣ человѣ́ческїй возсозда́вшемꙋ дне́сь ро́дъ, и҆стлѣ́вшїй ѿ престꙋпле́нїѧ.
Нб҃о вонми́ ми, землѐ внꙋшѝ глаго́лы моѧ̑, ꙗ҆́кѡ и҆з̾ глꙋбины̀ се́рдца моегѡ̀ ѿры́гнꙋхъ, бж҃їе великолѣ́пїе, дне́сь па́мѧть премꙋ́дрыхъ а҆пⷭ҇лъ є҆гѡ̀.
Ви́дите ви́дите, ꙗ҆́кѡ а҆́зъ є҆́смь въ мо́ри сп҃сы́й, и҆ въ пꙋсты́ни насы́тивый і҆и҃льтєскїѧ лю́ди, и҆ во́дꙋ и҆з̾ ка́мене и҆сточи́вый человѣ́кѡмъ, да дре́вле па́дшаго поне́съ, привлекꙋ̀ ко мнѣ̀ за неизрече́ннꙋю ми́лость.
Внемли́те лю́дїе моѝ зако́нꙋ моемꙋ̀, приклони́те ᲂу҆́хо ва́ше во глаго́лы ᲂу҆́стъ мои́хъ: ꙗ҆́кѡ и҆́мѧ твоѐ гдⷭ҇и призва́хъ.
Внемли́те лю́дїе зна́менїємъ дѣ́лъ, бж҃е́ственныѧ моеѧ̀ си́лы, и҆ ѡ҆ се́мъ разꙋмѣ́йте, ꙗ҆́кѡ є҆ди́нъ а҆́зъ бг҃ъ є҆́смь всѣ́хъ.
Бг҃ъ, и҆́стинна дѣла̀ є҆гѡ̀, и҆ всѝ пꙋтїѐ є҆гѡ̀ сꙋдьбы̑.
Пѣ́снь г҃.
Процвѣла̀ є҆́сть пꙋсты́нѧ, ꙗ҆́кѡ крі́нъ гдⷭ҇и, ꙗ҆зы́ческаѧ неплодѧ́щаѧ цр҃ковь прише́ствїемъ твои́мъ, въ не́йже ᲂу҆тверди́сѧ моѐ се́рдце.
[Бг҃оѧвле́нїй:] Крѣ́пость даѧ́й царє́мъ на́шымъ гдⷭ҇ь, и҆ ро́гъ пома́занныхъ свои́хъ возносѧ́й, ѿ дв҃ы ражда́етсѧ, грѧде́тъ же ко креще́нїю. томꙋ̀ вѣ́рнїи возопїе́мъ: нѣ́сть ст҃ъ, ꙗ҆́кѡ бг҃ъ на́шъ.
Є҆ли́цы дре́внихъ и҆зрѣши́хомсѧ сѣ́тей, бра́шенъ львѡ́въ сотре́нныхъ члено́вными, ра́дꙋимсѧ и҆ разшири́мъ ᲂу҆ста̀, сло́во плетꙋ́ще ѿ слове́съ сладкопѣ́нїѧ, и҆́мже къ на́мъ наслажда́етсѧ дарова́нїй.
[Ѻ҆смогла́сника:]
Лꙋ́къ сокрꙋши́сѧ си́льныхъ держа́вою твое́ю хрⷭ҇тѐ, и҆ си́лою немощствꙋ́ющїи препоѧ́сашасѧ.
На ка́мени мѧ̀ вѣ́ры ᲂу҆тверди́въ, разшири́лъ є҆сѝ ᲂу҆ста̀ моѧ̑ на врагѝ моѧ̑. возвесели́ бо сѧ дꙋ́хъ мо́й, внегда̀ пѣ́ти: нѣ́сть ст҃ъ, ꙗ҆́коже бг҃ъ на́шъ, и҆ нѣ́сть пра́веденъ, па́че тебѐ гдⷭ҇и.
[На ржⷭ҇тво̀ бцⷣы:] Оу҆твердѝ на́съ въ тебѣ̀ гдⷭ҇и, дре́вомъ ᲂу҆мерщве́й грѣ́хъ, и҆ стра́хъ тво́й всадѝ въ сердца̀ на́съ пою́щихъ тѧ̀.
Непло́дствовавшїй мо́й ᲂу҆́мъ, плодоно́сенъ бж҃е покажи́ ми, дѣ́лателю до́брыхъ, насади́телю бл҃ги́хъ, бл҃гоꙋтро́бїемъ твои́мъ.
Оу҆тверди́ мѧ гдⷭ҇и, бж҃е мо́й, да не похва́литсѧ вра́гъ мо́й ѡ҆ мнѣ̀: ты́ бо є҆сѝ гдⷭ҇и ᲂу҆твержде́нїе моѐ, и҆ прибѣ́жище и҆ си́ла.
Храни́тель тве́рдый, и҆ незы́блемое ᲂу҆твержде́нїе, ты̀ є҆сѝ хрⷭ҇тѐ, надѣ́ющыѧсѧ на тѧ̀ неꙋклѡ́нны ᲂу҆твержда́ѧ на́съ, и҆звѣстѝ въ тве́рдомъ твое́мъ ѡ҆снова́нїи наде́жды и҆ вѣ́ры.
Оу҆тверди́сѧ се́рдце моѐ въ гдⷭ҇ѣ, вознесе́сѧ ро́гъ мо́й въ бз҃ѣ мое́мъ: ꙗ҆́кѡ роди́лсѧ є҆сѝ на землѝ, и҆ спа́слъ є҆сѝ заблꙋ́дшаго.
Ты̀ сло́вомъ твои́мъ гдⷭ҇и, нб҃са̀ ᲂу҆тверди́лъ є҆сѝ, ты̀ и҆ се́рдце моѐ въ вѣ́рѣ ᲂу҆твердѝ.
Нб҃о простры́й ꙗ҆́кѡ ко́жꙋ и҆ сꙋ́шꙋ ѡ҆снова́вый на вода́хъ бж҃е́ственнымъ твои́мъ ма́нїемъ хрⷭ҇тѐ бж҃е, и҆ менѐ ᲂу҆твердѝ въ правосла́внѣй вѣ́рѣ, взыва́юща: ст҃ъ нѣ́сть па́че тебѐ.
Оу҆тверди́ мѧ гдⷭ҇и, ᲂу҆тверди́вый си́лою нб҃са̀, и҆ ᲂу҆твердѝ се́рдце моѐ во стра́сѣ твое́мъ, да а҆́ннинꙋ пѣ́снь принесꙋ́ ти сло́вꙋ: нѣ́сть ст҃ъ ꙗ҆́кѡ бг҃ъ на́шъ, вознесы́й ро́гъ пома́занныхъ свои́хъ.
Нб҃са̀ нб҃съ, сла́вꙋ твою̀ сп҃сѐ повѣ̑дающаѧ, на похвалꙋ̀ воздвиза́ютъ а҆́гг҃лѡвъ мно́жєства, и҆ человѣ́цы воспѣва́ютъ. нѣ́сть па́че тебѐ бг҃ъ и҆ гдⷭ҇ь, ѿ не сꙋ́щихъ во є҆́же бы́ти приведы́й всѧ́чєскаѧ.
И҆́же въ нача́лѣ премꙋ́дростїю твое́ю хрⷭ҇тѐ, нб҃са̀ ᲂу҆твержде́й ра́зꙋмомъ, ѡ҆снова́вый же зе́млю бг҃олѣ́пнѡ на вода́хъ безмѣ́рныхъ, держа́вою твое́ю, ᲂу҆тверди́ мѧ молю́сѧ, въ тве́рдомъ ѡ҆снова́нїи вѣ́ры.
Оу҆тверди́вый въ нача́лѣ премꙋ́дростїю и҆ сло́вомъ нб҃са̀ въ ра́зꙋмѣ, и҆ зе́млю ѡ҆снова́вый на вода́хъ, воскрⷭ҇нѝ ѿ гро́ба, даѧ́й на́мъ ро́гъ сп҃се́нїѧ.
Пѣ́снь д҃.
Прише́лъ є҆сѝ ѿ дв҃ы, не хода́тай, ни а҆́гг҃лъ, но са́мъ гдⷭ҇и вопло́щьсѧ, и҆ сп҃слъ є҆сѝ всего́ мѧ человѣ́ка. тѣ́мъ зовꙋ́ ти: сла́ва си́лѣ твое́й гдⷭ҇и.
[Бг҃оѧвле́нїй:] Оу҆слы́шахъ гдⷭ҇и гла́съ тво́й, є҆го́же ре́клъ є҆сѝ, гла́съ вопїю́щагѡ въ пꙋсты́ни, ꙗ҆́кѡ возгремѣ́лъ є҆сѝ над̾ вода́ми мно́гими, твоемꙋ̀ свидѣ́тельствꙋѧй сн҃ꙋ, ве́сь бы́въ соше́дшагѡ дх҃а, возопѝ: ты̀ є҆сѝ хрⷭ҇то́съ, бж҃їѧ мꙋ́дрость и҆ си́ла.
Ѻ҆гне́мъ ѡ҆чи́щьсѧ та́йнагѡ зрѣ́нїѧ, поѧ̀ прⷪ҇ро́къ человѣ́кѡвъ новодѣ́йство, возглаша́етъ гла́съ, дх҃омъ пле́щꙋщъ, воплоще́нїе ꙗ҆влѧ́ющъ неизрече́нна сло́ва, и҆́мже си́льныхъ держа̑вы сотро́шасѧ.
[Ѻ҆смогла́сника:]
Оу҆слы́шахъ гдⷭ҇и, сла́вное твоѐ смотре́нїе, и҆ просла́вихъ чл҃вѣколю́бче, непостижи́мꙋю твою̀ си́лꙋ.
[На ржⷭ҇тво̀ бцⷣы:] Оу҆слы́шахъ гдⷭ҇и, слꙋ́хъ твоегѡ̀ смотре́нїѧ, и҆ просла́вихъ тѧ̀, є҆ди́не чл҃вѣколю́бче.
Пою́ тѧ, слꙋ́хомъ бо гдⷭ҇и ᲂу҆слы́шахъ и҆ ᲂу҆жасо́хсѧ, до мене́ бо и҆́деши, менѐ и҆щѧ̀ заблꙋ́ждшаго. тѣ́мъ мно́гое твоѐ снизхожде́нїе, є҆́же на мѧ̀, прославлѧ́ю многомлⷭ҇тиве.
Оу҆слы́шахъ гдⷭ҇и слꙋ́хъ тво́й, и҆ ᲂу҆боѧ́хсѧ, разꙋмѣ́хъ дѣла̀ твоѧ̑, и҆ диви́хсѧ, и҆ возопи́хъ. сла́ва си́лѣ твое́й гдⷭ҇и.
И҆з̾ горы̀ ка́мень кромѣ̀ рꙋкѝ ѿсѣ́клсѧ є҆сѝ хрⷭ҇тѐ, ѿ дв҃ы мт҃ре. тѣ́мже прⷪ҇ро́къ прови́дѧ вопїѧ́ше: во сп҃се́нїе люде́й твои́хъ прише́лъ є҆сѝ, сла́ва си́лѣ твое́й гдⷭ҇и.
Прозорли́вѣ прⷪ҇ро́къ тайноводи́мый, твоемꙋ̀ хрⷭ҇тѐ прише́ствїю ᲂу҆жаса́етсѧ, є҆́же предрекі́й вопїѧ́ше: хвале́нїѧ твоегѡ̀ и҆спо́лнисѧ землѧ̀. бг҃олѣ́пнѡ бо на́шꙋ нищетꙋ̀ не презрѣ́лъ є҆сѝ, но прише́лъ и҆ сп҃слъ є҆сѝ.
Оу҆слы́шахъ слꙋ́хъ бж҃е́ственныѧ си́лы твоеѧ̀ хрⷭ҇тѐ, ꙗ҆́кѡ безсѣ́меннѡ во чре́вѣ дв҃ы зача́лсѧ є҆сѝ, и҆ возопи́хъ: сла́ва си́лѣ твое́й гдⷭ҇и.
Є҆́же ѿ дв҃ы твоѐ ржⷭ҇тво̀ прⷪ҇ро́къ предзрѧ̀, возпроповѣ́даше вопїѧ̀: слꙋ́хъ тво́й ᲂу҆слы́шахъ, и҆ ᲂу҆боѧ́хсѧ, ꙗ҆́кѡ ѿ ю҆́га, и҆ и҆з̾ горы̀ ст҃ы́ѧ прїѡсѣне́нныѧ прише́лъ є҆сѝ хрⷭ҇тѐ.
Внегда̀ прибли́житисѧ лѣ́тѡмъ позна́ешисѧ, положи́лъ бо є҆сѝ любо́вь тве́рдꙋ крѣ́пости твоеѧ̀, гдⷭ҇и.
Неизрече́нное та́инство вочл҃вѣ́ченїѧ твоегѡ̀ хрⷭ҇тѐ бж҃е, та́йнѡ прови́дѣвъ а҆ввакꙋ́мъ вопїѧ́ше: ᲂу҆слы́шахъ слꙋ́хъ тво́й, и҆ ᲂу҆боѧ́хсѧ, разꙋмѣ́хъ дѣла̀ твоѧ̑, и҆ просла́влю си́лꙋ твою̀.
Чꙋ́дꙋ стра́шномꙋ наꙋчи́всѧ чꙋ́дный а҆ввакꙋ́мъ, неизрече́нномꙋ твоемꙋ̀, сло́ве бж҃їй, прише́ствїю, ꙗ҆́кѡ ѿ прїѡсѣне́нныѧ ча́щи, неизмѣ́нне воплоща́емь проше́лъ є҆сѝ, и҆ ꙗ҆́кѡ во ᲂу҆́жасѣ бы́въ, взыва́ше: сла́ва си́лѣ твое́й гдⷭ҇и.
Свѣще́ю пре́жде а҆ввакꙋ́мъ просвѣща́емь гдⷭ҇и, и҆ твоѐ вочл҃вѣ́ченїе предвозвѣща́ѧ, вопїѧ́ше ѿ ст҃ы́ѧ дв҃ы проитѝ неизмѣ́нне, въ возсозда́нїе дре́внѧгѡ а҆да́ма.
Ѿ дв҃ы безсѣ́меннѡ ꙗ҆ви́лсѧ є҆сѝ мі́рови ꙗ҆́кѡ со́лнце, нетлѣ́нїѧ сла́вꙋ ѡ҆зарѧ́ѧ на́мъ, ѿ а҆да́ма престꙋпле́нїемъ ѡ҆сꙋди́вшымсѧ гдⷭ҇и. тѣ́мже дохнове́нїемъ дх҃а прⷪ҇ро́къ а҆ввакꙋ́мъ взыва́ше: сла́ва хрⷭ҇тѐ си́лѣ твое́й.
Посредѣ̀ двою̀ разбѡ́йникꙋ живо́тъ на дре́вѣ ви́сѧше, совокꙋпи́ти бо пре́жде разстоѧ́щее, дла̑ни прострѐ свое́ю во́лею, и҆ воскре́съ тридне́вный, совоскр҃си́въ є҆стество̀ человѣ́ческое, сла́вѧщее є҆гѡ̀ бж҃е́ственное снизхожде́нїе.
Пѣ́снь є҃.
Хода́тай бг҃ꙋ и҆ человѣ́кѡмъ бы́лъ є҆сѝ хрⷭ҇тѐ бж҃е: тобо́ю во влⷣко, къ свѣтонача́льникꙋ ѻ҆ц҃ꙋ̀ твоемꙋ̀, ѿ но́щи невѣ́дѣнїѧ, приведе́нїе и҆́мамы.
[Бг҃оѧвле́нїй:] І҆и҃съ живота̀ нача́льникъ, разрѣши́ти ѡ҆сꙋжде́нїе грѧде́тъ а҆да́ма первозда́ннагѡ, ѡ҆чище́нїй же ꙗ҆́кѡ бг҃ъ не тре́бꙋѧ, па́дшаго ѡ҆чища́етъ во і҆ѻрда́нѣ: въ не́мже враждꙋ̀ ᲂу҆би́въ, преимꙋ́щъ всѧ́къ ᲂу҆́мъ ми́ръ да́рꙋетъ.
Врага̀ те́мнагѡ и҆ ѡ҆скверне́ннагѡ ꙗ҆́да ѡ҆чище́нїемъ дх҃а и҆змове́ни: къ но́вой приста́хомъ небла́зненной стезѝ, водѧ́щей въ непристꙋ́пнꙋю ра́дость, є҆ди́нѣмъ пристꙋ́пнꙋ: и҆́мже бг҃ъ примири́сѧ.
[Ѻ҆смогла́сника:]
Свѣ́та пода́телю, и҆ вѣкѡ́въ тво́рче гдⷭ҇и, во свѣ́тѣ твои́хъ повелѣ́нїй наста́ви на́съ: ра́звѣ бо тебѐ и҆но́гѡ бг҃а не зна́емъ.
Мглꙋ̀ дꙋшѝ моеѧ̀, сп҃се мо́й, разгна́въ свѣ́томъ за́повѣдей твои́хъ, ѡ҆зари́ мѧ ꙗ҆́кѡ є҆ди́нъ цр҃ь ми́ра.
Оу҆́гль и҆са́їи проѧвле́йсѧ со́лнце и҆з̾ дѣ́вственныѧ ᲂу҆тро́бы возсїѧ̀ во тмѣ̀ заблꙋ́ждшымъ, бг҃оразꙋ́мїѧ просвѣще́нїе да́рꙋѧ.
Просвѣще́нїе во тьмѣ̀ лежа́щихъ, сп҃се́нїе ѿча́ѧнныхъ хрⷭ҇тѐ сп҃се мо́й, къ тебѣ̀ ᲂу҆́тренюю цр҃ю̀ ми́ра, просвѣти́ мѧ сїѧ́нїемъ твои́мъ: и҆но́гѡ бо ра́звѣ тебѐ бг҃а не зна́ю.
Ѿ но́щи пое́мъ тѧ̀ хрⷭ҇тѐ бж҃е, ꙗ҆́кѡ бл҃говоле́нїемъ ѻ҆́ч҃имъ, себѐ во и҆стоща́нїе положи́лъ є҆сѝ, на́шегѡ ра́ди сп҃се́нїѧ.
Стѧжи́ ны гдⷭ҇и плѣнє́нныѧ ѿ грѣха̀, и҆ просвѣтѝ сп҃се, во є҆́же пѣ́ти и҆ сла́вити тѧ̀, є҆ди́наго и҆зба́вителѧ и҆ просвѣти́телѧ дꙋ́шъ на́шихъ.
Живо́тъ сы́й и҆ свѣ́тъ хрⷭ҇тѐ бж҃е, мра́чнагѡ невѣ́дѣнїѧ разори́въ мглꙋ̀, просвѣтѝ на́шѧ мы̑сли, ᲂу҆́мнаѧ чꙋ̑вства незаходи́мымъ свѣ́томъ твоегѡ̀ ра́зꙋма.
Но́щи преше́дшей, прибли́жисѧ де́нь, и҆ свѣ́тъ мі́рꙋ возсїѧ̀, сегѡ̀ ра́ди хва́лѧтъ тѧ̀ а҆́гг҃льстїи чи́ни, и҆ славосло́вѧтъ тѧ̀ всѧ́чєскаѧ.
[На ржⷭ҇тво̀ бцⷣы:] Сѣннопи́санный мра́къ гада́нїй разори́въ, и҆ вѣ́рныхъ прибы́тїемъ и҆́стины, бг҃оѻтрокови́цею ѡ҆зари́въ сердца̀, и҆ на́съ свѣ́томъ твои́мъ хрⷭ҇тѐ наста́ви.
Невече́рнїй свѣ́тъ тво́й хрⷭ҇тѐ, возсїѧ́й въ на́съ свѣтода́вче, и҆ мра́къ прегрѣше́нїй на́шихъ разорѝ, ми́ра цр҃ю̀.
Свѣ́томъ за́повѣдей твои́хъ ѡ҆зарѝ хрⷭ҇тѐ, се́рдце моѐ, ꙗ҆́кѡ да во хвалѣ̀ твою̀ непреста́ннѡ славосло́влю, ѿ но́щи ᲂу҆́тренюѧ, бл҃госты́ню.
Тебѐ сла́вы сл҃нце незаходи́мое хрⷭ҇тѐ,ѿ се́рдца молю̀: просвѣтѝ дꙋшѝ моеѧ̀ ѡ҆слѣпле́ннїи зѣ̑ницы, ѿ но́щи грѣха̀ къ дѣ́ланїю за́повѣдей твои́хъ.
Просвѣще́нїемъ за́повѣдей твои́хъ, є҆ди́не ще́дре, ѡ҆зарѝ дꙋ́шꙋ мою̀, молю́сѧ, ю҆́же и҆з̾ глꙋбины̀ сна̀ лѣ́ности, ко ᲂу҆́трꙋ возста́ви, составле́нїе пе́рстное, ꙗ҆́кѡ да пою́ тѧ хрⷭ҇тѐ, свѣ́та невече́рнѧго.
Оу҆́тро свѣ́тлое возсїѧ̀ ѿ гро́ба, є҆гѡ́ бо схожде́нїемъ свѣ́та и҆спо́лнишасѧ преиспѡ́днѧѧ: првⷣныхъ дꙋ́шы воста́ша во сла́вѣ, славосло́вѧщыѧ стра́шное и҆ бж҃е́ственное воскрⷭ҇нїе: ты́ бо є҆ди́нъ цр҃ь, и҆ держа́вный, и҆ си́льный, и҆ ми́ра пода́тель.
Пѣ́снь ѕ҃.
Въ бе́зднѣ грѣхо́внѣй валѧ́ѧсѧ, неизслѣ́днꙋю милосе́рдїѧ твоегѡ̀ призыва́ю бе́зднꙋ: ѿ тлѝ бж҃е мѧ̀ возведѝ.
[Бг҃оѧвле́нїй:] Гла́съ словесѐ, свѣти́льникъ свѣ́та, денни́ца сл҃нца, прⷣте́ча, въ пꙋсты́ни пока́йтесѧ, всѣ̑мъ вопїе́тъ лю́демъ, и҆ пред̾ ѡ҆чи́ститесѧ: се́ бо предстои́тъ хрⷭ҇то́съ, ѿ тлѝ мі́ръ и҆збавлѧ́ѧй.
Вожделѣ́ннаго ꙗ҆́вствова со всебл҃же́ннымъ гла́сомъ ѻ҆ц҃ъ, є҆го́же и҆з̾ чре́ва ѿры́гнꙋ: є҆́й глаго́летъ, се́й соесте́ственъ сн҃ъ сы́й свѣтоза́ренъ. произни́че и҆з̾ человѣ́ча ро́да: сло́во же моѐ жи́во, и҆ человѣ́къ промышле́нїемъ.
[Ѻ҆смогла́сника:]
Гла́съ глагѡ́лъ моле́бныхъ ѿ болѣ́зненныѧ влⷣко, дꙋшѝ ᲂу҆слы́шавъ, ѿ лю́тыхъ мѧ̀ и҆зба́ви: є҆ди́нъ бо є҆сѝ на́шегѡ сп҃се́нїѧ вино́венъ.
Во глꙋбинѣ̀ грѣхо́внѣй содержи́мь є҆́смь сп҃се, и҆ въ пꙋчи́нѣ жите́йстѣй ѡ҆бꙋрева́емь: но ꙗ҆́коже і҆ѡ́нꙋ ѿ ѕвѣ́рѧ, и҆ менѐ ѿ страсте́й возведѝ, и҆ сп҃си́ мѧ.
[На ржⷭ҇тво̀ бцⷣы:] Ко гдⷭ҇ꙋ ѿ ки́та і҆ѡ́на возопѝ: ты́ мѧ возведѝ и҆з̾ глꙋбины̀ а҆́да, молю́сѧ, да ꙗ҆́кѡ и҆зба́вителю во гла́сѣ хвале́нїѧ, и҆́стины же дх҃омъ пожрꙋ̀ тебѣ̀.
Возопи́хъ въ ско́рби мое́й ко гдⷭ҇ꙋ бг҃ꙋ моемꙋ̀, и҆ посла̀ сп҃са мі́ра, и҆ и҆зба́ви ѿ тлѝ живо́тъ мо́й.
Бе́здна мѧ̀ мно́га грѣхо́внаѧ ѡ҆крꙋжа́етъ, и҆ вопїю́ ти, прⷪ҇ро́ка подража́ѧй: ѿ тли́ мѧ гдⷭ҇и, возведѝ.
Є҆́же и҆з̾ глꙋбины̀ се́рдца, не пре́зри моле́нїе рабѡ́въ твои́хъ гдⷭ҇и: но ꙗ҆́кѡ прⷪ҇ро́ка і҆ѡ́нꙋ ѿ ки́това чре́ва и҆зве́лъ є҆сѝ, и҆ на́съ ѿ ᲂу҆́мнагѡ ѕвѣ́рѧ и҆ дꙋшетли́тельнагѡ сп҃сѝ.
И҆з̾ глꙋбины̀ возведи́ мѧ, і҆ѡ́на къ тебѣ̀ возопѝ, ѡ҆́бразъ погребе́нїѧ и҆ воскрⷭ҇нїѧ сы́й, є҆́же на́мъ дарова́лъ є҆сѝ всеси́льне сп҃се.
Бе́здна согрѣше́нїй ѡ҆бы́де мѧ̀ послѣ́днѧѧ, но ꙗ҆́кѡ прⷪ҇ро́ка і҆ѡ́нꙋ, гдⷭ҇и, гдⷭ҇и, возведѝ и҆з̾ и҆стлѣ́нїѧ живо́тъ мо́й.
Морско́мꙋ ѕвѣ́рю впа́дъ і҆ѡ́на, здра́въ сп҃се́сѧ: а҆́зъ же содержи́мь мно́гими мои́ми лю́тыми, въ про́пасть ѿве́рженъ бы́хъ. но молю́ тѧ і҆и҃се бж҃е мо́й, предвари́въ ᲂу҆ще́дри мѧ̀, и҆ ѿ тьмы̀ возведѝ живо́тъ мо́й и҆ ѿ тлѝ.
Во глꙋбины̑ дости́гша морскі̑ѧ, и҆ тридне́вствовавша въ ки́товѣхъ пе́рсехъ морска́гѡ ѕвѣ́рѧ дре́вле і҆ѡ́нꙋ подража́ѧй зовꙋ̀ тѝ: сп҃се мо́й, вопїю́ща возведи́ мѧ и҆з̾ а҆́да преиспо́днѧгѡ, ꙗ҆́кѡ да пожрꙋ́ ти со гла́сомъ хвале́нїѧ.
И҆з̾ чре́ва бе́здны долгѡ́въ мои́хъ сп҃се и҆зведѝ дꙋ́хъ мо́й, ꙗ҆́кѡ дре́вле і҆ѡ́нꙋ ѿ ки́това чре́ва возве́лъ є҆сѝ, да во хра́мѣ ст҃ы́ѧ сла́вы твоеѧ̀ твою̀ похвалю̀ бл҃госты́ню.
Проѡбразꙋ́ѧй твоѐ погребе́нїе, крⷭ҇тъ и҆ стрⷭ҇ть і҆ѡ́на во чре́вѣ ки́товѣ, сп҃се, тридне́вновавъ, ѿ внꙋ́трь взыва́ше: да взы́детъ живо́тъ мо́й, и҆ прїи́детъ мл҃тва моѧ̀ въ хра́мъ тво́й бж҃е́ственный, ѽ гдⷭ҇и ми́лости.
Пѣ́снь з҃.
Бг҃опроти́вное велѣ́нїе беззако́ннꙋющагѡ мꙋчи́телѧ высо́къ пла́мень вознесло̀ є҆́сть: хрⷭ҇то́съ же прострѐ бг҃очести̑вымъ ѻ҆трокѡ́мъ ро́сꙋ дх҃о́внꙋю, сы́й бл҃гослове́нъ и҆ препросла́вленъ.
[Бг҃оѧвле́нїй:] Ю҆́ношы бл҃гочести̑выѧ пе́щи ѻ҆́гненнѣй прїѡбщи́вшыѧсѧ, шꙋмѧ́щъ дꙋ́хъ ро́сный невреди̑мы сохранѝ, и҆ бж҃їѧ а҆́гг҃ла снизхожде́нїе. тѣ́мже въ пла́мени ѡ҆роша́еми бл҃года́рственнѡ воспѣва́хꙋ: препѣ́тый ѻ҆тє́цъ гдⷭ҇и и҆ бж҃е бл҃гослове́нъ є҆сѝ.
Ѡ҆палѝ стрꙋе́ю ѕмі́євы главы̑ пе́щный высо́кїй пла́мень, ю҆́ношы носѧ́щъ бл҃гочести̑выѧ, ᲂу҆ти́шивый неꙋдободержи́мꙋю мглꙋ̀ и҆з̾ грѣха̀, всю́ же ѡ҆мыва́етъ росо́ю дх҃а.
[Ѻ҆смогла́сника:]
Ѡ҆́бразꙋ злато́мꙋ на по́лѣ деи́рѣ слꙋжи́мꙋ, трїѐ твоѝ ѻ҆́троцы небрего́ша безбо́жнагѡ велѣ́нїѧ: посредѣ́ же ѻ҆гнѧ̀ вве́ржени, ѡ҆роша́еми поѧ́хꙋ: бл҃гослове́нъ є҆сѝ бж҃е ѻ҆тє́цъ на́шихъ.
Вѣті́и ꙗ҆ви́шасѧ ѻ҆́троцы, любомꙋ́дрѣйшїи дре́вле: ѿ бг҃опрїѧ́тныѧ бо дꙋшѝ, бг҃осло́вѧще ᲂу҆стна́ми поѧ́хꙋ: пребж҃е́ственный ѻ҆тцє́въ и҆ на́шъ бж҃е, бл҃гослове́нъ є҆сѝ.
Херꙋві́мы подража́юще ѻ҆́троцы въ пещѝ, ликовствова́хꙋ вопїю́ще: бл҃гослове́нъ є҆сѝ бж҃е, ꙗ҆́кѡ и҆́стиною и҆ сꙋдо́мъ наве́лъ є҆сѝ сїѧ̑ всѧ̑, грѣ̑хъ ра́ди на́шихъ, препѣ́тый и҆ препросла́вленный во всѧ̑ вѣ́ки.
Да пресла́вное ржⷭ҇тво̀ твоѐ хрⷭ҇тѐ, є҆́же ѿ дв҃ы, проѡбрази́ши ꙗ҆́вѣ, неѡпали̑мы въ пещѝ ѻ҆́троки сохрани́лъ є҆сѝ, пѣ́сньми пою́щыѧ тебѣ̀: ѻ҆тцє́въ бж҃е, бл҃гослове́нъ є҆сѝ.
[На ржⷭ҇тво̀ бцⷣы:] Кꙋпина̀ въ горѣ̀ ѻ҆гненеѡпа́льнаѧ, и҆ росоно́снаѧ пе́щь халде́йскаѧ, ꙗ҆́вѣ предписа́ тѧ бг҃оневѣ́сто: бж҃е́ственный бо невеще́ственный въ веще́ственнѣмъ чре́вѣ, ѻ҆́гнь неѡпа́льнѡ прїѧ́ла є҆сѝ: тѣ́мже и҆з̾ тебѐ ро́ждшемꙋсѧ пое́мъ: бл҃гослове́нъ є҆сѝ бж҃е ѻ҆тє́цъ на́шихъ.
Трїѐ ѻ҆́троцы въ пещѝ трⷪ҇цꙋ проѡбрази́вше, цр҃ѧ̀ гдⷭ҇а проповѣ́даша, и҆ пре́лесть і҆́дѡльскꙋю ᲂу҆праздни́ша, вопїю́ще: бл҃гослове́нъ є҆сѝ бж҃е ѻ҆тє́цъ на́шихъ.
Пе́щь дре́вле всегремѧ́щꙋю ᲂу҆гаси́вый, и҆ ѻ҆́троки тꙋ́чею дх҃о́вною ѡ҆роси́вый, бл҃гослове́нъ є҆сѝ бж҃е ѻ҆тє́цъ на́шихъ.
Трисвѣ́тлыѧ трⷪ҇цы равночи́сленнїи ѻ҆́троцы, и҆̀же ѿ і҆ерⷭ҇ли́ма въ вавѷлѡ́нѣ, царѧ̀ нечести́вагѡ попра́ша велѣ́нїе, и҆ во ѻ҆́гнь вве́ржени ликовствова́хꙋ, глаго́люще: бл҃гослове́нъ є҆сѝ бж҃е ѻ҆тє́цъ на́шихъ.
Бг҃очести́вїи ѻ҆́троцы сїѡ́нстїи плѣне́ннїи въ вавѷлѡ́нѣ предразсꙋди́вше, и҆ посредѣ̀ пе́щи вве́ржени, всемі́рное ликова́нїе воздвиго́ша, пою́ще: ѻ҆тє́цъ на́шихъ бж҃е бл҃гослове́нъ є҆сѝ.
Бл҃гоче́стїѧ рачи́телїе ѻ҆́троцы въ вавѷлѡ́нѣ ѡ҆́бразꙋ злато́мꙋ не послꙋжи́вше, въ пе́щь ѻ҆́гненнꙋю ра́дꙋющесѧ самово́льнѣ и҆до́ша, и҆ пла́мень въ ро́сꙋ преведо́ша, сїѧ́нїю бж҃їю пою́ще: ѻ҆тцє́въ бж҃е, во хра́мѣ твое́мъ бл҃гослове́нъ є҆сѝ.
Въ пе́щь пла́меннꙋю ю҆́нѡши трѝ вве́ржени, ликова́нїе спле́тше, ꙗ҆́кѡ въ нетлѣ́ннѣмъ тра́вницѣ хрⷭ҇тꙋ̀ снаслажда́ющесѧ, вопїѧ́хꙋ пою́ще: ѻ҆тцє́въ бж҃е, во хра́мѣ твое́мъ бл҃гослове́нъ є҆сѝ.
Тѣ́лꙋ злато́мꙋ премꙋ̑дрыѧ дѣ́ти не послꙋжи́ша, и҆ въ пла́мень са́ми поидо́ша, и҆ бо́ги и҆́хъ ѡ҆брꙋга́ша, средѝ пла́мене возопи́ша, и҆ ѡ҆росѝ ѧ҆̀ а҆́гг҃лъ, ᲂу҆слы́шасѧ ᲂу҆жѐ ᲂу҆́стъ ва́шихъ мл҃тва.
Пѣ́снь и҃.
Пе́щь и҆ногда̀ ѻ҆́гненнаѧ въ вавѷлѡ́нѣ дѣ̑йства раздѣлѧ́ше, бж҃їимъ велѣ́нїемъ халдє́и ѡ҆палѧ́ющаѧ, вѣ́рныѧ же ѡ҆роша́ющаѧ, пою́щыѧ: бл҃гослови́те всѧ̑ дѣ́ла гдⷭ҇нѧ гдⷭ҇а.
[Бг҃оѧвле́нїй:] Та́йнꙋ пресла́внꙋю вавѷлѡ́нскаѧ показа̀ пе́щь, и҆сточи́вшаѧ ро́сꙋ, ꙗ҆́кѡ стрꙋѧ́ми и҆мѧ́ше невеще́ственный ѻ҆́гнь воспрїѧ́ти і҆ѻрда́нъ, и҆ ѡ҆б̾ѧ́ти пло́тїю креща́ема зижди́телѧ: є҆го́же бл҃гословѧ́тъ лю́дїе, и҆ превозно́сѧтъ во всѧ̑ вѣ́ки.
Свобо́дна ᲂу҆́бѡ тва́рь познава́етсѧ, и҆ сы́нове свѣ́та пре́жде ѡ҆мраче́ннїи: є҆ди́нъ сте́нетъ тьмы̀ предста́тель, ны́нѣ да бл҃гослови́тъ ᲂу҆се́рднѡ вино́внаго, пре́жде ѻ҆каѧ́нное ꙗ҆зы́кѡвъ всенаслѣ́дїе.
[Ѻ҆смогла́сника:]
Въ пе́щь ѻ҆́гненнꙋю ко ѻ҆трокѡ́мъ є҆вре́йскимъ снизше́дшаго, и҆ пла́мень въ ро́сꙋ прело́жшаго бг҃а, по́йте дѣла̀ ꙗ҆́кѡ гдⷭ҇а, и҆ превозноси́те во всѧ̑ вѣ́ки.
Ѡ҆ подо́бїи зла́тѣ, небре́гше требл҃же́ннїи ю҆́нѡши, неизмѣ́нный и҆ живы́й бж҃їй ѡ҆́бразъ ви́дѣвше, средѝ ѻ҆гнѧ̀ воспѣва́хꙋ: ѡ҆сꙋществова́ннаѧ да пое́тъ гдⷭ҇а всѧ̀ тва́рь, и҆ превозно́ситъ во всѧ̑ вѣ́ки.
Въ кꙋпинѣ̀ мѡѷсе́ю дв҃ы чꙋ́до, на сїна́йстѣй горѣ̀ проѡбрази́вшаго и҆ногда̀, по́йте, бл҃гослови́те и҆ превозноси́те во всѧ̑ вѣ́ки.
Неизрече́нною мꙋ́дростїю соста́вльшаго всѧ́чєскаѧ бг҃а сло́ва, и҆ ѿ не сꙋ́щихъ во є҆́же бы́ти приве́дшаго, бл҃гослови́те дѣла̀ ꙗ҆́кѡ гдⷭ҇а, и҆ превозноси́те во всѧ̑ вѣ́ки.
Свѣщено́сцы дꙋше́ю, свѣ́тлїи па́че снѣ́га пресїѧ́юще, прпⷣбнїи ѻ҆́троцы посредѣ̀ пла́мене не ѡ҆пали́шасѧ: всѧ̑ бо вкꙋ́пѣ, є҆ли̑ка под̾ тва́рїю, къ бж҃їи пѣ́сни себѣ̀ созыва́юще, съ ра́достїю поѧ́хꙋ: по́йте дѣла̀ гдⷭ҇нѧ гдⷭ҇а.
Велѣ́нїю мꙋчи́телевꙋ, прпⷣбнїи трїѐ ѻ҆́троцы не повинꙋ́вшесѧ, въ пе́щь вве́ржени, бг҃а и҆сповѣ́дахъ пою́ще: бл҃гослови́те дѣла̀ гдⷭ҇нѧ гдⷭ҇а.
Оу҆страши́сѧ ѻ҆трокѡ́въ бл҃гочести́выхъ, соѡбра́знагѡ дꙋшѝ нескве́рнагѡ тѣ́ла, и҆ ᲂу҆страни́сѧ воспита́нный въ безмѣ́рномъ веществѣ̀, нетрꙋжде́нъ ѻ҆́гнь, присноживꙋ́щꙋ же, и҆з̾ꙋвѧ́дшꙋ пла́меню, вѣ́чнꙋющаѧ пѣ́снь воспѣва́шесѧ: гдⷭ҇а всѧ̑ дѣла̀ по́йте, и҆ превозноси́те во всѧ̑ вѣ́ки.
Глаго́лъ мꙋчи́телевъ поне́же превозмо́же, седмери́цею пе́щь разжже́на бы́сть и҆ногда̀: въ не́йже ѻ҆́троцы не ѡ҆пали́шасѧ, царе́во попра́вше велѣ́нїе, но вопїѧ́хꙋ: всѧ̑ дѣла̀ гдⷭ҇нѧ гдⷭ҇а по́йте, и҆ превозноси́те во всѧ̑ вѣ́ки.
[На ржⷭ҇тво̀ бцⷣы:] Въ пе́щи ѻ҆́трочестѣй, проѡбрази́лъ є҆сѝ и҆ногда̀ твою̀ мт҃рь гдⷭ҇и: ѡ҆́бразъ же сїѧ̀ и҆з̾ ѻ҆гнѧ̀ и҆з̾има́ше, неѡпа́льнѡ входѧ́щыѧ. ю҆́же пое́мъ ꙗ҆́вльшꙋюсѧ тобо́ю концє́мъ дне́сь, и҆ превозно́симъ во всѧ̑ вѣ́ки.
Дре́вле ѡ҆роси́вшаго, є҆врє́йскїѧ ѻ҆́троки въ пла́мени, и҆ ѡ҆пали́вшаго гдⷭ҇а халдє́и пресла́внѡ въ не́мъ, воспое́мъ глаго́люще: бл҃гослови́те и҆ превозноси́те є҆го̀ во вѣ́ки.
Ѿ несꙋ́щихъ во є҆́же бы́ти приве́дшаго сло́вомъ всѧ̑, по́йте и҆ превозноси́те во всѧ̑ вѣ́ки.
Гла́сы а҆́гг҃льскими на нб҃сѣ́хъ сла́вимаго бг҃а, восхва́лимъ глаго́люще, земноро́днїи, во всѧ̑ вѣ́ки.
И҆стꙋка́нꙋ златосодѣ́ланномꙋ, на по́ли деи́рѣ ѻ҆рга́ны мꙋсїкі́йскими слꙋжи́мꙋ, бг҃ꙋ же всѣ́хъ созда́телю презрѣ́нꙋ: сїѡ́нстїи ѻ҆́троцы не послꙋ́шаша велѣ́нїѧ беззако́ннагѡ, но показа́ша тва́ри пе́щь росода́тельнꙋ, мꙋчи́телѧ бг҃осло́вѧща, лю́ди превозносѧ́щыѧ, є҆ди́наго бг҃а всѣ́хъ, во всѧ̑ вѣ́ки.
Велѣ́нїе беззако́нное до́блїи ѻ҆́троцы небрего́ша, и҆ мꙋсїкі́йскихъ ѻ҆рга́нѡвъ гла́са не послꙋ́шаша, но въ пещѝ ѡ҆роша́еми бл҃года́рнѡ поѧ́хꙋ: бл҃гослови́те дѣла̀ гдⷭ҇нѧ гдⷭ҇а.
Краснодꙋ́шнїи ѻ҆́троцы въ пе́щь вве́ржени, держа́вꙋ взѧ́ша вѣ́чнꙋю, бг҃а и҆сповѣ́дающе нбⷭ҇наго, и҆ мꙋчи́телѧ посрами́ша, до́гмꙋ предпросте́рше сладкопѣ́нїе, бл҃гослови́те всѧ́кое дыха́нїе и҆ тва́рь, сꙋ́щаго над̾ всѣ́ми цр҃ѧ̀ во всѧ̑ вѣ́ки.
Нераздѣ́льнїи трⷪ҇цы ѻ҆́троцы бы́ша, добро́ты ѡ҆́браза не жела́вше, дꙋшепа́гꙋбнꙋю пре́лесть ѿри́нꙋвше, съ нб҃сѐ ѡ҆роше́ни вопїѧ́хꙋ хрⷭ҇тꙋ̀ пѣ́снь: бл҃гослови́те всѧ̑ дѣла̀ гдⷭ҇нѧ гдⷭ҇а.
Ѡ҆росѝ а҆́гг҃лъ пе́щь ѻ҆трокѡ́въ, ѿвалѝ ка́мень ѿ две́ри гро́ба, и҆ жена́мъ мѷроно́сицамъ бл҃говѣща́ше, глаго́лѧ: воскр҃се гдⷭ҇ь, ꙗ҆́коже проречѐ ва́мъ, потщи́тесѧ, возопі́йте бж҃е́ствєннымъ ᲂу҆ч҃нкѡмъ є҆гѡ̀, ꙗ҆́кѡ предварѧ́етъ вы̀ въ галїле́и, ца́рствꙋѧй во всѧ̑ вѣ́ки.
Въ нача́лѣ гдⷭ҇и зе́млю ѡ҆снова́лъ є҆сѝ, и҆ дѣла̀ рꙋ́къ твои́хъ сꙋ́ть нб҃са̀: воспѣва́етъ всѧ̀ тва́рь и҆ славосло́витъ дѣ́йства сло́вомъ во вѣ́ки.
Хва́лимъ, бл҃гослови́мъ, превозно́симъ, пое́мъ и҆́мѧ твоѐ хрⷭ҇тѐ: ты́ бо цр҃ь во всѧ̑ вѣ́ки.
А҆́гг҃ли непреста́ннѡ воспѣва́ютъ, человѣ́цы при́снѡ славосло́вѧтъ, и҆ всѧ̀ тва́рь да бл҃гослови́тъ гдⷭ҇а.
Пѣ́снь ѳ҃.
Безнача́льна роди́телѧ сн҃ъ, бг҃ъ и҆ гдⷭ҇ь, вопло́щьсѧ ѿ дв҃ы на́мъ ꙗ҆ви́сѧ, ѡ҆мрачє́ннаѧ просвѣти́ти, собра́ти расточє́ннаѧ. тѣ́мъ всепѣ́тꙋю бцⷣꙋ велича́емъ.
[Бг҃оѧвле́нїй:] Недоꙋмѣ́етъ всѧ́къ ѧ҆зы́къ бл҃гохвали́ти по достоѧ́нїю, и҆з̾ꙋмѣва́етъ же ᲂу҆́мъ и҆ премі́рный пѣ́ти тѧ̀, бцⷣе: ѻ҆ба́че бл҃га́ѧ сꙋ́щи, вѣ́рꙋ прїимѝ, и҆́бо любо́вь вѣ́си бж҃е́ственнꙋю на́шꙋ. ты́ бо хрⷭ҇тїа́нъ є҆сѝ предста́тельница, тѧ̀ велича́емъ.
Ѽ па́че ᲂу҆ма̀ ржⷭ҇тва̀ твоегѡ̀ чꙋде́съ, невѣ́сто всечⷭ҇таѧ, мт҃и бл҃гослове́ннаѧ, є҆́юже полꙋчи́вше всесоверше́нное сп҃се́нїе, досто́йнѡ хва́лимъ ꙗ҆́кѡ бл҃годѣ́телѧ, да́ръ носѧ́ще пѣ́снь бл҃годаре́нїѧ.
[Ѻ҆смогла́сника:]
Ве́сь є҆сѝ жела́нїе, ве́сь сла́дость, сло́ве бж҃їй, дв҃ы сн҃е, бж҃е богѡ́въ гдⷭ҇и, ст҃ы́хъ прест҃ы́й. тѣ́мъ тѧ̀ всѝ съ ро́ждшею велича́емъ.
Ѿ земноро́дныхъ кто̀ слы́ша таково̀; и҆лѝ кто̀ ви́дѣ когда̀, ꙗ҆́кѡ дв҃а ѡ҆брѣ́тесѧ во чре́вѣ и҆мꙋ́щаѧ, и҆ безболѣ́зненно млⷣнца поро́ждшаѧ; таково́е твоѐ чꙋ́до, и҆ тѧ̀ чⷭ҇таѧ бцⷣе велича́емъ.
Преесте́ственнѡ пло́тїю заче́ншꙋю во чре́вѣ, ѿ ѻ҆ц҃а̀ безлѣ́тнѡ предвозсїѧ́вшее сло́во, въ пѣ́снехъ немо́лчныхъ велича́емъ вѣ́рнїи.
[На ржⷭ҇тво̀ бцⷣы:] Ꙗ҆́же пре́жде со́лнца свѣти́льника бг҃а возсїѧ́вшаго, пло́тски къ на́мъ прише́дшаго и҆з̾ бокꙋ̀ дв҃и́чꙋ, неизрече́ннѡ воплоти́вшаѧ, бл҃гослове́ннаѧ всечⷭ҇таѧ, тѧ̀ бцⷣе велича́емъ.
Ѿ бг҃а бг҃а сло́ва, неизрече́нною мꙋ́дростїю прише́дшаго ѡ҆бнови́ти а҆да́ма, ꙗ҆́дїю въ тлѣ́нїе па́дшаго лю́тѣ: ѿ ст҃ы́ѧ дв҃ы неизрече́ннѡ воплоти́вшагосѧ на́съ ра́ди, вѣ́рнїи є҆диномꙋ́дреннѡ пѣ́сньми велича́емъ.
Возвели́чисѧ вѣ́рныхъ люде́й цр҃ковь, ꙗ҆́кѡ созда́тель всѣ́хъ въ не́й ѡ҆бита́ѧй новотвори́тъ къ жи́зни.
Что̀ ѡ҆ тебѣ̀ ве́лїѧ и҆ пресла́внаѧ та́йна, а҆да́мова дщѝ и҆ вы́шнѧгѡ мт҃и; є҆ди́ный къ бг҃ꙋ небла́зненный вѣ́рныхъ мо́стъ, тѧ̀ немо́лчными пѣ́сньми вѣ́рнїи бцⷣꙋ велича́емъ.
Возвели́чилъ є҆сѝ хрⷭ҇тѐ, ро́ждшꙋю тѧ̀ бцⷣꙋ, ѿ неѧ́же созда́телю на́шъ, въ подобостра́стное на́мъ ѡ҆бле́клсѧ є҆сѝ тѣ́ло, на́шихъ прегрѣше́нїй рѣши́тельное: сїѐ ᲂу҆бл҃жа́юще, всѝ ро́ди, тебѐ велича́емъ.
Дꙋша́ми чи́стыми, и҆ нескве́рными ᲂу҆стна́ми, прїиди́те возвели́чимъ нескве́рнꙋю, и҆ пречⷭ҇тꙋю мт҃рь є҆мманꙋ́илевꙋ, є҆́юже и҆з̾ неѧ̀ къ рожде́нномꙋ приносѧ́ще мл҃твꙋ: пощадѝ дꙋ́шы на́шѧ хрⷭ҇тѐ бж҃е, и҆ сп҃сѝ на́съ.
Невмѣсти́маго бг҃а во чре́вѣ вмѣсти́вшаѧ, и҆ ра́дость мі́рꙋ роди́вшаѧ, тѧ̀ пое́мъ бцⷣе дв҃о.
Сотворѝ съ тобо́ю вели̑чїѧ чⷭ҇таѧ, всѣ́хъ творе́цъ роди́выйсѧ ѿ тебѐ, па́ки цѣ́ло показа̀ твоѐ чре́во всепѣ́таѧ. тѣ́мъ непреста́ннѡ тѧ̀ бцⷣе, человѣ́ческїй ро́дъ велича́емъ.
Чⷭ҇тꙋю и҆ пречⷭ҇тꙋю мт҃рь и҆ дв҃ꙋ, пѣ́сньми пѣ́сней всѝ вѣ́рнїи, бл҃гоче́стнѡ ꙗ҆́кѡ бцⷣꙋ велича́емъ.
На нб҃сѣ́хъ бл҃гослове́ннаѧ, и҆ на землѝ славосло́вимаѧ, ра́дꙋйсѧ невѣ́сто неневѣ́стнаѧ.
Дв҃ство твоѐ бцⷣе нескве́рнаѧ, є҆́же не ѡ҆палѝ ѻ҆́гнь бж҃е́ственный, велича́емъ.
Велича́емъ всѝ стрⷭ҇тоте́рпцєвъ па́мѧть, водо́ю и҆ ѻ҆гне́мъ проше́дшихъ, и҆ хрⷭ҇та̀ молѧ́щихъ, сп҃стѝ дꙋ́шы на́шѧ.
Пресла́вное слы́шанїе, и҆ та́инство стра́нное въ тебѣ̀ соверши́сѧ, пречⷭ҇таѧ дв҃о, зача́тїе без̾ сѣ́мене, и҆ дв҃ство по ржⷭ҇твѣ̀. но ꙗ҆́кѡ влⷣчца всецр҃и́ца сп҃си́ ны ꙗ҆́кѡ бл҃га, вѣ́рою несꙋмнѣ́нною покланѧ́ющымсѧ ржⷭ҇твꙋ̀ твоемꙋ̀, и҆ велича́ющыѧ.
Тебѐ мы́сленнꙋю и҆ ѡ҆дꙋшевле́ннꙋю лѣ́ствицꙋ: на не́йже бг҃ъ на́шъ ᲂу҆тверди́сѧ, є҆́юже къ нб҃сѝ ѡ҆брѣто́хомъ восхожде́нїе, пѣ́сньми бцⷣе велича́емъ.
Ра́дꙋйсѧ всецр҃и́це, земноро́дныхъ похвало̀, въ послѣ̑днѧѧ дни̑ сп҃се́нїе на́ше ро́ждшаѧ, да ѿ дре́внїѧ клѧ́твы человѣ́ческїй ро́дъ свободи́ши. тѣ́мже всѝ немо́лчнѡ тѧ̀ велича́емъ.
Оу҆тро́ба твоѧ̀ чⷭ҇таѧ бцⷣе дв҃о, нбⷭ҇нꙋю тꙋ́чꙋ мі́рови ᲂу҆ка́нꙋ, живо́тъ возсїѧ́ющꙋю вѣ́чный, и҆ а҆да́ма со є҆́ѵою въ па́жить ра́йскꙋю вселѝ. тѣ́мже тѧ̀ є҆ди́нꙋ въ жена́хъ мт҃рь бы́вшꙋю є҆мманꙋ́илевꙋ всѝ ро́ди велича́емъ.
Велича́емъ твоѐ ржⷭ҇тво̀, ѻ҆трокови́це нескве́рнаѧ, тобо́ю бг҃ꙋ соедини́вшесѧ, и҆ вопїе́мъ тѝ мр҃і́е бг҃оневѣ́сто: ра́дꙋйсѧ всѣ́хъ воззва́нїе ѿ дре́внїѧ клѧ́твы ᲂу҆мерщвле́нныхъ, твои́мъ невоздѣ́ланнымъ чревоноше́нїемъ.
Чꙋ́до пресла́вное, и҆ та́инство стра́нное, зача́тїе преесте́ственное, рождество̀ несказа́нное, а҆́гг҃лѡвъ вѡ́инства, и҆ человѣ́кѡвъ мно́жєства пѣ́сньми непреста́нными велича́емъ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.