Служба в понедельник – Бесплотным
Стїхи̑ры и҆ канѡ́нъ безплѡ́тнымъ.
Гла́съ а҃.
Подо́бенъ: Всехва́льнїи мч҃нцы:
Безпло́тнїи а҆́гг҃ли, бж҃їю престо́лꙋ предстоѧ́щїи, и҆ ѿѻнꙋ́дными свѣтлостьмѝ ѡ҆блистава́еми, и҆ свѣтоли́тїи вѣ́чнѡ сїѧ́юще, и҆ свѣ́ти быва́юще вторі́и: хрⷭ҇тꙋ̀ моли́тесѧ, дарова́ти дꙋша́мъ на́шымъ ми́ръ, и҆ ве́лїю млⷭ҇ть.
Безсме́ртнїи а҆́гг҃ли, живо́тъ вои́стиннꙋ неги́блемый ѿ пе́рвагѡ прїе́мше живота̀ всебога́тїи, присносꙋ́щныѧ сла́вы, и҆ честні́и зри́телїе премꙋ́дрости вѣ́чныѧ бы́сте, свѣ́та и҆сполнѧ́еми, и҆ свѣщѝ соѡбраща́еми, прили́чнѡ показꙋ́еми.
А҆рха́гг҃ли, а҆́гг҃ли, нача̑ла, прⷭ҇то́ли, гдⷭ҇ьствїѧ, серафі́ми шестокрила́тїи, и҆ многоѻчи́тїи херꙋві́ми, бж҃е́ственнїи премꙋ́дрости ѻ҆рга́ни, си̑лы, вла̑сти бж҃е́ственнѣйшїи: хрⷭ҇тꙋ̀ моли́тесѧ, дарова́ти дꙋша́мъ на́шымъ ми́ръ, и҆ ве́лїю млⷭ҇ть.
Сла́ва, и҆ ны́нѣ, бг҃оро́диченъ:
Чи́стое бж҃їе жили́ще бы́вши чⷭ҇таѧ, съ безпло́тными моли́сѧ, чи́стѣ соверши́ти мѝ пꙋ́ть жите́йскїй ꙗ҆́кѡ да не предвари́тъ ве́черъ сме́ртный негото́ва, и҆ ѿсле́тъ мѧ̀ въ пла́мень ѻ҆́гненный мꙋ́читисѧ. но ты́ мѧ ѿ сегѡ̀ и҆схитѝ.
Тропа́рь,гла́съ д҃:
Нбⷭ҇ныхъ во́инствъ а҆рхїстрати́зи, мо́лимъ ва́съ при́снѡ мы̀ недосто́йнїи, да ва́шими мл҃твами ѡ҆градитѐ на́съ кро́вомъ кри́лъ невеще́ственныѧ ва́шеѧ сла́вы, сохранѧ́юще ны̀ припа́дающыѧ прилѣ́жнѡ, и҆ вопїю́щыѧ: ѿ бѣ́дъ и҆зба́вите ны̀, ꙗ҆́кѡ чинонача́льницы вы́шнихъ си́лъ.
Канѡ́нъ, гла́съ и҃, є҆гѡ́же краегране́сїе сицево̀: Да торжествꙋ́емъ бг҃омꙋ́дрїи похвалꙋ̀ собо́рꙋ безпло́тныхъ. І҆ѡ́сифово творе́нїе.
Пѣ́снь а҃.
І҆рмо́съ: Пѣ́снь возсле́мъ лю́дїе чꙋ́дномꙋ бг҃ꙋ на́шемꙋ, свободи́вшемꙋ і҆и҃лѧ ѿ рабо́ты, пѣ́снь побѣ́днꙋю пою́ще, и҆ вопїю́ще: пои́мъ тебѣ̀ є҆ди́номꙋ влⷣцѣ.
Припѣ́въ: Ст҃і́и а҆рха́гг҃ли и҆ а҆́гг҃ли моли́те бг҃а ѡ҆ на́съ.
Всѝ воспои́мъ лю́дїе, всѧ̑ направлѧ́ющꙋю невеще́ствєнныѧ ли́ки вы́шнѧгѡ чинонача́лїѧ, трⷪ҇цꙋ несозда́ннꙋю, пою́ще: ст҃ъ, ст҃ъ, ст҃ъ є҆сѝ бж҃е вседержи́телю.
Положи́лъ є҆сѝ тва́рємъ нача́токъ, сꙋщество̀ безпло́тное, тво́рче а҆́гг҃лѡвъ, пречⷭ҇тый тво́й прⷭ҇то́лъ ѡ҆крꙋжа́ющѧ, зва́ти тѝ: ст҃ъ, ст҃ъ, ст҃ъ є҆сѝ бж҃е вседержи́телю.
Ра́дꙋйсѧ гаврїи́ле, бж҃їѧ воплоще́нїѧ возвѣсти́телю, мїхаи́ле же, чинѡ́въ невеще́ственныхъ предста́телю, непреста́ннѡ зовꙋ́ще: ст҃ъ, ст҃ъ, ст҃ъ є҆сѝ бж҃е вседержи́телю.
Бг҃оро́диченъ: Трепе́щꙋ та́инства хрⷭ҇тѐ, твоегѡ̀ схожде́нїѧ, ꙗ҆́кѡ и҆́же є҆стество́мъ бг҃ъ, прїѧ́лъ є҆сѝ ѿ дв҃ы роди́тисѧ ꙗ҆́кѡ человѣ́къ, да сп҃се́ши мі́ръ ѿ рабо́ты сопроти́внагѡ.
Пѣ́снь г҃.
І҆рмо́съ: Стра́хъ тво́й гдⷭ҇и, всадѝ въ сердца̀ ра̑бъ твои́хъ, и҆ бꙋ́ди на́мъ ᲂу҆твержде́нїе, тѧ̀ во и҆́стинѣ призыва́ющихъ.
Крѣ́постїю ᲂу҆ста́вилъ є҆сѝ безсме́ртне си̑льныѧ, соверша́ющыѧ прест҃о́е твоѐ хотѣ́нїе, тебѣ̀ въ вы́шнихъ всегда̀ предстоѧ́щыѧ.
Хода́таи твоегѡ̀ вочл҃вѣ́ченїѧ, и҆ честна́гѡ воста́нїѧ, а҆́гг҃льскїѧ чинонача́льники хрⷭ҇тѐ, за ны̀ прїимѝ молѧ́щыѧсѧ.
А҆́гг҃лы приста́вилъ є҆сѝ храни́тели человѣ́кѡмъ, ꙗ҆́кѡ бл҃гоꙋтро́бенъ, слꙋжи́тели же показа́лъ є҆сѝ хрⷭ҇тѐ сп҃се́нїѧ, твои̑мъ ᲂу҆го́дникѡмъ.
Бг҃оро́диченъ: Неизрече́ннѡ ро́ждши бг҃оневѣ́сто сп҃са и҆ гдⷭ҇а, и҆зба́вльшаго на́съ ѿ тлѝ, тѧ̀ вои́стиннꙋ призыва́ющихъ.
Сѣда́ленъ,гла́съ и҃.
Подо́бенъ: Повелѣ́нное:
Нбⷭ҇ныхъ нача́льниче, и҆ первостоѧ́телю высокопресто́льныхъ, и҆ стра́шныхъ бж҃е́ственныѧ сла́вы, мїхаи́ле а҆рхїстрати́же, а҆́гг҃лѡмъ чинонача́льниче, со всѣ́ми безпло́тными, є҆мꙋ́же слꙋ́жиши влⷣцѣ, ѡ҆ все́мъ мі́рѣ непреста́ннѡ моли́сѧ, и҆ и҆спросѝ ѡ҆ставле́нїе грѣхѡ́въ, и҆ млⷭ҇ть и҆ бл҃года́ть ѡ҆брѣстѝ въ де́нь сꙋ́дный.
Сла́ва, и҆ ны́нѣ, бг҃оро́диченъ:
Въ пꙋчи́нꙋ лю́тѣ впа́дъ ᲂу҆ны́нїѧ, ѿ мно́жества лꙋка́выхъ и҆ беззако́нныхъ мѝ дѣ́лъ, прїидо́хъ въ недоꙋмѣ́нїе, и҆ ѿча́ѧнїемъ ны́нѣ ѡ҆держꙋ́сѧ. влⷣчце бцⷣе, ты́ мѧ сп҃сѝ, ты́ ми помозѝ: грѣ́шныхъ бо ты̀ є҆сѝ ѡ҆чище́нїе, и҆ чистота̀ сп҃си́тельнаѧ.
Крⷭ҇тобг҃оро́диченъ: Ѿ чи́стыхъ крове́й твои́хъ вопло́щшасѧ, и҆ па́че ᲂу҆ма̀ и҆з̾ тебѐ чⷭ҇таѧ ро́ждшагосѧ, на дре́вѣ ви́сѧща посредѣ̀ ѕлодѣ̑ю зрѧ́щи, ᲂу҆тро́бою болѣ́зновала є҆сѝ, и҆ мт҃рски пла́чꙋщи вопїѧ́ла є҆сѝ: ᲂу҆вы̀ мнѣ̀ ча́до моѐ, что̀ є҆́сть бж҃е́ственное и҆ неизрече́нное смотре́нїе твоѐ, и҆́мже ѡ҆животвори́лъ є҆сѝ созда́нїе твоѐ; пою̀ твоѐ млⷭ҇рдїе.
Пѣ́снь д҃.
І҆рмо́съ: Всѣ́лъ є҆сѝ на ко́ни, а҆пⷭ҇лы твоѧ̑ гдⷭ҇и, и҆ прїѧ́лъ є҆сѝ рꙋка́ма твои́ма ᲂу҆зды̑ и҆́хъ, и҆ сп҃се́нїе бы́сть ѣ҆жде́нїе твоѐ, вѣ́рнѡ пою́щымъ: сла́ва си́лѣ твое́й гдⷭ҇и.
Всѣ́лъ є҆сѝ на а҆́гг҃лы, ꙗ҆́коже на ко́ни чл҃вѣколю́бче, и҆ прїѧ́тъ рꙋко́ю твое́ю вожда̀ и҆́хъ, и҆ сп҃се́нїе бы́сть ѣ҆жде́нїе твоѐ, вѣ́рнѡ тѝ вопїю́щымъ: сла́ва си́лѣ твое́й гдⷭ҇и.
Покрыва́етъ а҆́гг҃лы добродѣ́тель твоѧ̀ безсме́ртне, и҆ зємны́ѧ и҆сполнѧ́етъ концы̀ твоегѡ̀ сла́внагѡ безнача́льне, бж҃е́ственнагѡ хвале́нїѧ, съ ни́миже тебѣ̀ вопїе́мъ: сла́ва си́лѣ твое́й гдⷭ҇и.
И҆зше́лъ є҆сѝ ще́дре, на сп҃се́нїе лю́демъ твои̑мъ хрⷭ҇тѐ, созыва́еши же дрꙋ́ги си̑лы твоѧ̑: и҆ весе́лїе бы́сть во сп҃се́нїи твое́мъ безвє́щнымъ, вопїю́щымъ: сла́ва си́лѣ твое́й гдⷭ҇и.
Бг҃оро́диченъ: Дв҃а и҆ мт҃и па́че є҆стества̀ ꙗ҆ви́ласѧ є҆сѝ пречⷭ҇таѧ, ꙗ҆́кѡ бг҃а того́же и҆ человѣ́ка хрⷭ҇та̀ родила̀ є҆сѝ, ѿ а҆́гг҃лъ хвали́маго, люде́й твои́хъ печа́ль преложѝ на ра́дость, мл҃твами твои́ми.
Пѣ́снь є҃.
І҆рмо́съ: Ѿ но́щи невѣ́дѣнїѧ бг҃овѣ́дѣнїемъ просвѣти́вый концы̀, просвѣти́ мѧ ᲂу҆́тромъ чл҃вѣколю́бїѧ твоегѡ̀, гдⷭ҇и.
Невозвра́тнымъ жела́нїемъ всегда̀ къ высотѣ̀ хрⷭ҇тѐ носи́ми, кра́йнее всѣ́хъ жела́нїе, а҆́гг҃льскїѧ си̑лы непреста́ннѡ сла́вѧтъ.
Ты̀ разꙋ̑мныѧ по сꙋществꙋ̀, нетлѣ̑нныѧ бл҃года́тїю твое́ю хрⷭ҇тѐ, поста́вилъ є҆сѝ пѣвцы̀ твоемꙋ̀ вели́чествїю, а҆́гг҃лы твоѧ̑ по ѡ҆́бразꙋ содѣ́лавъ непостижи́ме.
Ты̀ непреклѡ́нны на гѡ́ршаѧ, къ тебѣ̀ приближе́нїемъ хрⷭ҇тѐ, сохрани́лъ є҆сѝ твоѧ̑ слꙋги̑: и҆сто́чникъ бо бл҃гости ты̀ є҆сѝ бл҃готворѧ̀ досто́йнѡ тѝ слꙋжа́щымъ.
Бг҃оро́диченъ: Оу҆мерщвле́ннꙋю мою̀ дꙋ́шꙋ страстьмѝ ме́рзкими, всенепоро́чнаѧ ѡ҆живѝ, животꙋ̀ храни́телѧ ро́ждши, и҆ къ стезѣ̀ вѣ́чнѣй и҆ бл҃же́нномꙋ житїю̀ ᲂу҆стремѝ.
Пѣ́снь ѕ҃.
І҆рмо́съ: І҆ѡ́нꙋ въ ки́тѣ гдⷭ҇и, є҆ди́наго всели́лъ є҆сѝ: мене́ же свѧ́заннаго мре́жами вра́жїими, ꙗ҆́кѡ ѿ тлѝ ѻ҆́наго, сп҃сѝ.
Бг҃олѣ́пнѡ ѿ несꙋщества̀ гдⷭ҇и, сло́вомъ приве́лъ є҆сѝ сꙋщества̀ нбⷭ҇ныхъ, безсме́ртне, во́инствъ, свѣтови́дны си́хъ содѣ́ловаѧ.
Слꙋжи́телїе честні́и бж҃їѧ хвале́нїѧ бы́сте безпло́тнїи, гра́ждане нбⷭ҇нїи, и҆ бж҃е́ственнаѧ вои́стиннꙋ ски́нїѧ, творцꙋ̀ досто́йнѡ слꙋжа́ще.
Бг҃оро́диченъ: Всепѣ́таѧ, свѣ́та поро́ждши, всѣ̑мъ свѣ́тъ даю́щаго, тьмꙋ̀ мои́хъ прегрѣше́нїй чⷭ҇таѧ, ѿженѝ мт҃рними твои́ми къ немꙋ̀ мл҃твами.
Конда́къ,гла́съ в҃:
А҆рхїстрати́зи бж҃їи, слꙋжи́телїе бж҃е́ственныѧ сла́вы, а҆́гг҃лѡвъ нача̑льницы, и҆ человѣ́кѡвъ наста̑вницы, поле́зное на́мъ проси́те и҆ ве́лїю млⷭ҇ть, ꙗ҆́кѡ безпло́тныхъ а҆рхїстрати́зи.
І҆́косъ: Ре́клъ є҆сѝ чл҃вѣколю́бче, въ писа́нїихъ твои́хъ, мно́жествꙋ ра́доватисѧ а҆́гг҃лъ ѡ҆ человѣ́цѣ є҆ди́номъ ка́ющемсѧ, безсме́ртне: тѣ́мъ и҆ мы̀ въ беззако́нїихъ сꙋ́ще, безгрѣ́шне є҆ди́не сердцевѣ́дче, тѧ̀ моли́ти всегда̀ дерза́емъ ꙗ҆́кѡ бл҃гоꙋтро́бнаго, ᲂу҆ще́дрити на́съ, и҆ посла́ти недостѡ́йнымъ ᲂу҆миле́нїе влⷣко, и҆ пода́ти на́мъ проще́нїе грѣхѡ́въ: ѡ҆ всѣ́хъ бо на́съ мо́лѧтсѧ тебѣ̀, ꙗ҆́кѡ безпло́тныхъ а҆рхїстрати́зи.
Пѣ́снь з҃.
І҆рмо́съ: Ѻ҆́троцы є҆вре́йстїи въ пещѝ попра́ша пла́мень дерзнове́ннѡ, и҆ на ро́сꙋ ѻ҆́гнь преложи́ша, вопїю́ще: бл҃гослове́нъ є҆сѝ гдⷭ҇и бж҃е во вѣ́ки.
Свѣ́ты ꙗ҆ви́лъ є҆сѝ ще́дре, а҆́гг҃лъ твои́хъ невеще́ственное сꙋщество̀ неизрече́ннагѡ свѣ́та и҆сполнѧ́емы, непреста́ннѡ зовꙋ́щыѧ: бл҃гослове́нъ є҆сѝ гдⷭ҇и бж҃е во вѣ́ки.
Є҆мꙋ́же предстоѧ́тъ непреста́ннѡ слꙋжа́ще тьмы̑ а҆́гг҃льскїѧ, лица́ же зрѣ́ти не терпѧ́тъ бж҃ества̀, бл҃гослове́нъ є҆сѝ зовꙋ́ще, бж҃е во вѣ́ки.
Сло́вомъ твои́мъ ѵ҆поста́снымъ гдⷭ҇и, а҆́гг҃льское є҆стество̀ содѣ́лалъ є҆сѝ, ѡ҆ст҃и́въ же бж҃е́ственнымъ дх҃омъ, трⷪ҇цꙋ бг҃осло́вити наꙋчи́лъ є҆сѝ бж҃е во вѣ́ки.
Трⷪ҇ченъ: Трѝ ᲂу҆́бѡ зрѧ́ще сꙋ́щыѧ ѵ҆поста̑си, неѡпи́санное сла́вимъ сꙋщество̀, ѻ҆ц҃а̀ и҆ сло́ва со дх҃омъ, вопїю́ще: бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ.
Пѣ́снь и҃.
І҆рмо́съ: На горѣ̀ ст҃ѣ́й просла́вльшасѧ, и҆ въ кꙋпинѣ̀ ѻ҆гне́мъ приснодв҃ы мѡѷсе́ови та́йнꙋ ꙗ҆́вльшаго, гдⷭ҇а по́йте, и҆ превозноси́те во всѧ̑ вѣ́ки.
А҆́гг҃льскомꙋ поревнꙋ́емъ житїю̀, и҆ ра́зꙋмъ впери́мъ къ высотѣ̀, и҆ съ ни́ми невеще́ственнѡ воспое́мъ гдⷭ҇а, и҆ превозно́симъ во вѣ́ки.
Лико́вствєнницы ли́ка нбⷭ҇нагѡ, и҆̀же прⷭ҇то́лъ ѡ҆бстоѧ́ще сла́вы, ѡ҆ бз҃ѣ всегда̀ ѡ҆браща́еми а҆́гг҃ли, пою́тъ и҆ славосло́вѧтъ во всѧ̑ вѣ́ки.
Невеще́ственна ѻ҆гнѧ̀ творѧ́щей пла́мы, на высотѣ̀ непреста́ннѡ слꙋжа́щихъ, и҆ а҆́гг҃лы дꙋ́хи ꙗ҆влѧ́ющей, трⷪ҇цѣ покланѧ́емсѧ, и҆ славосло́вимъ во всѧ̑ вѣ́ки.
Бг҃оро́диченъ: И҆́же во ᲂу҆тро́бꙋ все́льшасѧ дв҃ы, и҆ ѿ сеѧ̀ стра́ннѡ и҆ вы́ше сло́ва, дре́внѧго а҆да́ма назда́вша, гдⷭ҇а пое́мъ и҆ славосло́вимъ во вѣ́ки.
Пѣ́снь ѳ҃.
І҆рмо́съ: Оу҆ста́вы прешла̀ є҆сѝ є҆стества̀, содѣ́телѧ заче́нши и҆ гдⷭ҇а, и҆ две́рь сп҃се́нїѧ мі́рови была̀ є҆сѝ. тѣ́мъ тѧ̀ бцⷣе непреста́ннѡ велича́емъ.
Тѧ̀ неизрече́ннѡ совокꙋпи́вшаго нбⷭ҇нымъ хрⷭ҇тѐ земна̑ѧ, и҆ є҆ди́нꙋ цр҃ковь соверши́вша а҆́гг҃лѡмъ и҆ человѣ́кѡмъ, непреста́ннѡ велича́емъ.
А҆́гг҃ли и҆ а҆рха́гг҃ли, прⷭ҇то́ли, вла̑сти же и҆ гдⷭ҇ьствїѧ, нача̑ла и҆ си̑лы, и҆ херꙋві́ми, и҆ серафі́ми, съ бцⷣею ѡ҆ мі́рѣ моли́тесѧ.
Трⷪ҇ченъ: Тѧ̀ трⷪ҇це сла́вимъ, ѿ небытїѧ̀ всѧ̑ сотвори́вшꙋю, и҆ чи́ны а҆́гг҃льскїѧ ᲂу҆краси́вшꙋю, и҆ бж҃е́ственными зарѧ́ми просвѣти́вшꙋю концы̀.
Бг҃оро́диченъ: Ра́дꙋйсѧ ст҃а́ѧ бг҃оневѣ́сто, ра́дꙋйсѧ, свѣ́тъ мі́рови ро́ждши вѣ̑рнымъ, ра́дꙋйсѧ стѣно̀ и҆ покро́ве всѣ́хъ на́съ: бг҃а ꙗ҆́кѡ бл҃года́телѧ, за ны̀ непреста́ннѡ молѝ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.