і҆рмосы̀, гла́съ а҃
І҆РМОЛО́ГІЙ
съ бг҃омъ ст҃ы́мъ,
ѡ҆бдержа́й всѧ̑ і҆рмосы̀ ѻ҆смогла́сника, влⷣчнихъ же и҆ бг҃омт҃ре пра́здникѡвъ, и҆ всегѡ̀ лѣ́та.
Нача́ло і҆рмосѡ́въ пе́рвагѡ гла́са.
Пѣ́снь а҃.
Твоѧ̀ побѣди́тельнаѧ десни́ца, бг҃олѣ́пнѡ въ крѣ́пости просла́висѧ. та́ бо безсме́ртне ꙗ҆́кѡ всемогꙋ́щаѧ, проти̑вныѧ сотрѐ, і҆и҃льтѧнѡмъ пꙋ́ть глꙋбины̀ новосодѣ́лавшаѧ.
Хрⷭ҇то́съ во гра́дѣ виѳлее́мстѣ младе́нствꙋетъ, на́ше ꙗ҆́кѡ бл҃гоꙋтро́бенъ ѡ҆бновлѧ́ѧ є҆стество̀. ᲂу҆се́рднѡ прїиди́те земноро́днїи, се́рдцемъ пѣ́снь сладкопѣ́сненнꙋю воспои́мъ влⷣцѣ во вѣ́ки: сла́внѡ бо просла́висѧ.
[Въ ржⷭ҇тво̀ хрⷭ҇то́во:] Хрⷭ҇то́съ ражда́етсѧ, сла́вите: хрⷭ҇то́съ съ нб҃съ, срѧ́щите: хрⷭ҇то́съ на землѝ, возноси́тесѧ. по́йте гдⷭ҇еви всѧ̀ землѧ̀, и҆ весе́лїемъ воспо́йте лю́дїе, ꙗ҆́кѡ просла́висѧ.
Сп҃сѐ лю́ди чꙋдодѣ́йствꙋѧй влⷣка, мо́крꙋю мо́рѧ во́лнꙋ ѡ҆землени́въ дре́вле: во́лею же ро́ждьсѧ ѿ дв҃ы, стезю̀ прохо́днꙋ нб҃сѐ полага́етъ на́мъ, є҆го́же по сꙋществꙋ̀ ра́вна же ѻ҆ц҃ꙋ̀ и҆ человѣ́кѡмъ сла́вимъ.
[Въ поклоне́нїе чⷭ҇тна́гѡ крⷭ҇та̀:] Бж҃е́ственнѣйшїй проѡбразѝ дре́вле мѡѷсе́й, въ чермнѣ́мъ мо́ри прове́дъ і҆и҃лѧ крⷭ҇то́мъ твои́мъ, во́дꙋ жезло́мъ пресѣ́къ. пѣ́снь тебѣ̀ и҆схо́днꙋю воспѣва́ѧ, хрⷭ҇тѐ бж҃е.
[Во ст҃ꙋ́ю па́схꙋ:] Воскрⷭ҇нїѧ де́нь, просвѣти́мсѧ лю́дїе, па́сха, гдⷭ҇нѧ па́сха: ѿ сме́рти бо къ жи́зни, и҆ ѿ землѝ къ нб҃сѝ, хрⷭ҇то́съ бг҃ъ на́съ преведѐ, побѣ́днꙋю пою́щыѧ.
[Въ недѣ́лю ѳѡмы̀:] Пои́мъ всѝ лю́дїе, ѿ го́рькїѧ рабо́ты фараѡ́ни, і҆и҃лѧ и҆змѣ́ншемꙋ, и҆ во глꙋбинѣ̀ морстѣ́й нога́ми немо́крыми наста́вльшемꙋ, пѣ́снь побѣ́днꙋю, ꙗ҆́кѡ просла́висѧ.
[Во ᲂу҆спе́нїе бцⷣы:] Преꙋкраше́ннаѧ бж҃е́ственною сла́вою, сщ҃е́ннаѧ и҆ сла́внаѧ дв҃о па́мѧть твоѧ̀, всѧ̑ собра̀ къ весе́лїю вѣ̑рныѧ, начина́ющей марїа́мѣ, съ ли́ки и҆ тѷмпа́ны, твоемꙋ̀ пою́щыѧ є҆диноро́дномꙋ, сла́внѡ ꙗ҆́кѡ просла́висѧ.
[Ѻ҆смогла́сника:]
Пѣ́снь побѣ́днꙋю пои́мъ всѝ бг҃ꙋ, сотво́ршемꙋ ди̑внаѧ чꙋдеса̀ мы́шцею высо́кою, и҆ сп҃сшемꙋ і҆и҃лѧ, ꙗ҆́кѡ просла́висѧ.
Пои́мъ гдⷭ҇еви пѣ́снь но́вꙋю, непроходи́мое бо ѡ҆землени́въ, чермно́е, пѣшеше́ствовати сотворѝ сынѡ́мъ і҆и҃лєвымъ, и҆ сопроти̑вныѧ врагѝ покры̀ мо́ре.
Похвалꙋ̀ бг҃ови́децъ мѡѷсе́й і҆и҃лю предвозглаша́етъ, начина́етъ же марїа́мъ премꙋ̑дрымъ жена́мъ: пѣ́снь побѣ́днꙋю и҆зба́вителю бг҃ꙋ всѝ воспои́мъ.
Столпо́мъ ѻ҆́гненнымъ и҆ ѻ҆́блачнымъ і҆и҃лѧ наставле́й ꙗ҆́кѡ бг҃ъ, мо́ре разве́рже, колесни̑цы же фараѡ́нѡвы глꙋбино́ю покры̀: пои́мъ пѣ́снь побѣ́днꙋю, ꙗ҆́кѡ є҆ди́нъ просла́висѧ.
Го́рькїѧ рабѡ́ты и҆зба́вльсѧ і҆и҃ль, непроходи́мое про́йде ꙗ҆́кѡ сꙋ́шꙋ: врага̀ зрѧ̀ потоплѧ́ема, пѣ́снь ꙗ҆́кѡ бл҃годѣ́телю пое́тъ бг҃ꙋ, чꙋдодѣ́ющемꙋ мы́шцею высо́кою, ꙗ҆́кѡ просла́висѧ.
Пои́мъ пѣ́снь но́вꙋю бг҃ꙋ, ѿ рабо́ты фараѡ́новы и҆зба́вльшемꙋ сы́ны і҆и҃лєвы, и҆ въ пꙋсты́ни ты̑ѧ препита́вшемꙋ, ꙗ҆́кѡ сла́внѡ просла́висѧ.
Фараѡ́на съ колесни́цами въ мо́ри хрⷭ҇то́съ потопѝ и҆ наста́ви лю́ди, пою́щыѧ и҆ глаго́лющыѧ: пои́мъ гдⷭ҇еви, сла́внѡ бо просла́висѧ.
Вознесꙋ̀ тѧ̀ бж҃е сп҃се мо́й, ꙗ҆́кѡ воскре́слъ є҆сѝ ѿ ме́ртвыхъ, попра́въ сме́рть.
Гдⷭ҇еви пои́мъ побѣ́днꙋю пѣ́снь, во и҆схо́дѣ і҆и҃левѣ и҆з̾ є҆гѵ́пта, чермна́гѡ мо́рѧ, и҆ і҆ѻрда́на стрꙋи̑ ѡ҆гꙋсти́вшемꙋ є҆ди́номꙋ пресла́внѡ, лю́демъ пѣшеше́ствꙋющымъ посредѣ̀ є҆гѡ̀: сла́внѡ бо просла́висѧ.
Помо́гшемꙋ бг҃ꙋ во є҆гѵ́птѣ мѡѷсе́ови, и҆ тѣ́мъ фараѡ́на со всево́инствомъ погрꙋзи́вшемꙋ, побѣ́днꙋю пѣ́снь пои́мъ, ꙗ҆́кѡ просла́висѧ.
Пѣ́снь в҃.
Вонмѝ нб҃о, и҆ возглаго́лю, ꙗ҆́кѡ сло́во ѻ҆́ч҃ее во́лею сни́де на зе́млю, приклони́въ нб҃са̀, и҆ бы́сть человѣ́къ, да человѣ́ка сп҃се́тъ, ꙗ҆́кѡ чл҃вѣколю́бецъ.
Вонмѝ гла́сꙋ моемꙋ̀ ѿ дв҃ы рожде́йсѧ, и҆ глаго́лы моѧ̑ внꙋшѝ, ꙗ҆́кѡ и҆́мѧ твоѐ ди́вное гдⷭ҇и призва́хъ.
Вонмѝ нб҃о, и҆ слы́ши землѐ, и҆ хрⷭ҇та̀ воспо́й пелена́ми ѡ҆бви́таго, и҆ вери̑ги прегрѣше́нїй мои́хъ разрѣши́вшаго.
Вонмѝ нб҃о и҆ возглаго́лю, и҆ да слы́шитъ землѧ̀ глаго́лы ᲂу҆́стъ мои́хъ, ꙗ҆́кѡ и҆́мѧ твоѐ гдⷭ҇и, призва́хъ.
Вонмѝ нб҃о, и҆ возглаго́лю, и҆ воспою̀ хрⷭ҇та̀ сп҃са мі́рови, є҆ди́наго чл҃вѣколю́бца.
Вонмѝ гла́сꙋ моле́нїѧ моегѡ̀ цр҃ю̀ и҆ бж҃е мо́й, пѣ́сненнѡ тебѣ̀ вопїю̀: ꙗ҆́кѡ къ тебѣ̀ помолю́сѧ гдⷭ҇и, и҆ сп҃си́ мѧ.
Ви́дите ви́дите, ꙗ҆́кѡ бг҃ъ а҆́зъ є҆́смь, порабощє́нныѧ лю́ди і҆и҃лєвы, мѡѷсе́ю народоводи́ти въ пꙋсты́ни повелѣ́вый, и҆ сп҃сы́й ꙗ҆́кѡ си́ленъ вла́стїю мое́ю.
Ви́дите ви́дите, ꙗ҆́кѡ а҆́зъ є҆́смь сп҃съ мі́ра, свѣ́тъ и҆́стинный, и҆сто́чникъ жи́зни, сн҃ъ бж҃їй.
Пѣ́снь г҃.
Є҆ди́не вѣ́дый человѣ́ческагѡ сꙋщества̀ не́мощь, и҆ млⷭ҇тивнѡ въ нѐ воѡбра́жьсѧ, препоѧ́ши мѧ̀ съ высоты̀ си́лою, є҆́же вопи́ти тебѣ̀ ꙾ст҃ы́й, ѡ҆дꙋшевле́нный хра́ме꙾[[꙾ст҃ъ ѡ҆дꙋшевле́нный хра́мъ꙾]] неизрече́нныѧ сла́вы твоеѧ̀, чл҃вѣколю́бче.
Высокоцрⷭ҇твꙋѧй, безнача́льне млⷭ҇тиве сло́ве, при́зри, вонми́ ми, слезоточа́щаѧ прилѣ́жнѡ вопїѧ́ше тѝ дре́вле а҆́нна: но ꙗ҆́кѡ ѻ҆́нꙋю ᲂу҆слы́шалъ є҆сѝ рыда́ющꙋю, и҆ на́шѧ ᲂу҆твердѝ мы́сли цр҃ю̀, досто́йнѡ пѣ́ти твоѐ ржⷭ҇тво̀.
[Въ ржⷭ҇тво̀ хрⷭ҇то́во:] Пре́жде вѣ̑къ ѿ ѻ҆ц҃а̀ рожде́нномꙋ нетлѣ́ннѡ сн҃ꙋ, и҆ въ послѣ̑днѧѧ ѿ дв҃ы воплоще́нномꙋ безсѣ́меннѡ хрⷭ҇тꙋ̀ бг҃ꙋ возопїи́мъ: вознесы́й ро́гъ на́шъ, ст҃ъ є҆сѝ гдⷭ҇и.
При́зри на пѣ̑нїѧ рабѡ́въ бл҃годѣ́телю, врага̀ смирѧ́ѧ вознесе́ннꙋю горды́ню: носѧ́й же всеви́дче грѣха̀ превы́ше непоколе́блемѡ, ᲂу҆тверждє́нныѧ бл҃же пѣвцы̀, ѡ҆снова́нїемъ вѣ́ры.
[Чⷭ҇тна́гѡ крⷭ҇та̀:] Оу҆твердѝ влⷣко хрⷭ҇тѐ, крⷭ҇то́мъ на ка́мени мѧ̀ вѣ́ры, не поколеба́тисѧ ᲂу҆мꙋ̀, прилѡ́ги врага̀ ѕла́гѡ: є҆ди́нъ бо є҆сѝ ст҃ъ.
[Па́схи:] Прїиди́те пи́во пїе́мъ но́вое, не ѿ ка́мене непло́дна чꙋдодѣ́емое, но нетлѣ́нїѧ и҆сто́чникъ, и҆з̾ гро́ба ѡ҆дожди́вша хрⷭ҇та̀: въ не́мже ᲂу҆твержда́емсѧ.
[Ѳѡмы̀:] Оу҆твердѝ менѐ хрⷭ҇тѐ, на недви́жимомъ ка́мени за́повѣдей твои́хъ, и҆ просвѣти́ мѧ свѣ́томъ лица̀ твоегѡ̀: нѣ́сть бо ст҃ъ па́че тебѐ, чл҃вѣколю́бче.
[ᲂу҆спе́нїѧ бцⷣы:] Содѣ́тельнаѧ и҆ содержи́тельнаѧ всѣ́хъ бж҃їѧ мꙋ́дросте и҆ си́ло, непрекло́ннꙋ, недви́жимꙋ цр҃ковь ᲂу҆твердѝ хрⷭ҇тѐ: є҆ди́нъ бо є҆сѝ ст҃ъ, во ст҃ы́хъ почива́ѧй.
[Ѻ҆смогла́сника:]
Ка́мень є҆го́же небрего́ша зи́ждꙋщїи, бы́сть во главꙋ̀ ᲂу҆́гла: то́й є҆́сть ка́мень, на не́мже ᲂу҆твердѝ цр҃ковь хрⷭ҇то́съ, ю҆́же ѿ ꙗ҆зы̑къ и҆скꙋпѝ.
Оу҆твержде́й сло́вомъ нб҃са̀, и҆ зе́млю ѡ҆снова́вый бж҃е, и҆ менѐ ᲂу҆твердѝ вопїю́ща тебѣ̀ пѣ́снь: ст҃ъ є҆сѝ гдⷭ҇и.
Пре́жде зача́тїѧ чⷭ҇тна́гѡ самꙋ́ила, несꙋмнѣ́ннѡ бг҃ꙋ ѡ҆бѣща́вши, сщ҃еннома́ти а҆́нна, ны́нѣ ра́дꙋющисѧ пое́тъ съ на́ми: ᲂу҆тверди́сѧ въ гдⷭ҇ѣ се́рдце моѐ.
Не мꙋ́дростїю и҆ бога́тствомъ да хва́литсѧ сме́ртный свои́мъ, но вѣ́рою гдⷭ҇нею, правосла́внѡ взыва́ѧ хрⷭ҇тꙋ̀ бг҃ꙋ, и҆ поѧ̀ при́снѡ: на ка́мени твои́хъ за́повѣдей ᲂу҆тверди́ мѧ, влⷣко.
Да ᲂу҆тверди́тсѧ се́рдце моѐ въ во́ли твое́й хрⷭ҇тѐ бж҃е, и҆́же над̾ вода́ми нб҃о ᲂу҆твержде́й второ́е, и҆ ѡ҆снова́вый на вода́хъ зе́млю, всеси́льне.
Оу҆твердѝ гдⷭ҇и цр҃ковь твою̀, ю҆́же стѧжа́лъ є҆сѝ си́лою крⷭ҇та̀ твоегѡ̀, и҆́мже врага̀ побѣди́лъ є҆сѝ, и҆ просвѣти́лъ є҆сѝ вселе́ннꙋю.
Оу҆твержде́нїе мѝ бꙋ́ди, ѡ҆снова́вый зе́млю на вода́хъ, ꙗ҆́кѡ нѣ́сть ст҃ъ, па́че тебѐ, гдⷭ҇и.
Оу҆твержде́й сло́вомъ твои́мъ вселе́ннꙋю, ꙗ҆́же не подви́житсѧ, ᲂу҆твердѝ и҆ на́шꙋ мы́сль въ стра́хъ тво́й, влⷣко гдⷭ҇и.
Да ᲂу҆тверди́тсѧ се́рдце моѐ наде́ждею хрⷭ҇тѐ бла́гъ твои́хъ, да непреста́ннѡ съ пѣ́снїю пѣ́нїе взыва́ю тѝ: и҆́бо нѣ́сть ст҃ъ па́че тебѐ, чл҃вѣколю́бче.
Пѣ́снь д҃.
Го́рꙋ тѧ̀ бл҃года́тїю бж҃їею прїѡсѣне́ннꙋю, прозорли́выма а҆ввакꙋ́мъ ᲂу҆смотри́въ ѻ҆чи́ма, и҆з̾ тебѐ и҆зы́ти і҆и҃левꙋ провозглаша́ше ст҃о́мꙋ, во сп҃се́нїе на́ше и҆ ѡ҆бновле́нїе.
Оу҆слы́шавъ прⷪ҇ро́къ хрⷭ҇тѐ слꙋ́хъ тво́й, ᲂу҆боѧ́сѧ, ꙗ҆́кѡ и҆́маши ѿ дв҃ы пройтѝ, и҆ возопѝ тре́петомъ: сла́ва си́лѣ твое́й, гдⷭ҇и.
[Въ ржⷭ҇тво̀ хрⷭ҇то́во:] Же́злъ и҆з̾ ко́рене і҆ессе́ова, и҆ цвѣ́тъ ѿ негѡ̀ хрⷭ҇тѐ, ѿ дв҃ы прозѧ́блъ є҆сѝ и҆з̾ горы̀ хва́льный, прїѡсѣне́нныѧ ча́щи, прише́лъ є҆сѝ вопло́щьсѧ ѿ неискꙋсомꙋ́жныѧ невеще́ственный и҆ бж҃е: сла́ва си́лѣ твое́й, гдⷭ҇и.
Ро́да человѣ́ча ѡ҆бновле́нїе, дре́вле поѧ̀ прⷪ҇ро́къ а҆ввакꙋ́мъ предвозвѣща́етъ, ви́дѣти неизрече́ннѡ сподо́бивсѧ ѡ҆́бразъ: млады́й млⷣнецъ бо и҆з̾ горы̀ дв҃ы и҆зы́де, люде́й во ѡ҆бновле́нїе сло́во.
[Чⷭ҇тна́гѡ крⷭ҇та̀:] На крⷭ҇тѣ̀ тѧ̀ си́льне свѣти́ло вели́кое ви́дѣвъ, тре́петомъ взѧ́тсѧ, лꙋчѝ сопрѧ́тавъ скры̀, всѧ́ же тва́рь воспѣ̀ со стра́хомъ твоѐ долготерпѣ́нїе: и҆́бо и҆спо́лнисѧ землѧ̀ твоегѡ̀ хвале́нїѧ.
[Па́схи:] На бж҃е́ственнѣй стра́жи, бг҃оглаго́ливый а҆ввакꙋ́мъ, да ста́нетъ съ на́ми и҆ пока́жетъ свѣтоно́сна а҆́гг҃ла ꙗ҆́снѡ глаго́люща: дне́сь сп҃се́нїе мі́рꙋ, ꙗ҆́кѡ воскр҃се хрⷭ҇то́съ, ꙗ҆́кѡ всеси́ленъ.
[Ѳѡмы̀:] Ве́лїѧ та́йна твоегѡ̀ хрⷭ҇тѐ смотре́нїѧ: сїю́ бо свы́ше прови́дѧ, бг҃озри́тельнѡ а҆ввакꙋ́мъ, и҆зше́лъ є҆сѝ, вопїѧ́ше тебѣ̀, во сп҃се́нїе люде́й твои́хъ, чл҃вѣколю́бче.
[Оу҆спе́нїѧ:] Рѣ̑чи прⷪ҇ро́кѡвъ и҆ гада̑нїѧ, воплоще́нїе проѧви́ша ѿ дв҃ы твоѐ хрⷭ҇тѐ, сїѧ́нїе блиста́нїѧ твоегѡ̀, во свѣ́тъ ꙗ҆зы́кѡвъ и҆зы́детъ, и҆ возгласи́тъ тебѣ̀ бе́здна съ весе́лїемъ: си́лѣ твое́й сла́ва, чл҃вѣколю́бче.
[Ѡ҆смогла́сника:]
Дх҃омъ прови́дѧ прⷪ҇ро́че а҆ввакꙋ́ме, словесѐ воплоще́нїе, проповѣ́далъ є҆сѝ вопїѧ̀: внегда̀ прибли́житисѧ лѣ́тѡмъ, позна́ешисѧ: внегда̀ прїитѝ вре́мени, пока́жешисѧ. сла́ва си́лѣ твое́й, гдⷭ҇и.
Слы́ша дре́вле а҆ввакꙋ́мъ хрⷭ҇тѐ чꙋ́дный тво́й слꙋ́хъ, и҆ стра́хомъ взыва́ше: ѿ ю҆́га бг҃ъ прїи́детъ, и҆ ст҃ы́й ѿ горы̀ прїѡсѣне́нныѧ ча́щи, сп҃стѝ пома̑занныѧ. сла́ва си́лѣ твое́й, гдⷭ҇и.
А҆ввакꙋ́мъ сла́вное твоѐ прише́ствїе а҆́бїе сло́ве прови́дѧ, вопїѧ́ше: ᲂу҆слы́шахъ гдⷭ҇и, ꙗ҆́кѡ ѿ горы̀ ст҃ы́ѧ прїи́деши, во сп҃се́нїе человѣ́кѡвъ и҆ стра́ха и҆спо́лнь бы́въ взыва́етъ: ꙗ҆́кѡ вє́лїѧ дѣла̀ хрⷭ҇тѐ мо́й твоеѧ̀ сла́вы.
Слꙋ́хъ тво́й, гдⷭ҇и, ᲂу҆слы́шахъ, и҆ ᲂу҆боѧ́хсѧ, дѣла̀ твоѧ̑ разꙋмѣ́хъ, и҆ ᲂу҆жасо́хсѧ: ꙗ҆́кѡ бг҃ъ пре́жде вѣ̑къ сы́й ѿ дв҃ы рожде́йсѧ бы́сть чл҃вѣ́къ.
Съ чꙋ́днымъ ста́въ а҆ввакꙋ́момъ, на бж҃е́ственнѣй твое́й стра́жи григо́рїе, и҆ сꙋ́щаго на ра̑мꙋ херꙋві̑мскꙋ позна́вый, всемі́рнагѡ бы́лъ є҆сѝ возвѣсти́тель сп҃се́нїѧ, при́снѡ зовы́й: сла́ва си́лѣ твое́й, гдⷭ҇и.
Взѧ́тсѧ со́лнце, и҆ лꙋна̀ ста̀ въ чи́нѣ свое́мъ: возне́слсѧ є҆сѝ долготерпѣли́ве на дре́во, и҆ водрꙋзи́лъ є҆сѝ на не́мъ цр҃ковь твою̀.
Что̀ вопїе́ши дх҃омъ, рцы̀ прⷪ҇ро́че, прови́дѣвъ ᲂу҆жаснꙋ́лсѧ є҆сѝ; бг҃а разꙋмѣ́въ ѿ дв҃ы, соедине́на мнѣ̀ пло́тїю: тѣ́мже ᲂу҆жаса́юсѧ.
Ꙗ҆́кѡ бг҃ъ воплоща́етсѧ, не пострада́въ преложе́нїѧ, бж҃е́ственный ᲂу҆жасе́сѧ ᲂу҆слы́шавъ а҆ввакꙋ́мъ. и҆ є҆́же въ бг҃овѣ́дѣнїе ѿ і҆дѡлонеи́стовства разꙋмѣ́въ вѣ́рныхъ сп҃се́нїе, взыва́ше: гдⷭ҇и, сла́ва си́лѣ твое́й.
Оу҆слы́шахъ гдⷭ҇и, слꙋ́хъ тво́й и҆ ᲂу҆боѧ́хсѧ, разꙋмѣ́въ дѣла̀ твоѧ̑, прⷪ҇ро́къ глаго́лаше, и҆ просла́вихъ си́лꙋ твою̀.
Возсїѧ̀ бл҃года́ть твоѧ̑ ꙗ҆зы́кѡмъ, и҆ ви́дѣша концы̀ сла́вꙋ твою̀, ꙗ҆́кѡ крⷭ҇то́мъ твои́мъ мі́ръ ве́сь сп҃слъ є҆сѝ.
Разꙋмѣ́хъ всеси́льне, твоѐ смотре́нїе, и҆ со стра́хомъ просла́вихъ тѧ̀, сп҃се.
Оу҆слы́шахъ гдⷭ҇и, слꙋ́хъ тво́й и҆ ᲂу҆боѧ́хсѧ: ꙗ҆́кѡ крⷭ҇то́мъ твои́мъ мі́ръ просвѣти́лъ є҆сѝ, и҆ на́мъ дарова́лъ є҆сѝ твоѐ воскрⷭ҇нїе.
Слꙋ́хъ си́лы твоеѧ̀ прⷪ҇ро́къ а҆ввакꙋ́мъ ᲂу҆слы́шавъ ᲂу҆боѧ́сѧ, дѣла̀ твоѧ̑ бж҃е, разꙋмѣ́въ ᲂу҆жасе́сѧ, и҆ вопїѧ́ше: сла́ва си́лѣ, твое́й гдⷭ҇и.
Пѣ́снь є҃.
Просвѣти́вый сїѧ́нїемъ прише́ствїѧ твоегѡ̀ хрⷭ҇тѐ, и҆ ѡ҆свѧти́вый крⷭ҇то́мъ твои́мъ мі́ра концы̀, сердца̀ просвѣтѝ свѣ́томъ твоегѡ̀ бг҃оразꙋ́мїѧ, правосла́внѡ пою́щихъ тѧ̀.
Ѽ всеви́дче, царе́й сла́во, кто̀ твоемꙋ̀ чл҃вѣколю́бїю земноро́дныхъ не ᲂу҆диви́тсѧ; на земли́ бо ꙗ҆ви́лсѧ є҆сѝ не ѡ҆ста́вль ѻ҆ч҃ескихъ, дне́сь всю̀ ѡ҆бновлѧ́ѧй тва́рь и҆ ми́ръ ꙗ҆́кѡ є҆ди́нъ миронача́льникъ подаѧ́й.
[Въ ржⷭ҇тво̀ хрⷭ҇то́во:] Бг҃ъ сы́й ми́ра, ѻ҆ц҃ъ щедрѡ́тъ, вели́кагѡ совѣ́та твоегѡ̀ а҆́гг҃ла, ми́ръ подава́юща посла́лъ є҆сѝ на́мъ: тѣ́мъ бг҃оразꙋ́мїѧ къ свѣ́тꙋ наста́вльшесѧ, ѿ но́щи ᲂу҆́тренююще, славосло́вимъ тѧ̀, чл҃вѣколю́бче.
И҆з̾ но́щи дѣ́лъ ѡ҆мраче́нныѧ пре́лести, ѡ҆чище́нїе на́мъ хрⷭ҇тѐ бо́дреннѡ, ны́нѣ соверша́ющымъ пѣ́снь ꙗ҆́кѡ бл҃годѣ́телю, прїидѝ, подава́ѧй ᲂу҆до́бнꙋ стезю̀, по не́йже востека́юще ѡ҆брѧ́щемъ сла́вꙋ.
[Чⷭ҇тна́гѡ крⷭ҇та̀:] Оу҆́тренююще тѧ̀ воспѣва́емъ сп҃се ще́дре, ми́ръ ѡ҆брѣ́тше крⷭ҇то́мъ твои́мъ, и҆́мже ѡ҆бнови́лъ є҆сѝ ро́дъ человѣ́ческїй, къ свѣ́тꙋ невече́рнемꙋ вводѧ̀ на́съ.
[Па́схи:] Оу҆́тренюемъ ᲂу҆́треннюю глꙋбокꙋ̀, и҆ вмѣ́стѡ мѵ́ра пѣ́снь принесе́мъ влⷣцѣ, и҆ хрⷭ҇та̀ ᲂу҆́зримъ пра́вды сл҃нце, всѣ̑мъ жи́знь возсїѧ́юща.
[ᲂу҆спе́нїѧ бцⷣы:] Бж҃їю и҆ неизрече́ннꙋю добро́тꙋ добродѣ́телей твои́хъ хрⷭ҇тѐ и҆сповѣ́мъ: ѿ присносꙋ́щныѧ бо сла́вы, соприсносꙋ́щное и҆ ѵ҆поста́сное возсїѧ́вый сїѧ́нїе, и҆з̾ дв҃ственныѧ ᲂу҆тро́бы, сꙋ́щымъ во тьмѣ̀ и҆ сѣ́ни вопло́щьсѧ, возсїѧ́лъ є҆сѝ сл҃нце.
[Ѻ҆смогла́сника:] Тво́й ми́ръ да́ждь на́мъ, сн҃е бж҃їй, и҆но́гѡ бо ра́звѣ тебѐ бг҃а не зна́емъ: и҆́мѧ твоѐ и҆менꙋ́емъ, ꙗ҆́кѡ бг҃ъ живы́хъ и҆ ме́ртвыхъ є҆сѝ.
Ѿ но́щи ᲂу҆́тренююще, пое́мъ тѧ̀ хрⷭ҇тѐ, ѻ҆ц҃ꙋ̀ собезнача́льна, и҆ сп҃са дꙋ́шъ на́шихъ: ми́ръ мі́рови пода́ждь, чл҃вѣколю́бче.
Оу҆́гль горѧ́щїй, и҆́же до и҆са́їиныхъ ᲂу҆сте́нъ серафі́мъ приложѝ нѣ́когда, клеща́ми взе́мъ, и҆ приложе́нъ: ѻ҆́нъ же ѡ҆чище́нъ бы́въ, пра́вдѣ наꙋчи́тесѧ, всѣ̑мъ проповѣ́даше.
Свѣ́тъ тво́й гдⷭ҇и, и҆ и҆́стинꙋ твою̀ низпослѝ, є҆́же наста́вити на́съ на повелѣ̑нїѧ твоѧ̑, и҆ да́рꙋй на́мъ ми́ръ тво́й чл҃вѣколю́бче.
Свѣ́тлый на́мъ возсїѧ́й свѣ́тъ присносꙋ́щный ᲂу҆́тренюющымъ ѡ҆ сꙋдьба́хъ за́повѣдей твои́хъ, влⷣко чл҃вѣколю́бче, хрⷭ҇тѐ бж҃е на́шъ.
Ѿ но́щи ᲂу҆́тренююще, тебѣ̀ сла́вꙋ возсыла́емъ гдⷭ҇и бж҃е на́шъ, тво́й ми́ръ да́ждь на́мъ, ꙗ҆́кѡ ра́звѣ тебѐ бг҃а и҆но́гѡ не вѣ́мы.
Ѡ҆зарѝ на́шъ ᲂу҆́мъ бж҃е, свѣ́томъ за́повѣдей твои́хъ, и҆ свѣ́тлостїю бл҃года́ти твоеѧ̀, да́рꙋѧ на́мъ бл҃же твоѧ̑ млⷭ҇ти: занѐ свѣ́тъ и҆ ми́ръ повелѣ̑нїѧ твоѧ̑.
Ѿ но́щи ᲂу҆́тренююще, воспѣва́емъ тѧ̀ хрⷭ҇тѐ бж҃е, ѡ҆бнища́вшаго на́съ ра́ди, и҆ крⷭ҇тъ и҆ сме́рть, пло́тїю претерпѣ́вшаго.
Свѣ́тъ тво́й незаходи́мый возсїѧ́й хрⷭ҇тѐ, въ сердца̀ вѣ́рнѡ пою́щихъ тѧ̀, ми́ръ подава́ѧй на́мъ, па́че ᲂу҆ма̀: тѣ́мъ ѿ но́щи невѣ́дѣнїѧ, ко дню̀ свѣ́томъ твои́мъ текꙋ́ще, славосло́вимъ тѧ̀, чл҃вѣколю́бче.
Ѿ но́щи невѣ́дѣнїѧ просвѣще́й концы̀, просвѣти́ мѧ ᲂу҆́тромъ чл҃вѣколю́бїѧ твоегѡ̀ гдⷭ҇и.
Ꙗ҆́кѡ просвѣще́нїе на́ше сы́й хрⷭ҇тѐ, просвѣтѝ на́съ защи́тителю жи́зни на́шеѧ, сохрани́ ны надѣ́ющыѧсѧ на тѧ̀.
Пѣ́снь ѕ҃.
Ѡ҆бы́де на́съ послѣ́днѧѧ бе́здна, нѣ́сть и҆збавлѧ́ѧй, вмѣни́хомсѧ ꙗ҆́кѡ ѻ҆́вцы заколе́нїѧ. сп҃сѝ лю́ди твоѧ̑ бж҃е на́шъ, ты́ бо крѣ́пость немощствꙋ́ющихъ и҆ и҆справле́нїе.
Во глꙋбинꙋ̀ поги́бели, ѻ҆каѧ́нное є҆стество̀ хрⷭ҇тѐ мо́й сп҃се дости́гшее дре́вле лежа́ше, ᲂу҆вы̀ мнѣ̀ въ те́мныхъ глꙋбо́кихъ: поне́же твое́ю бж҃е́ственною си́лою, къ нб҃сѝ взы́де, краснѣ́йшымъ добро́тамъ, пожрꙋ̀ тебѣ̀ сп҃се вопїе́тъ, же́ртвꙋ хвале́нїѧ.
[Въ ржⷭ҇тво̀ хрⷭ҇то́во:] И҆з̾ ᲂу҆тро́бы і҆ѡ́нꙋ младе́нца и҆зблева̀ морскі́й ѕвѣ́рь, ꙗ҆кова̀ прїѧ́тъ: въ дв҃ꙋ же все́льшеесѧ сло́во, и҆ пло́ть прїе́мшее про́йде сохра́ньшее нетлѣ́ннꙋ: є҆гѡ́же бо не пострада̀ и҆стлѣ́нїѧ, ро́ждшꙋю сохранѝ неврежде́ннꙋ.
Ѡ҆бита́ѧ і҆ѡ́на въ преиспо́днихъ морски́хъ, прїитѝ молѧ́шесѧ, и҆ бꙋ́рю ᲂу҆толи́ти: ᲂу҆нзе́нъ же а҆́зъ мꙋча́щагѡ стрѣло́ю, хрⷭ҇тꙋ̀ воспѣва́ю, ѕѡ́лъ гꙋби́телю, ско́рѡ прїитѝ тебѣ̀ къ мое́й лѣ́ности.
[Крⷭ҇та̀:] Ѡ҆́бразъ бж҃е́ственнагѡ крⷭ҇та̀, і҆ѡ́на во чре́вѣ ки́товѣ, просте́ртыма дла́ньма проначерта̀, и҆ взира́ше сп҃се́нъ ѿ ѕвѣ́рѧ, си́лою твое́ю, сло́ве.
[Па́схи:] Снизше́лъ є҆сѝ въ преиспѡ́днѧѧ землѝ, и҆ сокрꙋши́лъ є҆сѝ верєѝ вѣ̑чныѧ, содержа́щыѧ свѧ̑занныѧ хрⷭ҇тѐ, и҆ тридне́венъ ꙗ҆́кѡ ѿ ки́та і҆ѡ́на, воскре́слъ є҆сѝ ѿ гро́ба.
[Ѳѡмы̀:] Прⷪ҇ро́ка сп҃слъ є҆сѝ ѿ ки́та чл҃вѣколю́бче, и҆ менѐ и҆з̾ глꙋбины̀ прегрѣше́нїй возведѝ, молю́сѧ.
[Оу҆спе́нїѧ бцⷣы:] Морскі́й пꙋчиноро́дный ки́товъ внꙋ́треннїй ѻ҆́гнь, тридне́внагѡ твоегѡ̀ погребе́нїѧ проѡбраже́нїе, є҆гѡ́же і҆ѡ́на прⷪ҇ро́къ показа́сѧ: сп҃се́нъ бо ꙗ҆́кѡ и҆ предпосла́сѧ, неврежде́нъ вопїѧ́ше: пожрꙋ́ ти со гла́сомъ хвале́нїѧ гдⷭ҇и.
[Ѻ҆смогла́сника:]
Прⷪ҇ро́ка і҆ѡ́нꙋ подража́ѧ вопїю̀: живо́тъ мо́й бл҃же, свободѝ и҆з̾ тлѝ, и҆ сп҃си́ мѧ сп҃се мі́ра, зовꙋ́ща: сла́ва тебѣ̀.
И҆з̾ глꙋбины̀ въ ско́рби вопїѧ́ше: возведѝ ѿ тлѝ живо́тъ мо́й, прⷪ҇ро́къ і҆ѡ́на къ тебѣ̀ чл҃вѣколю́бцꙋ.
И҆́же въ по́нтѣ под̾е́мый ѕлоключе́нїе, ᲂу҆бѣже́нїемъ бꙋ́ри и҆ метне́нїемъ жре́бїѧ, и҆ ᲂу҆сты̀ ꙗ҆́тъ бы́въ морска́гѡ ѕвѣ́рѧ, невреди́мь пребы́въ, но вопїѧ́ше і҆ѡ́на къ тебѣ̀: живо́тъ мо́й да взы́детъ хрⷭ҇тѐ.
Ѿве́рглъ мѧ̀ є҆сѝ во глꙋбины̀ се́рдца морска́гѡ, и҆ сп҃слъ є҆сѝ мѧ̀ сп҃се, ѿ рабо́ты сме́ртныѧ, и҆ разрѣши́лъ є҆сѝ ᲂу҆́зы беззако́нїй мои́хъ.
Ꙗ҆́кѡ і҆ѡ́нꙋ прⷪ҇ро́ка, возведѝ хрⷭ҇тѐ бж҃е живо́тъ мо́й ѿ тлѝ, вопїю́ ти чл҃вѣколю́бче, ꙗ҆́кѡ жи́знь ᲂу҆ тебѐ є҆́сть, и҆ нетлѣ́нїе и҆ си́ла.
Со і҆ѡ́ною вопїе́мъ тѝ гдⷭ҇и, со гла́сомъ хвале́нїѧ молѧ́щесѧ: возведѝ ѿ тлѝ живо́тъ на́шъ.
Ве́сь ѿ страсте́й безмѣ́рныхъ содержꙋ́сѧ, и҆ ки́томъ ѕѡ́лъ снизпадо́хъ: но возведѝ и҆з̾ и҆стлѣ́нїѧ мѧ̀ бж҃е, ꙗ҆́коже пре́жде і҆ѡ́нꙋ, и҆ вѣ́рою безстра́стїе мѝ да́рꙋй, ꙗ҆́кѡ да во гла́сѣ хвале́нїѧ и҆ сп҃се́нїѧ дꙋ́хомъ пожрꙋ́ ти.
Ꙗ҆́кѡ во глꙋбины̑ мѡрскі́ѧ ѿве́ргсѧ, и҆ ᲂу҆глѣбо́хъ въ тимѣ́нїи глꙋбины̀, ѿ ѿча́ѧнїѧ ᲂу҆́мныѧ зимы̀, лѣ́ности моеѧ̀, хрⷭ҇тѐ, и҆зми́ мѧ, ꙗ҆́кѡ і҆ѡ́нꙋ ѿ ѕвѣ́рѧ.
Пѣ́снь з҃.
Тебѐ ᲂу҆́мнꙋю бцⷣе пе́щь, разсмотрѧ́емъ вѣ́рнїи: ꙗ҆́коже бо ѻ҆́троки сп҃сѐ трѝ превозноси́мый, мі́ръ ѡ҆бновѝ, во чре́вѣ твое́мъ всецѣ́лъ, хва́льный ѻ҆тцє́въ бг҃ъ, и҆ препросла́вленъ.
Ꙗ҆́кѡ ѻ҆́троцы дре́вле, зове́мъ тебѣ̀ сло́ве: бꙋ́ди твои́хъ рабѡ́въ сп҃се, храни́тель и҆ покро́въ, и҆ сп҃сѝ всѧ̑ ѿ прило́га сопроти́внагѡ, ꙗ҆́кѡ да пою́ще твоѐ ржⷭ҇тво̀, во вѣ́ки глаго́лемъ: бл҃гослове́нъ є҆сѝ.
[Въ ржⷭ҇тво̀ хрⷭ҇то́во:] Ѻ҆́троцы бл҃гоче́стїю совоспита́ни, ѕлочести́вагѡ велѣ́нїѧ небре́гше, ѻ҆́гненнагѡ преще́нїѧ не ᲂу҆боѧ́шасѧ, но посредѝ пла́мене стоѧ́ще поѧ́хꙋ: ѻ҆тцє́въ бж҃е бл҃гослове́нъ є҆сѝ.
Всецр҃ѧ̀ любо́вїю ᲂу҆ловле́ннїи ѻ҆́троцы, ᲂу҆кори́ша безчи́сленнѡ ꙗ҆рѧ́щасѧ мꙋчи́телѧ ѕлобо́жное ѧ҆зыковре́дїе, и҆̀мже повинꙋ́сѧ ѻ҆́гнь мно́гїй, влⷣцѣ глаго́лющымъ: во вѣ́ки бл҃гослове́нъ є҆сѝ.
[Крⷭ҇та̀:] И҆з̾ пла́мене ѻ҆́троки и҆збавле́й, пло́ть прїи́мъ прише́лъ є҆сѝ на зе́млю, и҆ на крⷭ҇тѣ̀ пригвожде́нъ, сп҃се́нїе на́мъ дарова́лъ є҆сѝ хрⷭ҇тѐ, є҆ди́нъ бл҃гослове́нъ ѻ҆тцє́въ бж҃е, и҆ препросла́вленъ.
[Па́схи:] Ѻ҆́троки ѿ пе́щи и҆зба́вивый, бы́въ человѣ́къ, стра́ждетъ ꙗ҆́кѡ сме́ртенъ, и҆ стра́стїю сме́ртное, въ нетлѣ́нїѧ ѡ҆блачи́тъ бл҃голѣ́пїе, є҆ди́нъ бл҃гослове́нъ ѻ҆тцє́въ бг҃ъ и҆ препросла́вленъ.
[Ѳѡмы̀:] Ѡ҆́бразꙋ слꙋжи́ти мꙋсїкі́йскомꙋ согла́сїю созыва́ющꙋ лю́ди, ѿ пѣ́сней сїѡ́нскихъ пою́ще ѻ҆те́чески ѻ҆́троцы дв҃дѡвы, мꙋчи́телево разори́ша ѕлочести́вое велѣ́нїе, и҆ пла́мень въ ро́сꙋ преложи́ша, пѣ́снь воспѣва́юще: превозноси́мый ѻ҆тцє́въ и҆ на́шъ бж҃е бл҃гослове́нъ є҆сѝ.
[Оу҆спе́нїѧ бцⷣы:] Безстꙋ́днѣй ꙗ҆́рости же и҆ ѻ҆гню̀, бж҃е́ственное жела́нїе сопротивлѧ́ѧсѧ, ѻ҆́гнь ᲂу҆́бѡ ѡ҆роша́ше, ꙗ҆́рости же смѣѧ́шесѧ, бг҃одохнове́нною слове́сною прпⷣбныхъ тривѣща́нною цѣвни́цею, противовѣща́ѧ мꙋсїкі́йскимъ ѻ҆рга́нѡмъ посредѝ пла́мене: препросла́вленный ѻ҆тцє́въ и҆ на́шъ бж҃е бл҃гослове́нъ є҆сѝ.
[Ѻ҆смогла́сника:]
Сꙋ́щымъ въ пещѝ ѻ҆трокѡ́мъ твои̑мъ сп҃се, не прикоснꙋ́сѧ нижѐ стꙋжѝ ѻ҆́гнь. тогда̀ трїѐ, ꙗ҆́кѡ є҆ди́нѣми ᲂу҆сты̀ поѧ́хꙋ, и҆ бл҃гословлѧ́хꙋ глаго́люще: бл҃гослове́нъ бг҃ъ ѻ҆тє́цъ на́шихъ.
Проидо́ша ꙗ҆́кѡ черто́гъ, пе́щный пла́мень нестерпи́мый, и҆̀же за бл҃гоче́стїе и҆ногда̀, ѻ҆́троцы ст҃і́и показа́вшесѧ ꙗ҆́вѣ, и҆ согла́снѡ воспѣва́юще, пѣ́снь поѧ́хꙋ: ѻ҆тцє́въ бж҃е бл҃гослове́нъ є҆сѝ.
А҆враа́мстїи ѻ҆́троцы въ пещѝ трⷪ҇цꙋ проѡбрази́вше, ѻ҆́гненный пла́мень на ро́сꙋ преложи́ша, и҆ пою́ще вопїѧ́хꙋ: бл҃гослове́нъ є҆сѝ бж҃е ѻ҆тє́цъ на́шихъ.
Пе́щь сп҃се ѡ҆роша́шесѧ, ѻ҆́троцы же ликꙋ́юще поѧ́хꙋ: ѻ҆тцє́въ бж҃е бл҃гослове́нъ є҆сѝ.
Въ гремѧ́щꙋю пе́щь сни́де а҆́гг҃лъ гдⷭ҇нь къ сꙋ́щымъ ѡ҆ а҆за́рїи ѻ҆трокѡ́мъ, и҆ не прикоснꙋ́сѧ и҆́хъ ѿню́дъ ѻ҆́гнь. тогда̀ трїѐ воспѣва́юще глаго́лахꙋ: бл҃гослове́нъ є҆сѝ бж҃е ѻ҆тє́цъ на́шихъ.
Ꙗ҆вле́йсѧ въ кꙋпинѣ̀ законополо́жникꙋ ѻ҆гне́мъ, и҆ ржⷭ҇тво̀ дв҃ы проѡбраже́й въ не́й, бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ.
Всѧ̑ дѣла̀ твоѧ̑ и҆́стинна, и҆ пра́ви пꙋтїѐ твоѝ, бж҃е ѻ҆тє́цъ на́шихъ.
По мно́жествꙋ млⷭ҇ти твоеѧ̀ чл҃вѣколю́бче, сотворѝ съ на́ми, да тебѣ̀ вѣ́рнѡ всѝ воспѣва́юще пои́мъ, ꙗ҆́коже ѻ҆́троцы: бл҃гослове́нъ є҆сѝ бж҃е ѻ҆тє́цъ на́шихъ.
Пѣ́снь и҃.
Въ пещѝ ѻ҆́троцы і҆и҃лєвы, ꙗ҆́коже въ горни́лѣ добро́тою бл҃гоче́стїѧ, чистѣ́е зла́та блеща́хꙋсѧ глаго́люще: бл҃гослови́те всѧ̑ дѣла̀ гдⷭ҇нѧ, гдⷭ҇а по́йте, и҆ превозноси́те во всѧ̑ вѣ́ки.
Новодѣ́телю всегѡ̀ мі́ра и҆ сп҃си́телю, пое́тъ тѧ̀ всѧ̀ со а҆́гг҃лы тва́рь, и҆гра́етъ, ликꙋ́етъ и҆ ра́дꙋетсѧ тре́петомъ, бл҃гослови́те глаго́лющи, всѧ̑ дѣла̀, чⷭ҇тно́е ржⷭ҇тво̀ и҆зба́вителѧ моегѡ̀, со мно́ю во вѣ́ки, любо́вїю превозносѧ́щаѧ.
[Въ ржⷭ҇тво̀ хрⷭ҇то́во:] Чꙋ́да преесте́ственнагѡ, росода́тельнаѧ и҆з̾ѡбразѝ пе́щь ѡ҆́бразъ: не бо̀ ꙗ҆́же прїѧ́тъ пали́тъ ю҆́ныѧ, ꙗ҆́кѡ нижѐ ѻ҆́гнь бж҃ества̀ дв҃ы, въ ню́же вни́де ᲂу҆тро́бꙋ. тѣ́мъ воспѣва́юще воспое́мъ: да бл҃гослови́тъ тва́рь всѧ̀ гдⷭ҇а, и҆ превозно́ситъ во всѧ̑ вѣ́ки.
Оу҆тро́бꙋ неѡпа́льнѡ ѡ҆бразꙋ́ютъ ѻ҆трокови̑цы, и҆̀же въ ве́тсѣмъ ѡ҆палѧ́емїи ю҆́нѡши, преесте́ственнѡ ражда́ющꙋю, запечатлѣ́ннꙋ: ѻ҆боѧ́ же содѣва́ющи чꙋдодѣ́йство є҆ди́но, лю́ди къ пѣ́нїю возставлѧ́етъ бл҃года́ть.
[Крⷭ҇та̀:] Рꙋ́цѣ въ ро́въ ве́рженный львѡ́въ, и҆ногда̀ вели́кїй во прⷪ҇ро́цѣхъ, крⷭ҇тоѡбра́знѡ просте́ръ данїи́лъ, неврежде́нъ ѿ си́хъ снѣ́ди сп҃се́сѧ, бл҃гословѧ̀ хрⷭ҇та̀ бг҃а во вѣ́ки.
[Па́схи:] Се́й нарече́нный и҆ ст҃ы́й де́нь, є҆ди́нъ сꙋббѡ́тъ цр҃ь и҆ гдⷭ҇ь, пра́здникѡвъ пра́здникъ, и҆ торжество̀ є҆́сть торже́ствъ: во́ньже бл҃гослови́мъ хрⷭ҇та̀ во вѣ́ки.
[Ѳѡмы̀:] Въ пла́мени ѻ҆́гненнѣ горѧ́щїѧ пе́щи, сохра́ньшаго дѣ́ти, и҆ во зра́цѣ а҆́гг҃ла снизше́дшаго къ ни̑мъ, по́йте гдⷭ҇а, и҆ превозноси́те є҆го̀ во вѣ́ки.
[Оу҆спе́нїѧ бцⷣы:] Пла́мень ѡ҆роша́ющь преподѡ́бныѧ, ѕлочести̑выѧ же попалѧ́ющъ, а҆́гг҃лъ бж҃їй всемо́щный показа̀ ѻ҆трокѡ́мъ, живонача́льный же и҆сто́чникъ содѣ́ла бцⷣꙋ, тлю̀ сме́рти, и҆ живо́тъ точа́щꙋ пою́щымъ: содѣ́телѧ є҆ди́наго пои́мъ и҆зба́вленнїи, и҆ превозно́симъ во всѧ̑ вѣ́ки.
[Ѻ҆смогла́сника:]
Пѣсносло́вцы въ пещѝ сп҃сшагѡ дѣ́ти, и҆ громопла́меннꙋю прело́жшаго на ро́сꙋ, хрⷭ҇та̀ бг҃а по́йте, и҆ превозноси́те во всѧ̑ вѣ́ки.
Пѣ́снь тебѣ̀ прино́симъ безпло́тныхъ, ꙗ҆́коже ѻ҆́троцы въ пещѝ, и҆ пою́ще глаго́лемъ: бл҃гослови́те всѧ̑ дѣла̀ гдⷭ҇нѧ гдⷭ҇а.
Пѣснопѣ́вцы пе́щь дре́вле ѻ҆́троки прїе́мши неѡпа́льны сохранѝ, посредѣ́ же пла́мене стоѧ́щыѧ согла́снѡ пѣ́ти наꙋчѝ: бл҃гослови́те всѧ̑ дѣла̀ гдⷭ҇нѧ гдⷭ҇а.
И҆̀же пи́щею не ѡ҆скве́рншїисѧ ѻ҆́троцы ѿ ца́рскїѧ трапе́зы, во ѻ҆́гнь ра́дꙋющесѧ внидо́ша нѣ́когда: и҆ въ пла́мени прохлажда́еми, ᲂу҆се́рднѡ поѧ́хꙋ: бл҃гослови́те дѣла̀ гдⷭ҇нѧ гдⷭ҇а.
Нб҃са̀ нб҃съ, и҆ вода̀ ꙗ҆́же превы́ше нб҃съ, бл҃гослови́те, по́йте гдⷭ҇а, и҆ превозноси́те є҆го̀ во вѣ́ки.
Є҆гѡ́же ᲂу҆жаса́ютсѧ а҆́гг҃ли, и҆ всѧ̑ вѡ́инства, ꙗ҆́кѡ творца̀ и҆ гдⷭ҇а, по́йте сщ҃е́нницы, просла́вите ѻ҆́троцы, бл҃гослови́те лю́дїе и҆ превозноси́те во всѧ̑ вѣ́ки.
Пою́тъ тѧ̀ вѡ́и а҆́гг҃льстїи, сла́витъ тѧ̀ ро́дъ человѣ́ческїй, сщ҃е́нницы и҆ рабѝ и҆ дꙋ́шы пра́ведныхъ, ꙗ҆́кѡ творца̀ и҆ гдⷭ҇а всѣ́хъ во вѣ́ки.
Трисвѣ́тлое сꙋщество̀, и҆ трисл҃нчнаѧ сла́ва сни́де ѻ҆трокѡ́мъ посредѣ̀ ѻ҆гнѧ̀, сїѧ̑ невреди̑мы соблюда́ющи, и҆ воскрⷭ҇нїе на́мъ предвозвѣща́ющи хрⷭ҇та̀ бг҃а на́шегѡ, є҆го́же пою́тъ а҆́гг҃ли и҆ мно́жєства, ꙗ҆́кѡ побѣди́телѧ сме́рти во вѣ́ки.
Премꙋ́дростїю и҆ сло́вомъ всѧ̑ соста́вльшаго бг҃а, ѿ ꙗ҆зы́кѡвъ и҆ ва́рварѡвъ и҆зба́вльшаго на́съ, ѻ҆́троцы по́йте, сщ҃е́нницы просла́вите, лю́дїе превозноси́те во всѧ̑ вѣ́ки.
На сїна́и кꙋпинꙋ̀ горѧ́щꙋ, неѡпа́льнꙋ сохра́ньшаго и҆ ѻ҆́троки посредѣ̀ горѧ́щагѡ пла́мене и҆зба́вльшаго, бг҃а по́йте, бл҃гослови́те, и҆ превозноси́те є҆го̀ во вѣ́ки.
Премꙋ́дростїю нб҃са̀ ᲂу҆тверди́вшаго, и҆ на вода́хъ зе́млю ѡ҆снова́вшаго, и҆ тва́рь всю̀ созда́вшаго, бл҃гослови́те, по́йте сщ҃е́нницы гдⷭ҇а, лю́дїе превозноси́те є҆го̀ во всѧ̑ вѣ́ки.
Цр҃ѧ̀ сла́вы, и҆ побѣди́телѧ сме́рти, і҆и҃са назѡре́а, того̀ превозноси́те во всѧ̑ вѣ́ки.
Пѣ́снь а҆на́нїевꙋ, безнача́льномꙋ всѝ, ѻ҆ц҃ꙋ̀ и҆ бг҃ꙋ: мл҃твꙋ а҆за́рїевꙋ, собезнача́льномꙋ сло́вꙋ сн҃ꙋ ѻ҆́ч҃ꙋ: и҆ мїсаи́ловꙋ пѣ́снь, бж҃е́ственномꙋ дх҃ꙋ, и҆ соприсносꙋ́щномꙋ, правосла́вною вѣ́рою принесе́мъ лю́дїе, во сп҃се́нїе на́ше.
Чꙋ́да преесте́ственнагѡ показа̀ ѡ҆́бразъ ѻ҆гнеро́снаѧ пе́щь дре́вле. ѻ҆́гнь бо не ѡ҆палѝ ю҆́ныѧ дѣ́ти, хрⷭ҇то́во ꙗ҆влѧ́ѧ безсѣ́менное ѿ дв҃ы бж҃е́ственное ржⷭ҇тво̀. тѣ́мъ воспѣва́юще воспои́мъ. да бл҃гослови́тъ тва́рь всѧ̀ гдⷭ҇а, и҆ превозно́ситъ во всѧ̑ вѣ́ки.
Пѣ́снь ѳ҃.
Ѡ҆́бразъ чⷭ҇тагѡ ржⷭ҇тва̀ твоегѡ̀, ѻ҆гнепали́маѧ кꙋпина̀ показа̀ неѡпа́льнаѧ, и҆ ны́нѣ на на́съ напа́стей свирѣ́пѣющꙋю ᲂу҆гаси́ти мо́лимсѧ пе́щь, да тѧ̀ бцⷣе непреста́ннѡ велича́емъ.
Ра́дꙋйсѧ прест҃а́ѧ бг҃опрїе́мнаѧ мр҃і́е, ра́дꙋйсѧ пречⷭ҇таѧ, па́дшихъ ѡ҆снова́нїе: въ тебѣ́ бо ꙗ҆ви́сѧ дне́сь влⷣка, ѽ чꙋдесѐ! ѡ҆бновлѧ́ѧй и҆стлѣ́вшыѧ, и҆ къ свѣ́тꙋ возводѧ̀ невече́рнемꙋ ѻ҆трокови́це.
[Въ ржⷭ҇тво̀ хрⷭ҇то́во:] Та́инство стра́нное ви́жꙋ и҆ пресла́вное: нб҃о, верте́пъ: прⷭ҇то́лъ херꙋві́мскїй, дв҃ꙋ: ꙗ҆́сли, вмѣсти́лище, въ ни́хже возлежѐ невмѣсти́мый хрⷭ҇то́съ бг҃ъ: є҆го́же воспѣва́юще велича́емъ.
Люби́ти ᲂу҆́бѡ на́мъ, ꙗ҆́кѡ безбѣ́дное стра́хомъ, ᲂу҆до́бѣе молча́нїе, любо́вїю же дв҃о пѣ̑сни тка́ти спротѧже́ннѡ сложє́нныѧ, неꙋдо́бно є҆́сть: но и҆ мт҃и си́лꙋ, є҆ли́кѡ є҆́сть произволе́нїе, да́ждь.
[Крⷭ҇та̀:] Ѽ мт҃и дв҃о, и҆ бцⷣе нело́жнаѧ, ро́ждшаѧ безсѣ́меннѡ хрⷭ҇та̀ на́шего, на крⷭ҇тъ возне́сшагосѧ пло́тїю, тѧ̀ вѣ́рнїи всѝ, досто́йнѡ съ ни́мъ ны́нѣ велича́емъ.
[Па́схи:] Свѣти́сѧ свѣти́сѧ но́вый і҆ерⷭ҇ли́ме: сла́ва бо гдⷭ҇нѧ на тебѣ̀ возсїѧ̀. ликꙋ́й ны́нѣ и҆ весели́сѧ сїѡ́не, ты́ же чⷭ҇таѧ красꙋ́йсѧ бцⷣе, ѡ҆ воста́нїи ржⷭ҇тва̀ твоегѡ̀.
[Ѳѡмы̀:] Тебѐ свѣ́тлꙋю свѣщꙋ̀, и҆ мт҃рь бж҃їю, пречꙋ́днꙋю сла́вꙋ, и҆ вы́шшꙋю всѣ́хъ тва́рей, пѣ́сньми велича́емъ.
[Оу҆спе́нїѧ бцⷣы:] Побѣжда́ютсѧ є҆стества̀ ᲂу҆ста́вы, въ тебѣ̀ дв҃о чⷭ҇таѧ: дв҃ствꙋетъ бо ржⷭ҇тво̀, и҆ живо́тъ пред̾ѡбрꙋча́етъ сме́рть: по ржⷭ҇твѣ̀ дв҃а, и҆ по сме́рти жива̀, сп҃са́еши при́снѡ бцⷣе, наслѣ́дїе твоѐ.
[Ѻ҆смогла́сника:]
Свѣтоно́сный ѻ҆́блакъ, во́ньже всѣ́хъ влⷣка, ꙗ҆́кѡ до́ждь съ нб҃сѐ на рꙋно̀ сни́де, и҆ воплоти́сѧ на́съ ра́ди, бы́въ чл҃вѣ́къ, безнача́льный, велича́емъ всѝ ꙗ҆́кѡ мт҃рь бг҃а на́шегѡ чⷭ҇тꙋю.
Неизглаго́ланное дв҃ы та́инство: нб҃о бо сїѧ̀, и҆ прⷭ҇то́лъ херꙋві́мскїй, и҆ свѣтоно́сный черто́гъ показа́сѧ хрⷭ҇та̀ бг҃а вседержи́телѧ. сїю̀ бл҃гоче́стнѡ ꙗ҆́кѡ бцⷣꙋ велича́емъ.
Тѧ̀, ю҆́же ви́дѣ мѡѷсе́й неѡпали́мꙋю кꙋпинꙋ̀, и҆ лѣ́ствицꙋ ѡ҆дꙋшевле́ннꙋю, ю҆́же і҆а́кѡвъ ви́дѣ, и҆ две́рь нбⷭ҇нꙋю, є҆́юже про́йде хрⷭ҇то́съ бг҃ъ на́шъ, пѣ́сньми мт҃и чⷭ҇таѧ велича́емъ.
И҆́же вы́шнюю глꙋбинꙋ̀ бж҃е́ственнагѡ непостиже́нїѧ бл҃гоче́стнѡ ѿве́рзъ, ᲂу҆́мъ ꙗ҆́кѡ и҆з̾ ка́мене неѡб̾е́млемыѧ, бг҃онача́льныѧ возвы́силъ є҆сѝ трⷪ҇цы всебл҃же́нне ѻ҆́тче, тѧ̀ велича́емъ.
Ра́дꙋйсѧ бцⷣе дв҃о, мт҃и бл҃гослове́ннаѧ, и҆з̾ тебе́ бо про́йде бг҃ъ воплоще́нный: сего̀ сла́вѧще и҆ воспѣва́юще велича́емъ.
Ты̀ вмѣсти́лище чⷭ҇таѧ, бж҃е́ственнагѡ непостиже́нїѧ, па́че є҆стества̀ была̀ є҆сѝ, ꙗ҆́кѡ бг҃ꙋ пло́ть взаимода́вшаѧ, и҆ твою̀ дв҃ственнꙋю не растерза́вшаѧ ᲂу҆тро́бꙋ, внегда̀ роди́ти безсѣ́меннѡ: тѧ̀ велича́емъ.
Сотворѝ держа́вꙋ мы́шцею свое́ю, низложи́ бо си̑льныѧ со престѡ́лъ, и҆ вознесѐ смирє́нныѧ бг҃ъ і҆и҃левъ. въ ни́хже посѣтѝ на́съ восто́къ съ высоты̀, и҆ напра́вилъ ны̀ є҆́сть на пꙋ́ть ми́ра.
Тѧ̀ без̾ мт҃ре пе́рвѣе, и҆ без̾ ѻ҆ц҃а̀ второ́е, ꙗ҆́кѡ бг҃а и҆ чл҃вѣ́ка пѣ́сньми велича́емъ.
Живопрїе́мный и҆сто́чникъ приснотекꙋ́щїй, свѣтоно́сный свѣти́льникъ бл҃года́ти, хра́мъ ѡ҆дꙋшевле́нный, сѣ́нь пречⷭ҇тꙋю, нб҃сѐ и҆ землѝ простра́ннѣйшꙋю, бцⷣꙋ вѣ́рнїи велича́емъ.
Тебѐ ви́дѣннꙋю две́рь і҆езекі́илемъ проро́комъ, є҆́юже никто́же про́йде, то́кмѡ бг҃ъ є҆ди́нъ, бцⷣе дв҃о, пѣ́сньми почита́емъ.
Ра́дꙋйсѧ дв҃ственнаѧ похвало̀, ра́дꙋйсѧ мт҃и пречⷭ҇таѧ, ю҆́же всѧ̀ тва́рь бж҃е́ственными пѣ́сньми велича́емъ.
Слꙋжи́тель безпло́тный предста̀ глаго́лѧ бл҃года́тнѣй: гдⷭ҇ь съ тобо́ю, ю҆́же велича́емъ.
Тѧ̀ въ рѧ́сны златы̑ѧ ѡ҆дѣ́ѧннꙋю ᲂу҆кра́шеннꙋю бцⷣꙋ, голꙋби́цꙋ посре́бреннꙋю и҆ позлаще́ннꙋю блеща́нїемъ зла́та, велича́емъ.
Тѧ̀ го́рꙋ бж҃їю ᲂу҆сыре́ннꙋю, въ не́йже бл҃говолѝ бг҃ъ пло́тїю всели́тисѧ, бцⷣе мр҃і́е велича́емъ.
Тебѐ нб҃съ вы́шшꙋю, и҆ на землѝ нб҃о и҆ прⷭ҇то́лъ бы́вшꙋю мт҃рь бж҃їю, всѝ ро́ди велича́емъ.
Серафі́мски приглаша́юще вопїе́мъ тѝ бцⷣе, вѣ́рнїи: тобо́ю возвели́чи гдⷭ҇ь, є҆́юже сотвори́ти съ на́ми. тѣ́мъ тѧ̀ чⷭ҇таѧ, и҆ ѿ тебѐ неискꙋсомꙋ́жнѡ воплоще́ннаго сп҃са, ꙗ҆́кѡ бг҃а всѣ́хъ, пѣ́сньми велича́емъ.
Неизглаго́ланна дв҃ы та́йна: є҆гѡ́же бо не вмѣсти́ша горѣ̀ нбⷭ҇наѧ вели́чєствїѧ, вмѣща́етсѧ во ᲂу҆тро́бꙋ. тѣ́мже соше́дшесѧ ᲂу҆бл҃жа́емъ ю҆̀, и҆ съ вѣ́рою и҆ весе́лїемъ велича́емъ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.