Служба во вторник – Предтече
Стїхи̑ры, и҆ канѡ́нъ ст҃о́мꙋ і҆ѡа́ннꙋ прⷣте́чи.
Гла́съ в҃. Подо́бенъ: Є҆гда̀ ѿ дре́ва:
Проповѣ́дниче хрⷭ҇то́въ и҆ крⷭ҇ти́телю, а҆́гг҃ле, а҆пⷭ҇ле, мч҃нче, прⷪ҇ро́че, прⷣте́че, свѣ́щниче, дрꙋ́же бли́жнїй, прⷪ҇ро́кѡвъ печа́ть, въ рожде́нныхъ пречестнѣ́йшїй, хода́таю ве́тхїѧ и҆ но́выѧ бл҃года́ти, свѣ́тлый сло́ва гла́се, твои́ми сщ҃е́нными хода́тайствы мл҃твєннаѧ творє́нїѧ къ бг҃ꙋ бл҃гоꙋтро́бномꙋ и҆спра́ви.
Сѐ а҆́гнецъ бж҃їй, и҆́же грѣхѝ мі́ра взе́млѧй: возопи́лъ є҆сѝ прⷣте́че бл҃же́нне, внегда̀ ви́дѣ хрⷭ҇та̀, на землѝ ходѧ́ща. того̀ ᲂу҆́бѡ молѝ, грѣхѡ́въ ѡ҆ставле́нїе дарова́ти тебѐ почита́ющымъ: и҆́маши бо къ немꙋ̀ ве́лїе вои́стиннꙋ дерзнове́нїе крⷭ҇ти́телю, ꙗ҆́кѡ хода́тай зако́на и҆ бл҃года́ти.
Потщи́сѧ и҆ и҆зми́ мѧ ѿ и҆скꙋше́нїй, сла́вный гдⷭ҇ень прⷪ҇ро́че, молю́ ти сѧ. всꙋ́е бо подвиго́шасѧ на мѧ̀ борю́щїи мѧ̀ го́рцыи бѣ́сове, и҆́щꙋщїи похи́тити дꙋ́шꙋ раба̀ твоегѡ̀ ѻ҆каѧ́ннꙋю, ꙗ҆́коже пти́цꙋ, не ѡ҆ста́ви мѧ̀ до конца̀: да разꙋмѣ́ютъ же па́че всебл҃же́нне, ꙗ҆́кѡ ты́ ми є҆сѝ прибѣ́жище.
Сла́ва, и҆ ны́нѣ, бг҃оро́диченъ:
Ꙗ҆́коже сро́дствомъ є҆сте́ственнымъ, и҆ мл҃твеннымъ согла́сїемъ, є҆ди́но вы̀ сꙋ́ще, мт҃и всѣ́хъ цр҃ѧ̀, и҆ бж҃е́ственный прⷣте́че: мольбꙋ̀ сотвори́те вкꙋ́пѣ ѡ҆ рабѣ̀, ѕѣлѡ̀ прогнѣ́вавшемъ бл҃гомлⷭ҇тивнаго, ꙗ҆́кѡ да ᲂу҆ще́дритъ и҆ сп҃се́тъ, ва́шими прекло́ньсѧ хода́тайствы, и҆ ѻ҆́гненнагѡ родства̀ и҆змѣни́тъ мѧ̀.
Тропа́рь,гла́съ в҃.
Па́мѧть првⷣнагѡ съ похвала́ми, тебѣ́ же довлѣ́етъ свидѣ́тельство гдⷭ҇не, прⷣте́че: показа́лъ бо сѧ є҆сѝ вои́стиннꙋ и҆ прⷪ҇ро́кѡвъ чⷭ҇тнѣ́йшїй, ꙗ҆́кѡ и҆ въ стрꙋѧ́хъ крⷭ҇ти́ти сподо́билсѧ є҆сѝ проповѣ́даннаго. тѣ́мже за и҆́стинꙋ пострада́въ ра́дꙋѧсѧ, бл҃говѣсти́лъ є҆сѝ и҆ сꙋ́щымъ во а҆́дѣ, бг҃а ꙗ҆́вльшагосѧ пло́тїю, взе́млющаго грѣ́хъ мі́ра, и҆ подаю́щаго на́мъ ве́лїю млⷭ҇ть.
Канѡ́нъ прⷣте́чи і҆ѡа́ннꙋ, є҆гѡ́же краестро́чїе: Крⷭ҇ти́телю, сїю̀ мл҃твꙋ прїимѝ. Творе́нїе і҆ѡ́сифово. Гла́съ в҃.
Пѣ́снь а҃.
І҆рмо́съ: Во глꙋбинѣ̀ постла̀ и҆ногда̀ фараѡни́тское всево́инство преѡрꙋже́ннаѧ си́ла: вопло́щшеесѧ же сло́во всеѕло́бный грѣ́хъ потреби́ло є҆́сть, препросла́вленный гдⷭ҇ь, сла́внѡ бо просла́висѧ.
Припѣ́въ: Ст҃ы́й вели́кїй і҆ѡа́нне прⷣте́че гдⷭ҇ень, молѝ бг҃а ѡ҆ на́съ.
Крⷭ҇ти́телю и҆ прⷣте́че хрⷭ҇то́въ, погрꙋжа́емый всегда̀ сластьмѝ тѣле́сными ᲂу҆́мъ мо́й ᲂу҆пра́ви, и҆ во́лны страсте́й ᲂу҆кротѝ, ꙗ҆́кѡ да въ тишинѣ̀ бж҃е́ственнѣй бы́въ пѣсносло́влю тѧ̀.
Недоꙋмѣ́ннымъ просвѣти́всѧ просвѣще́нїемъ, ꙗ҆́кѡ многосвѣ́тлаѧ ѕвѣзда̀, мы́сленномꙋ восто́кꙋ предте́клъ є҆сѝ: и҆́мже ѡ҆зари́тисѧ се́рдцꙋ моемꙋ̀, крⷭ҇ти́телю молѝ, ѡ҆мраче́нномꙋ всѣ́ми бѣсо́вскими преложе́нїи.
Въ рѣцѣ̀ бе́зднꙋ и҆ногда̀ всемꙋ́дре погрꙋзи́лъ є҆сѝ, пото́пъ содѣва́ющꙋю бл҃года́тїю, всегѡ̀ престꙋпле́нїѧ: но молю́сѧ, пото́ки бл҃же́нне мои́хъ прегрѣше́нїй и҆зсꙋшѝ, бж҃е́ственнымъ хода́тайствомъ твои́мъ.
Бг҃оро́диченъ: Чⷭ҇тыѧ дв҃ы бг҃а воплоти́вшїѧ сро́дникъ бы́лъ є҆сѝ бл҃же́нне прⷣте́че, съ не́юже тѧ̀ чти́мъ и҆ мо́лимъ, и҆̀же въ бж҃е́ственнѣмъ хра́мѣ твое́мъ ны́нѣ живꙋ́ще, хра́мы и҆ на́съ сотворѝ дх҃а ст҃а́гѡ.
Пѣ́снь г҃.
І҆рмо́съ: На ка́мени мѧ̀ вѣ́ры ᲂу҆тверди́въ, разшири́лъ є҆сѝ ᲂу҆ста̀ моѧ̑ на врагѝ моѧ̑, возвесели́ бо сѧ дꙋ́хъ мо́й, внегда̀ пѣ́ти: нѣ́сть ст҃ъ, ꙗ҆́коже бг҃ъ на́шъ, и҆ нѣ́сть првⷣнъ, па́че тебѐ гдⷭ҇и.
И҆сцѣлѝ стрꙋ́пы дꙋшѝ моеѧ̀, ᲂу҆́мъ мо́й ѡ҆мраче́нный небреже́нїемъ, ѡ҆зарѝ бж҃е́ственнымъ твои́мъ хода́тайствомъ гдⷭ҇ень прⷣте́че: и҆ всѧ́кагѡ и҆зба́ви мѧ̀ сопроти́внагѡ ѡ҆бстоѧ́нїѧ, молю́сѧ.
Непло́дствїе разрѣши́лъ є҆сѝ ро́ждшїѧ, роди́всѧ бж҃їимъ промышле́нїемъ премꙋ́дре прⷪ҇ро́че: непло́дное ᲂу҆́бѡ се́рдце моѐ плодоно́сно ны́нѣ содѣ́лай гдⷭ҇ень прⷣте́че хода́тайствомъ твои́мъ, добродѣ́телей приноси́ти прозѧбє́нїѧ.
И҆́же любо́вїю твое́ю созида́ющаго бж҃е́ственный до́мъ, вы́шнѧгѡ житїѧ̀ ᲂу҆лꙋчи́ти молѝ, вѣ́рою хра́мꙋ твоемꙋ̀ слꙋжа́щыѧ, хра́мы дх҃а бж҃е́ственнагѡ сотворѝ, крⷭ҇ти́телю и҆ прⷣте́че, хода́тайствы твои́ми.
Бг҃оро́диченъ: Веселѧ́шесѧ прⷣте́ча въ ложесна́хъ носи́мь мт҃рнихъ, и҆ покланѧ́шесѧ гдⷭ҇ꙋ носи́мꙋ въ ложесна́хъ твои́хъ бг҃обл҃года́тнаѧ, є҆го́же молѝ ѿ всѧ́кїѧ ско́рби и҆зба́вити мѧ̀.
Сѣда́ленъ,гла́съ в҃. Подо́бенъ: Бл҃гоꙋтро́бїѧ сꙋ́щи: Бл҃гоꙋтро́бїѧ ра́ди млⷭ҇ти бл҃же, сп҃стѝ твоѐ созда́нїе хрⷭ҇тѐ прише́лъ є҆сѝ, прекло́нь нб҃са̀ схожде́нїемъ твои́мъ. тѣ́мже, стра́шное смотре́нїе твоѐ пою́ще, вопїе́мъ тѝ: мольба́ми прⷣте́чи твоегѡ̀, ѡ҆чище́нїе грѣхѡ́въ пода́ждь на́мъ, ꙗ҆́кѡ є҆ди́нъ бл҃гоꙋтро́бенъ.
Сла́ва, и҆ ны́нѣ, бг҃оро́диченъ:
Предста́тельнице те́плаѧ хрⷭ҇тїа́нѡмъ, сн҃ꙋ твоемꙋ̀ моли́сѧ при́снѡ бцⷣе, всѧ́кагѡ ѕлодѣ́йства и҆ ѡ҆горче́нїѧ и҆зба́вити на́съ борца̀, и҆ да́ти на́мъ проще́нїе, въ ни́хже согрѣши́хомъ, за млⷭ҇рдїе щедро́тъ, твои́ми мл҃твами мт҃и дв҃о.
Пѣ́снь д҃.
І҆рмо́съ: Прише́лъ є҆сѝ ѿ дв҃ы не хода́тай, ни а҆́гг҃лъ, но са́мъ гдⷭ҇и вопло́щьсѧ, и҆ спа́слъ є҆сѝ всего́ мѧ человѣ́ка. тѣ́мъ зовꙋ́ ти: сла́ва си́лѣ твое́й гдⷭ҇и.
Прекло́ньшемꙋ нб҃са̀, и҆ человѣ́кѡмъ бесѣ́довавшꙋ, главꙋ̀ преклони́лъ є҆сѝ, десни́цею твое́ю пребога́те: є҆́юже мѧ̀ соблюдѝ, во смире́нїи сохранѧ́ѧ се́рдце моѐ.
Пꙋсты́нѧ тебѐ граждани́на непрохо́днаѧ и҆мѧ́ше, бл҃же́нне прⷣте́че. тѣ́мже вопїю́ ти: пꙋ́стꙋ всѧ́кагѡ бж҃е́ственнагѡ дѣѧ́нїѧ бы́вшꙋ, дꙋ́шꙋ мою̀ снабдѝ.
Зако́нъ бж҃е́ственный ᲂу҆правлѧ́ѧ, беззако́ннѡ закла́нъ бы́лъ є҆сѝ. тѣ́мже молю́сѧ тебѣ̀, беззако́ннꙋюща мѧ̀ всегда̀, и҆ прельща́ема бѣсо́вскими прельще́ньми и҆спра́ви.
Созда́въ са́мъ себѐ хра́мъ влⷣцѣ цр҃ю̀, къ бж҃е́ствєннымъ селе́нїємъ ны́нѣ преше́лъ є҆сѝ прⷣте́че: и҆́хже полꙋчи́ти молѝ тебѣ̀ прест҃ы́й до́мъ воздви́гшаго.
Бг҃оро́диченъ: При́зри на мѧ̀ недꙋ́гꙋющаго всенепоро́чнаѧ, и҆ разрѣшѝ стра̑сти моѧ̑ лю̑тыѧ, и҆ неꙋдо́бь и҆сцѣ̑льныѧ: ꙗ҆́кѡ да велича́ю тѧ̀, возвели́чившꙋю всѐ человѣ́чество.
Пѣ́снь є҃.
І҆рмо́съ: Просвѣще́нїе во тьмѣ̀ лежа́щихъ, сп҃се́нїе ѿча́ѧнныхъ, хрⷭ҇тѐ сп҃се мо́й, къ тебѣ̀ ᲂу҆́тренюю цр҃ю̀ ми́ра, просвѣти́ мѧ сїѧ́нїемъ твои́мъ: и҆но́гѡ бо ра́звѣ тебѐ бг҃а не зна́ю.
Въ тече́нїихъ і҆ѻрда́нскихъ, стрꙋю̀ нетлѣ́нїѧ прⷣте́че, крⷭ҇ти́въ хрⷭ҇та̀, молѝ и҆стека̑нїѧ страсте́й мои́хъ и҆зсꙋши́ти, и҆ пото́ки сла́дѡстныѧ наслѣ́довати, и҆ првⷣныхъ кра́снагѡ ра́дованїѧ.
Оу҆жѐ рыда́ю и҆ содрога́юсѧ, стра́хомъ и҆ недоꙋмѣ́нїемъ всегда̀ содержи́мь є҆́смь, помышлѧ́ѧ моѧ̑ содѣ̑ѧннаѧ, и҆ бꙋ́дꙋщїй сꙋ́дъ ᲂу҆жа́сный. бл҃гоꙋтро́бне гдⷭ҇и, пощади́ мѧ, твоегѡ̀ крⷭ҇ти́телѧ мольба́ми.
Законополага́ѧй лю́демъ сп҃се́нїе въ раска́ѧнїи, прⷣте́че, прегрѣше́нїй бы́вшее, посредѣ̀ зако́на и҆ бл҃года́ти ста́лъ є҆сѝ. сегѡ̀ ра́ди мо́лимъ тѧ̀, ѡ҆бразмѝ покаѧ́нїѧ на́съ просвѣтѝ.
Да́ждь мѝ вре́мѧ покаѧ́нїѧ, ᲂу҆ны́ннѡ преше́дшее, всѐ и҆жди́вшемꙋ, бл҃годѣ́телю, и҆мѣ́ѧ на сїѐ молѧ́щаго тѧ̀, сло́ве, і҆ѡа́нна вели́каго прⷣте́чꙋ, и҆ покаѧ́нїю всемі́рнаго проповѣ́дника.
Бг҃оро́диченъ: Навѣ́ты и҆ ловлє́нїи льсти́вагѡ ᲂу҆мертви́хсѧ, влⷣчце всенепоро́чнаѧ ѡ҆живи́ мѧ, ꙗ҆́же ро́ждшаѧ живо́тъ всѣ́хъ бцⷣе ѵ҆поста́сный, да тѧ̀ пою̀ бл҃гоче́стнѡ всенепоро́чнꙋю.
Пѣ́снь ѕ҃.
І҆рмо́съ: Въ бе́зднѣ грѣхо́внѣй валѧ́ѧсѧ, неизслѣ́днꙋю млⷭ҇рдїѧ твоегѡ̀ призыва́ю бе́зднꙋ: ѿ тлѝ бж҃е мѧ̀ возведѝ.
Гла́съ сло́ва проповѣ́давый, всѣ́хъ гла́сы воспрїе́мъ, просѝ грѣхѡ́въ проще́нїе дарова́ти, и҆̀же вѣ́рою пою́щымъ тѧ̀.
Сокрꙋше́нїе дꙋшѝ моеѧ̀ и҆сцѣлѝ, и҆ грѣхѡ́въ бре́мѧ разрѣшѝ, и҆ па́че наде́жди сп҃си́ мѧ, мл҃твами твои́ми бл҃же́нне прⷣте́че.
І҆и҃са, є҆го́же рꙋко́ю твое́ю крⷭ҇ти́лъ є҆сѝ прⷣте́че, молѝ, рꙋки́ мѧ и҆зба́вити грѣха̀, взима́юща къ немꙋ̀ рꙋ́цѣ при́снѡ всесла́вне.
Бг҃оро́диченъ: Дрема́нїемъ лѣ́ностнымъ ѡ҆держи́мь є҆́смь, со́нъ грѣхо́вный тѧготи́тъ се́рдце моѐ: твои́мъ пречⷭ҇таѧ, бдѣ́ннымъ хода́тайствомъ воздви́гни и҆ сп҃си́ мѧ.
Конда́къ,гла́съ г҃.
Подо́бенъ: Дв҃а дне́сь:
Пре́жде непло́ды дне́сь хрⷭ҇то́ва прⷣте́чꙋ ражда́етъ, и҆ то́й є҆́сть и҆сполне́нїе всѧ́кагѡ проро́чества: є҆го́же бо прⷪ҇ро́цы проповѣ́даша, на сего̀ во і҆ѻрда́нѣ рꙋ́кꙋ положи́въ, ꙗ҆ви́сѧ бж҃їѧ сло́ва прⷪ҇ро́къ и҆ проповѣ́дникъ, вкꙋ́пѣ и҆ прⷣте́ча.
І҆́косъ: Восхва́лимъ ны́нѣ гдⷭ҇нѧ прⷣте́чꙋ, є҆го́же сщ҃е́нникꙋ є҆лїсаве́тъ родѝ, и҆з̾ ложе́снъ непло́дныхъ, но не без̾ сѣ́мене: хрⷭ҇то́съ бо є҆ди́нъ вмѣсти́лище про́йде непроходи́мо без̾ сѣ́мене. і҆ѡа́нна непло́ды родѝ, без̾ мꙋ́жа же сего̀ не родѝ: і҆и҃са же, ѡ҆сѣне́нїемъ ѻ҆ц҃а̀ и҆ дх҃а бж҃їѧ, дв҃а родѝ чⷭ҇таѧ. но безсѣ́менномꙋ ꙗ҆ви́сѧ ѿ непло́дове прⷪ҇ро́къ и҆ проповѣ́дникъ, вкꙋ́пѣ и҆ прⷣте́ча.
Пѣ́снь з҃.
І҆рмо́съ: Бг҃опроти́вное велѣ́нїе беззако́ннꙋющагѡ мꙋчи́телѧ, высо́къ пла́мень вознесло̀ є҆́сть: хрⷭ҇то́съ же прострѐ бг҃очести̑вымъ ѻ҆трокѡ́мъ ро́сꙋ дх҃о́внꙋю, сы́й бл҃гослове́нъ и҆ препросла́вленъ.
И҆з̾ ко́рене сѣки́рою твоегѡ̀ покаѧ́нїѧ и҆сто́ргъ ꙗ҆́звы стра́стнагѡ се́рдца моегѡ̀, всадѝ прⷣте́че бж҃е́ственное безстра́стїе, и҆ стра́хъ чⷭ҇тѣ́йшїй бж҃їй, всѧ́кїѧ ѕло́бы ѿчꙋжда́ющїй мѧ̀.
Во стрꙋѧ́хъ і҆ѻрда́нскихъ ꙗ҆́кѡ крⷭ҇ти́лъ є҆сѝ покрыва́ющаго вода́ми превы́спрєннѧѧ гдⷭ҇а, того̀ молѝ, во́дꙋ дарова́ти бж҃е́ственнагѡ ᲂу҆миле́нїѧ при́снѡ ѻ҆чи́ма мои́ма, сла́вный прⷣте́че.
И҆́же мі́рꙋ взе́млющаго грѣ́хъ, а҆́гнца бж҃їѧ прⷣте́че проповѣ́давъ, того̀ молѝ ѿ ко́злищъ ча́сти ꙗ҆ви́ти мѧ̀ чꙋ́жда, и҆ десны̑мъ є҆гѡ̀ ѻ҆вца́мъ и҆ менѐ сочета́ти, сла́вне.
Бг҃оро́диченъ: Непло́днаѧ ᲂу҆тро́ба носѧ́ше тѧ̀ дв҃о, во чре́вѣ носи́вшꙋю сло́во воплоще́нно: є҆го́же бж҃е́ственными взыгра́нїи, вели́кїй прⷣте́ча, непло́дныѧ всест҃ы́й пло́дъ, позна̀ ра́дꙋѧсѧ, и҆ поклони́сѧ.
Пѣ́снь и҃.
І҆рмо́съ: Пе́щь и҆ногда̀ ѻ҆́гненнаѧ въ вавѷлѡ́нѣ дѣ̑йства раздѣлѧ́ше, бж҃їимъ велѣ́нїемъ халдє́и ѡ҆палѧ́ющаѧ: вѣ̑рныѧ же ѡ҆роша́ющаѧ, пою́щыѧ: бл҃гослови́те всѧ̑ дѣла̀ гдⷭ҇нѧ гдⷭ҇а.
Да́ждь десни́цꙋ мнѣ̀ на землѝ лежа́щемꙋ, прⷣте́че, и҆́же десни́цꙋ просте́ръ, и҆ ѡ҆мы́лъ є҆сѝ вода́ми нескве́рнаго: и҆ и҆зба́ви мѧ̀ скве́рны тѣле́сныѧ, всего́ мѧ ѡ҆чища́ѧ покаѧ́нїемъ, и҆ сп҃си́ мѧ.
И҆мꙋ́щи дꙋшѐ вре́мѧ пока́ѧтисѧ, лѣ́ности тѧжча́йшїй со́нъ ѿтрѧсѝ, и҆ спѣ́шнѡ побдѝ, вопїю́щи влⷣцѣ твоемꙋ̀: млⷭ҇рде, ᲂу҆ще́дри мѧ̀ крⷭ҇ти́телѧ твоегѡ̀ мольба́ми.
Пото́цы страсте́й, и҆ во́ды ѕло́бы до дꙋшѝ моеѧ̀ внидо́ша: бл҃же́нне прⷣте́че, потщи́сѧ ско́рѡ и҆з̾ѧ́ти мѧ̀, и҆́же рѣчны́ми стрꙋѧ́ми и҆змы́въ безстра́стїѧ тиша́йшꙋю пꙋчи́нꙋ.
Оу҆вы̀ мнѣ̀, мнѡ́га ѕла̑ сотво́ршемꙋ! ᲂу҆вы̀ мнѣ̀ є҆ди́номꙋ, прогнѣ́вавшемꙋ бг҃а пребл҃га́го! крⷭ҇ти́телю хрⷭ҇то́въ помозѝ мѝ, и҆ пода́ждь прегрѣше́нїй мои́хъ разрѣше́нїе, и҆ долгѡ́въ мои́хъ ѿсѣче́нїе, хода́тайствы твои́ми.
Бг҃оро́диченъ: Вы́шнѧго бг҃а пло́тїю ро́ждшаѧ, ѿ гно́ѧ мѧ̀ возста́ви страсте́й ѡ҆скорблѧ́ющихъ мѧ̀: и҆ лю́тѣ всего̀ ѡ҆бнища́вша, бж҃е́ственными ѡ҆богатѝ пречⷭ҇таѧ, добродѣ́тельми, ꙗ҆́кѡ да воспою́ тѧ сп҃са́емь.
Пѣ́снь ѳ҃.
І҆рмо́съ: Безнача́льна роди́телѧ сн҃ъ, бг҃ъ и҆ гдⷭ҇ь, вопло́щьсѧ ѿ дв҃ы, на́мъ ꙗ҆ви́сѧ, ѡ҆мрачє́ннаѧ просвѣти́ти, собра́ти расточє́ннаѧ. тѣ́мъ всепѣ́тꙋю бцⷣꙋ велича́емъ.
Ка́ла мѧ̀ и҆зба́ви грѣхо́внагѡ гдⷭ҇и, безгрѣ́шне є҆ди́не и҆ многомлⷭ҇тиве, крⷭ҇ти́телѧ мольба́ми, и҆́же тебѐ проповѣ́да всемꙋ̀ мі́рꙋ а҆́гнца бж҃їѧ, взе́млющаго человѣ́кѡвъ грѣхѝ.
Ꙗ҆́кѡ ши́покъ бл҃гово́ненъ, ꙗ҆́кѡ бл҃гоꙋха́нный кѷпарі́съ, ꙗ҆́кѡ неꙋвѧда́емый крі́нъ, ꙗ҆́кѡ мѵ́ро че́стно и҆мѣ́ѧй тѧ̀ гдⷭ҇ень прⷣте́че, мои́хъ дѣ́лъ ѕлосмра́дїѧ и҆збавлѧ́юсѧ мл҃твами твои́ми, притека́ѧ къ покро́вꙋ твоемꙋ̀.
Непло́дствовати мѧ̀ непло́дными дѣ́лы всебл҃же́нне сотворѝ, добродѣ́телей бл҃гопло́дїе при́снѡ приносѧ́ща, ча́до мѧ̀ гдⷭ҇не творѧ̀, и҆ прича́стника бж҃е́ственномꙋ црⷭ҇твїю, и҆ ст҃ы́хъ собо́рꙋ кꙋпножи́телѧ.
На́мъ лю́бѧщымъ тѧ̀, и҆ любо́вїю почита́ющымъ, и҆ въ бж҃е́ственнѣмъ хра́мѣ твое́мъ ликꙋ́ющымъ, да́ждь съ нб҃сѐ разрѣше́нїе лю́тыхъ, прⷣте́че гдⷭ҇ень, и҆ житїѧ̀ и҆справле́нїе, и҆ прегрѣше́нїй и҆збавле́нїе.
Бг҃оро́диченъ: Носи́мꙋ во ᲂу҆тро́бѣ бг҃омт҃рни, и҆́же всѧ̑ носѧ́щемꙋ ма́нїемъ, поклони́лсѧ є҆сѝ прⷪ҇ро́че: съ не́юже молѝ смире́ннѣй сп҃сти́сѧ дꙋшѝ мое́й, во мнѡ́гаѧ впа́дающей по всѧ̑ дни̑ согрѣшє́нїѧ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.