Служба в субботу – всем святым
Стїхи̑ры и҆ канѡ́нъ всѣ̑мъ ст҃ы̑мъ.
Гла́съ ѕ҃.
Подо́бенъ: Всю̀ ѿложи́вше:
Дꙋхо́внїи вѣті́и, ᲂу҆ч҃нцы̀ сп҃сѡвы, дх҃ꙋ ѻ҆рга́ни бы́вше вѣ́рою, разсѣ́ѧшасѧ въ концы̀ землѝ, чⷭ҇тно́е проповѣ́данїе правосла́внѣ сѣ́юще: ѿ ни́хже прозѧбо́ша бж҃е́ственнымъ земледѣ́лїемъ и҆ бл҃года́тїю мч҃нкъ вѡ́инства, стрⷭ҇ть чⷭ҇тнꙋ́ю ѡ҆бразꙋ́юща, многоѡбра́зными раздробле́нїй ра́нами и҆ ѻ҆гне́мъ, и҆ со дерзнове́нїемъ мо́лѧтсѧ ѡ҆ дꙋша́хъ на́шихъ.
Ѻ҆гне́мъ воспалѧ́еми гдⷭ҇ни любвѐ, ѻ҆гнѧ̀ презрѣ́ша, и҆ ꙗ҆́кѡ бж҃е́ственное ᲂу҆́глїе возжига́еми чⷭ҇тні́и мч҃нцы во хрⷭ҇тѣ̀, попали́ша хвра́стное ле́сти шата́нїе: ѕвѣре́й же загради́ша ᲂу҆ста̀, честны́мъ призыва́нїемъ, и҆ во главы̑ ᲂу҆сѣка́еми, посѣко́ша врага̀ всѧ̑ ѡ҆полчє́нїѧ, и҆ крове́й пролива́юще пото́ки терпѣли́внѡ, цр҃ковь напои́ша вѣ́рою просвѣща́емꙋ.
Со ѕвѣрьмѝ бра́вшесѧ, бїе́ми мече́мъ, ногтьмѝ растерза́еми, рꙋка́ми ѿе́млеми, и҆ мꙋ́чими тве́рдїи мч҃нцы, и҆ ѻ҆гне́мъ веще́ственнымъ неща́днѡ пали́ми, и҆ пробода́еми, и҆ соста́вы ссѣца́еми, претерпѣ́ша твердѣ́йше, ᲂу҆покое́нїе предви́дѣша бꙋ́дꙋщее, и҆ нетлѣ̑нныѧ вѣнцы̀, и҆ сла́вꙋ хрⷭ҇та̀: є҆мꙋ́же со дерзнове́нїемъ мо́лѧтсѧ ѡ҆ дꙋша́хъ на́шихъ.
Сла́ва, гла́съ ѕ҃: Мч҃нкъ бж҃е́ственный ли́че, цр҃кве ѡ҆снова́нїе, бл҃говѣ́стїѧ сконча́нїе, вы̀ дѣ́ломъ сп҃сѡва глагѡ́ланїѧ и҆спо́лнисте: ва́ми бо врата̀ а҆́дѡва на цр҃ковь ѿве́рзшаѧсѧ заключи́шасѧ, кро́ве ва́шеѧ ли́тїе, і҆́дѡльскїѧ жє́ртвы и҆зсꙋшѝ, закла́нїе ва́ше породѝ цр҃ко́вное и҆сполне́нїе: безпло́тныхъ ᲂу҆диви́сте, бг҃ꙋ вѣнцено́сцы предстоитѐ. є҆го́же непреста́ннѡ моли́те ѡ҆ дꙋша́хъ на́шихъ.
И҆ ны́нѣ, бг҃оро́диченъ.
Тропа́рьвсѣ̑мъ ст҃ы̑мъ, гла́съ д҃:
И҆̀же во все́мъ мі́рѣ мч҃нкъ твои́хъ, ꙗ҆́кѡ багрѧни́цею и҆ вѵ́ссомъ, кровьмѝ цр҃ковь твоѧ̀ ᲂу҆краси́вшисѧ, тѣ́ми вопїе́тъ тѝ, хрⷭ҇тѐ бж҃е: лю́демъ твои̑мъ щедрѡ́ты твоѧ̑ низпослѝ, ми́ръ жи́тельствꙋ твоемꙋ̀ да́рꙋй, и҆ дꙋша́мъ на́шымъ ве́лїю млⷭ҇ть.
Канѡ́нъ пое́мый къ нбⷭ҇нымъ си́ламъ, и҆ ко всѣ̑мъ ст҃ы̑мъ моле́бный. Творе́нїе господи́на і҆ѡ́сифа, є҆гѡ́же краестро́чїе по а҆лфави́тꙋ. Гла́съ и҃.
Пѣ́снь а҃.
І҆рмо́съ: Колесницегони́телѧ фараѡ́нѧ погрꙋзѝ, чꙋдотворѧ́й и҆ногда̀ мѡѷсе́йскїй же́злъ, крⷭ҇тоѡбра́знѡ порази́въ, и҆ раздѣли́въ мо́ре: і҆и҃лѧ же бѣглеца̀, пѣшехо́дца сп҃сѐ, пѣ́снь бг҃ови воспѣва́юща.
Безнача́льне сло́ве, сщ҃е́нными моле́ньми, херꙋві́мѡвъ, серафі́мѡвъ, власте́й, прⷭ҇то́лѡвъ и҆ бж҃е́ственныхъ си́лъ, а҆́гг҃лѡвъ, а҆рха́гг҃лѡвъ же, нача̑лъ, гдⷭ҇ьствъ, твоѧ̑ млⷭ҇ти бога̑тыѧ да́рꙋй на́мъ, ꙗ҆́кѡ чл҃вѣколю́бецъ.
Помози́ ми гдⷭ҇ень прⷣте́че, хрⷭ҇та̀ молѧ̀, прⷪ҇ро́кѡвъ собо́ръ, а҆пⷭ҇лѡвъ собра́нїе, мч҃нкѡвъ вѡ́инства, всѣ́хъ влⷣкꙋ ᲂу҆моли́те сп҃сти́ мѧ, прегрѣше́ньми мно́гими содержи́маго.
Жєны̀ бж҃е́ствєнныѧ, до́брѣ страда́льчествовавшыѧ, и҆ по́стничествовавшыѧ, і҆ера́рхѡвъ собо́ръ, прпⷣбнїи и҆ првⷣнїи, чⷭ҇тні́и сщ҃енномч҃нцы, бла̑гъ вѣ́чныхъ полꙋчи́ти ᲂу҆моли́те, вѣ́рою ва́съ бл҃жа́щымъ.
Бг҃оро́диченъ: Порабоще́нный сластьмѝ тѣле́сными ᲂу҆́мъ мо́й, влⷣчце и҆ бл҃га́ѧ є҆ди́на, ве́сь свободѝ, и҆ раба̀ и҆́стиннѣйшаго, бл҃ги́ми дѣ́лы, твоегѡ̀ сн҃а мѧ̀ покажѝ, ꙗ҆́кѡ да по до́лгꙋ сла́влю тѧ̀.
Пѣ́снь г҃.
І҆рмо́съ: Оу҆твержде́й въ нача́лѣ нб҃са̀ ра́зꙋмомъ, и҆ зе́млю на вода́хъ ѡ҆снова́вый, на ка́мени мѧ̀ хрⷭ҇тѐ за́повѣдей твои́хъ ᲂу҆твердѝ: ꙗ҆́кѡ нѣ́сть ст҃ъ, па́че тебѐ є҆ди́не чл҃вѣколю́бче.
Ѿ собла̑знъ вра́жїихъ, ѽ серафі́ми, и҆зба́вите мѧ̀, вла̑сти, херꙋві́ми, молю̀: гдⷭ҇ьства же, нача̑ла, и҆ прⷭ҇то́ли, и҆ а҆рха́гг҃ли, со а҆́гг҃лы всѣ́ми, и҆зба́вителѧ ᲂу҆моли́те.
Живота̀ добродѣ́тельнагѡ мнѣ̀ при́снѡ, прⷣте́че хрⷭ҇та̀ ᲂу҆молѝ: прⷪ҇ро́цы, и҆ мч҃нкѡвъ ли́цы, а҆пⷭ҇лѡвъ, сщ҃е́нныхъ і҆ера́рхѡвъ, прпⷣбныхъ же, и҆ сщ҃енномч҃нкѡвъ, сконча́вшихсѧ кро́вїю.
Є҆ѧ́же сподо́бистесѧ сла́досте, и҆ сла́вы непрее́мныѧ страда́льчествовавшыѧ жєны̀ мꙋ́жественнѡ, и҆ по́стничествовавшыѧ свѣ́тлѡ, и҆ врага̀ побѣди́вшыѧ: сеѧ̀ на́мъ бы́ти въ прича́стїи, ᲂу҆моли́те.
Бг҃оро́диченъ: Бг҃обл҃года́тнѣйшаѧ чⷭ҇таѧ, съ го́рними чи́нми, со всѣ́ми мꙋ́дрыми а҆пⷭ҇лы, и҆ мч҃нки сщ҃е́нными, и҆ прⷪ҇ро́ки, ᲂу҆молѝ, ꙗ҆́кѡ да коне́чное разрѣше́нїе грѣхѡ́въ прїи́мемъ.
Сѣда́ленъ,гла́съ и҃.
Подо́бенъ: Премꙋ́дрости сло́во:
Пра́ѻтєцъ, ѻ҆тє́цъ, патрїа̑рхъ, а҆пⷭ҇лъ, и҆ мч҃нкъ, прⷪ҇ро́кѡвъ, ст҃и́телей, и҆ прпⷣбныхъ твои́хъ, по́стникѡвъ и҆ првⷣныхъ же, и҆ всѧ́кагѡ и҆́мене пи́саннагѡ въ кни́зѣ жи́зни, ст҃ꙋ́ю па́мѧть соверша́юще хрⷭ҇тѐ бж҃е, всѣ́хъ подвиза́емъ на мл҃твꙋ молѧ́щесѧ, ᲂу҆мирѝ мі́ръ тво́й тѣ́ми ꙗ҆́кѡ чл҃вѣколю́бецъ, да всѝ вопїе́мъ тѝ: бж҃е прославлѧ́емый въ совѣ́тѣ ст҃ы́хъ твои́хъ, ты̀ є҆сѝ вои́стиннꙋ просла́вивый досто́йнѡ па́мѧть и҆́хъ.
Сла́ва, и҆ ны́нѣ, бг҃оро́диченъ:
Нбⷭ҇нꙋю две́рь и҆ ковче́гъ, прест҃ꙋ́ю го́рꙋ, свѣ́тлый ѻ҆́блакъ воспои́мъ, неѡпали́мꙋю кꙋпинꙋ̀, слове́сный ра́й, є҆́ѵы воззва́нїе, вселе́нныѧ всеѧ̀ вели́кое сокро́вище, ꙗ҆́кѡ сп҃се́нїе въ не́й содѣ́ласѧ мі́рови, и҆ ѡ҆ставле́нїе дре́внихъ согрѣше́нїй. сегѡ̀ ра́ди вопїе́мъ є҆́й: моли́сѧ сн҃ꙋ твоемꙋ̀ прегрѣше́нїй ѡ҆ставле́нїе дарова́ти бл҃гоче́стнѡ покланѧ́ющымсѧ всест҃о́мꙋ ржⷭ҇твꙋ̀ твоемꙋ̀.
Пѣ́снь д҃.
І҆рмо́съ: Ты̀ моѧ̀ крѣ́пость гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а, и҆ на́шꙋ нищетꙋ̀ посѣти́въ. тѣ́мъ съ прⷪ҇ро́комъ а҆ввакꙋ́момъ зовꙋ́ ти: си́лѣ твое́й сла́ва, чл҃вѣколю́бче.
Ви́ждь хрⷭ҇тѐ, и҆ да не пре́зриши мѧ̀, молю́сѧ, грѣхѝ всѧ́кими содержи́маго: но мл҃твами сщ҃е́нныхъ, всѣ́хъ твои́хъ а҆́гг҃лѡвъ, съ мч҃нки, и҆ а҆пⷭ҇лы твои́ми, ᲂу҆ще́дри мѧ̀, сп҃сѝ, и҆ твоегѡ̀ црⷭ҇твїѧ наслѣ́дника мѧ̀ покажѝ, ꙗ҆́кѡ бл҃гоꙋтро́бенъ.
Проповѣ́дниче хрⷭ҇то́въ прⷣте́че, ᲂу҆га́сшїй моегѡ̀ се́рдца свѣти́льникъ ны́нѣ возжзѝ, свѣти́льникъ сл҃нца ᲂу҆́мнагѡ ᲂу҆жѐ бы́вый: и҆ съ прⷪ҇ро́ки молѝ, и҆ всѣ́ми ст҃ы́ми, въ те́пломъ покаѧ́нїи жи́знь прейти́ ми привре́меннꙋю.
Возсїѧ́й мѝ свѣ́тъ покаѧ́нїѧ чл҃вѣколю́бче, хода́тайствы въ преподо́бїи рабо́тавшихъ тебѣ̀ і҆и҃се, сщ҃е́нныхъ же́нъ, і҆ера́рхѡвъ, и҆ мч҃нкѡвъ твои́хъ, проповѣ́дникѡвъ, а҆пⷭ҇лѡвъ, и҆ сщ҃енномч҃нкѡвъ, и҆ полꙋчи́ти сп҃се́нїе сподо́би.
Бг҃оро́диченъ: Є҆ди́на бг҃а воплоти́вшагосѧ ро́ждшаѧ, всест҃а́ѧ, того̀ молѝ, въ де́нь стра́шный всѧ̑ ны̀ сп҃стѝ, и҆ мꙋ́ки и҆зба́вити, живота̀ вѣ́чнагѡ и҆ свѣ́та сподо́бити, и҆ съ си́ми до́брѣ слꙋжи́вшими.
Пѣ́снь є҃.
І҆рмо́съ: Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тьма̀ ѻ҆каѧ́ннаго; но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.
Оу҆́мнїи тѧ̀ си̑лы ны́нѣ ᲂу҆молѧ́ютъ бл҃гоꙋтро́бне гдⷭ҇и, вла̑сти, прⷭ҇то́ли, серафі́ми, гдⷭ҇ьства же, а҆́гг҃ли со а҆рха́гг҃лы, и҆ нача̑ла: млⷭ҇тивъ бꙋ́ди лю́демъ твои̑мъ и҆ сп҃сѝ ꙗ҆́кѡ бл҃гоꙋтро́бенъ.
Странноѡбра́знѡ пожи́вый прⷣте́че бл҃же́нне, стра́нна мѧ̀ сотворѝ всѧ́кагѡ мꙋче́нїѧ, і҆и҃са ᲂу҆молѧ́ѧ чл҃вѣколю́бца, съ прⷪ҇ро́ки бж҃е́ственными, и҆ а҆пⷭ҇лы, і҆ера́рхи, и҆ мч҃нкѡвъ ст҃ы́ми во́инствы.
Твоѧ̑ і҆ера́рхи, и҆ сщ҃енномч҃нки просвѣти́вый гдⷭ҇и, и҆ чⷭ҇тны́хъ же́нъ страда́льчествовавшихъ, бж҃е́ственное сосло́вїе возвели́чивый, тѣ́хъ мл҃твами ᲂу҆ще́дри мѧ̀, вѣ́дый моѧ̑ безмѣ̑рнаѧ прегрѣшє́нїѧ.
Бг҃оро́диченъ: Всест҃а́ѧ дв҃о, сло́во всест҃о́е роди́вшаѧ, дꙋшѝ моеѧ̀ всѧ́кое ᲂу҆ны́нїе и҆ печа́ль ѿженѝ, и҆ бл҃гоꙋспѣ́й мо́й по́мыслъ бж҃е́ствєннаѧ дѣ́ѧти, да вѣ́рою и҆ любо́вїю сла́влю тѧ̀.
Пѣ́снь ѕ҃.
І҆рмо́съ: Ѡ҆чи́сти мѧ̀ сп҃се, мнѡ́га во беззакѡ́нїѧ моѧ̑, и҆ и҆з̾ глꙋбины̀ ѕѡ́лъ возведѝ молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е сп҃се́нїѧ моегѡ̀.
И҆зба́вити мѧ̀ та́мѡ лежа́щїѧ мꙋ́ки, моли́те херꙋві́ми, прⷭ҇то́ли, гдⷭ҇ьства, а҆́гг҃ли, а҆рха́гг҃ли, нача̑ла, и҆ си̑лы, влⷣкꙋ всеѧ̀ тва́ри.
Со а҆пⷭ҇льскими ли́ки, и҆ мч҃нкѡвъ во́инствы, прⷣте́че, проповѣ́дниче хрⷭ҇то́въ, ѡ҆брѣстѝ на́мъ млⷭ҇ть въ ча́съ сꙋда̀, і҆и҃са ᲂу҆молѝ чл҃вѣколю́бца бг҃а на́шего.
Страда́льчествовавшихъ тве́рдѡ же́нъ, ѳе́кла нача́льница, молѝ съ ни́ми, страсте́й ѡ҆мраче́нїѧ, и҆ и҆скꙋше́нїй многоѡбра́зныхъ и҆зба́витисѧ на́мъ.
Бг҃оро́диченъ: Пое́мъ тѧ̀ вѣ́рнїи, бг҃обл҃года́тнѣйшаѧ влⷣчце, препѣ́таго бо бг҃а пло́тїю родила̀ є҆сѝ: є҆го́же ᲂу҆молѝ нескве́рнаѧ, гра́дꙋ и҆ лю́дꙋ твоемꙋ̀ въ ми́рѣ спасти́сѧ.
Конда́къ,гла́съ и҃:
Ꙗ҆́кѡ нача́тки є҆стества̀, насади́телю тва́ри, вселе́ннаѧ прино́ситъ тѝ, гдⷭ҇и, бг҃онѡ́сныѧ мч҃нки. тѣ́хъ мл҃твами въ ми́рѣ глꙋбо́цѣ, цр҃ковь твою̀, жи́тельство твоѐ бцⷣею соблюдѝ, многомлⷭ҇тиве.
І҆́косъ: И҆̀же по все́й землѝ мꙋ́чившїисѧ, и҆ на нб҃са̀ пресели́вшїисѧ, и҆̀же стрⷭ҇ти хрⷭ҇то́вы подража́вшїи, и҆ стра̑сти на́шѧ ѿе́млющїи, здѣ̀ дне́сь собира́ютсѧ, перворожде́нныхъ показꙋ́юще цр҃ковь, ꙗ҆́кѡ го́рнїѧ ѡ҆́бразъ содержа́щꙋ, и҆ хрⷭ҇тꙋ̀ вопїю́щꙋ: бг҃ъ мо́й є҆сѝ ты̀, бцⷣею соблюди́ мѧ многомлⷭ҇тиве.
Пѣ́снь з҃.
І҆рмо́съ: Бж҃їѧ снизхожде́нїѧ ѻ҆́гнь ᲂу҆стыдѣ́сѧ въ вавѷлѡ́нѣ и҆ногда̀, сегѡ̀ ра́ди ѻ҆́троцы въ пещѝ, ра́дованною ного́ю. ꙗ҆́кѡ во цвѣ́тницѣ ликꙋ́юще, поѧ́хꙋ: бл҃гослове́нъ є҆сѝ бж҃е ѻ҆тє́цъ на́шихъ.
Свѣ́та свѣ́ти вторі́и, пе́рвагѡ сꙋ́ще ст҃і́и а҆́гг҃ли, прича́стїемъ невеще́ственнымъ и҆ всебога́тымъ ᲂу҆ѧсни́стесѧ. тѣ́мже зовꙋ̀: ᲂу҆́мъ мо́й просвѣти́те, ѡ҆темне́нный при́снѡ житїѧ̀ страстьмѝ.
Ли́къ бл҃же́нный а҆пⷭ҇лѡвъ мо́литъ тѧ̀, съ бл҃же́ннымъ прⷣте́чею, стрⷭ҇тоте́рпцєвъ и҆ сщ҃е́нныхъ прⷪ҇ро́кѡвъ, і҆ера́рхѡвъ и҆ прпⷣбныхъ, чл҃вѣколю́бче, пре́зри всѣ́хъ на́съ согрѣшє́нїѧ, бл҃гослове́нъ є҆сѝ бж҃е ѻ҆тє́цъ на́шихъ.
Дꙋшѝ моеѧ̀ преложѝ хрⷭ҇тѐ, болѣ́знь, и҆ сїю̀ ᲂу҆ще́дри, сщ҃енномч҃нкѡвъ, і҆ера́рхѡвъ и҆ прпⷣбныхъ твои́хъ хода́тайствы: и҆ да не постыди́ши мѧ̀, є҆гда̀ и҆́мамъ твоемꙋ̀ прⷭ҇то́лꙋ предста́ти: бл҃гослове́нъ є҆сѝ бж҃е ѻ҆тє́цъ на́шихъ.
Бг҃оро́диченъ: Ꙗ҆́кѡ прⷭ҇то́лъ ѻ҆гнезра́чный, цр҃ѧ̀ но́сиши тва́ри: є҆го́же ᲂу҆молѝ дв҃о, со бл҃же́нными и҆ сщ҃е́нными жена́ми, црⷭ҇твїѧ є҆гѡ̀ сподо́бити мѧ̀, пѣсносло́вѧща вѣ́рнѡ предста́тельство твоѐ.
Пѣ́снь и҃.
І҆рмо́съ: Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею, сп҃се́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы бл҃гослови́те, сщ҃е́нницы воспо́йте, лю́дїе превозноси́те во всѧ̑ вѣ́ки.
Ѽ херꙋві́ми ѻ҆гнезра́чнїи, серафі́ми многоѻчи́тїи, прⷭ҇то́ли, вла̑сти, и҆ нача̑ла, и҆ а҆́гг҃ли, и҆ всѝ а҆рха́гг҃ли, и҆ гдⷭ҇ьства сщ҃є́ннаѧ, со бл҃же́ннымъ моли́те прⷣте́чею, прⷪ҇ро́ки, а҆пⷭ҇лы, і҆ера́рхи, прпⷣбными, и҆ всѣ́ми пра́ведными, на́мъ поми́ловатисѧ.
Дади́те на́мъ по́мощь пе́тре, па́ѵле, і҆а́кѡве, и҆ варѳоломе́е, и҆ ѳѡмо̀, и҆ фїлі́ппе, а҆ндре́е, ма́рко съ лꙋко́ю, і҆ѡа́нне дрꙋ́же хрⷭ҇то́въ, сі́мѡне, и҆ і҆ꙋ́до всебл҃же́нне, и҆ преве́лїй матѳе́е, ѡ҆долѣва́ємымъ и҆скꙋше́ньми лестца̀, и҆ недоꙋмѣва́ємымъ.
Со́лнечныхъ свѣтлѣ́йшїй бы́вый сїѧ́нїй стефа́не, пе́рвый страда́льцєвъ, съ си́ми молѝ ѡ҆зари́тисѧ всѣ̑мъ на́мъ, и҆ грѣха̀ и҆збѣжа́ти всѧ́кагѡ мра́ка, вопїю́щымъ влⷣцѣ: сщ҃е́нницы бл҃гослови́те, лю́дїе превозноси́те во всѧ̑ вѣ́ки.
Бг҃оро́диченъ: Послѣ́довати мнѣ̀, всечⷭ҇таѧ, преподо́бнѣ пожи́вшымъ, жи́тельствомъ добродѣ́тельнымъ сотворѝ, врагѝ поража́ющи неща́днѡ мѧ̀ ѡ҆скорблѧ́ющыѧ, и҆ къ плотски̑мъ ползꙋ́щꙋ страсте́мъ непреста́ннѡ стꙋжа́ющыѧ, да ра́дꙋѧсѧ зовꙋ̀: лю́дїе превозноси́те хрⷭ҇та̀ во вѣ́ки.
Пѣ́снь ѳ҃.
І҆рмо́съ: Оу҆жасе́сѧ ѡ҆ се́мъ нб҃о, и҆ землѝ ᲂу҆диви́шасѧ концы̀, ꙗ҆́кѡ бг҃ъ ꙗ҆ви́сѧ человѣ́кѡмъ пло́тски, и҆ чре́во твоѐ бы́сть простра́ннѣйшее нб҃съ: тѣ́мъ тѧ̀ бцⷣꙋ, а҆́гг҃лѡвъ и҆ человѣ̑къ чинонача̑лїѧ велича́ютъ.
Ѽ бж҃е́ственныѧ вла̑сти, и҆ херꙋві́ми, серафі́ми, гдⷭ҇ьства, а҆́гг҃ли, прⷭ҇то́ли, нача̑ла всѧ̑, и҆ си̑лы всесла̑вныѧ, и҆ сщ҃е́ннїи а҆рха́гг҃ли, мл҃твꙋ твори́те къ бг҃ꙋ, до́брѣ на́мъ пожи́ти, и҆ полꙋчи́ти сп҃се́нїе, и҆ ѿ лю́тыхъ и҆зба́витисѧ.
Со всѣ́ми прⷪ҇ро́ки, ꙗ҆́кѡ прⷪ҇ро́къ бы́вый преизѧ́щншїй прⷣте́че, бл҃ги́хъ всѣ́хъ сподо́би и҆ на́съ ѡ҆ѕло́бленныхъ страстьмѝ, и҆ и҆скꙋше́ньми лꙋка́вагѡ при́снѡ содержи́мыхъ, и҆ житїѧ̀ лестьмѝ, ꙗ҆́кѡ да ва́съ вѣ́рою почита́емъ.
Бж҃е́ственнаѧ а҆пⷭ҇лѡвъ всесла́внаѧ двоенадесѧ́тице, съ мч҃нки всѣ́ми, сщ҃еннодѣ́йственники, и҆ сщ҃енномч҃нки, сщ҃е́нными прⷪ҇ро́ки, и҆ бл҃же́нными: прпⷣбныѧ, првⷣныѧ, и҆ тве́рдѡ страда́льчествовавшыѧ жєны̀, ѡ҆ на́съ мл҃твꙋ чл҃вѣколю́бцꙋ сотвори́те.
Бг҃оро́диченъ: Бл҃голюби́ваѧ дв҃о, бл҃га́го молѝ сн҃а твоего̀ и҆ гдⷭ҇а, вы́нꙋ ѡ҆ѕло́бленнꙋю прило́гами дꙋшетли́телѧ ѕмі́ѧ, и҆ и҆знемо́гшꙋю мою̀ дꙋ́шꙋ и҆сцѣли́ти и҆ сп҃стѝ, и҆ всѧ́кими ᲂу҆бл҃жи́ти свѣтоно́сными восхожде́ньми.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.